1, 2. Udat dɛn go bɛnifit frɔm di Baybul buk we nem Sɔlɔmɔn In Siŋ? (Luk di pikchɔ nia dis atikul in taytul.)

WE WAN ɛlda gi wan mared tɔk dɔn, i bin si se di brɔda ɛn di sista we mared bin rili lɛk dɛnsɛf. Dɛn bin de wach dɛnsɛf ɛn ol dɛn an dɛn. Di ɛlda bin de tink se, ‘Udat go dinay se dɛn pipul ya nɔ rili lɛk dɛnsɛf?’ As di ɔkɔ ɛn yawo de dans na di risɛpshɔn, di ɛlda bigin fɔ wɔnda bak se: ‘Dɛn mared go las? As tɛm de go, dɛn go kɔntinyu fɔ lɛk dɛnsɛf ɔ di lɔv go dɔn?’ We man ɛn uman rili lɛk dɛnsɛf, i kin fayn fɔ si bikɔs di lɔv we dɛn gɛt kin mek dɛn bia ɛnitin we kam dɛn we. Bɔt bikɔs bɔku bɔku mared dɛn kin skata, wi kin bigin wɔnda if i rili pɔsibul fɔ lɛ mared las.

² Ivin insay Kiŋ Sɔlɔmɔn in tɛm, i nɔ bin izi fɔ si pipul dɛn we rili lɛk dɛnsɛf. We Sɔlɔmɔn bin de tɔk bɔt di we aw pipul dɛn bin de biev insay in tɛm, i bin se: “A dɔn fɛn wan man pan wan tawzin man dɛn, bɔt a nɔ ebul fɔ fɛn wan uman pan dɛn. Na wan tin nɔmɔ a dɔn kam fɔ no, dat na: Di tru Gɔd mek mɔtalman pafɛkt wan, bɔt na dɛn dɔn plan bɔku bad tin dɛn.” (Ɛkli. 7:26-29, futnot.) Sɔm uman dɛn we bin de wɔship Beal  bin de wit di Izrɛlayt dɛn, so bɔku Izrɛlayt dɛn nɔ bin de du wetin rayt. Dis bin mek i nɔ bin izi fɔ lɛ Sɔlɔmɔn si sɔmbɔdi we de biev fayn. * Bɔt Sɔlɔmɔn bin dɔn rayt di Baybul buk we nem Sɔlɔmɔn In Siŋ lɛk 20 ia so bifo i tɔk dɛn tin ya. Insay dis buk, Sɔlɔmɔn sho se man ɛn uman kin rili ebul fɔ lɛk dɛnsɛf. I tɔk bak bɔt di kayn lɔv we man ɛn uman fɔ gɛt fɔ dɛnsɛf ɛn aw dɛn go sho dis kayn lɔv to dɛnsɛf. Di wan dɛn we de wɔship Jiova go ebul fɔ lan bɔku tin frɔm dis Baybul buk, ilɛksɛf dɛn mared ɔ dɛn nɔ mared.

3. Wetin mek i pɔsibul fɔ lɛ man ɛn uman rili lɛk dɛnsɛf?

³ Rid Sɔlɔmɔn In Siŋ 8:6. Di Baybul tɔk se lɔv tan “lɛk di faya we de kɔmɔt frɔm Ja.” Wetin mek di Baybul se so? Na bikɔs na frɔm Jiova lɔv kɔmɔt. I mek mɔtalman lɛk aw i tan, so dat mɔtalman go ebul fɔ sho lɔv. (Jɛn. 1:26, 27) We Gɔd mek di fɔs uman we na Iv, ɛn briŋ am kam to di fɔs man we na Adam, Adam bigin fɔ tɔk fayn fayn tin dɛn bɔt in wɛf. Iv insɛf bin gladi fɔ de nia Adam, bikɔs na frɔm Adam “i kɔmɔt.” (Jɛn. 2:21-23) Jiova mek mɔtalman fɔ sho lɔv, so i rili pɔsibul fɔ lɛ man ɛn uman rili lɛk dɛnsɛf.

4, 5. Tɔk smɔl bɔt di stori we de na Sɔlɔmɔn In Siŋ.

