1, 2. (a) Wetin bɔku pipul dɛn fil se nɔ pɔsibul? Wetin di Baybul mek wi biliv tranga wan? (b) Udat Ebraam bin gɛt tayt padi biznɛs wit? Wetin mek?

AW YU go fil if di Wan we mek di ɛvin ɛn dis wɔl tɔk se yu na in padi? Bɔku pipul dɛn fil se dat nɔ pɔsibul. Dɛn kin wɔnda aw ɔdinari mɔtalman go bi padi to Jiova Gɔd. Bɔt di Baybul mek wi biliv tranga wan se i rili pɔsibul fɔ lɛ wi kam nia Gɔd.

² Ebraam we bin de trade trade bin gɛt dis kayn padi biznɛs wit Gɔd. Jiova bin se Ebraam na “mi padi.” (Ayzaya 41:​8) Fɔ tru, Jiova bin de si Ebraam as in tayt padi. Ebraam bin “put fet pan Jiova,” so na dat mek i bin gɛt tayt padi biznɛs wit am. (Jems 2:​23) Tide bak, Jiova de luk fɔ we dɛn fɔ “put in at to” di wan dɛn we de sav am bikɔs dɛn lɛk am. (Ditarɔnɔmi 10:​15) In Wɔd, di Baybul, ɛnkɔrej wi se: “Una kam nia Gɔd, ɛn insɛf go kam nia una.” (Jems 4:​8) We wi rid dɛn wɔd dɛn ya wi de si se Jiova de kɔl wi ɛn prɔmis wi.

3. Wetin Jiova de kɔl wi fɔ? Wetin i prɔmis wi?

³ Jiova de kɔl wi fɔ kam nia am. I dɔn gri ɛn i rɛdi fɔ lɛ wi bi in padi dɛn. Dɔn bak, i dɔn prɔmis wi se if wi go nia am, insɛf go kam nia wi. We dat apin, wi go gɛt sɔntin we rili valyu we na “tayt padi” biznɛs wit Jiova. (Sam 25:​14, NWT) “Tayt padi” na sɔmbɔdi we wi kin tɛl wi sikrit.—Emɔs 3:​7, NWT.

4. Udat yu go se na tayt padi? Aw Jiova dɔn sho se in na tayt padi to di wan dɛn we de kam nia am?

⁴ Yu gɛt tayt padi we yu kin tɛl yu sikrit? Da kayn padi  de na pɔsin we bisin bɔt yu. Yu abop pan am bikɔs i dɔn sho se i nɔ de kɔmɔt biɛn yu. Yu kin gladi mɔ we yu de tɛl am bɔt tin dɛn we de mek yu gladi. Di tin dɛn we kin mek yu at pwɛl nɔ kin mɔna yu tumɔs bikɔs i de tek tɛm lisin to yu. Pan ɔl we i kin tan lɛk se ɔda pipul dɛn nɔ de ɔndastand yu, in kin ɔndastand yu. Semweso, we yu kam nia Gɔd, yu go gɛt spɛshal Padi we rili valyu yu, we rili bisin bɔt yu, ɛn we rili de ɔndastand yu. (Sam 103:​14; 1 Pita 5:​7) Yu kin tɛl am yu bɛlɛ-wɔd, bikɔs yu biliv se i nɔ de kɔmɔt biɛn di wan dɛn we de biɛn am. (Sam 18:​25) Bɔt di wangren rizin we mek wi gɛt di ɔnɔ fɔ gɛt dis kayn tayt padi biznɛs wit Gɔd na bikɔs i dɔn mek am pɔsibul.

5. Wetin Jiova du fɔ mek am pɔsibul fɔ lɛ wi kam nia am?

⁵ Wi na sina dɛn, so if Gɔd nɔ ɛp wi, wi nɔ go ɛva ebul fɔ go nia am. (Sam 5:​4) Di apɔsul Pɔl bin rayt se: “Bɔt Gɔd sho se i lɛk wi we i mek Krays day fɔ wi di tɛm we wi na sina dɛn.” (Romans 5:​8) Fɔ tru, Jiova bin arenj fɔ lɛ Jizɔs “gi in layf as prayz fɔ fri bɔku pipul dɛn.” (Matyu 20:​28) Di fet we wi gɛt pan dis day we Jizɔs day de mek am pɔsibul fɔ lɛ wi kam nia Gɔd. Bikɔs na Gɔd “fɔs lɛk wi,” dat dɔn opin di we fɔ lɛ wi bi in padi.—1 Jɔn 4:​19.

