1. Us tɔk bɔku pipul dɛn dɔn yɛri?

BƆKU pipul dɛn go dɔn yɛri dis tɔk: ‘Yu nɔ kin valyu wetin yu gɛt pas te i kɔmɔt na yu an.’ Dis dɔn ɛva bi to yu? We pɔsin kin dɔn gɛt sɔntin frɔm we i smɔl, i nɔ kin valyu am tumɔs. Fɔ ɛgzampul, pɔsin we de na famili we gɛt mɔni, nɔ kin valyu di tin dɛn we i gɛt. Na so sɔm yɔŋ pipul dɛn kin du. Bikɔs dɛn nɔ liv lɔng yet, dɛn nɔ kin no wetin rili impɔtant na layf.

2, 3. (a) Wetin yɔŋ pipul dɛn we na Kristian nɔ fɔ du? (b) Wetin go ɛp wi fɔ valyu wetin wi dɔn gɛt?

² If yu na yɔŋ pɔsin, wetin impɔtant to yu? Bɔku yɔŋ pipul dɛn jɔs bisin bɔt wetin dɛn go gɛt na di wɔl, dat na, fɔ lɛ dɛn pe dɛn bɔku mɔni, gɛt fayn os, ɛn gɛt di nyu tin dɛn we dɛn jɔs mek, lɛk TV, fon, ɛn ɔda tin dɛn. Bɔt if na dis nɔmɔ wi de tink bɔt, dat min se sɔm tin de we rili impɔtant we wi nɔ gɛt, dat na, di jɛntri we valyu na Gɔd in yay. Ɛn i sɔri fɔ no se bɔku bɔku pipul dɛn nɔ ivin bigin fɔ luk dis jɛntri yet. Yɔŋ wan dɛn we dɛn mɛn na di trut fɔ tek  tɛm mek dɛn nɔ fɔgɛt di fayn fayn tin dɛn we dɛn mama ɛn papa dɔn tich dɛn bɔt Jiova Gɔd. (Mat. 5:3) If yu nɔ valyu di tin dɛn we dɛn dɔn tich yu bɔt Jiova, prɔblɛm dɛn go mit yu we go ambɔg yu te yu day.

³ Bɔt yu go ebul mek dis tin nɔ apin to yu. Wetin go ɛp yu fɔ valyu di tin dɛn we dɛn dɔn tich yu bɔt Jiova? Lɛ wi tɔk bɔt sɔm ɛgzampul dɛn na di Baybul we go mek yu no wetin mek i impɔtant fɔ valyu di tin dɛn we dɛn dɔn tich yu bɔt Jiova. Nɔto di yɔŋ wan dɛn nɔmɔ dɛn ɛgzampul ya go ɛp, dɛn go ɛp ɔlman we na Kristian fɔ valyu di tin dɛn we i dɔn lan bɔt Jiova.

4. Wetin 1 Samiɛl 8:1-5 tɛl wi bɔt Samiɛl in pikin dɛn?

⁴ Di Baybul tɔk bɔt sɔm pipul dɛn we lan bɔt Jiova, bɔt we nɔ valyu wetin dɛn lan bɔt am. Dis kayn tin bin apin na di prɔfɛt Samiɛl in famili. Samiɛl bigin fɔ sav Jiova we i smɔl ɛn in padi biznɛs wit Gɔd bin tayt. (1 Sam. 12:1-5) Samiɛl bin sɛt fayn ɛgzampul fɔ in bɔy pikin dɛn we na Joɛl ɛn Abayja. Ɛn i bin fɔ dɔn fayn if dɛn bin fala dɛn papa in ɛgzampul. Bɔt dɛn nɔ bin valyu di tin dɛn we dɛn papa bin tich dɛn, ɛn dɛn bin de biev bad we. Di Baybul se “dɛn nɔ bin de jɔj di rayt we” lɛk aw dɛn papa bin de jɔj.—Rid 1 Samiɛl 8:1-5.

5, 6. Wetin Josaya in pikin dɛn ɛn in granpikin, bin du?

