KWƐSTYƆN 6
Wetin Go Ɛp Mi Nɔ fɔ Du di Bad Tin we Mi Kɔmpin dɛn Want?
WETIN YU GO DU?
Tink bɔt dis: Brayan in bɛlɛ bwɛl we i si tu pan in skulmet dɛn de kam. Dɛn bin dɔn tray fɔ fos am tu tɛm insay dis wik fɔ smok. Dis go mek di tɔd tɛm.
Di fɔs bɔbɔ tɔk se:
“Na yu wangren de ya bak tide? Lɛ a sho yu to wan mi padi.”
I wink in yay we i yuz di wɔd “padi” ɛn tek sɔntin na in pɔkit ɛn sho am to Brayan.
Brayan si di sigrɛt na di bɔbɔ in an. In bɛlɛ bwɛl mɔ ɛn mɔ.
Brayan tɔk se: “A sɔri, a dɔn ɔlrɛdi tɛl una se a nɔ want fɔ . . .”
Di ɔda bɔbɔ kɔt wɔd na in mɔt ɛn tɔk se: “Nɔ fred bo!”
Brayan mek maynd ɛn tɔk se: “A nɔ de fred!”
Dis sem bɔbɔ put in an rawnd Brayan in sholda ɛn tɔk saful wan se: “Jɔs tek am.”
Di fɔs bɔbɔ briŋ di sigrɛt bifo Brayan in fes ɛn tɔk saful wan se: “Wi nɔ go tɛl ɛnibɔdi. Nɔbɔdi nɔ go ɛva no.”
If yu na bin Brayan, wetin yu fɔ dɔn du?
STƆP ƐN TINK!
Yu tink se Brayan in kɔmpin dɛn bin dɔn rili tink bɔt wetin dɛn de du? Yu tink se na wetin dɛn want na in dɛn disayd fɔ du? Nɔ-o. Na wetin dɛn kɔmpin dɛn de du na in dɛn dɔn falamakata. Dɛn want lɛ dɛn kɔmpin dɛn lɛk dɛn, so dɛn de alaw ɔda pipul dɛn fɔ disayd fɔ dɛn.
If dis sem tin apin to yu, wetin yu go du fɔ lɛ yu nɔ fala yu kɔmpin dɛn pan bad?
-
TRAY FƆ NO WETIN GO APIN
Di Baybul se: “Udat gɛt sɛns, nain de si denja i ayd pan am; bɔt udat ful de waka go insay de ɛn sɔfa fɔ dat.”—Prɔvabs 22:3.
Bɔku tɛm, yu kin si trɔbul fa. Fɔ ɛgzampul, lɛ wi se yu si sɔm pan yu skulmet dɛn, bɔt dɛn de fa say smɔl, ɛn dɛn de smok. If yu tray fɔ tink bɔt wetin go apin, i go ɛp yu fɔ no wetin fɔ du.
-
TINK
Di Baybul se: “Tray ɔltɛm mek [yu] at klin bifo Gɔd.”—Di Apɔsul Dɛn Wok [Akt] 24:16.
Aks yusɛf, ‘Aw a go fil afta sɔm tɛm if a du sɔntin jɔs bikɔs ɔlman de du am?’ Na tru se yu kɔmpin dɛn go lɛk yu fɔ sɔm tɛm. Bɔt aw yu go fil leta? Yu rɛdi fɔ ayd udat yu bi ɛn di tin dɛn we yu biliv jɔs fɔ lɛ yu klasmet dɛn lɛk yu?—Ɛksodɔs 23:2.
-
DISAYD
Di Baybul se: “Udat gɛt sɛns de tek tɛm.”—Prɔvabs 14:16.
As tɛm de go, wi gɛt fɔ disayd wetin fɔ du ɛn bia wit ɛnitin we kam wi we afta dat. Di Baybul tɛl wi bɔt pipul dɛn lɛk Josɛf, Job, ɛn Jizɔs, we bin disayd fɔ du di rayt tin. I tɛl wi bak bɔt Ken, Isɔ, ɛn Judas, we nɔ bin disayd fɔ du di rayt tin. Wetin yu go du?
Di Baybul se: “Da pɔsin we yu kin trɔs pan lili tin na pɔsin we yu kin trɔs pan big tin.” (Lyuk 16:10) If yu bin dɔn tink bɔt di bad tin dɛn we go apin if yu du wetin yu kɔmpin dɛn want, yu go si se i izi fɔ lɛ yu tɛl dɛn wetin yu disayd ɛn yu go gɛt bɔku bɛnifit we yu du dat.
Nɔ wɔri, yu nɔ gɛt fɔ tɔk bɔku to yu kɔmpin dɛn. Jɔs se NƆ ɛn min wetin yu se. Ɔ fɔ mek dɛn no klia wan se yu nɔ go du wetin dɛn want, yu kin se:
-
“Nɔ miks mi de o!”
-
“A nɔ de du dis kayn tin!”
-
“Bo, yu no mi naw, a nɔ de put an pan dɛn kayn tin ya!”
Di men tin we yu fɔ du na fɔ mek dɛn no wantɛm wantɛm se yu nɔ go du wetin dɛn want. Ɛn yu fɔ tɔk am di we we go sho se yu rili min wetin yu de se. If yu du dat, yu go sɔprayz fɔ si se dɛn go kɔmɔt biɛn yu kwik kwik wan!
WETIN FƆ DU WE DƐN PROVOK YU?
If yu du wetin yu kɔmpin dɛn de tɛl yu, yu go fiba rɔbɔt we dɛn de kɔntrol
Wetin yu go du if yu kɔmpin dɛn provok yu? Lɛ wi se dɛn aks yu se, “Wetin apin, yu de fred?” Wan tin we yu fɔ no na dat we yu kɔmpin dɛn provok yu dis kayn we, dɛn jɔs want lɛ yu du wetin dɛn want. Wetin yu go du? Tu tin dɛn de we yu kin du.
-
We dɛn provok yu, yu kin se yu gri. (“Na tru, a de fred!” Dɔn yu kin tɛl dɛn wetin mek.)
-
We dɛn tray fɔ mɔna yu, yusɛf kin mɔna dɛn. Tɛl dɛn wetin mek yu nɔ go du am ɛn mɛmba dɛn se dɛnsɛf ebul fɔ du di rayt tin. (“A bin tink se yu tu gɛt sɛns fɔ lɛ ɔda pɔsin mek yu bigin smok!”)
If yu kɔmpin dɛn kɔntinyu fɔ provok yu, jɔs go yu yon we! Mɛmba se, di mɔ we yu tinap de, na di mɔ dɛn go de mɔna yu. We yu kɔmɔt de, i de sho se yu nɔ de alaw ɔda pipul dɛn fɔ chenj udat yu bi.
I mek sɛns fɔ ɔndastand se yu nɔ go ebul ayd pan yu kɔmpin dɛn. Bɔt yu kin disayd wetin yu want fɔ du, tɛl dɛn wetin mek yu nɔ go du am, ɛn kɔntrol yusɛf. Mɛmba se na yu gɛt fɔ disayd!—Jɔshwa 24:15.
