1-2. Akɔdin to Sam 34:8 (NWT), wetin wi fɔ du fɔ lan bɔt Jiova in gudnɛs?

IMAJIN se dɛn gi yu sɔntin fɔ it we yu nɔ wande tes. Yu go lan sɔntin bɔt di it we yu luk am, smɛl am, aks bɔt wetin dɛn yuz fɔ kuk am, ɔ we yu aks ɔda pipul dɛn if dɛn lɛk am. Bɔt fɔ mek yu rili no if yu go lɛk am, na we yu tes am fɔ yusɛf.

² Wi kin ebul fɔ lan sɔntin bɔt Jiova in gudnɛs we wi rid di Baybul ɛn wi pɔblikeshɔn dɛn, ɛn we wi yɛri ɔda pipul dɛn de tɔk bɔt di gud tin dɛn we Jiova dɔn du fɔ dɛn. Bɔt wi go ɔndastand fayn fayn wan aw Jiova gud we wi “tes” in gudnɛs fɔ wisɛf. (Rid Sam 34:8, NWT.) Lɛ wi tɔk bɔt wan ɛgzampul bɔt aw wi go du dat. Sɔntɛm wi go want fɔ yuz ɔl wi tɛm na di prichin wok, bɔt fɔ mek wi go rich da gol de, wi nid fɔ liv simpul layf. Sɔntɛm wi dɔn rid bɔku tɛm bɔt di prɔmis we Jizɔs bin se if wi put di Kiŋdɔm fɔs, Jiova go gi wi ɔl di tin dɛn we wi nid, bɔt wi nɔ ɛva si Jiova du dat fɔ wi. (Mat. 6:33) Bɔt bikɔs wi gɛt fet pan Jizɔs in prɔmis, wi de tray nɔ fɔ spɛn bɔku mɔni, wi de mek ajɔstmɛnt dɛn pan wi wok, ɛn wi de du mɔ na di prichin wok. We wi du dat, wi go si se Jiova de rili kia fɔ di tin dɛn we wi nid. Wi de “tes” Jiova in gudnɛs fɔ wisɛf.

3. Akɔdin to wetin de na Di Sam Dɛm 16:1, 2, udat dɛn Jiova de du gud to?

³ Jiova “gud to ɔlman,” ivin di wan dɛn we nɔ sabi am. (Sam 145:9; Mat. 5:45) Bɔt i kin du bɔku gud tin  dɛn mɔ fɔ di wan dɛn we lɛk am ɛn we de du ɔl wetin dɛn ebul fɔ sav am. (Rid Di Sam Dɛm 16:1, 2.) Lɛ wi tɔk bɔt sɔm gud tin dɛn we Jiova dɔn du fɔ wi.

4. Aw Jiova de sho in gudnɛs to di wan dɛn we dɔn bigin fɔ kam nia am?

⁴ Ɛnitɛm we wi du wetin wi de lan frɔm Jiova, wi de si aw i de ɛp wi. Fɔ ɛgzampul, we wi bin lan mɔ bɔt am ɛn stat fɔ lɛk am, i bin ɛp wi fɔ stɔp fɔ tink ɛn du tin dɛn we i nɔ gri wit. (Kol. 1:21) Ɛn we wi bin gi wi layf to Jiova ɛn baptayz, i gi wi bɔku gud tin dɛn, lɛk klin kɔnshɛns ɛn tayt padi biznɛs wit am.—1 Pit. 3:21.

5. Aw wi dɔn si Jiova in gudnɛs na wi prichin wok?

⁵ Wi de kɔntinyu fɔ si Jiova in gudnɛs we wi de du di prichin wok. Yu na pɔsin we de shem? Bɔku pan Jiova in pipul dɛn de shem. Sɔntɛm bifo yu kam fɔ bi wan pan Jiova in savant dɛn, yu nɔ ɛva imajin se yu go go nak na pɔsin in domɔt we yu nɔ wande sabi fɔ tɔk to am bɔt di Baybul. Bɔt tide, yu de du dat ɔltɛm. Ɛn Jiova dɔn ivin ɛp yu fɔ ɛnjɔy di prichin wok. Jiova dɔn ɛp yu bak ɔda we dɛn. I dɔn ɛp yu fɔ mek yu nɔ wɔri we pɔsin we yu prich to nɔ tɔk to yu fayn. I dɔn ɛp yu bak fɔ mɛmba di rayt skripchɔ dɛn fɔ yuz we pɔsin want fɔ lisin to yu. Ɛn i dɔn gi yu di trɛnk fɔ kɔntinyu fɔ prich ivin we pipul dɛn nɔ want fɔ lisin to yu.—Jɛr. 20:7-9.

