DI LƆ we Gɔd bin gi Mozis bin de alaw pipul dɛn fɔ tek sɔm oth dɛn bay we dɛn tɔk se, “A swɛ to Gɔd,” ɔ “A swɛ to Jiova in nem.” Bɔt insay Jizɔs in tɛm, fɔ tek oth bin so kɔmɔn dat di Ju pipul dɛn bin de swɛ pan ɛnitin we dɛn bin de tɔk. Dɛn bin de du dis fɔ mek pipul dɛn biliv wetin dɛn bin de tɔk, bɔt tu tɛm Jizɔs bin kɔndɛm dis bad tin we dɛn bin de du. I bin tich se: “Jɔs mek yu ‘Yɛs’ bi yɛs, ɛn yu ‘Nɔ,’ bi nɔ.”—Matyu 5:​33-37, NW; 23:​16-22.

Wan buk we nem Theological Dictionary of the New Testament, di Talmud ɛp wi fɔ si se i bin kɔmɔn fɔ mek Ju pipul dɛn tek oth ɔ swɛ se wetin dɛn de tɔk na tru. Wi no dis bikɔs di Talmud rili ɛksplen us oth dɛn fɔ kip ɛn us oth dɛn nɔ fɔ kip.

Nɔto Jizɔs nɔmɔ bin kɔndɛm dis bad abit. Fɔ ɛgzampul, Fleviɔs Josifɔs we bin de rayt di Ju pipul dɛn istri bin rayt bɔt wan Ju grup we bin de avɔyd fɔ swɛ. Di wan dɛn we bin de na da grup de bin biliv se fɔ tek oth wɔs pas fɔ lay. Dɛn tink se if pɔsin nid fɔ tek oth fɔ mek ɔda pipul dɛn biliv wetin i de tɔk, dat min se da pɔsin de na layman. Semweso, wan buk we nem Jewish apocryphal writing Wisdom of Sirach, ɔ Ecclesiasticus, (23:​11) tɔk se: “Ɛnibɔdi we lɛk fɔ swɛ na pɔsin we nɔ de obe lɔ atɔl.” Jizɔs bin se i bad fɔ tek oth pan tin we nɔ impɔtant. If ɔltɛm wi de tɔk tru, nid nɔ go de fɔ swɛ fɔ mek ɔda pɔsin biliv wetin wi de se.