1. Us prɔblɛm dɛn we di fɔstɛm Kristian dɛn bin gɛt?

ARAWND di ia 62 ɛn 64, di apɔsul Pita bin rayt to Kristian dɛn “we skata ɔlɔbɔt na Pɔnchɔs, Galeshya, Kapadoshia, Eshya ɛn Bitinya, we de lɛkɛ trenja na ɔl dɛn kɔntri ya.” (Pita In Fɔs Lɛta 1:​1) Dɛn brɔda ɛn sista dɛn ya kɔmɔt na bɔku difrɛn ples dɛn. Dɛn bin de gɛt “big big waala,” ɔ dɛn bin de mek dɛn sɔfa, ɛn dɛn nid pɔsin fɔ ɛnkɔrej ɛn gayd dɛn. Dɛn bin de bak insay di tɛm we tin bin rili bad-ɔf. Pita bin rayt se: “Di tɛm we di wɔl go dɔn nɔ de fa igen.” I nɔ go rich tɛn ia igen, dɛn go dɔnawe wit Jerusɛlɛm. Wetin go ɛp Kristian dɛn we bin de ɔlsay fɔ bia we dis tɛm ya nɔ go rili izi fɔ dɛn?—Pita In Fɔs Lɛta 4:​4, 7, 12.

2, 3. Wetin mek Pita bin ɛnkɔrej in brɔda ɛn sista dɛn fɔ de du gud to dɛnsɛf? (Luk di pikchɔ nia dis atikul in taytul.)

² Wan tin we Pita bin tɛl in brɔda ɛn sista dɛn na dat dɛn ‘fɔ gladi we dɛn kɔmpin Kristian dɛn kam fɛn dɛn.’ (Pita In Fɔs Lɛta 4:​9) Di Grik wɔd we Pita bin yuz min “fɔ lɛk ɔ fɔ du gud to strenja dɛn.” Bɔt Pita bin de tɛl in brɔda ɛn  sista dɛn fɔ de du gud to dɛnsɛf, pan ɔl we dɛn no dɛnsɛf ɛn dɛn de du tin dɛn togɛda. Aw di gud we dɛn de du to dɛnsɛf go ɛp dɛn?

³ I go mek dɛn kam nia dɛnsɛf. We yu? Yu mɛmba di gud tɛm we yu bin gɛt we sɔmbɔdi bin invayt yu na in os? Ɛn we yu invayt sɔmbɔdi na yu os, dat de mek una kam nia unasɛf mɔ ɛn mɔ. Wan fayn we we wi go no wi brɔda ɛn sista dɛn na bay we wi de du gud to dɛn. We tin bin de wɔs, di Kristian dɛn we bin de insay Pita in tɛm bin nid fɔ kam nia dɛnsɛf mɔ ɛn mɔ. Insay dis las dez, wisɛf nid fɔ du di sem tin.—Sɛkɛn Lɛta To Timoti 3:​1.

4. Us kwɛstyɔn dɛn wi go tɔk bɔt insay dis atikul?

⁴ Us we dɛn wi go du gud to wi kɔmpin dɛn? Wetin go ɛp wi fɔ lɛ wi nɔ stɔp fɔ de du gud ɛn aw wi go kɔntinyu fɔ de du gud mɔ ɛn mɔ? Wetin go ɛp wi fɔ bi gud strenja dɛn?

5. Aw wi go du gud to strenja dɛn na di mitin dɛn?

⁵ Na mitin: Jiova ɛn in ɔganayzeshɔn de invayt wi fɔ atɛnd di mitin dɛn. Wi want ɛnibɔdi we de atɛnd wi mitin dɛn fɔ fil gud, mɔ di wan dɛn we de kam fɔ di fɔstɛm. (Lɛta Fɔ Rom 15:​7) Dɛn na Jiova in strenja dɛn bak, so wi nid fɔ mek dɛn fil fayn ilɛk aw dɛn tan ɔ aw dɛn drɛs. (Jems 2:​1-4) If yu notis se strenja kam na mitin ɛn na in wangren sidɔm, yu nɔ tink se yu fɔ kɔl am fɔ lɛ i kam sidɔm nia yu? Di pɔsin go gladi if yu ɛp am fɔ ɔndastand wetin de apin na di program ɔ ɛp am fɔ fɛn di skripchɔ dɛn we una de rid. Dat go bi wan fayn we fɔ ‘du gud to strenja.’—Lɛta Fɔ Rom 12:​13.

