1-2. Wetin di enjɛl bin tɛl di uman dɛn na Jizɔs in grev? Wetin Jizɔs insɛf sɛf bin tɛl dɛn?

WAN ali mɔnin, Naysan 16, insay di ia 33, sɔm uman dɛn we dɛn at bin rili pwɛl ɛn we lɛk Gɔd bin go na di grev usay dɛn bin dɔn bɛr di Masta Jizɔs Krays. Na lɛk 36 awa so dɔn pas frɔm we dɛn bɛr am. We dɛn rich de, dɛn bin want fɔ rɔb sɔm tin dɛn we gɛt fayn sɛnt ɛn ɔyl pan di bɔdi, bɔt dɛn bin sɔprayz fɔ si se di grev ɛmti! Wan enjɛl bin tɛl di uman dɛn se Jizɔs dɔn gɛt layf bak, ɛn i bin tɛl dɛn bak se: “I de go bifo una na Galili. Una go si am de.”—Mat. 28:​1-7, NWT; Lyuk 23:​56; 24:​10.

² Afta we di uman dɛn dɔn kɔmɔt na di grev, Jizɔs insɛf sɛf bin mit dɛn ɛn tɛl dɛn se: “Una go tɛl mi brɔda dɛn so dat dɛn go go na Galili; na de dɛn go si mi.” (Mat. 28:​10, NWT) I go mɔs bi se Jizɔs bin gɛt impɔtant tin fɔ tɛl in disaypul dɛn bikɔs dis mitin na bin di fɔs tin we i arenj afta we i gɛt layf bak!

3-4. Wetin mek wi go se di kɔmand we de na Matyu 28:​19, 20 (NWT) nɔ bin de fɔ di apɔsul dɛn nɔmɔ? (Luk di pikchɔ na di frɔnt pej.)

³ Rid Matyu 28:​16-20, NWT. Na di mitin we Jizɔs bin ɔganayz, i bin tɔk bɔt di impɔtant wok we in disaypul dɛn bin fɔ du da tɛm de ɛn na di sem wok we wisɛf de du tide. Jizɔs bin tɔk se: “una go ɛn mek pipul dɛn bi mi disaypul na ɔl di neshɔn dɛn, . . . tich dɛn fɔ du ɔl di tin dɛn we a dɔn tɛl una.”

⁴ Jizɔs want ɔl di wan dɛn we de fala am fɔ prich. I nɔ bin jɔs gi dis kɔmand to in 11 fetful apɔsul dɛn.  Wetin mek wi shɔ bɔt dis? Na bikɔs nɔto Jizɔs in apɔsul dɛn nɔmɔ bin de na di mawntin na Galili di tɛm we i gi di kɔmand fɔ mek disaypul dɛn. Aw wi no dis? Mɛmba se di enjɛl bin tɛl di uman dɛn se: “Una go si am [na Galili].” I go mɔs bi se fetful uman dɛn bak bin de na da mitin de. Bɔt nɔto dat nɔmɔ. Di apɔsul Pɔl bin se: “[Jizɔs] sho insɛf to pipul dɛn we pas fayv ɔndrɛd we bin de fala am.” (1 Kɔr. 15:​6) Usay dɛn 500 brɔda dɛn ya bin de togɛda?

5. Wetin wi lan frɔm Fɔs Lɛta Fɔ Kɔrint 15:​6?

⁵ Wi gɛt rizin dɛn fɔ biliv se di wɔd dɛn we Pɔl tɔk na Fɔs Lɛta Fɔ Kɔrint 15:​6, sho se i bin de tɔk bɔt di mitin na Galili we di Baybul tɔk bɔt na Matyu chapta 28. Wetin na di rizin dɛn? Fɔs, bɔku pan Jizɔs in disaypul dɛn na bin Galilian dɛn. Bifo dɛn gɛt di mitin wit bɔku bɔku pipul dɛn na wan pɔsin in os na Jerusɛlɛm, i bɛtɛ fɔ lɛ dɛn gɛt am na wan mawntin na Galili. If Jizɔs bin want fɔ tɛl in apɔsul dɛn se na dɛn nɔmɔ fɔ go prich ɛn mek disaypul dɛn, i bin fɔ dɔn du dat na Jerusɛlɛm ɛn i nɔ bin fɔ dɔn tɛl dɛn, di uman dɛn, ɛn bɔku ɔda pipul dɛn fɔ mit am na Galili.—Lyuk 24:​33, 36.

6. Aw Matyu 28:​20 (NWT) sho se di kɔmand we Jizɔs bin gi fɔ mek disaypul dɛn de bak fɔ wi tide? Aw pipul dɛn de obe da kɔmand de tide?

⁶ Lɛ wi tɔk bɔt di nɔmba tri impɔtant rizin. We Jizɔs bin gi di kɔmand fɔ mek disaypul dɛn, i nɔ bin jɔs de tɔk to di fɔstɛm Kristian dɛn. Aw wi no dat? Jizɔs bin ɛnd-ɔp fɔ tɛl di wan dɛn we de fala am se: “A de wit una ɔltɛm te di tɛm want fɔ dɔn.” (Mat. 28:​20, NWT) Jɔs lɛk aw Jizɔs bin tɔk, bɔku pipul dɛn de mek disaypul dɛn tide. Jɔs tink bɔt dis! Ɛni ia, na lɛk 300,000 pipul dɛn de baptayz fɔ bi Jiova in witnɛs dɛn ɛn Jizɔs Krays in disaypul dɛn!

7. Wetin wi de kam tɔk bɔt naw? Wetin mek?

⁷ Bɔku pan di wan dɛn we de stɔdi di Baybul kin mek chenj dɛn na dɛn layf ɛn baptayz. But sɔm ɔda wan dɛn we wi kin stɔdi di Baybul wit kin fred fɔ baptayz ɛn bi disaypul dɛn. Dɛn kin ɛnjɔy di stɔdi, bɔt dɛn nɔ de mek chenj dɛn na dɛn layf fɔ baptayz. If yu de stɔdi di Baybul wit sɔmbɔdi, wi shɔ se yu go want fɔ ɛp am fɔ fala di tin dɛn we i de lan ɛn bi Krays in disaypul. Dis atikul go tɔk bɔt aw wi go ɛp wi studɛnt dɛn fɔ lɛk Jiova ɛn mek chenj dɛn na dɛn layf. Wetin mek wi nid fɔ tɔk bɔt dis tɔpik? Na bikɔs sɔntɛnde, wi kin gɛt fɔ disayd if wi fɔ kɔntinyu di stɔdi ɔ nɔ fɔ kɔntinyu.

8. Wetin mek sɔntɛnde i nɔ kin izi fɔ ɛp wi studɛnt dɛn fɔ lɛk Jiova?

⁸ Jiova want pipul dɛn fɔ sav am bikɔs dɛn lɛk am. So wi gol na fɔ ɛp wi Baybul studɛnt dɛn fɔ no se Jiova rili bisin bɔt dɛn ɛn i rili lɛk dɛn. Wi want fɔ ɛp dɛn fɔ si Jiova as “papa fɔ di wan dɛn we nɔ gɛt papa” ɛn di wan we de “protɛkt di uman dɛn we dɛn man dɛn dɔn day.” (Sams 68:​5, NWT) We yu studɛnt dɛn kam fɔ no se Gɔd rili lɛk dɛn, dɛnsɛf go bigin fɔ lɛk Gɔd. Sɔntɛnde, i nɔ kin izi fɔ sɔm studɛnt dɛn fɔ si Jiova as Papa we rili lɛk dɛn bikɔs dɛn yon papa nɔ bin sho lɔv to dɛn ɛn kia fɔ dɛn. (2 Tim. 3:​1, 3) As yu de stɔdi wit dɛn, tɔk mɔ bɔt di fayn fayn kwaliti dɛn we Jiova gɛt. Ɛp yu studɛnt dɛn fɔ ɔndastand se wi Gɔd we lɛk wi want dɛn fɔ gɛt layf we go de sote go, ɛn i rɛdi fɔ ɛp dɛn fɔ gɛt da layf de. Wetin bak wi go du?

9-10. Us buk dɛn wi fɔ yuz we wi de stɔdi wit pipul dɛn? Wetin mek wi fɔ yuz dɛn buk dɛn de?

 ⁹ Yuz di buk dɛn we gɛt di taytul “Wetin Wi Go Lan Frɔm di Baybul?” ɛn “Kɔntinyu fɔ Mek Gɔd Lɛk Yu.” Di men rizin we mek dɛn mek dɛn buk dɛn ya na fɔ ɛp wi Baybul studɛnt dɛn fɔ lɛk Jiova. Fɔ ɛgzampul, na chapta 1 insay di buk Lan Frɔm di Baybul wi gɛt ansa dɛn to kwɛstyɔn dɛn lɛk: Gɔd bisin bɔt wi ɔ i wikɛd?, Aw Gɔd kin fil we pipul dɛn de sɔfa?, ɛn Yu go ebul bi Jiova in padi? Wetin wi go se bɔt di buk we gɛt di taytul Mek Gɔd Lɛk Yu? Dis buk go ɛp di studɛnt fɔ ɔndastand se we i fala di prinsipul dɛn we de insay di Baybul, dat go mek in layf bɛtɛ ɛn i go mek i kam nia Jiova. Ilɛksɛf yu dɔn stɔdi ɔda pipul dɛn wit dɛn buk dɛn ya, yu nid fɔ pripia gud gud wan ɛnitɛm we yu de go stɔdi ɛni wan pan yu studɛnt dɛn ɛn tink bɔt di patikyula tin dɛn we di studɛnt nid.

¹⁰ Lɛ wi se yu studɛnt want fɔ no bɔt wan tɔpik, bɔt di buk we tɔk bɔt da tɔpik de nɔ de insay wi Tichin Tulbɔks,  wetin yu go du? Sɔntɛm yu kin ɛnkɔrej am fɔ rid da buk de fɔ insɛf so dat yu go kɔntinyu fɔ stɔdi am wit wan pan di buk dɛn we wi de yuz fɔ stɔdi wit pipul dɛn lɛk di wan dɛn we wi bin dɔn tɔk bɔt.

11. Ustɛm wi fɔ stat fɔ pre we wi de stɔdi di Baybul wit wi studɛnt dɛn? Aw wi go ɛp wi studɛnt fɔ no wetin mek i impɔtant fɔ pre?

¹¹ Stat di stɔdi wit prea. Bɔku tɛm, i kin fayn nɔ fɔ westɛm fɔ stat di stɔdi wit prea ɛn dɔn am wit prea. Wi fɔ ɛp wi Baybul studɛnt fɔ no se di wangren we aw wi go ɔndastand Gɔd in Wɔd na we Gɔd in oli spirit ɛp wi. Sɔm Baybul ticha dɛn kin ɛksplen wetin mek wi de pre we wi de stɔdi wit wi Baybul studɛnt dɛn bay we dɛn de rid Jems 1:​5 we se: “If ɛni wan pan una want mɔ sɛns fɔ du ɛnitin, mek i aks Gɔd.” Di ticha kin aks di studɛnt se: “Aw wi go aks Gɔd fɔ mɔ sɛns?” Di studɛnt go mɔs ansa se wi fɔ pre to Gɔd.

12. Aw yu go yuz Sam 139:​2-4 fɔ ɛp yu Baybul studɛnt fɔ pre to Jiova wit ɔl in at?

¹² Tich yu studɛnt aw fɔ pre. Ɛksplen to yu studɛnt se Jiova want fɔ yɛri in prea dɛn we de kɔmɔt frɔm in at. Mek lɛ i no se we wi de pre, wi kin tɛl Jiova aw wi de rili fil ɛn tɛl am tin dɛn we wi nɔ go want fɔ tɛl ɛni ɔda pɔsin. Wi fɔ mɛmba se Jiova ɔlrɛdi no wetin de na wi at. (Rid Sam 139:​2-4.) Wi kin ɛnkɔrej wi studɛnt bak fɔ aks Gɔd fɔ ɛp am fɔ chenj di bad we aw i de tink ɛn fɔ lɛf in bad abit dɛn. Fɔ ɛgzampul, sɔntɛnde yu Baybul studɛnt go lɛk fɔ sɛlibret tin dɛn we tru Kristian dɛn nɔ fɔ sɛlibret. I no se i bad, bɔt i stil kin ɛnjɔy sɔm tin dɛn bɔt dɛn sɛlibreshɔn dɛn de. Ɛnkɔrej am fɔ tɛl Jiova bɔt aw i de fil bɔt dɛn tin dɛn de ɛn fɔ lɛ i beg Gɔd fɔ ɛp am fɔ lɛ i lɛk di tin dɛn we Gɔd lɛk nɔmɔ.—Sam 97:​10.

13. (a) Wetin mek wi nɔ fɔ westɛm fɔ invayt wi Baybul studɛnt dɛn na wi mitin dɛn? (b) Aw wi kin ɛp wi Baybul studɛnt dɛn fɔ fil fri na Kiŋdɔm Ɔl?

¹³ Nɔ westɛm fɔ invayt yu Baybul studɛnt fɔ atɛnd di mitin dɛn. Di tin dɛn we yu studɛnt go yɛri ɛn si na wi Kristian mitin dɛn go ɛp am fɔ sav Jiova ɛn mek chenj dɛn na in layf. Sho am di fim we gɛt di taytul Wetin Kin Apin na Kiŋdɔm Ɔl? ɛn invayt am fɔ atɛnd mitin wit yu. If i pɔsibul yu kin ɛp am wit transpɔt. I fayn fɔ lɛ yu de go wit difrɛn brɔda ɛn sista dɛn to yu Baybul studɛnt dɛn. Bay da we de, yu Baybul studɛnt go kam fɔ no ɔda brɔda ɛn sista dɛn na di kɔngrigeshɔn, ɛn i go fil fri we i de atɛnd wi mitin dɛn.

14. Wetin go ɛp yu Baybul studɛnt fɔ mek chenj dɛn na in layf?

¹⁴ Wi gol na fɔ ɛp wi Baybul studɛnt fɔ mek chenj dɛn na in layf. (Ɛfi. 4:​13) We pɔsin gri fɔ stɔdi di Baybul wit wi, i go bi se di men tin we mek i want fɔ stɔdi na bikɔs i want fɔ lɛ wi ɛp am. Bɔt as i de kam fɔ lɛk Jiova mɔ ɛn mɔ, i go bigin fɔ tink bɔt aw insɛf go ɛp ɔda pipul dɛn, ivin di wan dɛn we de na di kɔngrigeshɔn. (Mat. 22:​37-39) We di rayt tɛm rich, yu nɔ fɔ fred fɔ tɛl yu Baybul studɛnt se i gɛt di chans fɔ gi mɔni fɔ sɔpɔt di Kiŋdɔm wok.

15. Aw wi go ɛp wi Baybul studɛnt fɔ du wetin rayt we i gɛt prɔblɛm dɛn?

¹⁵ Tich yu Baybul studɛnt wetin fɔ du we prɔblɛm mit am. Fɔ ɛgzampul, lɛ wi se yu Baybul studɛnt we na ɔnbaptayz pɔblisha tɛl yu se sɔmbɔdi insay di kɔngrigeshɔn dɔn du am bad. I nɔ go fayn fɔ mek yu tɛl am udat gɛt rayt ɛn udat nɔ gɛt rayt, bɔt i go fayn fɔ mek yu ɛksplen to am wetin di Baybul se i fɔ du.  I fɔ fɔgiv di brɔda ɔ sista ɛn fɔgɛt bɔt wetin dɔn apin. Ɔ if i nɔ ebul fɔ du dat, i kin tɔk fayn to di pɔsin we dɔn du am sɔntin ɛn in gol fɔ bi fɔ lɛ dɛn bi ‘brɔda ɔ sista bak.’ (Luk Matyu 18:​15.) Ɛp yu studɛnt fɔ pripia wetin i de go tɔk. Sho am aw fɔ yuz di JW Laybri^® ap, di Buk we De Ɛp Jiova Witnɛs dɛn fɔ No bɔt Sɔntin, ɛn jw.org^® fɔ lan bɔt difrɛn we dɛn aw fɔ sɔlv prɔblɛm. If i lan aw fɔ sɔlv prɔblɛm dɛn wit ɔda pipul dɛn bifo i baptayz, i go mɔs gɛt gud padi biznɛs wit di brɔda ɛn sista dɛn na di kɔngrigeshɔn afta we i dɔn baptayz.

16. Wetin mek i fayn fɔ lɛ ɔda brɔda ɔ sista jɔyn yu we yu de kɔndɔkt yu Baybul stɔdi?

¹⁶ We yu de kɔndɔkt Baybul stɔdi, mek lɛ ɔda brɔda ɔ sista na di kɔngrigeshɔn jɔyn yu pan di stɔdi, dɔn bak yu kin ivin tɛl di sakit ovasia ɔ in wɛf fɔ jɔyn yu pan di stɔdi we dɛn visit di kɔngrigeshɔn. Wetin mek? Frɔm di rizin dɛn we wi bin dɔn tɔk bɔt fɔs, sɔntɛm di brɔda ɔ sista go ebul fɔ ɛp yu studɛnt pan sɔm tin dɛn we yu nɔ ebul fɔ ɛp am wit. Fɔ ɛgzampul, lɛ wi se yu studɛnt dɔn de tray fɔ stɔp fɔ smok bɔt plɛnti tɛm i nɔ kin ebul fɔ stɔp. Mek lɛ wan brɔda ɔ sista we bin dɔn lɛf da bad abit de, pan ɔl we i nɔ bin izi fɔ am jɔyn yu pan di stɔdi. Da brɔda ɔ sista de go ebul fɔ gi yu studɛnt fayn advays we go ɛp am fɔ chenj. If yu nɔ de fil fri fɔ kɔndɔkt di stɔdi we wan ɛkspiriɛns brɔda ɔ sista de wit yu, i go fayn fɔ mek yu tɛl am lɛ in kɔndɔkt di stɔdi da de de. We yu mek lɛ ɔda brɔda ɔ sista dɛn jɔyn yu fɔ kɔndɔkt yu Baybul stɔdi, yu studɛnt go bɛnifit frɔm dɛn ɛkspiriɛns. Wi fɔ mɛmba se, wi gol na fɔ ɛp di studɛnt fɔ mek chenj dɛn na in layf ɛn sav Jiova.

17-18. Wetin yu nid fɔ tink bɔt we yu de disayd if yu fɔ stɔp di stɔdi?

¹⁷ If yu Baybul studɛnt nɔ de mek chenj dɛn na in layf, i go fayn fɔ mek yu aks yusɛf dis kwɛstyɔn, ‘A fɔ stɔp di stɔdi?’ Bifo yu disayd wetin fɔ du, yu nid fɔ tink bɔt wetin di pɔsin ebul fɔ du ɛn wetin i nɔ ebul fɔ du. I kin tek lɔng tɛm fɔ lɛ sɔm pipul dɛn mek chenj dɛn na dɛn layf, bɔt fɔ ɔda pipul dɛn i kin izi fɔ lɛ dɛn du dat. So na fɔ aks yusɛf dɛn kwɛstyɔn dɛn ya: ‘Mi studɛnt de mek smɔl smɔl chenj dɛn na in layf?’ ‘I dɔn bigin “fɔ du ɔl di tin dɛn,” ɔ fɔ fala di tin dɛn we i de lan?’ (Mat. 28:​20, NWT) I kin tek lɔng tɛm fɔ lɛ di studɛnt bi disaypul. Bɔt i fɔ mek smɔl smɔl chenj dɛn na in layf.

