1, 2. (a) Aw di we aw Jiova de trit pipul dɛn difrɛn frɔm di we aw pawaful mɔtalman dɛn de trit dɛn? (b) Wetin wi go tɔk bɔt insay dis atikul?

BƆKU tɛm, pipul dɛn we pawaful kin kɔntrol ɔda pipul dɛn ɔ ivin sɔprɛs dɛn. (Matyu 20:​25; Ɛkliziastis 8:​9) Jiova nɔ de ɛva du dat! Pan ɔl we in na di Ɔlmayti, we min se na in na di Pɔsin we pawaful pas ɔlman na di wan ol wɔl, i rili bisin bɔt aw mɔtalman dɛn we nɔ pafɛkt de fil. I gud ɛn i bisin bɔt aw wi de fil ɛn wetin wi nid. I de mɛmba se wi nɔ pafɛkt ɛn i no se nɔto ɔltin wi ebul du, so i nɔ de ɛva tɛl wi fɔ du wetin wi nɔ ebul fɔ du.—Sam 103:​13, 14.

² Insay di Baybul, wi lan bɔt aw Jiova de sho se i bisin bɔt aw in pipul dɛn de fil. Lɛ wi tɔk bɔt tri ɛgzampul dɛn. Fɔs, aw Jiova bin ɛp yɔŋ Samiɛl fɔ gi jɔjmɛnt mɛsej to di  Ay Prist we nem Ilay. Sɛkɔn, aw Jiova bin peshɛnt wit Mozis we Mozis bin fil se i nɔ go ebul fɔ lid di Izrɛlayt dɛn fɔ kɔmɔt na Ijipt. Ɛn tɔd, aw Jiova bin sho se i bisin bɔt di we aw di Izrɛlayt dɛn bin de fil we dɛn bin de kɔmɔt na Ijipt. Wetin wi lan bɔt Jiova frɔm dɛn ɛgzampul dɛn ya ɛn aw wi go falamakata am?

3. Wan nɛt, us strenj tin bin apin to yɔŋ Samiɛl? Us kwɛstyɔn wi go aks wisɛf? (Luk di pikchɔ nia dis atikul in taytul.)

³ Samiɛl bin rili smɔl we i bin stat fɔ sav na di tabanakul. (Fɔs Samiɛl 3:​1) Wan nɛt, afta we i dɔn slip, wan strenj tin bin apin. * (Luk di futnot.) (Rid Fɔs Samiɛl 3:​2-10.) I bin yɛri we pɔsin de kɔl in nem. Samiɛl bin fil se na Ay Prist Ilay we dɔn ol de kɔl am. So i grap ɛn rɔn go to Ilay ɛn tɔk se: “Luk mi, yu kɔl mi.” Bɔt Ilay tɛl am se: “A nɔ kɔl yu.” Afta we di sem tin apin tu tɛm bak, Ilay kam fɔ no se na Gɔd de kɔl Samiɛl. So i tɛl Samiɛl wetin fɔ du di nɛks tɛm we i yɛri di vɔys, ɛn Samiɛl bin obe. Wetin mek Jiova nɔ bin tɛl Samiɛl frɔm di biginin se na in bin de kɔl am? Di Baybul nɔ tɛl wi dat. Bɔt i go mɔs bi se Jiova bin du am da we de bikɔs i bin bisin bɔt aw Samiɛl bin de fil.

4, 5. (a) Wetin Samiɛl bin du we Jiova bin gi am mɛsej fɔ gi Ilay? (b) Wetin dis stori tich wi bɔt Jiova?

⁴ Rid Fɔs Samiɛl 3:​11-18. Jiova in Lɔ tɛl pikin dɛn fɔ rɛspɛkt ol pipul dɛn, mɔ di wan dɛn we de oba dɛn. (Ɛksodɔs 22:​28; Lɛvitikɔs 19:​32) So i at fɔ imajin sɛf se yɔŋ bɔbɔ lɛk Samiɛl go go to Ilay na mɔnin ɛn gɛt maynd fɔ tɛl am di jɔjmɛnt mɛsej we Jiova gi am. Di Baybul tɛl wi se Samiɛl “bin de fred fɔ tɛl Ilay bɔt di vishɔn.” Bɔt Gɔd men Ilay no klia wan se na In bin de kɔl Samiɛl. Dis bin mek Ilay tɛl Samiɛl fɔ tɛl am ɔl wetin Gɔd tɛl am, i nɔ fɔ ayd ɛnitin. Samiɛl bin obe ɛn “tɛl am ɔl wetin PAPA GƆD bin tɛl am.”

