Na lɛk 19,000 pipul dɛn bin gɛda Ɔktoba 4, 2014, fɔ di mitin we mek 130 we Watch Tower Bible and Tract Society of Pennsylvania kin gɛt wan tɛm pan ia. Dɛn bin ol di program na Jersey City, New Jersey, insay Amɛrika ɛn dɛn bin ple di vidio na difrɛn say dɛn.

Mak Sandasin, wan pan di Gɔvnin Bɔdi mɛmba dɛn fɔ Jiova Witnɛs, na in na bin di chiaman fɔ di mitin. We i bin stat, i bin tɔk se di mitin rili impɔtant bikɔs dɛn bin de sɛlibret di 100 ia we di Kiŋdɔm dɔn rul fɔ.

Brɔda Sandasin bin tɔk bɔt tri men tin dɛn we di Kiŋdɔm dɔn du insay di 100 ia we i dɔn rul fɔ:

• Di prichin wok na difrɛn say dɛn na di wɔl. Jiova dɔn blɛs in pipul dɛn fɔ mek dɛn ebul fɔ wok tranga wan fɔ prich di gud nyus bɔt di Kiŋdɔm. Insay dɛn 1914 wi nɔ bin bɔku, bɔt insay 2014 wi dɔn pas lɛk et milyɔn so. Wi go kɔntinyu fɔ prich wit zil te Jiova se di wok dɔn dɔn.

• I de protɛkt in pipul dɛn. Pipul dɛn we de na ɔda rilijɔn ɛn sɔm gɔvmɛnt dɛn kin ambɔg di wok we wi de du ɛn kin want fɔ stɔp Jiova Witnɛs dɛn wantɛm wantɛm mek dɛn nɔ de igen. Bɔt Jiova dɔn de protɛkt in pipul dɛn. Wi dɔn win bɔku kes dɛn na kɔt ɛn ivin di wan dɛn we wi kin kɛr go na di European Court of Human Rights, ɛn dat de sho se Jiova de kɔntinyu fɔ protɛkt wi ivin insay wi yon tɛm.

• I de mek pipul dɛn gɛt wanwɔd ɔlsay na di wɔl. Di Kiŋdɔm de mek pipul dɛn we kɔmɔt difrɛn say dɛn na di wɔl ɛn de tɔk difrɛn langwej dɛn, gɛt wanwɔd as dɛn de wɔship Gɔd. Brɔda Sandasin bin se, “Na Jiova nɔmɔ ebul fɔ du dis kayn mirekul.” Ɛn ɔl di wan dɛn we bin de na di mitin bin gladi fɔ we dɛn de de.

Bi Jiova in Padi.

Dɛn katun fim dɛn ya we pikin dɛn dɔn de wach fɔ tu ia naw, na in na bin di nɛks tin we dɛn tɔk bɔt na di program. Fɔs, Brɔda Sandasin mek dɛn ple di fim usay dɛn intavyu pikin dɛn we de difrɛn say dɛn na di wɔl. Di ɔdiɛns bin rili gladi fɔ di kayn we aw di pikin dɛn sho se dɛn gladi fɔ di fim dɛn.

Dɛn ple wan ɔda nyu wan we gɛt di taytul, “Jehovah Will Help You Be Bold.” Dis fim we ple fɔ 12 minit bin sho di Izrɛlayt gyal in stori bɔt aw i bin gɛt maynd fɔ tɔk bɔt Jiova to Neman in wɛf. (2 Kiŋ 5:​1-​14) Dɛn bin put di fim na jw.org Mɔnde, Ɔktoba 6, 2014, ɛn i pas 20 langwej dɛn we i de pan.

JW Langwej.

