1, 2. (a) Wetin Jizɔs bin aks fɔ we i bin de pre in las prea wit in apɔsul dɛn? (b) Wetin mek Jizɔs bin wɔri bɔt di wanwɔd we i apɔsul dɛn fɔ gɛt?

DI TƐM we Jizɔs bin de it wit in apɔsul dɛn fɔ di las tɛm, i bin de wɔri bɔt aw dɛn go gɛt wanwɔd. We i bin de pre wit dɛn, i bin tɔk se i want in disaypul dɛn fɔ gɛt wanwɔd, jɔs lɛk aw in ɛn in Papa gɛt wanwɔd. (Rid Jɔn 17:​20, 21.) If Jizɔs in disaypul dɛn gɛt wanwɔd, dis go sho ɔda pipul dɛn klia wan se na Jiova sɛn Jizɔs fɔ kam na di wɔl. Pipul dɛn go ebul no Jizɔs in tru tru disaypul dɛn bay di we aw dɛn lɛk dɛnsɛf, ɛn dis lɛk we dɛn lɛk dɛnsɛf go mek dɛn kɔntinyu fɔ gɛt wanwɔd.—Jɔn 13:​34, 35.

² Wi kin ɔndastand wetin mek Jizɔs bin tɔk bɔku tin dɛn bɔt wanwɔd da nɛt de. Jizɔs bin notis se in apɔsul dɛn nɔ bin rili gɛt wanwɔd. Fɔ ɛgzampul, di apɔsul dɛn bin de agyu bɔt “uswan pan dɛn fɔ bi edman,” jɔs lɛk aw dɛn bin dɔn de du. (Lyuk 22:​24-27; Mak 9:​33, 34) Wan ɔda tɛm, Jems ɛn Jɔn bin aks Jizɔs fɔ mek dɛn de na di say we impɔtant pas ɔl na di Kiŋdɔm, dat na fɔ mek dɛn sidɔm nia am na ɛvin.—Mak 10:​35-40.

3. Wetin bin de mek Krays in disaypul dɛn nɔ bin gɛt wanwɔd? Us kwɛstyɔn dɛn wi go tɔk bɔt?

 ³ Nɔto ay pozishɔn ɛn pawa nɔmɔ bin de mek Krays in disaypul dɛn nɔ gɛt wanwɔd. Di pipul dɛn we bin de insay Jizɔs in tɛm nɔ bin gɛt wanwɔd bikɔs dɛn nɔ bin lɛk dɛnsɛf ɛn dɛn bin de fil se dɛn bɛtɛ pas dɛn kɔmpin dɛn. Jizɔs in disaypul dɛn bin nid fɔ stɔp fɔ fil dis kayn bad we. Insay dis atikul, wi go tɔk bɔt dɛn kwɛstyɔn dɛn ya: Wetin Jizɔs bin du bɔt di we aw pipul dɛn kin fil se dɛn bɛtɛ pas ɔda pipul dɛn? Aw Jizɔs bin ɛp in disaypul dɛn fɔ lan fɔ trit ɔda pipul dɛn fia wan ɛn gɛt wanwɔd? Aw Jizɔs in ɛgzampul ɛn di tin dɛn we i bin de tich go ɛp wi fɔ kɔntinyu fɔ gɛt wanwɔd?

4. Gi wan ɛgzampul bɔt aw pipul dɛn bin de tink se dɛn bɛtɛ pas Jizɔs.

⁴ Pipul dɛn bin de ivin trit Jizɔs bad ɛn fil se dɛn bɛtɛ pas am. We Filip bin tɛl Natanyɛl se i dɔn si di Mɛsaya, Natanyɛl bin tɔk se: “Ɛni tin gud kin kɔmɔt Nazarɛt?” (Jɔn 1:​46) I go mɔs bi se Natanyɛl bin no se na Bɛtliɛm dɛn go bɔn di Mɛsaya, jɔs lɛk aw dɛn bin dɔn tɔk na Mayka 5:​2. Ɛn Natanyɛl go dɔn tink se Nazarɛt nɔto impɔtant ples fɔ mek di Mɛsaya kɔmɔt. Dɔn bak, dɛn bin gɛt sɔm bigman dɛn na Judia we bin de tink se dɛn bɛtɛ pas Jizɔs bikɔs i kɔmɔt na Galili. (Jɔn 7:​52) Bɔku pipul dɛn na Judia bin de tink se dɛn impɔtant pas di pipul dɛn we kɔmɔt na Galili. Ɔda Ju pipul dɛn bin tray fɔ mɔlɛs Jizɔs bay we dɛn bin de kɔl am Sameritan. (Jɔn 8:​48) Di Sameritan dɛn bin difrɛn frɔm ɔda neshɔn dɛn, ɛn dɛn rilijɔn bin difrɛn frɔm di Ju pipul dɛn rilijɔn. Di pipul dɛn we kɔmɔt na Judia ɛn Galili nɔ bin gɛt bɛtɛ rɛspɛkt fɔ di Sameritan dɛn ɛn dɛn bin de avɔyd dɛn.—Jɔn 4:​9.