⁵ Na di sem we Kiŋ Josaya in bɔy pikin dɛn bin biev. Josaya bin sɛt fayn ɛgzampul we i de wɔship Jiova. We dɛn bin si di buk usay Gɔd in Lɔ bin rayt ɛn rid am to Josaya, i tray tranga wan fɔ du wetin Jiova se. Josaya bin pul aydɔl wɔship ɛn juju biznɛs na di land, ɛn i bin ɛnkɔrej di pipul dɛn fɔ obe Jiova. (2 Kiŋ 22:8; 23:2, 3, 12-15, 24, 25) Dis na bin fayn ɛgzampul we i sɛt fɔ in pikin dɛn. Afta sɔm tɛm, tri pan in bɔy pikin dɛn ɛn wan pan in granpikin dɛn, bin kam fɔ bi kiŋ, bɔt dɛn nɔn nɔ bin valyu di tin dɛn we dɛn bin dɔn lan bɔt Jiova.

⁶ Josaya in pikin we na Jɛoahaz, bin bi kiŋ afta am, bɔt i bin de “du wetin bad na Jiova in yay.” Na tri mɔnt nɔmɔ i rul fɔ, na in wan kiŋ na Ijipt kam ol am ɛn kɛr am go, ɛn na de i lɛf te i day. (2 Kiŋ 23:31-34) Dɔn in brɔda we na Jɛoakim in bin rul fɔ 11 ia. Insɛf nɔ bin valyu di tin dɛn we in papa bin tich am bɔt Jiova. Bikɔs Jɛoakim bin de du wetin bad, Jɛrimaya bin tɔk se: “Dɛn go bɛr am lɛk aw dɛn kin bɛr dɔnki.” (Jɛr. 22:17-19) Josaya in ɔda pikin we bin bi kiŋ, na Zɛdikaya ɛn Josaya in granpikin we na Jɛoakin insɛf bin bi kiŋ. Bɔt dɛnsɛf nɔ bin bɛtɛ atɔl. Dɛn nɔ bin fala Josaya in fayn ɛgzampul.—2 Kiŋ 24:8, 9, 18, 19.

7, 8. (a) Aw Sɔlɔmɔn bin sho se i nɔ valyu di tin dɛn we i lan bɔt Jiova? (b) Us lɛsin wi lan frɔm sɔm pipul dɛn na di Baybul we nɔ bin valyu di tin dɛn we dɛn bin dɔn lan bɔt Jiova?

⁷ Kiŋ Sɔlɔmɔn bin lan plɛnti tin bɔt Jiova frɔm in papa, Devid, ɛn i bin bigin fɔ du wetin fayn. Bɔt as tɛm de go, i nɔ bin valyu di tin dɛn we i bin dɔn lan. “We Sɔlɔmɔn ol, in wɛf dɛn tɔn in at fɔ mek i bigin wɔship ɔda gɔd dɛn, ɛn ɔl in at nɔ bin de to Jiova we na in Gɔd lɛk aw in papa Devid bin du.” (1 Kiŋ 11:4) So, Jiova bin pul an pan Sɔlɔmɔn.

⁸ Ɔl dɛn pipul ya bin no bɔt Jiova ɛn dɛn bin fɔ ebul fɔ du wetin rayt, bɔt dɛn nɔ bin du am! Bɔt nɔto ɔl di yɔŋ wan dɛn we di Baybul tɔk bɔt, bin du dat. Lɛ  wi kam tɔk bɔt sɔm fayn ɛgzampul dɛn we yɔŋ wan dɛn we na Kristian fɔ falamakata.

9. Us fayn ɛgzampul Noa in pikin dɛn sɛt? (Luk di pikchɔ nia dis atikul in taytul.)

⁹ Noa in pikin dɛn bin sɛt fayn ɛgzampul. Jiova bin tɛl dɛn papa fɔ bil wan ak ɛn mek in ɛn in famili go insay de. Noa in pikin dɛn bin gladi fɔ du wetin Jiova want. Ɛn dɛn bin jɔyn dɛn papa fɔ du di wok. We dɛn dɔn fɔ bil di ak, dɛn go insay de. (Jɛn. 7:1, 7) Ɛn dɛn put sɔm animal dɛn insay. Wetin mek dɛn bin du dat? Jɛnɛsis 7:3 se dɛn bin du dat fɔ sev di animal dɛn so dat di animal dɛn go “bɔn pikin dɛn ɛn de ɔlsay na di wɔl.” Bɔt nɔto di animal dɛn nɔmɔ bin sev, mɔtalman dɛn bak bin sev. Dis bin apin bikɔs Noa in pikin dɛn valyu wetin dɛn papa tich dɛn bɔt Jiova, so na dɛn mek mɔtalman de na di wɔl tide ɛn dɛn bin bigin fɔ wɔship Jiova di rayt we afta di ebi Ren.—Jɛn. 8:20; 9:18, 19.