6. Na udat dɛn mɔ wi fɔ du gud to?

⁶ Fɔ smɔl chamcham ɔ it: Insay di tɛm we dɛn bin de rayt di Baybul, bɔku tɛm pipul dɛn bin de du gud to strenja dɛn bay we dɛn bin de invayt dɛn fɔ kam it na dɛn os. Ɛn dɛn bin de du dis fɔ sho se dɛn want dɛn fɔ bi dɛn padi ɛn fɔ mek pis wit dɛn. (Jɛnɛsis 18:​1-8; Di Jɔj Dɛm 13:​15; Lyuk 24:​28-30) Na udat dɛn mɔ wi fɔ du gud to? Na to wi brɔda ɛn sista dɛn na di kɔngrigeshɔn mɔ wi fɔ du gud. As tin de bad-ɔf ɛvride, wi nid fɔ abop pan wi brɔda ɛn sista dɛn ɛn kɔntinyu fɔ de biɛn dɛn as wi padi dɛn. Insay 2011, di Gɔvnin Bɔdi bin chenj di tɛm we di Bɛtɛl famili na Amɛrika kin du dɛn Wachtawa Stɔdi. Dɛn chenj di tɛm frɔm kwata to sɛvin ivintɛm to kwata pas siks ivintɛm. Wetin mek dɛn bin du dat? Dɛn bin anawns se sɔntɛm dat go mek am izi fɔ di Bɛtɛlayt dɛn fɔ de du gud to dɛnsɛf we di mitin dɔn kwik. Ɔda branch dɛn dɔn du di sem tin. Dis na fayn chans fɔ lɛ di Bɛtɛlayt dɛn no dɛnsɛf gud gud wan.

7, 8. Aw wi go du gud to brɔda dɛn we de kam gi tɔk na wi kɔngrigeshɔn?

⁷ Sɔntɛnde brɔda dɛn we kɔmɔt na ɔda kɔngrigeshɔn dɛn, sakit ovasia dɛn, ɛn brɔda dɛn we di branch ɔfis kin sɛn, kin kam gi tɔk na wi kɔngrigeshɔn. Yu nɔ tink se dis na chans fɔ mek wi du gud to dɛn brɔda dɛn ya? (Rid Jɔn In Tɔd Lɛta 5-8, NW.) Wan we we wi kin du dis na bay we wi de invayt dɛn na wi os fɔ smɔl chamcham ɔ fɔ it wit dɛn.

 ⁸ Wan sista na Amɛrika bin tɔk se: “Fɔ sɔm tɛm naw, mi ɛn mi man dɔn gɛt di chans fɔ du gud to bɔku brɔda dɛn ɛn dɛn wɛf dɛn we kin kam gi tɔk.” Dis sista tɔk se ɔl di tɛm we dɛn spɛn togɛda bin de mek dɛn gɛt fet mɔ ɛn dɛn bin de ɛnjɔy am bak. I kɔntinyu fɔ tɔk bak se: “Wi nɔ ɛva rigrɛt am.”

9, 10. (a) Udat dɛn kin nid fɔ de wit wi fɔ lɔng tɛm? (b) Yu tink se di wan dɛn we gɛt smɔl os kin ɛp? Gi wan ɛgzampul.

