1, 2. Aw Gɔd want mek wi wɔship am, ilɛksɛf wi yɔŋ ɔ ol?

YU NA yɔŋ pɔsin? If yu yɔŋ, i go fayn lɛ yu no se yu impɔtant na Jiova in ɔganayzeshɔn. Insay bɔku kɔntri dɛn, plɛnti pan di wan dɛn we de baptayz na yɔŋ pipul dɛn. I rili fayn fɔ si se bɔku yɔŋ wan dɛn de kam jɔyn di wan dɛn we dɔn disayd fɔ sav Jiova!

² If yu na pɔsin we yɔŋ, i go mɔs bi se yu kin gladi fɔ de wit ɔda yɔŋ pipul dɛn. Wi kin gladi we wi de wit pipul dɛn we wi ɔl de na di sem ej grup. Bɔt Gɔd want lɛ wi ɔl kam togɛda fɔ wɔship am, ilɛksɛf wi yɔŋ ɔ ol, ɔ ilɛksɛf dɛn mɛn wi difrɛn we. Di apɔsul Pɔl bin rayt se Gɔd want mek “ɔlkayn pipul dɛn sev ɛn lan di tru tin bɔt am.” (1 Tim. 2:3, 4) Rɛvɛleshɔn 7:9 sho wi se di wan dɛn we de wɔship Gɔd kɔmɔt na “ɔl di neshɔn dɛn, na ɔl di trayb dɛn, ɛn dɛn . . . de tɔk difrɛn langwej dɛn.”

3, 4. (a) Aw bɔku yɔŋ pipul dɛn de biev tide? (b) Insay Lɛta Fɔ Ɛfisɔs 4:25, wetin Pɔl bin se di kɔngrigeshɔn tan lɛk?

³ Di yɔŋ wan dɛn we de sav Jiova rili difrɛn frɔm di yɔŋ wan dɛn we de na di wɔl! Bɔku yɔŋ wan dɛn we nɔ de sav  Jiova jɔs bisin bɔt dɛnsɛf nɔmɔ, ɛn dɛn kin jɔs pe atɛnshɔn pan wetin dɛn want. Sɔm masta sabi bukman dɛn se di yɔŋ pipul dɛn we de tide bisin bɔt dɛnsɛf pas aw yɔŋ pipul dɛn bin bisin bɔt dɛnsɛf trade. Di we aw dɛn de tɔk ɛn drɛs de sho se dɛn nɔ gɛt wan rɛspɛkt fɔ big pipul dɛn, ɛn dɛn ivin de fil se big pipul dɛn nɔ ɔndastand.

⁴ Na dis kayn we yɔŋ pipul dɛn de biev ɔlsay na di wɔl. So na dis mek i nɔ izi fɔ lɛ di yɔŋ wan dɛn we de sav Jiova si tin di we aw Jiova de si am. Ɛn i nɔ izi bak fɔ mek dɛn nɔ biev lɛk dɛn kɔmpin dɛn. Ivin trade trade, Pɔl bin si am se i impɔtant fɔ tɛl in brɔda dɛn fɔ avɔyd “di we aw dɛn tranga-yes pipul dɛn de biev” ɛn “di tin dɛn we di pipul dɛn na di wɔl de du.” (Rid Lɛta Fɔ Ɛfisɔs 2:1-3.) Wi fɔ tɛl tɛnki to di yɔŋ wan dɛn we nɔ de biev dɛn kayn we ya ɛn we de tray tranga wan fɔ de togɛda wit dɛn brɔda dɛn. Dɛn ɔndastand se di kɔngrigeshɔn tan lɛk mɔtalman bɔdi we gɛt difrɛn pat dɛn we de wok togɛda. Di apɔsul Pɔl bin rayt se: “Wi ɔl na wan.” (Ɛfi. 4:25) Naw we dis wɔl de kam dɔn, i rili fayn fɔ lɛ wi de togɛda wit wanwɔd. Lɛ wi tɔk bɔt sɔm ɛgzampul dɛn na di Baybul we go ɛp wi fɔ si wetin mek i impɔtant fɔ de togɛda wit wanwɔd.

5, 6. Us lɛsin wi lan frɔm Lɔt ɛn in gyal pikin dɛn?

