IMAJIN se wan nyu dɔktɔ kam na yu eria. Di fɔs tɛm we yu si am, yu nɔ biliv se na gud dɔktɔ. Bɔt wetin yu go du if yu si se sɔm pan yu padi dɛn go na in ɔspitul fɔ lɛ i mɛn dɛn, ɛn di dɔktɔ rili mɛn dɛn? Yusɛf nɔ go want fɔ go na da dɔktɔ de in ɔspitul?

Semweso, di Oli Skripchɔ dɛn tan lɛk dɔktɔ. Sɔm pipul dɛn fil se Gɔd in Wɔd nɔ go ebul fɔ ɛp dɛn. Bɔt we dɛn fala di advays dɛn we de insay de, i kin rili ɛp dɛn fɔ chenj ɛn liv dɛn layf di rayt we. Lɛ wi tɔk bɔt sɔm ɛgzampul dɛn.

Wan uman we nem Sumietɔn bin tɔk se: “Di tɛm we wi jɔs mared, mi man we nem Dumas nɔ bin de spɛn tɛm wit mi. Dis kin mek a gens ɛn sɔntɛnde, a kin tɛl am bad wɔd, a kin sɛn tin dɛn pan am, ɛn a kin ivin nak am. Sɔm ɔda tɛm dɛn, a kin vɛks pasmak ɛn dat kin mek a fent.

“We Dumas bigin fɔ stɔdi Gɔd in Wɔd, a bin de provok am. Bɔt a bin de ayd na di ɔda rum fɔ lisin we dɛn bin de stɔdi am. Wan de, a yɛri dɛn rid wan vas we se: ‘Wɛf fɔ put insɛf ɔnda in man lɛkɛ se na Krays i de put insɛf ɔnda . . . mared uman fɔ rɛspɛkt in man.’ (Lɛta Fɔ Ɛfisɔs 5:​22, 33) Dɛn wɔd ya bin tɔch mi at. A beg Gɔd fɔ mek i fɔgiv mi fɔ we a bin de kɔs mi man, ɛn a pre fɔ mek i ɛp mi fɔ bi gud wɛf. I nɔ tu te, mi ɛn Dumas bigin fɔ stɔdi di skripchɔ dɛn togɛda.”

Gɔd in Wɔd tɔk bak se: “Man fɔ lɛk in wɛf lɛkɛ aw i lɛk in yon bɔdi.” (Lɛta Fɔ Ɛfisɔs 5:​28) Sumietɔn kɔntinyu fɔ tɔk se: “Di tin dɛn we wi bin de lan bin de ɛp wi. A bigin fɔ mek ti fɔ Dumas we i kɔmɔt wok ɛn tɔk fayn to am. Dumas insɛf bigin fɔ sho se i rili lɛk mi, ɛn i bin de ɛp mi fɔ du sɔm wok dɛn na os. Wi ɔl tu bin de tray fɔ de du gud to wisɛf, sɔri fɔ wisɛf, ɛn fɔgiv wisɛf. (Lɛta Fɔ Ɛfisɔs 4:​32) Dat bin mek smɔl smɔl, wi bin de lɛk ɛn rɛspɛkt wisɛf mɔ ɛn mɔ. Naw, i dɔn pas 40 ia we wi de ɛnjɔy gladi at na wi mared-os. Di fayn advays dɛn we de na Gɔd in Wɔd, nain sev wi mared!”

Wan man we nem Teyib tɔk se: “A bin gɛt bad bad wamat. Mi ɛn bɔku pipul dɛn kin fɛt ɛn sɔntɛnde, a kin trɛtin dɛn wit gun. Mi wɛf nem Kɔstriya. We a kin dɔn vɛks, a kin bit am ɛn ib am na grɔn. Bɔku pipul dɛn bin de fred mi.

“Wan de, a rid wetin Jizɔs bin tɔk we i se: ‘A de gi una nyu lɔ we se: una fɔ lɛk una kɔmpin. Una fɔ lɛk dɛn lɛkɛ aw a lɛk una.’ (Jɔn 13:​34) Dis tin we a rid bin rili tɔch mi at, so a mekɔp mi maynd fɔ chenj. We mi at kin wam, a kin pre to Gɔd lɛ i ɛp mi mek mi at kol. I nɔ kin tu te mi at kin kol. Mi ɛn mi wɛf fala di advays we de na Lɛta Fɔ Ɛfisɔs 4:​26, 27 we tɔk se: ‘Una nɔ fɔ vɛks ol de. Una nɔ gi Setan da chans de.’ Ɛni nɛt, wi kin rid di skripchɔ dɛn ɛn pre togɛda fɔ lɛ Gɔd ɛp wi. Dis kin mek ala ala nɔ de na di os ɛn i kin mek wi lɛk wisɛf mɔ ɛn mɔ.

“Naw, pipul dɛn no mi as pɔsin we lɛk pis. Mi wɛf ɛn mi pikin dɛn lɛk mi ɛn dɛn rɛspɛkt mi. A gɛt bɔku padi dɛn, ɛn a rili de fil se a de nia Gɔd. Fɔ tru, a rili gladi.”

Wan man we nem Goin tɔk se: “A bin de insay wan gang wit sɔm yɔŋ pipul dɛn, a bin de smok bad bad wan, ɛn bɔku tɛm we a dɔn drink, a kin fɔdɔm na strit mi chak chak wan ɛn na de a kin slip. A bin de yuz ɛn sɛl bad bad drɔgs dɛn lɛk jamba ɛn wan ɔda drɔgs we dɛn kɔl ecstasy. A kin kip dɛn ɔnda mi bulɛtpruf vɛst. Pan ɔl we a bin gɛt maynd fɔ du sɔntin, a bin rili de fred.

