Bikɔs mɔ pipul dɛn bin de prich, di brɔda ɛn sista dɛn bin nid mɔ pɔblikeshɔn dɛn. Na di brɔda dɛn na Bruklin Bɛtɛl bin de mek di magazin dɛn, bɔt dɛn bin stil de yuz kɔmni dɛn we de du printin wok fɔ print dɛn buk dɛn. Wan tɛm, di kɔmni nɔ bin ebul fɔ print bɔku buk dɛn fɔ sɔm mɔnt we di brɔda dɛn go yuz na di prichin wok. So Brɔda Rutafɔd bin aks Rɔbɔt Matin, di brɔda we na bin di faktri maneja, if i go pɔsibul fɔ lɛ dɛn print dɛn yon buk dɛn.

We Brɔda Matin bin de mɛmba wetin bin apin da tɛm de, i bin se: “Dat na bin wɔndaful aydia bikɔs i min se wi go opin faktri fɔ mek wi yon buk dɛn fɔ wisɛf.” So di brɔda dɛn bin rɛnt wan ples na 18 Kɔnkɔd Strit na Bruklin, ɛn dɛn bin ebul fɔ gɛt di tin dɛn we dɛn nid.

Bɔt nɔto ɔlman bin gladi we di brɔda dɛn go stat fɔ print dɛn yon buk dɛn fɔ dɛnsɛf. Di prɛsidɛnt na wan kɔmni we bin de print wi buk dɛn bin go na di nyu faktri. I tɔk se: “Una gɛt fayn tin dɛn we una go yuz fɔ print di buk dɛn, bɔt nɔbɔdi nɔ sabi aw fɔ yuz dɛn. Insay siks mɔnt, una go pwɛl ɔl dɛn tin dɛn ya.”

Brɔda Matin se: “I tan lɛk se wetin i tɔk na tru; bɔt wi bin no se Jiova go ɛp wi, ɛn na dat i du.” Brɔda Matin bin kɔrɛkt. Insay shɔt tɛm, dɛn bin de print 2,000 buk dɛn ɛvride na di nyu printin faktri.

Apat frɔm we Jiova in pipul dɛn bin de print sɔm pan dɛn buk dɛn fɔ dɛnsɛf, dɛn bigin yuz wan nyu we fɔ prich di gud nyuz, we na tru di redio. Sɔnde aftanun,  Fɛbwari 26, 1922, Brɔda Rutafɔd bin tɔk na redio fɔ di fɔs tɛm. I bin gi di tɔk we gɛt di taytul “Millions Now Living Will Never Die” na di redio steshɔn we nem KOG na Lɔs Anjɛlis, Kalifonia, insay Amɛrika.

Na lɛk 25,000 pipul dɛn bin lisin to di program. Sɔm pan dɛn bin sɛn lɛta fɔ tɛl Brɔda Rutafɔd tɛnki fɔ di redio program. Wan pan di pipul dɛn we bin sɛn di lɛta na Wiliam Ashfɔd, we bin de na Santa Ana, insay Kalifonia. I bin tɛl Brɔda Rutafɔd tɛnki fɔ di tɔk we bin “swit fɔ lisin ɛn we bin rili intrɛstin.” I tɔk bak se: “Tri pipul dɛn de na mi os we sik ɛn dɛn nɔ ebul fɔ lɛf os. If nɔto fɔ dis redio program, wi nɔ bin fɔ ebul lisin to yu ilɛksɛf yu de tɔk na di os we de nia wi.”

Dɛn bin gi mɔ tɔk dɛn na redio afta da fɔs wik de. Bay di tɛm di ia de dɔn, Di Wach Tawa bin se “na lɛk 300,000 pipul dɛn bin dɔn yɛri di mɛsej na redio.”

Di lɛta dɛn ɛn tin dɛn we pipul dɛn bin tɔk bin ɛnkɔrej di Baybul Studɛnt dɛn, so dɛn bin disayd fɔ bil wan redio steshɔn na wan land we bin de na Stetin Ayland, we nɔ bin de fa frɔm Bruklin Bɛtɛl. Insay di ia dɛn afta 1922, di Baybul Studɛnt dɛn bin yuz dis steshɔn we na WBBR, fɔ mek di Kiŋdɔm mɛsej rich bɔku pipul dɛn na bɔku ples dɛn.

Di Jun 15, 1922, Wach Tawa bin anawns se di Baybul Studɛnt dɛn go gɛt wan jɛnɛral kɔnvɛnshɔn na Sida Pɔynt, Oayo, frɔm Sɛptɛmba 5 to 13, 1922. Di Baybul Studɛnt dɛn bin rili gladi we dɛn bin rich na Sida Pɔynt.

We Brɔda Rutafɔd bin de gi in fɔs tɔk, i bin se: “A biliv tranga wan se di Lɔd go . . . blɛs dis kɔnvɛnshɔn ɛn mek shɔ se wi prich pas aw wi dɔn ɛva prich na di wɔl.” Di spika dɛn bin de ɛnkɔrej di brɔda ɛn sista dɛn fɔ prich.

Dɔn Frayde, Sɛptɛmba 8, na lɛk 8,000 pipul dɛn bin de na di ɔl, ɛn dɛn bin rili gladi fɔ lisin to Brɔda Rutafɔd in tɔk. Dɛn bin de op se i go ɛksplen wetin di “ADV” we rayt na dɛn inviteshɔn min. We dɛn bin de sidɔm, bɔku pan dɛn bin notis di big bana we bin  de ɔp di stej. Atɔ Klaws, we bin kɔmɔt na Tulsa, Oklaoma, insay Amɛrika fɔ kam atɛnd di kɔnvɛnshɔn, bin ebul fɔ fɛn sit usay i go ebul fɔ yɛri di tɔk fayn. I nɔ bin izi fɔ am bikɔs dɛn tɛm dɛn de mayk ɔ spika dɛn nɔ bin de.