⁵ Trade, Jiova bin de protɛkt in pipul dɛn we dɛn de togɛda ɛn we dɛn de ɛp dɛnsɛf fɔ tinap tranga wan we prɔblɛm kam. Di wan dɛn we de sav Gɔd tide kin lan frɔm di ɛgzampul dɛn we de na di Baybul, ilɛksɛf dɛn yɔŋ ɔ ol. Wan ɛgzampul na Lɔt.

⁶ Lɔt ɛn in famili bin de pan denja bikɔs Gɔd bin dɔn se i de kam pwɛl di siti usay dɛn bin de, we na Sɔdɔm. Gɔd in enjɛl dɛn bin tɛl Lɔt fɔ mekes lɛf di siti ɛn go ɔp na di mawnten usay natin nɔ go apin to am. Di enjɛl dɛn bin tɛl am se: “Una rɔn fɔ una layf!” (Jɛn. 19:12-22) Lɔt bin du wetin di enjɛl dɛn tɛl am, ɛn in tu gyal pikin dɛn bin jɔyn am fɔ kɔmɔt na di siti. Bɔt i sɔri fɔ no se sɔm pipul dɛn we dɛn bin lɛk nɔ bin du wetin di enjɛl dɛn se. We Lɔt go tɛl di yɔŋ man dɛn we ɛngej in pikin dɛn se dɛn fɔ kɔmɔt na di siti, dɛn “bin de fil se na jok i de jok.” So dɛn bin day bikɔs dɛn nɔ du wetin Lɔt tɛl dɛn. (Jɛn. 19:14) Na Lɔt ɛn in tu gyal pikin dɛn nɔmɔ bin sev.

7. Aw Jiova bin ɛp di Izrɛlayt dɛn we bin de togɛda we dɛn bin de kɔmɔt na Ijipt?

⁷ Tink bɔt dis ɔda ɛgzampul. We di Izrɛlayt dɛn bin de kɔmɔt na Ijipt, dɛn bin kɔmɔt de togɛda, dɛn nɔ bin sheb dɛnsɛf to smɔl smɔl grup dɛn ɛn ɔl di grup dɛn go dɛn yon we. We Mozis bin “stret in an oba di si,” ɛn Jiova mek di si sheb to tu, Mozis nɔ bin waka midul di si in wangren ɔ waka wit sɔm Izrɛlayt dɛn. Bifo dat, Jiova bin protɛkt di Izrɛlayt dɛn ɛn i mek dɛn ɔl pas midul di si. (Ɛks. 14:21, 22, 29, 30) Dɛn ɔl bin de togɛda ɛn “bɔku ɔda pipul dɛn” we nɔto Izrɛlayt bin fala dɛn. (Ɛks. 12:38) I nɔ bin fɔ mek sɛns if sɔm yɔŋ pipul dɛn ɔ ivin sɔm big pipul dɛn disayd fɔ go fɔ dɛnsɛf ɛn pas na rod we dɛn si se fayn. Jiova nɔ bin fɔ dɔn protɛkt di wan dɛn we go dɛn yon we.—1 Kɔr. 10:1.

8. Aw Gɔd in pipul dɛn bin sho se dɛn gɛt wanwɔd insay Jɛoshafat in tɛm?

⁸ Insay Kiŋ Jɛoshafat in tɛm, wan pawaful ami we bin gɛt “bɔku bɔku”  sojaman dɛn bin kam fɔ fɛt Gɔd in pipul dɛn. (2 Krɔn. 20:1, 2) Gɔd in pipul dɛn nɔ bin abop pan dɛnsɛf fɔ fɛt dis ami. Bifo dat, dɛn pre to Jiova fɔ ɛp dɛn. (Rid 2 Krɔnikuls 20:3, 4.) Ɔlman nɔ bin pre to Jiova fɔ insɛf ɔ tray fɔ sɔlv di prɔblɛm in yon we. Di Baybul tɛl wi se: “Ɔl di wan dɛn we bin de na Juda bin tinap bifo Jiova, wit dɛn smɔl pikin dɛn, dɛn wɛf dɛn, ɛn dɛn bɔy pikin dɛn.” (2 Krɔn. 20:13) Di big pipul dɛn ɛn di yɔŋ pipul dɛn ɔl bin gɛt fet ɛn dɛn du wetin Jiova tɛl dɛn, so Jiova bin protɛkt dɛn frɔm dɛn ɛnimi. (2 Krɔn. 20:20-27) Yu nɔ tink se dis na fayn ɛgzampul we Gɔd in pipul dɛn fɔ falamakata we trɔbul kam?

