1, 2. Us “oli sikrit” wi fɔ want fɔ no bɔt? Wetin mek?

SIKRIT! Bikɔs mɔtalman kin want fɔ no bɔt am, ɛn i nɔ kin izi fɔ ɔndastand am, i kin at fɔ lɛ dɛn kip am to dɛnsɛf. Bɔt di Baybul tɔk se: “PAPA GƆD de gɛt ɔna pan di tin dɛn we i de ayd.” (Prɔvabs 25:​2) Bikɔs Jiova na di Wan we De Rul Ɔlman ɛn na in mek ɔltin, i gɛt di rayt fɔ kip sɔm sikrit dɛn frɔm mɔtalman te di tɛm rich we i want mek dɛn no bɔt am.

² Bɔt wan sikrit de we wi want fɔ no bɔt we Jiova dɔn sho wi na in Wɔd. Dɛn de kɔl am “di oli sikrit bɔt wetin [Gɔd] want.” (Ɛfishians 1:​9) We wi de lan bɔt dis sikrit, dat nɔ jɔs de mek wi satisfay, bɔt i go mek wi sev, ɛn i go mek wi no smɔl bɔt di sɛns we Jiova gɛt we bɔku pasmak.

3, 4. Aw di prɔfɛsi we de na Jɛnɛsis 3:​15 (NWT) gi pipul dɛn op? Us “oli sikrit” bin de insay de?

³ We Adam ɛn Iv bin sin, i bin tan lɛk se wetin Jiova bin want dɔn pwɛl, dat na, fɔ mek dis wɔl bi Paradays usay pafɛkt mɔtalman dɛn go de. Bɔt Gɔd fɛn we wantɛm wantɛm fɔ sɔlv di prɔblɛm. I se: “A go mek yu [di snek] ɛn di uman et unasɛf, ɛn yu pikin ɛn di uman in pikin go et dɛnsɛf. I go nyamanyama yu ed, ɛn yu go wund am na in fut.”—Jɛnɛsis 3:​15, NWT.

⁴ Dɛn wɔd ya nɔ bin izi fɔ ɔndastand. Udat na bin dis uman? Udat na bin di snek? Udat na di “pikin” we go nyamanyama di snek in ed? Na gɛs nɔmɔ Adam ɛn Iv go dɔn gɛs. Bɔt di wɔd dɛn we Gɔd tɔk mek Adam ɛn Iv dɛn pikin dɛn we fetful gɛt op. Wetin rayt nain go apin. Wetin  Jiova want go bi. Bɔt aw i go bi? Dat na bin sikrit! Di Baybul kɔl am “Gɔd in sɛns we de insay wan oli sikrit, dat na di sɛns we ayd.”—1 Kɔrintians 2:​7.

5. Gi ɛgzampul bɔt wetin mek Jiova pul in sikrit na do smɔl smɔl.

⁵ Bikɔs Jiova na di Gɔd “we de pul sikrit na do,” as tɛm de go i go mek pipul dɛn no aw dis sikrit go kɔmɔt na do. (Daniɛl 2:​28, NWT) Bɔt i go du am smɔl smɔl. Fɔ ɛgzampul, tink bɔt di we aw wan papa we lɛk in smɔl bɔypikin go ansa am we di pikin aks am se: “Papa, aw dɛn bɔn mi?” Papa we gɛt sɛns go ansa in smɔl bɔypikin di we aw di pikin go ɔndastand datɛnde. As di bɔbɔ de big, in papa go ɛksplen mɔ to am. Semweso, Jiova no di tɛm we in pipul dɛn rɛdi fɔ lɛ i tɛl dɛn di sikrit dɛn bɔt wetin i want fɔ du.—Prɔvabs 4:​18; Daniɛl 12:​4.

6. (a) Wetin mek dɛn kin mek agrimɛnt? (b) We Jiova mek agrimɛnt wit mɔtalman, wetin mek dat na wɔndaful tin?