⁴ Na tru se i pɔsibul fɔ lɛ tu pipul dɛn lɛk dɛnsɛf sote go ɛn bia ɛnitin we go kam dɛn we, bɔt nɔto dat nɔmɔ lɔv kin du. Di Baybul buk we nem Sɔlɔmɔn In Siŋ tɔk bɔt sɔm tin dɛn we lɔv kin mek pɔsin du. Dis siŋ we Sɔlɔmɔn bin rayt na bɔt di lɔv we bin de bitwin wan yɔŋ uman we bin de na wan vilej we nem Shunem, or Shulɛm, ɛn wan yɔŋ shɛpad bɔy. Dis Shulamayt gyal bin fayn ɛn i bin de wok na dɛn gadin we bin de nia usay Sɔlɔmɔn bin kamp. So we Sɔlɔmɔn si am, i tɛl in man dɛn mek dɛn go kam wit am insay di kamp. Bɔt frɔm di biginin, di Shulamayt gyal mek Sɔlɔmɔn no se na di shɛpad bɔy i lɛk. Sɔlɔmɔn du ɔlkayn tin fɔ mek di Shulamayt gyal want am, bɔt di Shulamayt gyal nɔ bin want am bikɔs i bin lɛk di shɛpad bɔy ɛn i bin want fɔ de wit am. (Sɔl. in Siŋ 1:4-14) Di shɛpad bɔy kam insay di kamp, ɛn in ɛn di Shulamayt gyal bigin fɔ tɔk swit swit tɔk dɛn to dɛnsɛf.—Sɔl. in Siŋ 1:15–17.

⁵ We Sɔlɔmɔn de go bak na Jerusɛlɛm, i kɛr di Shulamayt gyal go wit am, ɛn di shɛpad bɔy insɛf fala dɛn. (Sɔl. in Siŋ 4:1-5, 8, 9) Sɔlɔmɔn du ɔlkayn tin fɔ mek di Shulamayt gyal want am, bɔt stil, di Shulamayt gyal nɔ want am. (Sɔl. in Siŋ 6:4-7; 7:1-10) Leta, di kiŋ lɛf am fɔ go bak na in os. Di stori dɔn usay di Shulamayt gyal bin want mek di shɛpad bɔy rɔn kam mit am “lɛk fritambo.”—Sɔl. in Siŋ 8:14.

6. Wetin mek i nɔ izi fɔ no udat de tɔk pan di siŋ we Sɔlɔmɔn bin rayt?

⁶ Sɔlɔmɔn In Siŋ fayn ɛn dɛn gɛt minin, bɔt i nɔ izi fɔ no di pɔsin we de tɔk. (Sɔl. in Siŋ 1:1) The New Interpreter’s Dictionary of the Bible, tɔk se “di we aw dɛn kin rayt stori ɛn di pipul dɛn we kin de insay di stori, nɔ tu impɔtant.” We Sɔlɔmɔn bin de rayt in siŋ, i nɔ bin sho di pipul dɛn nem we de insay di siŋ. Wetin mek i du dat? Na fɔ mek wi maynd nɔ go kɔmɔt pan di wɔd dɛn we i yuz pan di siŋ.  Bɔt stil, wi go ebul fɔ no udat de tɔk bay wetin di pɔsin se. *

7, 8. Wetin wi go tɔk bɔt di we aw di Shulamayt gyal ɛn di shɛpad bɔy bin de “sho” se dɛn lɛk dɛnsɛf? Gi sɔm ɛgzampul dɛn.

⁷ Di siŋ we Sɔlɔmɔn rayt de “sho” di we aw di Shulamayt gyal ɛn di shɛpad bɔy bin de sho se dɛn lɛk dɛnsɛf. Wi nɔ kin tɔk dɛn sem swit swit wɔd ya tide, bikɔs i dɔn pas 3,000 ia we dɛn rayt dɛn. Bɔt pan ɔl dat, di swit swit wɔd dɛn we dɛn bin de tɔk bin gɛt minin, ɛn dɛn ɛp wi fɔ no di kayn lɔv we bin de bitwin dɛn. Fɔ ɛgzampul, di shɛpad bɔy bin tɔk se di Shulamayt gyal in yay tan lɛk “dɔv yay.” (Sɔl. in Siŋ 1:15) Bɔt we di Shulamayt gyal in de tɔk, i nɔ tɔk se di shɛpad bɔy in yay dɛn tan lɛk dɔv yay, bɔt i se dɛn tan lɛk dɔv insɛf sɛf. (Rid Sɔlɔmɔn In Siŋ 5:12.) We di Shulamayt gyal luk di bɔy in yay, i si se di wayt tin we de rawnd di blak tin na in yay fayn lɛk we dɔv de was insay milk.