6. Aw di trenin we Jiova de gi wi de sho se i gud?

⁶ Jiova dɔn sho wi bak se i gud bay we i de tren wi fɔ du di prichin wok. (Jɔn 6:45) Na di mitin we wi kin gɛt insay di wik, wi kin lisin to gud ɛgzampul dɛn bɔt wetin wi fɔ se we wi de prich to ɔda pipul dɛn, ɛn dɛn de ɛnkɔrej wi fɔ yuz dɛn ɛgzampul dɛn de we wi de prich. Fɔs, sɔntɛm wi go fred fɔ tray nyu tin, bɔt we wi du dat, wi go kam fɔ si se dɛn nyu we dɛn de, de wok fayn na wi tɛritri. Dɔn bak, dɛn kin ɛnkɔrej wi na mitin ɛn kɔnvɛnshɔn fɔ tray nyu we dɛn fɔ prich we sɔntɛm wi nɔ wande tray yet. Sɔntɛm dis bak go mek wi fred, bɔt we wi tray dɛn nyu we dɛn ya, Jiova go blɛs wi. Naw, wi de kam lan bɔt sɔm pan di gud tin dɛn we Jiova go gi wi we wi abop pan am ɛn tray nyu we dɛn fɔ gi am wi bɛst, ilɛk wetin de apin to wi. Dɔn wi go tɔk bɔt aw wi go rich wi gol dɛn.

7. Us blɛsin wi go gɛt we wi tray tranga wan fɔ du mɔ na di prichin wok?

⁷Wi de kam nia Jiova mɔ ɛn mɔ. Lɛ wi tɔk bɔt wan ɛlda we nem Samiɛl * in ɛgzampul, we de sav wit in wɛf na Kolombia. Dis brɔda wit in wɛf bin de ɛnjɔy fɔ payɔnia na dɛn kɔngrigeshɔn, bɔt dɛn bin want fɔ du mɔ na di prichin wok bay we dɛn go ɛp kɔngrigeshɔn usay nid rili de. Fɔ mek dɛn go ebul fɔ rich da gol de, dɛn bin nid fɔ mek sɔm sakrifays dɛn. Samiɛl se: “Wi fala wetin Matyu 6:33 se ɛn stɔp fɔ bay tin dɛn we wi nɔ nid. Bɔt di tin we bin at fɔ lɛ wi du, na fɔ lɛf wi os. Dɛn bin bil am jɔs di we aw wi want am, ɛn wi nɔ bin o ɛni mɔni fɔ am.” We dɛn go na di nyu kɔngrigeshɔn, dɛn nɔ bin nid bɔku mɔni lɛk trade. Samiɛl se: “Wi dɔn si  aw Jiova de gayd wi we wi de disayd fɔ du sɔntin, ɛn aw i de ansa wi prea dɛn. Wi de si se Jiova gladi fɔ wi, ɛn wi de fil in lɔv di kayn we aw wi nɔ ɛva fil am trade.” Yu tink se we dɛn de we yu go ebul du mɔ na yu prichin wok? If yu ebul fɔ du dat, no se yu go kam nia Jiova mɔ ɛn mɔ, ɛn i go kia fɔ wetin yu nid.—Sam 18:25.

8. Wetin yu lan frɔm wetin Ivan ɛn Viktoria se?

⁸Wi de gɛt mɔ gladi-at na wi savis. Notis wetin wan brɔda ɛn in wɛf we nem Ivan ɛn Viktoria we de sav as payɔnia na Kirgistan bin se. Dɛn bin disayd fɔ liv simpul layf so dat dɛn go ebul fɔ vɔlɔntia fɔ ɛni asaynmɛnt, lɛk bildin projɛkt dɛn. Ivan se: “Wi bin de wok tranga wan pan ɛni wok we dɛn gi wi. Pan ɔl we wi bin de taya we di de dɔn, wi bin gladi bikɔs wi no se wi dɔn yuz wi trɛnk fɔ wok tranga wan fɔ Jiova. Wi bin gladi bak bikɔs wi mek bɔku nyu padi dɛn, ɛn wi gɛt bɔku fayn ɛkspiriɛns dɛn.”—Mak 10:29, 30.

