1. Wetin kin apin to wi if wi at pwɛl?

WI ƆL kin gɛt prɔblɛm dɛn ɛvride, bɔt wi kin tray wi bɛst fɔ bia dɛn. Bɔt yu nɔ go gri se i izi mɔ fɔ bia wit prɔblɛm dɛn di tɛm we wi at nɔ pwɛl? So wi nid fɔ si pwɛlat as sɔntin we kin mek wi nɔ gɛt kɔnfidɛns, wi nɔ gɛt maynd, ɛn wi nɔ gɛt gladi-at. Prɔvabs 24:​10 (NWT) se: “If yu at pwɛl di tɛm we yu gɛt prɔblɛm, yu nɔ go gɛt bɛtɛ trɛnk.” Fɔ tru, pwɛlat de mek wi nɔ gɛt trɛnk fɔ bia wit di prɔblɛm dɛn we wi de gɛt na layf.

2. Wetin kin mek wi at pwɛl? Wetin wi go tɔk bɔt insay dis atikul?

² Bɔku tin dɛn kin mek wi at pwɛl; sɔntɛnde i kin bi di we aw wi de fil na wi at, ɔ i kin bi bikɔs ɔf ɔda tin dɛn we de apin to wi. Sɔm pan dɛn tin dɛn de kin bi di mistek dɛn we wi kin mek, di tin dɛn we wi nɔ ebul fɔ du, ɔ bikɔs wi sik. Ɔ wi at kin pwɛl bikɔs wi nɔ gɛt di wok we wi go want fɔ du na Jiova in ɔganayzeshɔn, ɔ bikɔs wi de prich na say we bɔku pipul dɛn nɔ de lisin to wi mɛsej. Insay dis atikul, wi go tɔk bɔt sɔm tin dɛn we wi go du we wi at pwɛl.

3. Wetin go ɛp wi we wi fil bad bɔt wisɛf ɛn wi mistek dɛn?

³ I izi fɔ mek wi fil bad bɔt wisɛf ɛn bɔt di mistek dɛn we wi kin mek. So bikɔs ɔf dat, wi go ivin tink se Jiova nɔ go want wi fɔ de na Paradays. I go rili bad fɔ mek wi tink da kayn we de. So aw wi fɔ fil bɔt wi mistek dɛn? Di Baybul se apat frɔm Jizɔs Krays, ɔl mɔtalman “dɔn sin.” (Rom. 3:​23) Bɔt di Wan we mek dɛn rayt di Baybul nɔto pɔsin we de fɛn fɔlt pan wi, ɛn i nɔ de ɛkspɛkt wi fɔ bi pipul dɛn we pafɛkt. Bifo dat, in na Papa we lɛk wi, i want fɔ ɛp wi,  ɛn i de peshɛnt wit wi. I no se i nɔ izi fɔ bɔku pan wi fɔ du wetin rayt ɛn fɔ lɛ wi lɛf fɔ fil bad bɔt wisɛf, bɔt stil i rɛdi fɔ ɛp wi.—Rom. 7:​18, 19.

4-5. Akɔdin to 1 Jɔn 3:​19, 20, wetin bin ɛp tu sista dɛn we bin de fil bad bɔt dɛnsɛf?

⁴ Tink bɔt Dɛbora ɛn Maria dɛn ɛgzampul. * We Dɛbora bin smɔl, dɛn nɔ bin de trit am fayn, ɛn dat bin de mek i fil bad bɔt insɛf. I nɔ bin izi fɔ mek dɛn prez am fɔ sɔntin we i du. So dat bin mek we i big, i nɔ bin de fil gud bɔt insɛf. Ivin we i kin mek smɔl mistek, i kin fil lɛk i nɔ ebul du ɛnitin di rayt we. Maria insɛf bin gɛt da sem kayn prɔblɛm de. In fambul dɛn bin de mek i shem. Ɛn bikɔs ɔf dat, insɛf bin de tink se in nɔto bɛtɛ pɔsin. Ivin afta we i baptayz, i bin stil de tink se i nɔ fit fɔ bi Jiova Witnɛs.

⁵ Bɔt dɛn tu sista dɛn ya nɔ bin stɔp fɔ sav Jiova. Wetin mek? Wan rizin na bikɔs dɛn bin lɛf ɔltin to Jiova bay we dɛn bin de pre to am wit ɔl dɛn at ɛn tɛl am aw dɛn de fil. (Sam 55:​22) Dɛn bin kam fɔ lan se wi Papa we de na ɛvin we lɛk wi no se di bad tin dɛn we bin dɔn apin to wi kin mek wi fil bad bɔt wisɛf. Bɔt apat frɔm dat, i de si di gud kwaliti dɛn we wi gɛt pan ɔl we wi nɔ de si dɛn kwaliti dɛn de pan wisɛf.—Rid 1 Jɔn 3:​19, 20.

