1, 2. (a) Tɔk bɔt di ɛgzampul we Jizɔs bin gi bɔt wan man we gɛt fam. (b) Aw di ɛgzampul ɛp wi fɔ no wetin na fri-an ɛn wetin i min fɔ du gud to pɔsin we nɔ fit fɔ lɛ dɛn du am gud?

WAN ali mɔnin, wan man we gɛt fam bin go na wan ples we bɔku pipul dɛn kin gɛda, fɔ go fɛn wokman dɛn fɔ wok fɔ am. I bin sho dɛn ɔmɔs i go pe dɛn ɛn di wokman dɛn bin gri fɔ wok fɔ am. Bɔt bikɔs i bin want mɔ wokman dɛn, i go bak na di ples we bɔku pipul dɛn kin gɛda, bɔku bɔku tɛm fɔ fɛn mɔ wokman dɛn. I bin tɛl dɛn ɔl se i go pe dɛn wetin dɛn fɔ gɛt. We dɛn dɔn fɔ wok, di man gɛda di wokman dɛn so dat i go pe dɛn. Di man bin gi dɛn ɔl di sem mɔni, ilɛksɛf na fɔ di ol de dɛn wok ɔ na wan awa nɔmɔ dɛn wok. Bɔt we di wokman dɛn we bin wok ol de bigin fɔ grɔmbul, di man we gɛt di fam se: ‘Una nɔ bin gri fɔ tek di mɔni we a bin se a go pe una? A nɔ gɛt rayt fɔ gi mi wokman dɛn wetin a want fɔ gi dɛn? Una de jɛlɔs bikɔs a gɛt fri-an?’—Matyu 20:​1-15.

² Jizɔs in stori de tich wi wan impɔtant lɛsin bɔt di “gud we Gɔd gud” to wi. ^[1] (Rid di ɛndnot ɔnda di las paregraf.) (Rid Sɛkɛn Lɛta Fɔ Kɔrint 6:​1.) Aw? Sɔm pipul dɛn go de tink se di man dɛn we wok ol de fɔ gɛt mɔ mɔni pas di ɔda wan dɛn. Bɔt di man we gɛt di fam sho se i gud to di wan dɛn we wok fɔ jɔs smɔl tɛm. Wan masta sabi bukman tɔk bɔt di wɔd we di Baybul kin yuz fɔ “gud” ɔ “blɛsin.” I se dɛn wɔd ya min “fɔ gi  sɔntin to pɔsin we di pɔsin nɔ fit fɔ gɛt ɔ i nɔ wok fɔ am.”

3, 4. Aw Jiova dɔn sho se i de blɛs ɔl mɔtalman? Wetin mek?

³ Di Baybul tɛl wi se Gɔd in blɛsin na tin we i de “gi” fri. (Lɛta Fɔ Ɛfisɔs 3:​7) Bikɔs wi nɔ ebul fɔ obe Jiova pafɛkt wan, wi nɔ fit fɔ gɛt ɛni blɛsin frɔm am. Infakt, wi fit fɔ day. Kiŋ Sɔlɔmɔn bin se: “Nɔbɔdi nɔ de na [di] wɔl we de du wetin PAPA GƆD want ɔltɛm ɛn nɔ de ɛva sin.” (Ɛkliziastis 7:​20) Leta di apɔsul Pɔl se: “Ɔlman dɔn sin, dɛn nɔ bi igen lɛkɛ aw dɛn bin fɔ bi,” ɛn “day na sin in pe.”—Lɛta Fɔ Rom 3:​23; 6:​23a.

⁴ Bikɔs Jiova rili lɛk mɔtalman, i sɛn “in wangren Pikin” fɔ kam day fɔ wi. Dat na di bɛst blɛsin we Jiova dɔn gi to mɔtalman. (Jɔn 3:​16) Pɔl bin se: “Jizɔs de rul ɔltin. . . . So di lɛk we Gɔd lɛk mɔtalman ɛn di sɔri we i sɔri fɔ am, mek i mek Jizɔs sɔfa ɛn day fɔseka mɔtalman.” (Di Ibru Pipul Dɛn 2:​9) So di “layf we go de sote go, nain Gɔd gi wi fri. Wi gɛt di layf we go de sote go bikɔs wi gɛt wanwɔd wit Jizɔs Krays we na wi Masta.”—Lɛta Fɔ Rom 6:​23b.