⁵ Ilay nɔ bin sɔprayz fɔ yɛri dis mɛsej. Bifo dis tɛm, “wan man we bin de tɔk bɔt PAPA GƆD,” bin dɔn kam tɛl am dis kayn mɛsej. (Fɔs Samiɛl 2:​27-36)Dis stori tich wi se Jiova gɛt sɛns ɛn i bisin bɔt aw ɔda pipul dɛn de fil.

6. Us lɛsin wi kin lan frɔm di we aw Gɔd bin ɛp yɔŋ Samiɛl?

⁶ Yu na yɔŋ pɔsin? If na so i bi, di stori bɔt yɔŋ Samiɛl de sho se Jiova de ɔndastand di prɔblɛm dɛn we de mit yu ɛn aw yu de fil. Sɔntɛm, yu de shem ɛn yu de fil se i nɔ izi fɔ prich to big pipul dɛn ɔ fɔ difrɛn frɔm yu kɔmpin dɛn. Yu fɔ no se Jiova want fɔ ɛp yu. So pre to am ɛn tɛl am aw yu de rili fil. (Sam 62:​8) Tink gud gud wan bɔt di  ɛgzampul dɛn na di Baybul bɔt yɔŋ wan dɛn lɛk Samiɛl. Ɛn tɔk to brɔda ɛn sista dɛn we yu ɛn dɛn na di sem ej ɔ we big pas yu we bin dɔn gɛt di kayn prɔblɛm dɛn we yu de gɛt. Dɛn go tɛl yu bɔt tɛm dɛn we Jiova ɛp dɛn, ɛn sɔntɛm na we dɛn we dɛn nɔ bin de tink se i go ɛp dɛn.

7, 8. Aw Jiova bin sho se i rili bisin bɔt aw Mozis bin de fil?

⁷ We Mozis bin ol 80 ia, Jiova bin gi am wan wok we nɔ bin rili izi. I bin gi am di wok fɔ fri di Izrɛlayt dɛn frɔm di slev wok we dɛn bin de du na Ijipt. (Ɛksodɔs 3:​10) Dis wok go mɔs dɔn shɔk Mozis, bikɔs in na bin shɛpad na Midian fɔ 40 ia. Mozis bin tɔk se: “Udat nain fɔ go tinap bifo di kiŋ ɛn pul di Izrɛlayt dɛn kɔmɔt na Ijipt”? Jiova bin tɛl Mozis se: “A go de wit yu.” (Ɛksodɔs 3:​11, 12) Jiova bin prɔmis am bak se di wan dɛn we de bifo na Izrɛl “go biliv wetin yu se.” Bɔt stil Mozis bin aks se, wetin i fɔ du “if di pipul dɛn nɔ biliv am ɛn nɔ gri lisin to wetin i de tɛl dɛn”? (Ɛksodɔs 3:​18; 4:​1) Mozis bin de tray fɔ tɔk se nɔto di rayt tin Jiova bin de tɛl am! Bɔt Jiova bin peshɛnt wit Mozis. I bin ivin gi am di pawa fɔ pafɔm mirekul dɛn. Infakt, Mozis na bin di fɔs pɔsin we di Baybul tɔk se bin gɛt dis kayn pawa.—Ɛksodɔs 4:​2-9, 21.

⁸ Pan ɔl dat, Mozis bin gɛt ɔda ɛkskyuz. I bin tɔk se i nɔ sabi tɔk fayn. So Gɔd bin tɛl am se: “A go ɛp yu fɔ tɔk ɛn a go tɛl yu wetin fɔ se.” Mozis bin rili biliv? Nɔ, i bin tɛl Gɔd fɔ sɛn ɔda pɔsin. Dɔn Jiova bin vɛks. Bɔt pan ɔl dat Jiova bin stil bisin bɔt aw Mozis bin de fil, so i bin sɛn Erɔn fɔ tɔk fɔ Mozis.—Ɛksodɔs 4:​10-16.

9. Aw di we aw Jiova bin peshɛnt ɛn gud bin ɛp Mozis fɔ bi gud lida?

 ⁹ Wetin dis stori de tich wi bɔt Jiova? Bikɔs Jiova na di Ɔlmayti, i bin fɔ dɔn yuz in pawa fɔ mek Mozis fred ɛn obe am. Bifo dat, Jiova bin peshɛnt ɛn i bin gud, ɛn i bin mek in savant we no se nɔto ɔltin i ebul fɔ du ɛn we ɔmbul biliv tranga wan se i go de wit am. Dat bin ɛp Mozis? Yɛs, i bin ɛp am! Mozis bin bi gud lida fɔ Gɔd in pipul dɛn. I bin tray nɔ fɔ de vɛks kwik ɛn fɔ bisin bɔt di we aw ɔda pipul dɛn bin de fil, jɔs lɛk aw Jiova bin du to am.—Di Nɔmba Dɛm 12:​3.