⁶ Aw Jiova bin pul dɛn sikrit ya na do? I yuz difrɛn difrɛn agrimɛnt dɛn fɔ pul dɛn na do. Sɔntɛm, yu go dɔn mek agrimɛnt we yu bin sayn, sɔntɛm na we yu bin want fɔ bay os ɔ lɛnt mɔni. Akɔdin to lɔ, da kayn agrimɛnt de na garanti se una go du wetin una bin dɔn se. Bɔt wetin mek Jiova nid fɔ mek agrimɛnt wit mɔtalman? In wɔd dɔn du fɔ bi garanti fɔ in prɔmis dɛn. Dat na tru, bɔt bɔku tɛm Gɔd nɔ de tɔk nɔmɔ, i de mek agrimɛnt dɛn bak. Dɛn agrimɛnt ya de mek wi, mɔtalman we nɔ pafɛkt, gɛt kɔnfidɛns mɔ pan Jiova in prɔmis dɛn.—Ibruz 6:​16-18.

7, 8. (a) Us agrimɛnt Jiova bin mek wit Ebraam? Wetin dat mek dɛn ɔndastand bɔt di oli sikrit? (b) As tɛm de go, aw Jiova bin sho tru udat dɛn di Pikin go kɔmɔt frɔm?

⁷ Afta tu tawzin ia we Jiova bin dɔn drɛb mɔtalman na  Paradays, i tɛl in fetful savant Ebraam se: “I go mek [in] jɛnareshɔn bɔku lɛkɛ di sta dɛn na di skay . . . Ɔl dɛn ɔda neshɔn dɛn go gɛt blɛsin tru [in] jɛnareshɔn bikɔs [i] obe am.” (Jɛnɛsis 22:​17, 18) Dis nɔto jɔs prɔmis; Jiova mek agrimɛnt ɛn i swɛ fɔ sho se i go mɔs du wetin i dɔn tɔk. (Jɛnɛsis 17:​1, 2; Ibruz 6:​13-15) I wɔndaful we di Masta we De Rul Ɔlman bin mek agrimɛnt fɔ blɛs mɔtalman!

⁸ Di agrimɛnt we Gɔd mek wit Ebraam bin sho se di Pikin we Gɔd bin prɔmis se go kam, go kɔmɔt frɔm Ebraam. Bɔt udat i go bi? As tɛm de go, Jiova bin sho se pan Ebraam in bɔypikin dɛn, na Ayzak go bi di Pikin in gret gret granpa. Pan Ayzak in tu bɔypikin dɛn, na Jekɔp Gɔd bin pik. (Jɛnɛsis 21:​12; 28:​13, 14) Leta, Jekɔp bin tɔk wetin Gɔd tɛl am fɔ tɔk to wan pan in 12 bɔypikin dɛn. I bin se: “Di kiŋ in staf nɔ go kɔmɔt na Juda in an, ɛn di kɔmanda in staf go de midul in fut, te Shaylɔ [“Di Wan We Gɛt Am”] kam, ɛn di pipul dɛn go obe am.” (Jɛnɛsis 49:​10, NWT) Naw dɛn bin no se di Pikin go bi kiŋ, ɛn i go kɔmɔt frɔm Juda!

9, 10. (a) Us agrimɛnt we Jiova mek wit di Izrɛlayt dɛn? Aw da agrimɛnt de protɛkt dɛn? (b) Aw di Lɔ sho se mɔtalman nid pɔsin we go pe di prayz fɔ fri dɛn?

⁹ Insay di ia 1513 bifo Krays, Jiova bin mek arenjmɛnt we go mek am pɔsibul fɔ mek dɛn no mɔ tin dɛn bɔt di oli sikrit. I mek agrimɛnt wit di wan dɛn we kɔmɔt frɔm Ebraam, dat na di Izrɛlayt dɛn. Pan ɔl we dis Lɔ agrimɛnt we Gɔd bin mek wit Mozis nɔ ol wata igen, di agrimɛnt na bin wan impɔtant tin we go mek wetin Jiova want apin, we na fɔ mek di Pikin we i bin dɔn tɔk bɔt kam. Aw dis go bi? Lɛ wi tɔk bɔt tri we dɛn aw i go apin. Fɔs, di Lɔ bin tan lɛk wɔl we de protɛkt dɛn. (Ɛfishians 2:​14) Dɛn lɔ dɛn de we bin gud bin tan lɛk sɔntin we de blɔk di Ju dɛn frɔm di wan  dɛn we nɔto Ju. So di Lɔ bin ɛp fɔ protɛkt di famili we di Pikin go kɔmɔt frɔm. Dis bin ɛp fɔ mek di neshɔn stil de we Gɔd in tɛm rich fɔ mek di Mɛsaya bɔn na Juda in trayb.

