Fɔ Jiova Witnɛs dɛn, no buk nɔ de we impɔtant pas di Baybul. Dɛn de stɔdi am fast fast ɛn dɛn de yuz am fɔ tich ɔda pipul dɛn di gud nyus bɔt Gɔd in Kiŋdɔm. (Matyu 24:14) We dɛn de yuz am dɛn difrɛn we dɛn ya, dat dɛn mek dɛn Baybul dɛn pwɛl kwik. Na dat mek dɛn tray ɔlkayn we so dat di 2013 nyu New World Translation of the Holy Scriptures go fayn ɛn i go las.

Dɛn bin nid fɔ mek nyu Baybul we strɔng. Sɔm pan di wan dɛn we de wok na di say usay dɛn de print na Wɔlkil, Nyu Yɔk insay Amɛrika, bin tɔk to di prɛsidɛnt fɔ wan kɔmni we kin put kɔva pan buk. We dɛn tɛl di man di kayn we dɛn want, di man tɛl dɛn se, “Di kayn Baybul we una want nɔ de.” I tɔk bak se, “I sɔri fɔ no, bɔt na tru fɔ se bɔku Baybul dɛn we dɛn de mek, nɔto fɔ mek i te bɔt na fɔ mek i luk fayn nɔmɔ we dɛn put am na shɛlf.”

Sɔm ɔda New World Translation we dɛn bin dɔn mek, nɔ bin de te—sɔntɛnde, dɛn bin de ivin pwɛl we wam san mit dɛn. Di wan dɛn we de wok usay dɛn de print bin luk luk difrɛn difrɛn tin dɛn we dɛn kin yuz fɔ mek kɔva, glu dɛn, ɛn difrɛn we dɛn aw dɛn kin jɔyn pej dɛn fɔ mek buk. Dɛn bin du ɔl dis fɔ mek dɛn go ebul fɔ mek Baybul we go ebul fɔ bia wɛda. We dɛn dɔn luk luk dɛn difrɛn tin dɛn ya dɛn mek sɔm dɛn fɔ mek Jiova Witnɛs dɛn we de na difrɛn say dɛn tɛst di Baybul dɛn. Dɛn sɛn di Baybul dɛn na say dɛn we kin wam ɛn say dɛn we ples kin kol lɛk Alaska.

Afta siks mɔnt, dɛn sɛn di Baybul dɛn bak fɔ mek dɛn chɛk dɛn. Di wan dɛn we de wok usay dɛn de print bin ad sɔm tin ɛn dɛn sɛn ɔda wan dɛn bak fɔ tɛst. Na lɛk 1,697 Baybul dɛn sɛn fɔ tɛst. Dɛn nɔ bin ol sɔm dɛn fayn. Fɔ ɛgzampul, wan pan di Baybul dɛn bin lɛf na do ɛn ren sok am na nɛt, wan ɔda wan bin sok insay bɔku bɔku wata we ebi ebi ren bin kam wan say. Di tɛst dɛn we dɛn du bin ɛp dɛn fɔ no mɔ tin dɛn bɔt di buk in te wan.

Insay 2011, we dɛn bin de du di tɛst, dɛn bay mashin dɛn we de jɔyn pej dɛn fɔ mek buk kwik wan fɔ di say dɛn we dɛn de du printin na Wɔlkil ɛn insay Ebina na Jepan. Di men tin we mek dɛn bay dɛn mashin dɛn ya nɔto fɔ jɔs mitɔp fɔ mek di bɔku bɔku Baybul dɛn we dɛn nid, bɔt na fɔ mek dɛn go ebul fɔ print di sem Baybul na di tu difrɛn say dɛn.

Insay 2012, dɛn bigin yuz wan material we nem polyurethanethe fɔ mek blak ɛn marun kɔva fɔ di New World Translation we wi de yuz naw. Bɔt dɛn yuz glu ɛn layna we dɛn nɔ bin put pan di wan dɛn we dɛn bin de sɛn fɔ tɛst so di kɔva dɛn fol bad bad wan we dɛn fiks dɛn pan di Baybul. Dɛn tray fɔ sɔlv di prɔblɛm bɔt dɛn nɔ bin ebul so dɛn stɔp fɔ mek.

Di wan dɛn we mek di matirial dɛn bin tɔk se i kɔmɔn fɔ mek kɔva dɛn we izi fɔ bɛn de fol lɛk dat ɛn na prɔblɛm we at fɔ sɔlv. Dɛn nɔ chenj fɔ mek strɔng kɔva bikɔs na kɔva we de bɛn na in dɛn bin want so dat i go fayn fɔ luk. Dɛn tɛst difrɛn difrɛn glu ɛn layna matirial dɛn fɔ 4 mɔnt te dɛn ebul fɔ mitɔp di wan we go mek dɛn kɔntinyu fɔ mek Baybul we di kɔva de bɛn bɔt i nɔ de fol.

Insay Sɛptɛmba 2012, dɛn sɛn wɔd usay dɛn de print fɔ se dɛn fɔ stɔp fɔ print, ridyus di Baybul dɛn we de, ɛn wet fɔ bigin mek di nyu New World Translation. Di fɔs tɛm we dɛn bin fɔ sheb dis Baybul na Ɔktoba 5, 2013 we dɛn de ol di mitin we di Watch Tower Bible and Tract Society of Pennsylvania kin gɛt wan tɛm pan ia.

Na Frayde, Ɔgɔst 9, 2013 na in dɛn sɛn di ilɛktronik fayl fɔ di nyu Baybul ɛn dɛn bigin fɔ print di nɛks de. Na Ɔgɔst 15 dɛn mek di fɔs Baybul ɛn afta dat fɔ lɛk sɛvin wik so di wan dɛn we de wok usay dɛn de print na Wɔlkil ɛn Ebina bin de wok ol de ɛn nɛt fɔ mek di Baybul dɛn. Dɛn bin ship lɛk 1,600,000 Baybul dɛn we bin du fɔ mek dɛn gi ɔl di wan dɛn we atɛnd di program.

Pan ɔl we di nyu Baybul fayn ɛn i de te, di mɛsej we de insay de, de gi layf ɛn na dat mɔ na in impɔtant. Dɛn bin gi wan Baybul to wan uman we de na Amɛrika. Di nɛks de i bin rayt se, “A ebul fɔ ɔndastand di Baybul fayn we a de rid dis nyu wan.”