10. Aw yu go bɛnifit we yu tink bɔt di we aw ɔda pipul dɛn de fil jɔs lɛk aw Jiova de du?

¹⁰ Us lɛsin dɛn wi lan frɔm dis? If yu na maredman, mama ɔ papa, ɔ yu na ɛlda, yu gɛt pipul dɛn we yu de oba. Na dat mek i rili impɔtant fɔ mek yu falamakata Jiova bay we yu bisin bɔt aw ɔda pipul dɛn de fil, yu gud, ɛn yu peshɛnt wit yu wɛf, yu pikin dɛn, ɛn di wan dɛn we de na di kɔngrigeshɔn. (Lɛta Fɔ Kɔlɔse 3:​19-21; Pita in Fɔs Lɛta 5:​1-3, NW) If yu falamakata Jiova Gɔd ɛn Jizɔs Krays we pas Mozis, yu go mek i izi fɔ lɛ ɔda pipul dɛn kam tɔk to yu, ɛn yu go ebul fɔ ɛnkɔrej dɛn. (Matyu 11:​28, 29) Yu kin sɛt gud ɛgzampul bak fɔ dɛn.—Di Ibru Pipul Dɛn 13:​7.

11, 12. Aw Jiova bin protɛkt di Izrɛlayt dɛn ɛn mek dɛn fil sef we i bin de pul dɛn kɔmɔt na Ijipt?

¹¹ I go bi se insay di ia 1513 bifo Krays, i bin pas tri milyɔn Izrɛlayt dɛn we kɔmɔt na Ijipt. Sɔm pan dɛn na bin pikin dɛn, ol wan dɛn, ɛn sɔntɛm sɔm bin sik ɔ pat pan dɛn bɔdi bin ambɔg. Dɛn kayn bɔku bɔku pipul dɛn de bin nid Lida we bisin bɔt dɛn ɛn we ɔndastand dɛn. Ɛn Jiova bin yuz Mozis fɔ du dat. Dat bin mek di Izrɛlayt dɛn fil sef we dɛn de kɔmɔt na di wangren ples we dɛn bin sabi.—Sam 78:​52, 53.

¹² Wetin Jiova bin du fɔ protɛkt in pipul dɛn ɛn mek dɛn fil sef? We di Izrɛlayt dɛn bin de kɔmɔt Ijipt, i ɔganayz dɛn ‘lɛk se na wɔ dɛn de go fɛt.’ (Ɛksodɔs 13:​18) Bikɔs dɛn bin ɔganayz dis kayn we, dɛn bin ebul fɔ si klia wan se na dɛn Gɔd de kɔntrol wetin bin de apin. Jiova bin gi dɛn bak “klawd fɔ gayd dɛn de tɛm” ɛn “i yuz  faya fɔ gayd dɛn” na nɛt fɔ mɛmba dɛn se i de wit dɛn, i de gayd dɛn, ɛn protɛkt dɛn. (Sam 78:​14) Dis tin we Jiova bin du fɔ dɛn go ɛp dɛn we i kam to wetin gɛt fɔ apin nɛks.

13, 14. (a) Aw Jiova bin kia fɔ di Izrɛlayt dɛn na di Rɛd Si? (b) Aw Jiova bin sho se i gɛt pawa pas di Ijipshian dɛn?

¹³ Rid Ɛksodɔs 14:​19-22. Imajin se yu bin de wit di Izrɛlayt dɛn. Yu de na trap. Di Ijipshian sojaman dɛn de biɛn yu, ɛn di Rɛd Si de bifo yu. Dɔn Gɔd du sɔntin. Di klawd we bin dɔn de bifo yu muv go biɛn una, dat na bitwin yu ɛn di Ijipshian dɛn. Naw di Ijipshian dɛn ples dak, bɔt usay una de gɛt layt. Dɔn yu si Mozis strɛch in an oba di si, ɛn wan big briz we kɔmɔt na di ist blo, ɛn i mek big rod fɔ go na di ɔda say. So yu, yu famili, ɛn yu animal dɛn ɔl waka midul di si ɔganayz wan wit ɔl di ɔda animal dɛn. Yu sɔprayz we di grɔn nɔ pɔtɔpɔtɔ ɛn i nɔ slipul. I dray, so i izi fɔ waka de. So ivin di wan dɛn we slo fɔ waka ebul fɔ rich na di ɔdasay sef wan.

