1. Us impɔtant tɔpik Jizɔs bin tɔk bɔt di las nɛt we i bin spɛn wit in disaypul dɛn?

DI LAS nɛt we Jizɔs bin spɛn wit in disaypul dɛn bifo i day, i bin tɔk bɔt lɔv fɔ lɛk 30 tɛm. I bin tɛl in disaypul dɛn se dɛn fɔ “lɛk” dɛnsɛf. (Jɔn 15:​12, 17) Di lɔv we dɛn gɛt go so spɛshal dat ɔda pipul dɛn go notis am ɛn no se dɛn na Krays in disaypul dɛn fɔ tru. (Jɔn 13:​34, 35) Di lɔv we Jizɔs bin tɔk bɔt nɔto jɔs filin; na pawaful kwaliti we pɔsin de gɛt ɛn i de sho se i nɔ jɔs bisin bɔt insɛf nɔmɔ. Jizɔs bin tɔk se: “If pɔsin day fɔ in padi, nɔ lɛk nɔ pas da wande. Una na mi padi dɛn if una du wetin a tɛl una fɔ du.”—Jɔn 15:​13, 14.

2. (a) Tide, wetin pipul dɛn sabi Jiova in savant dɛn fɔ? (b) Us kwɛstyɔn dɛn wi go tɔk bɔt insay dis atikul?

² Tide, pipul dɛn sabi Jiova in savant dɛn as pipul dɛn  we gɛt tru tru lɔv ɛn wanwɔd. (Jɔn In Fɔs Lɛta 3:​10, 11) I nɔ mata us kɔntri ɔ trayb wi kɔmɔt, us langwej wi de tɔk, usay wi kɔmɔt, ɔ aw dɛn mɛn wi. Ɔlsay na di wɔl, Jiova in savant dɛn rili lɛk dɛnsɛf. Wetin mek lɔv na sɔntin we rili impɔtant tide? Aw Jiova ɛn Jizɔs de ɛnkɔrej wi wit lɔv? Aw wi go sho dis lɔv fɔ ɛnkɔrej ɛn ɛp ɔda pipul dɛn?—Fɔs Lɛta Fɔ Kɔrint 8:​1.

3. Aw dis tɛm we tin rili “traŋa” de afɛkt pipul dɛn?

³ Wi de na di tɛm we tin rili “traŋa,” ɛn wi layf fulɔp wit “ɔlkayn trɔbul.” (Sɛkɛn Lɛta To Timoti 3:​1-5; Sam 90:​10) Bɔku pipul dɛn de rili sɔfa ɛn dat dɔn mek dɛn de fil fɔ giv ɔp. I pas 800,000 pipul dɛn we de kil dɛnsɛf ɛni ia, we min se wan pɔsin de kil insɛf ɛni 40 sɛkɔn. I sɔri fɔ no se ivin sɔm pan wi brɔda dɛn dɔn fil dis kayn we ɛn dɔn kil dɛnsɛf.

4. Udat dɛn di Baybul tɔk bɔt se dɛn bin want fɔ day?

⁴ Insay di tɛm we dɛn bin de rayt di Baybul, sɔm pan Gɔd in fetful savant dɛn bin gɛt prɔblɛm dɛn we bin de mek dɛn rili fil bad ɛn dɛn bin want fɔ day. Fɔ ɛgzampul, Job bin de sɔfa wan kayn we we mek i tɔk se: “A et mi layf: A dɔn taya wit dis layf.” (Job 7:​16) Jona in at bin rili pwɛl ɛn i bin tɔk se: “Mek PAPA GƆD [“Jiova,” NW] tek in layf sins i go bɛtɛ fɔ am fɔ day pas fɔ gɛt layf.” (Jona 4:​3) Di prɔfɛt Ilayja bin rili fil se op nɔ de fɔ am igen ɛn i bin tɔk se: “In dɔn taya, in dɔn si bɔku trɔbul so lɛ in day wantɛm.” (Fɔs Kiŋ 19:​4) Bɔt Jiova bin lɛk dɛn in fetful savant dɛn ya ɛn i bin want dɛn fɔ liv. I nɔ bin kɔndɛm di we aw dɛn bin de fil. Bifo dat, i bin ɛp dɛn fɔ si se nid de fɔ lɛ dɛn de alayf so dat dɛn go kɔntinyu fɔ wɔship am fetful wan.