5. Wetin mek pipul dɛn bin de fil se dɛn bɛtɛ pas Jizɔs ɛn in disaypul dɛn?

⁵ Di Ju bigman dɛn pan Gɔd biznɛs nɔ bin gɛt wan rɛspɛkt fɔ Jizɔs in disaypul dɛn. Di Faresi dɛn bin de kɔl dɛn “pipul dɛn we gɛt swɛ.” (Jɔn 7:​47-49, NW) Di Faresi dɛn bin de luk di wan dɛn we nɔ lan na dɛn skul usay dɛn de lan bɔt di Ju rilijɔn ɛn dɛn wan we nɔ de fala dɛn tradishɔn dɛn as pipul dɛn we nɔ bɛtɛ ɛn na ɔdinari pipul dɛn. (Di Apɔsul Dɛn Wok [Akt] 4:​13) Pipul dɛn bin de fil se dɛn bɛtɛ pas Jizɔs ɛn in disaypul dɛn bikɔs dɛn tɛm dɛn de pipul dɛn bin prawd bɔt dɛn rilijɔn, dɛn pozishɔn, ɛn dɛn kɔlɔ. Dis kayn we we pipul dɛn bin de tink se wan pɔsin bɛtɛ pas in kɔmpin, bin afɛkt di we aw di disaypul dɛn bin de si ɔda pipul dɛn. Fɔ mek Jizɔs in disaypul dɛn go kɔntinyu fɔ gɛt wanwɔd, dɛn bin gɛt fɔ chenj di we aw dɛn de tink.

6. Us ɛgzampul dɛn yu go yuz fɔ sho se di we aw pipul dɛn de fil se dɛn bɛtɛ pas dɛn kɔmpin dɛn de afɛkt wi?

⁶ Insay di wɔl we wi de tide, plɛnti pipul dɛn arawnd wi de fil se dɛn bɛtɛ pas dɛn kɔmpin dɛn. Pipul dɛn kin fil se dɛn bɛtɛ pas wi, ɔ wi kin fil se wi bɛtɛ pas ɔda pipul dɛn. Wan sista we na payɔnia naw na  Ɔstrelia bin tɔk se: “We a bin de put mi maynd pan di bad we dɛn aw dɛn bin de trit di Aborijinal pipul dɛn trade ɛn ivin naw, dat bin de mek a et di wayt pipul dɛn mɔ ɛn mɔ.” Dis sista bin kam fɔ et dɛn bak mɔ ɛn mɔ fɔ di bad we sɔm pan dɛn bin dɔn trit am. We wan brɔda na Kanada de tɔk bɔt aw i bin de fil fɔstɛm, i tɔk se: “A bin fil se di pipul dɛn we de tɔk Frɛnch bɛtɛ pas ɔlman.” Dis brɔda bin se, dat bin mek i nɔ lɛk di wan dɛn we de tɔk Inglish.

7. Wetin Jizɔs bin du bɔt di we aw pipul dɛn kin fil se dɛn bɛtɛ pas dɛn kɔmpin dɛn?

⁷ Jɔs lɛk Jizɔs in tɛm, di we aw pipul dɛn de fil se dɛn bɛtɛ pas dɛn kɔmpin dɛn dɔn rili pasmak tide, ɛn i nɔ izi fɔ mek dɛn chenj. Wetin Jizɔs bin du bɔt da kayn we de we pipul dɛn bin de fil? Fɔs, Jizɔs nɔ bin ɛva fil se i bɛtɛ pas ɔda pipul dɛn. I bin de trit ɔlman di sem we ɔltɛm. I bin de prich to di wan dɛn we jɛntri ɛn di wan dɛn we po, to di Faresi dɛn ɛn di Sameritan dɛn, ɛn ivin to di wan dɛn we bin de gɛda taks ɛn to di wan dɛn we de du bad. Sɛkɔn, Jizɔs bin tich in disaypul dɛn ɛn sɛt di ɛgzampul fɔ dɛn se dɛn nɔ fɔ dawt ɔda pipul dɛn ɔ fil se dɛn bɛtɛ pas dɛn.

