1. Uskayn dawt we bɔku pipul dɛn ɛn ivin sɔm tru Kristian dɛn gɛt?

YU TINK se Jiova Gɔd lɛk yu? Sɔm pipul dɛn kin gri se Gɔd lɛk mɔtalman, lɛk aw Jɔn 3:​16 se. Bɔt dɛn kin se: ‘Gɔd nɔ go ɛva lɛk mi.’ Ivin tru Kristian dɛnsɛf kin dawt wan wan tɛm if Gɔd lɛk dɛn. Wan man we in at pwɛl bin tɔk se: “I nɔ rili izi fɔ lɛ a biliv se Gɔd bisin bɔt mi.” Fɔ se yusɛf kin gɛt da kayn dawt de sɔntɛnde?

2, 3. Udat want lɛ wi biliv se wi nɔ gɛt wan valyu na Jiova in yay ɛn i nɔ lɛk wi? Wetin go ɛp wi nɔ fɔ tink da we de?

² Setan want lɛ wi rili biliv se Jiova Gɔd nɔ lɛk wi ɛn i nɔ valyu wi. Na tru se we pɔsin prawd, Setan kin yuz dat fɔ mek di pɔsin du wetin bad. (2 Kɔrintians 11:​3) Bɔt i kin gladi bak fɔ mek di wan dɛn we wik lɔs di rɛspɛkt we dɛn gɛt fɔ dɛnsɛf. (Jɔn 7:​47-49; 8:​13, 44) Dis de apin mɔ insay di “las dez” we tin tranga. Bɔku pipul dɛn mɛn na famili dɛn usay di wan dɛn we de de “nɔ . . . lɛk dɛn kɔmpin mɔtalman.” Ɔda pipul dɛn kin de arawnd pipul dɛn we wayl, we jɔs bisin bɔt dɛnsɛf, ɛn we trangayes. (2 Timoti 3:​1-5) Ɛn we dɛn dɔn trit dɛn bad, dɛn nɔ lɛk dɛn bikɔs ɔf dɛn kɔlɔ, ɔ dɛn et dɛn fɔ lɔng tɛm, dat dɔn mek dɛn biliv se dɛn nɔ gɛt wan valyu ɔ pɔsin nɔ go ebul fɔ lɛk dɛn.

³ If yu de fil dis kayn we, lɛ dat nɔ mek yu at pwɛl. Wan wan tɛm, bɔku pan wi kin kɔndɛm wisɛf. Bɔt mɛmba se Gɔd in Wɔd de fɔ “sɛtul tin dɛn di rayt we” ɛn fɔ “chenj tin dɛn we rili rili strɔng.” (2 Timoti 3:​16; 2 Kɔrintians 10:​4) Di Baybul se: “Wi go gi wisɛf kɔnfidɛns bifo am ilɛk wetin wi at go kɔndɛm wi pan, bikɔs Gɔd pas wi at  ɛn i no ɔltin.” (1 Jɔn 3:​19, 20) Lɛ wi tɔk bɔt 4 we dɛn we di Skripchɔ dɛn ‘gi wi kɔnfidɛns’ se Jiova lɛk wi.

4, 5. Aw di ɛgzampul we Jizɔs gi bɔt di sparo sho se wi gɛt valyu na Jiova in yay?

⁴ Fɔs, di Baybul de tich klia wan se Jiova valyu ɔl in savant dɛn. Fɔ ɛgzampul, Jizɔs bin se: “Dɛn de sɛl tu [sparo] fɔ wan kɔyn we nɔ gɛt bɛtɛ valyu, nɔto so? Bɔt una Papa de no we ɛniwan pan dɛn fɔdɔm na grɔn. Ɛn i ivin no ɔmɔs ia de na una ed. So una nɔ fred, una valyu pas bɔku sparo dɛn.” (Matyu 10:​29-31) Tink bɔt wetin dɛn wɔd ya bin min to di wan dɛn we bin de lisin to Jizɔs.