5. Wetin mek wi brɔda ɛn sista dɛn rili nid wi lɔv naw?

⁵ Tide, bɔku pan wi brɔda ɛn sista dɛn gɛt prɔblɛm dɛn we de mek dɛn at pwɛl ɛn dɛn nid wi fɔ sho se wi lɛk dɛn. Dɛn de provok sɔm pan dɛn ɔ mek dɛn sɔfa. Ɔda wan dɛn de we de bia bikɔs dɛn de tek advantej pan ɔ dɛn de kongosa dɛn na dɛn wok ples. Ɔ dɛn taya bikɔs dɛn de wok fɔ lɔng tɛm ɔ dɛn gɛt wok we de mɔna dɛn. Stil ɔda wan dɛn de we gɛt siriɔs prɔblɛm dɛn na dɛn famili. Sɔntɛm dɛn mared to sɔmbɔdi we nɔ de sav Jiova ɛn we de fɛn fɔlt pan dɛn ɔltɛm. Dɛn prɔblɛm dɛn ya ɛn ɔda tin dɛn kin mek bɔku pan wi brɔda ɛn sista dɛn fil se dɛn nɔ gɛt bɛtɛ trɛnk igen, ɛn dɛn kin ivin bigin fɔ dawt if dɛn impɔtant. Udat go ɛp dɛn?

6. Aw di lɛk we Jiova lɛk in savant dɛn de mek dɛn gɛt trɛnk?

⁶ Jiova de mek in savant dɛn no se i lɛk dɛn naw ɛn i go lɛk dɛn sote go. Imajin aw di Izrɛlayt dɛn bin fil we Jiova bin tɛl dɛn se: ‘Una spɛshal na mi yay, ɛn una gɛt ɔnɔ, ɛn a lɛk una,’ ɛn ‘una nɔ fred, bikɔs a de wit una.’ (Ayzaya 43:​4, 5) Wi no se wi ɔl valyu to Jiova. * (Luk di futnot.) Di Baybul  prɔmis wi se: “PAPA GƆD de wit una; na sojaman so i mɔs mek una win. Dat go mek in at swit.”—Zɛfinaya 3:​16, 17.

7. Aw di lɛk we Jiova lɛk wi tan lɛk aw kombra lɛk in pikin? (Luk di pikchɔ nia dis atikul in taytul.)

⁷ Jiova prɔmis se i go ɛnkɔrej ɛn gi trɛnk to in pipul dɛn ilɛk uskayn prɔblɛm dɛn gɛt. I tɔk se: ‘Una go sɔk, ɛn a go tot una na mi fut, ɛn mek una dans na mi ni. Lɛkɛ pikin we in mami de bayo bayo, na so a go bayo bayo una.’ (Ayzaya 66:​12, 13) Tink bɔt aw bebi kin fil sef we i mama de tot am ɔ ple wit am! Jiova rili lɛk yu ɛn i want yu fɔ fil sef. Nɔ ɛva dawt if yu rili impɔtant to Jiova.—Jɛrimaya 31:​3.

8, 9. Aw di lɛk we Jizɔs lɛk wi de ɛnkɔrej wi?

⁸ Lɛ wi tɔk bɔt wan ɔda rizin we de mek wi no se Jiova lɛk wi. Di Baybul se: “Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am nɔ go day, bɔt i go gɛt layf we go de sote go.” (Jɔn 3:​16, NW) Jizɔs in sakrifays sho se insɛf lɛk wi, ɛn di lɛk we i lɛk wi de ɛnkɔrej wi. Di Baybul se ivin “trɔbul,” ɔ “traŋa layf” nɔ go mek “di lɛk we Gɔd lɛk wi we Jizɔs Krays wi Masta dɔn sho wi tap fɔ rich wi.”—Lɛta Fɔ Rom 8:​35, 38, 39.