9. Wetin wan sista we gɛt prɔblɛm dɔn du fɔ mek i go ebul fɔ du mɔ na di prichin wok, ɛn wetin na di rizɔlt?

⁹ Wi kin gɛt gladi-at na Jiova in savis ivin we tin nɔ izi fɔ wi. Fɔ ɛgzampul, wan ol sista we nem Mirɛ we in man dɔn day na Wɛst Afrika, na bin dɔktɔ. We i bin ritaya, i stat fɔ payɔnia. Mirɛ gɛt wan sik we dɛn kɔl atraytis, we de mek i nɔ izi fɔ am fɔ waka, ɛn na jɔs wan awa nɔmɔ i kin spɛn we i de prich frɔm os to os. Bɔt i ebul fɔ spɛn bɔku tɛm we i de prich wit kat. I gɛt bɔku ritɔn visit ɛn Baybul stɔdi dɛn; i de stɔdi sɔm pan dɛn tru fon. Wetin bin mek Mirɛ want fɔ du mɔ fɔ Jiova? I se: “A rili lɛk Jiova ɛn Krays Jizɔs. Ɛn a de pre ɔltɛm fɔ mek Jiova ɛp mi fɔ du di bɛst we a ebul na in savis.”—Mat. 22:36, 37.

10. Akɔdin to 1 Pita 5:10, wetin Jiova kin du fɔ di wan dɛn we disayd fɔ du mɔ fɔ sav am?

¹⁰Wi de gɛt mɔ trenin frɔm Jiova. Wan brɔda we nem Kɛni, we de sav as payɔnia na Mɔrishɔs, bin kam fɔ si se dis na tru. We i bin lan di trut, i lɛf yunivasiti, i baptayz, ɛn stat fɔ sav as rɛgyula payɔnia. I se, “A tray fɔ bi lɛk di prɔfɛt Ayzaya we se: ‘Luk mi! Sɛn mi.’” (Ayz. 6:8) Kɛni dɔn ɛp pan bɔku bildin projɛkt dɛn, ɛn i dɔn ɛp bak fɔ translet wi pɔblikeshɔn dɛn insay in langwej. Kɛni se, “A bin gɛt trenin we ɛp mi fɔ sabi du mi wok dɛn.” Bɔt i nɔ jɔs lan aw fɔ du in wok. I kɔntinyu fɔ tɔk se, “A lan bak bɔt tin dɛn we at fɔ mi fɔ du ɛn kwaliti dɛn we a nid fɔ gɛt so dat a go ebul du mɔ fɔ Jiova ɛn mi brɔda dɛn.” (Rid 1 Pita 5:10.) Sɔntɛm, yusɛf kin mek sɔm ajɔstmɛnt dɛn so dat Jiova go tren yu mɔ we dɛn.

11. Wetin sɔm sista dɛn na Sawt Koria bin du fɔ mek dɛn go ebul fɔ prich, ɛn wetin na bin di rizɔlt? (Luk di pikchɔ na di frɔnt pej.)

¹¹ Ivin pipul dɛn we dɔn bi Jiova Witnɛs fɔ lɔng tɛm nid trenin we dɛn de tray nyu we fɔ sav Jiova. Insay di COVID-19 pandɛmik, di ɛlda dɛn na wan kɔngrigeshɔn insay Sawt Koria bin rayt se: “Sɔm pan di wan dɛn we bin tink se dɛn nɔ go ebul ɛp pan di prichin wok bikɔs ɔf dɛn wɛlbɔdi prɔblɛm, naw de prich tru vidio kɔl. Tri sista dɛn we dɔn pas 80 ia bin lan aw fɔ yuz kɔmpyuta fɔ  du dis, ɛn naw dɛn de prich ɔlmost ɛvride.” (Sam 92:14, 15) Yu go lɛk fɔ du mɔ na di prichin wok ɛn tes Jiova in gudnɛs mɔ? Lɛ wi tɔk bɔt sɔm tin dɛn we yu go du we go ɛp yu fɔ rich da gol de.

12. Wetin Jiova prɔmis fɔ du fɔ di wan dɛn we abop pan am?

¹²Lan fɔ abop pan Jiova. I prɔmis wi se i go du bɔku gud tin dɛn fɔ wi we wi abop pan am ɛn gi am wi bɛst. (Mal. 3:10) Wan sista we nem Fabiola, we de na Kolombia bin si aw Jiova du dis fɔ am. I bin want fɔ sav as rɛgyula payɔnia jɔs afta i baptayz. Bɔt i bin nid fɔ wok fɔ ɛp fɔ sɔpɔt in famili. Bɔt we tɛm bin rich fɔ lɛ i ritaya, i pre to Jiova wit ɔl in at fɔ mek I ɛp am. I se: “Pipul dɛn kin gɛt fɔ wet fɔ lɔng tɛm bifo dɛn bigin gɛt dɛn pɛnshɔn, bɔt a bigin gɛt mi yon jɔs wan mɔnt afta a aplay fɔ am. I bin tan lɛk mirekul!” Tu mɔnt leta, i stat fɔ payɔnia. Naw, Fabiola dɔn pas 70 ia, ɛn i dɔn de payɔnia pas 20 ia. Insay dɛn tɛm dɛn de, i dɔn ɛp et pipul dɛn fɔ baptayz. I se: “Pan ɔl we sɔntɛnde a kin fil wik, Jiova de ɛp mi ɛvride fɔ kɔntinyu fɔ payɔnia.”