9. Us lɛsin wi lan frɔm dɛn Kristian dɛn we bin de trade trade?

⁹ Di Kristian dɛn we bin de trade trade bin de du tin togɛda. Fɔ ɛgzampul, afta bɔku Ju dɛn ɛn ɔda pipul dɛn we nɔto Ju, bi Kristian, dɛn bin de “put dɛn maynd pan wetin di apɔsul dɛn bin de tich dɛn, dɛn bin de gɛda togɛda, it togɛda, ɛn pre togɛda.” (Akt 2:42) Pan ɔl we pipul dɛn bin de du dɛn ɔlkayn bad tin, dɛn bin stil de togɛda wit wanwɔd. Ɛn na da tɛm de dɛn bin nid fɔ kɔrɛj dɛnsɛf mɔ. (Akt 4:23, 24) Yu nɔ gri se insay dɛn kayn tɛm ya i fayn fɔ de togɛda?

10. Ustɛm mɔ i go fayn fɔ lɛ wi de wit wanwɔd?

¹⁰ Di tɛm we bad pas ɔl we mɔtalman nɔ ɛva si yet, de kam jisnɔ. Di prɔfɛt Joɛl bin se “da de de go dak ɛn sɔri.” (Joɛl 2:1, 2; Zɛf. 1:14) Da tɛm de, Gɔd in pipul dɛn go nid fɔ de wit wanwɔd. Jizɔs bin se: “Ɛni kiŋdɔm we nɔ gɛt wanwɔd nɔ go las.”—Mat. 12:25.

11. Us lɛsin Gɔd in pipul dɛn kin lan frɔm Sam 122:3, 4? (Luk di pikchɔ nia dis atikul in taytul.)

¹¹ Di tɛm we da big trɔbul go kam na di wɔl, wi go rili nid fɔ gɛt wanwɔd ɛn de togɛda. Di os dɛn na Jerusɛlɛm bin de nia nia. Dɛn bin so de nia nia dat wan pan di man dɛn we rayt di Sam buk bin se Jerusɛlɛm na “siti we jɔyn togɛda.” Dis bin mek di pipul dɛn na Jerusɛlɛm bin ebul fɔ ɛp ɛn protɛkt dɛnsɛf. Apat frɔm dat, di we aw di os dɛn bin de nia nia, go dɔn mek di pɔsin we rayt dis Sam mɛmba di tɛm we ɔl di trayb dɛn na Izrɛl bin de wɔship Jiova togɛda. (Rid Sam 122:3, 4.) Wisɛf fɔ kɔntinyu fɔ de “togɛda” naw ɛn tumara bambay we di wɔl go bad-ɔf.

12. Wetin go ɛp wi fɔ sev we dɛn go kam atak Gɔd in pipul dɛn?

¹² Wetin mek i go rili fayn fɔ mek wi de “togɛda” da tɛm de? Izikɛl chapta 38 tɔk bɔt di tɛm we “Gɔg we de na Megɔg” go kam atak Gɔd in pipul dɛn. I nɔ go fayn fɔ alaw ɛnitin fɔ skata wi da tɛm de. Wi go mek big mistek fɔ tink se Setan in wɔl go protɛkt wi. Bifo dat, i go fayn fɔ lɛ wi de nia wi brɔda dɛn. Bɔt dis nɔ min se wi go sev jɔs bikɔs wi de wit wi brɔda dɛn. Jiova ɛn in Pikin go sev di wan dɛn we de kɔl Jiova in nem. (Joɛl 2:32; Mat. 28:20) Bɔt yu fil se i mek sɛns fɔ tink se Jiova go sev di wan dɛn we dɔn lɛf in pipul dɛn ɛn go dɛn yon we?—Mayk. 2:12.

13. Us lɛsin yɔŋ pipul dɛn we de fred Gɔd dɔn lan frɔm wetin wi dɔn tɔk bɔt?

¹³ Yu nɔ tink se i nɔ mek sɛns atɔl fɔ fala yɔŋ pipul dɛn we dɔn lɛf Gɔd in pipul dɛn ɛn go dɛn yon we? I nɔ go te igen, wi go rili nid fɔ de nia wisɛf, ilɛksɛf wi yɔŋ ɔ ol. So na naw wi fɔ lan aw fɔ de  togɛda ɛn aw fɔ gɛt wanwɔd bikɔs dɛn tin ya go rili ɛp wi we da trɔbul go kam.