⁸ Di shɛpad bɔy ɛn di Shulamayt gyal nɔ bin jɔs de tɔk bɔt aw dɛn fayn nɔmɔ. Tink bɔt wetin di shɛpad bɔy se bɔt aw di Shulamayt gyal de tɔk. (Rid Sɔlɔmɔn In Siŋ 4:7, 11.) I se “di ɔni we de insay ɔni os” de kɔmɔt na di Shulamayt gyal in mɔt. Wetin mek i se so? Na bikɔs di ɔni we de na di ɔni dɛn os swit pas di ɔni we briz kin dɔn blo. Di shɛpad bɔy se “ɔni ɛn milk de ɔnda [di Shulamayt gyal in] tɔng.” Dis min se i de tɔk wetin fayn ɛn gud ɔltɛm. Ɛn we di shɛpad bɔy tɛl di Shulamayt gyal se i “fayn pasmak,” ɛn i “nɔ gɛt wan bɔt,” i nɔ bin jɔs de tɔk bɔt aw i fayn, bɔt i bin de tɔk bak bɔt di gud kwaliti dɛn we i gɛt.

9. (a) Uskayn lɔv fɔ de insay mared? (b) Wetin mek i fayn fɔ lɛ mared pipul dɛn de sho se dɛn lɛk dɛnsɛf?

⁹ Mared nɔto fɔ jɔs go sayn pepa nɔmɔ; na tin we fɔ gɛt lɔv insay. Infakt, lɔv na di men tin we fɔ de insay Kristian mared. Bɔt uskayn lɔv fɔ de insay Kristian mared? Na di kayn lɔv we di Baybul se wi fɔ gɛt fɔ pipul dɛn? (1 Jɔn 4:8) Na di kayn lɔv we famili dɛn fɔ gɛt fɔ dɛnsɛf? Na di kayn lɔv we kin de bitwin padi dɛn we rili lɛk dɛnsɛf? (Jɔn 11:3) Na di kayn lɔv we man ɛn uman kin gɛt fɔ dɛnsɛf? (Prɔv. 5:15-20) Ɔl dɛn kayn lɔv ya fɔ de insay Kristian mared. Pɔsin go no se yu lɛk am we yu de sho am se yu lɛk am. I rili fayn fɔ lɛ mared pipul dɛn de sho se dɛn lɛk dɛnsɛf; dɛn nɔ fɔ yagba yagba te dɛn nɔ gɛt tɛm fɔ sho lɔv to dɛnsɛf. We mared pipul dɛn de sho lɔv to dɛnsɛf, i kin mek dɛn gɛt wanwɔd ɛn gladi at na dɛn mared. Sɔm kɔntri dɛn de usay dɛn kin arenj mared fɔ pipul dɛn we nɔ wande sabi dɛnsɛf. We dɛn kayn pipul ya mared, dɛn fɔ de tɔk bɔt aw dɛn lɛk dɛnsɛf bikɔs dis go mek dɛn mared go bifo ɛn dɛn go lɛk dɛnsɛf mɔ ɛn mɔ.

10. Wetin kin apin we mared pipul dɛn de mɛmba di swit swit tɔk dɛn we dɛn kin tɛl dɛnsɛf?

¹⁰ We mared pipul dɛn de tɔk bɔt aw dɛn lɛk dɛnsɛf, dɛn mared de go bifo mɔ ɛn mɔ. Kiŋ Sɔlɔmɔn bin tɛl di Shulamayt gyal se i go mek “gold krawn fɔ [am] ɛn dɛkɔret am wit silva.” I bin de prez am ɛn tɛl am se i “fayn lɛk ful mun” ɛn “klin lɛk di san in layt.” (Sɔl. in Siŋ 1:9-11; 6:10) Bɔt di Shulamayt gyal nɔ bin kɔmɔt  biɛn in shɛpad bɔy. Wetin bin ɛp di Shulamayt gyal we i nɔ bin de nia di shɛpad bɔy? Di Shulamayt gyal bin tɛl wi wetin bin ɛp am. (Rid Sɔlɔmɔn In Siŋ 1:2, 3.) I se na we i kin mɛmba di we aw di shɛpad bɔy bin de “sho” se i lɛk am. Di we aw di shɛpad bɔy bin de sho se i lɛk am “bɛtɛ pas wayn” we de mek pɔsin gladi, ɛn di shɛpad bɔy in nem bin fayn lɛk “we dɛn tɔn ɔyl we gɛt fayn sɛnt” na pɔsin in ed. (Sam 23:5; 104:15) We sɔmbɔdi de mɛmba di swit swit tɔk we pɔsin we i lɛk bin tɛl am, dat kin mek dɛn kɔntinyu fɔ lɛk dɛnsɛf mɔ ɛn mɔ. So i rili impɔtant fɔ lɛ maredman ɛn mareduman de sho aw dɛn lɛk dɛnsɛf bikɔs dis kin mek mared go bifo mɔ ɛn mɔ!

