1-2. (a) Wetin go ɛp wi fɔ kɔntinyu fɔ bia wit prɔblɛm dɛn ɛvride? Ɛksplen. (b) Wetin wi go tɔk bɔt insay dis atikul?

YU MƐMBA ɛni prɔblɛm we yu bin gɛt trade we mek yu tɔk se, “if i lɛf to mi wan a no se a nɔ fɔ bin ɛva ebul fɔ bia da prɔblɛm de?” Bɔku pan wi go dɔn tɔk da we de. Sɔntɛm yu bin tɔk dat afta we yu tink bɔt aw yu bin ebul fɔ bia wit prɔblɛm dɛn lɛk siriɔs sik ɔ we pɔsin we yu lɛk day. We yu tink bɔt da prɔblɛm de, yu kam fɔ si se yu bin ebul fɔ bia ɛvride bikɔs Jiova in oli spirit bin gi yu “di pawa we pas mɔtalman in yon.”—2 Kɔr. 4:​7-9, NW.

² Wi nid bak di oli spirit fɔ ɛp wi fɔ tinap tranga wan agens di tin dɛn we pipul dɛn de du na Setan in wikɛd wɔl. (1 Jɔn 5:​19) Dɔn bak, wi nid trɛnk fɔ tinap tranga wan agens “di dimɔn dɛn.” (Ɛfi. 6:​12, NW) Wi go tɔk naw bɔt tu we dɛn aw di oli spirit kin ɛp wi fɔ bia wit ɔl dɛn prɔblɛm dɛn ya. Dɔn, wi go tɔk bak bɔt wetin wi go du fɔ rili bɛnifit frɔm di oli spirit.

3. Us wan we we Jiova de ɛp wi fɔ bia wit wi prɔblɛm dɛn?

³ Jiova in oli spirit de ɛp wi bay we i de gi wi di pawa ɔ trɛnk fɔ du ɔl wetin wi nid fɔ du pan ɔl we wi de gɛt prɔblɛm dɛn. Pan ɔl we di apɔsul Pɔl bin gɛt prɔblɛm dɛn, i bin no se i go ebul fɔ kɔntinyu fɔ sav Jiova bikɔs i bin abop pan “Krays in pawa.” (2 Kɔr. 12:​9) We Pɔl bin de travul fɔ du in mishɔnari wok di sɛkɔn tɛm, i nɔ bin jɔs de wok tranga wan fɔ prich, bɔt i bin de wok bak fɔ kia fɔ insɛf. We i bin de na Kɔrint, i bin de na Akwila ɛn Prisila dɛn os. Na tɛnt Akwila ɛn Prisila bin de mek. Bikɔs Pɔl  insɛf bin sabi aw fɔ mek tɛnt, i bin de wok wit dɛn wan wantɛm. (Akt 18:​1-4) Di oli spirit bin gi Pɔl di trɛnk fɔ wok fɔ kia fɔ insɛf ɛn fɔ prich.

4. Frɔm wetin de na 2 Kɔrintians 12:​7b-9 (NW), us prɔblɛm Pɔl bin gɛt?

⁴ Rid 2 Kɔrintians 12:​7b-9, NW. Insay dɛn vas dɛn ya, wetin Pɔl bin min we i tɔk se i bin gɛt “chukchuk na [in] bɔdi”? If yu gɛt chukchuk na yu bɔdi, yu go de fil bɔku pen. So Pɔl bin min se i bin de sɔfa wit sɔm prɔblɛm dɛn we i bin gɛt. I bin se in prɔblɛm dɛn tan lɛk we “wan pan Setan in enjɛl dɛn” de kɔntinyu fɔ “slap” (“bit,” futnot.) am. I go bi se nɔto Setan ɛn in dimɔn dɛn bin de mek prɔblɛm dɛn we tan lɛk chukchuk bin de mit Pɔl. Bɔt we dɛn wikɛd dimɔn dɛn ya notis Pɔl in prɔblɛm dɛn, i go mɔs bi se dɛn bin tray fɔ mek i wɔs. We jɔs tan lɛk we sɔmbɔdi de push chukchuk rayt insay pɔsin in bɔdi. Wetin Pɔl bin du?

