“Na Dat Yu Want”
“Yu dɔn tek tɛm kip dɛn tin ya frɔm di wan dɛn we gɛt sɛns ɛn dɛn masta sabi bukman dɛn, bɔt yu dɔn sho am to smɔl pikin dɛn.”—LYUK 10:21.
1. Wetin du “di oli spirit mek Jizɔs gladi pasmak”? (Luk di pikchɔ nia dis atikul in taytul.)
YU GO ebul fɔ imajin aw i bin tan lɛk fɔ si Jizɔs Krays we “di oli spirit mek [i] gladi pasmak”? Sɔntɛm yu imajin we i de smayl, we i opin in yay dɛn fɔ sho se i gladi. Wetin mek Jizɔs gladi so? I bin jɔs dɔn sɛn 70 pan in disaypul dɛn fɔ go prich di gud nyus bɔt Gɔd in Kiŋdɔm. So i bin want fɔ no aw dɛn go du dis wok, bikɔs bɔku pawaful pipul dɛn nɔ bin want fɔ lɛ dɛn prich di gud nyus, lɛk di Ju Lɔ ticha dɛn ɛn di Faresi dɛn we bin gɛt sɛns ɛn lan bɔku buk. Dɛn bin de mek bɔku pipul dɛn si Jizɔs as ɔdinari kapɛnta ɛn dɛn bin de mek pipul dɛn si in disaypul dɛn as “ɔdinari pipul dɛn we nɔ lan buk.” (Akt 4:13; Mak 6:3) Bɔt stil, di disaypul dɛn bin gladi we dɛn kam bak afta dɛn dɔn prich. Dɛn bin prich pan ɔl we pipul dɛn ɛn ivin di dɛbul dɛn bin tray fɔ stɔp dɛn! Wetin bin mek dɛn gladi ɛn gɛt maynd?—Rid Lyuk 10:1, 17-21.
2. (a) Aw Jizɔs in disaypul dɛn bin tan lɛk smɔl pikin? (b) Wetin bin ɛp Krays in disaypul dɛn fɔ ɔndastand di impɔtant tin dɛn we de insay Gɔd in Wɔd?
2 Lɛ wi si wetin Jizɔs bin tɛl Jiova. I bin se: “A de prez yu bifo ɔlman Papa, yu na di Masta fɔ di ɛvin ɛn di wɔl. A de prez yu bikɔs yu dɔn tek tɛm kip dɛn tin ya frɔm di wan dɛn we gɛt sɛns ɛn dɛn masta sabi bukman dɛn, bɔt yu dɔn sho am to smɔl pikin dɛn. Yu du dis Papa, bikɔs na dat yu want.” (Mat. 11:25, 26) Jizɔs nɔ bin de tray fɔ tɔk se in disaypul dɛn na smɔl pikin dɛn. Bifo dat, i bin no se dɛn tan lɛk smɔl pikin dɛn we yu kɔmpia dɛn to di masta sabi bukman dɛn we bin de da tɛm de. Dɛn masta sabi bukman ya bin de si dɛnsɛf as pipul dɛn we gɛt sɛns. Wan ɔda impɔtant rizin we mek Jizɔs kɔl in disaypul dɛn smɔl pikin na bikɔs i bin dɔn tich dɛn se dɛn fɔ tan lɛk smɔl pikin, we min se dɛn fɔ put dɛnsɛf dɔŋ ɛn dɛn fɔ bi pipul dɛn we rɛdi fɔ lan. (Mat. 18:1-4) Aw dɛn bin bɛnifit we dɛn put dɛnsɛf dɔŋ? Jiova bin yuz in oli spirit fɔ ɛp di disaypul dɛn fɔ ɔndastand di impɔtant tin dɛn we de insay in Wɔd, bɔt di masta sabi bukman dɛn we bin de si dɛn as pipul dɛn we nɔ impɔtant, nɔ bin no natin bikɔs Setan bin dɔn blaynd dɛn ɛn dɛn bin prawd.