10. Aw 4 Ibru yɔŋ man dɛn na Babilɔn bin sho se dɛn valyu di tru tin dɛn we dɛn bin dɔn lan?

¹⁰ Afta lɔng lɔng tɛm dɔn pas, 4 Ibru yɔŋ man dɛn bin sho se dɛn rili valyu wetin dɛn bin dɔn lan. Dɛn nem dɛn na Ananaya, Mishɛl, Azaraya, ɛn Daniɛl. Dɛn bin kɛr dɛn go na Babilɔn insay di ia 617 bifo Krays. Dɛn bin fayn ɛn gɛt sɛns, so i bin fɔ izi fɔ lɛ dɛn jɔyn di Babilonian dɛn. Bɔt dɛn nɔ du am. Di tin dɛn we dɛn bin du bin sho se dɛn mɛmba di tin dɛn we dɛn bin dɔn tich dɛn. Ɛn dɛn bin gɛt bɔku blɛsin bikɔs dɛn valyu di tin dɛn we dɛn bin tich dɛn we dɛn yɔŋ.—Rid Daniɛl 1:8, 11-15, 20.

11. Aw ɔda pipul dɛn bin bɛnifit frɔm di tin dɛn we Jizɔs bin lan frɔm in Papa?

¹¹ If wi tɔk bɔt gud ɛgzampul dɛn, bɔt wi nɔ tɔk bɔt Jizɔs, we na Gɔd in Pikin, dat min se wi nɔ tɔk bɔt gud ɛgzampul yet. Jizɔs bin lan bɔku tin frɔm in Papa, ɛn i bin rili valyu wetin i lan. Fɔ sho se i bin rili valyu wetin i lan, i bin tɔk se: “Na wetin mi Papa tich mi na in a de tɛl una.” (Jɔn 8:28) Ɛn i bin want mek ɔda pipul dɛn bɛnifit frɔm di tin dɛn we i bin dɔn lan. I bin tɛl di pipul dɛn se: “A fɔ tɔk di gud nyus bɔt Gɔd in Kiŋdɔm na ɔda siti dɛn, bikɔs na dis mek dɛn sɛn mi.” (Lyuk 4:18, 43) I bin mek di wan dɛn we de lisin to am no se dɛn nɔ fɔ “du di tin dɛn we di wɔl de du,” bikɔs di wɔl nɔ valyu di tru tin dɛn bɔt Gɔd.—Jɔn 15:19.

12. (a) Aw bɔku yɔŋ wan dɛn tide fiba Timoti? (b) Us kwɛstyɔn dɛn yɔŋ wan dɛn we na Kristian fɔ tink bɔt?

¹² Jɔs lɛk di yɔŋ pipul dɛn we wi dɔn tɔk bɔt, i go bi se yu mama ɛn papa rili lɛk Jiova Gɔd. If na so i bi, yu fiba Timoti. (Rid Sɛkɔn Lɛta To Timoti 3:14-17.) Na yu mama ɛn papa go “dɔn lan” yu bɔt di tru Gɔd ɛn aw fɔ du wetin i want. I go bi se yu mama ɛn papa go dɔn bigin tich yu frɔm we yu smɔl. Dis go dɔn mek yu “gɛt sɛns” ɛn i go “ɛp yu fɔ sev if yu gɛt fet pan Krays Jizɔs” ɛn i go ɛp yu fɔ rɛdi fɔ du Gɔd in wok. Wan impɔtant kwɛstyɔn we yu fɔ aks yusɛf naw na, A valyu wetin a dɔn gɛt? Fɔ ansa dis kwɛstyɔn, i go fayn fɔ lɛ yu chɛk yusɛf gud wan. Tink bɔt dɛn kwɛstyɔn ya: ‘A gladi fɔ bi wan pan Gɔd in fetful witnɛs dɛn? Aw a fil fɔ bi wan pan di pipul dɛn we Gɔd no tide? A de  si am se na big big ɔnɔ a gɛt fɔ no di trut?’

