Di Baybul in Ansa to Sɔm Kwɛstyɔn Dɛn
Yu tink se enjɛl dɛn go ebul fɔ ɛp wi?
Jɔs lɛk aw di enjɛl dɛn bin ɛp Gɔd in fetful savant, Daniɛl we bin trade trade, na so di enjɛl dɛn de ɛp pipul dɛn tide fɔ lan di gud nyus
Jiova Gɔd bin dɔn mek di enjɛl dɛn lɔn lɔn tɛm bifo i mek mɔtalman. Ɛn di enjɛl dɛn rili bɔku. (Job 38:4, 7) Dɛn ɔl na spirit, dɛn pawaful, ɛn dɛn de wok fɔ Gɔd. Sɔntɛnde Gɔd kin sɛn in enjɛl dɛn fɔ gayd ɛn protɛkt in savant dɛn we de na dis wɔl. (Sam 91:10, 11) Tide, enjɛl dɛn de ɛp pipul dɛn fɔ lan di gud nyus we Jizɔs bin tɛl tru Kristian dɛn fɔ prich bɔt.—Rid Rɛvɛleshɔn 14:6, 7.
Wetin yu tink, yu fil se wi fɔ pre to enjɛl dɛn fɔ lɛ dɛn ɛp wi? Nɔ. Prea na wan we fɔ wɔship Gɔd, so na to Gɔd nɔmɔ wi fɔ pre. (Rɛvɛleshɔn 19:10) Di enjɛl dɛn na Gɔd in savant dɛn, so na wetin Gɔd tɛl dɛn na in nɔmɔ dɛn de du, nɔto wetin mɔtalman tɛl dɛn. So na to Gɔd nɔmɔ wi fɔ de pre to ɔltɛm. Ɛn wi fɔ pre to Gɔd tru Jizɔs.—Rid Sam 103:20, 21; Matyu 26:53.
Bad enjɛl dɛn de?
Jɔs lɛk aw Gɔd gi mɔtalman fridɔm fɔ du wetin dɛn want, na so di enjɛl dɛnsɛf gɛt fridɔm fɔ du wetin rayt ɔ wetin rɔng. Bɔt i sɔri fɔ no se bɔku enjɛl dɛn disayd fɔ tɔn dɛn bak pan Gɔd. (Pita In Sɛkɔn Lɛta 2:4) Di fɔs enjɛl we tɔn in bak pan Gɔd na Setan; ɔda enjɛl dɛn bak bin fala Setan, ɛn dɛn enjɛl dɛn ya dɔn tɔn to dɛbul. Bɔt Gɔd bin yuz Jizɔs fɔ pul Setan ɛn in dɛbul dɛn kɔmɔt na ɛvin ɛn ib dɛn dɔŋ na di wɔl.—Rid Rɛvɛleshɔn 12:7-9.
Frɔm 1914, di bɔku bad bad tin dɛn we dɔn de apin na di wɔl dɔn sho se i nɔ go te igen Gɔd go stɔp ɔl di bad tin dɛn we Setan ɛn in dɛbul dɛn de du. We Gɔd go dɔn du dis, i go mek dis wɔl fayn fayn wan lɛk aw i bin want am fɔ de trade.—Rid Rɛvɛleshɔn 12:12; 21:3, 4.