⁹ Sɔntɛnde, wi go gɛt prɔblɛm dɛn we go mek wi nɔ gɛt bɛtɛ trɛnk igen ɔ we go mek wi at pwɛl ɔ we go mek wi nɔ gladi we wi de sav Jiova. Bɔt we wi mɛmba di we aw Krays lɛk wi, dat de mek wi gɛt trɛnk fɔ bia. (Rid Sɛkɛn Lɛta Fɔ Kɔrint 5:​14, 15.) Di lɛk we Jizɔs lɛk wi de mek wi want fɔ kɔntinyu fɔ liv ɛn sav Jiova. I go mek  wi nɔ giv ɔp, ilɛk bad bad tin dɛn lɛk atkwek, ebi ebi ren ambɔg usay wi de, pipul dɛn de mek wi sɔfa, pɔsin du sɔntin we mek wi at pwɛl, ɔ sɔntin de mek wi wɔri.

10, 11. Udat gɛt di wok fɔ ɛnkɔrej wi brɔda dɛn we gɛt pwɛl at? Ɛksplen.

¹⁰ Jiova de yuz di kɔngrigeshɔn fɔ ɛnkɔrej wi fɔ sho se i lɛk wi. We wi lɛk wi brɔda ɛn sista dɛn, wi de sho se wi lɛk Jiova. Wi fɔ du ɔl wetin wi ebul fɔ mek wi brɔda dɛn no se dɛn impɔtant ɛn Jiova lɛk dɛn. (Jɔn In Fɔs Lɛta 4:​19-21) Di apɔsul Pɔl bin rayt se: “Una fɔ stil de kɔrej ɛn ɛp una kɔmpin Kristiɛn dɛn, lɛkɛ aw una de du naw.” (Fɔs Lɛta Fɔ Tɛsalonayka 5:​11) Nɔto di ɛlda dɛn nɔmɔ fɔ du dis. Wi ɔl kin falamakata Jiova ɛn Jizɔs fɔ ɛnkɔrej wi brɔda ɛn sista dɛn.—Rid Lɛta Fɔ Rom 15:​1, 2.

¹¹ Sɔm brɔda ɛn sista dɛn kin de na di kɔngrigeshɔn we go nid ɛp ɛn mɛrɛsin bikɔs dɛn de sɔfa bikɔs dɛn at rili pwɛl ɔ dɛn de wɔri pasmak. (Lyuk 5:​31) Ɛlda dɛn ɛn ɔda pipul dɛn na di kɔngrigeshɔn fɔ no se pan ɔl we dɛn nɔto dɔktɔ dɛn, di ɛp we dɛn go ɛp ɛn ɛnkɔrej dɛn kayn pipul dɛn de go rili impɔtant. Ɔlman na di kɔngrigeshɔn “fɔ kɔrej dɛn pipul we de fred” ɛn “fɔ ɛp dɛn pipul we nɔ ɔndastand Gɔd biznɛs gud”, ɛn dɛn “fɔ bia wit ɔlman.” (Fɔs Lɛta Fɔ Tɛsalonayka 5:​14) Wi want fɔ tray fɔ ɔndastand aw wi brɔda dɛn de fil. Wi nid fɔ peshɛnt wit dɛn ɛn tɔk to dɛn di kayn we we go ɛnkɔrej dɛn we dɛn at pwɛl. Yu kin tray fɔ ɛnkɔrej  ɔda pipul dɛn? Wetin yu go du fɔ mek yu kɔntinyu fɔ ɛnkɔrej dɛn mɔ ɛn mɔ?