⁹ Strenja dɛn we de kam fɔ lɔng tɛm: Insay di tɛm we dɛn bin de rayt di Baybul, na bin kɔmɔn tin fɔ lɛ dɛn gi strenja dɛn say fɔ de. (Job 31:​32; Faylimɔn 22) Wi bak go nid fɔ du di sem tin tide. Bɔku tɛm, sakit ovasia dɛn kin nid say fɔ de we dɛn visit di kɔngrigeshɔn. Na di sem tin bak kin apin to studɛnt dɛn we kin kam fɔ atɛnd tiokratik skul dɛn ɛn di wan dɛn we de kam fɔ bil say dɛn fɔ wɔship Jiova. Wetin wi go se fɔ dɛn wan dɛn we nɔ gɛt say fɔ de bikɔs bad bad tin dɛn lɛk ebi ren, briz, ɔ atkwek dɔn apin? Dɛn go nid say fɔ de te dɛn bil dɛn os dɛn bak. Wi nɔ fɔ tink se na dɛn wan dɛn we gɛt big os nɔmɔ fɔ ɛp dɛn. I go mɔs bi se dɛn go dɔn du dat bɔku tɛm. Yu tink se yu go gi pɔsin say fɔ de ilɛksɛf yu os nɔ big?

¹⁰ Wan brɔda na Sawt Koria bin mɛmba we i kin lɔj studɛnt dɛn we kin kam fɔ atɛnd tiokratik skul dɛn na in os. Dis brɔda rayt se: “Fɔs, a bin de fred fɔ lɔj dɛn bikɔs mi ɛn mi wɛf bin jɔs mared ɛn wi os bin smɔl. Bɔt wi bin gladi fɔ lɔj di studɛnt dɛn. As pipul dɛn we jɔs mared, wi bin ebul fɔ si se maredman ɛn in wɛf kin gladi we dɛn de sav Jiova togɛda ɛn dɛn gɛt di sem gol.”

11. Wetin mek wi nid fɔ du gud to dɛn nyu wan dɛn na wi kɔngrigeshɔn?

¹¹ We wi gɛt nyu brɔda ɛn sista dɛn na wi kɔngrigeshɔn: Sɔm brɔda ɛn sista dɛn ɛn sɔm famili dɛn go kɔmɔt na ɔda kɔngrigeshɔn ɛn muf go na yu eria. Sɔntɛnde, dɛn kin muf kam na yu kɔngrigeshɔn bikɔs una nid pipul dɛn fɔ ɛp. Ɔ i go bi se na payɔnia dɛn we dɛn sɛn na yu kɔngrigeshɔn. Dis go bi big chenj fɔ dɛn. Dɛn kin gɛt fɔ ajɔst to di nyu eria, nyu kɔngrigeshɔn, ɛn sɔntɛnde i kin ivin bi nyu langwej ɔ kɔlchɔ. Yu nɔ tink se i go fayn fɔ invayt dɛn fɔ smɔl chamcham ɔ it ɔ go waka togɛda? Dis go ɛp dɛn fɔ mek nyu padi dɛn ɛn ajɔst to di nyu we aw dɛn de liv.

12. Wetin bin apin to wan brɔda ɛn in wɛf we sho se yu nɔ nid fɔ gɛt bɔku tin dɛn bifo yu du gud?

¹² Yu nɔ nid fɔ gɛt bɔku tin bifo yu du gud. (Rid Lyuk 10:​41, 42.) Wan brɔda bin mɛmba sɔntin we bin apin to in ɛn in wɛf di tɛm we dɛn bi mishɔnari fɔ di fɔstɛm. Di brɔda bin tɔk se: “Wi bin yɔŋ, wi nɔ bin no bɔku tin, ɛn wi bin de mis di say we wi kɔmɔt ɛn wi fambul dɛn. Wan ivintɛm, mi wɛf bin de rili mis di say we wi kɔmɔt ɛn wi fambul dɛn, ɛn ɔl wetin a bin du fɔ ɛp am nɔ bin wok. Dɔn arawnd af pas sɛvin ivintɛm, wi  yɛri pɔsin nak na wi domɔt. We wi opin, wi si wan Baybul studɛnt we kam wit tri ɔrinch fɔ wi. Dis Baybul studɛnt kam fɔ wɛlkɔm di nyu mishɔnari dɛn. Wi bin tɛl am fɔ kam insay ɛn wi gi am wata fɔ drink. Dɔn wi mek ti ɛn ɔt koko. Wi nɔ bi sabi tɔk Swaili yet, ɛn di Baybul studɛnt nɔ bin sabi tɔk Inglish.” Di brɔda bin tɔk se dis tin we bin apin bin ɛp dɛn fɔ bigin fɔ mek padi wit dɛn lokal brɔda ɛn sista dɛn, ɛn in ɛn in wɛf bin rili gladi.

