WE ƆDA pipul dɛn sho se dɛn bisin bɔt wi, dat kin rili mek wi fil gud. Wi kin rili fil fayn fɔ no se dɛn bisin bɔt wi. Bikɔs wi gladi fɔ we ɔda pipul dɛn de sho se dɛn bisin bɔt wi, aw wisɛf go lan fɔ sho se wi bisin bɔt ɔda pipul dɛn?

Pɔsin we bisin bɔt ɔda pipul dɛn kin sho dis bay wetin i de tɔk ɛn du. I nɔ de jɔs tɔk fayn to pipul dɛn nɔmɔ. Bifo dat, i de trit dɛn di kayn we we go sho se i lɛk dɛn ɛn i ɔndastand aw dɛn de fil. Di tin we impɔtant pas ɔl na dat, fɔ bisin bɔt ɔda pipul dɛn na kwaliti we Gɔd in spirit de gi. (Lɛta fɔ Galeshya 5:​22, 23, NW) Jiova want wi fɔ bisin bɔt ɔda pipul dɛn. So lɛ wi si aw in ɛn in Pikin dɔn sho se dɛn bisin bɔt ɔda pipul dɛn, ɛn aw wisɛf go falamakata dɛn ɛgzampul.

Jiova bisin bɔt ɔlman, ivin di wan dɛn we “nɔ de tɛl tɛnki ɛn to pɔsin we wikɛd.” (Lyuk 6:​35) Fɔ ɛgzampul, Jiova “de mek di san shayn pan dɛn bad pipul ɛn pan dɛn gud wan. I de mek ren kam pan dɛn pipul we gud ɛn dɛn wan we bad.” (Matyu 5:​45) Ivin di wan dɛn we nɔ biliv se Jiova na di Wan we mek ɔltin kin stil bɛnifit frɔm di we aw Jiova bisin bɔt pipul dɛn ɛn dɛn kin gɛt gladi-at.

Wan fayn ɛgzampul bɔt aw Jiova sho se i bisin bɔt mɔtalman na wetin i bin du fɔ Adam ɛn Iv. Jɔs afta we dɛn sin, “dɛn so klos wit fig lif fɔ kɔba dɛnsɛf.” Bɔt Jiova no se we dɛn nɔ go de na di gadin igen, dɛn go nid klos we go protɛkt dɛn bikɔs di say usay dɛn de go gɛt bɔku “gras ɛn chuk chuk.” So Jiova bin mek “klos wit animal kanda” fɔ dɛn.—Jɛnɛsis 3:​7, 17, 18, 21.

Pan ɔl we Jiova bisin bɔt “bad pipul” dɛn ɛn di “gud wan” dɛn, i bisin mɔ bɔt in fetful savant dɛn. Fɔ ɛgzampul, insay di tɛm we Zɛkaraya na bin prɔfɛt, wan enjɛl bin wɔri smɔl bikɔs di Izrɛlayt dɛn bin dɔn stɔp fɔ bil Jiova in tɛmpul na Jerusɛlɛm. Jiova bin lisin to wetin di enjɛl bin tɔk ɛn i “tɔk fayn” to am “fɔ kol in at.” (Zɛkaraya 1:​12, 13) Jiova bin trit di prɔfɛt Ilayja di sem we. Wan tɛm bin de we di prɔfɛt in at bin rili pwɛl ɛn i bin fil se na in wangren de, so i bin tɛl Jiova fɔ kil am. Jiova bin sho se i bisin bɔt aw Ilayja bin de fil, so i bin sɛn wan enjɛl fɔ go ɛnkɔrej am. I bin tɛl di prɔfɛt bak se nɔto in wangren de. We Jiova bin sho se i bisin bɔt Ilayja, dat bin gi am di trɛnk fɔ kɔntinyu fɔ du di wok we i bin de du. (Fɔs Kiŋ 19:​1-18) Bɔt pan ɔl Jiova in savant dɛn, udat yu go se dɔn falamakata di kayn we aw i de sho se i bisin bɔt ɔda pipul dɛn?