8. Wetin na di men tin we mek wi gɛt wanwɔd? Ɛksplen.

⁸ Jizɔs bin gi wi wan impɔtant advays [prinsipul] we na di men tin we go mek wi gɛt wanwɔd. I bin tɛl in disaypul dɛn se: “Una ɔl na brɔda ɛn sista” dɛn. (Rid Matyu 23:​8, 9.) I mek sɛns fɔ se wi na brɔda dɛn bikɔs wi ɔl na Adam in pikin dɛn. (Di Apɔsul Dɛn Wok [Akt] 17:​26) Jizɔs bin ɛksplen se in disaypul dɛn ɔl na brɔda ɛn sista dɛn bikɔs dɛn ɔl dɔn lan se Jiova na dɛn Papa na ɛvin. (Matyu 12:​50) Ɛn dɛn ɔl dɔn kam jɔyn Gɔd in famili, dɔn di lɛk we dɛn lɛk dɛnsɛf ɛn di fet we dɛn gɛt dɔn mek dɛn gɛt wanwɔd. Na dat mek di apɔsul dɛn bin kɔl dɛn kɔmpin Kristian dɛn brɔda ɛn sista dɛn we dɛn bin de rayt lɛta na dɛn kɔngrigeshɔn.—Lɛta Fɔ Rom 1:​13; Pita In Fɔs Lɛta 2:​17; Jɔn In Fɔs Lɛta 3:​13. *—Luk di futnot.

9, 10. (a) Wetin mek di Ju pipul dɛn nɔ gɛt ɛni rizin fɔ mek prawd? (b) Aw Jizɔs bin tich se i nɔ fayn fɔ lɛ wi fil se wi kɔlɔ bɛtɛ pas ɔda pipul dɛn kɔlɔ? (Luk di pikchɔ nia dis atikul in taytul.)

⁹ Afta we Jizɔs bin tɛl in disaypul dɛn se dɛn fɔ si dɛnsɛf lɛk brɔda ɛn sista dɛn, i bin tɔk mɔ bak bɔt aw dɛn fɔ put dɛnsɛf dɔŋ. (Rid Matyu 23:​11, 12.) Wi dɔn lan se sɔntɛnde, prawd bin de mek di apɔsul dɛn nɔ gɛt wanwɔd. Insay Jizɔs in tɛm, pipul dɛn bin rili prawd bɔt dɛn kɔlɔ. Bɔku Ju pipul dɛn bin biliv se dɛn bɛtɛ pas ɔda pipul dɛn bikɔs dɛn na Ebraam in pikin dɛn. Bɔt Jɔn we bin de baptayz pipul dɛn bin tɛl dɛn se: “Gɔd ebul fɔ tek pan dɛn ston ya ɛn tɔn dɛn to Ebraam in grampikin pikin dɛm.”—Lyuk 3:​8.

¹⁰ Jizɔs bin tich se i nɔ fayn fɔ lɛ pipul dɛn mek prawd fɔ dɛn kɔlɔ. I bin ɛksplen dis klia wan we wan Ju Lɔ ticha bin aks am se: “Udat na mi neba?” Fɔ ansa di kwɛstyɔn, Jizɔs bin pul wan stori. I se tifman dɛn bin bit wan Ju man ɛn lɛf am na di rod. Pan ɔl we sɔm Ju pipul dɛn bin pas nia dis man, dɛn nɔ bin stil ɛp am. Bɔt wan Sameritan bin fil sɔri fɔ am ɛn  i bin kia fɔ am. Jizɔs bin ɛnd di stori bay we i bin tɛl di Ju Lɔ ticha se i fɔ tan lɛk da Sameritan de. (Lyuk 10:​25-37) Jizɔs bin de sho se pɔsin we na Sameritan kin tich di Ju pipul dɛn wetin i min fɔ lɛk dɛn neba.