6, 7. (a) Aw wi no se Jiova nɔto Gɔd we ayd we wi nɔ go ebul fɔ no bɔt? (b) Us we dɛn Jiova dɔn sho insɛf to wi?

⁶ Jiova dɔn du ɔda tin: I dɔn sho insɛf to wi. Padi biznɛs go tayt we yu rili no di pɔsin, valyu in kwaliti dɛn ɛn di we aw i de du tin. So if Jiova bin ayd ɔ in na Gɔd we pɔsin nɔ de ebul fɔ no, wi nɔ fɔ bin ɛva ebul fɔ kam nia am. Bɔt Jiova nɔ ayd, i want lɛ wi no am.  (Ayzaya 45:​19) Infakt, di tin dɛn we i de sho wi bɔt insɛf na fɔ ɔlman, ivin to wi we pipul dɛn na di wɔl nɔ tek mek natin.—Matyu 11:​25.

⁷ Aw Jiova dɔn sho insɛf to wi? Di tin dɛn we i mek de sho wi sɔm pan in kwaliti dɛn, lɛk di bɔku bɔku pawa we i gɛt, in pasmak sɛns, ɛn in lɔv we nɔ de dɔn. (Romans 1:​20) Nɔto di tin dɛn nɔmɔ we Jiova mek i de yuz fɔ sho insɛf to wi. Jiova de tich pas ɛni ɔda pɔsin, so i mek dɛn rayt ɔl wetin i want mɔtalman fɔ no bɔt am na in Wɔd, di Baybul.

8. Wetin mek wi se di Baybul insɛf sɛf de sho se Jiova lɛk wi?

⁸ Di Baybul insɛf sɛf de sho se Jiova lɛk wi. Insay in Wɔd, i sho insɛf to wi di kayn we we wi go ebul fɔ ɔndastand, we nɔ jɔs de sho se i lɛk wi bɔt i want lɛ wi no am ɛn lɛk am. Di tin dɛn we wi de rid na di Baybul de mek wi si Jiova “in gudnɛs” ɛn mek wi want fɔ kam nia am. (Sam 27:​4) Lɛ wi tɔk bɔt sɔm fayn we dɛn we Jiova dɔn sho insɛf to wi insay in Wɔd.

9. Wetin na sɔm kwaliti dɛn we di Baybul sho se Gɔd gɛt?

⁹ Di Baybul gɛt bɔku wɔd dɛn we de sho Gɔd in kwaliti dɛn. Dis na sɔm ɛgzampul dɛn. “Jiova lɛk fɔ du tin tret.” (Sam 37:​28, NWT) Gɔd gɛt “pawa pasmak.” (Job 37:​23, NWT) Jiova “nɔ de kɔmɔt biɛn pɔsin.” (Rɛvɛleshɔn 15:​3, 4; 16:​5) I “sabi ɔltin.” (Job 9:​4) In na Gɔd we “gud ɛn de sho masi, we nɔ gɛt shɔtat, we in lɔv nɔ de fel, ɛn PAPA GƆD we pɔsin kin put in op ɛn trɔs pan.” (Ɛksodɔs 34:​6) “Yu na gud PAPA GƆD [“Jiova,” NWT] ɛn yu de fɔgiv.” (Sam 86:​5) Ɛn jɔs lɛk aw wi bin dɔn tɔk na di fɔs chapta, wan kwaliti de  we impɔtant pas dɛn ɔl. Di Baybul se: “Gɔd na lɔv.” (1 Jɔn 4:​8) We yu de tink bɔt dɛn fayn fayn kwaliti dɛn ya, yu de fil fɔ kam nia dis Gɔd we in kayn nɔ de, nɔto so?

