1. Wetin mek wi ɔl nid pɔsin fɔ ɛnkɔrej wi?

WI Ɔl nid pɔsin fɔ ɛnkɔrej wi. Sɔntɛm wi gɛt bɔku tin dɛn we de mek wi wɔri ɛn tin dɛn we kin mek wi at pwɛl. I go bi se wi de sɔfa bikɔs wi sik, wi dɔn de ol, ɔ pɔsin we wi lɛk dɔn day. Ɔda pipul dɛn kin trit sɔm pan wi bad. Dɔn, pipul dɛn we de arawnd wi de lɛk fɛt fɛt mɔ ɛn mɔ. Fɔ tru, dis “traŋa” tɛm de sho se wi de liv na di las dez ɛn ɛvride wi de nia di tɛm fɔ lɛ di nyu wɔl kam. (Sɛkɛn Lɛta To Timoti 3:​1) Sɔntɛm, wi dɔn de wet fɔ lɔng tɛm naw fɔ lɛ wetin Jiova bin dɔn tɔk bi, ɛn bɔku prɔblɛm go dɔn de mit wi. So udat wi go luk to fɔ ɛnkɔrej wi?

2, 3. (a) Wetin wi sabi bɔt Abakɔk? (b) Wetin mek wi go tɔk bɔt di Baybul buk we nem Abakɔk?

² Lɛ wi tɔk bɔt wan buk na di Baybul we nem Abakɔk fɔ fɛn di ansa to da kwɛstyɔn de. Pan ɔl we di Baybul nɔ tɔk bɔku bɔt Abakɔk in layf, di tin dɛn we i rayt na in buk kin  rili ɛnkɔrej wi. Abakɔk in nem min “Fɔ Ɔg Pɔsin.” Dis kin min di ɔg we Jiova ɔg di wan dɛn we de wɔship am fɔ ɛnkɔrej dɛn. Ɔ i kin sho bak di we aw di wan dɛn we de wɔship Jiova de ol am tayt wan. Abakɔk bin tɔk to Gɔd ɛn i bin aks am sɔm kwɛstyɔn dɛn. Jiova bin mek Abakɔk rayt wetin dɛn bin tɔk bikɔs I bin no se wi go bɛnifit frɔm am.—Abakɔk 2:​2.

³ Di tin we di Baybul tɛl wi nɔmɔ bɔt dis prɔfɛt we in at bin pwɛl na di tɔk we in ɛn Jiova bin tɔk. Bɔt in buk de pat pan “ɔltin we rayt” na Gɔd in Wɔd, so dat, wetin dɛn rayt de, “de mek wi ebul bia ɛn mek wi gɛt kɔrej.” (Lɛta Fɔ Rom 15:​4) Aw Abakɔk in buk kin ɛp wi ɔl? I kin ɛp wi fɔ si wetin i min fɔ abop pan Jiova. Ɛn di tin we Abakɔk bin dɔn tɔk go mek wi biliv tranga wan se wi ebul fɔ gɛt kolat ilɛk us prɔblɛm wi gɛt.

4. Wetin mek Abakɔk in at bin pwɛl?

⁴ Rid Abakɔk 1:​2, 3. Abakɔk bin liv na tɛm we tin bin rili tranga. Di pipul dɛn we bin de arawnd am bin wikɛd ɛn dɛn bin lɛk fɛt fɛt, ɛn dis bin mek in at rili pwɛl. Ɛnisay i wach, i bin de si di Izrɛlayt dɛn de trit dɛnsɛf bad. Abakɔk bin wɔnda: ‘Ustɛm dɛn bad tin dɛn ya go dɔn? Wetin mek Jiova de te fɔ du sɔntin bɔt am?’ I nɔ bin no wetin fɔ du. So i bin beg Jiova fɔ du sɔntin. Abakɔk go dɔn de tink se Jiova nɔ bisin bɔt In pipul dɛn igen ɔ I nɔ go du sɔntin. Yu dɔn ɛva fil dis kayn we?