11. Us lɛsin Kristian dɛn we nɔ mared kin lan frɔm di Shulamayt gyal we i tɛl di uman dɛn se mek dɛn nɔ fos am fɔ lɛk sɔmbɔdi we i nɔ want?

¹¹ Sɔlɔmɔn In Siŋ gɛt fayn lɛsin fɔ Kristian dɛn we nɔ mared, mɔ di wan dɛn we de luk fɔ pɔsin fɔ mared. Di Shulamayt gyal nɔ bin lɛk Sɔlɔmɔn atɔl. I tɛl di uman dɛn na Jerusɛlɛm se: “Una nɔ tray fɔ fos mi fɔ lɛk sɔmbɔdi te di rayt tɛm rich.” (Sɔl. in Siŋ 2:7; 3:5) Wetin mek i tɛl dɛn so? Bikɔs i nɔ fayn fɔ jɔs lɛk ɛnibɔdi we kam yu we. So if pɔsin we na Kristian want fɔ mared, i go bɛtɛ lɛ i wet fɔ pɔsin we i rili lɛk.

12. Wetin mek di Shulamayt gyal bin lɛk di shɛpad bɔy?

¹² Wetin mek di Shulamayt gyal bin lɛk di shɛpad bɔy? I bin lɛk am bikɔs i bin fayn lɛk “fritambo”; in an dɛn bin strɔng lɛk “silinda we dɛn mek wit gold”; ɛn in lɛg dɛn bin fayn ɛn strɔng lɛk “pila dɛn we dɛn mek wit mabul.” Bɔt di Shulamayt gyal nɔ bin lɛk di shɛpad bɔy jɔs bikɔs i strɔng ɛn fayn. I bin lɛk am bikɔs i bin lɛk Jiova ɛn i gɛt fayn kwaliti dɛn. Na in mek i se di shɛpad bɔy tan “lɛk apul tik we de wit ɔda tik dɛn na bush.”—Sɔl. in Siŋ 2:3, 9; 5:14, 15.

13. Wetin mek di shɛpad bɔy bin lɛk di Shulamayt gyal?

¹³ Wetin wi go se bɔt di Shulamayt gyal? Di Shulamayt gyal bin fayn bad. Na dat mek di kiŋ bin want am, pan ɔl we i bin gɛt “60 kwin dɛn, ɛn 80 galfrɛn dɛn, ɛn di yɔŋ uman dɛn bɔku te dɛn bɔku.” Bɔt dis nɔ bin mek di  Shulamayt gyal fil big bɔt insɛf, bifo dat, i bin si insɛf lɛk “safrɔn we de nia di si.” Dis safrɔn na kɔmɔn kɔmɔn flawa. Di Shulamayt gyal bin ɔmbul ɛn i bin de biev fayn. No wɔnda we mek i bin tan “lɛk lili we de usay chuk chuk dɛn de,” we min se i bin spɛshal to di shɛpad bɔy, ɛn i bin fetful to Jiova!—Sɔl. in Siŋ 2:1, 2; 6:8.

14. Us lɛsin we Kristian dɛn we nɔ mared kin lan frɔm di tin dɛn we de insay Sɔlɔmɔn In Siŋ?

¹⁴ Di Baybul tɛl Kristian dɛn klia wan se dɛn fɔ mared to pɔsin “we biliv di Masta.” (1 Kɔr. 7:39) We Kristian want fɔ mared, i nɔ fɔ luk fɔ pɔsin we nɔto Witnɛs, bifo dat, i fɔ luk insay di kɔngrigeshɔn fɔ pɔsin we fetful to Jiova. I nɔ izi tide fɔ gɛt pis ɛn wanwɔd insay mared, bɔt if mared pipul dɛn gɛt fet ɛn dɛn rili lɛk Gɔd, dɛn go gɛt gladi at na dɛn mared-os. So na dɛn kayn kwaliti ya pɔsin we want mared fɔ luk fɔ. Na dɛn kayn kwaliti ya di shɛpad bɔy ɛn di Shulamayt gyal bin si insay dɛnsɛf.

