1-2. Wetin go mek Jiova gladi fɔ wi wɔship?

 WETIN yu kin tink bɔt we yu yɛri di wɔd “wɔship”? Sɔntɛm yu de tink bɔt wan brɔda we nil dɔŋ fɔ pre ɛn tɔk to Jiova bifo i slip. Ɔ sɔntɛm yu de tink bɔt wan famili we de ɛnjɔy fɔ stɔdi di Baybul.

² Dɛn tu ɛgzampul dɛn de na we dɛn fɔ wɔship. Fɔ se Jiova go gladi fɔ dɛn wɔship? Wɛl, Jiova go gladi fɔ dɛn wɔship if dɛn de tray fɔ du wetin i want, ɛn dɛn lɛk ɛn rɛspɛkt am. Wi rili lɛk Jiova. Wi no se i fit fɔ mek wi wɔship am, ɛn wi want fɔ wɔship am di bɛst we.

3. Wetin wi go tɔk bɔt insay dis atikul?

³ Insay dis atikul, wi go lan bɔt di kayn wɔship we Jiova bin gladi fɔ trade trade, ɛn wi go lan bɔt et we dɛn we Jiova want wi fɔ wɔship am tide. As wi de du dat, wi go tink bɔt aw wi go du wi bɛst fɔ wɔship Jiova di rayt we. Dɔn bak, wi go si wetin mek wi de gladi we wi wɔship Jiova di rayt we.

4. Aw Jiova in savant dɛn we bin de bifo di Kristian dɛn tɛm bin sho se dɛn lɛk ɛn rɛspɛkt Jiova?

⁴ Bifo di Kristian dɛn tɛm, fetful man dɛn lɛk Ebɛl,  Noa, Ebraam, ɛn Job bin sho se dɛn lɛk ɛn rɛspɛkt Jiova. Aw? Na bay we dɛn bin de obe Gɔd, put fet pan am, ɛn mek sakrifays dɛn to am. Di Baybul nɔ tɛl wi ɔltin we dɛn bin nid fɔ du fɔ wɔship Jiova. Bɔt dɛn bin du dɛn bɛst fɔ ɔnɔ Jiova, ɛn Jiova bin gladi fɔ dɛn wɔship. Leta, Jiova bin yuz Mozis fɔ gi Ebraam in pikin dɛn lɔ dɛn. Dɛn lɔ dɛn de tɔk bɔku bɔt aw Jiova bin want mek dɛn wɔship am.

5. Aw Jiova bin want di wan dɛn we de fala Jizɔs fɔ wɔship am?

⁵ Afta Jizɔs bin day ɛn gɛt layf bak, Jiova nɔ bin de ɛkspɛkt pipul dɛn fɔ wɔship am akɔdin to di Lɔ we i bin gi di Izrɛlayt dɛn. (Rom. 10:​4) Kristian dɛn bin fɔ fala wan nyu lɔ, we na “Krays in lɔ.” (Gal. 6:​2) Dɛn nɔ go obe dis “lɔ” bay we dɛn kram am ɛn fala bɔku bɔku lɔ dɛn, bɔt na bay we dɛn de falamakata Jizɔs in ɛgzampul ɛn du wetin i de tich dɛn. Tide bak, Kristian dɛn de du dɛn bɛst fɔ fala di Krays fɔ mek Jiova go gladi fɔ dɛn ɛn mek dɛn go “fil fayn.”—Mat. 11:​29.

6. Aw wi go bɛnifit frɔm dis atikul?

⁶ As wi de tɔk bɔt ɛni wan pan dɛn eria dɛn ya pan wi wɔship, aks yusɛf, ‘A de du mi bɛst na dis eria?’ Dɔn sɔntɛm yu kin aks yusɛf bak, ‘A nid fɔ du mɔ fɔ mek Jiova go gladi fɔ mi wɔship mɔ ɛn mɔ?’ Yu fɔ gladi wit wetin yu de du naw, bɔt i go fayn fɔ aks Jiova fɔ ɛp yu fɔ si usay yu go nid fɔ du mɔ.