5. Aw Jiova bin ansa Pɔl in prea?

⁵ Fɔs, Pɔl bin want fɔ lɛ Jiova pul di “chukchuk” na in bɔdi. I bin tɔk se: “A dɔn beg di Masta [Jiova] tri tɛm . . . fɔ lɛ i go kɔmɔt pan mi.” Bɔt pan ɔl we Pɔl bin pre, di chukchuk bin stil de na in bɔdi. Fɔ se dis min se Jiova nɔ bin ansa Pɔl in prea? Nɔ, nɔto so i bi. I bin ansa in prea. Jiova nɔ bin pul di prɔblɛm, bɔt i bin gi Pɔl di trɛnk fɔ bia am. Jiova bin tɔk se: “Na we pɔsin wik, na in a kin rili sho mi pawa.” (2 Kɔr. 12:​8, 9, NW) Ɛn Gɔd bin ɛp Pɔl fɔ mek i go ebul fɔ kɔntinyu fɔ gɛt pis ɛn gladi at!—Fil. 4:​4-7.

6. (a) Aw Jiova kin ansa wi prea dɛn? (b) Us prɔmis dɛn de na di skripchɔ dɛn na di paregraf we go gi yu trɛnk?

⁶ Yu dɔn ɛva beg Jiova jɔs lɛk Pɔl fɔ lɛ i pul di prɔblɛm we yu gɛt? Sɔntɛm yu dɔn de pre bɔku tɛm to Jiova bɔt di prɔblɛm stil de, ɛn i de ivin wɔs mɔ ɛn mɔ. Fɔ se dat de mek yu tink se sɔntɛm Jiova vɛks pan yu? If na so i bi, na fɔ mɛmba Pɔl in ɛgzampul. Jɔs lɛk aw Jiova bin ansa in prea, na so bak i go ansa yu prea! Sɔntɛm Jiova nɔ go pul di prɔblɛm. Bɔt i go yuz in oli spirit fɔ gi yu di trɛnk we yu nid fɔ bia di prɔblɛm. (Sam 61:​3, 4) Sɔntɛm wi prɔblɛm go “ib wi dɔŋ,” bɔt Jiova nɔ go ɛva lɛf wi.—2 Kɔr. 4:​8, 9; Fil. 4:​13, NW.

7-8. (a) Aw di oli spirit tan lɛk briz? (b) Aw Pita bin sho aw di oli spirit de wok?

⁷ Us ɔda we di oli spirit kin ɛp? Wi kin kɔmpia di oli spirit to briz we de blo. We briz de blo na di rayt say usay bot de go, dat de ɛp am fɔ rich sef wan na di say we i de go pan ɔl we di si rɔf. Semweso, di oli spirit kin ɛp wi fɔ kɔntinyu fɔ sav Jiova te to di tɛm we wi go de na di nyu wɔl we Gɔd dɔn prɔmis, pan ɔl we wi gɛt prɔblɛm dɛn.

⁸ Bikɔs di apɔsul Pita na bin fishaman, i bin no bɔku tin bɔt aw fɔ kɔntrol bot na wata. I go bi se na dat mek we i bin de sho aw di oli spirit de wok, i yuz wɔd dɛn we gɛt fɔ du wit aw dɛn de kɔntrol bot na wata. I bin rayt se: “Nɔto di prɔfɛt dɛnsɛf bin jɛs sidɔm tink ɛn tɔk wetin dɛn want, bɔt na Gɔd in Spirit bin tɛl dɛn di wɔd dɛn we Gɔd want dɛn fɔ tɔk.” Di Grik wɔd we dɛn transelet “tɛl” min fɔ “gayd”—2 Pit. 1:​21

