1, 2. Di tɛm we Zɛkaraya in nɔmba sɛvin vishɔn de dɔn, wetin bin de apin to di Ju pipul dɛn na Jerusɛlɛm?

ZƐKARAYA bin gɛt plɛnti tin fɔ tink bɔt we di nɔmba sɛvin vishɔn bin de dɔn. I go mɔs dɔn gɛt trɛnk frɔm di prɔmis we Jiova bin mek fɔ se i go pɔnish ɔl dɛn pipul dɛn we nɔ ɔnɛs. Bɔt natin nɔ chenj yet. Bɔku pan dɛn nɔ bin stil ɔnɛs, dɛn bin de du wikɛd tin dɛn, ɛn dɛn nɔ bin dɔn yet fɔ bil di tɛmpul na Jerusɛlɛm. Wetin mek kwik kwik wan di Ju pipul dɛn lɛf fɔ du di wok we Jiova bin dɔn gi dɛn? Fɔ se dɛn kam bak na Jerusɛlɛm jɔs fɔ mek dɛn layf bɛtɛ?

² Zɛkaraya bin no se di Ju pipul dɛn we bin kam bak na Jerusɛlɛm na pipul dɛn we de wɔship Jiova. Na di wan dɛn we ‘Gɔd dɔn tɔch dɛn at’ fɔ mek dɛn lɛf dɛn os ɛn dɛn biznɛs na Babilɔn. (Ɛzra 1:​2, 3, 5) Dɛn lɛf di say  we dɛn bin no gud gud wan fɔ go de na land we plɛnti pan dɛn nɔ wan de sabi. Fɔ bil Jiova in tɛmpul bin rili impɔtant to dɛn Ju pipul dɛn de. Na dat mek dɛn gri fɔ travul fɔ lɛk 1,000 mayl (1,600 kilomita) pan bad rod pan ɔl we i nɔ bin sef.

3, 4. Us prɔblɛm dɛn di Ju pipul dɛn we bin go bak na Jerusɛlɛm bin gɛt?

³ Imajin di lɔng distans we dɛn fɔ travul frɔm Babilɔn to Jerusɛlɛm. Di pipul dɛn gɛt bɔku tɛm fɔ tink ɛn tɔk bɔt di say we dɛn de go de. Di ol wan dɛn bin dɔn tɛl dɛn bɔt aw Jerusɛlɛm ɛn di tɛmpul bin fayn. (Ɛzra 3:​12) If yu bin de travul wit dɛn, aw yu bin fɔ dɔn fil we yu si Jerusɛlɛm fɔ di fɔs tɛm? Yu at bin fɔ dɔn pwɛl we yu si se gras dɔn kɔba di bildin dɛn we dɔn pwɛl pwɛl, ɔ di wɔl dɛn na di siti we dɔn brok brok, ɔ we gɛt big big ol dɛn we de sho usay di get ɛn tawa dɛn bin de? Sɔntɛm yu go kɔmpia di wɔl dɛn we dɔn brok brok to di strɔng wɔl dɛn we de na Babilɔn. Bɔt di Ju dɛn at nɔ bin pwɛl. Wetin mek? Na bikɔs di tɛm we dɛn bin de travul, Jiova bin ɛp ɛn protɛkt dɛn. As dɛn rich na Jerusɛlɛm so, dɛn bil ɔlta usay di tɛmpul bin de ɛn bigin fɔ mek sakrifays to Jiova ɛvride. (Ɛzra 3:​1, 2) Dɛn bin rili gɛt zil ɛn dɛn bin rɛdi fɔ wok. I bin tan lɛk se natin nɔ go mek dɛn at pwɛl.