5, 6. Wetin go apin if wi alaw (a) sin fɔ kɔntrol wi? (b) di blɛsin we wi nɔ fit fɔ gɛt fɔ kɔntrol wi?

⁵ Wetin mek wi de sin ɛn day? Di Baybul tɔk se “bikɔs wan man sin, frɔm da tɛm de ɔlman bin gɛt fɔ day.” So bikɔs wi na Adam in pikin dɛn, wi nɔ pafɛkt ɛn wi de day. (Lɛta Fɔ Rom 5:​12, 14, 17) Bɔt wi kin stil mek sin nɔ kɔntrol wi. Aw dat go apin? We wi sho se wi gɛt fet pan di day we Jizɔs Krays kam day fɔ wi, wi go bɛnifit frɔm di blɛsin we Gɔd de gi. Di Baybul se: “Aw sin de plɛnti, na so Gɔd de sho wi se i lɛk wi mɔ ɛn mɔ, pan ɔl we wi nɔ fit fɔ mek i lɛk wi. So jɛs lɛkɛ aw sin bin gɛt pawa fɔ mek ɔlman day, na semwe so di lɛk we Gɔd lɛk wi pan ɔl we wi nɔ fit fɔ mek i lɛk wi, gɛt pawa fɔ mek wi gɛt layf we go de sote go, naw we Gɔd dɔn mek ɔltin rayt bitwin in ɛn mɔtalman na Masta Jizɔs Krays mek dat bi so.”—Lɛta Fɔ Rom 5:​20, 21.

⁶ Pan ɔl we wi de sin, wi nɔ want fɔ mek sin kɔntrol wi. So we wi du sɔntin we nɔ rayt, wi fɔ beg Jiova mek i fɔgiv wi. Pɔl bin wɔn wi se: “Una nɔ fɔ mek sin rul una layf igen, bikɔs una nɔ de ɔnda di lɔ naw, bɔt na di lɛk we Gɔd lɛk una ɛn di sɔri we i sɔri fɔ una de rul una layf naw, pan ɔl we wi nɔ fit fɔ mek Gɔd lɛk wi so ɔ sɔri fɔ wi so.” (Lɛta Fɔ Rom 6:​14) Aw wi go bɛnifit frɔm Gɔd in blɛsin we wi nɔ fit fɔ gɛt? Pɔl se: “Gɔd dɔn sho wi aw i gud we . . . i de sho wi se wi fɔ lɛf fɔ liv lɛkɛ pipul we nɔ no am, wi fɔ lɛf dɛn bad tin we wi want du na di wɔl, ɛn lan fɔ kɔntrol wisɛf, fɔ waka tret, ɛn fɔ waka wit am na dis wɔl.”—Taytɔs 2:​11, 12.

7, 8. Wetin di Baybul min we i tɔk bɔt “di difrɛn difrɛn blɛsin dɛn we Gɔd de gi”? (Luk di pikchɔ nia dis atikul in taytul.)

⁷ Di apɔsul Pita bin rayt se: “Bikɔs wi ɔl gɛt gift we Gɔd dɔn gi wi, yuz am fayn fɔ ɛp ɔda pipul dɛn. Yuz am lɛk pɔsin we de wok fɔ Gɔd ɛn we de bɛnifit frɔm di difrɛn difrɛn blɛsin dɛn we Gɔd de gi.” (Pita In Fɔs Lɛta 4:​10) Wetin di Baybul min we i tɔk bɔt “di difrɛn difrɛn blɛsin dɛn we Gɔd de gi”? I min se ilɛk uskayn prɔblɛm mit wi, Jiova go gi wi wetin wi nid so dat wi go ebul fɔ bia. (Pita In Fɔs Lɛta 1:​6) I kin gi wi jɔs wetin wi nid ɔltɛm so dat wi go ebul fɔ bia wit di prɔblɛm dɛn we kin mit wi.

 ⁸ Di apɔsul Jɔn bin rayt se: “Bikɔs i lɛk wi bad, i dɔn blɛs wi ɔl ɛn i de blɛs wi mɔ ɛn mɔ. (Jɔn 1:​16) Bikɔs Jiova de blɛs wi difrɛn difrɛn we dɛn, wi de gɛt bɔku blɛsin dɛn. Wetin na sɔm pan dɛn blɛsin dɛn ya?

