1-2. Wetin Jizɔs bin min we i tɔk di wɔd dɛn we de na Jɔn 4:​35, 36?

I GO bi se Jizɔs bin de pas na fam dɛn usay di tin dɛn jɔs bigin fɔ gro. (Jɔn 4:​3-6) I go tek lɛk 4 mɔnt bifo dɛn avɛst dɛn tin dɛn ya. So i go mɔs dɔn strenj fɔ lɛ Jizɔs tɔk se: “Luk di fam dɛn gud, una go si se di tin dɛn we de gro dɔn du fɔ kɔt.” (Rid Jɔn 4:​35, 36.) Wetin i bin min?

² Jizɔs nɔ bin de tɔk bɔt di tin dɛn we dɛn plant, bɔt i bin de tɔk bɔt aw fɔ mek pipul dɛn bi in disaypul dɛn. Tink bɔt wetin bin jɔs apin. Pan ɔl we di Ju pipul dɛn nɔ gɛt natin fɔ du wit di Samɛritan dɛn, Jizɔs bin dɔn prich to wan Samɛritan uman, ɛn di uman bin lisin. Infakt, we Jizɔs bin de tɔk bɔt fam we “dɔn du fɔ kɔt,” bɔku Samɛritan pipul dɛn we bin dɔn yɛri bɔt Jizɔs frɔm di uman, bin de kam fɔ kam lan mɔ frɔm Jizɔs. (Jɔn 4:​9, 39-42) We wan man bin de tɔk bɔt dis akawnt na di Baybul, i bin se: “Di we aw di pipul dɛn bin want fɔ no mɔ sho se dɛn fiba lɛk tin dɛn we de na fam we dɔn du fɔ kɔt.”

3. If yu de si pipul dɛn lɛk Jizɔs, aw dat go ɛp yu fɔ du yu prichin wok fayn?

³ Aw yu de si di pipul dɛn we yu de prich di gud nyuz to? Yu de si dɛn lɛk tin dɛn we dɔn du fɔ avɛst? If na so i bi, yu go du tri tin dɛn. Fɔs, yu nɔ go westɛm fɔ du mɔ fɔ prich. Di tɛm fɔ avɛst shɔt, so nid nɔ de fɔ westɛm. Sɛkɔn, yu go gladi we yu de si pipul dɛn de lisin to di gud nyuz. Di Baybul se: “Pipul dɛn kin gladi avɛst tɛm.” (Ayz. 9:​3) Ɛn tɔd, yu go si ɛniwan pan dɛn pipul dɛn ya as pɔsin we go bi Jizɔs in disaypul, ɛn dat go mek yu ajɔst wetin yu de tɔk fɔ mek i bi tin we dɛn bisin bɔt.

4. Insay dis atikul, wetin wi go lan frɔm di apɔsul Pɔl?

 ⁴ Jizɔs nɔ bin tink se di Samɛritan pipul dɛn nɔ go bi in disaypul dɛn lɛk aw di wan dɛn we de fala am bin fɔ dɔn tink. Bifo dat, i bin si dɛn as pipul dɛn we go bi in disaypul dɛn. Wisɛf fɔ si pipul dɛn na wi tɛritri as pipul dɛn we go bi Krays in disaypul dɛn. Di apɔsul Pɔl bin sɛt fayn ɛgzampul fɔ wi fɔ fala. Wetin wi kin lan frɔm am? Insay dis atikul, wi go tɔk bɔt aw i (1) bin sabi sɔntin bɔt wetin di pipul dɛn we i bin de prich to, biliv, (2) wetin dɛn bisin bɔt, ɛn (3) i si dɛn as pipul dɛn we go bi Jizɔs in disaypul.

5. Wetin mek Pɔl bin ebul fɔ ɔndastand di wan dɛn we i bin de prich to na di Ju mitin os?

⁵ Bɔku tɛm, Pɔl bin de prich na di Ju mitin os dɛn. Fɔ ɛgzampul, insay di Ju mitin os we de na Tɛsalonayka, “Pɔl tek tri pan dɛn de we dɛn Ju pipul de pre ɛn blo, fɔ ɛksplen wetin rayt na Gɔd in Buk.” (Akt 17:​1, 2) I go bi se Pɔl bin gɛt kɔnfidɛns we i de na di Ju mitin os, bikɔs in na bin Ju. (Akt 26:​4, 5) Pɔl bin ɔndastand di Ju pipul dɛn so i bin ebul fɔ prich to dɛn wit kɔnfidɛns.—Fil. 3:​4, 5.