3. Wetin wi go tɔk bɔt insay dis atikul?
3 No wɔnda we mek Jizɔs bin gladi pasmak! I bin gladi fɔ si di we aw Jiova bin mek ɔlkayn pipul dɛn we ɔmbul no di dip tin dɛn we de na in Wɔd, i nɔ mata if dɛn lan buk ɔ dɛn nɔ lan buk. I bin gladi bak bikɔs in Papa bin lɛk tichin we klia ɛn simpul fɔ ɔndastand. Jiova dɔn chenj? Aw i de sho se i stil lɛk dis kayn tichin? As wi de tray fɔ no di ansa, wi go gladi jɔs lɛk aw Jizɔs bin gladi.
ƆLMAN GO NO DI DIP TIN DƐN WE DE NA DI BAYBUL
4. Aw Di Wachtawa we yuz wɔd dɛn we izi fɔ ɔndastand dɔn ɛp bɔku pipul dɛn?
4 Dɛn biɛn tɛm ya, Jiova in ɔganayzeshɔn de tich simpul ɛn klia wan. Lɛ wi tɔk bɔt tri ɛgzampul dɛn. Fɔs, wi gɛt Di Wachtawa we dɛn yuz wɔd dɛn we izi fɔ ɔndastand. * Dis Wachtawa dɔn ɛp bɔku pipul dɛn. Na fayn gift fɔ di wan dɛn we i nɔ izi fɔ dɛn fɔ rid ɛn ɔndastand. Papa dɛn dɔn si se dɛn pikin dɛn de kɔmɛnt naw mɔ we dɛn de stɔdi dis Wachtawa. Di Wachtawa na di men tin we di ɔganayzeshɔn de yuz fɔ tich wi. Bɔku brɔda ɛn sista dɛn dɔn rayt lɛta to di Gɔvnin Bɔdi fɔ sho se dɛn rili gladi. Wan sista rayt se i bin de fred fɔ kɔmɛnt na di Wachtawa Stɔdi. Bɔt naw i nɔ de fred igen! Afta di sista bigin yuz Di Wachtawa we izi fɔ ɔndastand, i rayt se: “A de kɔmɛnt naw pas wan tɛm, ɛn a nɔ de fred igen! A de tɛl Jiova tɛnki ɛn a de tɛl unasɛf tɛnki.”
5. Us bɛnifit dɛn di nyu New World Translation of the Holy Scriptures gɛt?
5 Sɛkɔn, wi gɛt di nyu New World Translation of the Holy Scriptures. Di ɔganayzeshɔn bin pul di Inglish kɔpi insay di mitin we dɛn kin gɛt wan tɛm pan ia. Dat bin apin Ɔktoba 5, 2013. * Bɔku Skripchɔ dɛn naw nɔ gɛt bɔku wɔd dɛn, bɔt dɛn stil gɛt di sem minin ɛn dɛn ivin klia pas aw dɛn bin de trade. Fɔ ɛgzampul, Job 10:1 bin gɛt 27 wɔd dɛn, bɔt insay di nyu Inglish Baybul na 19 wɔd dɛn naw i gɛt; ɛn Prɔvabs 8:6 in bin gɛt 20 wɔd dɛn, bɔt naw na 13 wɔd dɛn i gɛt. Ɔl tu dɛn vas ya klia naw na di nyu Baybul. Infakt, wan fetful anɔyntɛd brɔda, we dɔn sav Jiova fɔ lɔng tɛm, bin tɔk se: “A jɔs dɔn rid di Baybul buk we nem Job insay di nyu Baybul, ɛn i jɔs tan lɛk se na mi fɔs tɛm fɔ ɔndastand am!” Bɔku brɔda dɛn bak dɔn tɔk di sem tin.