12. Gi wan ɛgzampul bɔt wan sista we di brɔda ɛn sista dɛn na in kɔngrigeshɔn bin ɛnkɔrej bay we dɛn sho se dɛn lɛk am.

¹² Wan sista na Yurop bin tɔk se: “Sɔntɛnde, a kin tink fɔ kil misɛf, bɔt a gɛt pipul dɛn we de rili sɔpɔt mi. Di kɔngrigeshɔn we a de dɔn sev mi layf. Di brɔda ɛn sista dɛn de rili ɛnkɔrej mi ɔltɛm ɛn dɛn lɛk mi. Pan ɔl we na sɔm pan dɛn nɔmɔ no se a gɛt wan sik we kin mek mi at pwɛl, ɔlman na di kɔngrigeshɔn rɛdi ɔltɛm fɔ ɛp mi. Wan brɔda ɛn in wɛf tan lɛk mama ɛn papa to mi. Dɛn de rili kia fɔ mi, ɛn 24 awa insay di de, dɛn rɛdi fɔ ɛp mi.” Fɔ tru, nɔto ɔlman go ebul fɔ ɛp yu da kayn we de. Bɔt wi ɔl gɛt bɔku tin we wi ebul fɔ du fɔ sɔpɔt wi brɔda ɛn sista dɛn. * (Luk di futnot.)

13. Wetin wi nid fɔ du fɔ ɛnkɔrej ɔda pipul dɛn?

¹³ Tek tɛm lisin. (Jems 1:​19) Wi go sho se wi lɛk wi brɔda we wi de tek tɛm lisin to am we i de tɔk. Aks kwɛstyɔn dɛn we go ɛp yu fɔ ɔndastand aw yu brɔda de fil. Ivin frɔm di we aw yu de mek yu fes, i go no if yu rili bisin bɔt am. Na fɔ peshɛnt wit am we i de tɔk, ɛn alaw am fɔ tɔk bay we yu nɔ kɔt wɔd na in mɔt we i de tɛl yu aw i de fil. We yu tek tɛm lisin, yu go ɔndastand am fayn fayn wan ɛn yu go ɛp am fɔ trɔst yu. Dat go mek am izi fɔ lɛ i lisin to wetin yu de tɛl am we yu de tray fɔ ɛp am. We yu rili bisin bɔt ɔda pipul dɛn, dat go mek yu ebul fɔ ɛnkɔrej dɛn.

14. Wetin mek wi nɔ fɔ de fɛn fɔlt pan ɔda pipul dɛn?

¹⁴ Nɔ tray fɔ fɛn fɔlt. Pɔsin we in at rili pwɛl kin fil bad mɔ if i tink se wi de fɛn fɔlt pan am. Dat go mek i nɔ izi fɔ mek wi ɛp am. Di Baybul se: “Wɔd we pɔsin nɔ tink bifo i pul am nain mɔt, kin kɔt shap lɛk sɔd, bɔt [udat] gɛt sɛns, wɛn i tɔk, i kin mek pɔsin in at kol.” (Prɔvabs 12:​18) Pan ɔl we wi nɔ go want fɔ tɔk sɔntin bay wilful wan we go mek pɔsin we i at pwɛl fil bad mɔ ɛn mɔ, wi go stil mek di pɔsin fil bad if wi tɔk bifo wi tink. Fɔ ɛp wi brɔda fɔ fil gud bɔt insɛf, wi fɔ mek i biliv se wi de rili tray fɔ ɔndastand wetin de apin to am.—Matyu 7:​12.

15. Us impɔtant tin wi gɛt we wi go yuz fɔ ɛnkɔrej ɔda pipul dɛn?

¹⁵ Yuz Gɔd in Wɔd fɔ ɛnkɔrej ɔda pipul dɛn. (Rid Lɛta Fɔ Rom 15:​4, 5.) Di Baybul kɔmɔt frɔm “Gɔd we de mek pipul ebul bia ɛn gɛt kɔrej,” so wi nɔ sɔprayz fɔ se wi go fɛn tin dɛn we go ɛnkɔrej wi insay de. Wi gɛt bak di Watch Tower Publications Index ɛn di Buk we De Ɛp Jiova Witnɛs dɛn fɔ No bɔt Sɔntin. We wi de yuz dɛn tin dɛn ya, wi go fɛn skripchɔ dɛn, buk, magazin dɛn, ɛn ɔda tin dɛn, we wi go yuz fɔ ɛnkɔrej wi brɔda ɛn sista dɛn.

