1, 2. Aw di Baybul bin tɔk se Jiova in pipul dɛn go bɔku?

ARƆWND di wɔl, wan ɔganayzeshɔn de we gɛt pipul dɛn we lɛk Jiova ɛn we want fɔ sav am. Dɛn pipul dɛn ya na Jiova Witnɛs dɛn. Pan ɔl we dɛn gɛt fɔlt ɛn dɛn kin mek mistek, Jiova de gayd dɛn wit in oli spirit. Lɛ wi si sɔm pan di we dɛn aw Jiova dɔn blɛs dɛn.

² Insay 1914, di pipul dɛn we bin de wɔship Jiova nɔ bin bɔku. Bɔt Jiova dɔn blɛs di prichin wok. Dat dɔn mek bɔku bɔku pipul dɛn dɔn lan di tru tin we de na di Baybul ɛn dɛn dɔn kam fɔ bi Jiova in Witnɛs dɛn. Jiova bin tɔk bɔt di wɔndaful we aw in pipul dɛn go bɔku we i se: “Di las wan go bi ɛkstɛndɛd famili, ɛn di wan we smɔl pas ɔl go bi wan big big neshɔn; Mi na PAPA GƆD; we di tɛm rich, a go mekes du am.” (Ayzaya 60:​22) Tide, wi kin si klia wan se wetin Jiova bin tɔk dɔn de apin. Jiova in pipul dɛn tan lɛk big big neshɔn. Infakt, na  lɛk bɔku kɔntri dɛn de na di wɔl we nɔ bɔku rich ɔl di Jiova Witnɛs dɛn we de na di wɔl.

3. Aw Gɔd in savant dɛn de sho se dɛn lɛk dɛn kɔmpin dɛn?

³ Insay dis las dez, Jiova dɔn ɛp in pipul dɛn fɔ mek dɛn lɛk dɛn kɔmpin dɛn mɔ. Di Baybul se: “Gɔd na di wan we nɔ de tap fɔ lɛk ɔltɛm” ɛn dɛn de falamakata am. (Jɔn In Fɔs Lɛta 4:​8) Jizɔs bin tɛl di wan dɛn we de fala am se: “Una fɔ lɛk una kɔmpin.” I bin tɛl dɛn bak se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:​34, 35) Dɛn biɛn tɛm ya, Jiova in savant dɛn dɔn sho dis kayn lɔv fɔ dɛn kɔmpin dɛn pan ɔl we ɔda neshɔn dɛn de fɛt wɔ. Fɔ ɛgzampul, insay Wɔl Wɔ Tu dɛn bin kil lɛk 55 milyɔn pipul dɛn. Bɔt Jiova in pipul dɛn nɔ bin kil nɔbɔdi pan da wɔ de. (Rid Mayka 4:​1, 3.) Dis dɔn ɛp dɛn fɔ mek Gɔd nɔ “blem” dɛn fɔ pipul dɛn layf.—Di Apɔsul Dɛn Wok 20:​26.

4. Wetin mek i impɔtant fɔ no se Gɔd in pipul dɛn jɔs de bɔku?

⁴ Gɔd in pipul dɛn de kɔntinyu fɔ bɔku pan ɔl we dɛn gɛt wan pawaful ɛnimi we nem Setan. In na “di gɔd we de na dis wɔl.” (Sɛkɔn Lɛta Fɔ Kɔrint 4:​4, NW) Na Setan de kɔntrol dɛn politikal ɔganayzeshɔn dɛn na dis wɔl, di wan dɛn we de tɔk bɔt di tin dɛn we de apin na di wɔl, ɛn i de yuz dɛn wan dɛn ya fɔ tray fɔ stɔp di gud nyus we Gɔd in pipul dɛn de prich. Bɔt Setan nɔ go ebul fɔ stɔp dis wok. Pan ɔl dat, Setan no se i gɛt smɔl tɛm we dɔn lɛf, so i de tray fɔ stɔp wi fɔ mek wi nɔ go wɔship Jiova.—Rɛvɛleshɔn 12:​12.

