1. Wetin Mata bin biliv se go apin to in brɔda? (Luk di pikchɔ nia dis atikul in taytul.)

MATA we na bin Jizɔs in tayt padi ɛn in disaypul, bin de kray bikɔs in brɔda we nem Lazarɔs dɔn day. Yu tink se ɛnitin de we go mek i bia dis pwɛl at? Yɛs. Jizɔs bin prɔmis am se: “Yu brɔda go rayz.” Na tru se dɛn wɔd ya nɔ go mek di pwɛl at we Mata bin gɛt, dɔn. Bɔt Mata bin biliv di tin we Jizɔs prɔmis ɛn i tɔk se: “A no se, insɛf go rayz frɔm in grev di las de we ɔlman go rayz frɔm dɛn grev.” (Jɔn 11:​20-24) Mata bin biliv tranga wan se di wan dɛn we dɔn day go gɛt layf bak tumara bambay. Bɔt Jizɔs bin du wan mirekul. I bin gi layf bak to Lazarɔs da sem de de.

2. Wetin mek yu go lɛk fɔ biliv tranga wan se di wan dɛn we dɔn day go gɛt layf bak jɔs lɛk Mata?

² Wi nɔ gɛt no rizin fɔ tink se rayt naw Jizɔs ɔ in Papa go gi layf bak to pɔsin we wi lɛk we dɔn day. Bɔt yu biliv tranga wan se jɔs lɛk Mata, yu pɔsin we yu lɛk we dɔn day go gɛt layf bak tumara bambay? Sɔntɛm yu  man ɔ wɛf, yu mama, yu papa, yu grani ɔ granpa we yu lɛk, ɔ ivin yu pikin dɔn day. I go mɔs bi se yu rili de wet fɔ di tɛm we yu go ɔg, tɔk, ɛn laf to di pɔsin we yu lɛk we dɔn day. Wi gladi fɔ no se jɔs lɛk Mata yu gɛt gud rizin fɔ se, ‘A no se di pɔsin we a lɛk we dɔn day go gɛt layf bak.’ I fayn fɔ lɛ ɔlman we na Kristian tink bɔt wetin mek i rili biliv dis.

3, 4. Udat dɛn Jizɔs bin gi layf bak? Aw dat bin mek Mata gɛt fet mɔ ɛn mɔ?

³ Mata bin de nia Jerusɛlɛm, so i go mɔs bi se i nɔ bin si we Jizɔs bin de gi layf bak to wan uman we i man dɔn day, in bɔy pikin nia Nen insay Galili. Bɔt sɔntɛm, Mata bin yɛri bɔt we Jizɔs bin gi layf to Jayrɔs in gyal pikin. Ɔlman we bin de na dis titi in os “bin no se di pikin dɔn day.” Bɔt Jizɔs bin ol di titi in an ɛn tɔk se: “Mi pikin, grap!” Ɛn wantɛm wantɛm di pikin grap. (Lyuk 7:​11-17; 8:​41, 42, 49-55) Mata ɛn in sista Meri bin no se Jizɔs kin mɛn dɛn wan dɛn we sik. So dɛn bin biliv se if Jizɔs bin de de, Lazarɔs nɔ bin fɔ day. Wetin Mata bin tink se go apin naw we Lazarɔs dɔn day? Mɛmba se Mata bin tɔk se Lazarɔs go gɛt layf bak tumara bambay insay “di las de.” Wetin mek Mata bin rili shɔ se dis go apin? Ɛn wetin mek yu fɔ biliv se di wan dɛn we dɔn day go gɛt layf bak tumara bambay, ivin di wan we yu lɛk we dɔn day?

⁴ Gud rizin dɛn de we mek yu fɔ biliv se di wan dɛn we dɔn day go gɛt layf bak. Insay dis atikul, wi go tɔk bɔt sɔm pan dɛn. Infakt, yu go si sɔm pɔynt dɛn insay Gɔd in Wɔd we yu nɔ bin ivin notis yet, bɔt dis go mek yu gɛt fet mɔ ɛn mɔ fɔ se yu go si di pɔsin we yu lɛk we dɔn day.