16. Us kwaliti dɛn go ɛp wi fɔ ɛnkɔrej pɔsin we gɛt pwɛl at?

¹⁶ Trit ɔda pipul dɛn fayn ɛn saful-saful. Jiova na di Papa we “de  sɔri fɔ wi we nain pikin dɛn ɛn nain de kɔrej wi ɔltɛm,” ɛn i gɛt sɔri-at fɔ in savant dɛn. (Rid Sɛkɛn Lɛta Fɔ Kɔrint 1:​3-6; Lyuk 1:​78; Lɛta Fɔ Rom 15:​13) Pɔl bin sɛt fayn ɛgzampul bikɔs i bin falamakata Jiova fɔ sho sɔri-at. I bin tɔk se: “Wi go kɛlɛkɛlɛ wit una lɛkɛ aw kombra kin bayo bayo in pikin dɛn. Bikɔs wi lɛk una bad, wi bin rɛdi fɔ tɛl una di Gud Nyuz we Gɔd tɛl wi fɔ tɛl una ɛn fɔ day sɛf fɔ una. Wi bin lɛk una bad bad!” (Fɔs Lɛta Fɔ Tɛsalonayka 2:​7, 8) We wi de trit ɔda pipul dɛn fayn lɛk aw Jiova de du, wi go gi wi brɔda dɛn di kɔrej we dɛn de pre fɔ.

17. Wetin na di rayt we we wi fɔ tink bɔt wi brɔda dɛn we go ɛp wi fɔ ɛnkɔrej dɛn?

¹⁷ Nɔ tink se yu brɔda dɛn fɔ pafɛkt. Tink di rayt we. If yu de tink se yu brɔda dɛn fɔ pafɛkt, yu go ɛnd ɔp wit pwɛl at. (Ɛkliziastis 7:​21, 22) Mɛmba se Jiova de tink di rayt we we i kam pan wetin i want wi fɔ du. So wi nid fɔ peshɛnt wit wisɛf. (Lɛta Fɔ Ɛfisɔs 4:​2, 32) Wi nɔ go ɛva want fɔ mek wi brɔda ɛn sista dɛn fil se dɛn nɔ de du bɛtɛ ɔ fɔ kɔmpia dɛn wit ɔda pipul dɛn. Bifo dat, wi de ɛnkɔrej dɛn ɛn tɛl dɛn bɔt di gud tin dɛn we dɛn de du. Dis kin mek dɛn gladi we dɛn de sav Jiova.—Lɛta Fɔ Galeshya 6:​4.

18. Wetin mek yu want fɔ sho di kayn lɔv we go ɛnkɔrej ɔda pipul dɛn?

¹⁸ Jiova ɛn Jizɔs valyu ɔl di wan dɛn we de sav am. (Lɛta Fɔ Galeshya 2:​20) Wi rili lɛk wi brɔda ɛn sista dɛn, so wi fɔ trit dɛn saful-saful. Wi “fɔ tray ɔltɛm fɔ de du dɛn tin we de briŋ kol at, ɛn dɛn tin we go mek ɔda pipul ɛn wisɛf biliv Gɔd mɔ ɛn mɔ.” (Lɛta Fɔ Rom 14:​19) Wi rili de wet fɔ di tɛm we wi go gɛt layf na Paradays usay nɔbɔdi nɔ go gɛt ɛnitin we go mek in at pwɛl! Nɔbɔdi nɔ go sik igen, ɛn wɔ nɔ go de igen. Sin ɛn day nɔ go de, ɛn nɔbɔdi nɔ go mek wi sɔfa, wi nɔ go gɛt prɔblɛm dɛn na wi famili, ɔ natin nɔ go mek wi at pwɛl igen. Bay di tɛm we di Wan Tawzin Ia de dɔn, ɔlman go dɔn pafɛkt. Di wan dɛn we go kɔntinyu fɔ fetful to Jiova di tɛm we dɛn go tɛst dɛn fɔ di las tɛm, go bi Jiova in pikin dɛn na dis wɔl ɛn “dɛn go fri, lɛkɛ aw Gɔd in pikin dɛn dɔn fri.” (Lɛta Fɔ Rom 8:​21) So lɛ wi ɔl sho di kayn lɔv we go ɛnkɔrej ɛn ɛp wi ɛn ɔda pipul dɛn fɔ de na Gɔd in nyu wɔl.