6. Wetin pɔsin go du if i ripit di sem mistek we i bin dɔn mek?

⁶ I go bi se pɔsin de rili tray fɔ lɛf wan patikyula bad abit, bɔt i go mek di sem mistek bak, ɛn dat kin mek in at pwɛl. I nɔmal fɔ mek wi fil bad we wi sin. (2 Kɔr. 7:​10) Bɔt wi nɔ fɔ fil bad pasmak ɛn kɔndɛm wisɛf ɔ ivin tink se: ‘Mi nɔto bɛtɛ pɔsin. Jiova nɔ go ɛva fɔgiv mi.’ Da kayn we de fɔ tink nɔ kɔrɛkt, ɛn i kin mek wi lɛf fɔ sav Jiova. Mɛmba wetin wi bin dɔn rid na Prɔvabs 24:​10 we se wi nɔ go gɛt bɛtɛ trɛnk we wi at pwɛl. So bifo dat, wi fɔ “tɔk di kes” we de bitwin wi ɛn Jiova bay we wi pre to am ɛn beg am fɔ mek i fɔgiv wi. (Ayz. 1:​18, NWT) We i si se yu rili sɔri ɛn yu de tray fɔ chenj, i go fɔgiv yu. Apat frɔm dat, na fɔ go to di ɛlda dɛn. Dɛn go peshɛnt ɛp yu fɔ mek yu gɛt tayt padi biznɛs wit Jiova bak.—Jems 5:​14, 15.

7. Wetin mek wi at nɔ fɔ pwɛl if i nɔ izi fɔ wi fɔ du wetin rayt?

⁷ Na dis wan ɛlda we nem Jen-Luk we de na Frans kin se to di wan dɛn we de fɛt fɔ lɛf bad abit. I kin se: “Pɔsin we de du  wetin rayt na Jiova in yay, nɔto pɔsin we nɔ de ɛva mek mistek, bɔt na pɔsin we de fil bad bɔt di mistek dɛn we i mek ɛn du in bɛst fɔ ripɛnt ɔltɛm.” (Rom. 7:​21-25) So if yu de fɛt fɔ lɛf bad abit, nɔ kɔndɛm yusɛf. Na fɔ mɛmba se bikɔs wi ɔl de mek mistek, wi nid Jiova in spɛshal gudnɛs we i de gi wi tru Jizɔs Krays in day.—Ɛfi. 1:​7; 1 Jɔn 4:​10.

8. We wi at pwɛl, udat go ɛp wi?

⁸ Wi brɔda ɛn sista dɛn na di kɔngrigeshɔn go ɛnkɔrej wi. Dɛn go lisin to wi we wi nid pɔsin fɔ tɔk to, ɛn dɛn go ɛnkɔrej wi fɔ mek wi fil bɛtɛ. (Prɔv. 12:​25; 1 Tɛs. 5:​14) Wan sista we de na Nayjiria we nem Jɔy bin gɛt pwɛlat. I bin se: “A nɔ no wetin a fɔ dɔn du witawt di brɔda ɛn sista dɛn na di kɔngrigeshɔn. Di we aw dɛn brɔda ɛn sista dɛn ya ɛnkɔrej mi na pruf fɔ se Jiova de ansa mi prea dɛn. A dɔn ivin lan frɔm dɛn aw fɔ ɛnkɔrej ɔda brɔda ɛn sista dɛn we gɛt pwɛlat.” Bɔt wi nid fɔ mɛmba se nɔto ɔltɛm wi brɔda ɛn sista dɛn go no we wi nid ɛnkɔrejmɛnt. So sɔntɛnde, wi go nid fɔ go mit wan machɔ brɔda ɔ sista ɛn tɛl am aw wi de fil fɔ mek i ɛp wi.