5. Wetin mek Mata bin shɔ se Lazarɔs go gɛt layf bak?

⁵ Notis se Mata nɔ bin tɔk se: ‘A op se mi brɔda go rayz.’ I se “A no se, insɛf go rayz.” Wetin mek Mata bin rili biliv dis? Na bikɔs i bin no bɔt sɔm pipul dɛn we bin dɔn day we bin gɛt layf bak. I go mɔs bi se i lan bɔt dɛn na os ɛn na di Ju mitin os di tɛm we i bin smɔl. Wi go kam tɔk bɔt tri pan di stori dɛn we de insay di Baybul bɔt pipul dɛn we bin dɔn gɛt layf bak.

6. Us mirekul bin apin we Mata bin no bɔt?

⁶ Di fɔs tɛm we Gɔd gi layf bak to pɔsin we dɔn day, na we i gi pawa to di prɔfɛt Ilayja fɔ du mirekul dɛn. Insay wan Fonishian tɔŋ we nem Zarɛfat we de na di nɔt pat na Izrɛl, wan po uman we i man dɔn day bin du gud to di prɔfɛt Ilayja. Dɔn Jiova du wan mirekul. I bin mek di uman in flawa ɛn ɔyl nɔ dɔn so dat di uman ɛn in bɔy pikin go kɔntinyu fɔ de alayf. (Fɔs Kiŋ 17:​8-16) Leta, dis uman in bɔy pikin bin sik ɛn day. Bɔt Ilayja bin ɛp am. Ilayja tɔch di pikin ɛn i bin beg Jiova se: “PAPA GƆD, lɛ dis bɔbɔ in layf kam bak pan am!” Ɛn i bin apin! Gɔd bin yɛri Ilayja in prea, ɛn di pikin bin gɛt layf bak. Dis na di fɔs pɔsin we bin gɛt layf bak we dɛn rayt na di  Baybul. (Rid Fɔs Kiŋ 17:​17-24.) Mata bin no klia wan bɔt wetin bin apin.

7, 8. (a) Wetin Ilaysha bin du fɔ kɔrej wan uman? (b) We Ilaysha bin gi layf bak to di uman in pikin, wetin dat pruv bɔt Jiova?

⁷ Di sɛkɔn pɔsin we di Baybul tɔk se gɛt layf bak na wan bɔbɔ we di prɔfɛt Ilaysha bin gi layf bak. Insay wan siti we dɛn kɔl Shunɛm, wan Izrɛlayt uman we nɔ bin gɛt pikin bin de de. Bikɔs dis uman bin du gud to Ilaysha, Jiova bin gi dis uman ɛn in man we bin dɔn de ol wan bɔy pikin. Bɔt afta sɔm tɛm, dis bɔbɔ bin day. Imajin aw dis uman in at bin pwɛl. In at bin rili pwɛl ɛn dat bin mek i travul 19 mayl (30 kilomita) fɔ go fɛn Ilaysha na Mawnt Kamɛl. Ilaysha bin sɛn in savant we nem Gɛazi fɔ go bifo am na Shunɛm fɔ go gi di bɔbɔ layf bak. Bɔt Gɛazi nɔ bin ebul fɔ gi di bɔbɔ layf bak. Dɔn di bɔbɔ in mama ɛn Ilaysha bin rich na Shunɛm.—Sɛkɛn Kiŋ 4:​8-31.

⁸ Ilaysha bin go insay di os usay di bɔbɔ in bɔdi bin de, ɛn i bin pre. Jiova bin ansa Ilaysha in prea ɛn i bin mek di bɔbɔ gɛt layf bak. We di uman bin si se in bɔy pikin dɔn gɛt layf bak, i bin gladi pasmak! (Rid Sɛkɛn Kiŋ 4:​32-37.) Sɔntɛm i bin mɛmba di wɔd dɛn pan Ana in prea. Ana nɔ bin ebul fɔ bɔn pikin te Jiova blɛs am wit wan bɔy pikin we nem Samiɛl. Ana bin prez Jiova bikɔs na i “de mek pɔsin go na di Grev, ɛn i de gi layf bak to di wan dɛn we dɔn day.” (Fɔs Samiɛl 2:​6, NW) We Jiova bin gi layf bak to di bɔbɔ na Shunɛm, i bin pruv se i gɛt di pawa fɔ gi layf bak to di wan dɛn we dɔn day.