⁵ Wi go de wɔnda wetin mek pɔsin go bay sparo. Wɛl, insay Jizɔs in tɛm sparo na di bɔd we bin chip pas ɔl di ɔda bɔd dɛn we dɛn bin de sɛl fɔ it. Yu go dɔn notis se di pɔsin we de bay go gɛt tu sparo if i gi wan kɔyn we nɔ gɛt bɛtɛ valyu. Bɔt leta Jizɔs bin se if pɔsin gi tu kɔyn, na fayv sparo i go gɛt, nɔto 4. Dɛn bin de ad di ɛkstra bɔd lɛk se i nɔ gɛt wan valyu. Sɔntɛm, to mɔtalman dɛn bɔd dɛn de nɔ bin gɛt wan valyu, bɔt aw Gɔd bin de si dɛn? Jizɔs bin se: “Gɔd nɔ de fɔgɛt ɛniwan pan dɛn,” ivin di wan we dɛn ad. (Lyuk 12:​6, 7) Naw wi dɔn bigin fɔ si Jizɔs in pɔynt. If Jiova valyu wan sparo, yu nɔ tink se i valyu mɔtalman fa fawe? Jɔs lɛk aw Jizɔs tɔk, Jiova no ɔltin bɔt wi. Infakt, i ivin no ɔmɔs ia de na wi ed.

6. Wetin mek wi shɔ se na tru Jizɔs bin de tɔk we i se Gɔd no ɔmɔs ia de na wi ed?

⁶ Fɔ se Gɔd no ɔmɔs ia de na wi ed? Sɔm pipul dɛn go se wetin Jizɔs tɔk na ya nɔ pɔsibul. Bɔt jɔs tink bɔt di op we wi gɛt fɔ se di wan dɛn we dɔn day go gɛt layf bak. Dis min se Jiova fɔ rili no wi fɔ lɛ i ebul fɔ mek wi bak! I so  valyu wi dat, i de mɛmba ɔltin bɔt wi, lɛk di infɔmeshɔn we de na wi sɛl dɛn we dɛn kɔl jɛnɛtik kod, ɔl di tin dɛn we de na wi maynd, ɛn ɔl di tin dɛn we wi dɔn go tru. * So fɔ lɛ Gɔd kɔnt di ia we de na mɔtalman ed, we na lɛk 100,000, na simpul simpul tin we yu kɔmpia am to di gi we i gɛt fɔ gi dayman dɛn layf bak.

7, 8. (a) Wetin na sɔm kwaliti dɛn we Jiova kin gladi fɔ we i de luk insay mɔtalman at? (b) Wetin na sɔm tin dɛn we wi kin du we Jiova valyu?

⁷ Sɛkɔn, di Baybul tich wi bɔt wetin Jiova valyu pan in savant dɛn. Jiova de gladi fɔ di gud kwaliti dɛn we wi gɛt ɛn we wi de tray fɔ du wetin i want. Kiŋ Devid bin tɛl in pikin Sɔlɔmɔn se: “PAPA GƆD [“Jiova,” NWT] de luk ɔlman at ɛn i no ɔlman plan ɛn wetin i de tink bɔt.” (Fɔs Kronikul 28:​9) As Gɔd de luk insay bɔku bɔku pipul dɛn at na dis wɔl we fɛt-fɛt ɛn badat bɔku, i kin gladi we i si pɔsin we lɛk pis, tru, ɛn wetin rayt. Wetin Gɔd kin du we i si pɔsin we lɛk am, we de tray fɔ lan bɔt am, ɛn we de tɛl ɔda pipul dɛn bɔt wetin i de lan? Jiova tɛl wi se i kin notis di wan dɛn we de tɛl ɔda pipul dɛn bɔt am. I ivin gɛt “wan buk usay i rayt dɛn wan we de fred am dɛn nem, so dat i go de mɛmba se na dɛn de tink bɔt am.” (Malakay 3:​16) I valyu dɛn kwaliti dɛn ya.

⁸ Wetin na sɔm gud tin dɛn we wi kin du we Jiova valyu? I valyu di tray we wi de tray fɔ falamakata in  Pikin, Jizɔs Krays. (1 Pita 2:​21) Wan impɔtant wok we Gɔd valyu na we wi de prich di gud nyuz bɔt in Kiŋdɔm. Romans 10:​15 se: “Di wan dɛn we de tɔk gud nyuz bɔt gud tin, dɛn fut dɛn fayn!” Wi nɔ kin tink se wi fut dɛn “fayn.” Bɔt na ya dɛn tinap fɔ di tray we Jiova in savant dɛn de tray fɔ prich di gud nyuz. Ɔl dɛn tin ya valyu ɛn fayn na in yay.—Matyu 24:​14; 28:​19, 20.