5. Wetin kin mek sɔntɛnde ɔda pipul dɛn kin mek wi vɛks? (Luk di pikchɔ nia dis atikul in taytul.)

⁵ Gɔd in savant dɛn de lan se i rili impɔtant fɔ lɛk Gɔd ɛn ɔda pipul dɛn. Jizɔs bin se: “‘Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.’ Dis na di lɔ we pas ɔl di ɔda wan dɛn. Di ɔda lɔ we impɔtant nain dis: ‘Yu fɔ lɛk yu kɔmpin mɔtalman lɛkɛ aw yu lɛk yusɛf.’” (Matyu 22:​35-39) Bɔt di Baybul ɛp wi fɔ no se we Adam bin sin, dat bin mek ɔl mɔtalman nɔ pafɛkt. (Rid Lɛta Fɔ Rom 5:​12, 19.) So sɔm tɛm de, sɔmbɔdi na di kɔngrigeshɔn go tɔk ɔ du sɔntin we go mek wi vɛks. We dis apin, wetin wi go du? Wi go kɔntinyu fɔ lɛk Jiova mɔ ɛn mɔ? Wi go de biɛn Jiova ɛn in pipul dɛn? Di Baybul tɛl wi bɔt sɔm pan Gɔd in savant dɛn we bin se ɔ du tin we bin mek ɔda pipul dɛn vɛks. Lɛ wi si wetin wi go lan frɔm wetin bin apin to dɛn.

6. Aw Ilay nɔ bin ebul fɔ kɔrɛkt in tu bɔy pikin dɛn?

⁶ Fɔ ɛgzampul, Ilay na bin ay prist na Izrɛl, bɔt in tu bɔy pikin dɛn nɔ bin de obe Jiova in lɔ. Di Baybul se: “Ilay in bɔypikin dɛn na bin bad baba dɛn. Dɛn nɔ bin de biɛv lɛk udat dɛn no PAPA GƆD.” (Fɔs Samiɛl 2:​12) Ilay bin no se in pikin dɛn de du bad bad tin dɛn. Bɔt pan ɔl dat, i nɔ bin de kɔrɛkt in pikin dɛn di we we i fɔ du am. As  tɛm de go, Jiova bin pɔnish Ilay ɛn in tu pikin dɛn. Ɛn leta, i nɔ bin alaw Ilay in granpikin dɛn fɔ sav as ay prist. (Fɔs Samiɛl 3:​10-14) If yu bin de di tɛm we Ilay bin de ɛn yu kam fɔ no se i bin alaw in tu bɔy pikin dɛn fɔ du bad bad tin dɛn, dat bin fɔ dɔn ambɔg yu? Yu tink se wetin bin apin fɔ dɔn mek yu nɔ gɛt bɛtɛ fet igen pan Jiova ɛn mek yu lɛf fɔ sav am?

7. Aw Devid bin sin siriɔs wan? Wetin Gɔd bin du?

⁷ Devid bin gɛt fayn kwaliti dɛn we bin mek Jiova rili lɛk am. (Fɔs Samiɛl 13:​13, 14; Di Apɔsul Dɛn Wok 13:​22) Bɔt ivin Devid bin du sɔntin we rili bad. We Yuraya bin go fɔ fɛt wɔ, Devid bin du mami ɛn dadi biznɛs wit Yuraya in wɛf we nem Batshiba ɛn i bin gɛt bɛlɛ. Devid nɔ bin want fɔ mek ɛni ɔda pɔsin no wetin i bin dɔn du. So i mek dɛn kɔl Yuraya fɔ kam si am ɛn i tray fɔ tɔk to am fɔ mek i go na in os. Devid bin op se Yuraya go du mami ɛn dadi biznɛs wit in wɛf we go mek pipul dɛn tink se na Yuraya na di pikin in papa. Bɔt Yuraya nɔ bin go na in os. So Devid bin arenj fɔ mek dɛn kil Yuraya pan di wɔ. Bikɔs Devid bin sin siriɔs wan, dat bin mek in ɛn in famili bin sɔfa bad bad wan. (Sɛkɛn Samiɛl 12:​9-12) Bɔt Jiova bin sɔri fɔ am ɛn fɔgiv am. Jiova bin no se Devid bin want fɔ du wetin rayt. (Fɔs Kiŋ 9:​4) If yu bin  de da tɛm de, aw yu bin fɔ fil bɔt di tin we Devid bin du? Yu bin fɔ dɔn lɛf fɔ sav Jiova?

