1-2. (a) Aw wi kin fil we wi tink bɔt Jizɔs in layf ɛn prichin wok? (b) Wetin wi go tɔk bɔt insay dis atikul?

 WE PƆSIN we wi lɛk day, wi kin rili mis da pɔsin de! We di pɔsin jɔs day, wi at kin rili pwɛl mɔ we wi tink bɔt aw di pɔsin day, mɔ if i bi se i bin sɔfa bifo i day. Bɔt afta sɔm tɛm, wi kin bigin gladi bak we wi tink bɔt sɔntin we di pɔsin bin tich wi, ɔ sɔntin we i bin tɔk ɔ du fɔ ɛnkɔrej wi ɔ fɔ mek wi smayl.

² Semweso, wi at kin pwɛl we wi rid bɔt di sɔfa we Jizɔs bin sɔfa ɛn day. Insay di tɛm fɔ di Mɛmorial, wi kin tek tɛm tink gud wan bɔt aw Jizɔs in sakrifays rili impɔtant. (1 Kɔr. 11:​24, 25) Bɔt wi kin rili gladi we wi tink bɔt ɔl di tin dɛn we Jizɔs bin tɔk ɛn du we i bin de na di wɔl. Wi kin gladi bak fɔ tink bɔt wetin i de du naw ɛn wetin i go du fɔ wi tumara bambay. We wi tink bɔt dɛn tin dɛn ya ɛn di lɛk we i lɛk wi, dat go muv wi fɔ du difrɛn tin dɛn fɔ sho se wi gladi fɔ wetin i dɔn du fɔ wi; ɛn na dat wi go lan insay dis atikul.

3. Us rizin dɛn wi gɛt fɔ sho se wi gladi fɔ Jizɔs in day?

³ Wi kin rili gladi we wi tink bɔt di we aw Jizɔs liv in layf ɛn di day we i day fɔ wi. We Jizɔs bin de du di prichin wok na di wɔl, i bin tich pipul dɛn bɔt di blɛsin dɛn  we dɛn go ɛnjɔy ɔnda Gɔd in Kiŋdɔm. Wi lɛk di gud tin dɛn we di Baybul de tich wi bɔt Jizɔs in day ɛn di gud tin dɛn we wi de ɛnjɔy bikɔs ɔf dat. Wi rili gladi fɔ Jizɔs in day bikɔs i mek am pɔsibul fɔ lɛ wi gɛt tayt padi biznɛs wit in ɛn Jiova. Dɔn bak, di wan dɛn we sho se dɛn gɛt fet pan Jizɔs go gɛt di op fɔ liv sote go ɛn fɔ si di wan dɛn we dɛn lɛk we dɔn day. (Jɔn 5:​28, 29; Rom. 6:​23) Wi nɔ du ɛnitin fɔ mek wi fit fɔ gɛt dɛn blɛsin dɛn ya; ɛn wi nɔ go ɛva ebul fɔ pe Gɔd ɛn Krays fɔ wetin dɛn dɔn du fɔ wi. (Rom. 5:​8, 20, 21) Bɔt wi go ebul fɔ sho se wi rili gladi fɔ wetin dɛn du. Aw?