9. Ɛksplen di tɔd stori we de na di Baybul bɔt aw pɔsin bin gɛt layf bak.

⁹ Wan ɔda wɔndaful tin bin apin afta Ilaysha dɔn day. I bin dɔn pas 50 ia we Ilaysha dɔn wok as prɔfɛt ɛn i bin “kam sik bad wan” ɛn leta i “day.” Afta sɔm tɛm we dɛn dɔn bɛr am, na in bon dɛn nɔmɔ bin lɛf. Wan de, sɔm Izrɛlayt pipul dɛn bin de go bɛr wan man. I nɔ tu te dɛn si sɔm pan dɛn ɛnimi dɛn de kam. Dɛn pipul ya we bin de go bɛr bin tray fɔ rɔnawe kwik kwik wan, so dɛn trowe di man we dɔn day insay Ilaysha in grev. Di Baybul se: “Wɛn di dedebɔdi tɔch Ilaysha in bon dɛn, di dayman wek ɛn tinap deŋ.” (Sɛkɛn Kiŋ 13:​14, 20, 21) Dis tin we bin apin bin pruv to Mata se Gɔd gɛt pawa fɔ gi layf bak to di wan dɛn we dɔn day. Dis fɔ mek yu biliv bak se Gɔd in pawa nɔ de dɔn.

10. Wetin apin to wan Kristian uman we nem Tabita? Wetin Pita bin du?

¹⁰ Di Kristian Grik Skripchɔ dɛn gɛt stori dɛn bɔt sɔm pipul dɛn we bin dɔn day we Gɔd bin yuz in fetful savant dɛn fɔ gi layf bak. Wi bin dɔn tɔk bɔt da uman in bɔy pikin we Jizɔs bin gi layf bak nia wan siti we nem Nen ɛn Jayrɔs in gyal pikin. Afta sɔm  tɛm, di apɔsul Pita bin gi layf bak to Dɔkas we dɛn kin kɔl bak Tabita. Pita bin go insay di rum usay Dɔkas in bɔdi bin de, i pre, ɛn i tɔk se: “Tabita, grap!” Wantɛm wantɛm, i bin gɛt layf bak, ɛn Pita ‘sho Tabita layf wan’ to di ɔda Kristian dɛn we bin de de. Dis tin we bin apin bin mek bɔku pipul dɛn na di tɔŋ “biliv pan di Masta.” Dɛn nyu disaypul dɛn ya go tɛl ɔda pipul dɛn di gud nyuz bɔt Jizɔs, ɛn dɛn go tɔk bak bɔt di pawa we Jiova gɛt fɔ gi layf bak to pɔsin we dɔn day.—Di Apɔsul Dɛn Wok [Akt] 9:​36-42.

11. Wetin Lyuk we na bin dɔktɔ tɔk bɔt wan yɔŋ man? Aw di tin we bin apin afɛkt ɔda pipul dɛn?

¹¹ Bɔku pipul dɛn bin si we wan ɔda pɔsin bin gɛt layf bak. Wan tɛm, di apɔsul Pɔl bin gɛt mitin na wan rum insay Troas we de naw na Tɔki. Pɔl bin prich te midul nɛt. Wan yɔŋ man we nem Yutikɔs bin sidɔm na wan winda de lisin. Bɔt slip pas wit am ɛn i bin kɔmɔt ɔp di tri stori bildin ɛn fɔdɔm. Sɔntɛm na Lyuk fɔs bin rich usay Yutikɔs bin ledɔm. Bikɔs Lyuk na dɔktɔ, i bin kam fɔ no se dis yɔŋ man nɔ bin jɔs wund ɛn fent nɔmɔ. Na day i dɔn day! Pɔl insɛf bin kam dɔn. I ɔg Yutikɔs ɛn ɔlman bin sɔprayz we i tɔk se: “I gɛt layf!” Dis mirekul we bin apin bin afɛkt ɔlman we bin si wetin bin apin. Dɛn bin no se dis yɔŋ man dɔn day, ɛn i dɔn gɛt layf bak ɛn dis bin gi dɛn kɔrej ɛn “dɛn ɔl gladi.”—Di Apɔsul Dɛn Wok [Akt] 20:​7-12.

