Dis agrimɛnt bin mek dɛn gɛt wan nyu ɔganayzeshɔn we dɛn kɔl di League of Nations. Dɛn gol na bin fɔ “mek ɔl di neshɔn dɛn jɔyn-an togɛda ɛn mek pis de ɔlsay ɛn natin nɔ de fɔ fred.” Bɔku lay lay chɔch dɛn bin de sɔpɔt dis nyu ɔganayzeshɔn. Di Federal Council of the Churches of Christ in America bin prez di ɔganayzeshɔn se i “tinap fɔ Gɔd in Kiŋdɔm na dis wɔl.” Dis kansul bin sho se dɛn de sɔpɔt da nyu ɔganayzeshɔn de bay we dɛn bin sɛn pipul dɛn na di Paris Peace Conference. Wan pan dɛn bin tɔk se di kɔnfrɛns na “nyu biginin insay mɔtalman istri na di wɔl.”

Nyu tin bin bigin, bɔt nɔto di man dɛn we bin de pan di pis kɔnfrɛns bin mek dat bi. Insay 1919, Jiova bin gi in pipul dɛn trɛnk fɔ du di prichin wok pas aw dɛn bin de du am trade. Bɔt fɔs, wan big chenj bin nid fɔ apin fɔ di Baybul Studɛnt dɛn.

Dɛn bin disayd fɔ mek di ilɛkshɔn we dɛn kin du wantɛm insay di ia fɔ vot fɔ di dayrɛktɔ dɛn fɔ di Watch Tower Bible and Tract Society Satide, Janwari 4, 1919. Da tɛm de, dɛn bin dɔn put Josɛf F. Rutafɔd we bin de lid Jiova in pipul dɛn ɛn sɛvɛn ɔda brɔda dɛn na prizin na Atlanta, Jɔjia insay Amɛrika fɔ tin we dɛn nɔ du. Bɔt di kwɛstyɔn na dat, Dɛn fɔ vot bak fɔ di brɔda dɛn we de na prizin fɔ tek di lid? Ɔ dɛn fɔ vot fɔ ɔda wan dɛn fɔ tek dɛn ples?

We Brɔda Rutafɔd bin de na prizin, i bin de wɔri bɔt wetin go apin tumara bambay to di ɔganayzeshɔn. I bin no se sɔm brɔda dɛn bin de tink se i go fayn fɔ lɛ dɛn vot fɔ ɔda pɔsin fɔ bi prɛsidɛnt. Dis bin mek i rayt wan lɛta to di pipul dɛn we bin gɛda fɔ di ilɛkshɔn fɔ tɛl dɛn fɔ lɛ dɛn pik Ivanda J. Kawɔd fɔ bi prɛsidɛnt. Brɔda Rutafɔd bin tɔk bɔt Brɔda Kawɔd se na pɔsin we gɛt “kolat,” “gɛt sɛns,” ɛn i nɔ de “kɔmɔt biɛn di Masta.” Bɔt bɔku brɔda dɛn bin want fɔ du difrɛn tin, dat na fɔ push di ilɛkshɔn te afta siks mɔnt. Di lɔya dɛn we bin de tɔk fɔ di brɔda dɛn we bin de na  prizin bin gri wit dat. Bɔt we dɛn bin de tɔk bɔt wetin fɔ du, sɔm brɔda dɛn bin vɛks.

Dɔn sɔntin bin apin we Brɔda Richad Ave Baba bin tɔk se tan lɛk we yu put wata pan faya. Wan pan di brɔda dɛn we bin de de bin grap ɛn tɔk se: “Mi nɔto lɔya, bɔt a no wetin i min fɔ de biɛn pɔsin. Gɔd want wi fɔ de biɛn am. Di bɛst we aw wi go sho se wi de biɛn Gɔd na we wi gɛt ilɛkshɔn ɛn vot bak fɔ Brɔda Rutafɔd fɔ bi prɛsidɛnt.”—Sam 18:​25.