4. Aw Meri Magdalin bin sho se i gladi fɔ wetin Jizɔs bin du fɔ am? (Luk di pikchɔ.)

⁴ Lɛ wi tɔk bɔt wan Ju uman we nem Meri Magdalin in ɛgzampul. I bin de sɔfa bad bad wan bikɔs i bin gɛt sɛvin dimɔn dɛn we bin de tɔmɛnt am. I go dɔn fil se nɔbɔdi nɔ go ebul fɔ ɛp am. So i go dɔn gladi we Jizɔs pul dɛn dimɔn dɛn de pan am! Ɛn dat bin mek i gri fɔ bi wan pan Jizɔs in disaypul dɛn. Ɛn i yuz in tɛm, in trɛnk, ɛn di tin dɛn we i gɛt fɔ sɔpɔt Jizɔs fɔ du di prichin wok. (Lyuk 8:​1-3) Pan ɔl we Meri bin rili gladi fɔ wetin Jizɔs du fɔ am, sɔntɛm i nɔ bin no se Jizɔs go du pas dat leta. Jizɔs go gi in layf fɔ ɔlman, “so dat ɛnibɔdi we sho se i gɛt fet pan am” go gɛt layf we go de sote go. (Jɔn 3:​16) Bɔt stil, Meri bin sho se i gladi fɔ wetin Jizɔs du fɔ am bay we i kɔntinyu fɔ de biɛn am. We Jizɔs bin de na di tik we i sɔfa pan, Meri bin de nia am bikɔs i bisin bɔt am ɛn i bin want fɔ ɛnkɔrej di ɔda pipul dɛn we bin de de. (Jɔn 19:​25) Afta we Jizɔs day, Meri ɛn tu ɔda uman dɛn bin kam wit  spays dɛn na di grev fɔ Jizɔs in bɛrin. (Mak 16:​1, 2) Jiova bin rili blɛs Meri fɔ we i nɔ kɔmɔt biɛn Jizɔs. I bin gɛt di ɔnɔ fɔ tɔk wit Jizɔs afta i gɛt layf bak; dat na chans we bɔku pan in disaypul dɛn nɔ bin gɛt.—Jɔn 20:​11-18.

5. Aw wi go sho se wi gladi fɔ ɔl wetin Jiova ɛn Jizɔs dɔn du fɔ wi?

⁵ Wisɛf go sho se wi gladi fɔ ɔl wetin Jiova ɛn Jizɔs dɔn du fɔ wi bay we wi yuz wi tɛm, wi trɛnk, ɛn mɔni fɔ sav Jiova. Fɔ ɛgzampul, wi kin ɛp fɔ bil ɛn kia fɔ ples dɛn we wi de yuz fɔ wɔship Jiova.

6. Wetin mek wi go se di day we Jizɔs day na gift fɔ ɛniwan pan wi?

⁶ We wi tek tɛm tink bɔt aw Jiova ɛn Jizɔs rili lɛk wi, dat de muv wi fɔ lɛk dɛn. (1 Jɔn 4:​10, 19) Wi go lɛk dɛn mɔ ɛn mɔ we wi kam fɔ no se Jizɔs day fɔ ɛniwan pan wi. Apɔsul Pɔl bin no dis ɛn i sho se i gladi bay we i rayt to di Kristian dɛn na Galeshia se: “Gɔd in Pikin . . . lɛk mi ɛn an ova insɛf fɔ mi.” (Gal. 2:​20) Bikɔs Jizɔs day fɔ wi, Jiova dɔn mek yu kam nia am so dat yu go bi in padi. (Jɔn 6:​44) Yu nɔ gladi fɔ no se Jiova si gud tin pan yu ɛn i dɔn pe big big prayz fɔ mek yu bi in padi? Dat nɔ de mek yu lɛk Jiova ɛn Jizɔs mɔ ɛn mɔ? So wi fɔ aks wisɛf se, ‘Wetin di lɛk we a lɛk Jiova ɛn Jizɔs go muv mi fɔ du?’

7. Akɔdin to wetin de na di pikchɔ, aw wi ɔl go sho se wi lɛk Jiova ɛn Jizɔs? (2 Kɔrintians 5:​14, 15; 6:​1, 2)

⁷ Di lɛk we wi lɛk Gɔd ɛn Krays de muv wi fɔ sho se wi lɛk ɔda pipul dɛn. (Rid 2 Kɔrintians 5:​14, 15; 6:​1, 2.) Wan we aw wi de sho se wi lɛk ɔda pipul  dɛn na bay we wi de du di prichin wok wit zil. Wi de prich to ɔlman we wi mit. Wi nɔ de se wi nɔ go tɔk to pɔsin bikɔs ɔf in kɔlɔ, in trayb, di buk we i lan, ɔ bikɔs i jɛntri ɔ i po. We wi de tɔk to ɔlman we wi mit, wi de du wetin Jiova want, we na fɔ “mek ɔlkayn pipul dɛn sev ɛn no di kɔrɛkt tin bɔt di trut.”—1 Tim. 2:​4.

