1-3. Wetin Jizɔs in neba dɛn trade bin du we i de tich? Wetin dɛn nɔ bin no bɔt am?

DI PIPUL dɛn rili sɔprayz. Jizɔs tinap bifo dɛn na di sinagɔg de tich. Jizɔs nɔto strenja to dɛn—na dɛn siti i gro ɔp ɛn fɔ lɔng tɛm naw i dɔn de wok as kapɛnta we i de wit dɛn. Sɔntɛm Jizɔs bin dɔn ɛp fɔ bil sɔm pan di os dɛn we dɛn pipul ya de, ɔ sɔntɛm na Jizɔs go dɔn mek di tin dɛn we dɛn de yuz fɔ dig dɛn fam dɛn ɔ na in go dɔn mek dɛn yok dɛn, dat na, di tin we pɔsin kin put na in sholda ɔ pan animal fɔ kɛr lod go. * Bɔt wetin dɛn go du we dɛn yɛri Jizɔs, we na bin kapɛnta trade, de tich?

² Bɔku pan di wan dɛn we bin de lisin to am bin de wɔnda ɛn aks se: “Usay dis man pul dis sɛns?” Bɔt dɛn bin de tɔk bak se: “Nɔto da kapɛnta dis? Nɔto in mama nem Meri?” (Matyu 13:​54-58; Mak 6:​1-3) I sɔri fɔ no se Jizɔs in neba dɛn trade bin de tink se, ‘Dis kapɛnta na jɔs kɔmɔn kɔmɔn man lɛk wi.’ Pan ɔl we di tin dɛn we i bin de tɔk mek sɛns, dɛn nɔ bin lisin to am. Dɛn nɔ bin no se di sɛns tin dɛn we i bin de tɔk nɔto in yon.

³ Usay Jizɔs bin pul dis sɛns? I bin se: “Wetin a de tich nɔ kɔmɔt frɔm mi, i kɔmɔt frɔm di wan we sɛn mi.” (Jɔn 7:​16) Di apɔsul Pɔl ɛksplen se Jizɔs “de sho wi Gɔd in sɛns.” (1 Kɔrintians 1:​30) Jiova de sho wi in sɛns tru in Pikin,  Jizɔs. Fɔ tru, na dis bin mek Jizɔs se: “Mi ɛn di Papa na wan.” (Jɔn 10:​30) Lɛ wi tɔk bɔt tri we dɛn we Jizɔs sho se i gɛt “Gɔd in sɛns.”

4. (a) Wetin na di men tin we Jizɔs bin de tɔk bɔt? Wetin mek i rili impɔtant? (b) Wetin mek Jizɔs in advays bin de wok ɔltɛm ɛn rili bɛnifit di wan dɛn we bin de lisin to am?

⁴ Fɔs, tink bɔt wetin Jizɔs bin de tich. Di men tin we i bin de tɔk bɔt na “di gud nyuz bɔt Gɔd in Kiŋdɔm.” (Lyuk 4:​43) Dis bin rili impɔtant bikɔs di Kiŋdɔm go mek ɔlman no se na Jiova gɛt di rayt fɔ rul, ɛn i go mek mɔtalman gɛt blɛsin sote go. We Jizɔs bin de tich, i bin de gi pipul dɛn fayn advays bɔt aw fɔ liv dɛn layf ɛvride. I sho se na in na di “Wɔndaful Kanselɔ” we dɛn bin dɔn tɔk bɔt. (Ayzaya 9:​6) Fɔ tru, aw in advays nɔ go wɔndaful? I bin rili no Gɔd in Wɔd ɛn wetin Gɔd want, i bin ɔndastand mɔtalman gud gud wan, ɛn i bin lɛk mɔtalman bad bad wan. So in advays bin de wok ɔltɛm ɛn rili bɛnifit di wan dɛn we bin de lisin to am. Di tin dɛn we Jizɔs bin de “tɔk go mek pɔsin gɛt layf we go de sote go.” Fɔ tru, we pɔsin fala in advays, i go sev.—Jɔn 6:​68.