⁴ Di tɛm we di Ju pipul dɛn bin de bil di tɛmpul bak, dɛn bin nid fɔ bil dɛn siti ɛn dɛn os dɛn. Dɛn bin nid fɔ mek fam so dat dɛn go ebul gɛt tin fɔ it fɔ dɛn famili. (Ɛzra 2:​70) Dɛn bin rili gɛt bɔku bɔku wok fɔ du. I nɔ tu te, dɛn ɛnimi dɛn kam fɔ tray fɔ stɔp dɛn. Dɛn kɔntinyu fɔ du dis fɔ 15 ia, ɛn smɔl smɔl di Ju pipul dɛn at bigin pwɛl. (Ɛzra 4:​1-4) Ɔda prɔblɛm we dɛn bin gɛt bin apin insay di ia 522, we di Pashian kiŋ bin se dɛn fɔ stɔp fɔ bil na Jerusɛlɛm. I bin tan lɛk se dɛn nɔ go ɛva ebul fɔ bil di siti bak.—Ɛzra 4:​21-24.

5. Aw Jiova bin ɛp in pipul dɛn?

⁵ Jiova no se in pipul dɛn nid trɛnk ɛn maynd. I gi Zɛkaraya wan las vishɔn fɔ mek in pipul dɛn biliv tranga wan se I lɛk dɛn ɛn I gladi fɔ wetin dɛn de du fɔ sav am. I prɔmis se i go protɛkt dɛn if dɛn kɔntinyu di wok we i dɔn gi dɛn. Afta we dɛn dɔn fɔ bil di tɛmpul bak, Jiova se: “Ɔl dɛn tin dɛn ya go bi if una kɔntinyu fɔ lisin to wetin Jiova una Gɔd de tɛl una.”—Zɛkaraya 6:​15, NW.

6. (a) Aw Zɛkaraya in nɔmba et vishɔn bin bigin? (Luk di pikchɔ nia dis atikul in taytul.) (b) Wetin mek di ɔs dɛn bin gɛt difrɛn kɔlɔ?

⁶ Di nɔmba et ɛn las vishɔn we Zɛkaraya bin si go mek wi gɛt fet pas ɔl. (Rid Zɛkaraya 6:​1-3.) Tray fɔ imajin wetin Zɛkaraya bin si. Sɔm ɔs dɛn we gɛt 4 chariɔt “kɔmɔt midul tu mawnten” dɛn. Di ɔs dɛn bin gɛt difrɛn kɔlɔ dɛn we mek am izi fɔ no udat de rayd dɛn. Zɛkaraya aks se: ‘Wetin na dɛn wan ya?’ (Zɛkaraya 6:​4) Wi bak want fɔ no bikɔs di vishɔn de afɛkt wi.

7, 8. (a) Wetin di tu mawnten dɛn tinap fɔ? (b) Wetin mek dɛn yuz kɔpa fɔ mek di mawnten dɛn?

 ⁷ We di Baybul tɔk bɔt mawnten, i kin min kiŋdɔm ɔ gɔvmɛnt. Di mawnten dɛn we Zɛkaraya si fiba di tu mawnten dɛn we di prɔfɛt Daniɛl bin tɔk bɔt. Wan pan dɛn mawnten dɛn ya tinap fɔ di rayt we Jiova gɛt fɔ rul di wan ol wɔl, ɛn di ɔda wan tinap fɔ di Kiŋdɔm we Krays gɛt fɔ rul as Kiŋ. (Daniɛl 2:​35, 45) Frɔm 1914 we Jizɔs bi Kiŋ, ɔl tu dɛn mawnten dɛn bin dɔn de ɛn dɛn bin de du spɛshal wok fɔ mek wetin Gɔd want na di wɔl bi lɛk aw i want am.

⁸ Wetin mek dɛn yuz kɔpa fɔ mek di mawnten dɛn? Kɔpa na tin we gɛt valyu ɛn i de shayn. Infakt, Jiova bin tɛl di Izrɛlayt dɛn fɔ yuz kɔpa we dɛn de bil di tabanakul ɛn leta we dɛn de bil di tɛmpul na Jerusɛlɛm. (Ɛksodɔs 27:​1-3; Fɔs Kiŋ 7:​13-16) We dɛn yuz kɔpa fɔ mek di mawnten dɛn, dat de sho se di rayt we Jiova gɛt fɔ rul di wan ol wɔl ɛn di Kiŋdɔm we Krays de rul valyu pas ɛnitin. Na dat go mek mɔtalman fil sef ɛn i go briŋ kam bɔku blɛsin fɔ dɛn.