9, 10. (a) Wetin mek wi fɔ biliv se Jiova valyu di bia we wi de bia we wi gɛt plɛnti prɔblɛm dɛn we de mɔna wi? (b) Wetin Jiova nɔ de du to in savant dɛn we fetful?

⁹ Jiova valyu di bia we wi de bia. (Matyu 24:​13) Mɛmba se Setan want lɛ yu tɔn yu bak pan Jiova. Ɛnide we yu kɔntinyu fɔ de biɛn Jiova, yu dɔn ɛp fɔ gi ansa to Setan we de fityay Jiova. (Prɔvabs 27:​11) Sɔntɛnde, i nɔ kin izi fɔ bia. Wɛlbɔdi prɔblɛm, mɔni prɔblɛm, pwɛlat, ɛn ɔda prɔblɛm dɛn kin mek ɛnide nɔ izi. Pɔsin in at kin pwɛl bak we i nɔ gɛt wetin i want di tɛm we i want am. (Prɔvabs 13:​12) We wi de bia we wi de gɛt dɛn kayn  prɔblɛm dɛn ya, Jiova de valyu dat mɔ ɛn mɔ. Na dat mek Kiŋ Devid bin tɛl Jiova se: “Mak di kray we a de kray.” Ɛn i bin tɛl am bak se: “Rayt am dɔŋ na yu buk if i nɔ ɔlrɛdi de de.” (Sam 56:​8) Fɔ tru, Jiova valyu ɛn i de mɛmba ɔl di kray ɛn di sɔfa we wi de sɔfa we wi de kɔntinyu fɔ de biɛn am. Dɛn tin ya sɛf fayn na in yay.

¹⁰ Bɔt di at we wi gɛt we kin kɔndɛm wi kin mek i at fɔ lɛ wi biliv se wi gɛt valyu na Gɔd in yay. I go de tɛl wi ɔltɛm se: ‘Bɔt bɔku ɔda pipul dɛn de we de sɛt gud ɛgzampul pas mi. Jiova nɔ kin rili gladi we i kɔmpia mi wit dɛn!’ Jiova nɔ de kɔmpia, ɛn i nɔ strikt pasmak ɔ ash we i kam pan di we aw i de tink. (Galeshians 6:​4) I de rili tek tɛm we i de luk insay wi at, ɛn i kin valyu di gud tin dɛn we de de, ilɛksɛf na smɔl wan.

11. Wetin wi kin lan bɔt Jiova frɔm di we aw i trit Abija?

¹¹ Tɔd, we Jiova de luk insay wi, i de tek tɛm wach fɔ di gud tin dɛn we wi de du. Fɔ ɛgzampul, we Jiova bin se dɛn fɔ kil Kiŋ Jɛroboam in wan ol famili we bin dɔn tɔn dɛn bak pan am, I bin se dɛn fɔ bɛr wan pan di kiŋ in pikin dɛn we nem Abija, fayn fayn wan. Wetin mek? “Bikɔs nain na di waŋren pɔsin na Jɛroboam in famili we bin de waka tret na PAPA GƆD [“Jiova,” NWT] in yay.” (Fɔs Kiŋ 14:​1, 10-13) So Jiova tek tɛm wach insay da yɔŋman de in at ɛn fɛn sɔntin we gud. Ilɛk aw di gud we da yɔŋman de bin du bin luk smɔl ɔ nɔ impɔtant, Jiova bin si am se i go fayn fɔ rayt am na in Wɔd. I ivin du am gud bay we i sɔri fɔ in wan na da famili de we bin dɔn tɔn dɛn bak pan am.

12, 13. (a) Aw di tin we bin apin to Kiŋ Jɛoshafat sho se Jiova de luk fɔ di gud tin dɛn we wi de du ivin we wi sin? (b) We i kam to di gud tin dɛn we wi de du ɛn wi gud kwaliti dɛn, aw Jiova de sho se in na Papa we lɛk in pikin dɛn?