10, 11. (a) Wetin Jiova dɔn put insay in Wɔd, di Baybul, fɔ lɛ wi si in kwaliti dɛn klia klia wan? (b) Us ɛgzampul na di Baybul go ɛp wi fɔ imajin aw Gɔd de sho in pawa?

¹⁰ Jiova nɔ jɔs tɛl wi bɔt di kwaliti dɛn we i gɛt. Bɔt insay in Wɔd, di Baybul, i sho wi aw i dɔn yuz dɛn kwaliti dɛn ya we i de dil wit pipul dɛn. Dɛn ɛgzampul dɛn ya de ɛp wi fɔ imajin di difrɛn kwaliti dɛn we Jiova gɛt klia klia wan. Ɛn dat de ɛp wi fɔ kam nia am. Lɛ wi tɔk bɔt wan ɛgzampul.

¹¹ Fɔ rid se Gɔd gɛt “pawa bad bad wan” na wan tin. (Ayzaya 40:​26) Bɔt na difrɛn tin fɔ rid bɔt aw i mek di Izrɛlayt dɛn pas midul di Rɛd Si ɛn aw i kia fɔ dɛn fɔ 40 ia na di wildanɛs. Yu kin imajin we di wata de sheb midul. Yu kin imajin di neshɔn, we na bin lɛk 3,000,000 pipul dɛn, de waka na di dray grɔn na di si, di wata we bin dɔn stif bin tinap lɛk big big wɔl dɛn ɔl tu say. (Ɛksodɔs 14:​21; 15:​8) Yu kin si aw Gɔd protɛkt ɛn kia fɔ dɛn na di wildanɛs. Wata kɔmɔt insay rɔk. Wan it we fiba wayt sid bin de apia na grɔn. (Ɛksodɔs 16:​31; Di Nɔmba Dɛm 20:​11) Jiova bin de sho se i nɔ jɔs gɛt pawa, bɔt i de yuz am fɔ ɛp in pipul dɛn. Yu nɔ tink  se i fayn we wi prea dɛn de go ɔp to pawaful Gɔd we ‘tan lɛk ples fɔ ayd ɛn we kin gi wi trɛnk ɛn rɛdi fɔ ɛp wi ɛnitɛm we wi gɛt prɔblɛm’?—Sam 46:​1, NWT.

12. Aw Jiova de ɛp wi fɔ “si” am di kayn we we wi go ɔndastand?

¹² Jiova dɔn du ɔda tin fɔ ɛp wi fɔ no am, pan ɔl we in na spirit. As mɔtalman, nɔto ɔltin wi de si; so wi nɔ de si spirit dɛn. If Gɔd ɛksplen insɛf to wi di we aw na spirit dɛn nɔmɔ de ɔndastand, i go jɔs tan lɛk we yu de tray fɔ ɛksplen yu yay in kɔlɔ ɔ di spɔt spɔt dɛn na yu bɔdi to pɔsin we dɛn bɔn blayn. Bifo dat, Jiova de ɛp wi fɔ “si” am di kayn we we wi go ɔndastand. Sɔntɛnde, i de yuz ɛgzampul dɛn fɔ kɔmpia insɛf to tin dɛn we wi sabi. I kin ivin tɔk bɔt insɛf se i gɛt sɔm pat dɛn we wi gɛt na wi bɔdi. *

13. Wetin Ayzaya 40:​11 (NWT) de mek wi imajin? Aw dat de afɛkt yu?

¹³ Notis wetin di Baybul tɔk bɔt Jiova na Ayzaya 40:​11 (NWT): “Jɔs lɛk shɛpad, i go kia fɔ in ship dɛn. I go gɛda di ship pikin dɛn wit in an, ɛn i go ol dɛn nia in chɛst.” Insay dis vas, di Baybul kɔmpia Jiova to shɛpad we de tek in ship pikin dɛn wit “in an.” Dis de sho se Gɔd ebul fɔ protɛkt ɛn sɔpɔt in pipul dɛn, ivin di wan dɛn we nɔ ebul protɛkt dɛnsɛf. Wi kin fil sef we wi de na in strɔng an, bikɔs if wi nɔ kɔmɔt biɛn am, i nɔ go ɛva lɛf wi. (Romans 8:​38, 39) Di Gret Shɛpad de ol di ship pikin dɛn “nia in chɛst,” we na di pat pan di klos we fol fol, usay sɔntɛnde shɛpad dɛn bin de put  yɔŋbebi ship. Dis mek wi shɔ se Jiova valyu wi, ɛn i de kia fɔ wi fayn fayn wan. Dat de mek wi want fɔ kam nia am.