We Jizɔs bin de na dis wɔl, pipul dɛn bin de si aw i bisin bɔt ɔda pipul dɛn. I nɔ ɛva trit pipul dɛn bad ɛn tray fɔ fos pipul dɛn fɔ du wetin i want. I bin bisin bɔt ɔda pipul dɛn  ɛn i bin tɔk se: “Una kam to mi, una ɔl we dɔn taya fɔ tot ebi lod, a go pul di lod kɔmɔt pan una ed, mek una go blo. . . . Dɛn tin we a de gi una fɔ du nɔ at fɔ du.” (Matyu 11:​28-30) Bikɔs i bin rili bisin bɔt ɔda pipul dɛn, dat bin mek dɛn bin de fala am ɛnisay we i go. Bikɔs Jizɔs bin gɛt sɔri-at fɔ pipul dɛn, dat bin mek i gi dɛn tin fɔ it, mɛn di wan dɛn we sik, ɛn tich dɛn “plɛnti tin” bɔt in Papa.—Mak 6:​34; Matyu 14:​14; 15:​32-38.

Jizɔs bin ɔndastand di we aw pipul dɛn de fil ɛn i bin de trit dɛn fayn ɛn di we we de sho se i bisin bɔt dɛn. Infakt, ivin we tin nɔ fayn fɔ am, i bin de ɛp ɛnibɔdi we kam to am. (Lyuk 9:​10, 11) Tink bɔt wetin bin apin to wan uman we bin de blid. I bin want fɔ wɛl, so i bin tɔch Jizɔs in klos. Bɔt frɔm di Lɔ we Gɔd bin gi Mozis, dis uman nɔ fɔ dɔn du dat bikɔs i nɔ klin. (Lɛvitikɔs 15:​25-28) Wetin Jizɔs bin du? I nɔ bin tɔk to di uman vɛks vɛks wan. I si se di uman bin de fred, ɛn i bin sɔri fɔ am bikɔs di uman dɔn sɔfa fɔ 12 ia. I bin tɛl am se: “Mi pikin, bikɔs yu biliv, yu dɔn wɛl, go wit kol at ya, da kayn sik de nɔ go kam pan yu igen.” (Mak 5:​25-34) Jizɔs bin rili bisin bɔt ɔda pipul dɛn!

Frɔm di ɛgzampul dɛn we wi dɔn tɔk bɔt, wi lan se if wi bisin bɔt ɔda pipul dɛn, wi go du tin dɛn fɔ ɛp dɛn. Jizɔs bin tɔk mɔ bɔt aw dis impɔtant bay we i bin pul di stori bɔt di gud Samɛritan. Tifman dɛn bin tif wan man we na Ju, dɛn bit am, ɛn lɛf am na di rod fɔ mek i day. Wan Samɛritan we bin de pas bin sɔri fɔ dis man, pan ɔl we Samɛritan ɛn Ju dɛn et dɛnsɛf. Bikɔs dis Samɛritan bin bisin bɔt ɔda pipul dɛn, dat bin mek i ɛp dis man we na Ju we bin damej bad bad wan. I bin klin in wund ɛn kɛr am go na wan otɛl ɔ say usay pipul dɛn de lɔj we dɛn de travul. Di Samɛritan bin pe di pɔsin we de wok na di otɛl fɔ kia fɔ di man we na Ju, ɛn i bin ivin se i go pe bak di pɔsin fɔ ɛni ɔda tin we i spɛn.—Lyuk 10:​29-37.

Fɔ bisin bɔt ɔda pipul dɛn go ɛp wi fɔ tink bɔt dɛn ɛn ɛnkɔrej dɛn nɔto jɔs bay wetin wi de du bɔt bay wetin wi de tɛl dɛn bak. Di Baybul se: “Udat de wɔndrin tumɔs nɔ de api, bɔt if dɛn kɔrej am, i go bɔk ɔp.” (Prɔvabs 12:​25) We wi de du gud ɛn sho se wi bisin bɔt ɔda pipul dɛn, dat de ɛp wi fɔ tɔk fayn wan to dɛn, we go mek dɛn gladi. * (Luk di futnot.) Di fayn we aw wi de tɔk to dɛn go sho se wi bisin bɔt dɛn ɛn dat go mek i izi fɔ dɛn fɔ bia wit dɛn prɔblɛm dɛn.—Prɔvabs 16:​24.

