YU LƐK fɔ go pati?— Bɔku gladi gladi kin de de. Yu tink se di Gret Ticha go want fɔ mek wi go pati dɛn?— Wɛl, i bin go na wan pati we dɛn bin mek fɔ pɔsin we de mared, ɛn sɔm pan in disaypul dɛnsɛf bin go wit am. Jiova na “di Gɔd we gladi ɔltɛm,” so i kin gladi we pipul dɛn kin ɛnjɔy dɛnsɛf pan pati dɛn we fayn.—Fɔs Lɛta To Timoti 1:11, NW; Jɔn 2:1-11.

Insay pej 29 na dis buk, wi lan se Jiova bin sheb di Rɛd Si midul so dat di Izrɛlayt dɛn go pas. Yu mɛmba we wi lan bɔt am?— Afta dat, di pipul dɛn bigin fɔ siŋ ɛn dans ɛn tɛl Jiova tɛnki. I bin fiba pati. Di pipul dɛn bin rili gladi, ɛn wi shɔ se Gɔd insɛf bin gladi.—Ɛksodɔs 15:1, 20, 21.

Afta lɛk 40 ia, di Izrɛlayt dɛn bin go na wan ɔda big pati. Bɔt di pipul dɛn we bin invayt dɛn nɔ bin ivin de wɔship Jiova. Infakt, dɛn bin de butu ɛn wɔship ɔda gɔd dɛn ɛn dɛn kin du mami ɛn dadi biznɛs wit pipul dɛn we dɛn nɔ mared to. Yu tink se i fayn fɔ go dɛn kayn pati dɛn de?— Wɛl, Jiova nɔ bin gladi, so i pɔnish di Izrɛlayt dɛn fɔ dat.—Di Nɔmba Dɛm 25:1-9; Fɔs Lɛta Fɔ Kɔrint 10:8.

 Di Baybul tɛl wi bɔt tu batde pati dɛn. Yu tink se wan pan dɛn na fɔ mek di Gret Ticha in batde?— Nɔ-o. Ɔl tu di batde pati dɛn na fɔ pipul dɛn we nɔ de wɔship Jiova. Wan na bin Kiŋ Ɛrɔd Antipas in batde. Na in bin de rul Galili we Jizɔs bin de de.

Kiŋ Ɛrɔd bin du bɔku bad tin dɛn. I tek in brɔda in wɛf fɔ insɛf. Di uman in nem na Ɛrodias. Gɔd in savant we na Jɔn we bin de baptayz pipul dɛn, bin tɛl Ɛrɔd se na bad tin i du so. Ɛrɔd nɔ bin lɛk wetin i tɔk. So i mek dɛn ol Jɔn ɛn put am na jel.—Lyuk 3:19, 20.

We Jɔn bin de na jel, di tɛm fɔ Ɛrɔd in batde rich. Ɛrɔd bin mek wan big big pati. I invayt bɔku impɔtant pipul dɛn. Dɛn ɔl bin it, drink, ɛn ɛnjɔy dɛnsɛf. Na de Ɛrodias in pikin kam dans fɔ dɛn. Ɔlman bin so gladi wit di we aw i dans dat Kiŋ Ɛrɔd bin want gi am wan spɛshal gift. I tɛl am se i “go gi am ɛnitin we i aks fɔ, ɛn if i want sɛf, in go sheb di kɔntri we i de rul ɛn gi am wan pat.”

 Wetin i fɔ aks fɔ? Yu tink se na mɔni? fayn klos dɛn? ɔ fayn fayn ples fɔ insɛf? Di titi nɔ bin no wetin i fɔ se. So i go to in mama, Ɛrodias, ɛn aks am ‘wetin i fɔ aks fɔ’?

Ɛrodias bin rili et Jɔn we de baptayz pipul dɛn. So i tɛl in pikin fɔ go aks fɔ Jɔn in ed. Di titi go bak to di kiŋ ɛn tɛl am se i ‘want mek i gi am Jɔn in ed na plet wantɛm.’

Kiŋ Ɛrɔd nɔ bin want fɔ kil Jɔn bikɔs i no se Jɔn na bin gud pɔsin. Bɔt Ɛrɔd bin dɔn mek prɔmis, ɛn i bin de fred wetin ɔda pipul dɛn we bin de na di pati go tɔk if i chenj in maynd. So i sɛn wan man na di jel fɔ go kɔt Jɔn in ed. I nɔ tu te, di man kam bak. I kam wit Jɔn in ed na plet ɛn i gi di titi. Dɔn di pikin go gi am to in mama.—Mak 6:17-29.