9. Us wɔd Pita yuz fɔ tɔk bɔt di wɔd “gayd”?

⁹ Us wɔd Pita yuz fɔ tɔk bɔt di wɔd “gayd”? Lyuk bin yuz dis sem kayn Grik wɔd, we i bin de rayt di Baybul buk we  nem Akt fɔ tɔk bɔt bot we briz de ‘kɛr go’ na wata. (Akt 27:​15) Wan masta sabi bukman we stɔdi di Baybul bin tɔk se, we Pita bin rayt se na di oli spirit bin “gayd” di wan dɛn we rayt di Baybul wetin fɔ rayt, i bin yuz wɔd we go mek pipul dɛn tink bɔt aw dɛn de kɔntrol bot na wata. Pita bin de tɔk se jɔs lɛk aw briz de push bot na wata fɔ go di rayt say we i fɔ go, na so di oli spirit bin dayrɛkt di wan dɛn we rayt di Baybul fɔ du dɛn wok. Di sem masta sabi bukman bin tɔk se: “Di wan dɛn we rayt di Baybul bin tan lɛk bot dɛn we dɔn opin dɛn klos dɛn we de kɔntrol dɛn. Dɛn bin rɛdi fɔ du di wok we di oli spirit bin de dayrɛkt dɛn fɔ du.” Jiova bin du wetin i nid fɔ du. I bin gi dɛn “di briz” ɔ oli spirit. Di wan dɛn we rayt di Baybul bin du di wok we dɛn gi dɛn fɔ du. Dɛn fala di we aw di oli spirit bin de dayrɛkt dɛn.

10-11. Us tu tin dɛn wi nid fɔ du fɔ mek shɔ se di oli spirit de dayrɛkt wi? Gi wan ɛgzampul.

¹⁰ Na tru se tide, Jiova nɔ de yuz in oli spirit fɔ mek lɛ pipul dɛn rayt di buk dɛn na di Baybul. Bɔt, Jiova stil de yuz in oli spirit fɔ dayrɛkt in savant dɛn. Jiova stil de du in pat. Aw wi go mek shɔ se di oli spirit de dayrɛkt wi? Wi nid fɔ mek shɔ se wi de kɔntinyu fɔ du wi pat. Aw wi go du dat?

¹¹ Tink bɔt dis ɛgzampul. Fɔ bɛnifit frɔm di briz we de blo, pɔsin we de kɔntrol bot nid fɔ du tu tin dɛn. Fɔs, i nid fɔ dayrɛkt di bot na di say we di briz de blo. Bɔt di bot nɔ go muv if i stil de na di waf ɔ say usay bot de slam we de fa frɔm di say we di briz de blo. Sɛkɔn, i nid fɔ es ɛn opin di klos we de kɔntrol di bot fayn fayn wan. Bɔt ilɛksɛf briz de blo, in bot go muv nɔmɔ if di klos we de kɔntrol di bot fulɔp wit briz. Semweso, wi go ebul  fɔ kɔntinyu fɔ sav Jiova nɔmɔ if di oli spirit de ɛp wi. Fɔ lɛ di oli spirit ɛp wi, wi nid fɔ du tu tin dɛn. Fɔs, wi fɔ du di tin dɛn we Gɔd in oli spirit de dayrɛkt in savant dɛn fɔ du. Sɛkɔn, wi fɔ rɛdi fɔ du ɔl dɛn tin dɛn ya di bɛst we aw wi ebul fɔ du am. (Sam 119:​32) We wi de du dɛn tin dɛn ya, di oli spirit go gi wi di trɛnk fɔ kɔntinyu fɔ sav Jiova fetful wan te wi go na Gɔd in nyu wɔl.