7. Aw Jiova de si di pre we wi kin pre to am wit ɔl wi at?

⁷ Wi de wɔship Jiova we wi pre to am. Di Baybul kɔmpia wi prea dɛn to di insɛns we dɛn de tek tɛm fɔ pripia we dɛn bin de bɔn na di tabanakul, dɔn leta na di tɛmpul. (Sam 141:​2) Da insɛns de bin gɛt fayn sɛnt we bin de mek Gɔd gladi. Semweso, di pre we wi de pre wit ɔl wi at de mek i “gladi,” ivin if wi nɔ yuz bɔku wɔd dɛn na wi prea. (Prɔv. 15:​8; Dit. 33:​10) Wi gɛt gud rizin fɔ biliv se Jiova kin gladi we wi de tɔk to am bɔt aw wi lɛk am ɛn tɛl am tɛnki. I want wi fɔ tɛl am wetin de mɔna wi, wi op, ɛn wetin wi want. Bifo yu pre to Jiova, yu nɔ tink se i go fayn fɔ tek tɛm tink bɔt wetin yu go want fɔ se? We yu du dat, yu go ebul fɔ gi di bɛst “insɛns” to yu Papa we de na ɛvin.

8. Us fayn chans wi gɛt fɔ prez Gɔd?

⁸ Wi de wɔship Jiova we wi de prez am. (Sam 34:​1) Wi de prez Jiova bay we wi de tɛl ɔda pipul dɛn bɔt aw wi lɛk am ɛn aw wi de kɔle in fayn fayn kwaliti dɛn ɛn di tin dɛn we i de du. Wi go prez Jiova we wi gladi fɔ di tin dɛn we i de du. We wi tek tɛm tink gud wan bɔt aw Jiova dɔn du bɔku gud tin dɛn fɔ wi, wi go gɛt bɔku tin dɛn fɔ prez am fɔ ɔltɛm. Di prichin wok de gi wi fayn chans fɔ ‘prez Gɔd bikɔs dat tan lɛk sakrifays; we wi de yuz wi mɔt fɔ tɔk bɔt am, dat na di frut we wi de gi am.’ (Ibru. 13:​15) Jɔs lɛk aw wi fɔ tek tɛm tink bɔt wetin wi want fɔ se we wi de pre to Jiova, na so bak wi fɔ tek tɛm tink bɔt wetin wi go se to di wan dɛn we wi de prich to. Wi want di prez we wi de prez Jiova we “tan lɛk sakrifays” fɔ bi wi bɛst. Na dat mek wi de tɔk frɔm wi at we wi de prich to pipul dɛn.

9. Lɛk di Izrɛlayt dɛn trade, aw wi de bɛnifit frɔm wi mitin dɛn? Gi wan ɛgzampul bɔt aw yu dɔn bɛnifit.

 ⁹ Wi de wɔship Jiova we wi de atɛnd di mitin dɛn. Jiova bin tɛl di Izrɛlayt dɛn trade se: “Ɔl di man dɛn na Izrɛl fɔ go tri tɛm [insay di] ia na di ples we PAPA GƆD [“Jiova,” NWT] go pik.” (Dit. 16:​16) We dɛn go, nɔbɔdi nɔ go de fɔ protɛkt dɛn os ɛn dɛn fam. Bɔt Jiova bin prɔmis dɛn se: “Nɔbɔdi nɔ go ebul tek una land wɛn una dɔn lɛf . . . fɔ kam apia bifo mi PAPA GƆD [“Jiova,” NWT] una PAPA GƆD.” (Ɛks. 34:​24) Bikɔs di Izrɛlayt dɛn bin rili gɛt fet pan Jiova, dɛn bin de atɛnd dɛn fɛstival dɛn ya ɛvri ia, ɛn dɛn bin de gɛt bɔku bɛnifit. Fɔ ɛgzampul, dɛn bin de ɔndastand Gɔd in Lɔ mɔ ɛn mɔ, dɛn bin de tink bɔt di gud tin dɛn we Jiova de du fɔ dɛn, ɛn dɛn bin de ɛnjɔy fɔ de togɛda wit dɛn kɔmpin dɛn we lɛk Jiova. (Dit. 16:​15) Wisɛf de gɛt dɛn sem kayn bɛnifit dɛn ya we wi de du ɔl wetin wi ebul fɔ atɛnd wi Kristian mitin dɛn. Ɛn tink bɔt aw Jiova kin gladi we wi kin kam na mitin ɛn wi dɔn pripia fɔ gi shɔt kɔmɛnt we wi dɔn tink bɔt gud gud wan.