¹⁴ Rid Ɛksodɔs 14:​23, 26-30. We ɔl dis de apin, Fɛro we prawd ɛn nɔ gɛt sɛns, bigin rɔnata yu ɛn yu kɔmpin Izrɛlayt dɛn. Dɔn Mozis strɛch in an oba di si bak, ɛn di wata we bin tinap lɛk tu wɔl dɛn fɔdɔm pan dɛn ɛn kɔba Fɛro ɛn in sojaman dɛn. Dɛn ɔl day!—Ɛksodɔs 15:​8-10.

15. Wetin dis stori de tich yu bɔt Jiova?

¹⁵ Dis stori de tich wi ɔda tin bɔt Jiova. In na Gɔd we ɔganayz, ɛn na dis  kwaliti de ɛp wi fɔ fil sef. (Fɔs Lɛta Fɔ Kɔrint 14:​33) Jɔs lɛk shɛpad we lɛk in ship dɛn ɛn de kia fɔ dɛn, na so Jiova de du tin fɔ kia fɔ in pipul dɛn. I de protɛkt dɛn ɛn kip dɛn sef frɔm dɛn ɛnimi dɛn. Dis de gi wi kɔrej as wi de nia di tɛm we di wɔl fɔ dɔn.—Prɔvabs 1:​33.

16. Us bɛnifit wi go gɛt we wi dɔn tɔk smɔl bɔt di we aw Jiova sev di Izrɛlayt dɛn?

¹⁶ Tide, Jiova de stil kia fɔ ɔl in pipul dɛn. I de ɛp dɛn fɔ kɔntinyu fɔ gɛt gud padi biznɛs wit am ɛn i de protɛkt dɛn frɔm dɛn ɛnimi dɛn. Ɛn i go kɔntinyu fɔ du dat insay di gret tribyuleshɔn we de kam jisnɔ. (Rɛvɛleshɔn 7:​9, 10) So ilɛksɛf Gɔd in pipul dɛn yɔŋ ɔ dɛn ol, dɛn gɛt wɛlbɔdi ɔ dɛn nɔ gɛt wɛlbɔdi, dɛn nɔ go fred we di gret tribyuleshɔn go kam. * (Luk di futnot.) Infakt, na difrɛn tin dɛn go du! Dɛn go mɛmba wetin Jizɔs bin tɔk we i se: “Una es una ed ɛn luk ɔp to Gɔd bikɔs i nɔ go te igen, Gɔd go sev una.” (Lyuk 21:​28) Ivin we Gɔg, we na neshɔn dɛn we kam togɛda ɛn we pawaful pas Fɛro, go atak Gɔd in pipul dɛn, dɛn go biliv tranga wan se Jiova go protɛkt dɛn. (Izikɛl 38:​2, 14-16) Wetin mek? Na bikɔs dɛn no se Jiova nɔ de chenj. I go pruv bak se i lɛk in pipul dɛn ɛn in na Seviɔ we bisin bɔt in pipul dɛn.—Ayzaya 26:​3, 20.

17. (a) Aw wi go bɛnifit we wi de stɔdi Baybul stori dɛn bɔt aw Jiova de kia fɔ pipul dɛn? (b) Wetin wi go tɔk bɔt insay di nɛks atikul?

¹⁷ Insay dis atikul, wi dɔn si sɔm ɛgzampul dɛn bɔt aw Jiova gud ɛn aw i de tink bɔt di we aw in pipul dɛn de fil, we i de kia fɔ dɛn, we i de dayrɛkt dɛn, ɛn we i de sev dɛn. As yu de tink bɔt dɛn stori dɛn ya, tray fɔ lan nyu tin bɔt Jiova bay we yu de luk fɔ mɔ tin dɛn we yu nɔ bin dɔn si trade. As yu de lan mɔ bɔt Jiova in fayn fayn kwaliti dɛn, na so yu go de lɛk am ɛn gɛt fet pan am mɔ ɛn mɔ. Insay di nɛks atikul, wi go lan bɔt sɔm we dɛn we wi go falamakata Jiova bay we wi de sho se wi bisin bɔt di we aw di pipul dɛn na wi famili, na di kɔngrigeshɔn, ɛn pipul dɛn we wi de prich to, de fil.