5. Wetin na sɔm ɔf di tin dɛn we Jizɔs tɔk bɔt we i bin de tich sɔm pipul dɛn ɔp wan mawntin?

⁵ Di tin dɛn we Jizɔs bin tich sɔm pipul dɛn ɔp wan mawntin na wan fayn ɛgzampul we de sho se di sɛns we de insay di tin dɛn we i bin de tich, in kayn nɔ de. Dɛn tin ya we i bin de tich, we de na Matyu 5:​3–7:​27, na tin we go jɔs tek lɛk 20 minit fɔ tɔk. Bɔt in advays de wok ɔltɛm, dɛn de wok tide jɔs lɛk aw dɛn bin de wok trade. Jizɔs bin tɔk bɔt plɛnti tin dɛn, lɛk aw fɔ mek wi padi biznɛs wit ɔda pipul dɛn go bifo (5:23-26, 38-42; 7:1-5, 12), aw fɔ liv klin  layf we i kam pan mami ɛn dadi biznɛs (5:27-32), ɛn aw fɔ liv layf we gɛt minin (6:19-24; 7:24-27). Bɔt Jizɔs nɔ bin jɔs de tɛl di wan dɛn we de lisin to am bɔt tin dɛn we mek sɛns, bɔt i bin de sho dɛn bay we i de ɛksplen to dɛn, rizin wit dɛn, ɛn gi dɛn pruf.

6-8. (a) Us gud gud rizin dɛn Jizɔs gi fɔ lɛ wi lɛf fɔ wɔri? (b) Wetin sho se di sɛns we bin de insay Jizɔs in advays kɔmɔt frɔm Gɔd?

⁶ Fɔ ɛgzampul, tink bɔt Jizɔs in advays we mek sɛns na Matyu chapta 6, we tɔk bɔt aw wi go lɛf fɔ wɔri bɔt prɔpati dɛn. Jizɔs bin advays wi se: “Una lɛf fɔ wɔri bɔt una layf we i kam pan wetin una go it ɔ wetin una go drink, ɔ bɔt una bɔdi we i kam pan wetin una go wɛr.” (Vas 25) Fud ɛn klos na tin dɛn we wi nid, ɛn i nɔmal fɔ lɛ wi tink bɔt aw wi go gɛt dɛn tin dɛn de. Bɔt Jizɔs de tɛl wi fɔ “lɛf fɔ wɔri” bɔt dɛn tin dɛn de. * Wetin mek?

⁷ Lisin we Jizɔs de ɛksplen klia klia wan. If Jiova dɔn gi wi layf ɛn bɔdi, una nɔ tink se i go gi wi it fɔ mek wi kɔntinyu fɔ liv ɛn klos fɔ mek wi wɛr na wi bɔdi? (Vas 25) If Gɔd de gi di bɔd dɛn tin fɔ it ɛn mek di flawa dɛn fayn, yu nɔ tink se i go kia fɔ mɔtalman we de wɔship am? (Vas 26, 28-30) Fɔ tru, fɔ wɔri pasmak nɔ mek sɛns. I nɔ go ad ivin shɔt tɛm na wi layf. * (Vas 27) Aw wi go lɛf fɔ de wɔri? Jizɔs bin advays wi se: Kɔntinyu fɔ put Gɔd in wɔship fɔs na yu layf. Di wan dɛn we de du so fɔ gɛt kɔnfidɛns se dɛn Papa we de na ɛvin “go gi” dɛn di tin dɛn we dɛn nid ɛnide. (Vas 33) Dɔn Jizɔs gi wan advays we de rili ɛp—lɛf tumara yon fɔ tumara. Wetin mek yu fɔ ad tumara in yon wɔri pan tide  in yon wɔri? (Vas 34) Apat frɔm dat, wetin mek yu fɔ wɔri pasmak bɔt tin dɛn we sɔntɛm nɔ go ɛva apin? We wi fala dɛn advays ya we mek sɛns, i go mek wi nɔ de wɔri wɔri na dis wɔl we ful-ɔp wit strɛs.

⁸ Dis dɔn sho klia wan se pan ɔl we i dɔn ɔlmost 2,000 ia frɔm we Jizɔs gi dis advays, di advays de wok tide jɔs lɛk aw i bin de wok di tɛm we i tɔk dɛn. Yu nɔ tink se dat de sho se Jizɔs in sɛns na frɔm Gɔd i kɔmɔt? Ivin di bɛst advays we mɔtalman kanselɔ dɛn kin gi kin kɔmɔt na stayl ɛn i nɔ kin te, dɛn kin ajɔst am ɔ chenj am. Pan ɔl we di tin dɛn we Jizɔs bin tich dɔn tek lɔng tɛm, dɛn stil de wok ɛn bɛnifit pipul dɛn. Bɔt dis nɔ fɔ sɔprayz wi, bikɔs dis Wɔndaful Kanselɔ bin tɔk “wetin Gɔd tɛl am fɔ tɔk.”—Jɔn 3:​34.