13. Us bɛnifit yu go gɛt we yu du gud?

¹³ Yu dɔn ɛva fred ɔ shem fɔ du gud? If na so i bi, yu go dɔn mis di chans fɔ ɛnjɔy gud tɛm ɛn mek padi dɛn we yu go gɛt sote go. Fɔ du gud na wan we dat we go mek wi nɔ fil se na wi wangren de. So wetin mek sɔm pipul dɛn nɔ de gri fɔ du gud? Sɔm rizin dɛn de we mek dɛn nɔ de gri fɔ du gud.

14. Wetin wi go du if wi nɔ gɛt bɛtɛ tɛm ɛn trɛnk fɔ du gud to ɔda pipul dɛn ɔ gri fɔ mek dɛn du gud to wi?

¹⁴ Tɛm ɛn trɛnk: Jiova in pipul dɛn rili bizi ɛn dɛn gɛt bɔku wok dɛn fɔ du. Sɔm kin tink se dɛn nɔ gɛt bɛtɛ tɛm ɛn trɛnk fɔ du gud. If na da kayn we de yu de fil, yu go nid fɔ ajɔst yu tɛm ɛn di tin dɛn we yu de du so dat yu go du gud to ɔda pipul dɛn ɛn yusɛf go gri fɔ mek dɛn du gud to yu. Dis rili impɔtant bikɔs di Baybul de ɛnkɔrej wi fɔ du gud. (Di Ibru Pipul Dɛn 13:​2) So fɔ du gud na di rayt tin fɔ du. Bɔt fɔ du gud, yu go nid fɔ ridyus di tɛm we yu de spɛn pan tin dɛn we nɔ impɔtant.

15. Wetin mek sɔm pipul dɛn nɔ kin gri fɔ du gud?

¹⁵ Di we aw yu de fil bɔt yusɛf: Yu dɔn ɛva fil se yu nɔ go ebul fɔ du gud pan ɔl we yu rili want fɔ du am? Sɔntɛm yu de shem ɛn de wɔri se yu nɔ go ebul mek yu strenja dɛn ɛnjɔy. Ɔ sɔntɛm yu nɔ gɛt bɛtɛ mɔni ɛn yu de wɔri se yu nɔ go ebul du gud to yu strenja dɛn lɛk aw yu ɔda brɔda ɛn sista dɛn de du. Bɔt mɛmba se yu os nɔ nid fɔ gɛt dia dia tin dɛn. Yu strenja dɛn go gladi if yu os klin ɛn nit ɛn if yu na nays pɔsin.

16, 17. Wetin yu go du if yu de wɔri we yu gɛt strenja dɛn?

¹⁶ If yu de wɔri we yu gɛt strenja dɛn, mɛmba se nɔto yu wan. Wan ɛlda we de na Briten bin tɔk se: “Yu kin wɔri we yu de pripia fɔ strenja dɛn. Bɔt jɔs lɛk ɛnitin we gɛt fɔ du wit wi savis to Jiova, di bɛnifit ɛn gladi at we wi kin gɛt kin pas di wɔri we wi de wɔri. A kin ɛnjɔy fɔ sidɔm de tɔk ɛn drink kɔfi wit strenja dɛn.” I fayn fɔ sho se wi rili bisin bɔt wi strenja dɛn ɔltɛm. (Lɛta Fɔ Filipay 2:​4) Bɔku pipul dɛn kin lɛk fɔ tɔk bɔt di tin dɛn we dɔn apin to dɛn na layf. Wi go yɛri di tin dɛn we bin dɔn apin to dɛn, we wi ɛn dɛn spɛn tɛm togɛda. Wan ɔda ɛlda bin rayt se: “We a kin invayt brɔda ɛn sista dɛn frɔm di kɔngrigeshɔn fɔ kam na mi os, dat kin ɛp mi fɔ ɔndastand dɛn ɛn gɛt di chans fɔ no dɛn gud gud wan, mɔ fɔ no aw dɛn kam na di trut.” If yu de sho se yu rili bisin bɔt yu strenja dɛn, dat go mek yu shɔ se ɔlman go ɛnjɔy dɛnsɛf.