5. Wetin wi kin lan frɔm di Baybul buk we nem Abakɔk? (Luk di pikchɔ nia dis atikul in taytul.)

⁵ Fɔ se Abakɔk bin aks dɛn kwɛstyɔn dɛn ya bikɔs i dɔn lɛf fɔ abop pan Jiova ɛn di tin dɛn we i prɔmis? Nɔ, nɔto so i bi. Abakɔk bin de aks Jiova fɔ ɛp am wit in prɔblɛm dɛn ɛn di tin dɛn we bin de mek i dawt, we sho se i nɔ bin giv-ɔp ɛn i bin stil abop pan Am. Abakɔk bin sho klia wan se i bin wɔri ɛn kɔnfyus. I nɔ bin ɔndastand wetin mek Jiova bin de wet fɔ du sɔntin, ɛn wetin mek I bin de alaw am fɔ sɔfa pasmak. We Jiova bin mek Abakɔk rayt bɔt di tin dɛn we bin de mɔna am na in buk, dat tich wi wan impɔtant lɛsin. Wi nɔ fɔ fred fɔ tɛl Jiova di tin dɛn we de mek wi dawt ɔ wɔri. Fɔ tru, Jiova de invayt wi fɔ pre ɛn tɛl am aw wi de rili fil. (Sam 50:​15; 62:​8) Prɔvabs 3:​5 de ɛnkɔrej wi se: “Trɔs PAPA GƆD [“Jiova,” NW] wit ɔl yu at. Nɔ abop pan yu yon sɛns.” Abakɔk bin du wetin dis vas se.

6. Wetin mek i impɔtant fɔ pre?

 ⁶ Abakɔk bin abop pan Jiova, we na in Padi ɛn Papa, ɛn i bin tray fɔ go nia am. Abakɔk nɔ bin jɔs de wɔri bɔt di tin dɛn we bin de apin to am ɛn tray fɔ sɔlv dɛn fɔ insɛf. Bifo dat, i bin pre bɔt aw i de fil ɛn di tin dɛn we bin de wɔri am. Dis na gud ɛgzampul fɔ wi. Jiova we na di Wan we de yɛri prea, de tɛl wi fɔ sho se wi abop pan am bay we wi de pre ɛn tɛl am wetin de mɔna wi. (Sam 65:​2) We wi du dis, wi go si aw Jiova de ansa wi prea dɛn. Wi go fil lɛk se i de ɔg wi we i de ɛnkɔrej wi ɛn gayd wi. (Sam 73:​23, 24) I go ɛp wi fɔ ɔndastand aw Jiova de si wetin de apin to wi, ilɛk us prɔblɛm de mit wi. Wan pan di bɛst we dɛn we wi go sho se wi abop pan Jiova na we wi pre to am.

7. Wetin Jiova bin du we Abakɔk tɛl Am wetin de mɔna am?

⁷ Rid Abakɔk 1:​5, NW, 6, 7. Afta Abakɔk bin dɔn tɛl Jiova bɔt wetin de wɔri am, i go dɔn de wɔnda wetin Jiova go du. Lɛk Papa we lɛk in pikin dɛn, Jiova bin ɔndastand aw Abakɔk bin de fil. I no se Abakɔk bin de sɔfa ɛn i bin de beg Am fɔ ɛp am. So Jiova nɔ bin vɛks pan Abakɔk, bɔt i bin tɛl am wetin I gɛt fɔ du to di Ju pipul dɛn we nɔ bin fetful to am. Infakt, Abakɔk go dɔn bi di fɔs pɔsin we Jiova bin tɛl se i nɔ go te igen i de kam pɔnish di Ju pipul dɛn.

8. Wetin mek di ansa we Jiova bin gi Abakɔk nɔto di ansa we i bin fil se i go gi am?

⁸ Jiova bin tɛl Abakɔk se i rɛdi fɔ du sɔntin. I go pɔnish di wikɛd pipul dɛn na Juda. We Jiova se dis “go apin insay una tɛm,” sho se dis jɔjmɛnt go kam insay Abakɔk in tɛm ɔ di Izrɛlayt dɛn we bin de arawnd am dɛn tɛm. Di ansa we Jiova bin gi Abakɔk nɔto di ansa we i bin fil se Jiova go gi am. Di kaldian dɛn, ɔ di pipul dɛn na Babilɔn bin rili wikɛd. Dɛn bin wikɛd pas di Izrɛlayt dɛn we bin no Jiova in lɔ dɛn. So wetin mek Jiova bin yuz dis wikɛd pegan neshɔn fɔ pɔnish in pipul dɛn? Dis go mek di pipul dɛn na Juda sɔfa mɔ ɛn mɔ. Aw yu bin fɔ fil if yu na bin Abakɔk?