6. Aw yu fil bɔt di nyu we aw wi dɔn ɔndastand Matyu 24:45-47?
6 Tɔd, lɛ wi tɔk bɔt sɔm nyu we dɛn we wi dɔn kam fɔ ɔndastand sɔm tin dɛn na di Baybul. Fɔ ɛgzampul, di we aw dɛn bin ɛp wi fɔ ɔndastand udat na “di slev we fetful ɛn gɛt sɛns,” insay di Julay 15, 2013, Wachtawa (Inglish), bin mek wi gladi. (Mat. 24:45-47) Dɛn bin ɛksplen se di slev we fetful na di Gɔvnin Bɔdi, ɛn di ɔda “savant dɛn” na ɔl di wan dɛn we di Gɔvnin Bɔdi de tich bɔt Jiova, ilɛksɛf dɛn na anɔyntɛd ɔ “ɔda ship.” (Jɔn 10:16) I rili fayn fɔ lan dɛn tin ya ɛn tich dɛn to di nyu wan dɛn! Us ɔda we dɛn Jiova dɔn sho se i lɛk tichin dɛn we klia ɛn simpul fɔ ɔndastand?
DƐN DE ƐKSPLEN BAYBUL STORI DƐN SIMPUL ƐN KLIA WAN NAW
7, 8. Us stori dɛn na di Baybul tinap fɔ sɔmbɔdi ɔ sɔntin?
7 If i dɔn te we yu de sav Jiova, yu go dɔn si se di we aw wi magazin ɛn buk dɛn de ɛksplen Baybul stori dɛn, dɔn chenj. Aw i chenj? Trade, wi buk ɛn magazin dɛn bin lɛk fɔ tɔk se sɔm Baybul stori dɛn min sɔntin we gɛt fɔ apin tumara bambay. Ɛni rizin de na di Baybul we mek wi buk ɛn magazin dɛn bin de du dat? Yɛs, rizin de. Fɔ ɛgzampul, Jizɔs bin tɔk bɔt “di sayn bɔt Jona di prɔfɛt.” (Rid Matyu 12:39, 40.) Jizɔs bin ɛksplen se di tɛm we Jona bin de insay di fish in bɛlɛ, i bin jɔs tan lɛk se na grev i bin de, bɔt Jiova bin mek i nɔ day. Dis bin de sho di tɛm we Jizɔs go de na in grev.
8 Di Baybul tɔk bɔt ɔda stori dɛn bak we min sɔntin. Di apɔsul Pɔl bin tɔk bɔku tin bɔt dɛn stori ya. Fɔ ɛgzampul, i tɔk bɔt Ebraam, Ega, ɛn Sera. Dis stori bin de sho di padi biznɛs we go de bitwin Jiova, di Izrɛlayt dɛn, ɛn di pat pan in ɔganayzeshɔn we de na ɛvin. (Gal. 4:22-26) Semweso, di tabanakul, di tɛmpul, di De fɔ Fɔgiv Sin, di ay prist, ɛn ɔda tin dɛn na di Lɔ we Gɔd bin gi Mozis bin de “sho di gud tin dɛn we gɛt fɔ kam.” (Ibru 9:23-25; 10:1) I rili fayn fɔ stɔdi dɛn Baybul stori ya bikɔs dɛn kin mek wi gɛt mɔ fet. Wi go se naw ɔl di pipul dɛn, di tin dɛn we apin, ɛn di ɔda tin dɛn we di Baybul tɔk bɔt tinap fɔ sɔmbɔdi ɔ sɔntin?