9. Wetin sɔm sojaman dɛn bin tɔk bɔt Jizɔs in tichin? Wetin mek dɛn nɔ jɔs tɔk am fɔ mek tin big?

⁹ Di sɛkɔn we we Jizɔs sho se i gɛt Gɔd in sɛns na di we aw i bin de tich. Wan tɛm, sɔm sojaman dɛn we dɛn bin sɛn fɔ arɛst am tɔn bak wit ɛmti-an ɛn se: “Nɔbɔdi nɔ wande tɔk da kayn we de.” (Jɔn 7:​45, 46) Dɛn nɔ tɔk dis fɔ jɔs mek tin big. Jizɔs bin kɔmɔt “ɔp,” so i bin no bɔku tin dɛn ɛn gɛt ɛkspirɛns pas ɔl di mɔtalman dɛn we dɔn ɛva liv, ɛn i bin de yuz dɛn tin dɛn de we i de tɔk. (Jɔn 8:​23) Fɔ tru, i tich pas aw ɛni mɔtalman go tich. Lɛ wi jɔs tɔk bɔt tu we dɛn we dis Ticha we gɛt sɛns bin de yuz fɔ tich.

10, 11. (a) Wetin mek wi kin rili kɔle we wi tink bɔt di we aw Jizɔs bin de yuz ɛgzampul dɛn? (b) Us ɛgzampul sho se Jizɔs in shɔt stori dɛn na bin fayn we fɔ tich?

¹⁰ I yuz ɛgzampul dɛn gud gud wan. Di Baybul se: “Jizɔs yuz ɛgzampul dɛn fɔ tɛl di pipul dɛn ɔl dɛn tin ya. Fɔ tru, i nɔ go tɔk to dɛn pas i yuz ɛgzampul.” (Matyu 13:​34) Wi kin rili kɔle we wi tink bɔt di we aw i bin de yuz tin dɛn we de apin ɛvride fɔ tich impɔtant tin dɛn we na tru, lɛk  fama dɛn we de plant sid, uman dɛn we de pripia fɔ bek bred, pikin dɛn we de ple na makit, fishaman dɛn we de drɔ dɛn nɛt dɛn, ɛn shɛpad dɛn we de luk fɔ dɛn ship dɛn we lɔs. Di wan dɛn we bin de lisin to am bin dɔn si dɛn tin ya bɔku tɛm. We pɔsin yuz tin dɛn we pipul dɛn sabi fɔ tich impɔtant tin dɛn we na tru, i kin kwik fɔ ɔndastand ɛn lɛf na pipul dɛn maynd ɛn at.—Matyu 11:​16-19; 13:​3-8, 33, 47-50; 18:​12-14.

¹¹ Bɔku tɛm, Jizɔs bin pul shɔt stori dɛn we pɔsin kin lan fayn lɛsin frɔm ɔ fɔ tich di tru tin bɔt Gɔd. Bikɔs stori dɛn kin izi fɔ ɔndastand ɛn mɛmba pas we pɔsin jɔs tɔk so nɔmɔ, di shɔt stori dɛn we Jizɔs bin de pul bin de mek pipul dɛn mɛmba wetin i bin tich. Insay bɔku stori dɛn, Jizɔs bin yuz fayn fayn ɛgzampul dɛn fɔ ɛksplen bɔt in Papa di we we i nɔ go izi fɔ mek pipul dɛn fɔgɛt. Fɔ ɛgzampul, udat nɔ go ɔndastand di lɛsin we de na di stori bɔt di pikin we west in papa in prɔpati? Da stori de ɛp wi fɔ si se we pɔsin we dɔn du bad sho se i rili ripɛnt, Jiova de sɔri fɔ am ɛn tek am bak.—Lyuk 15:​11-32.