9. Aw Sam 41:​3 (NWT) ɛn 94:​19, de ɛnkɔrej wi?

⁹ Mek lɛ Jiova sɔpɔt yu. I nɔ kin izi fɔ lɛ wi tink di rayt we we wi sik, mɔ if wi dɔn sik fɔ lɔng tɛm. Jiova nɔ de mek mirekul fɔ mɛn wi naw, bɔt i de ɛnkɔrej wi ɛn gi wi di trɛnk we wi nid fɔ bia. (Rid Sam 41:​3, NWT; 94:​19.) Fɔ ɛgzampul, i kin mek wi kɔmpin Kristian dɛn ɛp wi fɔ kam du sɔm wok dɛn na wi os ɔ ɛp wi fɔ baybay. I kin mek wi brɔda ɛn sista dɛn pre wit wi. Ɔ i go mek wi mɛmba skripchɔ dɛn we go ɛnkɔrej wi, lɛk di wan dɛn we de tɔk bɔt di nyu wɔl usay wi nɔ go de sik ɛn gɛt pen igen.—Rom. 15:​4.

10. Wetin mek Isaŋ nɔ bin kɔntinyu fɔ fil bad afta in aksidɛnt?

¹⁰ Wan brɔda we nem Isaŋ we de na Nayjiria bin gɛt aksidɛnt, ɛn dat bin mek i paralayz. In dɔktɔ bin tɛl am se i nɔ go ɛva waka igen. Isaŋ bin se: “A bin fil se ɔltin dɔn dɔn fɔ mi ɛn bɛtɛ nɔ de fɔ mi igen.” Bɔt i nɔ bin kɔntinyu fɔ fil da we de. Wetin bin ɛp am? I bin se: “Mi ɛn mi wɛf nɔ bin lɛf fɔ pre to Jiova ɛn stɔdi in Wɔd. Wi bin mekɔp wi maynd fɔ kɔntinyu fɔ tink bɔt di blɛsin dɛn we wi de ɛnjɔy naw ɛn di op we wi gɛt fɔ tumara bambay.”

11. Wetin bin ɛp Sindi fɔ gɛt gladi-at di tɛm we i bin rili sik?

¹¹ Sindi we de na Mɛksiko in dɔktɔ bin tɛl am se i gɛt wan sik we go mek i day. Wetin bin ɛp am? We i bin de tek tritmɛnt, i bin mek am in gol fɔ prich ɛvride. I bin rayt se: “We a de du dat, i bin mek a nɔ pe atɛnshɔn pan di ɔpreshɔn we dɛn go du pan mi, di pen we a de fil, ɔ di we aw a bin rili sik. Bifo dat, a bin pe atɛnshɔn fɔ ɛp ɔda pipul dɛn. We a kin de tɔk wit di dɔktɔ ɔ nɔs dɛn, a kin aks bɔt dɛn famili. Ɛn a kin aks dɛn wetin mek dɛn disayd fɔ du dis kayn wok we nɔ izi fɔ du. Afta dat, i kin izi fɔ mek a no uskayn tɔpik dɛn go rili want fɔ no mɔ bɔt. Bɔku pan dɛn kin tɔk se i nɔ kin izi fɔ mek peshɛnt dɛn aks dɛn aw dɛn de du. Ɛn bɔku pan dɛn kin tɛl mi tɛnki fɔ we a sho se a rili bisin bɔt dɛn. Sɔm dɛn kin ivin gi mi dɛn fon nɔmba ɛn adrɛs dɛn. So we tin nɔ kin izi fɔ mi na layf,  Jiova de ɛp mi fɔ gɛt gladi-at ɛn dat kin ivin sɔprayz mi!”—Prɔv. 15:​15.

12-13. Aw sɔm brɔda ɛn sista dɛn we sik ɔ we nɔ ebul du tin fɔ dɛnsɛf dɔn ebul fɔ prich to ɔda pipul dɛn? Wetin kin apin we dɛn du dat?

¹² Di wan dɛn we sik ɔ nɔ ebul du tin fɔ dɛnsɛf kin gɛt pwɛlat bikɔs dɛn nɔ ebul fɔ prich lɛk aw dɛn want. Bɔt stil, dɛn kin fɛn we fɔ prich. Insay Amɛrika, wan sista we nem Lɔrɛl bin de insay wan mashin fɔ 37 ia, ɛn na da mashin de bin de ɛp am fɔ blo. I bin nid fɔ bia bikɔs i bin gɛt kansa, i bin de du sɔm big ɔpreshɔn dɛn, ɛn i bin de gɛt sɔm tin dɛn we de ambɔg in skin. Bɔt stil, ɔl dɛn tin dɛn ya we bin de apin to am nɔ mek i sɛt mɔt. I bin de prich to di nɔs dɛn ɛn pipul dɛn we bin de kam na os fɔ ɛp am. Wetin bin apin we i du dat? I bin ebul fɔ ɛp 17 pipul dɛn fɔ bi Jiova Witnɛs! *