14. Wetin mek wi se Jiova yuz Jizɔs fɔ rili sho wi udat I bi?

¹⁴ Insay di Baybul, Jiova yuz in Pikin we i lɛk, Jizɔs, fɔ rili sho wi udat i bi. Nɔbɔdi nɔ go ebul fɔ sho aw Gɔd de tink ɛn fil ɔ ɛksplen bɔt Gɔd klia wan pas Jizɔs. Afta ɔl, Jizɔs bin dɔn de wit in Papa bifo I mek di ɔda enjɛl dɛn ɛn di wan ol wɔl. (Koloshians 1:​15) Jizɔs bin sabi Jiova gud gud wan. Na dat mek i bin se: “Nɔbɔdi nɔ no di Pikin pas di Papa, ɛn nɔbɔdi nɔ no di Papa pas di Pikin, ɛn nɔbɔdi nɔ go ebul fɔ no di Papa pas di Pikin rɛdi fɔ tich am bɔt di Papa.” (Lyuk 10:​22) We Jizɔs bin de na di wɔl as mɔtalman, i yuz tu impɔtant we dɛn fɔ sho wi in Papa.

15, 16. Us tu we dɛn Jizɔs bin sho wi udat na in Papa?

 ¹⁵ Fɔs, Jizɔs in tichin dɛn ɛp wi fɔ no in Papa. Di wɔd dɛn we Jizɔs yuz fɔ tɔk bɔt Jiova kin rili tɔch wi at. Fɔ ɛgzampul, we Jizɔs bin de ɛksplen di sɔri-at we Gɔd gɛt, i bin kɔmpia Jiova to wan papa we rili want fɔ fɔgiv in pikin we west in prɔpati. We di papa si in pikin de kam bak, i rɔn go mit am ɛn kis am. (Lyuk 15:​11-24) Jizɔs bin se Jiova na Gɔd we de “briŋ” pipul dɛn we want fɔ du wetin rayt kam nia am bikɔs i lɛk dɛn. (Jɔn 6:​44) I ivin no we wan smɔl sparo fɔdɔm na grɔn. Jizɔs bin se: “Una nɔ fred, una valyu pas bɔku sparo dɛn.” (Matyu 10:​29, 31) Wi go mɔs want fɔ go nia dis kayn Gɔd we bisin bɔt wi.

¹⁶ Sɛkɔn, Jizɔs in ɛgzampul de sho wi aw Jiova tan. Jizɔs bin so fiba in Papa dat i bin tɔk se: “Ɛnibɔdi we dɔn si mi dɔn si di Papa.” (Jɔn 14:​9) So we wi rid di Gɔspɛl dɛn bɔt Jizɔs ɛn si di we aw i bin de du tin ɛn trit pipul dɛn, i jɔs tan lɛk se na in Papa wi de si. No we nɔ de we Jiova bin fɔ dɔn sho in kwaliti dɛn to wi pas dis. Wetin mek?

17. Wetin Jiova dɔn du fɔ ɛp wi fɔ ɔndastand udat i bi? Gi ɛgzampul.

¹⁷ Fɔ ɛgzampul, imajin se yu de tray fɔ ɛksplen wetin na gudnɛs. Sɔntɛm yu go yuz wɔd dɛn fɔ ɛksplen am. Bɔt if yu si usay pɔsin de du gud ɛn se “Na dis na gudnɛs,” di pɔsin go rili no wetin na gudnɛs, ɛn i go izi fɔ am fɔ ɔndastand. Jiova dɔn du di sem tin fɔ ɛp wi fɔ ɔndastand udat i bi. Jiova nɔ jɔs yuz wɔd dɛn fɔ ɛksplen udat i bi, bɔt i mek in Pikin kam na dis wɔl fɔ bi ɛgzampul fɔ lɛ wi no udat I bi. We yu wach di tin dɛn we Jizɔs bin de du, yu go si Gɔd in kwaliti dɛn. Insay di Gɔspɛl dɛn, i jɔs tan lɛk se Jiova de se: “Na so  a de.” Wetin di Baybul tɔk bɔt Jizɔs we i bin de na dis wɔl?