9. Aw wi go bɛnifit frɔm di blɛsin dɛn we Jiova de gi wi we wi nɔ fit fɔ gɛt? Aw wi go sho se wi rili gladi fɔ dat?

⁹ Jiova de fɔgiv wi sin dɛn. Wi gladi fɔ di blɛsin dɛn we wi nɔ fit fɔ gɛt we Jiova de gi wi bikɔs na dat mek i de fɔgiv wi sin dɛn. Bɔt i go du dat if wi ripɛnt ɛn tray tranga wan nɔ fɔ de du ɛnitin we go mek wi want fɔ sin. (Rid Jɔn In Fɔs Lɛta 1:​8, 9.) Pɔl bin ɛksplen to di anɔyntɛd Kristian dɛn we bin de da tɛm de bɔt aw Jiova de fɔgiv sin dɛn. I bin se: “[Gɔd] pul wi kɔmɔt pan sin we bin gɛt pawa oba wi ɛn we bin mek wi de na dak ɛn i briŋ wi kam ɔnda in Pikin we i lɛk bad, in pawa. Na Gɔd in Pikin dɔn pul wi kɔmɔt ɔnda sin in pawa, dat na we i dɔn padin wi.” (Lɛta Fɔ Kɔlɔse 1:​13, 14) Wi rili gladi we Gɔd dɔn sɔri fɔ wi, so dat dɔn mek wi want fɔ prez am. Ɛn bikɔs Jiova de fɔgiv wi sin dɛn, wi go ebul fɔ gɛt bɔku ɔda wɔndaful blɛsin dɛn.

10. Wetin wi gɛt bikɔs Gɔd de gi wi blɛsin we wi nɔ fit fɔ gɛt?

¹⁰ Wi go gɛt pis ɛn fayn padi biznɛs wit Gɔd. Wi nɔ pafɛkt, so frɔm di tɛm we dɛn bɔn wi, wi dɔn bi Gɔd in ɛnimi. Bɔt Pɔl bin se: “Wi na pipul dɛn we nɔ bin lɛk Gɔd, bɔt Gɔd briŋ wi kam bak to insɛf bay di day we in Pikin day.” (Lɛta Fɔ Rom 5:​10) Bikɔs Jizɔs bin dɔn kam day fɔ wi, pis go de bitwin wi ɛn Gɔd ɛn wi go ebul fɔ bi in padi. Pɔl bin ɛksplen dis ɛn aw dis gɛt sɔntin fɔ du wit di blɛsin we Jiova de gi wi, we i tɛl in anɔyntɛd brɔda dɛn se: “We Gɔd dɔn mek ɔltin rayt bitwin wi ɛn insɛf, bikɔs wi biliv pan am, wi gladi we wi de waka klos am; na wi Masta Jizɔs Krays du dat fɔ wi. Bikɔs wi biliv pan Krays, i dɔn mek wi no aw Gɔd lɛk wi pan ɔl we wi nɔ fit fɔ mek i lɛk wi, ɛn Gɔd de sho wi aw i lɛk wi naw.” (Lɛta Fɔ Rom 5:​1, 2) Wi rili gladi we wi gɛt pis ɛn fayn padi biznɛs wit Jiova!

11. Aw di anɔyntɛd dɛn de ɛp “di ɔda ship dɛn” fɔ du tin dɛn di rayt we?

¹¹ Wi kin bin pipul dɛn we de du wetin rayt na Gɔd in yay. Di prɔfɛt Daniɛl bin rayt se insay di las dez, “di wan dɛn we gɛt sɛns,” dat na di anɔyntɛd wan dɛn, go “sho bɔku pipul aw fɔ waka di rayt we.” (Rid Daniɛl 12:​3.) Aw di anɔyntɛd dɛn de du dat? Dɛn de prich di gud nyus ɛn tich bɔku bɔku pipul dɛn we na di “ɔda ship dɛn” Jiova in lɔ dɛn. (Jɔn 10:​16) Di anɔyntɛd dɛn de ɛp di ɔda ship dɛn fɔ du wetin rayt na Gɔd in yay, ɛn dat de apin bikɔs Jiova de gi dɛn di blɛsin we dɛn nɔ fit fɔ gɛt. Pɔl bin ɛksplen se: “Di lɛk we Gɔd lɛk wi we wi nɔ fit fɔ gɛt dɔn mek ɔltin rayt bitwin Gɔd ɛn mɔtalman, we Jizɔs Krays dɔn bay ɔlman wit in blɔd fɔ mek dɛn fri.”—Lɛta Fɔ Rom 3:​23, 24.