9. Udat dɛn bin de rayd di chariɔt dɛn? Us wok dɛn bin gɛt?

⁹ Wetin di chariɔt ɛn di wan dɛn we de rayd dɛn tinap fɔ? Di wan dɛn we de rayd di chariɔt dɛn na enjɛl dɛn; i go mɔs bi se dɛn enjɛl ya de na difrɛn difrɛn grup dɛn. (Rid Zɛkaraya 6:​5-8, NW.) Dɛn de kɔmɔt “bifo di Lɔd fɔ di wan ol wɔl” fɔ go du wan spɛshal wok. Dɛn sɛn di enjɛl dɛn na patikyula say dɛn fɔ protɛkt Gɔd in pipul dɛn, mɔ frɔm “di nɔt to usay Babilɔn de.” Jiova yuz dis vishɔn fɔ mek in pipul dɛn no se dɛn nɔ go ɛva bi slev igen ɔnda Babilɔn. Imajin aw dis bin ɛnkɔrej di wan dɛn we bin de bil di tɛmpul insay Zɛkaraya in tɛm! Dɛn bin no se dɛn ɛnimi dɛn nɔ go ebul fɔ stɔp dɛn.

10. Aw di tin we di prɔfɛt Zɛkaraya bin tɔk bɔt di chariɔt ɛn di rayda dɛn de ɛp wi tide?

¹⁰ Tide, Jiova de stil yuz in enjɛl dɛn fɔ protɛkt ɛn ɛnkɔrej in pipul dɛn. (Malakay 3:​6; Di Ibru Pipul Dɛn 1:​7, 14) Frɔm 1919, we Gɔd in pipul dɛn fri frɔm Babilɔn we ɔlman no [“Babilɔn di Gret,” NW], dɛn ɛnimi dɛn dɔn du ɔl wetin dɛn ebul fɔ mek tru wɔship nɔ kɔntinyu fɔ go bifo. (Rɛvɛleshɔn 18:​4) Bɔt dɛn nɔ ebul fɔ du dat. Bikɔs enjɛl dɛn de protɛkt Gɔd in ɔganayzeshɔn, dat de mek Gɔd in pipul dɛn nɔ de fred se dɛn go bi slev igen to lay lay rilijɔn. (Sam 34:​7) Bifo dat, wi go kɔntinyu fɔ gladi ɛn bizi de wɔship Jiova. Di tin we di prɔfɛt Zɛkaraya bin se ɛp wi fɔ no se di tu mawnten dɛn de protɛkt wi.

11. Wetin mek wi nɔ fɔ fred di tɛm we dɛn go atak Gɔd in pipul dɛn?

¹¹ I nɔ go te igen ɔl di gɔvmɛnt dɛn  go kam togɛda ɛn tray fɔ dɔnawe wit Gɔd in pipul dɛn. (Izikɛl 38:​2, 10-12; Daniɛl 11:​40, 44, 45; Rɛvɛleshɔn 19:​19) Frɔm wetin di prɔfɛt Izikɛl bin tɔk, wi si se dɛn go kɔba di wɔl lɛk klawd. Dɛn de rayd ɔs dɛn ɛn dɛn de kam wit wamat fɔ atak Gɔd in pipul dɛn. (Izikɛl 38:​15, 16) * (Luk di futnot.) Wi fɔ fred dɛn? Nɔ! Jiova in enjɛl dɛn de wit wi. Insay di big trɔbul, Jiova in enjɛl dɛn go protɛkt in pipul dɛn ɛn dɛn go dɔnawe wit ɔl di wan dɛn we nɔ want Jiova fɔ rul. (Fɔs Lɛta Fɔ Tɛsalonayka 1:​7, 8) Da de de go bi big de! Bɔt udat go lid Jiova in enjɛl dɛn?

12, 13. (a) Wetin bak Jiova bin tɛl Zɛkaraya fɔ du? (b) Aw wi no se di man we nem Branch tinap fɔ Jizɔs Krays?

