1. Aw wi de bɛnifit we wi de tɔk bɔt aw wi kam na “di trut”?

 “AW YU kam fɔ no di trut?” Wan dawt nɔ de se yu dɔn ansa da kwɛstyɔn de bɔku tɛm. Na wan pan di fɔs kwɛstyɔn dɛn we wi kin aks wi brɔda ɛn sista dɛn we wi want fɔ no dɛn gud gud wan. Wi kin rili lɛk fɔ yɛri bɔt aw wi brɔda ɛn sista dɛn kam fɔ no ɛn lɛk Jiova, ɛn wi kin ɛnjɔy fɔ tɛl dɛn wetin di trut min to wi. (Rom. 1:​11) Dɛn tin dɛn ya we wi kin tɔk wit wi brɔda ɛn sista dɛn de ɛp wi fɔ rili tink bɔt aw di trut valyu to wi. Dɔn i de ɛp wi fɔ lɛ wi mekɔp wi maynd mɔ fɔ “kɔntinyu fɔ de na di trut,” dat na fɔ lɛ wi kɔntinyu fɔ liv wi layf di we we go mek Jiova blɛs wi ɛn gladi fɔ wi.—3 Jɔn 4.

2. Wetin wi go tɔk bɔt insay dis atikul?

² Insay dis atikul, wi go tɔk bɔt sɔm rizin dɛn we mek wi lɛk di trut. Dɔn wi go tɔk bɔt aw wi go kɔntinyu fɔ sho se wi rili lɛk dis gift we gɛt valyu. Dɛn tin dɛn ya we wi go tɔk bɔt go ɛp wi fɔ lɛ wi rili gladi fɔ wetin Jiova dɔn du fɔ wi bay we i briŋ wi kam na di trut. (Jɔn 6:​44) I go ɛp wi bak fɔ lɛ wi rili want fɔ tɛl ɔda pipul dɛn bɔt di trut.

3. Wetin na di men rizin we mek wi lɛk di trut?

³ Wi gɛt bɔku rizin dɛn we mek wi lɛk di trut. Di wan  we impɔtant pas ɔl na dat, wi lɛk Jiova Gɔd, we na di Wan we gi wi di trut. Jiova dɔn yuz in Wɔd di Baybul fɔ lɛ wi kam fɔ no am as di Wan we gɛt pawa pas ɔlman we mek di ɛvin ɛn di wɔl, ɛn as wi Papa we de na ɛvin we rili lɛk ɛn bisin bɔt wi. (1 Pit. 5:​7) Wi no se wi Gɔd ‘gud ɛn de sho masi, i nɔ gɛt shɔtat, in lɔv nɔ de fel, ɛn na PAPA GƆD we pɔsin kin put in op ɛn trɔs pan.’ (Ɛks. 34:​6) Jiova lɛk jɔstis. (Ayz. 61:​8) I kin rili fil am we i de si wi de sɔfa, ɛn i de wet fɔ di tɛm we i go pul ɔl di tin dɛn we de mek wi sɔfa. (Jɛr. 29:​11) Wisɛf de rili wet fɔ da wɔndaful tɛm de! Dat na wan rizin we mek wi rili lɛk Jiova!

4-5. Wetin mek apɔsul Pɔl kɔmpia wi op to ankɔ?

⁴ Wetin na wan ɔda rizin we mek wi lɛk di trut? Di trut de rili bɛnifit wi. Lɛ wi tɔk bɔt wan ɛgzampul. Wan pan di trut we de na di Baybul na di op we wi gɛt fɔ tumara bambay. Fɔ lɛ wi ɔndastand di valyu we da op de gɛt, apɔsul Pɔl bin rayt se: “Dis op we wi gɛt tan lɛk ankɔ fɔ wi layf we de ɛp wi fɔ tinap tranga wan ɛn nɔ gɛt wan dawt.” (Ibru. 6:​19) Jɔs lɛk aw ankɔ de ɛp bot fɔ stɛdi na wata, na so di op we wi gɛt frɔm di Baybul de ɛp wi fɔ mek wi nɔ wɔri we prɔblɛm dɛn mit wi na layf.