10. Wetin mek fɔ siŋ na impɔtant pat pan wi wɔship?

¹⁰ Wi de wɔship Jiova we wi de siŋ wit wi brɔda ɛn sista dɛn. (Sam 28:​7) Di Izrɛlayt dɛn bin si di siŋ we dɛn bin de siŋ as impɔtant pat pan dɛn wɔship. Kiŋ Devid bin pik 288 Livayt dɛn fɔ siŋ na di tɛmpul. (1 Kro. 25:​1, 6-8) Tide, wi go sho se wi lɛk wi Gɔd we wi de siŋ siŋ dɛn fɔ prez am. Wi nɔ nid fɔ bi pɔsin we sabi siŋ bifo wi du dat. Tink bɔt dis ɛgzampul: We wi de tɔk, “wi ɔl kin mek mistek bɔku tɛm,” bɔt dat nɔ de stɔp wi fɔ mek wi nɔ tɔk we wi de na di kɔngrigeshɔn ɛn we wi de na fil savis. (Jems 3:​2) Semweso, wi go stil siŋ fɔ prez Jiova ivin if wi tink se wi nɔ gɛt fayn vɔys fɔ siŋ.

11. Akɔdin to wetin de na Sam 48:​13, wetin mek wi fɔ sɛt tɛm fɔ stɔdi di Baybul wit wi famili?

¹¹ Wi de wɔship Jiova we wi de stɔdi in Wɔd ɛn tich wi pikin dɛn bɔt Am. Di de fɔ di Sabat, di Izrɛlayt dɛn nɔ bin de wok, ɛn dɛn bin de yuz da de de fɔ gɛt tayt padi biznɛs wit Jiova. (Ɛks. 31:​16, 17) Di fetful wan dɛn bin de tich dɛn pikin dɛn bɔt Jiova ɛn aw i gud. Wisɛf sɛf fɔ sɛt tɛm fɔ rid ɛn stɔdi Gɔd in Wɔd. Dis na pat pan wi wɔship to Jiova, ɛn i go ɛp wi fɔ kam nia am. (Sam 73:​28) Ɛn we wi de stɔdi togɛda as famili, wi de ɛp di nyu jɛnareshɔn, we na wi pikin dɛn, fɔ mek dɛn gɛt tayt padi biznɛs wit wi Papa we de na ɛvin.—Rid Sam 48:​13.

12. Wetin wi lan frɔm aw Jiova bin si di wok we di wan dɛn we bin de bil di tabanakul bin de du?

¹² Wi de wɔship Jiova we wi de ɛp fɔ bil ɛn kia fɔ di ples dɛn we wi de yuz fɔ wɔship. Di Baybul se di wok fɔ mek di tabanakul ɛn di fɔnichɔ dɛn we fɔ de insay de na bin “oli wok.” (Ɛks. 36:​1, 4, NWT) Tide bak, Jiova de si di wok fɔ bil Kiŋdɔm Ɔl dɛn ɛn ɔda bildin dɛn fɔ wɔship am as oli wok. Sɔm brɔda ɛn sista dɛn de spɛn bɔku tɛm de du dɛn wok dɛn de. Wi gladi fɔ dis impɔtant we aw dɛn de ɛp fɔ du di Kiŋdɔm wok, nɔto so? As wi ɔl no, dɛnsɛf de du di prichin wok. Sɔntɛm sɔm pan dɛn ivin want fɔ bi payɔnia dɛn. Ɛlda dɛn de sho se dɛn de sɔpɔt di bildin wok bay we dɛn de alaw dɛn brɔda ɛn sista dɛn ya we de wok tranga wan fɔ bi payɔnia dɛn, we dɛn kwalifay. Ilɛksɛf wi sabi du bildin wok ɔ wi nɔ sabi, wi  ɔl kin ɛp fɔ klin di bildin dɛn ɛn kia fɔ dɛn.