13-14. Us ɛgzampul dɛn go ɛp wi fɔ abop pan Jiova ɛn tray fɔ du mɔ fɔ sav am?

¹³Lan frɔm di ɛgzampul dɛn bɔt pipul dɛn we abop pan Jiova. Di Baybul gɛt bɔku ɛgzampul dɛn bɔt pipul dɛn we wok tranga wan fɔ sav Jiova. Bɔku  ɛgzampul dɛn de bɔt aw Jiova blɛs dɛn afta we dɛn du sɔntin we sho se dɛn abop pan am. Fɔ ɛgzampul, na afta Ebraam lɛf in os, “pan ɔl we i nɔ no usay i de go,” na in Jiova bin blɛs am. (Ibru. 11:8) Na afta Jekɔb fɛt wit di enjɛl, na in i gɛt spɛshal blɛsin. (Jɛn. 32:24-30) We di Izrɛlayt dɛn bin want fɔ go na di Prɔmis Land, na afta di prist dɛn put dɛn fut insay di Jɔdan Riva, na da tɛm de di wata bin stɔp fɔ flo, ɛn di pipul dɛn ebul fɔ krɔs.—Jɔs. 3:14-16.

¹⁴ Yu kin lan bak frɔm Jiova Witnɛs dɛn insay wi yon tɛm we abop pan Jiova ɛn tray fɔ du mɔ fɔ sav am. Fɔ ɛgzampul, wan brɔda we nem Paytin ɛn in wɛf we nem Dayana, bin de ɛnjɔy fɔ rid bɔt brɔda ɛn sista dɛn we dɔn du mɔ fɔ sav Jiova, lɛk di wan dɛn we dɛn tɔk bɔt na di atikul dɛn we gɛt di taytul, “They Offered Themselves Willingly.” * Paytin se: “We wi rid bɔt dɛn ɛkspiriɛns, wi bin fil lɛk se wi de wach pɔsin we de ɛnjɔy swit it. Di mɔ we wi de wach, na di mɔ wi want fɔ ‘tes ɛn si se Jiova gud.’” Leta, Paytin ɛn Dayana bin go sav usay di nid bin de. Yu dɔn rid dɛn atikul dɛn de? Ɛn yu dɔn wach di vidio dɛn we gɛt di taytul Witnessing in Isolated Territory—Australia ɛn Witnessing in Isolated Territory—Ireland we de na jw.org? Sɔntɛm dɛn vidio dɛn ya go ɛp yu fɔ luk fɔ we dɛn we yu go du mɔ fɔ sav Jiova.

15. We wi spɛn tɛm wit di rayt pipul dɛn, aw dat go ɛp wi?

¹⁵Spɛn tɛm wit pipul dɛn we go ɛnkɔrej yu fɔ du mɔ fɔ Jiova. I izi fɔ it sɔntin we wi nɔ wande tes yet, we wi de wit ɔda pipul dɛn we de ɛnjɔy am. Semweso, if wi de spɛn tɛm wit di wan dɛn we de put Jiova fɔs na dɛn layf, dat go ɛp wi fɔ luk fɔ we dɛn fɔ du mɔ fɔ sav Gɔd. Na dis bin apin to wan brɔda we nem Kɛnt ɛn in wɛf, Vɛronika. Kɛnt se: “Wi padi ɛn fambul dɛn bin ɛnkɔrej wi fɔ tray nyu we dɛn fɔ sav Jiova. Wi bin kam fɔ no se we wi spɛn tɛm wit di wan dɛn we de put di Kiŋdɔm fɔs, wi bin gɛt kɔnfidɛns fɔ tray nyu tin.” Kɛnt ɛn Vɛronika naw de sav as spɛshal payɔnia na Sabia.