9. Aw wi bin de ɛksplen Nebɔt in stori?
9 Trade, na dis kayn we wi bin de ɛksplen Baybul stori dɛn. Fɔ ɛgzampul, lɛ wi tɔk bɔt Nebɔt in stori. Wikɛd Kwin Jezibɛl bin mek dɛn jɔj am ɛn kil am pan ɔl we i nɔ bin du natin. Jezibɛl bin du dis fɔ mek in man we na Eab, tek Nebɔt in gadin. (1 Kiŋ 21:1-16) Insay 1932, di ɔganayzeshɔn bin se dis stori min sɔntin. Eab ɛn Jezibɛl bin min Setan ɛn in ɔganayzeshɔn; Nebɔt bin tinap fɔ Jizɔs; Nebɔt in day wan bin min di day we Jizɔs bin day. Afta lɔng tɛm, dat na insay 1961, dɛn bin mek wan buk we nem “Let Your Name Be Sanctified.” Dis buk bin ɛksplen se Nebɔt bin tinap fɔ di anɔyntɛd Kristian dɛn, ɛn Jezibɛl bin tinap fɔ ɔl di lay lay Kristian dɛn. So di bad tin we Jezibɛl bin du to Nebɔt bin de sho di bad tin we dɛn gɛt fɔ du to di anɔyntɛd Kristian dɛn insay wi yon tɛm. Fɔ lɔng tɛm, Gɔd in pipul dɛn bin de gɛt mɔ fet we dɛn de ɛksplen Baybul stori dɛn dis kayn we. Wetin mek tin dɔn chenj naw?
10. (a) Aw di sɛns we Jiova dɔn gi “di slev we fetful ɛn gɛt sɛns” dɔn ɛp dɛn we dɛn de ɛksplen sɔm Baybul stori dɛn? (b) Wetin mɔ wi buk ɛn magazin dɛn de tɔk bɔt tide?
10 As tɛm de go, Jiova dɔn ɛp “di slev we fetful ɛn gɛt sɛns” fɔ gɛt mɔ sɛns. Dis sɛns we dɛn dɔn gɛt dɔn mek dɛn de tek tɛm mɔ. Dɛn nɔ jɔs de si ɛni stori na di Baybul ɛn se i min sɔntin pas if dɛn si am klia wan na di Baybul. Apat frɔm dat, dɛn dɔn kam fɔ si se di we aw dɛn bin de ɛksplen dɛn Baybul stori dɛn, bin at fɔ lɛ bɔku pipul dɛn ɔndastand. Di bɔku bɔku tin dɛn we dɛn bin de ɛksplen bɔt di stori, lɛk udat dis pɔsin tinap fɔ ɛn wetin mek i tinap fɔ am, bin mek di stori at fɔ ɔndastand, at fɔ mɛmba, ɛn i bin ivin at fɔ si di lɛsin we de insay de. Di rizin we pas ɔl, na dat di we aw dɛn bin de ɛksplen dɛn stori ya bin de mek wi nɔ de si di lɛsin dɛn we di stori de tich. Na dat mek tide wi buk ɛn magazin dɛn de tɔk mɔ bɔt simpul tin dɛn we wi kin lan frɔm di stori. Insay di stori dɛn, wi kin tɔk mɔ bɔt aw fɔ gɛt fet, aw fɔ bia, aw fɔ wɔship Jiova, ɛn ɔda impɔtant kwaliti dɛn we wi kin lan na di Baybul. *
Nebɔt in stori de tich wi fayn lɛsin (Luk na paregraf 11)
11. Aw wi dɔn ɔndastand Nebɔt in stori naw? Aw Nebɔt in ɛgzampul go ɛp wi ɔl?
11 Aw wi dɔn ɔndastand Nebɔt in stori naw? Nebɔt in stori dɔn klia ɛn simpul fɔ ɔndastand. Wi dɔn kam fɔ no se di rizin we mek Nebɔt day, nɔto bikɔs i bin tinap fɔ Jizɔs ɛn di anɔyntɛd dɛn, bɔt i day bikɔs i bin de du wetin Jiova want. Nebɔt bin obe Jiova in Lɔ pan ɔl we in layf bin de pan denja. (Nɔm. 36:7; 1 Kiŋ 21:3) I sɛt fayn ɛgzampul fɔ Gɔd in pipul dɛn we go gɛt fɔ sɔfa bikɔs dɛn de du wetin rayt. (Rid Sɛkɔn Lɛta To Timoti 3:12.) Ɔlman we na Kristian kin ebul ɔndastand, mɛmba, ɛn falamakata Nebɔt in fayn ɛgzampul.
