1. Wetin Jiova de notis pan in pipul dɛn?

JIOVA GƆD “lɛk in pipul dɛn.” (Sam 149:​4, NWT) Dis de mek wi rili gladi! Jiova de notis wi gud kwaliti dɛn; i de si wetin wi ebul du, ɛn i de ɛp wi fɔ bi in padi. If wi kɔntinyu fɔ fetful to am, i go kɔntinyu fɔ de nia wi sote go!—Jɔn 6:​44.

2. Wetin mek i at fɔ mek sɔm pipul dɛn biliv se Jiova lɛk dɛn?

² Sɔm pipul dɛn kin se, ‘A no se Jiova lɛk in pipul dɛn as grup, bɔt aw a shɔ se Jiova lɛk mi? Wetin kin mek pɔsin aks dis kayn kwɛstyɔn? Ɔksana, * bin sɔfa pasmak we i bin smɔl. I se: “A bin gladi pasmak we a baptayz ɛn stat fɔ payɔnia. Bɔt afta 15 ia, a bigin fɔ mɛmba di bad bad tin dɛn we apin to mi we a bin smɔl. A bigin fɔ tink se Jiova nɔ gladi wit mi igen ɛn a nɔ fit fɔ mek i lɛk mi.” Yua, we na wan payɔnia sista we bin gɛt bɔku prɔblɛm dɛn we i bin smɔl, se: “A bin gi mi layf to Jiova bikɔs a bin want fɔ mek i gladi. Bɔt a bin shɔ se i nɔ go ɛva lɛk mi.”

3. Wetin wi go tɔk bɔt insay dis atikul?

³ Lɛk di fetful sista dɛn we wi jɔs tɔk bɔt, yusɛf rili lɛk Jiova, bɔt yu go de dawt if i lɛk yu. Wetin mek yu nid fɔ biliv tranga wan se i rili bisin bɔt yu? Ɛn wetin go ɛp yu we yu de tink se Jiova nɔ lɛk yu? Lɛ wi tɔk bɔt di ansa dɛn to dɛn kwɛstyɔn dɛn ya.

4. Wetin mek i rili bad fɔ dawt se Jiova lɛk wi?

⁴ Lɔv de mek pɔsin du sɔntin. If wi shɔ se Jiova lɛk wi ɛn de sɔpɔt wi, dat go muv wi fɔ sav am wit ɔl wi at pan ɔl we prɔblɛm dɛn de mit wi. Bɔt if wi de dawt se Gɔd bisin bɔt wi, wi “nɔ go gɛt bɛtɛ trɛnk.” (Prɔv. 24:​10, NWT) Ɛn we wi at pwɛl ɛn wi bigin fɔ tink se Gɔd nɔ lɛk wi, wi nɔ go ebul fɔ tinap tranga wan agens Setan in atak dɛn.—Ɛfi. 6:​16.

5. Wetin dɔn apin to sɔm brɔda ɛn sista dɛn we de tink se Gɔd nɔ lɛk dɛn?

⁵ Sɔm pan wi brɔda ɛn sista dɛn dɔn bigin tink se Jiova nɔ lɛk dɛn ɛn bisin bɔt dɛn, so dat dɔn mek dɛn fet dɔn wik. Wan ɛlda we nem Jems tɔk se: “Pan ɔl we a bin de sav na Bɛtɛl ɛn a bin de ɛnjɔy fɔ prich na wan fɔrin langwej kɔngrigeshɔn, a nɔ bin shɔ if Jiova gladi wit wetin a bin de du fɔ am. Wantɛm, a bin ivin de dawt if Jiova de lisin to mi prea dɛn.” Iva, we insɛf de ful-taym savis tɔk se: “A lan se i rili bad fɔ tink se Jiova nɔ lɛk wi bikɔs dat kin afɛkt ɔltin we yu de du fɔ sav Jiova. Wi kin stɔp fɔ du tin dɛn fɔ Gɔd ɛn wi nɔ go gɛt gladi-at we wi de sav Jiova.” Maykɛl we na rɛgyula payɔnia ɛn ɛlda tɔk se: “If yu nɔ biliv se Gɔd bisin bɔt yu, yu go bigin fɔ kɔmɔt nia am smɔl smɔl.”