12. Aw prea gɛt sɔntin fɔ du wit di blɛsin we Gɔd de gi wi we wi nɔ fit fɔ gɛt?

¹² Wi go kam nia Gɔd bay we wi de pre. Bikɔs Jiova dɔn gi wi blɛsin we wi nɔ fit fɔ gɛt, wi kin ebul fɔ pre to am. Pɔl bin se “lɛ wi kam bifo Gɔd we go sho wi aw i lɛk wi,” ɛn i se “wi nɔ fɔ fred” fɔ kam to am. (Di Ibru Pipul Dɛn 4:​16a) Wi kin yuz Jizɔs in nem fɔ pre to Jiova ɛnitɛm. Fɔ tru, dis na big big ɔnɔ! Pɔl se: “Wi biliv pan Jizɔs Krays ɛn wi gɛt wanwɔd wit am, wi fri ɛn gɛt di maynd fɔ go bifo Gɔd.”—Lɛta Fɔ Ɛfisɔs 3:​12.

13. Aw Gɔd in blɛsin we wi nɔ fit fɔ gɛt kin ɛp wi “di rayt tɛm”?

¹³ Wi go gɛt ɛp di rayt tɛm. Pɔl bin  ɛnkɔrej wi fɔ pre to Jiova ɛnitɛm we nid de, ɛn i se “lɛ wi kam bifo Gɔd we go sho wi aw i lɛk wi, ɛn we go sɔri fɔ wi, ɛn ɛp wi di rayt tɛm.” (Di Ibru Pipul Dɛn 4:​16b) Ɛnitɛm we wi kin gɛt prɔblɛm na wi layf, wi kin beg Jiova fɔ ɛp wi. Ɛn i kin ansa wi prea dɛn pan ɔl we i nɔ nid fɔ du dat. I kin yuz wi brɔda ɛn sista dɛn fɔ ɛp wi. Jiova kin ansa wi prea dɛn, so “na dat mek wi shɔ bɔt wetin wi de tɔk wɛn wi se, ‘Na Gɔd de ɛp mi ɔltɛm, natin nɔ go mek a fred, bikɔs mɔtalman nɔ gɛt ɛni pawa fɔ du mi bad.’”—Di Ibru Pipul Dɛn 13:​6.

14. Aw Jiova in blɛsin we wi nɔ fit fɔ gɛt de bɛnifit wi?

¹⁴ Wi go gɛt kɔrej na wi at. Na big big blɛsin fɔ mek Jiova ɛnkɔrej wi ɛnitɛm we wi gɛt prɔblɛm we de mɔna wi insay wi at. (Sam 51:​17) We di Kristian dɛn we bin de na Tɛsalonayka bin gɛt bɔku bɔku prɔblɛm, Pɔl bin rayt dɛn se: “Wi de pre mek wi Masta Jizɔs Krays insɛf, ɛn Gɔd we na wi Papa, we lɛk wi ɛn mek wi gɛt kɔrej ɔltɛm bikɔs i gud ɛn mek wi ebul bia wet fɔ wetin gud, kɔrej una ɛn ɛp una fɔ du ɛn tɔk ɔl wetin gud.” (Sɛkɛn Lɛta Fɔ Tɛsalonayka 2:​16, 17) Dat de rili ɛnkɔrej wi fɔ no se bikɔs Jiova de blɛs wi di we we wi nɔ fit fɔ gɛt na dat mek i lɛk wi ɛn i de kia fɔ wi!

15. Us op wi gɛt we Gɔd dɔn gi wi blɛsin we wi nɔ fit fɔ gɛt?

¹⁵ Wi gɛt op fɔ gɛt layf we go de sote go. Bikɔs wi de sin, wi nɔ go gɛt ɛni op if Jiova nɔ ɛp wi. (Sam 49:​7, 8.) Bɔt Jiova dɔn gi wi wan wɔndaful op. Wetin na da op de? Jizɔs bin se: “Wetin mi Papa want, na fɔ mek ɔlman we no in Pikin ɛn biliv pan am gɛt layf we go de sote go.” (Jɔn 6:​40) So wi gɛt op se wi go de sote go bikɔs Jiova dɔn gi wi blɛsin we wi nɔ fit fɔ gɛt. Pɔl bin se: “Gɔd dɔn sho wi aw i gud we i want sev ɔlman.”—Taytɔs 2:​11.