¹² Na Zɛkaraya in wangren si dɛn et vishɔn dɛn ya. Bɔt afta dat, i du sɔntin we ɔda pipul dɛn go si ɛn we go ɛnkɔrej di wan dɛn we de bil Gɔd in tɛmpul. (Rid Zɛkaraya 6:​9-12.) Tri man dɛn we na Ɛlday, Tobija, ɛn Jɛdaya bin kɔmɔt frɔm Babilɔn. Jiova bin tɛl Zɛkaraya fɔ tek silva ɛn gold frɔm dɛn man dɛn ya ɛn yuz dɛn fɔ mek wan spɛshal “krawn.” (Zɛkaraya 6:​11) Fɔ se dis krawn na fɔ  Gɔvnɔ Zɛrubabɛl, we kɔmɔt na Juda in trayb ɛn we kɔmɔt na Devid in famili? Nɔ. Jiova tɛl Zɛkaraya fɔ put di krawn na di Ay Prist we na Jɔshwa in ed. I go mɔs bi se di wan dɛn we si dis bin sɔprayz.

¹³ Fɔ se di krawn mek Ay Prist Jɔshwa bi kiŋ? Nɔ. Jɔshwa nɔ bin kɔmɔt na Devid in famili, so i nɔ fit fɔ bi kiŋ. In krawn bin de sho wetin go apin tumara bambay to wan kiŋ ɛn prist, we nem Branch. Di Baybul ɛksplen se dis Branch na Jizɔs Krays.—Ayzaya 11:​1; Matyu 2:​23. * (Luk di futnot.)

14. Us wok Jizɔs de du as Kiŋ ɛn Ay Prist?

¹⁴ Jizɔs na Kiŋ ɛn Ay Prist. Na in de lid Jiova in enjɛl dɛn, ɛn i de wok tranga wan fɔ mek Gɔd in pipul dɛn fil sef na dis wɔl we fɛt-fɛt bɔku. (Jɛrimaya 23:​5, 6) I nɔ go te igen, Krays go dɔnawe wit di neshɔn dɛn fɔ sho se i de sɔpɔt Gɔd as rula ɛn fɔ fɛt fɔ Jiova in pipul dɛn. (Rɛvɛleshɔn 17:​12-14; 19:​11, 14, 15) Bɔt bifo da tɛm de, Jizɔs ɔ Branch, gɛt bɔku wok fɔ du.

15, 16. (a) Udat dɔn klin Gɔd in pipul dɛn tide? Aw i du dat? (b) Aw di wɔl go tan lɛk afta di Wan Tawzin Ia we Krays go rul fɔ?

¹⁵ Pan ɔl we Jizɔs na Kiŋ ɛn Ay Prist, i gɛt di wok bak fɔ “bil PAPA GƆD [“Jiova,” NW] in os.” (Rid Zɛkaraya 6:​13.) Insay 1919, i du dis bildin wok bay we i fri Gɔd in pipul dɛn frɔm lay lay rilijɔn, we na Babilɔn di Gret. Jizɔs mek di kɔngrigeshɔn de bak lɛk aw i bin de, ɛn i pik “di slev we fetful ɛn gɛt sɛns.” Na dɛn anɔyntɛd brɔda dɛn ya de sho aw fɔ du di impɔtant wok we de apin na di pat pan Jiova in ɔganayzeshɔn we de na di wɔl. (Matyu 24:​45, NW) Dɔn Jizɔs bin dɔn de klin Gɔd in pipul dɛn, fɔ ɛp dɛn fɔ wɔship Jiova di rayt we.—Malakay 3:​1-3.

¹⁶ Jizɔs ɛn di 144,000 kiŋ ɛn prist dɛn go rul fɔ wan tawzin ia. Insay da tɛm de, i go ɛp fetful mɔtalman dɛn fɔ bi pafɛkt. Afta we dɛn kiŋ ɛn prist dɛn ya dɔn dis wok, na di wan dɛn we de wɔship Jiova di rayt we nɔmɔ go de  na di wɔl. Da tɛm de, tru wɔship go de bak na di wɔl!