6. Wetin wi fɔ du we wi bigin fɔ tink se Gɔd nɔ lɛk wi?

⁶ Dɛn ɛkspiriɛns dɛn ya de sho se if wi de tink se Jiova nɔ lɛk wi, dat kin damej wi fet. Bɔt wetin wi fɔ du if wi stat fɔ tink se Jiova nɔ lɛk wi? Wantɛm wantɛm, wi fɔ stɔp fɔ tink da we de! Pre to Jiova fɔ ɛp yu fɔ chenj wetin de “wɔri yu” wit ‘di pis we Gɔd de gi we go gayd yu at ɛn maynd.’ (Sam. 139:​23, NWT; Fil. 4:​6, 7) Ɛn mɛmba se, nɔto yu wangren de. Ɔda fetful brɔda ɛn sista dɛnsɛf de fɛt wit di bad we aw dɛn de fil bɔt dɛnsɛf. Ivin Jiova in savant dɛn we bin de trade trade bin nid fɔ fɛt wit di bad we aw dɛn bin de fil bɔt dɛnsɛf. Lɛ wi si wetin wi go lan frɔm di apɔsul Pɔl in ɛgzampul.

7. Us prɔblɛm dɛn Pɔl bin gɛt?

⁷ Sɔntɛnde, yu kin fil lɛk se yu gɛt  bɔku wok fɔ du ɛn i nɔ izi fɔ yu fɔ du ɔltin we yu nid fɔ du? If na so i bi, yu go ɔndastand wetin bin de apin to Pɔl. I bin de wɔri “fɔ ɔl di kɔngrigeshɔn dɛn,” nɔto fɔ jɔs wan kɔngrigeshɔn. (2 Kɔr. 11:​23-28) Yu gɛt siriɔs wɛlbɔdi prɔblɛm we de mek yu nɔ gɛt gladi-at? Pɔl bin gɛt wan prɔblɛm we bin mek i sɔfa pasmak. I go bi se na wɛlbɔdi prɔblɛm, ɛn i bin rili want am fɔ dɔn. (2 Kɔr. 12:​7-10) Yu at pwɛl bikɔs ɔf yu mistek dɛn? Na so Pɔl bin de fil sɔntɛnde. I kɔl insɛf “man we sɔri” bikɔs ɔltɛm i bin nid fɔ fɛt fɔ du wetin rayt.—Rom. 7:​21-24.

8. Wetin bin ɛp Pɔl fɔ bia wit in prɔblɛm dɛn?

⁸ Pɔl bin kɔntinyu fɔ sav Jiova pan ɔl we i bin de gɛt difrɛn difrɛn prɔblɛm dɛn ɛn tin dɛn we bin de pwɛl in at. Wetin bin de gi am di trɛnk fɔ du dat? Pan ɔl we i bin no se i nɔ pafɛkt, i bin gɛt strɔng fet pan di day we Jizɔs day fɔ fri mɔtalman. I bin no bɔt di prɔmis we Jizɔs bin mek fɔ se “ɛnibɔdi we sho se i gɛt fet pan [Jizɔs] . . . go gɛt layf we go de sote go.” (Jɔn 3:​16; Rom. 6:​23) Fɔ tru, Pɔl na wan pan di pipul dɛn we bin sho se i gɛt fet pan di day we Jizɔs day fɔ fri mɔtalman. I bin biliv tranga wan se Jiova rɛdi fɔ fɔgiv ivin di wan dɛn we dɔn kɔmit siriɔs sin if dɛn ripɛnt.—Sam 86:​5.

9. Wetin wi lan frɔm wetin Pɔl rayt na Galeshians 2:​20?

⁹ Pɔl bin gɛt fet fɔ se Gɔd lɛk am pasmak bikɔs i bin no se na Gɔd sɛn Jizɔs fɔ day fɔ am. (Rid Galeshians 2:​20.) Notis di fayn wɔd dɛn we i yuz fɔ ɛnd di vas. Pɔl se: “Gɔd in Pikin . . . lɛk mi ɛn an ova insɛf fɔ mi.” Pɔl nɔ bin fil se i bin so bad dat Gɔd nɔ go lɛk am. I nɔ bin tink se, ‘A kin si wetin mek Jiova go lɛk mi brɔda dɛn, bɔt i nɔ lɛk mi.’ Pɔl bin mɛmba di Roman Kristian dɛn se: “Krays day fɔ wi di tɛm we wi na sina dɛn.” (Rom. 5:​8) Natin nɔ go stɔp Gɔd fɔ lɛ i nɔ lɛk wi!

10. Wetin wi lan frɔm Romans 8:​38, 39?

¹⁰ Rid Romans 8:​38, 39. Pɔl bin biliv tranga wan se Gɔd rili lɛk am. I bin rayt se “natin nɔ go mek Gɔd nɔ ebul fɔ lɛk wi.” Pɔl bin no bɔt aw Jiova bin peshɛnt wit di Izrɛlayt dɛn. I bin no bak bɔt aw Jiova dɔn sho am sɔri-at. So wi  go se, na dis we Pɔl bin de tink, ‘If Jiova sɛn in yon Pikin fɔ day fɔ mi, a go gɛt ɛni rizin fɔ dawt se i lɛk mi?’—Rom. 8:​32.

