DI TRU bɔt wetin? Bɔt sɔm pan di impɔtant kwɛstyɔn dɛn we mɔtalman dɔn ɛva aks. Sɔmtɛm yu dɔn aks kwɛstyɔn lɛk dɛn wan ya:

• Gɔd rili bisin bɔt wi?

• Wɔ ɛn sɔfa go ɛva dɔn?

• Wetin kin apin to wi we wi day?

• Yu fil se wi go ɛva si di wan dɛn we dɔn day?

• Aw a go pre mek Gɔd yɛri mi?

• Aw a go gɛt gladi at?

Usay yu go luk fɔ ansa to dɛn kwɛstyɔn ya? If yu aks difrɛn pipul dɛn, yu go gɛt difrɛn ansa. We yu aks pipul we se dɛn sabi bɔt Gɔd, yu go stil gɛt difrɛn ansa. Sɔm pan dɛn ansa ya luk kɔrɛkt, bɔt i nɔ go te dɛn go chenj dɛn.

Wan buk de we gɛt ansa dɛn we wi kin abop pan. Na buk we de tɔk tru. We Jizɔs Krays bin de pre to Gɔd, i se: “Yu wɔd na tru.” (Jɔn 17:17) Tide, na da Wɔd de wi de kɔl di Oli Baybul. Na di ɔda pej dɛn, yu go no smɔl tin bɔt di Baybul in tru ansa to dɛn kwɛstyɔn we de ɔp.

WETIN MEK WI KIN AKS DIS KWƐSTYƆN: Di wɔl we wi de insay, fulɔp wit bad ɛn tin we nɔ rayt. Bɔku rilijɔn de tich se na Gɔd de mek wi de sɔfa.

WETIN DI BAYBUL TICH: Gɔd nɔ de ɛva du bad. Lɛta Fɔ Rom 9:14 se: “Wɛl, wetin wi go se? Wi go se Gɔd nɔ de du wetin rayt? Gɔd de du wetin rayt ɔltɛm!” Gɔd gɛt fayn tin dɛn we i want du fɔ mɔtalman. Na dat mek Jizɔs lan wi fɔ pre se: “Papa Gɔd we de na ɛvin: . . . mek . . . yu rul wi; mek wetin yu want, bi na dis wɔl, lɛkɛ aw i de bi na ɛvin.” (Matyu 6:​9, 10) Bikɔs Gɔd bisin bɔt wi, na dat mek i dɔn du bɔku tin, fɔ mek wetin i bin dɔn tɔk kam tru.​—⁠Jɔn 3:16.

Ɔda skripchɔ dɛn fɔ rid: Jɛnɛsis 1:​26-28; Jems 1:13 ɛn Pita In Fɔs Lɛta 5:​6, 7.

WETIN MEK WI KIN AKS DIS KWƐSTYƆN: Wa de mek bɔku pipul stil de day. Sɔfa dɔn mit wi ɔl.

WETIN DI BAYBUL TICH: Gɔd bin dɔn se di tɛm go kam we kolat go de na di wan ol wɔl. We Gɔd gɛt fɔ rul wi wit in gɔvmɛnt we de na ɛvin, pipul dɛn nɔ go no bɔt wɔ igen. God “de mek ɔl udat de fɛt na [di] wɔl, lɛf fɔ fɛt; i de pwɛl pwɛl ɔl wetin dɛn de tek fɛt.” (Sam 46:⁠9) Gɔd go mek sɔfa ɛn tin we nɔ rayt dɔn. Di Baybul prɔmis wi se: “[Gɔd] go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs [lɛk di sɔfa ɛn tin we nɔ rayt tide] nɔ go de igen.”​—⁠Rɛvɛleshɔn 21:​3, 4.

Ɔda skripchɔ dɛn fɔ rid: Sam 37:​10, 11 ɛn Mayka 4:​1-4.

WETIN MEK WI KIN AKS DIS KWƐSTYƆN: Bɔku rilijɔn na di wɔl de tich se sɔmtin de insay mɔtalman we nɔ de day we di pɔsin dɔn day. Sɔm dɛn biliv se dayman gɛt pawa fɔ du bad to wi we gɛt layf ɔ Gɔd go put di wan dɛn we de du bad na ɛl faya.

WETIN DI BAYBUL TICH: We pɔsin dɔn day, i nɔ gɛt layf igen. Ɛkliziastis 9:5 se: “Dayman nɔ de no natin.” Bikɔs dayman nɔ no natin, dɛn nɔ gɛt pawa fɔ du wi bad ɔ ɛp wi we gɛt layf.​—⁠Sam 146:3, 4.

Ɔda skripchɔ dɛn fɔ rid: Jɛnɛsis 3:19 ɛn Ɛkliziastis 9:​6, 10.

WETIN MEK WI KIN AKS DIS KWƐSTYƆN: Wi want fɔ liv ɛn ɛnjɔy layf wit di wan dɛn we wi lɛk. Na nɔmal tin fɔ mek wi want fɔ si di wan dɛn we wi lɛk we bin dɔn day.