Brɔda Sandasin bin anawns bɔt dis nyu aplikeshɔn fɔ smatfon, kɔmpyuta, ɔ tablɛt, fɔ ɛp Jiova Witnɛs dɛn we want fɔ lan ɔda langwej so dat dɛn go ebul fɔ prich mɔ. Di aplikeshɔn gɛt pas 4,000 wɔd dɛn insay 18 langwej dɛn. Dɛn de mek plan fɔ ad mɔ wɔd dɛn ɛn mɔ tin dɛn we wi go tɔk we wi de prich.

JW TV.

Di ɔdiɛns bin gladi fɔ no se naw wi dɔn gɛt nyu TV steshɔn na Intanɛt. Na Jiova Witnɛs dɛn gɛt am ɛn dɛn jɔs de tɛst am pan Inglish fɔs. Dɛn gɛt fɔ de du di program dɛn na di wɔl ɛdkwata na Bruklin, Nyu Yɔk, insay Amɛrika. Dɛn gɛt fɔ de sho wi fim dɛn, myuzik dɛn, ɛn Baybul ridin drama dɛn. Wi go de gɛt program dɛn fɔ di mɔnt we Gɔvnin Bɔdi mɛmba dɛn ɛn di wan dɛn we de ɛp dɛn, go de du.

Brɔda Sandasin tɔk smɔl bɔt di fɔs program dɛn. Na Brɔda Stivin Lɛt we na Gɔvnin Bɔdi mɛmba na in bin du dis program, ɛn i bin tɔk bɔt di tin dɛn we dɛn bin du fɔ mek di TV steshɔn. JW TV bin stat Ɔktoba 6, 2014, ɛn pɔsin kin ebul fɔ go de bay we i go na tv.dan124.com.

“Di Kiŋdɔm​—100 Ia ɛn Mɔ.”

Samiɛl Ad wan pan di Gɔvnin Bɔdi mɛmba bin tɔk smɔl bɔt di fim we tɔk bɔt aw Gɔd in Kiŋdɔm dɔn de ɛp wi fɔ go bifo pan di prichin wok. I tɔk bak bɔt lɔng tɛm Jiova Witnɛs dɛn istri, dɛn ɛkspiriɛns dɛn, ɛn dɛn bin akt sɔm pan dɛn ɛkspiriɛns dɛn, i bin tɔk bak bɔt di fim we gɛt di taytul, “Photo-Drama of Creation”; aw dɛn bin de yuz di gramafon, tɛstimoni kad, information marches, ɛn motoka we gɛt sawnd sistɛm; ɛn dɛn de mek skul dɛn fɔ tren wi fɔ prich.

Aw wi go bɛnifit we wi de tink bɔt wetin di Kiŋdɔm dɔn du insay 100 ia? I de mek di Kiŋdɔm rial to wi ɛn i de mek wi tink mɔ bɔt di tin dɛn we di Kiŋdɔm gɛt fɔ du tumara bambay.

Siŋ dɛn fɔ Wɔship.

Devid Splen wan pan di Gɔvnin Bɔdi mɛmba, bin mek ɔlman na di ɔdiɛns gladi we i anawns se dɛn de plan fɔ chenj sɔm tin dɛn na di siŋbuk, Sing to Jehovah. Dɛn go yuz di sem kayn matirial dɛn fɔ mek di kɔva ɛn in kɔva go jɔs tan lɛk di New World Translation in kɔva. We wi de yuz fayn matirial dɛn, dat de sho se myuzik na impɔtant tin pan wi wɔship.

Brɔda Splen anawns bak se dɛn go ad sɔm nyu siŋ dɛn na di siŋbuk. Bɔt wi nɔ go nid fɔ wet te dɛn chenj ɔl di tin dɛn we dɛn gɛt fɔ chenj bifo wi bigin fɔ yuz di nyu siŋ dɛn. As dɛn kɔmɔt so, dɛn go put dɛn na jw.org wantɛm.