13, 14. Wetin bɔku yɔŋ pipul dɛn we na Kristian kin want fɔ du? Wetin mek dis nɔ mek sɛns? Gi wan ɛgzampul.

¹³ Sɔm yɔŋ wan dɛn we dɛn mama ɛn papa na Kristian nɔ kin no aw i fayn fɔ de na di trut ɛn dɛn nɔ kin no di trɔbul dɛn we de na di wɔl. So sɔm dɛn kin want fɔ no aw Setan in wɔl tan lɛk. Bɔt yu go rɔn go bifo motoka jɔs fɔ lɛ yu no aw pɔsin kin fil we motoka bang am? Nɔ, yu nɔ go du dat! Semweso, no nid nɔ de fɔ lɛ wi go tes di “bad layf” we de na di wɔl jɔs fɔ lɛ wi no di pen we pipul dɛn kin fil.—1 Pit. 4:4.

¹⁴ Wan bɔbɔ we nem Jɛna we de na Esia, bin gro ɔp na Kristian famili. Ɛn i bin baptayz we i ol 12 ia. Bɔt as i de big, i bigin lɛk di wɔl. I se: “A bin want fɔ tes di ‘fridɔm’ we de na di wɔl.” Jɛna bigin lay to in mama ɛn papa ɛn i bigin du bad tin biɛn dɛn bak. Bay di tɛm we i de ol 15 ia, i bigin fɔ du di bad tin dɛn we in padi dɛn bin de du. I bin de drink ɛn kɔs lɛk dɛn. Jɛna bin de kam na os let afta i kin dɔn ple dɛn fɛt-fɛt kɔmpyuta gem dɛn wit in padi dɛn. Bɔt as tɛm de go, i kam si se dɛn tin ya nɔ de mek i gladi. In layf nɔ bin gɛt wan minin. We i kam bak na di trut, i tɔk se: “A gɛt bɔku prɔblɛm dɛn we de stil mit mi, bɔt di blɛsin dɛn we Jiova de gi mi bɔku pas dɛn fa fawe.”

15. Wetin yɔŋ pipul dɛn we dɛn mama ɛn papa nɔ de na di trut fɔ tink bɔt?

¹⁵ Ɔda yɔŋ pipul dɛn de na di kɔngrigeshɔn we dɛn mama ɛn papa nɔ de na di trut. If yu na wan pan dɛn, tink bɔt di blɛsin dɛn we yu de ɛnjɔy naw we yu dɔn no di Pɔsin we mek ɔltin ɛn yu de wɔship am! Bɔku bɔku pipul dɛn de na di wɔl, so na rial blɛsin yu gɛt fɔ bi wan pan di pipul dɛn we Jiova dɔn drɔ kam nia am ɛn we i dɔn sho di tru tin dɛn we de na di Baybul. (Jɔn 6:44, 45) We yu kɔnt 1,000 pipul dɛn na di wɔl, na 1 pan dɛn nɔmɔ no di tru tin dɛn na di Baybul, ɛn yu na wan pan dɛn. Yu nɔ tink se dis fɔ mek wi ɔl gladi, ilɛk aw wi  lan di trut? (Rid Fɔs Lɛta Fɔ Kɔrint 2:12.) Jɛna se: “Mi ia kin rayz we a kin tink bɔt dis. Udat na mi fɔ lɛ Jiova we mek di wan ol wɔl, sabi mi?” (Sam 8:4) Wan sista we kɔmɔt na di sem eria tɔk se: “Skulpikin dɛn kin gladi we dɛn ticha dɛn mɛmba dɛn, no dɛn nem, ɛn no ɔda tin dɛn bɔt dɛn. So na big big ɔnɔ fɔ mek Jiova we na di Bɛst Ticha, no mi!”

16. Wetin na di bɛst tin we yɔŋ pipul dɛn fɔ du wit dɛn layf?

¹⁶ We yu tink bɔt di ɔnɔ we yu gɛt, yu nɔ tink se yu fɔ mekɔp yu maynd fɔ de wit Jiova in savant dɛn we dɔn disayd fɔ du di rayt tin wit dɛn layf? We yu du dat, yusɛf go bi wan pan Jiova in fetful savant dɛn. Nɔ tan lɛk dɛn yɔŋ pipul dɛn na di wɔl we de west dɛn layf ɛn we nɔ gɛt op fɔ tumara bambay.—2 Kɔr. 4:3, 4.