⁵ Insay dis kɔntɛks, Pɔl bin de tɔk bɔt di op fɔ go de na ɛvin we di anɔyntɛd Kristian dɛn gɛt we dɛn valyu. Bɔt dɛn wɔd dɛn de, de bak fɔ di Kristian dɛn we gɛt di op fɔ de na Paradays na dis wɔl sote go. (Jɔn 3:​16) Fɔ tru, we wi de lan bɔt di op fɔ de sote go, dat dɔn mek wi layf gɛt minin.

6-7. Aw Ivɔn dɔn bɛnifit we i lan di tru bɔt tumara bambay?

⁶ Tink bɔt wan sista we nem Ivɔn in ɛkspiriɛns. I nɔ mɛn na di trut, ɛn we in na bin pikin i bin de fred day. I mɛmba sɔntin we i bin rid we i nɔ go ɛva fɔgɛt. Di tin we i bin rid na, “As tɛm de go, wi ɔl gɛt fɔ day.” I tɔk se: “Dɛn wɔd dɛn de bin mek a nɔ de slip na nɛt, a bin de tink bɔt di bambay. A bin de tink se, ‘I go mɔs bi se mɔ tin de bɔt layf.’ ‘Wetin mek a de ya?’ A nɔ bin want fɔ day!”

⁷ Leta, we Ivɔn na bin tineja, Jiova Witnɛs dɛn bin prich to am. I tɔk se: “A bigin fɔ biliv se a go ebul gɛt op fɔ de sote go na Paradays na dis wɔl.” We wi sista bin lan di trut, aw dat bin bɛnifit am? I kɔntinyu fɔ tɔk se: “Naw a de slip na nɛt, ɛn a nɔ de wɔri bɔt tumara bambay ɔ day. Fɔ tru, Ivɔn rili lɛk di trut, ɛn i de rili ɛnjɔy fɔ tɛl ɔda pipul dɛn bɔt in op fɔ tumara bambay.—1 Tim. 4:​16.

8-9. (a) Insay wan pan Jizɔs in parabul dɛn, aw wan man bin sho se i rili valyu di tin we i bin fɛn? (b) Aw di trut valyu to yu?

⁸ Wan ɔda Baybul trut na di gud nyuz bɔt Gɔd in Kiŋdɔm. Jizɔs bin kɔmpia di trut bɔt da Kiŋdɔm de to sɔntin we valyu ɛn we ayd. Akɔdin to Matyu 13:​44, Jizɔs bin se: “Di Kiŋdɔm we de na ɛvin tan lɛk tin we gɛt valyu we ayd na wan land we wan man fɛn ɛn ayd am; ɛn bikɔs i gladi, i go sɛl ɔl wetin i gɛt ɛn bay di land.” Notis se di man nɔ bin de luk fɔ di tin we valyu. Bɔt we i bin fɛn am, i bin sakrifays bɔku tin dɛn fɔ mek i go gɛt am. Infakt, i bin sɛl ɔl wetin i gɛt. Wetin mek? Na bikɔs i bin no se da tin de we i bin fɛn rili valyu. I bin valyu pas ɛnitin we i go giv-ɔp.

 ⁹ Na da we de yu de fil bɔt di trut? Wan dawt nɔ de se na da we de yu de fil! Wi no se natin nɔ de na dis wɔl we valyu pas di gladi-at we wi gɛt bikɔs wi de sav Jiova naw, wit di op fɔ gɛt layf we go de sote go tumara bambay ɔnda Gɔd in Kiŋdɔm. Di ɔnɔ we wi gɛt fɔ ɛnjɔy tayt padi biznɛs wit Jiova valyu pas ɛni sakrifays we wi go mek. Di tin we de mek wi gladi pas ɔl, na we wi de “rili mek i gladi.”—Kol. 1:​10.

10-11. Wetin bin muv Maykɛl fɔ mek big chenj dɛn na in layf?