Wan pan di brɔda dɛn we bin de na prizin we nem Alɛgzanda Makmilan bin mɛmba we Brɔda Rutafɔd bin nak na in sɛl di nɛks de afta di ilɛkshɔn ɛn gi am wan lɛta we di brɔda dɛn bin sɛn to Brɔda Rutafɔd fɔ sho di ilɛkshɔn rizɔlt. Makmilan bin no wantɛm wantɛm wetin di lɛta min. Di lɛta bin min se dɛn dɔn vot fɔ ɔl di dayrɛktɔ dɛn bak ɛn Brɔda Josɛf Rutafɔd, ɛn Wiliam Van Ambɔg na ɔfisa dɛn stil. So Brɔda Rutafɔd go kɔntinyu fɔ bi prɛsidɛnt.

We di et brɔda dɛn bin de na prizin, di fetful Baybul Studɛnt dɛn bin aks pipul dɛn fɔ sayn wan lɛta we dɛn rayt to di gɔvmɛnt fɔ beg fɔ lɛ dɛn fri dɛn brɔda dɛn ya. Fɔ aks pipul dɛn we nɔto Baybul Studɛnt dɛn fɔ sayn dis lɛta bin sho se di brɔda ɛn sista dɛn bin rili gɛt maynd. Ɛn i bin pas 700,000 pipul dɛn we bin sayn dis lɛta. Di gɔvmɛnt bin fri Brɔda Rutafɔd ɛn di ɔda brɔda dɛn we bin de tek di lid Wɛnsde, Mach 26, 1919, ivin bifo di brɔda dɛn gi di lɛta.

We Brɔda Rutafɔd bin de tɔk to di wan dɛn we bin wɛlkɔm am, i bin tɔk se: “A biliv tranga wan se dis tin we apin to wi ɔl na fɔ mek wi rɛdi fɔ di siriɔs prɔblɛm dɛn we gɛt fɔ apin. . . . Di fɛt we una fɛt nɔto fɔ lɛ dɛn fri una brɔda dɛn na prizin. Dat nɔto bin di men rizin fɔ ɔl wetin una du. . . . Di men rizin we mek una bin de fɛt na fɔ prez Jiova ɛn di wan dɛn we bin du dat dɔn gɛt wɔndaful blɛsin.”

Di tin dɛn we bin apin to wi brɔda dɛn bin sho klia wan se na Jiova bin de dayrɛkt di we aw tin bin de apin. Me 14, 1919, di apil kɔt bin tɔk se: “Dɛn nɔ bin jɔj di brɔda dɛn we dɛn bin arɛst fia wan pan ɔl we dɛn bin gɛt di rayt fɔ lɛ dɛn du dat fɔ dɛn. So dat bin mek dɛn chenj wetin di kɔt bin disayd.” Dɛn bin arɛst di brɔda dɛn fɔ siriɔs kraym dɛn, ɛn di jɔjmɛnt we dɛn bin mek bin fɔ dɔn lɛf na dɛn rɛkɔd if dɛn bin jɔs sɔri fɔ dɛn ɔ ridyus di tɛm we dɛn bin fɔ spɛn na prizin. Dɛn nɔ bin chaj dɛn fɔ ɛni ɔda tin. Dis bin mek Brɔda Rutafɔd bin kɔntinyu fɔ gɛt di rayt fɔ tɔk fɔ Jiova in pipul dɛn bifo di Suprim Kɔt na Amɛrika, we na tin we i du bɔku tɛm afta we dɛn fri am.

Brɔda Makmilan bin mɛmba se: “Wi nɔ go sidɔm lezi wan ɛn fol an fol fut de wet fɔ lɛ di  Masta kam tek wi fɔ go na ɛvin. Wi bin kam fɔ no se wi fɔ du sɔntin fɔ no wetin di Masta rili want.”

Bɔt di brɔda dɛn we bin de na di ɛdkwata nɔ go jɔs kɔntinyu di wok we dɛn bin dɔn de du fɔ lɔng tɛm. Wetin mek? Na bikɔs we dɛn bin de na prizin, di wan dɛn we bin de mek dɛn sɔfa bin pwɛl ɔl di printin plet dɛn we dɛn bin de yuz fɔ print wi buk ɛn magazin dɛn. Dis bin mek di brɔda dɛn at pwɛl ɛn sɔm pan dɛn bin de wɔnda if di prichin wok dɔn dɔn.