8. Aw wi go sho se wi lɛk wi brɔda ɛn sista dɛn?

⁸ Wi go sho bak se wi lɛk Gɔd ɛn Krays bay we wi de sho se wi lɛk wi brɔda ɛn sista dɛn. (1 Jɔn 4:​21) Wi de sho se wi rili bisin bɔt dɛn ɛn sɔpɔt dɛn we dɛn gɛt prɔblɛm dɛn. Wi kin kɔrej dɛn we pɔsin we dɛn lɛk day, wi kin go fɛn dɛn we dɛn sik, ɛn wi kin du wi bɛst fɔ ɛnkɔrej dɛn we dɛn at pwɛl. (2 Kɔr. 1:​3-7; 1 Tɛs. 5:​11, 14) Wi de kɔntinyu fɔ pre fɔ dɛn bikɔs wi no se “we pɔsin we de du wetin rayt rili beg Gɔd, dat rili gɛt pawa.”—Jems 5:​16.

9. Us ɔda we wi go sho se wi lɛk wi brɔda ɛn sista dɛn?

⁹ Wi de sho bak se wi lɛk wi brɔda ɛn sista dɛn bay we wi de wok tranga wan fɔ kɔntinyu fɔ gɛt pis wit dɛn. Wi de tray fɔ falamakata di kayn we aw Jiova de fɔgiv ɔda pipul dɛn. Jiova bin rɛdi fɔ mek in Pikin day fɔ wi sin dɛn. So wisɛf fɔ rɛdi fɔ fɔgiv wi brɔda ɛn sista dɛn we dɛn sin agens wi. Wi nɔ want fɔ tan lɛk di wikɛd slev we Jizɔs bin tɔk bɔt na wan pan in parebul dɛn. Di slev nɔ bin fɔgiv in kɔmpin we bin gɛt fɔ pe am smɔl mɔni, pan ɔl we in masta bin dɔn fɔgiv am fɔ di bɔku bɔku mɔni we i bin gɛt fɔ pe in masta. (Mat. 18:​23-35) If yu gɛt cham-mɔt wit pɔsin na di kɔngrigeshɔn, yu fɔs go du sɔntin fɔ mek pis wit di pɔsin bifo una atɛnd di Mɛmorial? (Mat. 5:​23, 24) We yu du dat, yu de sho se yu rili lɛk Jiova ɛn Jizɔs.

10-11. Aw ɛlda dɛn go sho se dɛn lɛk Jiova ɛn Jizɔs? (1 Pita 5:​1, 2)

¹⁰ Aw ɛlda dɛn go sho se dɛn lɛk Jiova ɛn Jizɔs? Wan impɔtant we aw dɛn go du dat na we dɛn kia fɔ Jizɔs in ship dɛn. (Rid 1 Pita 5:​1, 2.) Jizɔs bin mek apɔsul Pita no dis klia wan. Afta we Pita dinay Jizɔs tri tɛm, i bin rili rɛdi fɔ sho se i lɛk Jizɔs. Afta we Jizɔs gɛt layf bak, i aks Pita se: “Saymɔn, Jɔn in pikin, yu lɛk mi?” Wi shɔ se Pita go dɔn rɛdi fɔ du ɛnitin fɔ sho se i lɛk in Masta. Jizɔs bin tɛl Pita se: “Mɛn mi smɔl ship dɛn.” (Jɔn 21:​15-17) Pita bin kia fɔ di Masta in ship dɛn te i day, ɛn dat sho se i lɛk Jizɔs.

¹¹ Ɛlda dɛn, aw una go sho se di wɔd dɛn we Jizɔs tɛl Pita impɔtant to una insay di tɛm fɔ di Mɛmorial? Una go sho se una lɛk Jiova ɛn Jizɔs bay we una de mek tɛm fɔ ɛnkɔrej di brɔda ɛn sista dɛn ɔltɛm ɛn tray tranga wan fɔ ɛp inaktiv wan dɛn fɔ kam bak to Jiova. (Izi. 34:​11, 12) Wan ɔda tin we una kin du na fɔ ɛnkɔrej Baybul studɛnt dɛn ɛn nyu wan dɛn we atɛnd di Mɛmorial, so dat dɛn go fil fayn ɛn dɛnsɛf go kam fɔ bi Jizɔs in disaypul dɛn.

12. Wetin mek wi de gɛt maynd we wi tink bɔt di wɔd dɛn we Jizɔs tɔk di nɛt bifo i day? (Jɔn 16:​32, 33)

¹² Di nɛt bifo Jizɔs day, i tɛl in disaypul dɛn se: “Una go gɛt prɔblɛm dɛn na  dis wɔl, bɔt una tek at! A dɔn win di wɔl.” (Rid Jɔn 16:​32, 33.) Wetin bin ɛp Jizɔs fɔ gɛt maynd we in ɛnimi dɛn bin trɛtin am ɛn fɔ kɔntinyu fɔ fetful te i day? I bin abop pan Jiova. Jizɔs beg Jiova fɔ protɛkt in disaypul dɛn bikɔs i bin no se dɛn go gɛt di sem prɔblɛm dɛn we i bin gɛt. (Jɔn 17:​11) Wetin mek dis de mek wi gɛt maynd? Na bikɔs Jiova strɔng pas ɔl wi ɛnimi dɛn. (1 Jɔn 4:​4) Jiova de si ɔltin. Wi biliv tranga wan se if wi abop pan Jiova, i go ɛp wi fɔ lɛf fɔ fred ɛn gɛt maynd.

13. Aw Josɛf we kɔmɔt Arimatia bin sho se i gɛt maynd?

¹³ Lɛ wi tɔk bɔt Josɛf we kɔmɔt Arimatia in ɛgzampul. Di Ju pipul dɛn bin rili rɛspɛkt am. In na bin mɛmba na di Sanɛndrin, we na di Ju dɛn ay kɔt. Bɔt we Jizɔs bin de na di wɔl de du di prichin wok, Josɛf nɔ bin gɛt maynd. Jɔn bin se Josɛf na bin “wan pan Jizɔs in disaypul, bɔt bikɔs i bin de fred di Ju dɛn, i nɔ mek pipul dɛn no.” (Jɔn 19:​38) Pan ɔl we Josɛf bin want fɔ no mɔ bɔt di Kiŋdɔm mɛsej, i nɔ bin mek ɔda pipul dɛn no se i gɛt fet pan Jizɔs. Sɔntɛm i bin de fred se pipul dɛn nɔ go rɛspɛkt am igen if dɛn no se in na Jizɔs in disaypul. Bɔt afta we Jizɔs day, di Baybul tɛl wi se Josɛf “mek maynd ɛn go mit Paylet ɛn aks am fɔ Jizɔs in bɔdi.” (Mak 15:​42, 43) Josɛf nɔ bin de fred igen fɔ mek pipul dɛn no se in na Jizɔs in disaypul.

14. Wetin yu fɔ du if yu de fred mɔtalman?

¹⁴ Yusɛf de fred mɔtalman lɛk Josɛf? We yu de na skul ɔ na wokples, yu de shem fɔ tɛl pipul dɛn se yu na Jiova Witnɛs? Yu de fred fɔ bi pɔblisha ɔ fɔ baptayz bikɔs yu de wɔri bɔt wetin ɔda pipul dɛn go tink bɔt yu? Nɔ alaw di we aw yu de fil fɔ mek yu nɔ du wetin yu no se rayt. Pre to Jiova wit ɔl yu at. Beg am fɔ gi yu maynd fɔ du wetin i want. We yu si aw Jiova de ansa yu prea dɛn, dat go mek yu gɛt maynd ɛn trɛnk mɔ ɛn mɔ.—Ayz. 41:​10, 13.