¹³ Richad we na wan ɛlda na Frans, gɛt fayn advays fɔ di wan dɛn we nɔ ebul fɔ kɔmɔt na dɛn os ɔ di wan dɛn we de na nɔsin om. I se: “I go fayn fɔ mek dɛn gɛt smɔl tebul ɔ sɔnsay usay dɛn go put buk ɛn magazin dɛn fɔ mek ɔda pipul dɛn si am. We pipul dɛn de pas ɛn dɛn si dis, dɛn go want fɔ no mɔ ɛn dɛn kin ebul fɔ tɔk to dɛn. Dis kin ɛnkɔrej wi brɔda ɛn sista dɛn we nɔ ebul fɔ prich frɔm os to os.” Di wan dɛn we nɔ ebul fɔ kɔmɔt na dɛn os bikɔs dɛn sik kin ebul fɔ prich bay we dɛn de rayt lɛta ɛn yuz fon.

14. Us fayn ɛgzampul Kiŋ Devid bin sɛt?

¹⁴ Bɔku rizin dɛn de we kin mek wi nɔ gɛt wok we wi kin want fɔ du na Jiova in ɔganayzeshɔn. Fɔ ɛgzampul, i go bi se wi dɔn ol, wi gɛt wɛlbɔdi prɔblɛm, ɔ sɔntɛm ɔda tin dɛn de apin to wi. If na so i bi, wi kin lan frɔm Kiŋ Devid in ɛgzampul. We dɛn bin tɛl Devid se nɔto in Jiova pik fɔ bil in tɛmpul pan ɔl we i bin rili want fɔ du dat, i bin sɔpɔt di wan we Jiova pik fɔ du dis wok. Devid bin ivin gi bɔku bɔku gold ɛn silva fɔ sɔpɔt dis wok. Devid sɛt fayn ɛgzampul, nɔto so?—2 Sam. 7:​12, 13; 1 Kro. 29:​1, 3-5.

15. Wetin bin ɛp Uɛg we in at pwɛl?

¹⁵ Wan brɔda we nem Uɛg we de na Frans bin lɛf fɔ sav as ɛlda bikɔs i bin gɛt wɛlbɔdi prɔblɛm, ɛn i nɔ bin ivin ebul fɔ du af af wok dɛn na in os. I bin rayt se: “Fɔs, mi at bin rili pwɛl ɛn a bin tink se a nɔ gɛt wan yus. Bɔt afta sɔm tɛm, a bin kam fɔ si se i rili impɔtant fɔ mek a lɛf fɔ  fil bad bɔt di tin dɛn we a nɔ ebul fɔ du. We a du dat, i bin mek a gladi we a de sav Jiova pan ɔl we nɔto ɔltin a ebul fɔ du. A dɔn mekɔp mi maynd nɔ fɔ giv-ɔp. Lɛk Gidiɔn ɛn in tri ɔndrɛd man dɛn we bin taya, a go kɔntinyu fɔ fɛt!”—Jɔj. 8:​4.

16. Wetin wi kin lan frɔm di enjɛl dɛn ɛgzampul?

¹⁶ Di fetful enjɛl dɛn sɛt fayn ɛgzampul. Di tɛm we Kiŋ Eab bin de rul, Jiova bin aks di enjɛl dɛn fɔ tɛl am wetin dɛn go du fɔ ful di wikɛd kiŋ. Difrɛn difrɛn enjɛl dɛn bin tɛl am wetin dɛn tink. Bɔt Gɔd bin pik wan pan di enjɛl dɛn ɛn tɛl am se wetin i tɔk go wok. (1 Kiŋ 22:​19-22) Yu tink se di ɔda fetful enjɛl dɛn bin fil bad ɛn sɔntɛm dɛn ivin bigin tink se, ‘If a bin no a nɔ tɔk?’ Nɔ, dɛn nɔ bin du dat. Di enjɛl dɛn rili ɔmbul ɛn dɛn want lɛ ɔl di prez go to Jiova.—Jɔj. 13:​16-18; Rɛv. 19:​10.

17. Wetin wi fɔ du if wi fil bad bikɔs wi nɔ gɛt wan patikyula wok we wi want fɔ du na Jiova in ɔganayzeshɔn?

¹⁷ Kɔntinyu fɔ tink bɔt di ɔnɔ we wi gɛt fɔ bi Jiova Witnɛs ɛn fɔ prich bɔt Gɔd in Kiŋdɔm. Di wok dɛn we wi kin gɛt na Jiova in ɔganayzeshɔn kin chenj, bɔt nɔto dat de mek wi valyu to Gɔd. Bifo dat, na we wi ɔmbul na in go mek Jiova lɛk wi ɛn wi brɔda ɛn sista dɛnsɛf go lɛk wi. So beg Jiova fɔ lɛ i ɛp yu fɔ kɔntinyu fɔ put yusɛf dɔŋ. Go de tink bɔt di bɔku fayn ɛgzampul dɛn we de insay di Baybul bɔt pipul dɛn we bin put dɛnsɛf dɔŋ. Du wetin yu ebul fɔ wok fɔ yu brɔda ɛn sista dɛn.—Sam 138:​6; 1 Pit. 5:​5.