18. Aw Jizɔs bin sho kwaliti dɛn lɛk pawa, sɛns, ɛn fɔ du tin tret?

¹⁸ Jizɔs bin sho di 4 men kwaliti dɛn we Gɔd gɛt. I bin gɛt pawa fɔ mɛn sik dɛn, fɔ fid pipul dɛn we angri, ɛn fɔ ivin gi layf bak to di wan dɛn we dɔn day. Jizɔs nɔ bin tan lɛk pipul dɛn we jɔs bisin bɔt dɛnsɛf ɛn we nɔ de yuz dɛn pawa di rayt we. I nɔ ɛva yuz di pawa we i gɛt fɔ bɛnifit insɛf ɔ fɔ du bad tin to ɔda pipul dɛn. (Matyu 4:​2-4) I bin lɛk fɔ du tin tret. I bin de vɛks we i si dɛn wikɛd biznɛsman dɛn de kruk pipul dɛn. (Matyu 21:​12, 13) I bin de trit po pipul dɛn ɛn di wan dɛn we dɛn nɔ bin de tek mek ɛnitin di sem we aw i bin de trit ɔda pipul dɛn, ɛn dis bin de mek dɛn “fil fayn.” (Matyu 11:​4, 5, 28-30) Di sɛns we bin de insay Jizɔs in tichin, in kayn nɔ de. Infakt, Jizɔs bin “pas Sɔlɔmɔn.” (Matyu 12:​42) Bɔt Jizɔs nɔ bin de sho-ɔf wit di sɛns we i bin gɛt. Di wɔd dɛn we i bin de tɔk bin de tɔch di kɔmɔn pipul dɛn at, bikɔs in tichin dɛn bin klia, simpul, ɛn i bin de bɛnifit pipul dɛn.

19, 20. (a) Aw Jizɔs bin sɛt fayn ɛgzampul we i kam pan lɔv? (b) Wetin wi fɔ de mɛmba as wi de rid ɛn tink bɔt Jizɔs in ɛgzampul?

¹⁹ Jizɔs bin sɛt fayn ɛgzampul we i kam pan lɔv. We i bin de prich, i bin de sho lɔv difrɛn difrɛn we dɛn. Fɔ ɛgzampul, i bin de fil pen fɔ pipul dɛn, ɛn i bin want fɔ ɛp dɛn. I nɔ bin ebul fɔ si we ɔda pipul dɛn de sɔfa ɛn nɔ fil sɔri fɔ dɛn. Dis sɔri-at bin de mek i de du sɔntin fɔ ɛp pipul dɛn bɔku bɔku tɛm. (Matyu 14:​14) Pan ɔl we Jizɔs bin de mɛn di wan dɛn we sik ɛn fid di wan dɛn we angri, i bin de sho sɔri-at wan we we impɔtant pas dɛn we dɛn ya. I bin de ɛp ɔda pipul dɛn fɔ no, biliv, ɛn lɛk di trut bɔt Gɔd in Kiŋdɔm, we go bɛnifit pipul dɛn  sote go. (Mak 6:​34; Lyuk 4:​43) Wetin pas ɔl na dat, Jizɔs sho se i lɛk wi, ɛn i nɔ jɔs bisin bɔt insɛf bay we i gri fɔ gi in layf fɔ ɔda pipul dɛn.—Jɔn 15:​13.

²⁰ No wɔnda we ɔlkayn pipul dɛn bin de go nia dis man we bin rili lɛk pipul dɛn ɛn gɛt sɔri-at! (Mak 10:​13-16) As wi de rid ɛn tink bɔt Jizɔs in ɛgzampul, lɛ wi de mɛmba se na in Papa wi de si klia wan.—Ibruz 1:​3.