¹⁰ Bɔku pan wi dɔn mek bɔku sakrifays dɛn fɔ mek Jiova go gladi fɔ wi. Sɔm pan wi dɔn lɛf biɛn gud wok dɛn na di wɔl. Ɔda pipul dɛn dɔn stɔp fɔ rɔnata bɔku mɔni ɛn prɔpati. Stil ɔda wan dɛn dɔn chenj di we aw dɛn bin de liv dɛn layf we dɛn lan bɔt Jiova. Na dat Maykɛl bin du. I nɔ bin mɛn na di trut. As yɔŋman, i bin de tren karet. I tɔk se: “I bin rili impɔtant to mi fɔ mek mi bɔdi gɛt fitnɛs ɔltɛm. Sɔntɛnde, a bin de fil se nɔbɔdi nɔ ebul fɔ bit mi.” Bɔt we Maykɛl bin stat fɔ stɔdi di Baybul, i bin lan bɔt aw Jiova de si fɛt-fɛt. (Sam 11:​5) Maykɛl tɔk bɔt di brɔda ɛn in wɛf we bin stɔdi am se: “Dɛn nɔ bin ɛva tɛl mi fɔ lɛf karet; dɛn bin jɔs kɔntinyu fɔ tich mi Baybul trut.”

¹¹ Di mɔ we Maykɛl bin de lan bɔt Jiova, na di mɔ i bin de lɛk Am. Wetin bin tɔch am mɔ na di sɔri-at we Jiova gɛt fɔ di wan dɛn we de wɔship Am. As tɛm de go, Maykɛl bin kam fɔ no se i nid fɔ disayd fɔ du sɔntin we go chenj in layf. I tɔk se: “A bin no se fɔ lɛf karet go bi di tin we tranga fɔ du pas ɛni ɔda tin we a dɔn ɛva du. Bɔt a bin no bak se i go mek Jiova gladi, ɛn a bin biliv tranga wan se di sav we a de sav am valyu pas ɛni sakrifays.” Maykɛl bin no se di trut we i dɔn fɛn rili valyu, ɛn na dat mek i bin rɛdi fɔ mek big chenj dɛn na in layf.—Jems 1:​25.

12-13. Aw di Baybul trut bin ɛp Mayli?

¹² Fɔ sho di valyu we di trut gɛt, di Baybul kɔmpia di trut to lamp we de shayn brayt wan na nɛt. (Sam 119:​105; Ɛfi. 5:​8) Mayli, we de na Azabayjan, rili valyu di ɛp we i dɔn gɛt frɔm Gɔd in Wɔd. I bin mɛn na famili usay ɔlman de na difrɛn rilijɔn. In papa na bin Muslim ɛn in mama na bin Ju. I tɔk se: “Pan ɔl we a nɔ ɛva dawt se Gɔd de, a bin gɛt bɔku kwɛstyɔn dɛn. A bin de wɔnda, ‘Wetin mek Gɔd mek mɔtalman, ɛn wetin mek pɔsin fɔ sɔfa in wan ol layf ɛn afta i day i go bɔn na ɛl faya sote go?’ Bikɔs pipul dɛn se ɔltin we de apin na wetin Gɔd want, a bin de wɔnda, ‘Fɔ se Gɔd jɔs de kɔntrol mɔtalman ɛn ɛnjɔy fɔ si we dɛn de sɔfa?’”

¹³ Mayli bin kɔntinyu fɔ fɛn ansa dɛn to in kwɛstyɔn dɛn. As tɛm de go, i bin bigin fɔ stɔdi di Baybul ɛn i bin kam fɔ bi wan pan Jiova Witnɛs dɛn. I tɔk se: “Di sɛns na di Baybul bin ɛp mi fɔ gɛt mɔ gladi-at. Di tin dɛn we Gɔd in Wɔd ɛksplen klia wan de ɛp mi fɔ gɛt kolat.” Lɛk Mayli, wi ɔl de prez Jiova, “di Wan we pul [wi] na daknɛs ɛn briŋ [wi] na in wɔndaful layt.”—1 Pit. 2:​9.

14. Wetin wi go du fɔ mek wi lɛk di trut mɔ ɛn mɔ? (Luk bak di bɔks we gɛt di taytul, “ Mɔ Tin dɛn fɔ Kɔmpia.”)

¹⁴ Dis na jɔs sɔm pan di ɛgzampul dɛn  we de sho di valyu we di trut gɛt. Wan dawt nɔ de se yu go tink bɔt bɔku ɔda ɛgzampul dɛn. Yu nɔ tink se i go fayn fɔ mek am yu pasɔnal stɔdi projɛkt fɔ fɛn ɔda rizin dɛn we mek wi fɔ lɛk di trut? Di mɔ we wi lɛk di trut, na di mɔ wi go fɛn we dɛn fɔ sho se wi lɛk am.