8. (a) Aw Pita nɔ bin du wetin i se? (b) Wetin bin mek Jiova kɔntinyu fɔ yuz Pita pan ɔl we i bin dɔn mek mistek?

⁸ Wan ɔda baybul ɛgzampul na di apɔsul Pita. Jizɔs bin pik am fɔ bi in apɔsul. Pan ɔl dat, Pita bin de tɔk ɔ du tin we nɔ bin rayt. Fɔ ɛgzampul, Pita bin tɔk se i nɔ go ɛva kɔmɔt biɛn Jizɔs ilɛksɛf ɔlman kɔmɔt biɛn am. (Mak 14:​27-31, 50) Bɔt afta we dɛn arɛst Jizɔs, ɔl di apɔsul dɛn, ivin Pita bin kɔmɔt biɛn am. Dɔn tri difrɛn tɛm dɛn, Pita bin tɔk se i nɔ sabi Jizɔs. (Mak 14:​53, 54, 66-72) Bɔt Pita bin fil bad bɔt wetin i bin du. So Jiova fɔgiv am ɛn i kɔntinyu fɔ de yuz am. If yu na bin wan pan di disaypul dɛn dɛn tɛm dɛn de ɛn yu bin no wetin Pita bin dɔn du, yu go kɔntinyu fɔ abop pan Jiova?

9. Wetin mek wi biliv se Gɔd kin du wetin rayt ɔltɛm?

⁹ Frɔm dɛn ɛgzampul dɛn ya, wi si se sɔm pan Jiova in savant dɛn bin du bad tin dɛn ɛn dɛn bin ivin mek ɔda pipul dɛn vɛks bad bad wan. If dis kayn tin apin tide, wetin yu go du? Yu go lɛf fɔ de go mitin ɔ ivin kɔmɔt biɛn Jiova ɛn in pipul dɛn? Ɔ yu go kam fɔ no se Jiova na Gɔd we gɛt sɔri-at ɛn sɔntɛm i de wet fɔ lɛ di pɔsin ripɛnt? Bɔt sɔm tɛm de, pɔsin we kin dɔn sin siriɔs wan nɔ kin fil sɔri fɔ wetin i dɔn du. Yu biliv se Jiova no dis ɛn i go du sɔntin bɔt dis di rayt tɛm? Jiova kin ivin pul da pɔsin de kɔmɔt na in ɔganayzeshɔn if nid de. Yu biliv se Jiova kin du tin tret ɛn i kin du wetin rayt ɔltɛm?

10. Wetin Jizɔs bin ɔndastand bɔt di fɔlt we Judas Iskariɔt ɛn Pita bin gɛt?

¹⁰ Na di Baybul, wi rid bɔt plɛnti pipul dɛn we dɔn kɔntinyu fɔ de biɛn Jiova ɛn in pipul dɛn pan ɔl we ɔda pipul dɛn de mek siriɔs mistek dɛn. Jizɔs sɛt di bɛst ɛgzampul. Afta we i bin pre ol nɛt fɔ mek i Papa go ɛp am, i bin ebul fɔ pik in 12 apɔsul dɛn. Bɔt wan pan dɛn we nem Judas Iskariɔt bin leta kɔmɔt biɛn Jizɔs. Dɔn bak di apɔsul Pita bin tɔk se i nɔ no Jizɔs. (Lyuk 6:​12-16; 22:​2-6, 31, 32) Jizɔs nɔ bin blem Jiova, ɔ in ɔda disaypul dɛn we sɔm nɔ bin du wetin i want. Bifo dat, Jizɔs bin kɔntinyu fɔ sav am ɛn de biɛn am. Dat bin mek Jiova bin blɛs am bay we i gi am layf bak ɛn leta i mek am Kiŋ na in Kiŋdɔm we de na ɛvin.—Matyu 28:​7, 18-20.