18-19. Wetin go ɛp wi fɔ gladi we wi de du di prichin wok pan ɔl we wi de na tɛritri we pipul dɛn nɔ want fɔ lisin to wi?

¹⁸ Tɛm dɛn kin de we yu at kin pwɛl bikɔs di wan dɛn we de na yu tɛritri nɔ kin lisin to wi mɛsej ɔ bikɔs yu nɔ kin mit bɔku pipul dɛn fɔ tɔk to? If na dat de apin to yu, wetin yu go du fɔ mek yu kɔntinyu fɔ gɛt gladi-at? Sɔm fayn advays dɛn de na di bɔks we gɛt di taytul, “Wetin Yu Go Du fɔ Mek Yu Ɛnjɔy Yu Prichin Wok?” I impɔtant bak fɔ lɛ wi tink di rayt we bɔt wi prichin wok. Wetin dat min?

¹⁹ Mɛmba se di men rizin we mek wi de prich na fɔ tɔk bɔt Gɔd in nem ɛn in Kiŋdɔm. Jizɔs bin mek wi no klia wan se  di wan dɛn we de waka na di rod we de gi layf nɔ bɔku. (Mat. 7:​13, 14) We wi de du di prichin wok, wi gɛt di ɔnɔ fɔ wok wit Jiova, Jizɔs, ɛn di enjɛl dɛn. (Mat. 28:​19, 20; 1 Kɔr. 3:​9; Rɛv. 14:​6, 7) Na Jiova de drɔ pipul dɛn we rili want fɔ no mɔ fɔ kam sav am. (Jɔn 6:​44) So if pɔsin nɔ want fɔ lisin to wi naw, sɔntɛm i go lisin to wi nɛks tɛm we wi kam fɔ prich to am.

20. We wi at pwɛl, wetin wi kin lan frɔm Jɛrimaya 20:​8, 9?

²⁰ Wi kin lan bɔku tin frɔm di prɔfɛt Jɛrimaya. I bin de na tɛritri usay pipul dɛn nɔ bin want fɔ lisin to wetin i de prich. “Ɛnitɛm” we i bin de tɔk to dɛn, dɛn bin de tɛl am bad wɔd ɛn provok am. (Rid Jɛrimaya 20:​8, 9.) Wan tɛm, in at bin rili pwɛl ɛn i bin want fɔ lɛf fɔ prich. Bɔt i nɔ bin du dat. Wetin bin ɛp am? “PAPA GƆD [“Jiova,” NWT] in wɔd” bin tan lɛk faya insay Jɛrimaya, ɛn i nɔ bin ebul fɔ sɛt in mɔt. Di sem tin kin apin to wi tide if wi stɔdi di Baybul ɛvride ɛn tink gud wan bɔt wetin wi de lan. Dat go mek wi gɛt mɔ gladi-at ɛn sɔntɛm bɔku pipul dɛn go lisin to wi.—Jɛr. 15:​16.

21. Wetin go ɛp wi we wi at pwɛl?

²¹ Dɛbora we wi bin dɔn tɔk bɔt bin se, “Pwɛlat na wan pawaful wɛpɔn we Setan de yuz.” Bɔt Jiova gɛt pawa pas Setan ɛn ɔl di wɛpɔn dɛn we i de yuz. So ɛnitɛm we yu at pwɛl, na fɔ pre to Jiova mek i sɔpɔt yu. I go ɛp yu fɔ bia we yu de fil bad bɔt di mistek dɛn we yu de mek ɛn di tin dɛn we yu nɔ ebul fɔ du. I go sɔpɔt yu we yu sik. I go ɛp yu fɔ tink di rayt we bɔt di wok dɛn we yu de du na in ɔganayzeshɔn. Ɛn i go ɛp yu bak fɔ tink di rayt we bɔt di prichin wok. Pre to yu Papa we de na ɛvin we lɛk yu ɛn tɛl am aw yu rili de fil. Na in nɔmɔ go ɛp yu we yu gɛt pwɛlat.