12. Wetin wi de kam tɔk bɔt naw?

¹² So wi dɔn tɔk bɔt tu we dɛn aw di oli spirit de ɛp wi. Oli spirit de gi wi trɛnk ɛn ɛp wi fɔ kɔntinyu fɔ de fetful wan we prɔblɛm dɛn de mit wi. Dɔn bak, i de ɛp wi fɔ go bifo ɛn fɔ kɔntinyu fɔ waka na di rod we go mek wi gɛt layf. Lɛ wi tɔk naw bɔt 4 tin dɛn we wi fɔ du we go mek wi rili bɛnifit frɔm di oli spirit.

13. Frɔm wetin de na 2 Timoti 3:​16, 17 (NW), wetin di Baybul de du fɔ wi? Wetin wi fɔ du?

¹³ Fɔs, na fɔ stɔdi Gɔd in Wɔd. (Rid 2 Timoti 3:​16, 17, NW.) Di Grik wɔd we dɛn translet “na Gɔd dayrɛkt” min “Gɔd put.” Gɔd yuz in oli spirit fɔ “put” wetin i want na di wan dɛn we rayt di Baybul dɛn maynd. We wi de rid di Baybul ɛn tink gud gud wan bɔt wetin wi dɔn rid, di tin dɛn we Gɔd de tich go de na wi at ɛn wi maynd. Dɛn tin dɛn de we Gɔd de tich go mek wi chenj di we aw wi de liv wi layf so dat wi go mek i gladi. (Ibru 4:​12) Bɔt fɔ lɛ wi go rili bɛnifit frɔm di oli spirit, wi nid fɔ fɛn tɛm fɔ stɔdi di Baybul ɔltɛm ɛn fɔ tink gud gud wan bɔt wetin wi de rid. Gɔd in Wɔd go ɛp wi pan ɔl wetin wi de tɔk ɛn du.

14. (a) Wetin mek wi se Jiova in oli spirit kin de na wi Kristian mitin dɛn? (b) We wi atɛnd di mitin dɛn, wetin go ɛp wi fɔ rili bɛnifit frɔm di oli spirit?

¹⁴ Sɛkɔn, na fɔ wɔship Gɔd togɛda. (Sam 22:​22) Jiova in spirit kin de na wi Kristian mitin dɛn. (Rɛv. 2:​29) Wetin mek wi se so? Na bikɔs we wi de wit wi kɔmpin Kristian dɛn fɔ wɔship Jiova, wi de pre fɔ in oli spirit, wi de siŋ Kiŋdɔm siŋ dɛn we kɔmɔt frɔm Gɔd in Wɔd, ɛn lisin to tɔk dɛn we brɔda dɛn we di oli spirit dɔn pik de gi frɔm di Baybul. Ɛn na di sem oli spirit de ɛp sista dɛn fɔ pripia ɛn du dɛn pat dɛn. Fɔ rili bɛnifit frɔm di oli spirit, wi nid fɔ pripia fɔ di mitin dɛn so dat wi go gi kɔmɛnt. Bay da we de, wi go rɛdi fɔ bɛnifit frɔm di oli spirit jɔs lɛk bot we “di klos we de kɔntrol am opin.”

15. Aw di oli spirit de ɛp wi fɔ du di prichin wok?

¹⁵ Tɔd, na fɔ du di prichin wok. We wi yuz di Baybul fɔ prich ɛn fɔ tich, wi de alaw di oli spirit fɔ ɛp wi fɔ du di prichin wok. (Rom 15:​18, 19) Fɔ lɛ wi go rili bɛnifit frɔm Gɔd in oli spirit, wi nid fɔ de prich ɔltɛm ɛn yuz di Baybul ɛnitɛm we wi gɛt di chans. Wan we aw wi go ebul fɔ tɔk fayn fayn wan to pipul dɛn we wi de prich na bay we wi de yuz di say we se Wetin Wi Go Se na Wi Kristian Layf ɛn Prichin Wok Mitin Buk.

