Dis min se Isɔ nɔ bin sho wan rɛspɛkt fɔ Gɔd biznɛs ɛn “i sɛl in rayt gi in smɔl brɔda fɔseka wan plet it.” So wi bin de tink se bikɔs Jekɔb bin gɛt di “rayt” fɔ bi di fɔs bɔy pikin, dis min se i dɔn gɛt di rayt bak fɔ bi gret-granpa to di Mɛsaya.—Matyu 1:​2, 16; Lyuk 3:​23, 34.

Bɔt we wi tek tɛm stɔdi ɔda skripchɔ dɛn na di Baybul, wi kam fɔ si se man nɔ nid fɔ bi di fɔs bɔy pikin bifo i bi gret-granpa to di Mɛsaya. Lɛ wi tɔk bɔt sɔm pan dɛn skripchɔ dɛn ya:

Jekɔb in fɔs bɔy pikin na bin Rubɛn, ɛn na Lia we na in fɔs wɛf na in bɔn am. Jekɔb in fɔs bɔy pikin wit Rechɛl na bin Josɛf. We Rubɛn bin du mami ɛn dadi biznɛs di we aw Gɔd nɔ want, i bin lɔs di rayt we i gɛt as fɔs bɔy pikin, ɛn na Josɛf bin gɛt di rayt fɔ bi di fɔs bɔy pikin. (Jɛnɛsis 29:​31-35; 30:​22-25; 35:​22-26; 49:​22-26; Fɔs Kronikul 5:​1, 2) Bɔt stil, di Mɛsaya nɔ kɔmɔt frɔm Rubɛn ɔ Josɛf dɛn famili layn. Di Mɛsaya kɔmɔt frɔm Juda we na Jekɔb ɛn Lia dɛn nɔmba 4 bɔy pikin.—Jɛnɛsis 49:​10.

Lyuk 3:​32 tɔk bɔt fayv ɔda gret-granpa dɛn to di Mɛsaya, ɛn i tan lɛk se dɛn ɔl na fɔs bɔy pikin dɛn. Fɔ ɛgzampul, na Boaz bɔn Obɛd, ɛn na Obɛd bɔn Jɛsi.—Ruth 4:​17, 20-22; Fɔs Kronikul 2:​10-12.

Jɛsi in pikin Devid nɔto bin di fɔs bɔy pikin. Devid na bin di las bɔy pikin pan Jɛsi in et bɔy pikin dɛn. Bɔt di Mɛsaya bin kɔmɔt frɔm Devid in layn. (Fɔs Samiɛl 16: 10, 11; 17:​12; Matyu 1:​5, 6) Semweso, di ɔda gret-granpa to di Mɛsaya na Sɔlɔmɔn, pan ɔl we in nɔto bin Devid in fɔs bɔy pikin.—Sɛkɛn Samiɛl 3:​2-5.

Dis nɔ min se fɔ bi fɔs bɔy pikin nɔ impɔtant. Di fɔs bɔy pikin kin gɛt rayt fɔ du tin dɛn we di ɔda bɔy pikin dɛn nɔ gɛt rayt fɔ du. Bɔku tɛm, na in kin bi di nɛks pɔsin fɔ de oba di famili, ɛn na in kin gɛt mɔ prɔpati pas ɔl di ɔda bɔy pikin dɛn.—Jɛnɛsis 43:​33; Ditarɔnɔmi 21:​17; Jɔshwa 17:​1.

Bɔt dɛn kin gi di rayt we di fɔs bɔy pikin gɛt to ɔda bɔy pikin na di famili. We Ebraam bin mek Ishmɛl go, dat bin gi Ayzak di rayt fɔ bi di fɔs bɔy pikin. (Jɛnɛsis 21:​14-21; 22:​2) Jɔs lɛk aw wi dɔn tɔk, na Josɛf bin kam gɛt di rayt we Rubɛn bin gɛt as fɔs bɔy pikin.

Wetin di apɔsul Pɔl bin min na Di Ibru Pipul Dɛn 12:​16? Wi rid se: “Una tek tɛm, mek una nɔ liv fri layf, ɛn una nɔ tek dɛn tin we blant Gɔd lɛkɛ se dɛn nɔ min natin, lɛkɛ aw Isɔ bin du we i sɛl in rayt gi in smɔl brɔda fɔseka wan plet it.”

Pɔl nɔ bin de tɔk bɔt di gret-granpa dɛn to di Mɛsaya. Bɔt na wɔn i bin de wɔn Kristian dɛn. I bin tɛl dɛn se dɛn fɔ kɔntinyu fɔ “waka na di tret rod” so dat dɛn “nɔn nɔ go du tin we go mek [dɛn] nɔ gɛt Gɔd in blɛsin.” I sɔri fɔ no se, dis kin apin if dɛn du mami ɛn dadi biznɛs di we aw Gɔd nɔ want. (Di Ibru Pipul Dɛn 12:​12, 13, 14, NW; 15, 16) If dat apin dɛn go tan lɛk Isɔ we bin “tek dɛn tin we blant Gɔd lɛkɛ se dɛn nɔ min natin,” ɛn i bin jɔs want fɔ satisfay insɛf.

I go bi se Isɔ bin gɛt di rayt fɔ mek sakrifays to Jiova bikɔs na so dɛn bin de du dɛn tɛm dɛn de. (Jɛnɛsis 8:​20, 21; 12:​7, 8; Job 1:​4, 5) Bɔt Isɔ bin jɔs pe atɛnshɔn pan di tin we go mek i satisfay, dat bin mek i giwe in rayt we i gɛt as di fɔs bɔy pikin fɔ wan bol sup. Sɔntɛm Isɔ bin want fɔ avɔyd di sɔfa we Jiova bin tɔk se Ebraam in pikin dɛn go sɔfa. (Jɛnɛsis 15:​13) Isɔ bin sho bak se i nɔ gɛt wan rɛspɛkt fɔ Gɔd biznɛs we i bin mared tu pegan uman dɛn. Dis tin we i bin du bin mek in mama ɛn papa dɛn at rili pwɛl. (Jɛnɛsis 26:​34, 35) Bɔt Jekɔb bin difrɛn bikɔs i bin mek shɔ se i mared pɔsin we de wɔship di tru Gɔd!—Jɛnɛsis 28:​6, 7; 29:​10-12, 18.

Wetin dɛn skripchɔ dɛn ya de tich wi bɔt di Mɛsaya in gret-granpa dɛn? Sɔm pan dɛn na bin di fɔs bɔy pikin dɛn ɛn sɔm nɔto bin di fɔs bɔy pikin dɛn. Dis na tin we di Ju pipul dɛn bin ɔndastand ɛn dɛn gri wit am. Aw wi no dis? Bikɔs dɛn bin gri se Krays kɔmɔt na Devid in famili layn, ɛn Devid na Jɛsi in las bɔy pikin.—Matyu 22:​42.