14, 15. (a) Wetin mek Jiova de tren wi tide? (b) Us advays Jiova de gi wi so dat wi go gɛt wanwɔd?

¹⁴ Jiova de ɛp wi fɔ “wɔship am wit wanwɔd.” (Zɛf. 3:8, 9) I de tren wi fɔ tumara bambay, we i go “gɛda ɔltin togɛda ɔnda Krays.” (Rid Lɛta Fɔ Ɛfisɔs 1:9, 10.) I want mek ɔl di wan dɛn we de wɔship am na ɛvin ɛn na dis wɔl, kam togɛda as wan famili. Ɛn wi no se i go ebul fɔ du dat. Yu nɔ tink se i fayn fɔ de wit Jiova in ɔganayzeshɔn?

¹⁵ Jiova de tich wi aw wi go gɛt wanwɔd naw so dat wi go ebul fɔ gɛt wanwɔd sote go. Ɛn di Baybul tɛl wi se wi fɔ “bisin bɔt [wi] kɔmpin,” wi fɔ “rili lɛk [wi] kɔmpin dɛn,” wi fɔ “kɔntinyu fɔ kɔrej [wisɛf],” ɛn wi fɔ ‘ɛp wisɛf.’ (1 Kɔr. 12:25; Rom 12:10; 1 Tɛsa. 4:18; 5:11) Jiova no se wi nɔ pafɛkt, ɛn dis kin mek i nɔ izi fɔ lɛ wi gɛt wanwɔd. So wi fɔ tray tranga wan fɔ “fɔgiv” wisɛf.—Ɛfi. 4:32.

16, 17. (a) Wetin na wan rizin we mek wi kin go mitin? (b) Us lɛsin yɔŋ wan dɛn kin lan frɔm Jizɔs in ɛgzampul we i bin yɔŋ?

¹⁶ Wan ɔda tin we Jiova dɔn gi wi fɔ ɛp wi fɔ de togɛda, na wi mitin dɛn. Bɔku tɛm, wi kin rid Di Ibru Pipul Dɛn 10:24, 25, ɛn i kin ɛnkɔrej wi. Wan rizin we mek wi kin go mitin na fɔ sho se wi “bisin bɔt wisɛf so dat wi go ɛp wisɛf fɔ sho lɔv ɛn du wetin fayn.” Bɔt i impɔtant fɔ no se di mitin dɛn de fɔ mek wi “de ɛnkɔrej wisɛf mɔ we wi no se di de de kam nia.”

¹⁷ We Jizɔs bin yɔŋ, i bin lɛk fɔ de usay dɛn de tɔk bɔt Gɔd. We i bin ol 12 ia, in, in mama, ɛn in papa bin go wan big mitin na di tɛmpul. We dɛn bin de de, i bin lɔs pan in mama ɛn papa, bɔt i nɔ bin du dat bikɔs i bin want go jɔyn in kɔmpin yɔŋ wan dɛn. We Josɛf ɛn Meri bin fɛn am, dɛn mit am de tɔk to dɛn ticha dɛn na di tɛmpul bɔt Gɔd biznɛs.—Lyuk 2:45-47.

18. Aw wi prea dɛn go mek wi gɛt wanwɔd?

¹⁸ Apat frɔm di lɛk we wi lɛk wisɛf ɛn  di mitin dɛn we de ɛp wi fɔ gɛt wanwɔd, wi fɔ de pre fɔ wi kɔmpin Kristian dɛn. We wi de pre to Jiova, wi fɔ tɛl am di patikyula tin we de mɔna wi brɔda dɛn. We wi du dat, wi de rili sho se wi bisin bɔt dɛn. Nɔto big pipul dɛn nɔmɔ fɔ du dis. Yɔŋ pipul dɛnsɛf fɔ du am. So if yu na yɔŋ pɔsin, i go fayn lɛ yu pre fɔ yu brɔda dɛn bikɔs dis go ɛp yu fɔ de nia dɛn. We yu de du so, dat go mek yu nɔ gɛt ɛnitin fɔ du wit dis wɔl di tɛm we i go dɔn.