Wi ɔl ebul fɔ sho se wi bisin bɔt ɔda pipul dɛn bikɔs Gɔd mek mɔtalman lɛk aw i tan. (Jɛnɛsis 1:​27) Fɔ ɛgzampul, di Roman ɔfisa we nem Julyɔs, we dɛn bin gi di wok fɔ kɛr di apɔsul Pɔl go na Rom, “bin gud to Pɔl so i kin lɛf Pɔl fɔ go fɛn in padi dɛn ɛn i kin mek dɛn gi Pɔl ɛnitin we i want” we dɛn bin de na wan siti we dɛn kɔl Saydɔn. (Di Apɔsul Dɛn Wok [Akt] 27:​3) We di ship we Pɔl ɛn ɔda pipul dɛn bin de pan bin brokdɔŋ, di pipul dɛn we de na Mɔlta bin du “gud” to dɛn ɛn dɛn bin ivin mek faya fɔ mek dɛn wam dɛn bɔdi. (Di Apɔsul Dɛn Wok [Akt] 28:​1, 2) Dɛn pipul dɛn ya bin du gud tin. Bɔt fɔ mek Jiova go gladi, wi fɔ de sho se wi bisin bɔt pipul dɛn ɔltɛm, nɔto jɔs wan patikyula tɛm.

Jiova want wi fɔ sho dis kwaliti pan ɔltin we wi de du. Na dat mek i bin ɛnkɔrej wi fɔ de sho se wi bisin bɔt ɔda pipul dɛn ɔltɛm. (Lɛta Fɔ Kɔlɔse 3:​12) Bɔt nɔto ɔltɛm i kin izi fɔ sho se wi bisin bɔt ɔda pipul dɛn. Wetin mek? Sɔntɛm wi nɔ kin du am bikɔs wi de shem, wi de fred, ɔ wi bisin bɔt wisɛf smɔl. Ɔ i nɔ kin izi fɔ wi fɔ sho se wi bisin bɔt pipul dɛn we de trit wi bad. Bɔt if wi pre fɔ oli spirit ɛn tray fɔ falamakata Jiova, i go ɛp wi fɔ bi pɔsin we rili bisin bɔt ɔda pipul dɛn.—Fɔs Lɛta Fɔ Kɔrint 2:​12.

 Aw wi go no wetin wi fɔ du so dat wi go bisin bɔt ɔda pipul dɛn mɔ? Aks yusɛf dɛn kwɛstyɔn dɛn ya: ‘A de tek tɛm lisin to ɔda pipul dɛn ɛn tray fɔ ɔndastand aw dɛn de fil? A kin notis we ɔda pipul dɛn nid pɔsin fɔ ɛp dɛn? Ustɛm las a sho se a bisin bɔt pɔsin we nɔto mi fambul ɔ tayt padi?’ Dɔn sɛt gol dɛn lɛk fɔ no mɔ bɔt di pipul dɛn we de arawnd yu, mɔ di wan dɛn we de na yu kɔngrigeshɔn. We yu du dis, yu go ebul no di prɔblɛm dɛn we dɛn gɛt ɛn wetin dɛn nid. Dɔn bak, tray fɔ trit pipul dɛn fayn jɔs lɛk aw yu go want fɔ mek dɛn trit yu. (Matyu 7:​12) Aks Jiova fɔ ɛp yu, ɛn i go blɛs yu fɔ di tray we yu de tray fɔ sho se yu bisin bɔt ɔda pipul dɛn.—Lyuk 11:​13.