Fɔ se pipul dɛn bin stil want fɔ yɛri di Kiŋdɔm mɛsej we di Baybul studɛnt dɛn bin de prich? Fɔ ansa da kwɛstyɔn de, Brɔda Rutafɔd bin disayd fɔ gi wan tɔk. Dɛn go invayt ɔlman fɔ kam. Brɔda Makmilan bin tɔk se: “If nɔbɔdi nɔ kam na da mitin de, wi go no se di prichin wok dɔn dɔn.”

Ɛn na dat bin apin Sɔnde, Me 4, 1919. Pan ɔl we Brɔda Rutafɔd bin sik siriɔs wan, i bin gi di tɔk we gɛt di taytul “The Hope for Distressed Humanity” insay Lɔs Anjɛlis we de na Kalifonia. Na bin lɛk 3,500 pipul dɛn bin atɛnd di tɔk, bɔt bɔku pan dɛn bin tɔn bak bikɔs di ples bin dɔn fulɔp. Di nɛks de, na 1,500 pipul dɛn bin atɛnd. Di brɔda dɛn bin gɛt ansa to dɛn kwɛstyɔn; pipul dɛn bin want fɔ no mɔ bɔt di Baybul!

Di nɛks tin we di brɔda dɛn bin du bin afɛkt di we aw Jiova Witnɛs dɛn de du di prichin wok te to dis wi yon tɛm.

Di Wach Tawa fɔ Ɔgɔst 1, 1919, bin anawns se ali Sɛptɛmba dɛn go gɛt kɔnvɛnshɔn fɔ ɔlman na Sida Pɔynt, insay Oayo. Wan yɔŋ Baybul Studɛnt we de na Misiri we nem Klarɛns B. Biti bin tɔk se: “Ɔlman bin jɔs fil se dɛn fɔ go di kɔnvɛnshɔn.” I pas 6,000 brɔda ɛn sista dɛn we bin atɛnd di kɔnvɛnshɔn, we pas di nɔmba we dɛn bin de fil se go atɛnd. Wan tin we bin mek di kɔnvɛnshɔn rili fayn na  we di pipul dɛn we bin baptayz bin pas 200 na wan lek we dɛn kɔl Lek Iri we de nia di say we dɛn gɛt di kɔnvɛnshɔn.

Di nɔmba fayv de fɔ di kɔnvɛnshɔn, we na bin Sɛptɛmba 5, 1919, we Brɔda Rutafɔd bin de gi di “Address to Co-laborers,” i bin anawns se dɛn dɔn mek wan nyu magazin we dɛn kɔl The Golden Age. * Dis magazin go “tɔk bɔt nyuz dɛn bɔt impɔtant tin dɛn we de apin, bay we i go ɛksplen frɔm di Baybul wetin mek dɛn impɔtant tin dɛn de apin.”

Dɛn bin ɛnkɔrej ɔl di Baybul Studɛnt dɛn fɔ gɛt maynd we dɛn de prich wit dis nyu magazin. Wan lɛta we de sho aw dɛn bin ɔganayz di wok bin tɔk se: “Lɛ ɔlman we dɔn baptayz mɛmba se na big ɔnɔ dɛn gɛt fɔ sav, ɛn dɛn fɔ yuz dis chans naw ɛn du ɔl wetin dɛn ebul fɔ prich to di pipul dɛn na di wɔl.” Bɔku brɔda ɛn sista dɛn bin gri fɔ prich! Bay Disɛmba, brɔda ɛn sista dɛn we bin de prich wit zil bin dɔn gɛt pas 50,000 pipul dɛn we bin aks fɔ di nyu magazin.

Let insay 1919, Jiova in pipul dɛn bin ɔganayz dɛnsɛf bak ɛn dɛn bin gɛt mɔ trɛnk. Apat frɔm dat, bɔku impɔtant prɔfɛsi dɛn we gɛt sɔntin fɔ du wit di las dez bin dɔn apin. Di tɛst we dɛn tɛst Gɔd in pipul dɛn ɛn di klin we Jiova bin klin dɛn, we Malakay 3:​1-4 tɔk bɔt bin dɔn dɔn, Jiova in pipul dɛn bin dɔn fri frɔm “Babilɔn di Gret,” ɛn Jizɔs dɔn pik “di slev we fetful ɛn gɛt sɛns.” * (Rɛv. 18:​2, 4, NW; Mat. 24:​45, NW) Naw di Baybul Studɛnt dɛn bin rɛdi fɔ di wok we Jiova bin want dɛn fɔ du.