19-21. (a) Aw wi go rili sho se “wi ɔl na wan”? Gi sɔm ɛgzampul dɛn. (b) Us lɛsin we yu lan frɔm di tin dɛn we sɔm brɔda dɛn bin du di tɛm we bad tin bin apin to wi brɔda dɛn?

¹⁹ Jiova in pipul dɛn de fala wetin Lɛta Fɔ Rom 12:5 tɔk, we i se: “Wi ɔl na wan.” Wi kin si dis we bad bad tin dɛn kin apin. Insay Disɛmba 2011, wan big big briz bin mek bɔku bɔku wata kam na wan ayland na Filipins we dɛn kɔl Mindanao. Wan nɛt, i pas 40,000 os dɛn we bɔku bɔku wata go insay, ɛn di wata bin go insay bɔku pan wi brɔda dɛn os dɛn. Di branch ɔfis se “ivin bifo wi sɛn brɔda dɛn fɔ ɛp, brɔda dɛn we de na ɔda eria dɛn bin dɔn de sɛn tin dɛn to di brɔda dɛn.”

²⁰ Na di sem tin bin apin na Jepan we wan big big atkwek bin mek bɔku bɔku wata kam. Bɔku pan wi brɔda ɛn sista dɛn bin lɔs bɔku bɔku tin dɛn. Sɔm nɔ bin gɛt ɛnitin igen. Wan sista we bin lɔs in os, na Yoshiko. Dis sista bin de lɛk 25 mayl so frɔm di Kiŋdɔm Ɔl. I se: “Wi bin sɔprayz fɔ no se di de afta di atkwek, di sakit ovasia ɛn wan ɔda brɔda bin kam fɔ luk fɔ wi.” Di sista bin de smayl we i bin de tɔk se: “Wi bin rili gladi we Jiova yuz di kɔngrigeshɔn fɔ ɛnkɔrej wi. Pantap dat, dɛn gi wi shuz, bag, klos fɔ wɛr we di ples kol, ɛn klos fɔ slip.” Wan brɔda we di branch ɔfis bin sɛn fɔ ɛp, bin tɔk se: “Di brɔda dɛn we de ɔlsay na Jepan bin gɛt wanwɔd, ɛn dɛn bin tray fɔ ɛp dɛnsɛf. Brɔda dɛn bin ivin kɔmɔt Amɛrika fɔ kam ɛp. We dɛn aks dɛn wetin mek dɛn travul frɔm fa say fɔ kam, dɛn se, ‘Wi ɛn wi brɔda dɛn na Jepan na wan, ɛn dɛn bin nid wi fɔ ɛp dɛn.’” Yu nɔ gladi fɔ de na ɔganayzeshɔn we rili kia fɔ di wan dɛn we de de? Jiova rili gladi fɔ si dis kayn wanwɔd we wi gɛt.

²¹ Dis wanwɔd go ɛp wi fɔ bia ɛni prɔblɛm we go mit wi tumara bambay, ilɛksɛf wi nɔ ebul fɔ de wit wi brɔda dɛn we de na ɔdasay dɛn na di wɔl. Infakt, dis wanwɔd we wi gɛt go ɛp wi fɔ tinap tranga wan naw we di wɔl want dɔn. Wan sista na Jepan we nem Fumiko, we bin sev we wan big big briz bin blo, bin se: “Di wɔl go dɔn jisnɔ. Wi fɔ kɔntinyu fɔ ɛp wi brɔda ɛn sista dɛn we wi de wet fɔ di tɛm we dɛn bad bad tin ya nɔ go bi igen.”

22. Aw wanwɔd go ɛp wi tumara bambay?

²² Di yɔŋ ɛn ol wan dɛn we de tray tranga wan fɔ de wit wanwɔd naw, de rɛdi dɛnsɛf fɔ sev we dis wikɛd wɔl we nɔ gɛt wan wanwɔd, go dɔn. Jɔs lɛk aw Gɔd bin de sev in pipul dɛn trade, na so i go sev in pipul dɛn tide. (Ayz. 52:9, 10) Mɛmba se i pɔsibul fɔ lɛ yu sev, bɔt dat go bi if yu tray fɔ de wit Gɔd in pipul dɛn we gɛt wanwɔd. Wan ɔda tin we go ɛp yu na we yu kɔntinyu fɔ valyu wetin yu ɔlrɛdi gɛt. Na dis wi go tɔk bɔt insay di nɛks atikul.