 ¹² Wan ɛgzampul we fayn mɔ gɛt fɔ du wit gud Kiŋ Jɛoshafat. We di Kiŋ bin du fulish tin, Jiova in prɔfɛt bin tɛl am se: “Fɔseka dat, PAPA GƆD [“Jiova,” NWT] dɔn vɛks pan yu.” Dis rili siriɔs! Bɔt Jiova in mɛsej nɔ stɔp de. Di prɔfɛt kɔntinyu fɔ se: “Ɛniwe, sɔm gud de insay yu.” (Sɛkɛn Kronikul 19:​1-3) Pan ɔl we Jiova bin gɛt rayt fɔ vɛks, dat nɔ bin mek i nɔ si di gud tin dɛn we Jɛoshafat bin du. Dis difrɛn frɔm aw mɔtalman we nɔ pafɛkt kin du tin! We wi kin vɛks pan ɔda pipul dɛn, wi nɔ kin si di gud tin we dɛn de du. Ɛn we wi kin sin, di pwɛlat, di shem, ɛn di blem we wi kin blem wisɛf kin mek wi nɔ si di gud tin dɛn we wi de du. Bɔt mɛmba se if wi ripɛnt ɛn tray tranga wan nɔ fɔ du da kayn tin de igen, Jiova de fɔgiv wi.

¹³ As Jiova de luk insay yu at, i nɔ de pe atɛnshɔn to dɛn sin dɛn de, jɔs lɛk aw pɔsin  we de fɛn gold nɔ de pe atɛnshɔn to di gravul gravul we nɔ gɛt valyu. Wetin Jiova de du wit yu gud kwaliti dɛn ɛn gud tin dɛn we yu de du? I de kip dɛn. Yu dɔn ɛva notis di we aw mama ɛn papa we lɛk dɛn pikin dɛn kin valyu dɛn pikin dɛn drɔin ɔ skul wok dɛn? Sɔm tɛm de dɛn kin kip am fɔ lɔng lɔng tɛm ivin we di pikin dɛn kin dɔn fɔgɛt bɔt dɛn. Jiova na di Papa we lɛk in pikin dɛn pas ɔl ɔda papa dɛn. If wi kɔntinyu fɔ fetful to am, i nɔ de ɛva fɔgɛt wi gud wok dɛn ɛn di gud kwaliti dɛn we wi gɛt. Infakt, i go tek am se i nɔ de du wetin rayt if i fɔgɛt dɛn tin ya, ɛn i nɔ de ɛva du wetin nɔ rayt. (Ibruz 6:​10) Wan ɔda we de bak we i de luk fɔ di gud tin dɛn we wi de du.

14, 15. (a) Wetin mek di pafɛkt we wi nɔ pafɛkt nɔ de ɛva mek Jiova nɔ si di gud tin dɛn we wi de du? Gi ɛgzampul. (b) Wetin Jiova de du wit di gud kwaliti dɛn we i de si pan wi? Aw i de si in savant dɛn we fetful?

¹⁴ Pan ɔl we wi nɔ pafɛkt, Jiova de si di kayn pɔsin we wi go bi. Fɔ ɛgzampul: Pipul dɛn we lɛk drɔin kin tray tranga wan fɔ mek drɔin dɛn we dɔn pwɛl bad, fayn bak lɛk aw dɛn bin de. Fɔ ɛgzampul, we sɔmbɔdi we gɛt gɔn bin pwɛl wan pan Lionado da Vinsi in drɔin we bin de na di National Gallery na Lɔndɔn, Ingland ɛn we dia lɛk 30 milyɔn dɔla, nɔbɔdi nɔ tɔk se bikɔs di drɔin dɔn pwɛl, dɛn fɔ trowe am. Wantɛm wantɛm dɛn bigin fɔ wok fɔ mek dis wɔndaful drɔin we dɔn tek ɔlmos 500 ia. Wetin mek? Bikɔs i gɛt valyu to di wan dɛn we lɛk drɔin. Yu nɔ tink se yu gɛt valyu pas chɔk ɛn chakol drɔin? Yu gɛt valyu na Gɔd in yay, ilɛk aw di sin we yu gɛt frɔm Adam dɔn damej yu. (Sam 72:​12-14) Jiova Gɔd, we mek mɔtalman fayn fayn wan, go du ɔl wetin i nid fɔ du fɔ mek ɔl di wan dɛn we de du wetin i want pafɛkt bak.—Akt 3:​21; Romans 8:​20-22.