We di apɔsul Pɔl bin de sho di kwaliti dɛn we mek i bi gud ticha, wan pan dɛn na fɔ bisin bɔt ɔda pipul dɛn. (Sɛkɛn Lɛta Fɔ Kɔrint 6:​3-6) Pipul dɛn bin lɛk Pɔl bikɔs i bin de tɔk ɛn du fayn tin dɛn to dɛn, ɛn dɛn bin rili no se i bisin bɔt dɛn. (Di Apɔsul Dɛn Wok [Akt] 28:​30, 31) Semweso, if wi bisin bɔt ɔda pipul dɛn, dat go mek dɛn want fɔ lan mɔ bɔt di trut. If wi bisin bɔt ɔlkayn pipul dɛn, ivin di wan dɛn we de trit wi bad, dat go tɔch dɛn at ɛn dɛn go chenj di we aw dɛn de biev. (Lɛta Fɔ Rom 12:​20) Sɔntɛm leta, dɛn go ivin want fɔ stɔdi di Baybul.

Insay Paradays, ɔlman go bisin bɔt in kɔmpin. Dɛn go trit di wan dɛn we go gɛt layf bak fayn, ɛn fɔ sɔm pan dɛn, dat go bi di fɔstɛm we pipul dɛn go trit dɛn fayn. Dis go rili ɛp dɛn fɔ bisin bɔt ɔda pipul dɛn. Infakt, ɛnibɔdi we nɔ go bisin bɔt in kɔmpin ɛn we nɔ go want fɔ ɛp ɔda pipul dɛn nɔ go de na Gɔd in Kiŋdɔm. Na di wan dɛn nɔmɔ we lɛk ɛn bisin bɔt ɔda pipul dɛn, go de na Paradays sote go. (Sam 37:​9-11) Da tɛm de di wɔl go sef ɛn gɛt pis! Bɔt ivin bifo da tɛm de kam, wi go bɛnifit if wi bisin bɔt ɔda pipul dɛn. Aw?

Di Baybul se: ‘Yu du gud yu du am fɔ yusɛf.’ (Prɔvabs 11:​17) Pipul dɛn kin want fɔ de wit pɔsin we bisin bɔt dɛn, ɛn dɛnsɛf kin trit di pɔsin fayn bak. Jizɔs bin tɔk se: “Aw una de mɛnshɔ fɔ ɔda pipul dɛn, na so dɛn go mɛnshɔ fɔ una.” (Lyuk 6:​38, NW) So i izi fɔ mek pɔsin we bisin bɔt ɔda pipul dɛn kɔntinyu fɔ gɛt gud padi dɛn.

Di apɔsul Pɔl bin tɛl di wan dɛn na di kɔngrigeshɔn na Ɛfisɔs se dɛn fɔ “de du gud ɛn gɛt sɔri at” fɔ dɛn kɔmpin dɛn ɛn dɛn fɔ de “padin [“fɔgiv,” NW]” ɔda pipul dɛn. (Lɛta Fɔ Ɛfisɔs 4:​32) We ɔlman na di kɔngrigeshɔn bisin bɔt in kɔmpin ɛn gɛt sɔri-at, di kɔngrigeshɔn de strɔng ɛn gɛt wanwɔd. Wi nɔ ɛva want fɔ de fɛn fɔlt pan wi brɔda ɛn sista dɛn, ɔ de kongosa dɛn, ɔ fɔ tɔk bad tin ɔ sɔntin we go mek dɛn at pwɛl ivin pan jok. Bifo dat, wetin wi de tɔk fɔ bi sɔntin we go ɛp dɛn ɛn ɛnkɔrej dɛn ɔltɛm. (Prɔvabs 12:​18) Dis go mek ɔlman na di kɔngrigeshɔn sav Jiova wit gladi-at.

As wi dɔn lan, fɔ bisin bɔt ɔda pipul dɛn na kwaliti we wi de sho pan ɛnitin we wi de se ɔ du. Ɛn we wi gɛt dis kwaliti, wi de falamakata wi Gɔd Jiova, we lɛk wi ɛn we gɛt fri-an. (Lɛta Fɔ Ɛfisɔs 5:​1) Dis go mek di kɔngrigeshɔn strɔng ɛn mek ɔda pipul dɛn sav am bak. So lɛ wi du ɔl wetin wi ebul fɔ mek ɔda pipul dɛn si se Jiova Witnɛs dɛn bisin bɔt pipul dɛn!