11. Wetin mek Jizɔs in disaypul dɛn nid fɔ trit ɔlman di sem we? Aw Jizɔs bin ɛp dɛn fɔ ɔndastand dat?

¹¹ Bifo Jizɔs bin go na ɛvin, i bin tɛl in disaypul dɛn se dɛn fɔ prich ɔlsay “na Judia, na Sameria ɛn ɔlɔbɔt na [di] wɔl.” (Di Apɔsul Dɛn Wok [Akt] 1:​8) Fɔ mek dɛn go ebul du dis, Jizɔs in disaypul dɛn bin nid fɔ stɔp fɔ mek prawd ɛn dɛn nɔ fɔ fil se dɛn bɛtɛ pas ɔda pipul dɛn. Bɔku tɛm Jizɔs bin dɔn de tɔk bɔt di gud kwaliti dɛn we sɔm fɔrina dɛn gɛt, ɛn dis bin mek in disaypul dɛn rɛdi fɔ prich to difrɛn neshɔn dɛn. Fɔ ɛgzampul, Jizɔs bin prez wan Roman ɔfisa fɔ di kayn fet we i bin gɛt. (Matyu 8:​5-10) We Jizɔs bin de na Nazarɛt, i bin ɛksplen aw Jiova dɔn ɛp fɔrina dɛn lɛk wan uman we in man bin dɔn day insay wan Fonishian tɔŋ we nem Zarɛfat ɛn Neman we bin gɛt lɛprɔsi we kɔmɔt na Siria. (Lyuk 4:​25-27) Jizɔs bin prich bak to wan Sameritan uman, ɛn i bin ivin spɛn tu dez na wan Sameritan tɔŋ bikɔs di pipul dɛn bin lɛk di mɛsej we i bin de prich.—Jɔn 4:​21-24, 40.

12, 13. (a) Wetin di apɔsul dɛn bin du we Jizɔs bin tich wan Sameritan uman? (Luk di pikchɔ nia dis atikul in taytul.) (b) Wetin sho se Jems ɛn Jɔn nɔ bin ɔndastand di tin we Jizɔs bin de tray fɔ tich dɛn?

¹² I nɔ bin izi fɔ mek di apɔsul dɛn stɔp fɔ fil se dɛn bɛtɛ pas ɔda pipul dɛn. Dɛn bin rili sɔprayz fɔ si we Jizɔs de tich wan Sameritan uman. (Jɔn 4:​9, 27) Wetin mek? Sɔntɛm na bikɔs di Ju bigman dɛn pan Gɔd biznɛs nɔ bin de tɔk to uman dɛn na pɔblik, mɔ to Sameritan uman we nɔ gɛt wan gud nem. Di apɔsul dɛn bin tɛl Jizɔs fɔ it, bɔt it biznɛs nɔ bin impɔtant to Jizɔs bikɔs i bin de ɛnjɔy fɔ tɔk to dis uman. Gɔd bin want am fɔ prich, so fɔ du wetin in Papa want, ɛn ivin fɔ prich to da Sameritan uman bin tan lɛk it to am.—Jɔn 4:​31-34.

¹³ Jems ɛn Jɔn nɔ bin ɔndastand dis impɔtant lɛsin. Wan de, we Jizɔs ɛn in disaypul dɛn bin de travul na Sameria, dɛn bin de luk fɔ ples fɔ slip da nɛt de na wan Sameritan vilej. Bɔt di Sameritan dɛn nɔ gri fɔ mek dɛn slip de. Jems ɛn Jɔn bin rili vɛks so dɛn aks Jizɔs if i want fɔ mek dɛn sɛn faya kɔmɔt frɔm ɛvin ɛn dɔnawe wit di wan ol vilej. Jizɔs bin kɔrɛkt dɛn. Sɔntɛm Jems ɛn Jɔn nɔ bin fɔ vɛks if dis tin bin apin na dɛn tɔŋ insay Galili. I go mɔs bi se dɛn vɛks bikɔs dɛn fil se dɛn bɛtɛ pas di Samɛritan dɛn. Leta, Jɔn bin prich to di Sameritan dɛn ɛn bɔku pan dɛn bin lisin to am, i go mɔs bi se Jɔn bin shem we i mɛmba di we aw i bin dɔn biev.—Di Apɔsul Dɛn Wok [Akt] 8:​14, 25.