21, 22. Wetin i min fɔ luk fɔ Jiova? Wetin dis buk gɛt we go ɛp wi fɔ du dat?

²¹ We Jiova sho insɛf klia wan to wi na in Wɔd, i mek wi no gud gud wan se i want wi fɔ kam nia am. Bɔt i nɔ de fos wi fɔ bi in padi. I lɛf to wi fɔ luk fɔ am “di tɛm we mɔtalman kin ebul fɛn am.” (Ayzaya 55:​6) Fɔ luk fɔ Jiova min fɔ no in kwaliti dɛn ɛn di we aw i de du tin jɔs lɛk aw i dɔn tɛl wi na di Baybul. Dɛn mek dis buk we yu de rid so fɔ ɛp yu fɔ du dis.

²² Yu go notis se dɛn sheb dis buk to 4 sɛkshɔn dɛn we de tɔk bɔt Jiova in 4 men kwaliti dɛn, dat na pawa, jɔstis, sɛns, ɛn lɔv. Di fɔs pat na ɛni sɛkshɔn de tɔk smɔl  tin bɔt di kwaliti. Sɔm chapta dɛn ɔnda di sɛkshɔn tɔk bɔt aw Jiova de sho di kwaliti difrɛn difrɛn we dɛn. Dɔn ɛni sɛkshɔn gɛt wan chapta we de sho aw Jizɔs sho da kwaliti de, ɛn i gɛt wan chapta bak we de sho aw wi go sho da kwaliti de.

23, 24. (a) Ɛksplen aw fɔ yuz di spɛshal bɔks we gɛt di taytul “Kwɛstyɔn dɛn fɔ Tink Bɔt.” (b) We wi tink gud gud wan, aw dat go ɛp wi fɔ kam nia Gɔd?

²³ Dis chapta ɛn ɔl di ɔda chapta dɛn we de afta am gɛt wan spɛshal bɔks we gɛt di taytul “Kwɛstyɔn dɛn fɔ Tink Bɔt.” Fɔ ɛgzampul, luk di bɔks we de na pej 24. Di skripchɔ dɛn ɛn di kwɛstyɔn dɛn we de de nɔto fɔ rivyu di chapta. Bɔt na fɔ ɛp wi fɔ tink bɔt ɔda impɔtant tin dɛn bɔt da tɔpik de. Aw yu go yuz dis bɔks gud gud wan? Tek tɛm rid ɔl di skripchɔ dɛn fayn fayn wan. Dɔn luk di kwɛstyɔn we de afta di skripchɔ. Tink gud gud wan bɔt di ansa dɛn. Sɔntɛm yu kin du risach. Aks yusɛf ɔda kwɛstyɔn dɛn lɛk: ‘Wetin dis de tɛl mi bɔt Jiova? Aw i de afɛkt mi layf? Aw a go yuz am fɔ ɛp ɔda pipul dɛn?’

²⁴ We wi tek tɛm tink gud wan bɔt wetin wi rid, dat go ɛp wi fɔ kam nia Jiova mɔ ɛn mɔ. Wetin mek? Di Baybul mek wi no se na insay di at wi de tink gud wan. (Sam 19:​14, NWT) We wi tink gud gud wan bɔt wetin wi de lan bɔt Gɔd, di tin we wi tink bɔt de go rayt insay wi at, ɛn i de afɛkt di we aw wi de tink, fil, ɛn mek wi du sɔntin. Wi go lɛk Gɔd mɔ ɛn mɔ, ɛn da lɔv de go mek wi want fɔ du tin we go pliz wi bɛst Padi. (1 Jɔn 5:​3) Fɔ lɛ wi gɛt dis kayn padi biznɛs wit Jiova, wi fɔ no in kwaliti dɛn ɛn aw i de du tin. Bɔt fɔs, lɛ wi tɔk bɔt sɔntin we go mek wi rili want fɔ kam nia Gɔd, dat na di oli we i oli.