13. Aw wi fɔ si di kɔntribyushɔn we wi kin gi fɔ sɔpɔt di Kiŋdɔm wok?

¹³ Wi de wɔship Jiova we wi sɔpɔt di Kiŋdɔm wok wit wi kɔntribyushɔn dɛn. Dɛn bin de ɛkspɛkt di Izrɛlayt dɛn fɔ briŋ gift fɔ Jiova we dɛn bin de atɛnd di fɛstival dɛn. (Dit. 16:​16) Dɛn fɔ briŋ akɔdin to wetin dɛn ebul fɔ gi. Na da we de dɛn bin de sho se dɛn gladi fɔ ɔltin we Jiova dɔn du fɔ dɛn fɔ mek dɛn gɛt tayt padi biznɛs wit am. Aw wi go sho se wi lɛk Jiova ɛn wi gladi fɔ ɔl di tin dɛn we i dɔn gi wi fɔ gɛt tayt padi biznɛs wit am? Wan we na bay we wi de gi mɔni as kɔntribyushɔn to di lokal kɔngrigeshɔn ɛn to di wɔlwayd wɔk, akɔdin to wetin wi ebul fɔ gi. Apɔsul Pɔl put am dis we: “If pɔsin rɛdi fɔ gi, i fayn mɔ mek i gi akɔdin to wetin i gɛt, nɔto akɔdin to wetin i nɔ gɛt.” (2 Kɔr. 8:​4, 12) Jiova kin rili gladi wit ɛnitin we wi ebul fɔ gi am, ivin if i nɔ bɔku.—Mak 12:​42-44; 2 Kɔr. 9:​7.

14. Akɔdin to Prɔvabs 19:​17, aw Jiova de si di ɛp we wi de ɛp wi brɔda ɔ sista we nid ɛp?

¹⁴ Wi de wɔship Jiova we wi de ɛp wi kɔmpin Kristian dɛn we nid ɛp. Jiova bin prɔmis fɔ pe bak di Izrɛlayt dɛn we bin de du gud to po pipul dɛn. (Dit. 15:​7, 10) Fɔ tru, ɛnitɛm we wi ɛp wi brɔda ɔ sista we nid ɛp, Jiova de si am as gift to Am. (Rid Prɔvabs 19:​17.) Fɔ ɛgzampul, we di Kristian dɛn we bin de na Filipay bin sɛn gift to Pɔl di tɛm we i bin de na prizin, i bin se di gift na “sakrifays we Gɔd gri wit ɛn we i lɛk.” (Fil. 4:​18) Tink bɔt di wan dɛn we de na yu kɔngrigeshɔn ɛn aks yusɛf, ‘Pɔsin de we a go ebul fɔ ɛp?’ Jiova kin gladi we i si se wi de yuz wi tɛm, wi trɛnk, wetin wi sabi, ɛn di tin dɛn we wi gɛt fɔ ɛp di wan dɛn we nid ɛp. I de si dat as pat pan wi wɔship.—Jems 1:​27.

15. Wi nid fɔ yuz wi tɛm ɛn ɛnaji fɔ wɔship Jiova di rayt we, bɔt wetin mek dat nɔto ebi lod?

¹⁵ Wi nid fɔ yuz wi tɛm ɛn ɛnaji fɔ wɔship Jiova di rayt we. Bɔt dat nɔto ebi lod. (1 Jɔn 5:​3) Wetin mek? Na bikɔs na lɔv fɔ Jiova de mek wi wɔship am. Imajin se wan smɔl pikin want fɔ gi in papa sɔntin. Sɔntɛm i go spɛn lɔng tɛm fɔ drɔ pikchɔ fɔ in papa. Bɔt di bɔbɔ nɔ go rigrɛt di tɛm we i spɛn fɔ du dat. Wetin mek? Na bikɔs i lɛk in papa ɛn i gladi fɔ gi am da gift de. Semweso, bikɔs wi lɛk Jiova, wi gladi fɔ yuz wi tɛm ɛn ɛnaji fɔ wɔship am di rayt we.