17-19. Wetin go ɛp yu fɔ difrɛn frɔm di pipul dɛn na di wɔl?

¹⁷ Nɔto ɔltɛm i kin izi fɔ lɛ wi difrɛn frɔm di pipul dɛn na di wɔl. Bɔt we yu wach, yu go si se i rili mek sɛns fɔ lɛ wi difrɛn frɔm pipul dɛn na di wɔl. Fɔ ɔndastand dis mɔ, lɛ wi tink bɔt pɔsin we de rɔn na Olimpik. Fɔ mek pɔsin rɔn na Olimpik, i fɔ difrɛn frɔm in kɔmpin dɛn. I fɔ lɛf fɔ du bɔku tin dɛn we go tek in tɛm ɛn mek i nɔ pe atɛnshɔn pan di tren we i de tren. If i du dis, i go gɛt mɔ tɛm fɔ tren ɛn ebul fɔ win.

¹⁸ Bɔku pipul dɛn nɔ kin tink bɔt di prɔblɛm dɛn we dɛn go gɛt we dɛn put an pan bad tin, bɔt Jiova in pipul dɛn kin tink bɔt dat. If yu difrɛn frɔm di pipul dɛn na di wɔl ɛn nɔ miks pan di bad tin dɛn we dɛn de du, dat min se yu dɔn “ol di rial layf wit tu an.” (1 Tim. 6:19) Da sista we wi bin tɔk bɔt, tɔk bak se: “If yu tinap tranga wan fɔ wetin yu biliv, yu go rili gladi. I go sho se yu nɔ de du wetin Setan want. Apat frɔm dat, Jiova de gladi fɔ yu ɛn i go tan lɛk se i de smayl to yu! Na da tɛm de yu go fil gud we yu difrɛn!”

¹⁹ Yu layf nɔ go gɛt wan minin if yu jɔs de pe atɛnshɔn pan wetin yu go gɛt naw. (Ɛkli. 9:2, 10) If yu na yɔŋ pɔsin, ɛn yu de tink gud wan bɔt di rizin we mek yu gɛt layf ɛn di chans we yu gɛt fɔ liv sote go, yu go si se i nɔ mek sɛns fɔ “waka lɛk aw di pipul dɛn na di wɔl . . . , de waka.” Bifo dat, yu go want fɔ liv yu layf di rayt we.—Ɛfi. 4:17; Mal. 3:18.

20, 21. If wi disayd fɔ du di rayt tin, us chans wi go gɛt? Wetin fɔs wi fɔ du?

²⁰ If wi disayd fɔ du di rayt tin, wi go ɛnjɔy wi layf naw ɛn wi go gɛt di chans fɔ de na “di wɔl” sote go. Jiova dɔn kip bɔku bɔku blɛsin dɛn fɔ wi we wi nɔ go ivin ebul fɔ tink bɔt. (Mat. 5:5; 19:29; 25:34) Bɔt dis nɔ min se Gɔd de gi wi sɔntin wantɛm wantɛm jɔs lɛk dat. I want lɛ wi du sɔntin fɔs. (Rid Jɔn In Fɔs Lɛta 5:3, 4.) If wi fetful to am naw, wi go gɛt bɔku bɔku blɛsin!

²¹ Gɔd dɔn gi wi bɔku bɔku tin. Wi dɔn no di tru tin dɛn we de na di Baybul, wi no di tru bɔt Jiova ɛn di tin dɛn we i want fɔ du. Na big big ɔnɔ wi gɛt fɔ lɛ dɛn kɔl wi Jiova Witnɛs ɛn fɔ lɛ wi tɔk bɔt Jiova in nem. Ɛn Gɔd dɔn prɔmis wi se i go ɛp wi. (Sam 118:7) So lɛ wi ɔl, ilɛksɛf wi yɔŋ ɔ ol, sho se wi valyu di tin dɛn we wi dɔn gɛt ɛn du wetin go mek Jiova gɛt “di prez sote go.”—Rom 11:33-36; Sam 33:12.