16. Aw sɔm fɔstɛm Kristian dɛn bin sho se dɛn nɔ tek di blɛsin dɛn we Gɔd de gi wi we wi nɔ fit fɔ gɛt, mek natin?

¹⁶ Wi kin gɛt bɔku blɛsin dɛn bikɔs Jiova de gi wi in blɛsin we wi nɔ fit fɔ gɛt.  Bɔt wi nɔ fɔ tek dɛn blɛsin ya lɛk se dɛn na natin ɛn fil se wi fɔ jɔs de du bad tin dɛn nɔmɔ. Di tɛm we dɛn fɔstɛm Kristian dɛn bin de, sɔm pipul dɛn bin de we bin de fil “se bikɔs Gɔd gud, dɛn kin du ɛni kayn tin, ɛn Gɔd nɔ go kɔndɛm dɛn.” (Jud In Lɛta 4) Dɛn Kristian ya we nɔ bin fetful bin tink se dɛn kin sin ɛn Jiova go de fɔgiv dɛn ɔltɛm. Dɛn bin ivin tray fɔ mek dɛn brɔda dɛn jɔyn dɛn fɔ sin. Tide bak, ɛnibɔdi we de du dat “de fityay Gɔd in Spirit we [de] briŋ blɛsin kam.”—Di Ibru Pipul Dɛn 10:​29.

17. Us advays Pita bin gi?

¹⁷ Setan dɔn ful sɔm Kristian dɛn tide fɔ biliv se dɛn kin sin ɛn Jiova go fɔgiv dɛn wantɛm wantɛm. Na tru se Jiova rɛdi fɔ fɔgiv pipul dɛn we ripɛnt we dɛn sin; bɔt i want wi fɔ tray tranga wan nɔ fɔ sin. Jiova bin tɛl Pita fɔ rayt se: “Mi padi dɛn we a lɛk, we una dɔn no dɛn tin ya bifo dɛn bi, una fɔ tek tɛm mek dɛn pipul ya we nɔ de kip Gɔd in lɔ nɔ drɔ una fɔ fala dɛn ɛn mek una yon at nɔ stɛdi. Una fɔ lan mɔ ɛn mɔ bɔt wi Masta Jizɔs Krays we sev wi.”—Pita In Sɛkɛn Lɛta 3:​17, 18.

18. Bikɔs Jiova dɔn gi wi in blɛsin we wi nɔ fit fɔ gɛt, wetin wi fɔ du?

¹⁸ Wi rili gladi fɔ di blɛsin we Jiova de gi wi we wi nɔ fit fɔ gɛt. So wi fɔ yuz di tin dɛn we wi gɛt fɔ ɔnɔ Jiova ɛn fɔ ɛp ɔda pipul dɛn. Na tin we wi fɔ du fɔ dɛn. Aw wi fɔ yuz dɛn gift dɛn de? Pɔl bin se: “Ɔlman fɔ wok lɛkɛ aw Gɔd mek i ebul wok wit di pawa ɔ sɛns we Gɔd gi am. . . . If Gɔd mek wi want fɔ ɛp Kristiɛn dɛn ɔltɛm ɛn mek wi sabi wetin fɔ du, wi fɔ ɛp dɛn. If i mek wi sabi fɔ lan pipul, wi fɔ lan pipul. If i mek wi sabi fɔ kɔrej pipul, wi fɔ kɔrej pipul. . . . Ɛnibɔdi we Gɔd gi ajo, fɔ gladi fɔ sho am.” (Lɛta Fɔ Rom 12:​6-8) Bikɔs wi gɛt Jiova in blɛsin we wi nɔ fit fɔ gɛt, wi fɔ wok tranga wan fɔ du di prichin wok, fɔ tich ɔda pipul dɛn di Baybul, ɛnkɔrej wi brɔda ɛn sista dɛn, ɛn fɔgiv ɛnibɔdi we du wi bad.

19. Wetin wi go tɔk bɔt insay di nɛks atikul?

¹⁹ Jɔs lɛk di wan dɛn we Jiova dɔn gi in blɛsin, wi fɔ tray fɔ du wi bɛst “fɔ tɛl pipul di Gud Nyuz bɔt aw Gɔd gud ɛn aw i lɛk mɔtalman.” (Di Apɔsul Dɛn Wok [Akt] 20:​24) Wi go tɔk bɔt dis wok na di nɛks atikul.