16. Akɔdin to Ibruz 6:​10, aw Jiova de si wetin ɛniwan pan wi de du fɔ mek i gladi?

¹⁶ Mama ɛn papa dɛn we lɛk dɛn pikin dɛn nɔ de ɛkspɛkt se dɛn ɔl fɔ gi dɛn di sem gift. Dɛn no se ɔl dɛn pikin dɛn difrɛn, ɛn dɛn ɔl ebul fɔ du difrɛn tin dɛn. Semweso, wi Papa we de na ɛvin ɔndastand wetin ɛniwan pan wi ebul fɔ du. Sɔntɛm yu ebul fɔ du pas bɔku pipul dɛn we yu sabi ɛn lɛk. Ɔ sɔntɛm yu nɔ ebul fɔ du bɛtɛ tin lɛk ɔda pipul dɛn, sɔntɛm bikɔs ɔf yu ej, yu wɛlbɔdi, ɔ di tin dɛn we yu gɛt fɔ du na yu famili. Nɔ pwɛl-at. (Gal. 6:​4) Jiova nɔ go fɔgɛt yu wok. Wans yu gi am yu bɛst ɛn yu du am fɔ di rayt rizin, i go gladi. (Rid Ibruz 6:​10.) Jiova de ivin si wetin yu want fɔ du fɔ am. I want yu fɔ gladi ɛn satisfay wit wetin yu ebul du fɔ wɔship am.

17. (a) If i nɔ izi fɔ du sɔm tin dɛn we wi fɔ du fɔ wɔship Jiova, wetin wi fɔ du? (b) Aw wan pan di tin dɛn we de na di bɔks we nem “ Gɛt Mɔ Gladi-At,” dɔn ɛp yu?

 ¹⁷ Wetin wi go du if wi si se i nɔ izi fɔ mek wi du sɔm pan di tin dɛn we wi jɔs dɔn tɔk bɔt, lɛk fɔ du wi pasɔnal stɔdi ɔ fɔ du di prichin wok? I go mɔs bi se wi go kam fɔ si se di mɔ wi de du dɛn tin dɛn ya, na di mɔ wi de ɛnjɔy fɔ du dɛn ɛn bɛnifit frɔm dɛn. Sɔntɛm wi go kɔmpia wi wɔship to sɔntin we wi de du, lɛk we wi de ɛksasayz ɔ lan aw fɔ ple myuzik instrumɛnt. If wi de du am wan wantɛm, wi nɔ go ebul fɔ go bifo. Bɔt wetin yu tink se go apin if wi disayd fɔ du am ɛvride? Sɔntɛm wi go stat fɔ du am fɔ shɔt tɛm ɛn leta wi bigin du am fɔ lɔng tɛm. As wi de si di gud rizɔlt we wi de gɛt frɔm di tray we wi de tray, wi go gladi mɔ fɔ de du am, ɛn wi go rili ɛnjɔy am. Yu si aw wi go aplay dis ɛgzampul to wi wɔship?

18. Wetin na di tin we impɔtant pas ɔl we wi go ebul fɔ du? Wetin go apin we wi du dat?

¹⁸ Di tin we impɔtant pas ɔl we wi go ebul fɔ du na fɔ gi wi bɛst to Jiova we wi de wɔship am. If wi du dat, wi go gɛt gladi-at, wi layf go gɛt minin, ɛn wi go gɛt di op fɔ wɔship Jiova sote go. (Prɔv. 10:​22) Wi ɔlrɛdi gɛt kolat bikɔs wi no se Jiova de ɛp in savant dɛn we dɛn gɛt prɔblɛm dɛn. (Ayz. 41:​9, 10) Fɔ tru, wi gɛt gud rizin dɛn fɔ gladi we wi de wɔship wi Papa we lɛk wi, ɛn we fit “fɔ gɛt di glori [ɛn] di ɔnɔ” frɔm ɔl di tin dɛn we i mek.—Rɛv. 4:​11.