¹⁰ Sɛkɔn, di Lɔ bin sho klia wan se mɔtalman nid pɔsin we go pe di prayz fɔ fri dɛn. Bikɔs di Lɔ bin pafɛkt, i bin de sho se mɔtalman nɔ ebul fɔ obe am fayn fayn wan. I bin de “fɔ sho di bad tin dɛn we pipul dɛn de du te di pikin we dɛn mek di prɔmis to kam.” (Galeshians 3:​19) Di Lɔ bin mek we fɔ mek Gɔd fɔgiv sin fɔ shɔt tɛm bay we dɛn bin de sakrifays animal dɛn. Bɔt lɛk aw Pɔl rayt, “i nɔ pɔsibul fɔ mek man kaw ɛn got dɛn blɔd pul sin kɔmɔt,” so dɛn sakrifays ya bin jɔs tinap fɔ Krays in sakrifays we go pe di prayz fɔ fri wi. (Ibruz 10:​1-4) Fɔ di Ju dɛn we fetful, da agrimɛnt de bin tan lɛk “pɔsin we de gayd wi fɔ kɛr wi go to Krays.”—Galeshians 3:​24.

11. Us wɔndaful chans we di Lɔ agrimɛnt bin mek di Izrɛlayt dɛn gɛt? Wetin mek di neshɔn bin lɔs da chans de?

¹¹ Tɔd, di agrimɛnt bin gi di Izrɛlayt dɛn wan wɔndaful chans. Jiova tɛl dɛn se if dɛn kip di agrimɛnt fetful wan, dɛn “go mekɔp wan kiŋdɔm usay [dɛn] go bi kiŋ ɛn prist, ɛn [dɛn] go bi wan oli neshɔn.” (Ɛksodɔs 19:​5, 6, NWT) Na frɔm di Izrɛlayt dɛn di fɔs pipul dɛn we bin gɛt fɔ bi kiŋ ɛn prist na ɛvin kɔmɔt. Bɔt di neshɔn bin tɔn agens di Lɔ agrimɛnt, dɛn nɔ biliv di Mɛsaya, ɛn dɛn lɔs di chans we dɛn bin gɛt. So udat dɛn go bi kiŋ ɛn prist dɛn fɔ mek di nɔmba go kɔmplit? Aw da neshɔn de we gɛt blɛsin gɛt sɔntin fɔ du wit di Pikin we Gɔd bin dɔn prɔmis se go kam? Gɔd go pul dɛn oli sikrit ya na do we in yon tɛm rich.

12. Us agrimɛnt we Jiova mek wit Devid? Wetin dat mek dɛn ɔndastand bɔt di oli sikrit?

¹² Arawnd 1,000 ia bifo Krays, Jiova bin mek pipul dɛn no  mɔ bɔt di oli sikrit we i mek wan ɔda agrimɛnt. I prɔmis Kiŋ Devid we bin fetful se: “I go mek shɔ se na Devid in blɔd go bi kiŋ ɛn na so Devid in jɛnareshɔn dɛn go bi kiŋ te go. . . . I go bi kiŋ sote go.” (Sɛkɛn Samiɛl 7:​12, 13; Sam 89:​3) Naw i dɔn klia se na frɔm Devid in famili di Pikin we Gɔd prɔmis go kɔmɔt. Bɔt fɔ se ɔdinari mɔtalman go rul “sote go”? (Sam 89:​20, 29, 34-36) Ɛn fɔ se da kayn kiŋ de go pul mɔtalman pan sin ɛn day?

13, 14. (a) Akɔdin to Sam 110, us prɔmis Jiova bin mek to in Kiŋ we i bin dɔn anɔynt? (b) Wetin bak Jiova in prɔfɛt dɛn bin tɔk bɔt di Pikin we gɛt fɔ kam?