17. Wetin bak Jiova bin tɛl di Ju pipul dɛn we mek dɛn gɛt maynd? Aw dis mɛsej bin afɛkt dɛn?

¹⁷ Aw Zɛkaraya in mɛsej bin afɛkt di Ju pipul dɛn dɛn tɛm dɛn de? Jiova bin dɔn prɔmis dɛn se i go ɛp ɛn protɛkt dɛn so dat dɛn go dɔn fɔ bil di tɛmpul. Dis prɔmis bin gi dɛn op. Bɔt dɛn go dɔn de wɔnda aw dɛn go du dis kayn wok we dɛn nɔ bɔku. So Zɛkaraya bin tɛl dɛn sɔntin we bin mek dɛn lɛf fɔ fred ɛn nɔ gɛt dawt. Pipul dɛn lɛk Ɛlday, Tobija, ɛn Jɛdaya bin kam fɔ ɛp dɛn ɛn Jiova bin se bɔku ɔda pipul dɛn “go kam ɛp fɔ bil Jiova in os.” (Rid Zɛkaraya 6:​15, NW.) Di Ju pipul dɛn bin biliv se Jiova bin de sɔpɔt dɛn wok. Dɛn bin gɛt maynd fɔ go bak fɔ bil di tɛmpul pan ɔl we di kiŋ na Pashia bin dɔn ban dɛn wok. Dis ban bin tan lɛk big mawnten bifo dɛn, bɔt i nɔ tu te Jiova bin pul am. So dɛn bin dɔn fɔ bil di tɛmpul insay di ia 515 bifo Krays. (Ɛzra 6:​22; Zɛkaraya 4:​6, 7) Bɔt dɛn wɔd dɛn we Jiova bin tɔk sho sɔntin we de apin tide we pas wetin bin apin to dɛn fa fawe.

18. Aw di wɔd dɛn we de na Zɛkaraya 6:​15 de apin tide?

¹⁸ Tide, bɔku bɔku pipul dɛn de wɔship Jiova. Dɛn gladi fɔ gi am ɔl dɛn “valyu tin dɛn,” lɛk dɛn taym, trɛnk, ɛn prɔpati dɛn. We dɛn de du dis, i de sho se dɛn de sɔpɔt di arenjmɛnt we Jiova dɔn mek fɔ lɛ dɛn wɔship am di rayt we. (Prɔvabs 3:​9, NW) Ɛn wi shɔ se Jiova valyu di sɔpɔt we wi de gi. Mɛmba se Ɛlday, Tobija, ɛn Jɛdaya bin briŋ silva ɛn gold ɛn na dɛn Zɛkaraya bin yuz fɔ mek krawn. Da krawn de bin de fɔ lɛ dɛn “mɛmba” di kɔntribyushɔn we dɛn dɔn gi fɔ sɔpɔt tru wɔship. (Zɛkaraya 6:​14) Jiova nɔ go ɛva fɔgɛt di wok we wi de du fɔ am ɛn di we aw wi de sho se wi lɛk am.—Di Ibru Pipul Dɛn 6:​10.

19. Aw di vishɔn we Zɛkaraya bin si go afɛkt wi?

¹⁹ Jiova in pipul dɛn dɔn ebul fɔ du wan big big wok, insay dis las dez. Na Jiova in blɛsin ɛn di lid we Krays Jizɔs de lid dɔn mek dis pɔsibul. Wi gladi fɔ de na dis ɔganayzeshɔn we ɔganayz, sef, ɛn we go de sote go. Dɔn wi no bak se ɔl wetin Jiova want fɔ lɛ pipul dɛn wɔship am di rayt we go kam tru. So wi fɔ gladi fɔ de wit Jiova in pipul dɛn, ɛn ‘lisin to wetin Jiova wi Gɔd de tɛl wi.’ Dɔn, wi Kiŋ ɛn Ay Prist go protɛkt yu ɛn di enjɛl dɛnsɛf go protɛkt yu. Du ɔl wetin yu ebul fɔ sɔpɔt tru wɔship. Jiova go mek yu sev di tɛm we dis wikɛd wɔl go dɔn, ɛn yu go de sote go!