Sɔm Bɛtɛlayt dɛn bin praktis tri pan wi nyu siŋ dɛn we dɛn bin siŋ pan di mitin we wi kin gɛt wan tɛm pan ia. Na Brɔda Splen bin kɔndɔkt wan pan di nyu siŋ dɛn we gɛt di taytul, “The Kingdom Is in Place​—Let It Come!” Dɛn bin mek dis siŋ fɔ mitɔp di 100 ia we di Kiŋdɔm dɔn rul fɔ. Afta dɛn dɔn siŋ di siŋ, di wan dɛn we de na di ɔdiɛns bin jɔyn dɛn fɔ siŋ. Leta, di wan dɛn we bin de siŋ ɛn di wan dɛn we de na di ɔdiɛns bin jɔyn fɔ siŋ wan ɔda nyu siŋ we gɛt di taytul, Grant Us Boldness.”

Intavyu.

Garit Lɔsh wan pan di Gɔvnin Bɔdi mɛmba dɛn bin du di pat usay dɛn bin dɔn intavyu tri maredman dɛn ɛn dɛn wɛf dɛn, we na bin Bɛtɛlayt dɛn fɔ lɔng tɛm. Dɛn tɔk bɔt bɔku tin dɛn we dɔn chenj as di ɔganayzeshɔn de go bifo. Brɔda Lɔsh tɔk bɔt wetin di Baybul bin dɔn tɔk fɔ se di ɔganayzeshɔn go de go bifo ɛn i ɛnkɔrej ɔlman fɔ kɔntinyu fɔ go bifo wit di ɔganayzeshɔn.​—Ayzaya 60:17.

“Tin dɛn we Min Sɔntin.”

Na Brɔda Splen bin gi dis tɔk. I bin de ɛksplen aw wi pɔblikeshɔn dɛn dɔn ɛksplen sɔm wɔd dɛn ɛn dɛn minin dɛn pas aw wi bin ɔndastand dɛn trade.

Trade, bɔku fetful man ɛn uman dɛn we wi bin dɔn tɔk bɔt insay di Baybul, fiba wi fetful brɔda ɛn sista dɛn insay wi yon tɛm. Semweso, bɔku stori dɛn na di Baybul, wi bin jɔs tek am se na tin dɛn we di Baybul bin dɔn tɔk se go apin insay wi yon tɛm. Rili i go fayn fɔ mek wi stɔdi di tin dɛn we wi kɔmpia. Wetin mek naw insay wi nyu pɔblikeshɔn dɛn, wi de tɔk bɔt sɔm tin dɛn we min ɔda tin ɔ sɔm pipul dɛn we tinap fɔ sɔmbɔdi?

Di Baybul sho se sɔm pipul dɛn na di Baybul ɛn sɔm tin dɛn we bin apin, kin min ɔda tin dɛn. Wi kin gladi fɔ gri wit di say dɛn we di Baybul ɛksplen klia wan bɔt sɔm tin dɛn we min ɔda tin ɔ sɔm pipul dɛn we tinap fɔ sɔmbɔdi. Brɔda Splen bin tɔk se, “Bɔt di say dɛn we di Baybul nɔ tɔk natin, wisɛf nɔ tɔk natin.” Wi nɔ fɔ tray fɔ rid tumɔs bɔt di stori dɛn. Apat frɔm dat, if wi de fɛn tumɔs minin fɔ sɔm tin dɛn, wi go fɔgɛt bɔt di impɔtant lɛsin dɛn we di Baybul de tich wi fɔ wi yon bɛnifit​—ilɛksɛf wi gɛt op fɔ go na ɛvin ɔ fɔ de na dis wɔl.​—Lɛta Fɔ Rom 15:4. *

“Una Go Kɔntinyu fɔ ‘Wach’?”

Na Brɔda Lɛt bin gi dis tɔk. Di tɔk bin ajɔst di we aw wi bin ɔndastand Jizɔs in parebul bɔt di tɛn vajin dɛn. (Matyu 25:​1-​13) Naw wi dