1, 2. (a) Us impɔtant wok we Sɔlɔmɔn bin gɛt fɔ du? (b) Wetin mek Devid bin wɔri bɔt Sɔlɔmɔn?

SƆLƆMƆN bin gɛt spɛshal wok fɔ du. Jiova bin pik am fɔ de oba di wok di tɛm we dɛn de bil di tɛmpul na Jerusɛlɛm. Dis na wan impɔtant bildin wok we dɔn ɛva apin! Di tɛmpul “fɔ fayn bad bad wan,” ɛn dɛn fɔ de tɔk bɔt aw i fayn ɔlsay na di wɔl. Di tin we impɔtant pas ɔl na dat i go bi “Gɔd in os.”—Fɔs Kronikul 22:​1, 5, 9-11.

² Kiŋ Devid bin biliv tranga wan se Gɔd go ɛp Sɔlɔmɔn. Bɔt Sɔlɔmɔn bin “yɔŋ ɛn nɔ gɛt ɛkspiriɛns.” Yu tink se i go gɛt maynd fɔ gri fɔ bil di tɛmpul? Ɔ yu tink se di yɔŋ we i yɔŋ ɛn we i nɔ gɛt ɛkspiriɛns go mek i nɔ ebul du am? Fɔ lɛ i ebul du dis, Sɔlɔmɔn nid fɔ gɛt maynd ɛn du di wok.

3. Wetin Sɔlɔmɔn bin lan frɔm di maynd we in papa bin gɛt?

³ I go bi se Sɔlɔmɔn go dɔn lan bɔku tin bɔt aw fɔ gɛt  maynd frɔm in papa, we na Devid. Ivin we Devid na bin yɔŋ man, i fɛt wayl animal dɛn we bin kam atak in papa in ship. (Fɔs Samiɛl 17:​34, 35) I bin sho bak se i rili gɛt maynd we i fɛt wan jayant we nem Golaya we na bin strɔng ɛn fiaful sojaman. Gɔd bin ɛp Devid fɔ yuz ston fɔ kil Golaya.—Fɔs Samiɛl 17:​45, 49, 50.

4. Wetin mek Sɔlɔmɔn bin nid fɔ gɛt maynd?

⁴ Wi kin ɔndastand wetin mek Devid na bin di rayt pɔsin fɔ tɛl in pikin fɔ gɛt maynd fɔ bil di tɛmpul. (Rid Fɔs Kronikul 28:​20.) If Sɔlɔmɔn nɔ bin gɛt maynd, i bin fɔ dɔn fred ɛn i nɔ fɔ bin ebul fɔ stat di wok. Dat fɔ dɔn wɔs pas we i nɔ bin fɔ du am fayn.

5. Wetin mek wi nid fɔ gɛt maynd?

⁵ Jɔs lɛk Sɔlɔmɔn, wisɛf nid fɔ lɛ Jiova ɛp wi fɔ gɛt maynd ɛn du di wok we i dɔn gi wi. So lɛ wi luk ɛgzampul dɛn bɔt sɔm pipul dɛn we bin sho se dɛn gɛt maynd. Dɔn wi go tink bɔt aw wi go sho se wi gɛt maynd ɛn du wi wok.

6. Wetin yu lɛk bɔt di we aw Josɛf bin sho se i gɛt maynd?

⁶ Josɛf bin sho se i gɛt maynd we Pɔtifa in wɛf bin tɛmt am fɔ du mami ɛn dadi biznɛs di we aw Gɔd nɔ want. I go mɔs bi se i bin no se in layf go de pan denja if i nɔ du am. Bɔt Josɛf nɔ bin du am, i sho se i gɛt maynd ɛn wantɛm wantɛm i rɔnawe pan di uman.—Jɛnɛsis 39:​10, 12.

7. Aw Reab bin sho se i gɛt maynd? (Luk di pikchɔ nia dis atikul in taytul.)

⁷ Reab na wan ɔda ɛgzampul bɔt pɔsin we sho se i gɛt maynd. We di Izrɛlayt dɛn bin go spay na Jɛriko, Reab bin fɔ dɔn fred ɛn nɔ gri fɔ ɛp dɛn. Bɔt bikɔs i bin abop pan Jiova, i bin gɛt maynd fɔ ayd di tu man dɛn ɛn ɛp dɛn fɔ kɔmɔt insay di siti saful wan. (Jɔshwa 2:​4, 5, 9, 12-16) Reab bin biliv se Jiova na di tru Gɔd, ɛn i bin biliv tranga wan se Jiova go gi di Izrɛlayt dɛn di land. I nɔ bin fred mɔtalman, ivin di kiŋ na Jɛriko ɛn in man dɛn fɔ mek i nɔ du di rayt tin. Bifo dat, i bin sho se i gɛt maynd ɛn i sev in ɛn in famili.—Jɔshwa 6:​22, 23.

8. Aw di we aw Jizɔs sho se i gɛt maynd bin afɛkt di apɔsul dɛn?

⁸ Jizɔs in fetful apɔsul dɛnsɛf bin sho se dɛn gɛt maynd. Dɛn bin dɔn si di we aw Jizɔs sho se i gɛt maynd, ɛn dis bin ɛp dɛn fɔ falamakata am. (Matyu 8:​28-32; Jɔn 2:​13-17; 18:​3-5) We di Sadyusi dɛn bin tray fɔ stɔp di apɔsul dɛn fɔ lɛ dɛn nɔ tɔk bɔt Jizɔs, dɛn nɔ bin gri fɔ du dat.—Di Apɔsul Dɛn Wok [Akt] 5:​17, 18, 27-29.

9. Aw Sɛkɛn Lɛta To Timoti 1:​7 ɛp wi fɔ ɔndastand aw wi kin gɛt maynd?

⁹ Josɛf, Reab, Jizɔs, ɛn di apɔsul dɛn bin mekɔp dɛn maynd fɔ du wetin rayt. Dɛn nɔ sho se dɛn gɛt maynd bikɔs dɛn biliv dɛnsɛf, bɔt na bikɔs dɛn abop pan  Jiova. If wisɛf want fɔ sho se wi gɛt maynd, wi fɔ abop pan Jiova, ɛn nɔ abop pan wisɛf. (Rid Sɛkɛn Lɛta To Timoti 1:​7.) Lɛ wi tɔk bɔt tu eria dɛn we wi nid fɔ sho se wi gɛt maynd: insay wi famili ɛn insay di kɔngrigeshɔn.

10. Wetin mek yɔŋ Kristian dɛn nid fɔ gɛt maynd?

¹⁰ Bɔku tin dɛn kin apin we kin mek yɔŋ Kristian dɛn nid fɔ sho se dɛn gɛt maynd we dɛn de wɔship Jiova. Wi kin lan frɔm dɛn tin ya ɛn fala Sɔlɔmɔn in ɛgzampul. I bin sho se i gɛt maynd we i disayd fɔ du di rayt tin fɔ dɔn fɔ bil di tɛmpul. Pan ɔl we na mama ɛn papa dɛn fɔ gayd di yɔŋ wan dɛn, na dɛnsɛf sɛf fɔ disayd fɔ du sɔm impɔtant tin dɛn. (Prɔvabs 27:​11) Dɛn nid fɔ gɛt maynd we dɛn de disayd fɔ du di rayt tin lɛk udat fɔ bi dɛn padi, aw dɛn fɔ ɛnjɔy dɛnsɛf, aw dɛn fɔ kɔntinyu fɔ liv klin layf, ɛn ustɛm dɛn fɔ baptayz. Dɛn nid fɔ gɛt maynd bikɔs dɛn de du di tin we di wan we de provok Gɔd we na Setan, nɔ lɛk.

11, 12. (a) Aw Mozis bin sho se i gɛt maynd? (b) Aw yɔŋ wan dɛn go falamakata Mozis in ɛgzampul?

¹¹ Wan impɔtant tin we yɔŋ wan dɛn go disayd fɔ du na fɔ plan wetin dɛn go lɛk fɔ du tumara bambay. Na sɔm kɔntri dɛn, dɛn de fos di yɔŋ wan dɛn fɔ lan bɔku buk ɔ fɔ gɛt wok we go mek dɛn pe dɛn bɔku mɔni. Na sɔm ɔda kɔntri dɛn tin rili tranga de ɛn yɔŋ wan dɛn kin fil se di men tin we dɛn fɔ du na fɔ wok so dat dɛn go ɛp dɛn fambul dɛn. If dɛn kayn tin dɛn ya de apin to yu, na fɔ tink bɔt Mozis in ɛgzampul. Bikɔs na Fɛro in gyal pikin mɛn Mozis, i bin gɛt di chans fɔ du tin we fɔ mek i jɛntri ɔ mek i bi impɔtant pɔsin. Imajin aw Mozis in Ijipshian fambul dɛn, in ticha dɛn, ɛn in kanselɔ dɛn bin de mɔna am! Bɔt Mozis bin gɛt maynd ɛn i disayd fɔ de wit Gɔd in pipul dɛn. Afta we i lɛf Ijipt ɛn ɔl in jɛntri, i bin abop pan Jiova wit ɔl in at. (Di Ibru Pipul Dɛn 11:​24-26) Dis bin mek Jiova blɛs Mozis, ɛn i go blɛs am bak tumara bambay.

¹² We yɔŋ wan dɛn sho se dɛn gɛt maynd bay we dɛn de disayd fɔ du tin fɔ sav Jiova ɛn put in Kiŋdɔm fɔs na dɛn layf, i go blɛs dɛn. I go ɛp dɛn wit ɔl di tin dɛn we dɛn mama ɛn papa nid. Insay di fɔstɛm Kristian dɛn tɛm, wan yɔŋ man we nem Timoti bin yuz ɔl in tɛm fɔ sav Gɔd, ɛn yu bak kin du di sem tin. * (Luk di futnot.)—Rid Lɛta Fɔ Filipay 2:​19-22.

13. Wan sista bin nid fɔ gɛt maynd fɔ mek i go plan fɔ du mɔ fɔ Jiova. Aw dat bin ɛp am?

¹³ Wan sista we de na Alabama, insay Amɛrika, bin nid fɔ gɛt maynd fɔ mek i go plan fɔ du mɔ fɔ Jiova. I rayt se: “We a bin de gro ɔp, a bin rili de shem. I nɔ bin izi fɔ mi fɔ tɔk to pipul dɛn na Kiŋdɔm Ɔl, bifo a se fɔ go nak na strenja in domɔt.” Dis sista in mama ɛn papa, wit ɔda pipul dɛn na di kɔngrigeshɔn bin ɛp am. Leta dis yɔŋ sista bin ebul bi rɛgyula payɔnia. I bin  tɔk se: “Setan in wɔl de ɛnkɔrej pipul dɛn fɔ lan bɔku buk, fɔ mek bɔku pipul dɛn sabi dɛn, fɔ gɛt mɔni, ɛn fɔ gɛt bɔku prɔpati.” Bɔt dis sista bin kam fɔ no bak se bɔku pipul dɛn nɔ kin ɛva ebul fɔ gɛt dɛn tin dɛn de ɛn dis kin mek dɛn strɛs ɛn dɛn at kin pwɛl. I kɔntinyu fɔ tɔk se: “We a de sav Jiova, i dɔn mek a rili gɛt gladi at ɛn a de fil se a ebul du sɔntin fɔ Jiova.”

14. Ustɛm mama ɛn papa dɛn nid fɔ sho se dɛn gɛt maynd?

¹⁴ Mama ɛn papa dɛn we na Kristian dɛnsɛf nid fɔ gɛt maynd. Fɔ ɛgzampul, yu bɔs go de aks yu fɔ wok ovataym di de dɛn we yu dɔn plan fɔ du famili wɔship, fɔ go fil savis, ɛn fɔ atɛnd mitin. Yu nid fɔ gɛt maynd fɔ se nɔ to yu bɔs ɛn fɔ sɛt fayn ɛgzampul fɔ yu pikin dɛn. Ɔ sɔntɛm, sɔm mama ɛn papa dɛn na di kɔngrigeshɔn go alaw dɛn pikin dɛn fɔ du tin dɛn we yu nɔ de alaw yu pikin dɛn fɔ du. We dɛn mama ɛn papa dɛn ya aks yu bɔt dis, yu go gɛt maynd fɔ ɛksplen to dɛn wit rɛspɛkt di rizin?

15. Aw Sam 37:​25 ɛn Di Ibru Pipul Dɛn 13:​5 go ɛp mama ɛn papa dɛn?

¹⁵ Wi nid fɔ gɛt maynd fɔ ɛp wi pikin dɛn fɔ plan wetin dɛn want fɔ du fɔ Jiova. Fɔ ɛgzampul, sɔm mama ɛn papa dɛn kin fred fɔ ɛnkɔrej dɛn pikin dɛn fɔ payɔnia, fɔ go prich na di say usay dɛn nid mɔ pɔblisha dɛn, fɔ go wok na Bɛtɛl, ɔ fɔ go ɛp fɔ bil mɔ Kiŋdɔm Ɔl ɛn asɛmbli ɔl dɛn. Sɔntɛm  dɛn de fred se dɛn pikin dɛn nɔ go ebul fɔ kia fɔ dɛn we dɛn dɔn ol. Bɔt mama ɛn papa dɛn we gɛt sɛns de sho se dɛn gɛt maynd ɛn dɛn abop pan Jiova fɔ se i go du ɔl di tin dɛn we i dɔn prɔmis. (Rid Sam 37:​25; Di Ibru Pipul Dɛn 13:​5.) Mama ɛn papa dɛn we de sho se dɛn gɛt maynd ɛn dɛn abop pan Jiova go ɛp dɛn pikin dɛn fɔ du di sem tin.—Fɔs Samiɛl 1:​27, 28; Sɛkɛn Lɛta To Timoti 3:​14, 15.

16. Aw sɔm mama ɛn papa dɛn dɔn ɛp dɛn pikin dɛn fɔ du mɔ fɔ Jiova? Aw dis dɔn bɛnifit dɛn pikin dɛn?

¹⁶ Wan brɔda ɛn in wɛf na Amɛrika bin ɛp dɛn pikin dɛn fɔ du mɔ fɔ savJiova. Di brɔda bin se: “Bifo wi pikin dɛn bigin waka ɛn tɔk, wi kin tɛl dɛn bɔt di gladi at we pɔsin kin gɛt we i de payɔnia ɛn de wok na di kɔngrigeshɔn. Tide, na dat dɛn dɔn plan fɔ du.” I kɔntinyu fɔ tɔk se bikɔs dɛn pikin dɛn bin du wetin dɛn plan fɔ du, dat dɔn ɛp dɛn fɔ tinap tranga wan na Setan in wɔl ɛn fɔ pe atɛnshɔn pan di tin dɛn we go mek dɛn du mɔ fɔ Jiova. Wan brɔda we gɛt tu pikin dɛn bin rayt se: “Bɔku mama ɛn papa dɛn kin yuz ɔl dɛn tɛm ɛn mɔni fɔ ɛp dɛn pikin dɛn fɔ du tin dɛn lɛk spɔt, tin dɛn we dɛn lɛk, ɛn fɔ lan bɔku buk. Bɔt i mek mɔ sɛns fɔ yuz ɔl wi tɛm fɔ ɛp wi pikin dɛn fɔ du di tin dɛn we go mek dɛn kɔntinyu fɔ sav Jiova. I rili fayn fɔ si wi pikin dɛn de du di tin dɛn we dɛn plan fɔ du fɔ Jiova ɛn fɔ lɛ wisɛf de ɛp wi pikin dɛn fɔ du wetin dɛn dɔn plan.” Yu go gri se Gɔd de gladi fɔ mama ɛn papa dɛn we de ɛp dɛn pikin dɛn fɔ du mɔ fɔ am.

17. Gi sɔm ɛgzampul dɛn bɔt aw wi go sho se wi gɛt maynd insay di kɔngrigeshɔn.

¹⁷ Wi nid bak fɔ sho se wi gɛt maynd insay di kɔngrigeshɔn. Fɔ ɛgzampul, ɛlda dɛn nid fɔ gɛt maynd we dɛn de tɔk to pɔsin we dɔn kɔmit siriɔs sin ɔ we dɛn de ɛp di wan dɛn we dɛn layf de pan denja bikɔs dɛn sik. Sɔm ɛlda dɛn kin go to di wan dɛn we de na prizin fɔ stɔdi wit dɛn ɔ fɔ kɔndɔkt mitin wit dɛn. Wetin wi go se bɔt sista dɛn we nɔ mared? Dɛn gɛt bɔku we dɛn we dɛn go sho se dɛn gɛt maynd ɛn fɔ sav Jiova. Dɛn kin bi payɔnia, dɛn kin muf go na say usay dɛn nid mɔ pɔblisha dɛn fɔ prich, dɛn kin wok wit di Lokal Dizayn/Kɔnstrɔkshɔn program, ɛn rayt fɔ go na di Skul fɔ Pipul dɛn We De Prich bɔt Gɔd in Kiŋdɔm. Dɛn kin ivin invayt sɔm pan dɛn fɔ go na Gilead Skul.

18. Aw sista dɛn we dɔn ol go sho se dɛn gɛt maynd?

¹⁸ Wi lɛk wi sista dɛn we dɔn ol, ɛn wi gladi fɔ gɛt dɛn insay di kɔngrigeshɔn! Pan ɔl we sɔm pan dɛn nɔ ebul fɔ du mɔ lɛk aw dɛn bin de du fɔ Gɔd, dɛn kin stil sho se dɛn gɛt maynd ɛn du di wok. (Rid Taytɔs 2:​3-5.) Fɔ ɛgzampul, sista we dɔn ol nid fɔ sho se i gɛt maynd if di ɛlda dɛn aks am fɔ ɛp wan yɔŋ sista fɔ no aw fɔ drɛs fayn. I nɔ go tɔk pan di sista fɔ di klos dɛn we i de wɛr, bɔt i go tek tɛm ɛp am fɔ tink bɔt aw di klos dɛn we i de pik fɔ wɛr kin afɛkt ɔda pipul dɛn. (Fɔs Lɛta To Timoti 2:​9, 10) We di sista dɛn we dɔn ol sho se dɛn lɛk dɛn brɔda ɛn sista dɛn da kayn we de,  dis kin mek di kɔngrigeshɔn kɔntinyu fɔ gro.

19. (a) Aw di brɔda dɛn we dɔn baptayz kin gɛt maynd? (b) Aw Lɛta Fɔ Filipay 2:​13 ɛn Ayzaya 12:​2 go ɛp wi brɔda dɛn fɔ gɛt maynd?

¹⁹ Brɔda dɛn we dɔn baptayz dɛnsɛf nid fɔ sho se dɛn gɛt maynd ɛn du di wok dɛn we dɛn gɛt. We dɛn sho se dɛn rɛdi fɔ bi ministerial savant ɛn ɛlda dɛn, dat de rili bɛnifit ɔlman na di kɔngrigeshɔn. (Fɔs Lɛta To Timoti 3:​1) Bɔt sɔm kin fred fɔ du dat. Sɔntɛm wan brɔda bin dɔn mek mistek trade, ɛn naw i de fil se i nɔ fit fɔ bi ministerial savant ɔ ɛlda. Ɔda brɔda go fil se i nɔ ebul fɔ du di wok. If yu de fil da kayn we de, Jiova go ɛp yu fɔ gɛt maynd. (Rid Lɛta Fɔ Filipay 2:​13; Ayzaya 12:​2.) Mɛmba Mozis in ɛgzampul. Mozis in bak bin fil se i nɔ ebul fɔ du wetin Jiova bin tɛl am fɔ du. (Ɛksodɔs 3:​11) Bɔt Jiova bin ɛp am fɔ gɛt maynd ɛn fɔ mek i du wetin i bin nid fɔ du. Aw brɔda we dɔn baptayz go gɛt da kayn maynd de? I fɔ pre to Jiova fɔ ɛp am ɛn i fɔ rid di Baybul ɛvride. I fɔ tink gud wan bɔt di ɛgzampul dɛn we de na di Baybul bɔt pipul dɛn we sho se dɛn gɛt maynd. I kin put insɛf dɔŋ ɛn aks di ɛlda dɛn fɔ lɛ dɛn tren am, ɛn i kin ɛp fɔ du ɛni wok na di kɔngrigeshɔn. Wi de ɛnkɔrej ɔl di brɔda dɛn we dɔn baptayz fɔ gɛt maynd ɛn wok tranga wan na di kɔngrigeshɔn!

20, 21. (a) Wetin Devid bin mɛmba Sɔlɔmɔn bɔt? (b) Wetin wi fɔ biliv tranga wan?

²⁰ Kiŋ Devid bin mɛmba Sɔlɔmɔn se Jiova go de wit am te i dɔn fɔ bil di tɛmpul. (Fɔs Kronikul 28:​20) I go bi se Sɔlɔmɔn bin tink gud wan bɔt dɛn wɔd dɛn ya, ɛn dis bin mek i nɔ alaw di yɔŋ we i yɔŋ ɛn di ɛkspiriɛns we i nɔ gɛt fɔ mek i nɔ du di wok. Bifo dat i bin sho se i rili gɛt maynd ɛn Jiova bin ɛp am fɔ bil da fayn fayn tɛmpul de insay sɛvin ɛn af ia.

²¹ Jiova bin ɛp Sɔlɔmɔn, ɛn i kin ɛp wi bak fɔ gɛt maynd ɛn dɔn fɔ du wi wok we wi gɛt fɔ du fɔ wi famili ɛn insay di kɔngrigeshɔn. (Ayzaya 41:​10, 13) If wi sho se wi gɛt maynd we wi de sav Jiova, wi shɔ se Jiova go blɛs wi naw ɛn tumara bambay. So na fɔ “tinap lɛk man . . . tek kɔrej” ɛn du di wok.