¹⁷ Wan payɔnia sista we kin lɔj studɛnt dɛn we kin kam fɔ atɛnd difrɛn tiokratik skul dɛn bin tɔk se: “Fɔs a bin de wɔri  bikɔs mi os bin simpul ɛn di tin dɛn lɛk chia ɛn tebul we a bin gɛt na tin dɛn we pipul dɛn bin dɔn yuz. Wan instrɔktɔ in wɛf bin rili mek a fil fayn. I bin tɔk se we in ɛn in man de sav as sakit ovasia, dɛn bɛst tɛm dɛn na we dɛn kin de wit pipul dɛn we nɔ gɛt bɛtɛ mɔni bɔt we de pe atɛnshɔn pan Gɔd biznɛs jɔs lɛk dɛn; dat na fɔ sav Jiova ɛn liv simpul layf. Dis bin mek a mɛmba wetin mi mama bin de tɛl wi we wi bin smɔl smɔl. I kin se: ‘I bɛtɛ lɛ yu de na os wit lɔv ɛn nɔ gɛt bɛtɛ tin fɔ it.’” (Prɔvabs 15:​17) Nid nɔ de fɔ lɛ wi wɔri bikɔs di tin we rili impɔtant pas ɔl na fɔ sho se wi lɛk wi strenja dɛn.

18, 19. Aw di gud we wi de du go ɛp wi fɔ stɔp fɔ fil bad bɔt ɔda pipul dɛn?

¹⁸ Aw yu de fil bɔt ɔda pipul dɛn: Ɛnibɔdi de na yu kɔngrigeshɔn we dɔn mek yu fil bad? If yu nɔ tray fɔ stɔp fɔ de fil da kayn bad we de, yu go kɔntinyu fɔ de fil bad. Yu nɔ go lɛk fɔ invayt pɔsin na yu os if yu nɔ lɛk in biznɛs. Ɔ sɔntɛm pɔsin bin dɔn du yu sɔntin we mek yu fil bad ɛn i nɔ izi fɔ lɛ yu fɔgɛt.

¹⁹ Di Baybul tɛl wi se we wi de du gud, dat de mek wi gɛt tayt padi biznɛs wit ɔda pipul dɛn ɛn ivin wit wi ɛnimi dɛn. (Rid Prɔvabs 25:​21, 22, NW.) We yu invayt pɔsin na yu os, yu go ebul stɔp fɔ fil bad bɔt da pɔsin de ɛn i de ɛp yu fɔ gɛt tayt padi biznɛs wit am. Yu go bigin fɔ si in fayn fayn kwaliti dɛn we Jiova bin si we mek I bring am kam na di trut. (Jɔn 6:​44) We yu invayt sɔmbɔdi bikɔs yu lɛk am pan ɔl we i nɔ de tink se yu go du dat, na wan we dat we yu go stat fɔ mek padi biznɛs wit am. Aw yu go  mek shɔ se na lɔv de mek yu du dat? Wan we aw yu go du dat na bay we yu de fala di advays we de na Lɛta Fɔ Filipay 2:​3 we se: “Una nɔ fɔ prawd, una fɔ fil se ɔda pipul bɛtɛ pas una.” Wi fɔ tink bɔt we dɛn we de sho se wi brɔda ɛn sista dɛn bɛtɛ pas wi. Sɔntɛnde, wi kin lan frɔm di fet we dɛn gɛt, di bia we dɛn de bia, ɔ sɔm Kristian kwaliti dɛn we dɛn gɛt. We wi de tink bɔt di gud kwaliti dɛn we dɛn gɛt, dat de mek wi kɔntinyu fɔ lɛk dɛn ɛn i go izi fɔ lɛ wi du gud to dɛn.