¹³ Di oli spirit bin mek Devid rayt se: “PAPA GƆD [“Jiova,” NWT] tɔk to di Kiŋ. I se, ‘Kam sidɔm na mi raytan say, usay pɔsin we gɛt ɔna fɔ de, te a put yu ɛnimi dɛn ɔnda yu fut.’ PAPA GƆD [“Jiova,” NWT] dɔn swɛ se, ‘Lɛkɛ Mɛlkizidɛk na so yusɛf go bi man we de mek sakrifays fɔ pipul sin sote go, ɛn i nɔ go chenj in maynd.’” (Sam 110:​1, 4) Devid bin de tɔk bɔt di Mɛsaya ɔ di Pikin we Gɔd bin dɔn prɔmis se go kam. (Akt 2:​35, 36) Nɔto Jerusɛlɛm dis kiŋ go de we i de rul, na ɛvin i go de na Jiova in “raytan.” Dat go mek nɔto Izrɛl nɔmɔ i go gɛt pawa fɔ rul, bɔt i go gɛt pawa fɔ rul di wan ol wɔl. (Sam 2:​6-8) Dis skripchɔ pul mɔ sikrit dɛn na do. Insay de, Jiova bin dɔn prɔmis se di Mɛsaya “go bi man we de mek sakrifays fɔ pipul sin” jɔs “lɛkɛ Mɛlkizidɛk.” Jɔs lɛk aw Mɛlkizidɛk na bin kiŋ ɛn prist insay Ebraam in tɛm, na so Gɔd bin dɔn pik di Pikin we de kam fɔ bi Kiŋ ɛn Prist!—Jɛnɛsis 14:​17-20.

¹⁴ As tɛm de go, Jiova bin de yuz in prɔfɛt dɛn fɔ mek pipul dɛn no mɔ bɔt in oli sikrit. Fɔ ɛgzampul, Ayzaya bin tɔk bɔt aw di Pikin go sakrifays in layf. (Ayzaya 53:​3-12) Mayka bin sho usay di Mɛsaya go bɔn. (Mayka 5:​2) Daniɛl bin ivin tɔk bɔt di ɛgzakt tɛm we di Pikin go kam ɛn we i go day.—Daniɛl 9:​24-27.

15, 16. (a) Aw i bi se “uman bɔn” Jiova in Pikin? (b) Wetin Jizɔs gɛt frɔm in mɔtalman mama ɛn papa? Ustɛm i kam as di Pikin we Gɔd bin dɔn prɔmis se go kam?

¹⁵ Pipul dɛn nɔ bin no aw di tin dɛn we di prɔfɛt dɛn bin tɔk bɔt di Pikin go apin pas te di Pikin insɛf sɛf kam. Galeshians 4:​4 se: “We di tɛm dɔn, Gɔd sɛn in Pikin, we wan uman bɔn.” Bifo di Pikin kam, wan enjɛl tɛl wan Ju uman we na vajin ɛn we nem Meri se: “Luk! yu go gɛt bɛlɛ ɛn bɔn bɔypikin, ɛn yu fɔ gi am di nem Jizɔs. Dis pikin go bi pɔsin we gret, ɛn dɛn go kɔl am di Wan we De Pantap Ɔlman, in Pikin, ɛn Jiova Gɔd go gi am in gret gret granpa Devid in tron . . . Oli spirit go kam pan yu, ɛn di Wan we De Pantap Ɔlman go yuz in pawa fɔ kɔba yu. Na dat mek di pikin we yu go bɔn go oli, ɛn dɛn go kɔl am Gɔd in Pikin.”—Lyuk 1:​31, 32, 35.

¹⁶ Leta, Jiova tek di layf we in Pikin bin gɛt na ɛvin ɛn put am insay Meri in bɛlɛ, so dat uman go bɔn am. Meri na bin uman we nɔ pafɛkt. Bɔt Jizɔs nɔ bin gɛt sin frɔm am, bikɔs in na “Gɔd in Pikin.” Dɔn bikɔs Jizɔs in mɔtalman mama ɛn papa bin kɔmɔt frɔm Devid, dat bin mek i gɛt di rayt fɔ sidɔm na Devid in tron. (Akt 13:​22, 23) We Jizɔs bin de baptayz insay di ia 29, Jiova bin anɔynt am wit oli spirit ɛn se: “Na mi Pikin dis, di wan we a rili lɛk.” (Matyu 3:​16, 17) Di Pikin dɔn kam! (Galeshians 3:​16) Tɛm dɔn rich fɔ lɛ mɔ oli sikrit kɔmɔt na do.—2 Timoti 1:​10.