¹⁸ Wetin wi go du if wi dɔn de stɔdi wit sɔmbɔdi fɔ sɔm tɛm naw ɛn i nɔ de sho  se di stɔdi impɔtant to am? Imajin se yu gɛt wan studɛnt we dɔn dɔn fɔ stɔdi di buk Lan Frɔm di Baybul, ɛn sɔntɛm yu dɔn stat fɔ stɔdi am di buk Mek Gɔd Lɛk Yu, bɔt i nɔ ɛva atɛnd di mitin ɛn ivin di Mɛmorial! Ɛn bɔku tɛm, i kin gi ɛkskyuz dɛn we nɔ impɔtant jɔs fɔ lɛ una nɔ stɔdi. If na so yu studɛnt de, yu nid fɔ tɛl am di tru. *

19. Wetin yu go se to sɔmbɔdi we tink se di stɔdi nɔ impɔtant? Wetin yu nid fɔ tink bɔt?

¹⁹ Yu kin stat bay we yu aks am se: ‘Wetin na di tin we nɔ rili izi fɔ yu fɔ du so dat yu go bi Jiova Witnɛs?’ Sɔntɛm di studɛnt go ansa yu se: ‘A lɛk fɔ de stɔdi di Baybul, bɔt a nɔ go ɛva bi Jiova Witnɛs!’ If i biev dis kayn we pan ɔl we una dɔn de stɔdi fɔ sɔm tɛm naw, yu tink se nid de fɔ kɔntinyu da stɔdi de? Ɔ sɔntɛm, dis go bi di fɔs tɛm we yu studɛnt go tɛl yu di rizin we mek i nɔ de mek chenj dɛn na in layf. Fɔ ɛgzampul, sɔntɛm i go de fil se i nɔ go ɛva ebul fɔ prich frɔm os to os. We yu dɔn no aw i de fil, yu go ebul fɔ ɔndastand aw fɔ ɛp am.

20. Aw Akt 13:​48, (NWT) go ɛp wi fɔ no udat wi fɔ kɔntinyu fɔ stɔdi wit?

²⁰ I sɔri fɔ no se, sɔm studɛnt dɛn tan lɛk di Izrɛlayt dɛn we bin de insay Izikɛl in tɛm. Notis wetin Jiova bin tɛl Izikɛl bɔt dɛn: “Fɔ tru, yu tan to dɛm lɛk wan we de siŋ wit fayn fayn vɔys, lɔv siŋ dɛm, ɛn de ple gud gud wan pan myuzik instrumɛnt, bikɔs dɛn de yɛri wetin yu se, bɔt dɛn nɔ go du am.” (Izi. 33:​32) Sɔntɛnde, i nɔ kin izi fɔ wi fɔ tɛl wi Baybul studɛnt se wi de stɔp fɔ stɔdi am. Bɔt “plɛnti tɛm nɔ lɛf igen.” (1 Kɔr. 7:​29) I bɛtɛ fɔ lɛ wi nɔ kɔntinyu fɔ stɔdi wit studɛnt we nɔ de mek ɛni chenj na in layf. Wi fɔ tray fɔ luk fɔ di wan dɛn we de “rili sho se dɛn want fɔ gɛt layf we go de sote go.”—Rid Akt 13:​48, NWT.

21. Wetin na wi iatɛks fɔ di ia 2020? Wetin i go ɛp wi fɔ du?

²¹ Insay di ia 2020, wi iatɛks go ɛp wi fɔ tink bɔt aw wi go rili mek disaypul dɛn fayn fayn wan. Dis gɛt fɔ du wit sɔm pan di wɔd dɛn we Jizɔs bin tɔk na wan impɔtant mitin ɔp wan mawntin na Galili. I bin tɔk se: “Una go ɛn mek pipul dɛn bi mi disaypul . . . , una baptayz dɛn.”—Mat. 28:​19, NWT.