11. Wetin di Baybul bin tɔk bɔt Jiova in savant dɛn insay dis tɛm?

¹¹ Jizɔs in ɛgzampul de tich wi fɔ kɔntinyu fɔ de biɛn Jiova ɛn in pipul dɛn. Wi gɛt gud rizin fɔ du dat. Wi si  se Jiova de gayd in savant dɛn insay dis las dez. I de ɛp dɛn fɔ prich di trut na di wan ol wɔl ɛn na dɛn nɔmɔ de du dat. Ɔl di tin dɛn we Jiova de tich dɛn de mek dɛn gɛt wanwɔd ɛn gladi at. Jiova bin tɔk dis we i se: “A de tɛl una, mi wokman dɛn go siŋ bikɔs dɛn at gladi.”—Ayzaya 65:​14.

12. Aw wi fɔ si di fɔlt dɛn we ɔda pipul dɛn gɛt?

¹² Wi rili gladi bikɔs Jiova de gayd wi ɛn ɛp wi fɔ du bɔku gud tin dɛn. Di pipul dɛn na Setan in wɔl difrɛn bikɔs dɛn nɔ gladi ɛn dɛn nɔ gɛt ɛni op fɔ di tumara bambay. I nɔ go rili mek sɛns ɔ fayn fɔ lɛf Jiova ɛn in pipul dɛn jɔs bikɔs sɔmbɔdi na di kɔngrigeshɔn se ɔ du sɔntin we nɔ rayt! Bifo dat wi fɔ kɔntinyu fɔ de biɛn Jiova ɛn fala di tin dɛn we i dɔn sho wi fɔ du. Dɔn wi nid fɔ lan aw wi fɔ si di fɔlt dɛn we ɔda pipul dɛn gɛt ɛn wetin wi fɔ du.

13, 14. (a) Wetin mek wi fɔ peshɛnt wit ɔda pipul dɛn? (b) Us prɔmis wi go want fɔ de mɛmba?

¹³ Wetin yu fɔ du if wan pan yu brɔda dɛn se ɔ du sɔntin we mek yu vɛks bad bad wan? Di Baybul gi dis advays: “Nɔ kwik fɔ vɛks bikɔs na fulman gɛt soso vɛksteshɔn nain at.” (Ɛkliziastis 7:​9) Wi ɔl nɔ pafɛkt ɛn wi kin mek mistek. So wi nɔ fɔ tink se wi brɔda dɛn go se ɔ du sɔntin we rayt ɔltɛm. Ɛn i nɔ go fayn fɔ lɛ wi kɔntinyu fɔ de tink bɔt di mistek dɛn we dɛn kin mek. If wi du dat, dat go mek wi nɔ gladi igen we wi de sav Jiova. Dat go mek wi nɔ go gɛt bɛtɛ fet igen ɛn sɔntɛm wi go lɛf Jiova in ɔganayzeshɔn. Datɛnde, wi nɔ go de sav Jiova ɔ op fɔ de na di nyu wɔl.

¹⁴ So wetin go ɛp yu fɔ mek yu kɔntinyu fɔ gladi we yu de sav Jiova we ɔda pipul dɛn de du sɔntin we mek yu nɔ fil fayn? Ɔltɛm, mɛmba di fayn prɔmis we se: “A [de] mek nyu skay ɛn nyu wɔl; ɛn nɔbɔdi nɔ go mɛmba di fɔstɛm tin dɛn ɔ ivin kam na dɛn maynd.” (Ayzaya 65:​17; Pita In Sɛkɛn Lɛta 3:​13) Jiova go gi yu dɛn blɛsin dɛn ya if yu kɔntinyu fɔ de biɛn am.