17. Aw dɛn ɛp wi fɔ ɔndastand wetin Jɛnɛsis 3:​15 min?

¹⁷ We Jizɔs bin de du in prichin wok, i bin sho se di snek we di Baybul tɔk bɔt na Jɛnɛsis 3:​15 na Setan ɛn di snek in pikin dɛn na di wan dɛn we de fala Setan. (Matyu 23:​33; Jɔn 8:​44) Leta, dɛn bin sho aw dɛn go dɔnawe wit dɛn ɔl. (Rɛvɛleshɔn 20:​1-3, 10, 15) Ɛn dɛn bin sho se di uman na “Jerusɛlɛm we de ɔp,” we na di pat pan Jiova in  ɔganayzeshɔn we de na ɛvin, we na di enjɛl dɛn, we tan lɛk wɛf. *—Galeshians 4:​26; Rɛvɛleshɔn 12:​1-6.

18. Wetin mek dɛn mek “di nyu agrimɛnt”?

¹⁸ Sɔntɛm di wɔndaful sikrit we pas ɔl we bin kɔmɔt na do bin apin di nɛt bifo Jizɔs day we i tɛl in fetful disaypul dɛn bɔt “di nyu agrimɛnt.” (Lyuk 22:​20) Jɔs lɛk di “Lɔ agrimɛnt we Gɔd bin mek wit Mozis,” di wan dɛn we go de na dis nyu agrimɛnt go mekɔp “wan kiŋdɔm usay [dɛn] go bi kiŋ ɛn prist.” (Ɛksodɔs 19:​6, NWT; 1 Pita 2:​9) Dis agrimɛnt go mek wan neshɔn we go bi “di Izrɛl we na Gɔd in yon,” dat na di fetful wan dɛn nɔmɔ we Gɔd dɔn anɔynt ɛn we de fala Krays. (Galeshians 6:​16) Dɛn wan ya we go bi pat pan di nyu agrimɛnt go jɔyn Jizɔs fɔ blɛs mɔtalman!

19. (a) Wetin mek di nyu agrimɛnt go ebul fɔ mek Jizɔs in disaypul dɛn bi “wan kiŋdɔm usay [dɛn] go bi kiŋ ɛn prist” we go blɛs mɔtalman? (b) Wetin mek dɛn kɔl anɔyntɛd Kristian dɛn “nyu [pipul dɛn] we Gɔd dɔn mek”? Na dɛn ɔmɔs go rul wit Krays na ɛvin?

¹⁹ Bɔt wetin mek di nyu agrimɛnt go ebul fɔ mek Jizɔs in disaypul dɛn bi “wan kiŋdɔm usay [dɛn] go bi kiŋ ɛn prist” we go blɛs mɔtalman? Na bikɔs i nɔ de kɔndɛm Krays in disaypul dɛn se dɛn na sina dɛn, bifo dat, i de mek am pɔsibul fɔ lɛ Gɔd fɔgiv dɛn sin dɛn tru Krays in sakrifays. (Jɛrimaya 31:​31-34) We dɛn de du wetin rayt na Jiova in yay, i de adɔpt dɛn na in famili we de na ɛvin ɛn anɔynt dɛn wit oli spirit. (Romans 8:​15-17; 2 Kɔrintians 1:​21) Na so dɛn de gɛt “nyu layf fɔ mek [dɛn] gɛt wan op we go kɔntinyu fɔ de sote go. . . . Dɛn dɔn kip am na ɛvin.” (1 Pita 1:​3, 4) Bikɔs dis na sɔntin we nyu to mɔtalman  dɛn, di Kristian dɛn we Gɔd dɔn anɔynt wit oli spirit na “nyu [pipul dɛn] we Gɔd dɔn mek.” (2 Kɔrintians 5:​17) Di Baybul sho se na 144,000 pipul dɛn gɛt fɔ jɔyn Jizɔs fɔ rul na ɛvin fɔ fri mɔtalman dɛn.—Rɛvɛleshɔn 5:​9, 10; 14:​1-4.

20. (a) Us pat pan di oli sikrit bin kɔmɔt na do insay di ia 36? (b) Udat dɛn go ɛnjɔy di blɛsin dɛn we Gɔd bin prɔmis Ebraam?