12. (a) Wetin wi nɔ fɔ tɔk bɔt di stori dɛn we de na di Baybul? (b) Wetin mek wi ebul fɔ ɛksplen sɔm dip tin dɛn na di Baybul klia wan? (Luk di futnot.)
12 Fɔ se ɔl di stori dɛn na di Baybul nɔ gɛt ɛni ɔda minin, na jɔs lɛsin dɛn nɔmɔ dɛn gɛt? Nɔ. Tide, wi buk ɛn magazin dɛn kin tich wi mɔ bɔt tin dɛn we kin mek wi mɛmba ɔda tin dɛn na di Baybul ɛn dɛn kin gi wi ɛgzampul dɛn. Wi buk ɛn magazin dɛn naw nɔ de ɛksplen tumɔs igen se sɔm pipul dɛn na di Baybul stori dɛn tinap fɔ sɔmbɔdi ɔ min sɔntin. Fɔ ɛgzampul, wi kin tɔk se di obe we Nebɔt obe Jiova pan ɔl we dɛn bin du am bad ɛn kil am de mek wi mɛmba di obe we Krays ɛn di anɔyntɛd dɛn de obe Jiova. Bɔt nɔto dat nɔmɔ, Nebɔt in stori kin mek wi mɛmba Krays in “ɔda ship dɛn” we fetful to am. Dis klia ɛn simpul we fɔ tich de sho se di tin dɛn we wi de tich kɔmɔt frɔm Gɔd. *
DƐN DE ƐKSPLEN JIZƆS IN PAREBUL DƐN SIMPUL WAN NAW
13. Us ɛgzampul dɛn de sho se wi de ɛksplen Jizɔs in parebul dɛn klia ɛn simpul wan naw?
13 Jizɔs Krays na di bɛst Ticha we dɔn ɛva liv na di wɔl. We i bin de tich, i bin lɛk fɔ pul parebul dɛn. (Mat. 13:34) Parebul dɛn kin mek pɔsin bigin imajin wetin dɛn de tɔk bɔt, ɛn i kin tɔch pɔsin in at. Fɔ lɔng tɛm naw, wi buk ɛn magazin dɛn kin ɛksplen Jizɔs in parebul dɛn klia ɛn simpul wan. Yu nɔ gladi we wi dɔn kam fɔ ɔndastand Jizɔs in parebul dɛn we i bin pul bɔt di yist, di mɔstad sid, ɛn di fishin nɛt insay di Disɛmba 1, 2014 Wachtawa? Wi dɔn si klia wan se dɛn parebul ya gɛt sɔntin fɔ du wit Gɔd in Kiŋdɔm ɛn dɛn de sho aw di Kiŋdɔm de mek bɔku pipul dɛn kam bi Krays in disaypul dɛn ɛn naw dɛn nɔ de du di bad tin dɛn we pipul dɛn de du.
14. (a) Aw wi bin de ɛksplen di gud Samɛritan in stori? (b) Aw wi dɔn ɔndastand Jizɔs dis in stori naw?