12, 13. Frɔm ɔl di stori dɛn we wi dɔn tɔk bɔt pipul dɛn we dɔn gɛt layf bak, us kwɛstyɔn dɛn wi go aks?

¹² Di stori dɛn we wi dɔn tɔk bɔt aw pipul dɛn we bin day gɛt layf bak, fɔ mek yu biliv tranga wan jɔs lɛk Mata. Wi fɔ biliv se wi Gɔd we dɔn gi wi layf, go ebul mek di wan dɛn we dɔn day gɛt layf bak. I fayn fɔ no se fetful savant dɛn lɛk Ilayja, Jizɔs, ɔ Pita bin de we dɛn tin ya bin apin. Ɛn dɛn  bin apin di tɛm we Jiova bin de du mirekul dɛn. So wetin wi go se bɔt dɛn wan dɛn we bin dɔn day di tɛm we dɛn mirekul dɛn ya nɔ bin de? Yu tink se fetful man ɛn uman dɛn fɔ biliv se tumara bambay, Gɔd go gi layf bak to di wan dɛn we dɔn day? Yu tink se dɛnsɛf fɔ biliv tranga wan jɔs lɛk Mata we se: “A no se, insɛf go rayz frɔm in grev di las de we ɔlman go rayz frɔm dɛn grev?” Wetin mek Mata bin biliv se di wan dɛn we dɔn day go gɛt layf bak tumara bambay? Wetin mek yusɛf fɔ biliv dat?

¹³ Bɔku stori dɛn de na Gɔd in Wɔd we de sho se in savant dɛn no se di wan dɛn we dɔn day go gɛt layf bak tumara bambay. Lɛ wi tɔk bɔt sɔm pan dɛn.

14. Wetin Ebraam in stori tich wi bɔt aw di wan dɛn we dɔn day go gɛt layf bak?

¹⁴ Tink bɔt wetin Jiova bin tɛl Ebraam fɔ du wit Ayzak, we na di pikin we i dɔn wet fɔ fɔ lɔng tɛm. Jiova tɔk se: “Tek yu pikin, yu wangren bɔypikin, Ayzak, we yu lɛk, lɛkɛ yu bɔlyay, kɛr am go na Mɔria, yu fɔ tek am mek sakrifays to mi. Bɔn am pantap wan pan dɛn mawnten we a go sho yu.” (Jɛnɛsis 22:​2) Aw yu tink se Ebraam bin fil we i yɛri wetin Gɔd bin tɛl am? Jiova bin dɔn prɔmis Ebraam se na tru in pikin dɛn i go blɛs ɔl di neshɔn dɛn. (Jɛnɛsis 13:​14-16; 18:​18; Lɛta Fɔ Rom 4:​17, 18) Dɔn Jiova bin tɔk bak se “na frɔm Ayzak” di blɛsin go kɔmɔt. (Jɛnɛsis 21:​12) Bɔt aw dis go apin if Ebraam sakrifays in pikin? Gɔd in spirit bin ɛp Pɔl fɔ ɛksplen se Ebraam bin biliv se Gɔd ebul fɔ gi layf bak to Ayzak. (Rid Di Ibru Pipul Dɛn 11:​17-19.) Bɔt di Baybul nɔ tɔk se Ebraam bin tink se Ayzak go gɛt layf bak wantɛm wantɛm, afta sɔm awa, afta wan de, ɔ ivin afta wan wik. I go bi se Ebraam nɔ bin no ustɛm in pikin go gɛt layf bak. Bɔt i bin abop pan Jiova fɔ se i go gi Ayzak layf bak.

15. Us op di fetful man Job bin gɛt?

 ¹⁵ Wan fetful man we nem Job in bak bin no se di wan dɛn we dɔn day go gɛt layf bak tumara bambay. I bin no se if dɛn kɔt tik, da tik de go gro bak ɛn bi nyu tik. Bɔt dat nɔ go apin to mɔtalman. (Job 14:​7-12; 19:​25-27) If mɔtalman day, i nɔ go ebul gi insɛf layf bak. (Sɛkɛn Samiɛl 12:​23; Sam 89:​48) Bɔt dat nɔ min se Gɔd nɔ go ebul gi di pɔsin layf bak. Infakt, Job bin biliv se Gɔd go mɛmba am. (Rid Job 14:​13-15, NW.) Job nɔ bin no ustɛm dis go apin. Bɔt pan ɔl dat, Job bin biliv tranga wan se di Wan we mek mɔtalman ebul fɔ mɛmba am, ɛn I go gi am layf bak.