11. Pan ɔl we Pɔl bin dɔn kɔmit sin dɛn lɛk di wan dɛn we de na 1 Timoti 1:​12-15, wetin mek i bin shɔ se Gɔd lɛk am?

¹¹ Rid 1 Timoti 1:​12-15. I go mɔs bi se tɛm dɛn go mɔs de we Pɔl bin de fil bad bikɔs ɔf di bad tin dɛn we i bin dɔn du trade. I bin kɔl insɛf ‘sina we wɔs pas ɔl,’ ɛn wi nɔ sɔprayz! Bifo Pɔl no di trut, i bin de go na difrɛn difrɛn siti dɛn fɔ fɛn Kristian dɛn fɔ put sɔm na jel, ɛn i bin de gri fɔ mek dɛn kil ɔda wan dɛn. (Akt 26:​10, 11) Imajin aw Pɔl go dɔn fil wei mit yɔŋ Kristian we na in bin dɔn gri fɔ mek dɛn kil di yɔŋ Kristian in mama ɛn papa? Pɔl bin rigrɛt di bad tin dɛn we i bin dɔn du, bɔt i bin no se i nɔ go ebul fɔ chenj dɛn tin dɛn de. I bin gri se Krays bin dɔn day fɔ am, ɛn i bin rayt wit kɔnfidɛns fɔ se: “Gɔd in spɛshal gudnɛs dɔn mek a bi udat a bi.” (1 Kɔr. 15:​3, 10) Wetin na di lɛsin fɔ wi? Biliv gud gud wan se Krays day fɔ yu, ɛn na in mek am pɔsibul fɔ lɛ yu gɛt tayt padi biznɛs wit Jiova. (Akt 3:​19) Wetin impɔtant to Gɔd na wetin wi du naw ɛn wetin wi go du tumara bambay, nɔto di mistek dɛn we wi dɔn mek trade, ilɛk wi na bin Jiova Witnɛs ɔ wi nɔto bin Jiova Witnɛs.—Ayz. 1:​18.

12. Aw di wɔd dɛn we de na 1 Jɔn 3:​19,20 go ɛp wi if wi de fil lɛk se wi nɔ gɛt wan valyu ɔ nɔbɔdi nɔ lɛk wi?

¹² We yu tink bɔt di day we Jizɔs day fɔ yu sin dɛn, sɔntɛm yu go se, ‘A nɔ fit fɔ lɛ i du dis kayn tin fɔ mi?’ Wetin kin mek yu fil da we de? Wi at we nɔ pafɛkt kin ful wi ɛn mek wi fil lɛk se wi  nɔ gɛt wan valyu ɛn nɔbɔdi nɔ lɛk wi. (Rid 1 Jɔn 3:​19, 20.) We wi fil dɛn we dɛn de, wi go nid fɔ mɛmba se “Gɔd pas wi at.” Ilɛksɛf wi fil se Jiova nɔ lɛk wi ɛn i nɔ go fɔgiv wi, wi Papa we de na ɛvin stil lɛk wi ɛn i go fɔgiv wi. Wi nid fɔ lan fɔ biliv se Jiova lɛk wi. Fɔ du dat, wi nid fɔ stɔdi in Wɔd ɔltɛm, pre to am ɔltɛm, ɛn spɛn tɛm wit pipul dɛn we de wɔship am. Wetin mek i impɔtant fɔ du dɛn tin dɛn de?

13. We wi stɔdi Gɔd in Wɔd, aw dat go ɛp wi? (Luk bak di bɔks we gɛt di taytul, “ Aw Gɔd in Wɔd Ɛp Dɛn?”)

¹³ Stɔdi Gɔd in Wɔd ɛvride, ɛn yu go ɔndastand Gɔd in fayn fayn kwaliti dɛn mɔ ɛn mɔ. Dat go mek yu ɔndastand se i rili lɛk yu. We yu tek tɛm tink gud wan bɔt Gɔd in Wɔd ɛnide, dat go ɛp yu fɔ tink fayn, ɛn “sɛtul tin dɛn di rayt we” na yu at ɛn maynd. (2 Tim. 3:​16) Wan ɛlda we nem Kɛvin we kin fil lɛk se i nɔ gɛt bɛtɛ valyu bin tɔk se: “We a kin rid ɛn tink gud wan bɔt Sam 103, dat dɔn ɛp mi fɔ chenj di we aw a de tink ɛn fɔ ɔndastand aw Jiova de rili tink bɔt mi.” Iva, we wi bin dɔn tɔk bɔt, tɔk se: “A kin ɛnd ɛnide bay we a de tek tɛm tink kwayɛt wan bɔt wetin impɔtant to Jiova. Dat de mek a gɛt kolat ɛn mi fet de strɔng.”