12. (a) Aw Jizɔs bin de yuz kwɛstyɔn dɛn we i de tich? (b) We dɛn aks Jizɔs udat gi am di rayt fɔ du di tin dɛn we i de du, aw i yuz kwɛstyɔn fɔ mek dɛn nɔ ebul fɔ tɔk?

¹² I yuz kwɛstyɔn dɛn fayn fayn wan. Jizɔs yuz kwɛstyɔn dɛn fɔ ɛp di wan dɛn we de lisin to am fɔ fɛn di ansa fɔ dɛnsɛf, fɔ no di rizin we mek dɛn de du sɔntin, ɔ fɔ disayd. (Matyu 12:​24-30; 17:​24-27; 22:​41-46) We di bigman dɛn pan Gɔd biznɛs aks Jizɔs if na Gɔd gi am di rayt fɔ du di tin dɛn we i de du, i aks dɛn se: “Udat bin sɛn Jɔn fɔ baptayz pipul dɛn, na Gɔd we de na ɛvin ɔ na mɔtalman?” Di kwɛstyɔn mek dɛn wɔnda ɛn bigin tɔk to dɛn kɔmpin dɛn se: “If wi se, ‘Na Gɔd we de na ɛvin,’ i go se, ‘Wetin mek, naw, una nɔ bin biliv am?’ Bɔt wi nɔ gɛt maynd se, ‘Na mɔtalman.’ Dɛn bin de fred di pipul dɛn, bikɔs ɔl di  pipul dɛn biliv se Jɔn na tru tru prɔfɛt.” So dɛn ansa Jizɔs se: “Wi nɔ no.” (Mak 11:​27-33; Matyu 21:​23-27) Di simpul kwɛstyɔn we Jizɔs aks dɛn mek dɛn nɔ ebul fɔ tɔk, ɛn i sho se na bad tin de na dɛn at.

13-15. Aw di stori bɔt di gud Samɛritan sho se Jizɔs gɛt sɛns?

¹³ Sɔntɛnde we Jizɔs bin de yuz ɛgzampul dɛn, i bin de aks kwɛstyɔn dɛn bak we de mek pɔsin tink siriɔs wan. We wan lɔya we na Ju bin aks Jizɔs wetin i fɔ du fɔ gɛt layf we go de sote go, Jizɔs aks am bɔt di Lɔ we Gɔd bin gi Mozis, we se wi fɔ lɛk Gɔd ɛn wi neba. Bikɔs di man bin want fɔ sho se wetin i de tink kɔrɛkt, i aks se: “Udat rili na mi neba?” Fɔ ansa am, Jizɔs pul wan stori. Tifman dɛn bin atak wan Ju man we bin de travul in wangren. Dɛn bit am ɛn lɛf am fɔ mek i day. Na de tu man dɛn we na Ju kam pas na di say we i de, di fɔs wan na prist ɛn di sɛkɔn wan na Livayt. Dɛn ɔl tu lɛf am de ɛn go. Bɔt wan Samɛritan kam pas usay di man de. Di man sɔri fɔ am ɛn kia fɔ in wund dɛn ɛn kɛr am go na wan gɛstaws usay i go de in sef wan te i wɛl. Fɔ dɔn di stori, Jizɔs aks di man se: “Pan dɛn tri man ya, udat yu tink se sho se in na neba to di man we tifman dɛn atak?” Di man ansa se: “Na di wan we trit am fayn.”—Lyuk 10:​25-37.

¹⁴ Aw di stori sho se Jizɔs gɛt sɛns? Insay Jizɔs in tɛm, na di wan dɛn nɔmɔ we de fala di Ju dɛn tradishɔn na in di Ju dɛn de kɔl neba—nɔto di Samɛritan dɛn. (Jɔn 4:​9) If insay di stori, na di Samɛritan di tifman dɛn bin bit ɛn wan Ju ɛp am, yu tink se dat fɔ dɔn mek di Ju dɛn tink di rayt we bɔt di Samɛritan dɛn? Jizɔs yuz sɛns fɔ pul di stori so dat wan Samɛritan go kia fɔ wan Ju. Tink bak bɔt di kwɛstyɔn we Jizɔs aks afta i pul di stori. Jizɔs ɛp di man fɔ no udat na tru tru neba. I bin tan lɛk se di lɔya bin de tray fɔ aks se: ‘Udat a fɔ sho se a lɛk as mi neba?’ Bɔt Jizɔs aks am se: “Pan dɛn tri man ya, udat yu tink se sho se in na neba?” Jizɔs nɔ  pe atɛnshɔn to di wan we dɛn du gud, dat na, di man we dɛn bit, bɔt i pe atɛnshɔn to di wan we du gud, dat na, di Samɛritan. Tru tru neba de sho lɔv to ɔda pipul dɛn ilɛk us trayb ɔ kɔntri dɛn kɔmɔt. Jizɔs nɔ bin fɔ ebul mek dis man ɔndastand fayn fayn wan if i nɔ bin pul dis stori.