9. Us ɔda kwɛstyɔn dɛn Abakɔk bin aks?

⁹ Rid Abakɔk 1:​12-14, 17. Pan ɔl we Abakɔk bin no se Jiova go yuz di Babilɔnian dɛn fɔ pɔnish di wikɛd pipul dɛn we de arawnd am, i bin stil kɔnfyuz. Bɔt i bin put insɛf dɔŋ ɛn i bin mekɔp in maynd fɔ kɔntinyu fɔ abop pan Jiova. Infakt, i bin tɔk se Jiova tan lɛk “akpata” ston. (Ayzaya 26:​4; Ditarɔnɔmi 32:​4) Abakɔk bin biliv se Jiova na Gɔd we gɛt lɔv ɛn i gud, so i nɔ bin fred fɔ aks mɔ kwɛstyɔn dɛn lɛk: Wetin mek Jiova go alaw tin fɔ bad-ɔf na Juda ɛn fɔ lɛ in pipul dɛn kɔntinyu fɔ sɔfa mɔ ɛn mɔ? Wetin mek i nɔ go du sɔntin wantɛm wantɛm? Wetin mek di Ɔlmayti nɔ de tɔk natin ɛn i de alaw pipul dɛn fɔ du wikɛd tin dɛn ɔlsay? Jiova na Gɔd we  “oli,” ɛn “in yay tu gud fɔ de luk ɔl di bad we dɛn de du.”

10. Wetin mek sɔntɛnde wi kin fil lɛk aw Abakɔk bin fil?

¹⁰ Sɔntɛnde, wi kin fil jɔs lɛk aw Abakɔk bin fil. Wi de lisin to Jiova. Wi abop pan am ɛn wi de rid ɛn stɔdi in Wɔd, we de mek wi de gɛt op mɔ ɛn mɔ. Wi de yɛri bak bɔt di tin dɛn we i prɔmis wi we wi lisin to wetin in ɔganayzeshɔn de tich wi. Bɔt wi stil go de wɔnda, ‘Ustɛm wi go lɛf fɔ sɔfa?’ Wi go no di ansa frɔm di nɛks tin we Abakɔk bin du.

11. Wetin Abakɔk bin mekɔp in maynd fɔ du?

¹¹ Rid Abakɔk 2:​1. We Abakɔk bin tɔk wit Jiova, dat bin mek i gɛt kolat. Dat bin ɛp am fɔ mekɔp in maynd fɔ wet fɔ lɛ Jiova du sɔntin. Abakɔk bin ripit wetin i dɔn mekɔp in maynd fɔ du we i tɔk se: “A de sidɔm saful wet fɔ di de we trɔbul go mit dɛn wan we de ambɔg wi.” (Abakɔk 3:​16) Gɔd in ɔda fetful savant dɛn de bia wet fɔ lɛ i du sɔntin. Dɛn ɛgzampul de ɛnkɔrej wi bikɔs i de sho se wisɛf kin du di sem tin.—Mayka 7:​7; Jems 5:​7, 8.

12. Wetin wi kin lan frɔm Abakɔk?

¹² Wetin wi kin lan frɔm di tin we Abakɔk bin mekɔp in maynd fɔ du? Fɔs, wi nɔ fɔ ɛva stɔp fɔ pre to Jiova ilɛk uskayn prɔblɛm dɛn wi gɛt. Sɛkɔn, wi nid fɔ de lisin to wetin Jiova de tɛl wi bay we i de yuz in Wɔd di Baybul ɛn in ɔganayzeshɔn. Ɛn tɔd, wi fɔ bia wet fɔ lɛ Jiova du sɔntin ɛn biliv tranga wan se we di rayt tɛm rich, i go mek wi lɛf fɔ sɔfa. If wi falamakata Abakɔk, wi go gɛt kolat ɛn wi go ebul fɔ bia. Di op we wi gɛt go ɛp wi fɔ bia wet ɛn i go mek wi gladi ilɛk uskayn prɔblɛm wi gɛt. Wi biliv tranga wan se wi Papa we de na ɛvin go du sɔntin.—Lɛta Fɔ Rom 12:​12.

13. Aw Jiova bin ɛnkɔrej Abakɔk?

¹³ Rid Abakɔk 2:​3. Wi biliv se Jiova bin gladi we Abakɔk bin disayd fɔ wet fɔ Am fɔ du sɔntin. Di Ɔlmayti Gɔd bin no wetin rili bin de apin to Abakɔk, so I bin ɛnkɔrej di prɔfɛt ɛn mek i no se I go ansa in kwɛstyɔn dɛn.I nɔ go te igen Jiova go du sɔntin fɔ mek Abakɔk lɛf fɔ wɔri. I bin tan lɛk se Jiova de tɛl Abakɔk se: “Jɔs peshɛnt ɛn abop pan mi. A go ansa yu prea, ivin if i tan lɛk se i de tek lɔng tɛm.” Jiova bin mɛmba Abakɔk se I bin dɔn disayd ustɛm i go mek wetin I dɔn tɔk bi. So i bin ɛnkɔrej Abakɔk fɔ kɔntinyu fɔ wet. We dis go bi, di prɔfɛt go gladi.

14. Wetin wi fɔ mekɔp wi maynd fɔ du we wi de sɔfa?

 ¹⁴ Wisɛf nid fɔ wet fɔ Jiova fɔ mek i du sɔntin. Wi nid bak fɔ tek tɛm lisin to wetin i de tɛl wi. Dɔn, wi go biliv tranga wan ɛn gɛt kolat ilɛk uskayn prɔblɛm de mit wi. Jizɔs bin ɛnkɔrej wi se wi nɔ fɔ pe atɛnshɔn pan “di tɛm ɔ di sizin” we Gɔd nɔ tɛl wi. (Di Apɔsul Dɛn Wok [Akt] 1:​7, NW) Wi nid fɔ biliv tranga wan se Jiova no di bɛst tɛm fɔ du sɔntin. So wi nɔ fɔ giv-ɔp bɔt wi fɔ put wisɛf dɔŋ ɛn peshɛnt ɛn wi fɔ gɛt fet pan Gɔd. We wi de wet, wi fɔ yuz wi tɛm di rayt we ɛn du ɔl wetin wi ebul fɔ sav Jiova.—Mak 13:​35-37; Lɛta Fɔ Galeshya 6:​9.

15, 16. (a) Us prɔmis dɛn de na di Baybul buk we nem Abakɔk? (b) Wetin dɛn prɔmis dɛn de, de tich wi?

¹⁵ Jiova prɔmis se: “Udat de du tin tret wan go ɔrayt bikɔs i biliv PAPA GƆD,” ɛn “ɔlman go no bɔt PAPA GƆD [“Jiova,” NW] in pawa ɛn di wɔndaful tin we i de du.” (Abakɔk 2:​4, 14) Jiova prɔmis fɔ gi layf we go de sote go to di wan dɛn we de peshɛnt wet ɛn abop pan am.

¹⁶ Di prɔmis we de na Abakɔk 2:​4 rili  impɔtant, na dat mek di apɔsul Pɔl bin kot am tri tɛm insay in lɛta dɛn we i bin rayt. (Lɛta Fɔ Rom 1:​17; Lɛta Fɔ Galeshya 3:​11; Di Ibru Pipul Dɛn 10:​38) Wi fɔ biliv tranga wan se ilɛk uskayn prɔblɛm de mit wi, wi go si di tin dɛn we Jiova bin dɔn prɔmis apin if wi abop pan am. Jiova want wi fɔ put wi maynd pan di op we wi gɛt fɔ tumara bambay.