20. Wetin mek wi fɔ sho se wi na pɔsin we dɛn fɔ abop pan we wi gri fɔ go usay dɛn invayt wi? Aw wi go du dat?

²⁰ Devid bin aks Jiova se: “Udat fit fɔ go insay yu os fɔ wɔship?” (Sam 15:​1) Afta dat, Devid bin tɔk bɔt kwaliti dɛn we Jiova want in pipul dɛn fɔ gɛt. Wan pan dɛn kwaliti dɛn ya na dat wi fɔ bi pɔsin we dɛn fɔ abop pan. Da kayn pɔsin de, “de swɛ ɛn du wetin i se i go du no mata wetin i min.” (Sam 15:​4) If wi dɔn gri fɔ go usay dɛn invayt wi, wi fɔ mek shɔ se wi go pas if i bi se sɔntin apin we rili impɔtant. Di pɔsin we invayt wi go dɔn pripia fɔ wi ɛn if wi nɔ go, ɔl wetin i dɔn du go go fɔ natin. (Matyu 5:​37, NW.) Sɔm pipul dɛn nɔ kin go usay dɛn invayt dɛn bikɔs dɛn kin want fɔ go ɔda say usay dɛn invayt dɛn we dɛn fil se bɛtɛ. If yu du dat, yu tink se yu de sho lɔv ɛn rɛspɛkt fɔ di pɔsin we invayt yu? Wi fɔ gladi fɔ ɛnitin we di pɔsin we invayt wi gi wi. (Lyuk 10:​7) If sɔntin mek wi nɔ ebul fɔ go usay dɛn invayt wi, i go fayn fɔ mek wi tɛl di pɔsin we invayt wi wantɛm wantɛm se wi nɔ go ebul fɔ go.

21. We wi rɛspɛkt kɔstɔm dɛn, aw dat go ɛp wi fɔ bi gud strenja dɛn?

²¹ I fayn bak fɔ lɛ wi rɛspɛkt lokal kɔstɔm dɛn. Na sɔm kɔlchɔ dɛn, dɛn kin wɛlkɔm pɔsin we dɛn nɔ no se de kam. Ɔda say dɛn, yu fɔ arenj wit di pɔsin fɔs bifo yu go visit am. Na sɔm say dɛn, di pɔsin we dɛn de kam fɛn de sho se i rɛspɛkt in strenja dɛn bay we i de gi dɛn di bɛst it we i gɛt. Bɔt na ɔda say dɛn, di strenja ɛn ɔlman na di famili kin it di sem tin. Dɔn na sɔm say dɛn, di strenja kin briŋ sɔntin fɔ ad to di it we di pɔsin we invayt am dɔn mek. Ɔda wan dɛn nɔ want dɛn strenja dɛn fɔ briŋ kam ɛnitin. Na sɔm kɔlchɔ dɛn, we dɛn invayt pɔsin, i nɔ de gri fɔ go di fɔs tɛm ɔ sɛkɔn tɛm. Bɔt fɔ ɔda wan dɛn, dɛn kin si am se i nɔ sho rɛspɛkt fɔ lɛ pɔsin nɔ gri fɔ kam di fɔs tɛm we dɛn invayt am. Wi fɔ mek shɔ se wi du ɔl wetin wi ebul fɔ mek di pɔsin we invayt wi gladi fɔ we i invayt wi.

22. Wetin mek i impɔtant fɔ mek wi go de du gud to wisɛf?

²² Pita bin tɔk se: “Di tɛm we di wɔl go dɔn nɔ fa igen.” (Pita In Fɔs Lɛta 4:​7) Tide, wi de nia di tɛm we da big big trɔbul go kam, we in kayn nɔ wande bi yet. As di wɔl de bad-ɔf ɛvride, wi nid fɔ gɛt tru tru lɔv fɔ wi brɔda ɛn sista dɛn. Na naw wi fɔ fala di advays we Pita bin gi wi we i se: “Una fɔ gladi wɛn una kɔmpin Kristiɛn dɛn kam fɛn una.” (Pita In Fɔs Lɛta 4:​9) Fɔ tru, fɔ du gud na tin we wi go ɛnjɔy fɔ du, ɛn na impɔtant tin naw ɛn sote go.