15. Wetin Jizɔs bin se wi fɔ du we ɔda pipul dɛn du wi bad?

¹⁵ Na tru se wi nɔ de insay di nyu wɔl yet. So if pɔsin mek wi vɛks, wi fɔ tink gud wan bɔt wetin Jiova want wi fɔ du. Fɔ ɛgzampul, Jizɔs bin se: “If una padin ɔda pipul fɔ di bad we dɛn de du una, una Papa we de na ɛvin insɛf go padin una.” We Pita bin aks Jizɔs if wi fɔ fɔgiv “te i rich sɛvin tɛm,” Jizɔs bin ansa am se: “Nɔ, o, nɔto sɛvin tɛm nɔmɔ, yu fɔ padin am pas sɛvinti-sɛvin tɛm.” Jizɔs bin tich wi se wi fɔ rɛdi fɔ  fɔgiv ɔda pipul dɛn ɔltɛm.—Matyu 6:​14, 15; 18:​21, 22.

16. Us fayn ɛgzampul Josɛf bin sɛt?

¹⁶ Josɛf in ɛgzampul bin tich wi wetin fɔ du we ɔda pipul dɛn du wi tin we wi nɔ lɛk. Na Josɛf ɛn in smɔl brɔda nɔmɔ Jekɔb ɛn Rechɛl bin bɔn. Jekɔb bin gɛt tɛn ɔda bɔy pikin dɛn bɔt i bin lɛk Josɛf pas dɛn ɔl. Dis bin mek dɛn rili jɛlɔs Josɛf. Dɛn bin so et am dat dɛn sɛl am as slev ɛn di wan dɛn we bay am bin kɛr am go na Ijipt. Afta lɔng tɛm, di kiŋ na Ijipt bin mek Josɛf di sɛkɔn pɔsin we gɛt pawa pas ɔlman na di kɔntri bikɔs i bin gladi fɔ di gud wok we Josɛf bin de du. Leta we bad bad angri bin de, Josɛf in brɔda dɛn bin go na Ijipt fɔ go bay tin fɔ it. We dɛn bin si Josɛf dɛn nɔ bin no se na in, bɔt Josɛf in bin sabi dɛn. Pan ɔl we dɛn nɔ bin trit am fayn, Josɛf nɔ bin du bad to dɛn, bifo dat i bin du sɔntin fɔ tɛst in brɔda dɛn fɔ no if dɛn dɔn rili chenj. We Josɛf bin kam fɔ no se dɛn dɔn chenj, i bin tɛl dɛn se in na dɛn brɔda, Leta, i bin ɛnkɔrej dɛnɛn se: “Lɛ dɛn nɔ fred. I go mɛn dɛn ɛn dɛn pikin dɛn.”—Jɛnɛsis 50:​21.

17. Wetin yu go want fɔ du we ɔda pɔsin du yu bad?

¹⁷ Mɛmba se ɔlman gɛt fɔlt, ɛn yusɛf kin du pipul dɛn tin we nɔ fayn. So if yu no se yu dɔn du tin we nɔ fayn to pɔsin tek di Baybul in advays. Aks di pɔsin fɔ fɔgiv yu ɛn tray fɔ mek pis wit am. (Rid Matyu 5:​23, 24.) Wi kin lɛk we ɔda pipul dɛn kin fɔgiv wi. So wi fɔ du di sem tin to dɛn. Lɛta Fɔ Kɔlɔse 3:​13 (NW) tɛl wi se: “Una kɔntinyu fɔ de bia wit unasɛf ɛn fɔgiv unasɛf ɔltɛm, ivin if pɔsin dɔn du una bad. Una fɔ de fɔgiv unasɛf ɔltɛm, jɔs lɛk aw Jiova de fɔgiv una ɔltɛm.” If wi rili lɛk wi brɔda dɛn, wi nɔ go kɔntinyu fɔ fil bad bɔt sɔntin we dɛn bin dɔn du wi trade. (Fɔs Lɛta Fɔ Kɔrint 13:​5) If wi de fɔgiv ɔda pipul dɛn, Jiova go fɔgiv wi. So we ɔda pipul dɛn mek mistek, lɛ wi sɔri fɔ dɛn jɔs lɛk aw wi Papa Jiova de sɔri fɔ wi.—Rid Sam 103:​12-14.