17. Wetin Jiova se i go du fɔ wi if wi abop pan am?

¹⁷ Di Baybul buk we nem Abakɔk gɛt fayn fayn lɛsin fɔ wi ɔl we de insay di las dez. Jiova prɔmis se i go gi layf we go de sote go to ɛnibɔdi we de du tin tret ɛn we abop pan am. So lɛ wi kɔntinyu fɔ abop pan Gɔd mɔ ɛn mɔ, ilɛk us prɔblɛm wi gɛt ɔ tin we de mɔna wi. Di tin we Jiova bin tɛl Abakɔk mek wi biliv tranga wan se i go sɔpɔt wi ɛn sev wi. Jiova de tɛl wi fɔ abop pan am ɛn fɔ bia wet fɔ di tɛm we i dɔn tɔk se in Kiŋdɔm go rul dis wɔl. Da tɛm de, di pipul dɛn we go de na dis wɔl go gɛt gladi-at ɛn pis we dɛn de wɔship Jiova.—Matyu 5:​5; Di Ibru Pipul Dɛn 10:​36-39.

18. Aw wetin Jiova bin tɔk afɛkt Abakɔk?

¹⁸ Rid Abakɔk 3:​16-19. Di tin we Jiova bin tɛl Abakɔk bin rili afɛkt am. Abakɔk bin tink bɔt di wɔndaful tin dɛn we Jiova bin dɔn du fɔ in pipul dɛn. Dat bin mek i abop pan Jiova mɔ ɛn mɔ. I bin biliv tranga wan se i nɔ go te igen, Jiova go du sɔntin. Dis bin rili ɛnkɔrej di prɔfɛt, pan ɔl we i bin no se i stil gɛt fɔ sɔfa fɔ sɔm tɛm. Abakɔk nɔ bin gɛt dawt igen. Bifo dat, i bin rili gɛt fet pan Jiova se i go sev am. Infakt, di tin we i bin tɔk na vas 18 na wan pan di pawaful we dɛn we wi kin rid insay di Baybul we de sho se wi fɔ abop pan Jiova. Sɔm masta sabi bukman dɛn tɔk se dis min: “A go jomp wit gladi-at fɔ di Lɔd; a go tɔn rawnd ɛn rawnd fɔ gladi fɔ mi Gɔd.” Dis na pawaful lɛsin fɔ wi ɔl! Jiova nɔ jɔs gi wi wɔndaful prɔmis fɔ tumara bambay, bɔt i mek wi biliv bak se i nɔ go te igen i go du di tin dɛn we i dɔn prɔmis.

19. Aw Jiova go ɛnkɔrej wi lɛk aw i bin ɛnkɔrej Abakɔk?

¹⁹ Wan impɔtant lɛsin we wi lan frɔm di Baybul buk we nem Abakɔk, na fɔ abop pan Jiova. (Abakɔk 2:​4) Fɔ lɛ wi kɔntinyu fɔ abop pan Jiova, wi nid fɔ du sɔntin we go mek wi gɛt tayt padi biznɛs wit am. So na dɛn tin ya wi fɔ du. (1) Kɔntinyu fɔ de pre, tɛl Jiova bɔt ɔl di tin dɛn we de mek wi wɔri ɛn we de mɔna wi. (2) Tek tɛm lisin to wetin Jiova de tɛl wi insay in Wɔd di Baybul, ɛn fala di tin dɛn we in ɔganayzeshɔn de tɛl wi fɔ du. (3) Kɔntinyu fɔ fetful ɛn peshɛnt wet fɔ lɛ Jiova du di tin dɛn we i bin dɔn prɔmis. Na dat Abakɔk bin du. Pan ɔl we in at bin pwɛl we i bin stat fɔ tɔk to Jiova, leta, Jiova bin ɛnkɔrej am ɛn i bin gɛt gladi-at. If wi falamakata Abakɔk, wi Papa we de na ɛvin, Jiova, go ɛnkɔrej wi we tan lɛk se i de ɔg wi. Yu nɔ tink se dis na fayn we we Jiova de rili ɛnkɔrej wi insay dis wikɛd wɔl?