14. Aw di apɔsul dɛn bin sɔlv di prɔblɛm we di fɔstɛm Kristian dɛn bin gɛt?

¹⁴ Jɔs afta Pɛntikɔs insay di ia 33, pipul dɛn bin de tek ɔda pipul dɛn impɔtant pas dɛn kɔmpin dɛn insay di kɔngrigeshɔn. We di brɔda dɛn bin de gi it to di uman dɛn we dɛn man dɛn dɔn day, dɛn nɔ bin de gi di uman dɛn we bin de tɔk Grik. (Di Apɔsul Dɛn Wok [Akt] 6:​1) Dis go dɔn apin bikɔs dɛn bin de fil se wan langwej bɛtɛ pas di ɔda wan. Di apɔsul dɛn bin sɔlv dis prɔblɛm kwik kwik wan. Dɛn bin pik  sɛvin machɔ brɔda dɛn fɔ sheb di it fia wan. Ɔl dɛn brɔda dɛn ya bin gɛt Grik nem dɛn, so i go mɔs bi se dis bin mek dɛn Grik uman dɛn ya we dɛn man dɛn dɔn day gladi.

15. Aw Pita bin lan fɔ trit ɔlman di sem we? (Luk di pikchɔ nia dis atikul in taytul.)

¹⁵ Insay di ia 36, Jizɔs in disaypul dɛn bin stat fɔ prich to difrɛn difrɛn pipul dɛn. Bɔt bifo da tɛm de, di apɔsul Pita bin dɔn de spɛn ɔl in tɛm wit di Ju pipul dɛn. Dɔn Gɔd bin mek dɛn no klia wan se Kristian dɛn fɔ trit ɔlman di sem we, ɛn Pita bin prich to wan Roman sojaman we nem Kɔnilyɔs. (Rid Di Apɔsul Dɛn Wok [Akt] 10:​28, 34, 35.) Afta dat, Pita bin stat fɔ spɛn tɛm ɛn it wit Kristian dɛn we nɔto Ju. Bɔt afta sɔm tɛm, Pita bin stɔp fɔ it wit di Kristian dɛn we nɔto Ju we i bin de na wan siti we dɛn kɔl Antiɔk. (Lɛta Fɔ Galeshya 2:​11-14) Pɔl bin kɔrɛkt Pita, ɛn Pita bin gri fɔ lɛ dɛn kɔrɛkt am. Aw wi no dis? We Pita bin rayt in fɔs lɛta to di Ju Kristian dɛn ɛn di wan dɛn we nɔto Ju na Eshia Maynɔ, i bin tɔk bɔt aw i impɔtant fɔ lɛ wi lɛk ɔl wi brɔda dɛn.—Pita In Fɔs Lɛta 1:​1; 2:​17.

16. Wetin pipul dɛn bin no di fɔstɛm Kristian dɛn fɔ?

¹⁶ Wi dɔn si klia wan se di ɛgzampul we Jizɔs bin sɛt bin mek di apɔsul dɛn lan fɔ lɛk “ɔlkayn pipul dɛn.” (Jɔn 12:​32, NW; Fɔs Lɛta To Timoti 4:​10) Pan ɔl we i bin tek sɔm tɛm fɔ lɛ dɛn chenj, dɛn bin ɛnd-ɔp fɔ chenj di we aw dɛn bin de trit ɔda pipul dɛn. Infakt, dɛn bin no di fɔstɛm Kristian dɛn fɔ di lɛk we dɛn lɛk dɛnsɛf. Arawnd di ia 200, wan man we nem Tatulian we bin de rayt buk dɛn bin kot wetin ɔda pipul dɛn bin tɔk bɔt di Kristian dɛn. I bin tɔk se: “Dɛn lɛk dɛnsɛf,” ɛn “Dɛn ivin rɛdi fɔ day fɔ dɛnsɛf.” Bikɔs dɛn Kristian dɛn de bin dɔn “bi nyu pipul” dɛn, dɛn lan fɔ trit ɔlman di sem we lɛk aw Gɔd de trit dɛn.—Lɛta Fɔ Kɔlɔse 3:​10, 11.