15. Afta we Jizɔs apia to in disaypul dɛn, wetin di gladi-at we dɛn bin gɛt muv dɛn fɔ du? (Lyuk 24:​52, 53)

¹⁵ Di disaypul dɛn at bin rili pwɛl we Jizɔs day. Imajin se yusɛf gɛt dis sem prɔblɛm. Dɛn nɔ bin jɔs lɔs dɛn  padi we dɛn lɛk, bɔt dɛn bin fil se dɛn dɔn lɔs dɛn op. (Lyuk 24:​17-21) Bɔt we Jizɔs apia to dɛn, i tek in tɛm fɔ ɛp dɛn fɔ ɔndastand aw di day we i day mek Baybul prɔfɛsi dɛn kam tru. I bin gi dɛn impɔtant wok bak fɔ du. (Lyuk 24:​26, 27, 45-48) We Jizɔs bin dɔn gɛt layf bak ɛn go na ɛvin 40 dez leta, in disaypul dɛn at nɔ bin pwɛl igen, bifo dat dɛn bin rili gladi. Dɛn bin gladi bikɔs dɛn no se dɛn Masta de alayv ɛn i bin rɛdi fɔ ɛp dɛn fɔ du di nyu wok we i dɔn gi dɛn. Di gladi-at we dɛn bin gɛt bin muv dɛn fɔ kɔntinyu fɔ prez Jiova.—Rid Lyuk 24:​52, 53; Akt 5:​42.

16. Aw wi go falamakata Jizɔs in disaypul dɛn?

¹⁶ Aw wi go falamakata Jizɔs in disaypul dɛn? Wi go gɛt gladi-at ɔltɛm insay di ia we wi de wɔship Jiova, nɔto jɔs insay di tɛm fɔ di Mɛmorial. Bɔt fɔ mek dat apin, wi fɔ put Gɔd in Kiŋdɔm fɔs na wi layf. Fɔ ɛgzampul, bɔku pipul dɛn dɔn ajɔst dɛn tɛm fɔ wok so dat dɛn go prich, atɛnd mitin, ɛn du famili wɔship ɔltɛm. Sɔm dɔn ivin disayd se dɛn nɔ go gɛda bɔku mɔni ɛn prɔpati we ɔda pipul dɛn tink se rili impɔtant so dat dɛn go ebul fɔ du mɔ wok na di kɔngrigeshɔn ɔ go usay dɛn nid mɔ pipul dɛn fɔ prich. Pan ɔl we wi nid fɔ kɔntinyu fɔ bia we wi de sav Jiova, i go rili blɛs wi if wi put in Kiŋdɔm fɔs na wi layf.—Prɔv. 10:​22; Mat. 6:​32, 33.

17. Wetin yu dɔn mekɔp yu maynd fɔ du insay di tɛm fɔ di Mɛmorial? (Luk di pikchɔ.)

¹⁷ Wi de wet fɔ Tyusde, Epril 4 we wi go gɛt di Mɛmorial. Bɔt nɔ wet te da tɛm de bifo yu bigin tink bɔt Jizɔs in layf, in day, ɛn di we aw in ɛn Jiova dɔn sho se dɛn lɛk wi. Yuz ɛni chans we yu gɛt insay di tɛm fɔ di Mɛmorial fɔ du dis. Fɔ ɛgzampul, mek tɛm fɔ rid ɛn tink bɔt di tin dɛn we de na di chat we nem “Di Las Wik we Jizɔs Liv na di Wɔl,” we de insay di Epril 2019 Kristian Layf ɛn Prichin Wok Mitin Buk, pej 4. As yu de du dat, luk fɔ say dɛn na di Baybul we go ɛp yu fɔ sho lɔv, gɛt maynd, gɛt gladi-at, ɛn sho se yu gladi fɔ wetin Jiova ɛn Jizɔs dɔn du fɔ yu. Dɔn, tray fɔ tink bɔt patikyula we dɛn we yu go sho se yu rili gladi fɔ wetin dɛn dɔn du fɔ yu. Wi shɔ se Jizɔs go valyu ɔl wetin yu du fɔ mɛmba am insay di tɛm fɔ di Mɛmorial.—Rɛv. 2:​19.