“Dɔn sɔmbɔdi sho mi dis skripchɔ we se: ‘Mi pikin, nɔ fɔgɛt wetin a de tich yu . . . dat go mek yu gɛt lɔng layf ɛn bɛtɛ go fala yu na [di] wɔl.’ (Prɔvabs 3:​1, 2)  A want fɔ gɛt lɔng layf ɛn kolat! A rid bak na Gɔd in Wɔd se: ‘Gɔd dɔn mek ɔl dɛn prɔmis ya fɔ wi. So, lɛ wi nɔ du ɛnitin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi sho pipul se wi de fred Gɔd.’ (Sɛkɛn Lɛta Fɔ Kɔrint 7:​1) So a lɛf fɔ tek drɔgs, a lɛf di gang we a bin de, ɛn a bigin fɔ sav Gɔd.

“I dɔn pas 17 ia naw we a dɔn lɛf fɔ tek drɔgs. A gɛt wɛlbɔdi, mi famili gladi, a gɛt gud padi dɛn, ɛn a gɛt klin kɔnshɛns. A nɔ de slip na strit mi chak chak wan igen bifo dat a de ledɔm na mi bed wit kolat ɛni nɛt.”

Wan man we nem Bambaŋ tɔk se: “We a bin yɔŋ, a bin de brok lɔ, ɛn di wan dɛn mɔ we a bin de du bad na di wan dɛn we de na ɔda trayb we a bin et.

“Bɔt as tɛm de go, a bigin fɔ luk fɔ Gɔd. We a bin de du dat, a mit wan grup we bin de kam togɛda fɔ stɔdi di Oli Skripchɔ dɛn. Insay dis grup, sɔm pipul dɛn we de na di trayb we a bin et grit mi fayn fayn wan! A bin si bak se pipul dɛn frɔm difrɛn kɔntri dɛn bin de insay dis grup. Dɛn bin lɛk dɛnsɛf ɛn dɛn bin gladi. A bin kɔle! A kam fɔ ɔndastand di skripchɔ we se: ‘Fɔ tru, Gɔd nɔ de luk ɛnibɔdi bɛtɛ pas in kɔmpin. Gɔd go mek ɛnibɔdi we rɛspɛkt am ɛn du wetin i want, bi in yon.’—Di Apɔsul Dɛn Wok [Akt] 10:​34-35.

“Tide, a nɔ et ɔda pipul dɛn we de na ɔda trayb ɔ we kɔmɔt na ɔda kɔntri. Sɔm pan mi padi dɛn de na di trayb we a bin et trade. Gɔd dɔn yuz in Wɔd fɔ tich mi fɔ lɛk ɔda pipul dɛn.”

Wan man we nem Garoga tɔk se: “We a bin yɔŋ, dɛn lɔk mi na jel tri tɛm. Dɛn lɔk mi na jel tu tɛm fɔ we a tif, ɛn wan tɛm fɔ we a chuk chuk wan man. Leta, a jɔyn wan rebɛl grup ɛn kil bɔku pipul dɛn. Afta di fɛt dɔn, a bin de kɔntrol wan grup we bin de trɛtin pipul dɛn fɔ pul mɔni na dɛn an ɔ trɛtin pipul dɛn we dɛn want fɔ no bɔt sɔntin. Mi gaydman dɛn bin de fala mi ɛnisay we a de go. A bin wikɛd ɛn a lɛk fɛt-fɛt.

 “Bɔt wande, a rid dis skripchɔ we se: ‘If una lɛk una kɔmpin mɔtalman una go de bia wit dɛn; una go gɛt gud at fɔ dɛn; una nɔ go de jɛlɔs dɛn; una nɔ go prawd; ɔ fil se una bɛtɛ pas dɛn. Una nɔ go de du tin we go mek pipul nɔ rɛspɛkt una; una nɔ go want mek una yon biznɛs nɔmɔ go bifo; una nɔ go de vɛks; una nɔ go kip tin na una at.’ (Fɔs Lɛta Fɔ Kɔrint 13:​4, 5) Dɛn wɔd ya bin tɔch mi at. A muf go na wan nyu eria, stɔdi di skripchɔ dɛn, ɛn fala di advays dɛn we a bin de lan na Gɔd in Wɔd.

“Naw, mi nɔto man we lɛk fɛt-fɛt igen. Pipul dɛn rɛspɛkt mi bikɔs a de tich ɔda pipul dɛn bɔt Gɔd. A de liv mi layf di rayt we ɛn a rili gladi.”

Dɛn ɛgzampul ya we wi dɔn tɔk bɔt ɛn ɔda wan dɛn dɔn sho se “Gɔd in wɔd gɛt layf ɛn i gɛt pawa.” (Di Ibru Pipul Dɛn 4:​12) Di advays dɛn we de de simpul, dɛn go kɔrej yu ɛn mek yu liv yu layf fayn.

Yu tink se di Oli Skripchɔ dɛn go ɛp yusɛf? Fɔ tru, dɛn go ɛp yu, ilɛk uskayn prɔblɛm yu gɛt naw. Gɔd in Wɔd se: “Na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv, so dat ɛnibɔdi we de du Gɔd wok go gɛt ɔl wetin i fɔ gɛt ɛn bi wetin i fɔ bi so dat i go ebul du ɔl kayn gud wok lɛkɛ aw i fɔ du am.”—Sɛkɛn Lɛta To Timoti 3:​16, 17.

So lɛ wi tɔk bɔt sɔm smɔl smɔl tichin dɛn we de insay di Oli Skripchɔ.