6. Aw di pipul dɛn insay di makit na Atɛns bin difrɛn frɔm di wan dɛn we Pɔl bin de prich to na di Ju mitin os?

⁶ Afta we dɛn bin fos Pɔl fɔ kɔmɔt na Tɛsalonayka ɛn Biria, i bin go na Atɛns. Dis bin mek i gɛt chans bak “fɔ go tɔk to dɛn Ju pipul we bin de pre to Gɔd ɛn dɛn pipul we nɔto bin Ju we bin de pre to Gɔd.” (Akt 17:​17) Bɔt we Pɔl bin de prich na makit, i bin gɛt fɔ tɔk to pipul dɛn we difrɛn frɔm di wan dɛn we i bin de prich to na di Ju mitin os. Sɔm pan di wan dɛn we bin de lisin to Pɔl na bin pipul dɛn we lan bɔku buk ɛn ɔda Jɛntayl dɛn we bin si in mɛsej as “nyu tin.” Dɛn bin tɛl Pɔl se: “Sɔm dɛn tin we yu tɔk, wi nɔ yɛri dɛn wande.”—Akt 17:​18-20.

7. Akɔdin to Akt 17:​22, 23, aw Pɔl bin ajɔst di we aw i de prich?

⁷ Rid Di Apɔsul Dɛn Wok [Akt] 17:​22, 23. Pɔl nɔ bin prich to di Jɛntayl dɛn na Atɛns di sem we aw i bin prich to di Ju pipul dɛn na di Ju mitin os. I go bi se Pɔl go dɔn aks insɛf se, ‘Wetin dɛn pipul dɛn ya na Atɛns biliv?’ I bin tek tɛm wach di say we i de ɛn i bin notis di we aw di pipul dɛn bin de wɔship. We Pɔl bin want fɔ tɔk to dɛn bɔt di tru tin we de na di Skripchɔ dɛn, i bin stat wit sɔntin we dɛn ɔlrɛdi gri wit. Wan masta sabi bukman bin tɔk se:  “As Ju Kristian, i [Pɔl] bin kam fɔ no se di pegan Grik dɛn nɔ de wɔship di tru Gɔd we di Ju pipul dɛn ɛn di Kristian dɛn de wɔship. Bɔt i bin tray fɔ sho se di Gɔd we i de tɔk bɔt nɔ strenj to di pipul dɛn na Atɛns.” So Pɔl bin gri fɔ ajɔst di we aw i de prich. Pɔl bin tɛl di pipul dɛn na Atɛns se di mɛsej we i de prich, kɔmɔt frɔm di “Gɔd we [dɛn] nɔ no” we dɛn de tray fɔ wɔship. Pan ɔl we di Jɛntayl dɛn nɔ tu sabi di Skripchɔ dɛn, Pɔl nɔ bin giv-ɔp pan dɛn. Bifo dat, i bin si dɛn lɛk tin we dɔn du fɔ avɛst ɛn i bin ajɔst di we aw i de prich di gud nyuz to dɛn.

8. (a) Wetin go ɛp yu fɔ no wetin pipul dɛn biliv na yu tɛritri? (b) If sɔmbɔdi tɛl yu se i gɛt in yon rilijɔn, wetin yu go se?

⁸ Lɛk Pɔl, wach di tin dɛn we de arawnd. Wi fɔ luk fɔ tin dɛn we go ɛp wi fɔ no wetin di pipul dɛn we de na wi tɛritri biliv. Wetin-ɛn-wetin di pɔsin yuz fɔ dizayn in os ɔ in motoka? Di pɔsin in nem, di we aw i drɛs, ɔ ivin di we aw i de tɔk de sho di rilijɔn we i de? Sɔntɛm i go dɔn tɛl yu wantɛm wantɛm se i gɛt in yon rilijɔn. Na dat bin apin to wan spɛshal payɔnia we nem Flutura. I bin se: “A nɔ kam fɔ fos yu fɔ biliv wetin a biliv, bɔt a kam fɔ tɔk to yu bɔt dis tɔpik . . . ”

9. Wetin na sɔm tin dɛn we yu go tɔk wit pɔsin we lɛk Gɔd biznɛs?

⁹ Us tɔpik yu kin tɔk wit sɔmbɔdi we lɛk Gɔd biznɛs? Tɔk bɔt sɔntin we yu ɛn di pɔsin gri wit. Sɔntɛm, na wan Gɔd i de wɔship, i gri se na Jizɔs na di wan we Sev mɔtalman, ɔ sɔntɛm i biliv se wi de na di tɛm we di bad bad tin dɛn we de apin, go dɔn jisnɔ. Yuz di tin dɛn we yu ɛn di pɔsin gri wit fɔ tɔk bɔt di Baybul in mɛsej di kayn we, we go mek di pɔsin want fɔ no mɔ.