15. Wetin na wan we we wi go sho se wi lɛk di trut?

¹⁵ Wi go sho se wi lɛk di trut bay we wi de stɔdi di Baybul ɛn pɔblikeshɔn dɛn we de tɔk bɔt di Baybul ɔltɛm. Afta ɔl, ilɛk aw lɔng wi dɔn de na di trut, wi stil gɛt mɔ tin dɛn fɔ lan. Di fɔs Wachtawa magazin we dɛn ɛva mek tɔk se: “Di trut tan lɛk smɔl flawa we de na wildanɛs, ɛn bɔku lay lay tin dɛn we tan lɛk gras de rawnd am ɛn dɛn ɔlmost chok am. Fɔ fɛn am, yu fɔ kɔntinyu fɔ luk. . . . Yu nid fɔ wok tranga wan fɔ gɛt wan. Bɔt yu nɔ fɔ jɔs satisfay wit wan flawa, we na di trut. . . . Tray fɔ gɛda bɔku, tray fɔ luk fɔ mɔ.” I nɔ izi fɔ stɔdi, bɔt yu go bɛnifit we yu tray tranga wan fɔ du dat.

16. Us we fɔ stɔdi de bɛnifit yu? (Prɔvabs 2:​4-6)

¹⁶ Nɔto wi ɔl lɛk fɔ rid ɛn stɔdi. Bɔt  Jiova want wi fɔ ‘kɔntinyu fɔ luk’ ɛn kɔntinyu “fɔ fɛn” so dat wi go ɔndastand di trut mɔ ɛn mɔ. (Rid Prɔvabs 2:​4-6.) We wi tray tranga wan, wi go bɛnifit ɔltɛm. Kɔri bin tɔk se we i de du in pasɔnal Baybul ridin, i kin pe atɛnshɔn pan wan vas. I ɛksplen se: “A de rid ɔl di futnot dɛn, luk ɔl di krɔs rɛfrɛns dɛn, ɛn du mɔ risach. . . . Dis we fɔ stɔdi dɔn ɛp mi fɔ lan bɔku tin dɛn!” Ilɛk wi yuz dis we fɔ stɔdi ɔ ɔda wan, wi de sho se wi valyu di trut we wi yuz wi tɛm ɛn tray tranga wan fɔ stɔdi am.—Sam 1:​1-3.

17. Wetin i min fɔ liv akɔdin to di trut? (Jems 1:​25)

¹⁷ Fɔ tru, wi no se i nɔ jɔs du fɔ stɔdi di trut. Fɔ mek wi go rili bɛnifit, wi fɔ liv akɔdin to di trut, we min se, wi fɔ aplay wetin wi de lan na wi layf. Na da we de nɔmɔ di trut go mek wi gɛt tru tru gladi-at. (Rid Jems 1:​25.) Aw wi go mek shɔ se wi liv akɔdin to di trut? Wan brɔda bin advays se wi fɔ tek tɛm wach wisɛf fɔ si eria dɛn we wi de du wɛl ɛn eria dɛn we wi nid fɔ du mɔ. Apɔsul Pɔl bin put am dis we: “Ilɛk aw wi dɔn go bifo, lɛ wi kɔntinyu fɔ waka di kɔrɛkt we lɛk aw wi dɔn de du.”—Fil. 3:​16.

18. Wetin mek wi fɔ du wi bɛst fɔ “kɔntinyu fɔ de na di trut”?

¹⁸ Jɔs tink bɔt di bɛnifit dɛn we wi de gɛt we wi du wi bɛst fɔ “kɔntinyu fɔ de na di trut”! Wi layf nɔ go jɔs go bifo, bɔt wi go mek Jiova ɛn wi kɔmpin Kristian dɛn gladi. (Prɔv. 27:​11; 3 Jɔn 4) Dis na di bɛst rizin dɛn fɔ lɛk di trut ɛn liv akɔdin to di trut!