17. Aw wi go stɔp fɔ fil se wi bɛtɛ pas ɔda pipul dɛn? Gi ɛgzampul.

 ¹⁷ Tide, i kin tek sɔm tɛm fɔ lɛ wi chenj di we aw wi kin fil bɔt ɔda pipul dɛn, lɛk fɔ fil se wi bɛtɛ pas dɛn. Wan sista na Frans bin ɛksplen aw dis nɔ bin izi fɔ am. Dis sista tɔk se: “Jiova dɔn tich mi wetin lɔv min, wetin i min fɔ gi, wetin i min fɔ lɛk ɔlkayn pipul dɛn. Bɔt a stil de lan fɔ stɔp fɔ fil se a bɛtɛ pas ɔda pipul dɛn, ɛn dis nɔ kin rili izi. Na dat mek a de kɔntinyu fɔ pre bɔt am.” Wan sista na Spen ɛksplen se sɔntɛnde i stil nɔ izi fɔ am fɔ stɔp fɔ fil bad bɔt sɔm patikyula pipul dɛn. Dis sista se: “Bɔku tɛm, a kin ebul stɔp fɔ fil da kayn we de. Bɔt a no se a nid fɔ kɔntinyu fɔ tray. A tɛl Jiova tɛnki, ɛn a gladi fɔ de na famili we gɛt wanwɔd.” Wi ɔl nid fɔ tek tɛm tink bɔt aw wi de fil. Yu tink se wisɛf nid fɔ stɔp fɔ fil se wi bɛtɛ pas ɔda pipul dɛn?

18, 19. (a) Us rizin dɛn wi gɛt we mek wi de wɛlkɔm ɔlman? (b) Aw wi go du dis?

¹⁸ I fayn fɔ lɛ wi mɛmba se wi ɔl nɔ bin de nia Gɔd. (Lɛta Fɔ Ɛfisɔs 2:​12) Bɔt bikɔs Jiova lɛk wi, na dat mek i drɔ wi fɔ kam nia am. (Ozie 11:​4; Jɔn 6:​44) Ɛn Krays bin gladi fɔ wɛlkɔm wi. Na in mek am pɔsibul fɔ wi fɔ de na Gɔd in famili. (Rid Lɛta Fɔ Rom 15:​7.) Pan ɔl we wi nɔ pafɛkt, Jizɔs dɔn wɛlkɔm wi ɔl, so wi nɔ fɔ ɛva dinay ɛnibɔdi!

¹⁹ As wi de kam nia di tɛm fɔ lɛ dis wikɛd wɔl dɔn, pipul dɛn nɔ go gɛt wanwɔd, dɛn go de fil se dɛn bɛtɛ pas dɛn kɔmpin, ɛn dɛn go et dɛnsɛf. (Lɛta Fɔ Galeshya 5:​19-21; Sɛkɛn Lɛta To Timoti 3:​13) Bɔt as Jiova in pipul dɛn, wi want fɔ gɛt “di sɛns we Gɔd de gi,” bikɔs na dat de ɛp wi fɔ trit ɔlman di sem we ɛn kɔntinyu fɔ mek pis de. (Jems 3:​17, 18) Wi gladi fɔ mek padi dɛn wit pipul dɛn we kɔmɔt na ɔda kɔntri, wi lɛk di we aw dɛn de du tin, ɛn sɔntɛnde wi kin ivin lan dɛn langwej. We wi du dis, wi go ɛnjɔy pis we “tan lɛk riva” ɛn fɔ du tin tret “go tan lɛk swɛlin na si.”—Ayzaya 48:​17, 18.

20. Wetin kin apin we lɔv de mek wi chenj di we aw wi de tink ɛn fil?

²⁰ We di sista na Ɔstrelia bin stat fɔ stɔdi di Baybul, smɔl smɔl i bin stɔp fɔ et ɔda pipul dɛn ɛn i nɔ bin de fil se i bɛtɛ pas dɛn. Lɔv bin mek i chenj di we aw i de tink ɛn fil. Di brɔda na Kanada we de tɔk Frɛnch bin tɔk se i dɔn kam fɔ no wetin mek bɔku tɛm pipul dɛn kin et dɛn kɔmpin dɛn. Dɛn kin et dɛn kɔmpin dɛn jɔs bikɔs dɛn nɔ sabi dɛn. Dis brɔda bin lan se “di ples we dɛn bɔn pɔsin nɔ de sho us kwaliti dɛn i fɔ gɛt.” I ivin mared wan sista we de tɔk Inglish! Dɛn ɛgzampul dɛn ya dɔn sho klia wan se lɔv de mek pɔsin stɔp fɔ fil se i bɛtɛ pas in kɔmpin. Lɔv de mek wi gɛt di kayn wanwɔd we nɔ de ɛva skata.—Lɛta Fɔ Kɔlɔse 3:​14.