16. Akɔdin to Jizɔs in parebul na Lyuk 12:16-21, wetin mek wi fɔ rɛdi fɔ mek sakrifays dɛn?

¹⁶Mek sakrifays dɛn fɔ Jiova. Wi nɔ nid fɔ lɛf ɔl wetin wi de ɛnjɔy fɔ mek Jiova gladi. (Ɛkli. 5:19, 20) Bɔt if wi disayd nɔ fɔ du mɔ na Jiova in savis jɔs bikɔs wi nɔ want fɔ giv-ɔp sɔm tin dɛn we wi lɛk, wi go mek di sem mistek lɛk di man na Jizɔs in parebul we wok tranga wan fɔ gɛt bɔku tin dɛn, bɔt nɔ bin want fɔ no bɔt Gɔd. (Rid Lyuk 12:16-21.) Wan brɔda we nem Kristian, we de na Frans, bin se, “A nɔ bin de gi mi bɛst pan mi tɛm ɛn trɛnk fɔ Jiova ɛn mi famili.” So in ɛn in wɛf disayd fɔ payɔnia. Bɔt fɔ mek dɛn go rich da gol de, dɛn bin gɛt fɔ lɛf dɛn wok. Fɔ sɔpɔt dɛnsɛf, dɛn stat fɔ klin pipul dɛn os dɛn, ɛn dɛn lan fɔ gɛt gladi-at wit di smɔl mɔni we dɛn bin de gɛt. Fɔ se dɛn bin gladi we dɛn  bin giv-ɔp sɔm tin dɛn so dat dɛn go payɔnia? Kristian se, “Naw, wi de ɛnjɔy di prichin wok mɔ, ɛn wi gladi fɔ si we wi Baybul studɛnt ɛn ritɔn visit dɛn de lan bɔt Jiova.”

17. Wetin bin ɛp wan sista fɔ tray nyu we fɔ prich?

¹⁷Rɛdi fɔ tray nyu we dɛn fɔ sav Jiova. (Akt 17:16, 17; 20:20, 21) Wan payɔnia sista we nem Shali, we de na Amɛrika, bin gɛt fɔ ajɔst di we aw i de prich insay di COVID-19 pandɛmik. Fɔs, i nɔ bin want fɔ tray tɛlifon witnɛsin. Bɔt afta i gɛt trenin we dɛn bin gɛt sakit visit, i bigin fɔ yuz tɛlifon fɔ prich ɔltɛm. I se: “We a bigin, a bin de fred, bɔt naw a de rili ɛnjɔy am. Naw, wi de ebul fɔ prich to mɔ pipul dɛn pas we wi bin de prich frɔm os to os.”

18. Wetin go ɛp wi if sɔntin mek i nɔ izi fɔ lɛ wi du mɔ na wi prichin wok?

¹⁸Sɛt gol ɛn tray fɔ rich am. We wi kin gɛt prɔblɛm dɛn, wi kin pre lɛ Jiova ɛp wi, ɛn wi kin tek tɛm tink bɔt wetin wi fɔ du bɔt wi prɔblɛm dɛn. (Prɔv. 3:21) Sonia, we de sav as rɛgyula payɔnia na wan Romani langwej grup na Yurop bin se: “A lɛk fɔ rayt mi gol na pepa ɛn put di pepa say we a go de si am izi wan. A drɔ tu rod dɛn we de go difrɛn say dɛn ɛn put am na mi tebul. Ɛnitɛm we a nid fɔ disayd sɔntin, a kin luk di tu rod dɛn ɛn tink if di tin we a go disayd go ɛp mi fɔ rich mi gol ɔ if i nɔ go ɛp mi.” Sonia de tray fɔ tink di rayt we bɔt in prɔblɛm dɛn. I se, “A gɛt fɔ disayd if a go si di tin dɛn we kin chenj na mi layf lɛk wɔl we de stɔp mi fɔ mek a nɔ rich mi gol ɔ lɛk brij we de ɛp mi fɔ rich am.”

19. Wetin wi want fɔ du?

¹⁹ Jiova de blɛs wi bɔku we dɛn. Wi go ebul sho se wi rili gladi fɔ dɛn in blɛsin dɛn de bay we wi de du ɔl wetin wi ebul fɔ briŋ prez to am. (Ibru. 13:15) Sɔntɛm wi go ebul fɔ du bɔku difrɛn tin dɛn fɔ sav Jiova. Ɛn sɔntɛm dat go ivin mek Jiova blɛs wi mɔ ɛn mɔ. So lɛ wi luk fɔ we dɛn ɛvride fɔ “tes ɛn si se Jiova gud.” Da tɛm de, wi go tan lɛk Jizɔs we bin se: “Mi it na fɔ du wetin di Wan we sɛn mi want ɛn fɔ dɔn in wok.”—Jɔn 4:34.