Na bad tin bak bin apin na di ɔda batde pati we di Baybul tɔk bɔt. Dis batde pati na bin fɔ di kiŋ na Ijipt. Na dis pati ya sɛf, di kiŋ bin mek dɛn kɔt pɔsin in ed. Dɔn i mek dɛn ɛng di man in bɔdi fɔ mek bɔd dɛn it am! (Jɛnɛsis 40:19-22)  Yu tink se Gɔd bin gladi fɔ dɛn tu pati ya?— Yu go want fɔ de na dɛn tu pati dɛn de?—

Wi no se rizin de fɔ ɛnitin we de insay di Baybul. I tɔk bɔt jɔs tu batde pati. Ɛn pan dɛn ɔl tu, dɛn du bad tin dɛn pan di pati. So, wetin yu tink se Gɔd de tɛl wi bɔt batde pati dɛn? Yu tink se Gɔd want mek wi mek batde pati dɛn?—

Na tru se tide dɛn nɔ kin kɔt pɔsin in ed na dɛn kayn pati dɛn. Bɔt batde pati biznɛs bigin wit pipul dɛn we nɔ de wɔship di tru Gɔd. Wan buk we masta sabi bukman dɛn bin rayt, tɔk bɔt di batde pati dɛn we di Baybul tɔk bɔt. I se: “Na di wan dɛn we de sin . . . nɔmɔ go mek gladi gladi fɔ di de we dɛn bɔn.” (The Catholic Encyclopedia) Yu go want fɔ tan lɛk dɛn?—

We di Gret Ticha, yu tink se i mek in batde?— Nɔ-o, di Baybul nɔ tɔk ɛnitin bɔt batde pati fɔ Jizɔs. Infakt, Jizɔs in fɔstɛm disaypul dɛn nɔ bin de mek in batde. Yu no wetin mek leta pipul dɛn pik Disɛmba 25 fɔ bigin mek Jizɔs in batde?—

Wan buk we masta sabi bukman dɛn rayt tɔk se dɛn pik da de de bikɔs “di pipul dɛn na Rom bin dɔn de mek batde pati fɔ Satɔn we na di san.” (The World Book Encyclopedia) So pipul dɛn disayd fɔ mek Jizɔs in batde di sem de we pipul dɛn we de wɔship lay lay gɔd dɛn bin dɔn pik fɔ dɛn yon ɔlide!

Yu no wetin mek wi go se nɔto Disɛmba dɛn bɔn Jizɔs?— Na bikɔs di Baybul tɛl wi se di tɛm we dɛn bɔn Jizɔs, man dɛn we de mɛn ship dɛn bin de na do na nɛt. (Lyuk 2:8-12) Ɛn dɛn nɔ bin fɔ de na do dɛn tɛm dɛn de bikɔs Disɛmba insay Izrɛl, na mɔnt we ren kin kam ɛn di ples kin kol.

 Bɔku pipul dɛn no se Krismas de nɔto Jizɔs in batde. Dɛn ivin no se da de de pipul dɛn we de wɔship lay lay gɔd dɛn, bin gɛt ɔlide we Gɔd nɔ bin gladi fɔ. Bɔt bɔku pipul dɛn stil de sɛlibret Krismas. Na pati biznɛs mɔ dɛn kin tink bɔt, dɛn nɔ kin want fɔ no wetin Gɔd rili tink bɔt am. Bɔt wi want fɔ mek Jiova gladi, nɔto so?—

So we wi want fɔ mek pati, wi fɔ mek shɔ se na pati we Jiova go gladi fɔ. Wi kin mek dɛn ɛnitɛm insay di ia. Wi nɔ nid fɔ wet fɔ wan spɛshal de. Wi kin it spɛshal it ɛn rili ɛnjɔy fɔ ple gem. Yu go lɛk fɔ du dat?— Sɔntɛm yu go tɔk to yu mama ɛn papa fɔ mek dɛn ɛp yu fɔ mek pati. Dat go fayn, nɔto so?— Bɔt bifo yu plan fɔ mek pati, yu fɔ mek shɔ se na tin we Gɔd go gladi fɔ.