¹⁵ Yu nɔ tink se na dat mek pipul dɛn bin de kɔle “di we aw i bin de tich” ɛn want fɔ kam nia am? (Matyu 7:​28, 29) Wan tɛm, “bɔku bɔku pipul dɛn” bin de nia Jizɔs fɔ tri dez, pan ɔl we dɛn nɔ bin gɛt natin fɔ it!—Mak 8:​1, 2.

16. Us we Jizɔs bin “sho se” i gɛt Gɔd in sɛns?

¹⁶ Di tɔd we aw Jizɔs sho se i gɛt Jiova in sɛns na bay di we aw i liv in layf. Sɛns de bɛnifit pipul dɛn; i de wok. Jems bin aks se: “Udat pan una gɛt sɛns?” Dɔn i ansa in yon kwɛstyɔn we i se: “Lɛ i biev fayn . . . fɔ sho se i gɛt sɛns.” (Jems 3:​13) Di we aw Jizɔs bin de biev “sho se” i gɛt Gɔd in sɛns. Lɛ wi si aw Jizɔs bin de disayd fɔ du di rayt tin bay di we aw i bin de liv in layf ɛn trit ɔda pipul dɛn.

17. Wetin-ɛn-wetin sho se Jizɔs nɔ bin ɛva du tin pasmak?

¹⁷ Yu dɔn notis se pipul dɛn we nɔ de disayd fɔ du di rayt tin kin du tin pasmak? Bɔt na sɛns de mek pɔsin nɔ du tin pasmak. Bikɔs Jizɔs bin gɛt Gɔd in sɛns, i nɔ bin ɛva du tin pasmak. Pantap dat, i put Gɔd in biznɛs fɔs na in layf. I bin rili bizi de tɛl pipul dɛn bɔt di gud nyuz. I se: “Na dis mek a kam.” (Mak 1:​38) So prɔpati nɔ bin impɔtant to am; i tan lɛk se i nɔ bin gɛt bɛtɛ prɔpati. (Matyu 8:​20) Bɔt in nɔto bin pɔsin we nɔ de ɛnjɔy insɛf atɔl. Jizɔs na pɔsin we gladi jɔs lɛk in Papa, “di Gɔd we gladi,” ɛn i bin de mek ɔda pipul dɛn gladi. (1 Timoti 1:​11; 6:​15) We i go na wan mared pati—usay dɛn de ple myuzik, siŋ, ɛn gladi gladi—i nɔ go de fɔ go pwɛl di ɛnjɔymɛnt. We di wayn dɔn, i tɔn wata to fayn wayn “we de mek man at swit.” (Sam 104:​15; Jɔn 2:​1-11) Bɔku tɛm, Jizɔs bin gri fɔ go it na  pipul dɛn os dɛn we dɛn invayt am, ɛn i bin yuz da tɛm de fɔ tich.—Lyuk 10:​38-42; 14:​1-6.

18. Aw Jizɔs bin sho se i de disayd fɔ du di rayt tin ɔltɛm we i de dil wit ɔda pipul dɛn?

¹⁸ Jizɔs bin de disayd fɔ du di rayt tin ɔltɛm we i de dil wit ɔda pipul dɛn. Bikɔs i bin ɔndastand mɔtalman, dat bin mek i bin ebul fɔ tink di rayt we bɔt in disaypul dɛn. I bin rili no se dɛn nɔ pafɛkt. Bɔt stil, i bin de si dɛn gud kwaliti dɛn. I bin si wetin dɛn man ya we Jiova dɔn briŋ kam nia am ebul fɔ du. (Jɔn 6:​44) Pan ɔl we dɛn bin de mek mistek dɛn, Jizɔs bin sho se i rɛdi fɔ trɔst dɛn. Fɔ sho se i trɔst in disaypul dɛn, i bin gi dɛn big big wok fɔ du. I bin tɛl dɛn fɔ prich di gud nyuz, ɛn i bin biliv se dɛn go ebul fɔ du da wok de. (Matyu 28:​19, 20) Di Baybul buk we nem Akt sho klia wan se dɛn bin du di wok we i bin tɛl dɛn fɔ du. (Akt 2:​41, 42; 4:​33; 5:​27-32) So wi si klia wan se Jizɔs bin gɛt sɛns we i trɔst dɛn.