10. Wetin wi go tray fɔ du? Wetin mek?

¹⁰ Mɛmba se, nɔto ɔlman biliv ɔltin we dɛn rilijɔn de tich. So ivin afta we yu dɔn no di pɔsin in rilijɔn, tray fɔ no wetin di pɔsin insɛf sɛf biliv. Wan spɛshal payɔnia na Ɔstrelia we nem Devid, bin tɔk se: “Bɔku pipul dɛn kin miks dɛn yon aydia wit wetin dɛn biliv na dɛn rilijɔn.” Donalta we de na Albenia bin se: “Sɔm pan di wan dɛn we wi kin mit kin se dɛn de na wan rilijɔn. Bɔt leta dɛn kin tɔk bak se dɛn nɔ biliv Gɔd.” Wan mishɔnari brɔda na Ajɛntina bin se, sɔm pipul dɛn kin se dɛn biliv di triniti, bɔt dɛn nɔ kin rili biliv se di Papa, di Pikin, ɛn di oli spirit na wan Gɔd. I bin tɔk bak se: “We a no dat, i kin mek am izi fɔ tɔk sɔntin we mi ɛn di pɔsin gri wit.” So tray fɔ no  wetin pipul dɛn rili biliv. Dɔn lɛk Pɔl, “bay aw ɔlman tan” na so wisɛf go ajɔst.—1 Kɔr. 9:​19-23.

11. Frɔm wetin de na Di Apɔsul Dɛn Wok [Akt] 14:​14-17, aw Pɔl bin tek tɛm prich fayn wan to di pipul dɛn we bin de na Listra?

¹¹ Rid Di Apɔsul Dɛn Wok [Akt] 14:​14-17. Pɔl bin tray fɔ no wetin di wan dɛn we i de prich to bisin bɔt ɛn i bin tray fɔ ajɔst. Fɔ ɛgzampul, di pipul dɛn we i bin tɔk to na Listra nɔ bin sabi di Skripchɔ dɛn bɛtɛ ɔ sɔntɛm dɛn nɔ bin sabi am atɔl. So Pɔl bin tɔk di we aw dɛn go ɔndastand. I bin tɔk bɔt fayn avɛst ɛn we wi ebul fɔ ɛnjɔy layf. I bin yuz wɔd dɛn ɛn ɛgzampul dɛn we di wan dɛn we i de prich to go ɔndastand.

12. Aw yu go no wetin pɔsin bisin bɔt ɛn ajɔst wetin yu want fɔ tɔk?

¹² Yuz sɛns fɔ tray fɔ no wetin di pipul dɛn we de na yu tɛritri bisin bɔt ɛn ajɔst wetin yu plan fɔ tɔk. Aw yu go no wetin pɔsin bisin bɔt we yu mit am fɔ di fɔstɛm ɔ we yu mit am na in os? Nɔ fɔgɛt se yu fɔ wach ɔ notis di tin dɛn we de arawnd. Sɔntɛm di pɔsin de wok na gadin, i de rid buk, i de mek motoka, ɔ i de du ɔda tin. If nid de, yu nɔ tink se i go fayn fɔ tɔk bɔt wetin i de du? (Jɔn 4:​7) Ivin di klos we di pɔsin wɛr kin mek yu no us kɔntri i kɔmɔt, us wok i de du, ɔ in bɛst futbɔl tim. Gustavo bin tɔk se: “A bin bigin fɔ tɔk wit wan man we ol 19 ia. I bin wɛr wan polo we gɛt wan atist in pikchɔ ɛn bɔku pipul dɛn sabi di atist. A bin aks di man bɔt di pikchɔ, ɛn i tɛl mi wetin mek i lɛk di atist. Di tɔk we wi bin tɔk, bin mek di man bigin fɔ stɔdi di Baybul, ɛn naw na wan pan wi brɔda dɛn.”