15. Us ɛgzampul di Shulamayt gyal sɛt fɔ Kristian dɛn we nɔ mared yet?

¹⁵ Rid Sɔlɔmɔn In Siŋ 4:12. Wetin mek di shɛpad bɔy bin tɔk se di Shulamayt gyal tan lɛk “gadin we lɔk”? Na bikɔs gadin we gɛt wɔl ɔ fɛns nɔto fɔ ɔlman. If pɔsin want go insay de, pas i pas na di domɔt ɛn di domɔt kin lɔk. Di Shulamayt gyal tan lɛk da gadin bikɔs na di shɛpad bɔy we bin gɛt fɔ mared am na in nɔmɔ i bin lɛk. We di Shulamayt gyal nɔ gri fɔ di kiŋ, i sho se i tan lɛk “wɔl” we tinap tranga wan, nɔto lɛk “domɔt” we kin opin wayd wan. (Sɔl. in Siŋ 8:8-10) Semweso, Kristian dɛn we nɔ mared, fɔ kip dɛn lɔv fɔ di pɔsin we dɛn gɛt fɔ mared.

16. Us lɛsin Sɔlɔmɔn In Siŋ tich Kristian dɛn we de wach dɛnsɛf fɔ mared?

¹⁶ We di shɛpad bɔy bin tɛl di Shulamayt gyal se lɛ dɛn go waka, in brɔda dɛn nɔ gri fɔ lɛ i go. Bifo dat, dɛn tɛl am se lɛ i go gayd di gadin. Wetin mek dɛn du so? Fɔ se dɛn nɔ bin biliv am? Fɔ se dɛn bin de tink se i go go du mami ɛn dadi biznɛs wit di shɛpad bɔy? Nɔ, nɔto dat dɛn bin de tink. In brɔda dɛn bin want fɔ protɛkt am so dat i nɔ go go na say we go tɛmpt am fɔ du mami ɛn dadi biznɛs. (Sɔl. in Siŋ 1:6; 2:10-15) Dis na fayn lɛsin fɔ Kristian dɛn we nɔ mared yet: We Kristian dɛn de wach dɛnsɛf fɔ mared, dɛn fɔ tek tɛm lɛ dɛn nɔ du ɛnitin we go pwɛl dɛn padi biznɛs wit Jiova. Dɛn fɔ avɔyd ples dɛn we na dɛn tu nɔmɔ de de. I nɔ bad fɔ lɛ dɛn tɔk dɛn swit swit tɔk dɛn to dɛnsɛf, bɔt dɛn fɔ tek tɛm mek dɛn nɔ de na say we go tɛmpt dɛn fɔ du bad.

17, 18. Us bɛnifit yu dɔn gɛt frɔm Sɔlɔmɔn In Siŋ?

¹⁷ We Kristian dɛn kin jɔs mared, dɛn kin lɛk dɛnsɛf ɛn dɛn kin de tɔk to dɛnsɛf fayn. We Jiova bin mek mared, i bin mek am fɔ lɛ i las, so i fayn fɔ mek mared pipul dɛn kɔntinyu fɔ lɛk dɛnsɛf mɔ ɛn mɔ, ɛn dɛn fɔ tray fɔ lɛ kolat de na dɛn mared-os.—Mak 10:6-9.

¹⁸ We yu de luk fɔ pɔsin fɔ mared, yu fɔ luk fɔ pɔsin we yu go rili lɛk, ɛn we yu gɛt di pɔsin, tray fɔ lɛk di pɔsin mɔ ɛn mɔ, jɔs lɛk aw wi lan frɔm Sɔlɔmɔn In Siŋ. Ilɛksɛf yu de luk fɔ pɔsin fɔ mared ɔ yu dɔn mared, i pɔsibul fɔ lɛ yu gɛt tru lɔv, we tan lɛk “di faya we de kɔmɔt frɔm Ja.”—Sɔl. in Siŋ 8:6.