Fɔ mek nɔbɔdi nɔ go ambɔg di tɔk, di chiaman bin anawns se dɛn nɔ go alaw ɛnibɔdi we dɔn let fɔ kam insay di ɔl we Brɔda Rutafɔd de gi in tɔk. So 9:​30 da mɔnintɛm de, Brɔda Rutafɔd bin stat bay we i kot wetin Jizɔs bin tɔk na Matyu 4:​17 we se: “Di kiŋdɔm na ɛvin de nia.” (King James Version) We Brɔda Rutafɔd bin de tɔk bɔt aw pipul dɛn go yɛri bɔt dis Kiŋdɔm, i bin se: “Jizɔs insɛf sɛf bin tɔk se di tɛm we i go de wit wi, i go du wan avɛst wok ɛn i go gɛda in pipul dɛn we de kɔntinyu fɔ de biɛn am.”

Brɔda Klaws, we bin sidɔm na di men ɔl, tɔk se: “Wi bin de tek tɛm lisin to ɔl di wɔd dɛn we i bin de tɔk.” Bɔt insay shɔt tɛm, Brɔda Klaws bigin fil sik. I bin gɛt fɔ lɛf di ɔl pan ɔl we i nɔ bin want fɔ go bikɔs i no se dɛn nɔ go alaw am fɔ kam insay bak we Brɔda Rutafɔd de tɔk.

Afta smɔl tɛm, i bigin fil bɛtɛ. I se we i bin de go bak na di ɔl, i yɛri dɛn de klap lawd wan. Dat bin mek i rili gladi! So i disayd se i go mɔs yɛri dis fayn fayn tɔk ivin if dat min se i go nid fɔ klem ɔp di ruf. Brɔda Klaws we na yɔŋman we bin ol 23 ia da tɛm de, bin fɛn we fɔ klem ɔp di ruf! Di winda ɔp di ruf bin opin, ɛn as i bin de rich nia de, i bin kam fɔ si se i go ebul fɔ “yɛri di tɔk fayn fayn wan.”

Bɔt nɔto Atɔ nɔmɔ bin de ɔp di ruf, sɔm pan in padi dɛn bin de de. Wan pan dɛn we nem Frank Jɔnsin, bin go mit am ɛn aks am se, “Yu gɛt shap pɔkit nɛf?”

Atɔ ansa am se, “Yɛs, a gɛt.”

 Dɔn Frank se, “Yu na di ansa to wi prea. Yu si dis big tin we rol na ya? Na bana we dɛn tay to dɛn nel dɛn ya. Lisin fayn to di Jɔj. * As yu yɛri i tɔk se, ‘ɛn una fɔ advatayz, advatayz,’ kɔt dɛn 4 rop dɛn ya.”

So Atɔ bin ol in nɛf, ɛn wet wit in padi dɛn fɔ yɛri we Brɔda Rutafɔd go tɔk di wɔd dɛn we go bi di sayn fɔ lɛ dɛn kɔt di rop dɛn. I nɔ te, Brɔda Rutafɔd bin rich di men pat na in tɔk. Brɔda Rutafɔd bin rili gladi ɛn i bin gɛt zil. Dɔn bak i go bi se i bin ɔlmost de ala we i de se: “Una sho se una na fetful ɛn tru witnɛs dɛn fɔ di Lɔd. Una kɔntinyu fɔ fɛt te dɛn dɔnawe wit Babilɔn kpatakpata. Una prich di mɛsej ɔlsay. Di wɔl fɔ no se Jiova na Gɔd ɛn Jizɔs Krays na Kiŋ fɔ di kiŋ dɛn ɛn Lɔd fɔ di lɔd dɛn. Dis na di de we impɔtant pas ɛni ɔda de. Una luk, di Kiŋ de rul! Na una gɛt di wok fɔ tɛl ɔlman bɔt dis. So una advatayz, advatayz, advatayz, di Kiŋ ɛn Kiŋdɔm!”

Atɔ se in ɛn di ɔda brɔda dɛn bin kɔt di rop dɛn ɛn di bana bin rol go dɔŋ izi wan. So lɛk aw dɛn bin dɔn si ADV na dɛn inviteshɔn, di tin we bin rayt na di bana na: “Advatayz, di Kiŋ ɛn Kiŋdɔm.”

Di kɔnvɛnshɔn na Sida Pɔynt bin ɛp di brɔda dɛn fɔ pe atɛnshɔn pan di impɔtant wok fɔ prich bɔt di Kiŋdɔm, ɛn di wan dɛn we bin rɛdi fɔ du dis wok bin gladi fɔ du am. Wan kɔlpɔtɔ (we wi de kɔl naw payɔnia) we bin de na Oklaoma, insay Amɛrika bin rayt se, “Wi bin de prich na wan eria usay pipul dɛn bin de mayn kol, ɛn dɛn bin rili po.” I tɔk se bɔku tɛm we pipul dɛn bin de yɛri di mɛsej we de na di Golden Age magazin, “dɛn [bin] de bɔs kray.” I bin tɔk bak se, “Wi rili gladi we wi ebul fɔ kɔrej dɛn.”

Dɛn Baybul Studɛnt dɛn ya bin si se di wɔd dɛn we Jizɔs tɔk na Lyuk 10:​2 na tin we dɛn fɔ tek siriɔs. I se: “Di tin dɛn fɔ avɛst bɔku, bɔt di wokman dɛn smɔl.” As di ia de dɔn, dɛn bin mekɔp dɛn maynd mɔ ɛn mɔ fɔ advatayz di Kiŋdɔm mɛsej ɔlsay.