16. Wetin na di men we aw wi go gɛt di oli spirit?

¹⁶ Di nɔmba 4 we, na fɔ pre to Jiova. (Mat. 7:​7-11; Lyuk 11:​13) Di men we aw wi go gɛt oli spirit na bay we wi pre to Jiova fɔ lɛ i gi wi am. Natin nɔ de we go mek wi prea nɔ rich to Jiova ɔ we go mek wi nɔ gɛt Gɔd in oli spirit. Oli spirit kin ɛp wi ilɛksɛf wi de na prizin, ɛn Setan nɔ go ebul du ɛnitin fɔ stɔp wi fɔ lɛ wi nɔ gɛt am. (Jems 1:​17) Aw wi fɔ pre so dat wi go rili bɛnifit frɔm di oli spirit? Fɔ ansa da  kwɛstyɔn de, lɛ wi lan mɔ bɔt prea frɔm wan parebul we de insay Lyuk in Gɔspɛl nɔmɔ. *

17. Us lɛsin wi lan bɔt prea na di parebul we Jizɔs bin pul na Lyuk 11:​5-9, 13, (NW)?

¹⁷ Rid Lyuk 11:​5-9, 13, NW. Jizɔs in parebul sho aw wi fɔ pre fɔ oli spirit. Insay da parebul de, di man bin gɛt wetin i nid “bikɔs i kɔntinyu fɔ aks.” I nɔ bin fred fɔ aks in padi fɔ ɛp am pan ɔl we na bin midul nɛt. (Luk di stɔdi not “beg beg am” na pej 4 na di Julay 2018 Wi Kristian Layf ɛn Prichin Wok Mitin Buk.) Aw Jizɔs bin yuz dis parebul fɔ tich bɔt prea? I bin tɔk se: “Una kɔntinyu fɔ aks ɛn una go gɛt wetin una aks fɔ; una kɔntinyu fɔ luk ɛn una go fɛn; una kɔntinyu fɔ nak ɛn di domɔt go opin.” So wetin na di lɛsin fɔ wi? Fɔ lɛ di oli spirit go ɛp wi, wi fɔ kɔntinyu fɔ pre fɔ am ɛn nɔ taya.

18. Frɔm di parebul we Jizɔs bin pul, wetin mek wi biliv tranga wan se Jiova go gi wi in oli spirit?

¹⁸ Jizɔs in parebul ɛp wi fɔ si bak wetin mek Jiova de gi wi in oli spirit. Di man insay da parebul de bin want fɔ kia fɔ in strenja fayn fayn wan. I bin tink se i nid fɔ gi it to in strenja we bin kam fɛn am midul nɛt, bɔt i nɔ bin gɛt natin fɔ gi am. Jizɔs bin tɔk se di man in neba bin gi am bred bikɔs i bin kɔntinyu fɔ aks am. Wetin Jizɔs bin de tich? If mɔtalman we nɔ pafɛkt rɛdi fɔ ɛp in neba we kɔntinyu fɔ aks am fɔ ɛp, wi fɔ biliv tranga wan se wi Papa we de na ɛvin rɛdi fɔ ɛp di wan dɛn we de kɔntinyu fɔ aks am fɔ in oli spirit! So, wi fɔ biliv tranga wan se Jiova go ansa wi prea we wi aks am fɔ in oli spirit.—Sam 10:​17; 66:​19.

19. Wetin mek wi shɔ se wi go ebul bia?

¹⁹ Wi shɔ se wi go ebul fɔ bia wi prɔblɛm dɛn pan ɔl we Setan nɔ de taya fɔ atak wi. Wetin mek? Bikɔs oli spirit de ɛp wi tu we dɛn. Fɔs, i de gi wi di trɛnk we wi nid fɔ bia wi prɔblɛm dɛn. Sɛkɔn, i de ɛp wi fɔ kɔntinyu fɔ sav Jiova te wi go na di nyu wɔl. Lɛ wi mekɔp wi maynd fɔ rili bɛnifit frɔm di oli spirit!