SƐKSHƆN 11
Aw Pipul dɛn We Gɛt Rial Fet De Biev?
TIDE, bɔku pipul dɛn kin tɔk se dɛn gɛt fet. Bɔt Jizɔs bin tich se na smɔl pipul dɛn go gɛt rial fet. Jizɔs bin tɔk se: “Una pas na di smɔl get, bikɔs if una pas na di get we big ɛn fri, i go mek una day, ɛn bɔku pipul dɛn de waka de; bɔt di get we go gi layf, in smɔl ɛn i at fɔ waka, ɛn na wan wan pipul dɛn de fɛn am.”—Matyu 7:13, 14, NW.
Aw pipul dɛn de sho se dɛn gɛt rial fet tide? Jizɔs bin se: “Una go no dɛn bay wetin dɛn de du.” “Tik we gud go bia gud tin fɔ it, ɛn tik we nɔ gud go bia bad tin fɔ it.” (Matyu 7:16, 17) So pɔsin we gɛt rial fet go du “gud tin” jɔs lɛk we gud tik de bia gud tin fɔ it. Rial fet go mek pipul dɛn gɛt fayn abit dɛn we Gɔd want lɛ pipul dɛn gɛt. Aw dɛn go gɛt dɛn fayn abit ya?
Dɛn De Yuz Dɛn Pawa di Rayt We
Pipul dɛn we gɛt rial fet de yuz dɛn pawa ɛn di rayt we dɛn gɛt, fɔ ɔnɔ Gɔd ɛn bɛnifit ɔda pipul dɛn. Jizɔs bin tich se: “If ɛni wan pan una want bi bigman, i fɔ wok fɔ una ɔl lɛkɛ se in na una bɔy.” (Mak 10:43) Semweso, man we gɛt rial fet nɔ de yuz in pawa fɔ mek ɔda pipul dɛn sɔfa. I nɔ de du dat to pipul dɛn we de insay in os, ɔ to pipul dɛn we de na strit. I valyu in wɛf, i de rɛspɛkt am, ɛn i de tray fɔ gi am di tin dɛn we i nid. Di Skripchɔ dɛn se: “Una dɛn maredman, una fɔ lɛk una wɛf, una nɔ fɔ dil traŋa wan wit dɛn.” (Lɛta Fɔ Kɔlɔse 3:19) “Una dɛn maredman fɔ no se una wɛf nɔ gɛt trɛnk lɛkɛ man, so una fɔ de wit dɛn wit da ɔndastandin de, we rayt. Una fɔ rɛspɛkt dɛn bikɔs Gɔd go gi una ɛn dɛnsɛf layf we go de sote go. Una fɔ du ɔl dɛn tin ya, so dat natin nɔ go ambɔg di pre we una de pre.”—Pita In Fɔs Lɛta 3:7.
Mareduman we gɛt rial fet de “rɛspɛkt in man.” (Lɛta Fɔ Ɛfisɔs 5:33) Mareduman dɛn “fɔ lɛk dɛn man ɛn dɛn pikin” dɛn. (Taytɔs 2:4) Mama ɛn papa dɛn we gɛt rial fet de spɛn tɛm wit dɛn pikin dɛn ɛn tich dɛn bɔt Gɔd in lɔ ɛn advays dɛn. Gɔd in savant dɛn de trit ɔda pipul dɛn wit rɛspɛkt, ilɛksɛf dɛn de na os, na wokples, ɔ ɛni ɔdasay. Dɛn de fala di advays na di skripchɔ we se: “Una fɔ want fɔ rɛspɛkt una kɔmpin.”—Lɛta Fɔ Rom 12:10.
Gɔd in savant dɛn de obe dis lɔ na di Skripchɔ we se: “Una nɔ fɔ tek brayb.” (Ɛksodɔs 23:8) Dɛn nɔ de yuz di pawa we dɛn gɛt fɔ bɛnifit dɛnsɛf nɔmɔ. Bifo dat, dɛn de fɛn we fɔ ɛp ɔda pipul dɛn mɔ di wan dɛn we nid pɔsin fɔ ɛp dɛn. Dɛn de fala di advays na di Skripchɔ we se: “Una nɔ fɔgɛt se una fɔ de du ɔda pipul gud, ɛn una fɔ de gi dɛn pan wetin una gɛt, bikɔs na dɛn kayn sakrifays de, de mek Gɔd gladi.” (Di Ibru Pipul Dɛn 13:16) Ɛn dɛn no se wetin Jizɔs bin tɔk na tru we i se: “Di pɔsin we de gi gɛt blɛsin pas di pɔsin we de gɛt.”—Di Apɔsul Dɛn Wok [Akt] 20:35.