14. Aw prea kin ɛp wi?

¹⁴ Pre ɔltɛm. (1 Tɛs. 5:​17) Wan tin we go mek wi gɛt tayt padi biznɛs wit pɔsin na we wi de tɔk to am ɔltɛm ɛn tɛl am bɔt aw wi de fil. Na di sem tin wi go tɔk bɔt wi padi biznɛs wit Jiova. We wi pre to am fɔ tɛl am aw wi de fil, wetin wi de tink, ɛn wetin de wɔri wi, wi de sho se wi gɛt kɔnfidɛns pan am, ɛn wi no se i lɛk wi. (Sam 94:​17-19; 1 Jɔn 5:​14, 15) Yua, we wi bin dɔn tɔk bɔt bin se: “We a de pre, a nɔ de jɔs tɛl Jiova bɔt di tin dɛn we a du da de de. A de tɔk to am bɔt ɔltin ɛn tɛl am bɔt aw a de rili fil. Smɔl smɔl, a dɔn kam fɔ si Jiova as Papa we rili lɛk in pikin dɛn, nɔto as maneja fɔ wan big kɔmni.”—Luk di bɔks we gɛt di taytul, “ Yu Dɔn Rid Am?”

15. Aw Jiova de sho se i bisin bɔt wi?

¹⁵ Spɛn tɛm wit tru padi dɛn; dɛn na gift frɔm Jiova. (Jems 1:​17) Wi Papa we de na ɛvin de sho se i bisin bɔt wi bay we i de gi wi brɔda ɛn sista dɛn na di kɔngrigeshɔn we de sho “lɔv ɔltɛm.” (Prɔv. 17:​17) Insay di lɛta we Pɔl bin rayt to di Kristian dɛn na Kolose, i bin tɔk bɔt sɔm Kristian dɛn we bin sɔpɔt am, ɛn i bin tɔk se dɛn “dɔn rili kɔrej  am.” (Kol. 4:​10, 11) Ivin Krays Jizɔs bin nid di sɔpɔt we i bin gɛt frɔm in padi dɛn, we na enjɛl dɛn ɛn mɔtalman dɛn, ɛn i bin sho se i gladi fɔ dat.—Lyuk 22:​28, 43.

16. Aw tru padi dɛn go ɛp wi fɔ kam nia Jiova?

¹⁶ Yu de bɛnifit gud gud wan frɔm di gift we Jiova dɔn gi yu we na tru padi dɛn? We wi tɔk to wi padi we na machɔ Kristian bɔt di tin dɛn we de wɔri wi, dat nɔ de sho se wi nɔ gɛt bɛtɛ fet, bifo dat, i de protɛkt wi. Tink bɔt wetin Jems we wi bin dɔn tɔk bɔt bin se. I se: “Tayt padi biznɛs wit machɔ Kristian dɛn dɔn rili ɛp mi. We a kin bigin fɔ tink se Jiova nɔ lɛk mi, dɛn mi tru padi dɛn de kin peshɛnt lisin to mi ɛn mɛmba mi se dɛn lɛk mi. We dɛn du dat, dɛn de mek a no se Jiova lɛk mi ɛn i bisin bɔt mi.” Dis de sho se i rili impɔtant fɔ mek padi wit wi Kristian brɔda ɛn sista dɛn ɛn kɔntinyu fɔ gɛt tayt padi biznɛs wit dɛn.

17-18. Udat wi fɔ lisin to? Wetin mek?

¹⁷ Setan want lɛ wi lɛf fɔ tray fɔ du wetin rayt. I want wi fɔ biliv se Jiova nɔ lɛk wi, ɛn wi nɔ fit fɔ mek i sev wi. Bɔt as wi dɔn lan, dat nɔtɔ tru.

¹⁸ Jiova lɛk yu. Yu rili valyu to am. If yu obe am, i go “kɔntinyu fɔ lɛk [yu]” jɔs lɛk aw Jizɔs bin mek i kɔntinyu fɔ lɛk am. (Jɔn 15:​10) So nɔ lisin to Setan ɔ to yu at we de kɔndɛm yu. Bifo dat, lisin to Jiova, we de si di gud tin we ɛni wan pan wi de du. Na fɔ biliv gud gud wan se Jiova “lɛk in pipul dɛn,” ivin yu.