¹⁵ Fɔ tru, Jiova de si gud tin insay wi we wi nɔ kin si. Ɛn  as wi de sav am, i go mek di gud tin insay wi de bɔku te wi pafɛkt. Ilɛk aw Setan in wɔl dɔn trit wi, Jiova valyu in savant dɛn we fetful.—Egay 2:​7, NWT.

16. Wetin na di bɛst tin we Jiova dɔn du we sho se i lɛk wi? Aw wi no se da gift de na fɔ wi?

¹⁶ Nɔmba 4, Jiova de du bɔku tin fɔ sho se i lɛk wi. Di day we Krays day fɔ fri wi na di bɛst ansa we Gɔd dɔn gi to Setan we de lay se wi nɔ gɛt wan valyu ɔ pɔsin nɔ go ebul fɔ lɛk wi. Wi nɔ fɔ ɛva fɔgɛt se di pen we Jizɔs fil we i bin de na da tik we i sɔfa pan ɛn di siriɔs pen we Jiova fil we i si in Pikin we i lɛk de day de pruv se dɛn lɛk wi. I sɔri fɔ no se i kin at fɔ lɛ bɔku pipul dɛn biliv se dis gift na fɔ dɛn. Dɛn kin fil se dɛn nɔ fit fɔ gɛt am. Bɔt mɛmba se di apɔsul Pɔl bin de mek di wan dɛn we de fala Krays sɔfa. Pan ɔl dat, i rayt se: “Gɔd in Pikin . . . lɛk mi ɛn an ova insɛf fɔ mi.”—Galeshians 1:​13; 2:​20.

17. Aw Jiova de briŋ wi to insɛf ɛn to in Pikin?

¹⁷ Jiova de sho se i lɛk wi bay we i de mek wi bɛnifit frɔm Krays in sakrifays. Jizɔs bin se: “Nɔbɔdi nɔ go kam to mi pas di Papa, we sɛn mi, briŋ am kam.” (Jɔn 6:​44) Fɔ tru, na Jiova insɛf sɛf de briŋ wi kam nia in Pikin ɛn mek wi gɛt di op fɔ gɛt layf we go de sote go. Aw i de du dat? I de yuz di prichin wok, we de rich wi ɔl, ɛn in oli spirit we de ɛp wi fɔ ɔndastand ɛn du di tin dɛn we wi de lan bɔt am, pan ɔl we nɔto ɔltin wi ebul fɔ du ɛn wi nɔ pafɛkt. So Jiova de tɛl wi wetin i bin tɛl Izrɛl, we i se: “A dɔn lɛk yu wit lɔv we go de sote go. Na dat mek a dɔn drɔ yu to mi wit lɔv we go de sote go.”—Jɛrimaya 31:​3, NWT.

18, 19. (a) Us tɛm mɔ wi kin fil di lɛk we Jiova lɛk wi? Wetin sho se na insɛf sɛf de du dis wok? (b) Aw Gɔd in Wɔd mek wi no se Jiova de fil fɔ pɔsin we i de lisin to am?

¹⁸ Sɔntɛm na we wi kin pre na da tɛm de mɔ wi de fil  di lɛk we Jiova lɛk wi. Di Baybul de ɛnkɔrɛj wi fɔ “de pre ɔltɛm” to Gɔd. (1 Tɛsalonians 5:​17) I de lisin. Di Baybul ivin se in na di wan “we de ansa wi prea.” (Sam 65:​2) I nɔ gi dis wok to ɛnibɔdi, i nɔ ivin gi am to in yon Pikin. Jɔs tink bɔt dis: Di wan we mek ɔltin de tɛl wi fɔ fil fri fɔ pre to am. Aw Gɔd de lisin? Fɔ se i nɔ de fil fɔ pɔsin, i nɔ bisin? Nɔ-o.