²⁰ Jizɔs ɛn dɛn anɔyntɛd Kristian dɛn ya dɔn bi “Ebraam in pikin dɛn.” * (Galeshians 3:​29) Di fɔs wan dɛn we Gɔd pik na bin Ju dɛn. Bɔt insay di ia 36, wan ɔda pat pan di oli sikrit bin kɔmɔt na do: Pipul dɛn we nɔto Ju bin gɛt di op fɔ go de na ɛvin. (Romans 9:​6-8; 11:​25, 26; Ɛfishians 3:​5, 6) Fɔ se na anɔyntɛd Kristian dɛn nɔmɔ go ɛnjɔy di blɛsin dɛn we Gɔd bin prɔmis Ebraam? Nɔ-o, bikɔs Jizɔs in sakrifays de bɛnifit di wan ol wɔl. (1 Jɔn 2:​2) As tɛm de go, Jiova bin sho se “bɔku bɔku pipul dɛn” we pɔsin nɔ go ebul kɔnt go sev di tɛm we i go dɔnawe wit Setan in wɔl. (Rɛvɛleshɔn 7:​9, 14) Bɔku pipul dɛn go gɛt layf bak ɛn gɛt di chans fɔ de na Paradays sote go!—Lyuk 23:​43; Jɔn 5:​28, 29; Rɛvɛleshɔn 20:​11-15; 21:​3, 4.

21, 22. Aw Jiova in oli sikrit sho se i gɛt sɛns?

²¹ Di oli sikrit na wan wɔndaful we fɔ sho “di difrɛn difrɛn we dɛn we Gɔd de yuz in sɛns.” (Ɛfishians 3:​8-10) Jiova rili sho se i gɛt sɛns we i mek dis sikrit ɛn we i pul am na do smɔl smɔl. I sho se i gɛt sɛns bay we i mɛmba se nɔto ɔltin mɔtalman ebul fɔ du, ɛn i gi dɛn di chans fɔ sho wetin rili de na dɛn at.—Sam 103:​14.

²² Jiova sho bak se i gɛt sɛns pas ɔlman we i pik Jizɔs fɔ  bi Kiŋ. Wi kin abop pan Jiova in Pikin pas ɛni ɔda pɔsin we Jiova mek na ɛvin ɔ na di wɔl. We Jizɔs bin de na di wɔl as mɔtalman, difrɛn kayn prɔblɛm bin mit am. I rili ɔndastand di prɔblɛm dɛn we de mit mɔtalman. (Ibruz 5:​7-9) We di wan dɛn we gɛt fɔ rul wit Jizɔs? Insay di ia dɛn we dɔn pas, Jiova dɔn anɔynt man ɛn uman dɛn we gɛt difrɛn kɔlɔ, we de tɔk difrɛn langwej dɛn, ɛn we kɔmɔt difrɛn say dɛn. No prɔblɛm nɔ de we nɔ mit dɛn yet ɛn we dɛn nɔ bin ebul fɔ bia. (Ɛfishians 4:​22-24) Wi go rili ɛnjɔy we wi de ɔnda dɛn kiŋ ɛn prist ya we gɛt sɔri-at!

23. Us big big ɔnɔ Kristian dɛn gɛt we i kam pan Jiova in oli sikrit?

²³ Di apɔsul Pɔl bin rayt se: “Di oli sikrit we bin ayd ɔl dis tɛm ɛn we pipul dɛn we bin de trade trade nɔ bin no bɔt . . . i dɔn sho am to di oli wan dɛn.” (Koloshians 1:​26) Di oli wan dɛn we Jiova dɔn anɔynt dɔn ɔndastand bɔku tin bɔt di oli sikrit, ɛn dɛn dɔn mek bɔku bɔku pipul dɛn no bɔt am. Na big big ɔnɔ wi ɔl gɛt! Jiova dɔn “mek wi no di oli sikrit bɔt wetin i want.” (Ɛfishians 1:​9) Lɛ wi tɛl ɔda pipul dɛn bɔt dis wɔndaful sikrit, ɛn lɛ wi ɛp dɛnsɛf fɔ no gud wan bɔt di sɛns we Jiova Gɔd gɛt we bɔku pasmak!