13. Wetin yu go tɔk we go mek pɔsin want fɔ stɔdi di Baybul?

¹³ We yu de tɛl pɔsin bɔt Baybul stɔdi, tɔk sɔntin we go mek i fil fayn ɛn sho di pɔsin aw di stɔdi go ɛp am. (Jɔn 4:​13-15) Fɔ ɛgzampul, wan uman we bin sho se i want fɔ no mɔ, bin gri fɔ mek wan sista go insay in os. We di sista bin si wan  satifiket na di wɔl we sho se di uman na profɛsɔ we stɔdi bɔt buk lanin, i bin tɛl di uman se wisɛf de tich pipul dɛn bay we wi de stɔdi dɛn di Baybul ɛn na wi mitin dɛn. Di uman bin gri fɔ stɔdi, ɛn di nɛks de, i bin atɛnd mitin ɛn wan sakit asɛmbli jɔs afta dat. Wan ia leta, i bin baptayz. Aks yusɛf, ‘Wetin mi ritɔn visit dɛn bisin bɔt? A go ebul fɔ tɔk bɔt wi Baybul stɔdi program di we we go mek di pɔsin want fɔ stɔdi?’

14. Aw yu go ajɔst yu Baybul stɔdi to ɛni studɛnt?

¹⁴ Afta yu bigin wan Baybul stɔdi, na fɔ pripia ɛnitɛm we yu de kɔndɔkt di stɔdi. Tink bɔt udat di studɛnt bi ɛn wetin i bisin bɔt. As yu de pripia, na fɔ pik us skripchɔ dɛn yu go rid, us fim dɛn yu go ple, ɛn us ɛgzampul dɛn yu go yuz fɔ ɛksplen di tru tin dɛn we de na di Baybul. Aks yusɛf, ‘Wetin rili go fayn fɔ di pɔsin ɛn we go tɔch in at?’ (Prɔv. 16:​23) Insay Albenia, wan uman we bin de stɔdi wit wan payɔnia we nem Flɔra bin tɔk se, “A nɔ biliv di tichin we se di wan dɛn we dɔn day go gɛt layf bak.” Flɔra nɔ bin fos di uman fɔ biliv. Flɔra bin se, “Fɔs, i nid fɔ no di Gɔd we prɔmis se di wan dɛn we dɔn day go gɛt layf bak.” Frɔm da tɛm de, ɛni stɔdi we dɛn de du, Flɔra kin tɔk mɔ bɔt Jiova in lɔv, in sɛns, ɛn in pawa. Leta, in studɛnt bin biliv se di wan dɛn we dɔn day go gɛt layf bak. Naw, i gɛt zil fɔ tɔk bɔt Jiova.

15. Akɔdin to Di Apɔsul Dɛn Wok [Akt] 17:​16-18, wetin na sɔm tin dɛn we bin de apin na Atɛns we bin de mek Pɔl fil bad? Wetin mek i nɔ bin giv-ɔp pan dɛn?

¹⁵ Rid Di Apɔsul Dɛn Wok [Akt] 17:​16-18. Pɔl nɔ bin giv-ɔp pan di pipul dɛn na Atɛns pan ɔl we dɛn siti bin ful-ɔp wit pipul dɛn we de wɔship aydɔl, we de du mami ɛn dadi biznɛs di we aw Gɔd nɔ want, ɛn we biliv pegan aydia bɔt Gɔd. I nɔ bin stɔp fɔ prich pan ɔl we dɛn bin de tɔk bad bɔt am. Pɔl insɛf bin kam fɔ bi Kristian ‘pan ɔl we fɔstɛm i bin de tɔk bad bɔt Gɔd, i bin de fɛt in pipul dɛn ɛn i bin de kɔs am.’ (1 Tim. 1:​13) Jɔs lɛk aw Jizɔs bin biliv se Pɔl go bi in disaypul, na so Pɔl insɛf bin biliv se di pipul dɛn na Atɛns go bi disaypul dɛn. Ɛn i nɔ bin biliv fɔ natin.—Di Apɔsul Dɛn Wok [Akt] 9:​13-15; 17:​34.

16-17. Wetin sho se ɔlkayn pipul dɛn kin bi Krays in disaypul? Gi wan ɛgzampul.