19. Aw Jizɔs sho se i bin “de tek tɛm du tin ɛn [i] ɔmbul”?

¹⁹ As wi bin si na Chapta 20, di Baybul se pɔsin we ɔmbul ɛn pɔsin we de tek tɛm du tin gɛt sɛns. Jiova na di bɛst ɛgzampul we i kam pan dis. Bɔt wetin wi go se bɔt Jizɔs? Wi kin fil fayn we wi tink bɔt di we aw Jizɔs bin sho se i ɔmbul we i bin de dil wit in disaypul dɛn. Bikɔs Jizɔs bin  pafɛkt, i bin pas dɛn pan ɔltin. Bɔt stil, Jizɔs nɔ bin de tek in disaypul dɛn lɛk se dɛn na natin. Jizɔs nɔ bin ɛva tray fɔ mek in disaypul dɛn fil se dɛn nɔ bɛtɛ ɔ dɛn nɔ ebul fɔ du tin fayn wan. Bifo dat, i bin ɔndastand se nɔto ɔltin dɛn ebul fɔ du, ɛn i bin de bia wit dɛn we dɛn mek mistek. (Mak 14:​34-38; Jɔn 16:​12) Yu nɔ tink se na wɔndaful tin fɔ no se ivin pikin dɛn bin de fil fri we dɛn de wit Jizɔs? Dɛn bin de kam nia am bikɔs dɛn no se i bin “de tek tɛm du tin ɛn [i] ɔmbul.”—Matyu 11:​29; Mak 10:​13-16.

20. Aw Jizɔs bin sho se i nɔ de pin we i bin de dil wit di uman we in galpikin bin gɛt dimɔn?

²⁰ Jizɔs sho se i ɔmbul lɛk Gɔd wan ɔda impɔtant we. I nɔ bin de pin ɛn i bin de gri fɔ du wetin pɔsin se, we i bin gɛt rizin fɔ sho sɔri-at. Fɔ ɛgzampul, mɛmba di tɛm we wan uman we nɔto Ju bin beg am fɔ mɛn in galpikin we bin de sɔfa bad bad wan bikɔs i gɛt dimɔn. Jizɔs bin sho am tri difrɛn we se i nɔ go ɛp am. Fɔs, i nɔ bin de ansa am; sɛkɔn, i tɛl am klia wan se na to di Ju dɛn Gɔd sɛn am, i nɔ sɛn am to pipul dɛn we nɔto Ju; ɛn tɔd, i gi wan ɛgzampul we mek di sem pɔynt. Bɔt di uman bin kɔntinyu fɔ beg am, we sho se i bin rili gɛt fet. Wetin Jizɔs du we i si dis? I bin du wetin i nɔ bin want fɔ du. I mɛn di uman in pikin. (Matyu 15:​21-28) Dis kayn we aw Jizɔs ɔmbul at fɔ si, nɔto so? Ɛn mɛmba se fɔ ɔmbul na di men tin we de sho se pɔsin gɛt tru tru sɛns.

21. Wetin mek wi fɔ tray fɔ fala Jizɔs in kwaliti dɛn, di we aw i bin de tɔk, ɛn di we aw i bin de du tin?

²¹ Wi rili gladi fɔ no se di Gɔspɛl dɛn sho wi di wɔd dɛn ɛn di tin dɛn we di man we gɛt sɛns pas ɔlman we dɔn liv na dis wɔl bin du. Lɛ wi mɛmba se Jizɔs bin falamakata in Papa pafɛkt wan. So we wi falamakata Jizɔs in kwaliti dɛn, di we aw i bin de tɔk, ɛn di we aw i bin de du tin, wi de gɛt Gɔd in sɛns. Insay di nɛks chapta, wi go si aw wi go yuz Gɔd in sɛns na wi layf.