14 Wetin wi go se bɔt Jizɔs in stori ɔ parebul dɛn we kin lɔng? Sɔm gɛt minin, sɔm kin tɔk bɔt sɔntin dɛn we gɛt fɔ apin, ɛn ɔda wan dɛn kin sho di lɛsin dɛn we wi kin lan. Bɔt aw wi go ebul fɔ no uswan gɛt minin, uswan gɛt fɔ apin tumara, ɛn uswan jɔs gɛt lɛsin? As tɛm de go, wi dɔn de si di ansa klia wan. Fɔ ɛgzampul, lɛ wi tɔk bɔt aw wi bin de ɛksplen Jizɔs in parebul bɔt di gud Samɛritan. (Lyuk 10:30-37) Insay 1924, Di Wach Tawa bin se di gud Samɛritan tinap fɔ Jizɔs; di rod frɔm Jerusɛlɛm to Jɛriko, we na bin rɔn dɔŋ, bin min di we aw mɔtalman dɔn de go frɔm bad to wɔs frɔm we Adam ɛn Iv bin sin na Idɛn; di tifman dɛn na di rod tinap fɔ dɛn big big ɔganayzeshɔn dɛn ɛn pipul dɛn we de mek kruk fɔ gɛt bɔku bɔku prɔfit; ɛn di prist ɛn Livayt tinap fɔ di bigman dɛn na dɛn chɔch dɛn. Tide, wi buk ɛn magazin dɛn de yuz dɛn stori ya fɔ ɛp ɔlman we na Kristian fɔ no se dɛn nɔ fɔ pik-ɛn-chuz udat fɔ ɛp ɛn udat nɔ fɔ ɛp, mɔ we i kam pan Gɔd biznɛs. Wi gladi we Jiova dɔn mek wi ɔndastand in tichin dɛn klia wan, nɔto so?
15. Wetin wi go tɔk bɔt na di nɛks atikul?
15 Insay di nɛks atikul, wi go tɔk bɔt wan ɔda parebul we Jizɔs bin pul, dat na di parebul bɔt di tɛn vajin dɛn. (Mat. 25:1-13) Aw Jizɔs bin want lɛ in disaypul dɛn we de liv na di las dez ɔndastand dis parebul? Fɔ se i bin want lɛ wi ɔndastand am as parebul we gɛt fɔ apin tumara, ɔ as parebul we ɔl di pipul dɛn we de de, tinap fɔ sɔntin, ɔ as parebul we ɔl di tin dɛn we de de, ɛn ivin di tin dɛn we apin, min sɔntin? Ɔ i bin want lɛ in disaypul dɛn si am as lɛsin we go ɛp dɛn insay di las dez? Lɛ wi si.
^ par. 4 Na insay Inglish fɔs dɛn mek Di Wachtawa we gɛt wɔd dɛn we izi fɔ ɔndastand. Dɛn mek am Julay 2011. Ɛn dɛn dɔn mek am bak insay ɔda langwej dɛn.
^ par. 5 Dɛn de tray fɔ mek di nyu Baybul de insay ɔda langwej dɛn bak.
^ par. 10 Fɔ ɛgzampul, insay wan buk we dɛn kɔl Imitate Their Faith, dɛn tɔk bɔt 14 difrɛn pipul dɛn na di Baybul. Di buk tɔk plɛnti tin dɛn bɔt aw dɛn bin liv dɛn layf. Di buk tɔk mɔ bɔt aw wi kin falamakata dɛn pipul ya, i nɔ tɔk tumɔs bɔt udat dɛn tinap fɔ.
^ par. 12 Na tru se sɔm tin dɛn de na Gɔd in Wɔd we kin luk “at fɔ ɔndastand.” Fɔ ɛgzampul, sɔm tin dɛn we Pɔl rayt kin luk at fɔ ɔndastand. Bɔt lɛ wi mɛmba se na di oli spirit bin de tɛl ɔl di wan dɛn we rayt di Baybul, wetin fɔ rayt. Na da sem spirit de, de ɛp tru Kristian dɛn tide fɔ ɔndastand di tru tin dɛn we de na di Baybul, ɛn i de ivin mek wi no ɛn ɔndastand “di dip tin dɛn bɔt Gɔd” klia wan, pan ɔl we wi nɔ pafɛkt.—2 Pit. 3:16, 17; 1 Kɔr. 2:10.