¹⁶ Insay di fɔstɛm Kristian dɛn tɛm, na pipul dɛn we kɔmɔt difrɛn say dɛn bin bi Jizɔs in disaypul dɛn. We Pɔl bin rayt to di Kristian dɛn we bin de Kɔrint, i bin se sɔm pan di wan dɛn we de na di kɔngrigeshɔn na bin kriminal dɛn ɛn dɛn bin de liv fri layf di kayn we we nɔ fayn fɔ tɔk bɔt. Dɔn i tɔk bak se: “Sɔm pan una bin tan lɛkɛ dɛn pipul ya we a jɛs tɔk bɔt so. Bɔt Masta Jizɔs Krays dɔn pul una sin kɔmɔt pan una.” (1 Kɔr. 6:​9-11) If na yu, yu bin fɔ dɔn si dɛn pipul dɛn de as pipul dɛn we go chenj ɛn bi Krays in disaypul dɛn wan de?

¹⁷ Tide, bɔku pipul dɛn rɛdi fɔ chenj ɛn bi Jizɔs in disaypul. Fɔ ɛgzampul, insay Ɔstrelia, wan spɛshal payɔnia we nem Yukina bin lan se ɔlkayn pipul dɛn kin lisin to di Baybul in mɛsej. Wan de na wan ɔfis we de du os ɛn land biznɛs, Yukina bin si wan yɔŋ ledi we wɛr big klos ɛn we gɛt bɔku tatu dɛn na in bɔdi. Yukina se: “A fred fɔs bɔt a bin bigin fɔ tɔk to am. A kam si se in na pɔsin we rili  lɛk Baybul biznɛs ɛn sɔm pan in tatu dɛn na sɔm vas dɛn frɔm Sams!” Di uman bin bigin fɔ stɔdi ɛn atɛnd di mitin dɛn. *

18. Wetin mek wi nɔ fɔ jɔj pipul dɛn?

¹⁸ Yu tink se Jizɔs bin tɔk se di tin dɛn we de gro dɔn du fɔ avɛst bikɔs i bin de ɛkspɛkt se bɔku pipul dɛn go fala am? Nɔ, nɔto so i bi. Di Baybul bin dɔn tɔk se na smɔl pipul dɛn nɔmɔ go put fet pan am. (Jɔn 12:​37, 38) Ɛn Jizɔs bin ebul fɔ no wetin de na pipul dɛn at. (Mat. 9:​4) Pan ɔl we i bin pe atɛnshɔn pan di wan dɛn we go biliv am, i bin stil prich wit zil to ɔlman. Wetin wi go se bɔt wi? Wi nɔ ebul fɔ no wetin de na pipul dɛn at so na dat mek i nɔ fayn fɔ mek wi jɔj di wan dɛn we wi de prich to na di tɛritri. Bifo dat, wi fɔ si pipul dɛn as wan dɛn we go kam fɔ bi Jizɔs in disaypul. Wan mishɔnari we nem Mak we de na Bɔkina Faso bin tɔk se: “Bɔku tɛm, di pipul dɛn we a kin tink se go go bifo kin stɔp fɔ stɔdi. Bɔt di wan dɛn we a kin tink se nɔ go go bifo, na dɛn kin du wɛl. So a dɔn lan se i go fayn fɔ mek wi alaw Jiova in spirit fɔ dayrɛkt wi.”

19. Aw wi fɔ si di pipul dɛn we de na wi tɛritri?

¹⁹ Fɔs, i go tan lɛk se bɔku pipul dɛn nɔ de na di tɛritri we fiba tin dɛn we de gro we dɔn du fɔ avɛst. Bɔt na fɔ mɛmba wetin Jizɔs bin tɛl in disaypul dɛn. Di tin dɛn we de gro dɔn du fɔ avɛst. Pipul dɛn kin chenj ɛn bi Krays in disaypul dɛn. Jiova de si dɛn pipul dɛn ya as pipul dɛn “we gɛt valyu.” (Egay 2:​7, NWT) If wi de si pipul dɛn lɛk aw Jiova ɛn Jizɔs de si dɛn, wi go lan bɔt udat dɛn bi ɛn wetin dɛn bisin bɔt. Wi nɔ go si dɛn as strenja, bɔt wi go si dɛn as pipul dɛn we go bi wi brɔda ɛn sista dɛn.