YU DƆN notis se bɔku pipul dɛn na di wɔl fil se dɛn fɔ gɛt spɛhsal privilɛj dɛn, rayt dɛn, ɔ dɛn fɔ trit dɛn spɛshal we? Ɛn ilɛk aw dɛn trit dɛn, dɛn kin stil fil se dɛn fɔ trit dɛn fayn pas dat. Pipul dɛn we de tink dis kayn we jɔs bisin bɔt dɛnsɛf ɛn dɛn nɔ gɛt wan tɛnki fɔ di tin dɛn we dɛn gɛt. Na so di Baybul se pipul dɛn go biev insay di las dez​—2 Tim. 3:2.

As wi ɔl no, nɔto tide pipul dɛn stat fɔ sho se dɛn jɔs bisin bɔt dɛnsɛf nɔmɔ. Adam ɛn Iv bin fil se na dɛn fɔ disayd fɔ dɛnsɛf wetin gud ɛn bad, ɛn di tin we dɛn bin disayd fɔ du dɔn mek bad bad tin dɛn de apin. Lɔng lɔng tɛm afta dat, Kiŋ Uzaya we bin de rul na Juda bin tink se i gɛt rayt fɔ bɔn insɛns na di tɛmpul, bɔt dat na bin big big mistek. (2 Kro. 26:​18, 19) Semweso, di Faresi ɛn Sadyusi dɛn bin biliv se Gɔd fɔ trit dɛn fayn pas ɔda pipul dɛn jɔs bikɔs Ebraam na dɛn gret gret granpa.​—Mat. 3:9.

Wi de wit pipul dɛn we jɔs bisin bɔt dɛnsɛf ɛn prawd, so i pɔsibul fɔ mek di we aw dɛn de biev afɛkt wi. (Gal. 5:26) Sɔntɛm wi go bigin tink se wi fɔ gɛt wan patikyula privilɛj ɔ dɛn fɔ trit wi spɛshal. Wetin go ɛp wi nɔ fɔ tink dis kayn we? Wan tin we go ɛp wi na we wi tray fɔ ɔndastand wetin Jiova tink bɔt dis kayn tin. Tu Baybul prinsipul dɛn go ɛp wi.

 Na Jiova de disayd wetin wi fɔ gɛt. Lɛ wi tɔk bɔt sɔm ɛgzampul dɛn.

• Insay di famili, di man fɔ fil se in wɛf rɛspɛkt am ɛn di wɛf fɔ fil se in man lɛk am. (Ɛfi. 5:33) Maredman ɛn in wɛf fɔ sho dɛnsɛf spɛshal lɔv we dɛn nɔ go sho to ɛni ɔda pɔsin. (1 Kɔr. 7:3) Mama ɛn papa dɛn gɛt rayt fɔ ɛkspɛkt dɛn pikin dɛn fɔ obe dɛn, ɛn pikin dɛnsɛf fɔ ɛkspɛkt se dɛn mama ɛn papa dɛn fɔ lɛk dɛn ɛn kia fɔ dɛn—​2 Kɔr. 12:14; Ɛfi. 6:2.

• Wi fɔ rɛspɛkt ɛlda dɛn we de wok tranga wan na di kɔngrigeshɔn. (1 Tɛs. 5:12) Bɔt ɛlda dɛn nɔ gɛt rayt fɔ kɔntrol dɛn brɔda ɛn sista dɛn.​—1 Pit. 5:2, 3.

• Gɔd dɔn gi mɔtalman gɔvmɛnt dɛn di rayt fɔ mek di wan dɛn we dɛn de rul oba pe taks dɛn ɛn ɔnɔ dɛn.​—Rom. 13:1, 6, 7.

Jiova de gi wi pas wetin wi fit fɔ gɛt bikɔs i lɛk wi. Bikɔs wi na sina dɛn, di wangren tin we wi fit fɔ gɛt na day. (Rom. 6:23) Bɔt Jiova de blɛs wi bɔku we dɛn bikɔs ɔf di lɔv we i gɛt fɔ wi we nɔ de chenj. (Sam 103:10, 11) Ɛni blɛsin ɔ privilɛj we wi gɛt frɔm am na bikɔs ɔf in spɛshal gudnɛs.​—Rom. 12:6-8; Ɛfi. 2:8.

Tek tɛm mek yu nɔ stat fɔ tink lɛk aw pipul dɛn na Setan in wɔl de tink. Sɔntɛm, yu go bigin fɔ tink se yu fit fɔ gɛt pas wetin ɔda pipul dɛn de gɛt ɛn yu nɔ go ivin notis se na dat yu de du. Fɔ sho aw i izi fɔ lɛ pɔsin bigin fɔ tink da we de, Jizɔs bin yuz di ɛgzampul bɔt di wokman dɛn we dɛn bin pe wan dinariɔs. Sɔm pan di wokman dɛn bin stat fɔ wok ali mɔnin ɛn dɛn bin wok ol de ɔnda di san ɛn ɔda wan dɛn bin jɔs wok fɔ wan awa. Di wan dɛn we bin stat fɔ wok frɔm mɔnin bin fil se dɛn fɔ pe dɛn mɔ mɔni bikɔs ɔf di kayn wok we dɛn bin du. (Mat. 20:1-16) We Jizɔs bin de tɔk bɔt di lɛsin na dis ɛgzampul, i bin sho in disaypul dɛn se dɛn fɔ satisfay wit wetin Gɔd disayd fɔ gi dɛn.

Sho se yu gɛt tɛnki ɛn nɔ ɛkspɛkt ɛnitin frɔm ɔda pipul dɛn. (1 Tɛs. 5:18) Falamakata apɔsul Pɔl in ɛgzampul we nɔ bin aks  in brɔda ɛn sista dɛn na Kɔrint fɔ gi am di tin dɛn we i nid pan ɔl we i bin gɛt rayt fɔ du dat. (1 Kɔr. 9:11-14) Wi fɔ gladi fɔ ɛni blɛsin we wi gɛt ɛn nɔ ɛkspɛkt se ɔda pipul dɛn fɔ gi wi.

Put yusɛf dɔŋ. We pɔsin de tink tumɔs bɔt insɛf, bɔku tɛm, i kin stat fɔ tink se i fɔ gɛt pas wetin i gɛt. If wi put wisɛf dɔŋ, dat go ɛp wi nɔ fɔ ɛva tink dis kayn we we nɔ kɔrɛkt.

Prɔfɛt Daniɛl na pɔsin we bin put insɛf dɔŋ ɛn na fayn ɛgzampul i sɛt fɔ wi. I bin kɔmɔt na impɔtant famili, i bin fayn, gɛt sɛns, ɛn i bin sabi du bɔku tin dɛn, so i fɔ dɔn fil se dɛn fɔ trit am spɛshal we ɛn gi am privilɛj dɛn. (Dan. 1:3, 4, 19, 20) Bɔt pan ɔl dat, Daniɛl bin kɔntinyu fɔ put insɛf dɔŋ ɛn na dis kwaliti bin mek i valyu to Jiova.​—Dan. 2:30; 10:​11, 12.

Lɛ wi tray fɔ bi pipul dɛn we nɔ jɔs bisin bɔt wisɛf ɛn we prawd lɛk bɔku pipul dɛn na di wɔl tide. Bifo dat, lɛ wi kɔntinyu fɔ gladi fɔ ɛni blɛsin we Jiova gi wi bikɔs ɔf in spɛshal gudnɛs.