16. Aw wan enjɛl bin ɛnkɔrej Daniɛl?

¹⁶ Tink bɔt wan ɔda fetful man we nem Daniɛl. I bin fetful to Jiova te i day ɛn Jiova bin sɔpɔt am. Wantɛm, wan enjɛl kɔl Daniɛl “man we dɛn lɛk pasmak,” ɛn i tɛl am fɔ “gɛt kol at” ɛn fɔ “gɛt trɛnk.”—Daniɛl 9:​22, 23; 10:​11, 18, 19.

17, 18. Wetin Jiova bin prɔmis Daniɛl?

¹⁷ We Daniɛl bin dɔn rich lɛk 100 ia so ɛn tɛm bin dɔn de rich fɔ lɛ i day, i go mɔs bi se i bin de tink bɔt wetin go apin to am. Fɔ se Daniɛl bin fil se i go liv igen? Yɛs, na so i bi! Insay di las vas na di Baybul buk we nem Daniɛl, Gɔd prɔmis am se: ‘Go yu we te di tɛm we di ɛnd go kam; go ɛn go rɛst.’ (Daniɛl 12:​13) Daniɛl bin no se di wan dɛn we dɔn day de rɛst, ɛn i bin no bak se pɔsin we dɔn day “nɔ gɛt fɔ tink ɔ sabi ɛnitin, ɛn sɛns biznɛs nɔ de usay” i de go. (Ɛkliziastis 9:​10) Bɔt dat nɔ min se ɔltin dɔn dɔn fɔ Daniɛl. Jiova gi am wɔndaful prɔmis fɔ tumara bambay.

¹⁸ Jiova in enjɛl bin tɛl Daniɛl se: “Yu go tinap na di ples we dɛn dɔn kip fɔ yu we di tɛm kam we ɔltin fɔ dɔn.” Daniɛl nɔ bin rili no di tɛm we dat go apin. I bin no se i go day ɛn go rɛst. Bɔt we Daniɛl bin yɛri di prɔmis we Gɔd bin mek fɔ se, “Yu go tinap na di ples we dɛn dɔn kip fɔ yu,” i bin ɔndastand se i go gɛt layf bak tumara bambay. Dat go apin lɔng tɛm afta we i go dɔn day, dat na “we di tɛm kam we ɔltin fɔ dɔn.”

19, 20. (a) Aw di stori dɛn we wi dɔn tɔk bɔt gɛt sɔntin fɔ du wit wetin Mata bin tɛl Jizɔs? (b) Wetin wi go tɔk bɔt insay di nɛks atikul?

¹⁹ Fɔ tru, Mata bin gɛt gud rizin fɔ biliv tranga wan se in brɔda, Lazarɔs, “go rayz frɔm in grev di las de we ɔlman go rayz frɔm dɛn grev.” Di prɔmis we Jiova bin mek to Daniɛl ɛn di fet we Mata bin gɛt fɔ mek wisɛf biliv tranga wan se di wan dɛn we dɔn day go gɛt layf bak.

²⁰ Wi dɔn lan bɔt tru tru stori dɛn bɔt pipul dɛn we bin dɔn gɛt layf bak trade. Dis dɔn pruv se di wan dɛn we dɔn day go gɛt layf bak. Wi dɔn si bak se fetful man ɛn uman dɛn we bin de sav Gɔd bin biliv se di wan dɛn we dɔn day go gɛt layf bak tumara bambay. Bɔt ɛnitin de we de sho se di wan dɛn we dɔn day go gɛt layf bak pan ɔl we i dɔn te we Gɔd mek dis prɔmis? If i bi so, dat go mek wi biliv mɔ ɛn mɔ se di wan dɛn we dɔn day go gɛt layf bak tumara bambay. Bɔt ustɛm dat go bi? Wi go tɔk bɔt dis insay di nɛks atikul.