¹⁹ Jiova de fil fɔ pɔsin. Wi si dat we wi rid bɔt aw i bin fil we i si we in pipul dɛn de sɔfa. Di Baybul se: “I bin de fil am ɔl di tɛm we dɛn kin de pan prɔblɛm.” (Ayzaya 63:​9, NWT) Jiova nɔ bin jɔs de si in pipul dɛn prɔblɛm, bɔt i bin de fil fɔ dɛn. Jiova yuz wan ɛgzampul fɔ sho aw i de rili fil bɔt in savant dɛn. I se: “Ɛnibɔdi we tɔch una dɔn tɔch mi bɔlyay.” * (Zɛkaraya 2:​8, NWT) I kin rili at we pɔsin tɔch wi bɔlyay. Fɔ tru, Jiova de fil fɔ wi. We wi fil pen, insɛf de fil pen.

20. Uskayn we wi nɔ fɔ tink if wi want fɔ obe di advays we de na Romans 12:​3?

²⁰ Ɛni Kristian we de tink di rayt we nɔ go yuz di lɛk we Gɔd lɛk am ɛn valyu am as ɛkskyuz fɔ mek prawd ɔ fɔ fil se i tu impɔtant. Di apɔsul Pɔl bin rayt se: “Bikɔs ɔf Gɔd in spɛshal gudnɛs we de pan mi, a de tɛl una ɔl we de de se nɔbɔdi nɔ fɔ tink tumɔs bɔt insɛf pas aw i fɔ tink, bɔt i fɔ tink di kɔrɛkt we, jɔs lɛk aw Gɔd dɔn gi am fet.” (Romans 12:​3) Wan ɔda transleshɔn se: “A de tɛl una ɔl se: Una nɔ tink se una bɛtɛ pas aw una tan, bɔt una fɔ tink lɛkɛ aw soba pipul de tink bɔt dɛnsɛf, ɛn una ɔl fɔ jɔj unasɛf bay aw Gɔd mek una ebul biliv am.” (Krio Fɔs Oli Baybul) We  wi de rili ɛnjɔy di lɛk we wi Papa na ɛvin lɛk wi, lɛ wi de du tin wit sɛns ɛn mɛmba se wi nɔ wok fɔ lɛ Gɔd lɛk wi ɛn wi nɔ fit fɔ lɛ i lɛk wi.—Lyuk 17:​10.

21. Us lay lay tin dɛn Setan de tɔk we wi nɔ fɔ ɛva biliv? Wetin de na di Baybul we wi kin yuz fɔ gi wisɛf kɔnfidɛns ɔltɛm?

²¹ Lɛ wi du ɔl wetin wi ebul so dat wi nɔ go biliv di lay lay tin dɛn we Setan de tɔk, lɛk we i de lay se wi nɔ gɛt wan valyu ɔ pɔsin nɔ go ebul fɔ lɛk wi. If di tin dɛn we dɔn apin to yu de mek yu si yusɛf as prɔblɛm ɛn yu de tink se i nɔ go izi fɔ mek Gɔd lɛk yu pan ɔl we i rili gɛt lɔv, ɔ yu de tink se di gud wok dɛn we yu dɔn du tu smɔl fɔ mek Gɔd notis dɛn pan ɔl we i de si ɔltin, ɔ yu de tink se yu sin dɛn so bɔku dat ivin di day we Gɔd in Pikin we i rili lɛk day nɔ go mek i fɔgiv yu, dat nɔto tru. Nɔ biliv ɔl dɛn lay lay tɔk dɛn de! Lɛ wi kɔntinyu fɔ gi wisɛf kɔnfidɛns wit di wɔd dɛn we Gɔd bin yuz Pɔl fɔ rayt, we i se: “A rili biliv se day, layf, enjɛl dɛn, gɔvmɛnt dɛn, tin dɛn we de ya naw, tin dɛn we gɛt fɔ kam, pawa dɛn, ayt, tin we dip, ɔ ɛni ɔda tin we Gɔd mek nɔ ebul mek Gɔd lɛf fɔ lɛk wi tru Krays Jizɔs wi Masta.”—Romans 8:​38, 39.