WETIN DI BAYBUL TICH: Bɔku pipul we bin dɔn day go gɛt layf bak. Jizɔs prɔmis wi se “ɔl dɛn pipul we dɔn day . . . go rayz [grap bak] frɔm dɛn grev.” (Jɔn 5:​28, 29) Di wan dɛn we go gɛt layf bak, go gɛt chans fɔ de insay Paradays lɛk aw Gɔd bin want am frɔm tɛm. Insay di bambay we Gɔd prɔmis wi, wan bɔt sɛf nɔ go de pan wɛlbɔdi biznɛs ɛn layf go de sote go fɔ di wan dɛn we yɛri in wɔd. Di Baybul se: “Udat dɛn de du wetin rayt go gɛt di land, ɛn dɛn go de de sote go.”​—⁠Sam 37:29.

Ɔda skripchɔ dɛn fɔ rid: Job 14:​14, 15; Lyuk 7:​11-17 ɛn Di Apɔsul Dɛn Wok [Akt] 24:15.

WETIN MEK WI KIN AKS DIS KWƐSTYƆN: Ɔlman de pre. Bɔt bɔku pipul fil se Gɔd nɔ de ansa dɛn we dɛn de pre.

WETIN DI BAYBUL TICH: Jizɔs bin tich wi se wi nɔ fɔ se di sem tin ɔltɛm. I se: “Wɛn una de pre, una nɔ fɔ tɔk plɛnti plɛnti wɔd dɛn.” (Matyu 6:⁠7) Fɔ mek Gɔd ansa wi we wi de pre, wi fɔ pre di we aw i want. Fɔ du dis, wi fɔ lan wetin Gɔd want ɛn pre da we de. Jɔn In Fɔs Lɛta 5:14 se: “Wi biliv se wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.”

Ɔda skripchɔ dɛn fɔ rid: Sam 65:2; Jɔn 14:​6, 14 ɛn Jɔn In Fɔs Lɛta 3:22.

WETIN MEK WI KIN AKS DIS KWƐSTYƆN: Bɔku pipul fil se we dɛn fayn, gɛt mɔni ɛn bɔku pipul sabi dɛn, go mek dɛn gɛt gladi at. Pan ɔl we dɛn gɛt dɛn tin ya, dɛn nɔ stil gladi.

WETIN DI BAYBUL TICH: Jizɔs bin sho wi aw wi go gɛt gladi at we i se: “Blɛsin de fɔ di pipul dɛn we yɛri Gɔd in wɔd ɛn du wetin Gɔd tɛl dɛn.” (Lyuk 11:28) Fɔ gɛt gladi at, wi fɔ lan di tru bɔt Gɔd ɛn wetin i want fɔ mɔtalman. Dis tru tin bɔt Gɔd de insay di Baybul. Na da tru de go mek wi no wetin impɔtant na layf ɛn wetin nɔ impɔtant. Fɔ mek wi layf bɛtɛ, wi fɔ gri mek di Baybul sho wi wetin fɔ du ɛn aw fɔ du am.

Ɔda skripchɔ dɛn fɔ rid: Prɔvabs 3:​5, 6, 13-18 ɛn Fɔs Lɛta To Timoti 6:​9, 10.

Wi jɔs dɔn luk smɔl insay di Baybul fɔ di ansa to dɛn siks kwɛstyɔn. Yu go lɛk fɔ no mɔ? If yu ansa na yɛs, dis sho se yu na pɔsin we want fɔ lan bɔt Gɔd. Yu go dɔn de aks ɔda kwɛstyɔn dɛn lɛk dis: ‘If Gɔd bisin bɔt wi, wetin mek wi stil de sɔfa? Aw a go mek mi famili layf bɛtɛ?’ Di Baybul gi kɔrɛkt ansa to dis ɛn ɔda kwɛstyɔn dɛn.

Pan ɔl dis, bɔku pipul kin fred fɔ rid di Baybul. Dɛn fil se di Baybul na buk we at fɔ ɔndastand. Yu go want mek dɛn ɛp yu no di ansa dɛn frɔm di Baybul? Jiova Witnɛs dɛn gɛt tu we fɔ ɛp yu.

Di fɔs we, na wan buk we de insay Inglish, we dɛn kin yuz fɔ ɛp pipul dɛn fɔ no di ansa to sɔm impɔtant kwɛstyɔn dɛn. Di buk nem Wetin Rili di Baybul De Tich? Di sɛkɛn we, dɛn kin tich pipul dɛn di Baybul fri na dɛn os. Wan Jiova Witnɛs go kam tich yu di Baybul na yu os ɔ ɛni ɔda say we yu want fɔ smɔl tɛm insay di wik, ɛn yu nɔ go pe natin. Bɔku pipul na di wɔl dɔn ɛnjɔy fɔ stɔdi di Baybul. Bɔku dɔn se: “A dɔn fɛn di tru!”

Nɔ ɔda jɛntri nɔ de we pas dis. Di tru we de insay di Baybul, dɔn fri pipul dɛn frɔm juju ɛn ɛnitin we de mek dɛn fred. I dɔn gi wi op, mek wi layf bɛtɛ ɛn gi wi gladi at. Jizɔs bin se: “Una go no wetin tru bɔt Gɔd, ɛn dat go mek una fri.”​—⁠Jɔn 8:32.