Dɛn De Du Tin Stret lɛk Gɔd
Pipul dɛn we gɛt fet de obe Gɔd in lɔ wit ɔl dɛn at ɛn dɛn no se “wetin i [Gɔd] tɛl wi fɔ du nɔ traŋa fɔ wi.” (Jɔn In Fɔs Lɛta 5:3) Dɛn no se: “PAPA GƆD de tich wi wetin du fɔ wi nɔmɔ . . . PAPA GƆD nɔ de mistek tɔk we yu du wetin i se, yu de gladi.”—Sam 19:7, 8.
Rial fet de mek dɛn nɔ tek wan trayb bɛtɛ pas ɔda trayb, dɛn nɔ de tek wan kɔntri bɛtɛ pas ɔda kɔntri, ɔ ivin tink se sɔm pipul dɛn bɛtɛ pas sɔm ɔda pipul dɛn. Bifo dat dɛn de falamakata Gɔd; ɛn “fɔ tru, Gɔd nɔ de luk ɛnibɔdi bɛtɛ pas in kɔmpin. Gɔd go mek ɛnibɔdi we rɛspɛkt am ɛn du wetin i want, bi in yon.”—Di Apɔsul Dɛn Wok [Akt] 10:34, 35.
Rial fet de mek pipul dɛn “du wetin rayt ɔltɛm.” (Di Ibru Pipul Dɛn 13:18) Pɔsin we gɛt rial fet nɔ de kongosa in kɔmpin ɔ tɔk sɔntin we go pwɛl in kɔmpin in nem. We Devid bin de rayt bɔt di kayn pɔsin we Gɔd lɛk, i bin rayt se na pɔsin we “nɔ de pwɛl in kɔmpin in nem, du bad to am ɛn nɔ miks pan koŋosa.”—Sam 15:3.
Dɛn De Tray fɔ Gɛt di Sɛns we Gɔd De Gi
Na di tin dɛn we de insay di Oli Skripchɔ dɛn nɔmɔ di wan dɛn we gɛt rial fet biliv. Dɛn biliv se: “Na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv.” (Sɛkɛn Lɛta To Timoti 3:16) We dɛn de du ɛnitin wit ɔda pipul dɛn, dɛn de sho se dɛn gɛt “di sɛns we Gɔd de gi,” ɛn “pɔsin we gɛt da kayn sɛns de nɔ de mek plaba, i nɔ de ambɔg, i de du tin saful saful, ɛn i lɛk fɔ ɛp pipul; i gɛt sɔri at ɛn i de du plɛnti plɛnti gud.” (Jems 3:17) Dɛn nɔ de biliv wetin dɛn fɔstɛm pipul dɛn bin de lan pipul dɛn we nɔ gri wit wetin Gɔd se. Dɛn nɔ de put dɛn an pan juju biznɛs ɛn dɛn “nɔ gɛt natin fɔ du wit dɛn tin we mɔtalman mek fɔ pre to we nɔto di tru Gɔd.”—Jɔn In Fɔs Lɛta 5:21.
Dɛn De Sho se Dɛn Lɛk Gɔd ɛn Ɔda Pipul Dɛn
Prɔfɛt Mozis bin tɛl Gɔd in pipul dɛn se: “Dɛn fɔ lɛk PAPA GƆD wit ɔl dɛn at, wit ɔl dɛn sol ɛn wit ɔl dɛn trɛnk.” (Ditarɔnɔmi 6:5) Pipul dɛn we gɛt fet de sho se dɛn lɛk Gɔd dis kayn we. Dɛn rɛspɛkt Gɔd in nem we na Jiova. Dɛn de “tɛl PAPA GƆD tɛnki” ɛn “wɔship am” wit fet. (Sam 105:1) Gɔd in savant dɛn de obe in lɔ we se ‘wi fɔ lɛk wi kɔmpin lɛk aw wi lɛk wisɛf.’ (Lɛvitikɔs 19:18) Dɛn nɔ de miks pan ɛnitin we gɛt fɔ du wit fɛt-fɛt ɛn dɛn “kin de kwayɛt wan wit ɔlman.” (Lɛta Fɔ Rom 12:18) Bikɔs dɛn nɔ de lan fɔ fɛt wɔ igen, i tan lɛk se dɛn dɔn “tɔn dɛn sɔd dɛn to gɔgɔ, ɛn dɛn spia dɛn” to “gadin sizɔs.” (Ayzaya 2:4) Fɔseka dis, dɛn lɛk dɛnsɛf ɔlsay we dɛn de na di wɔl. Jizɔs bin tɔk se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:35) Yu sabi di wan dɛn insay wi yon tɛm we de biev lɛk pipul dɛn we gɛt rial fet?
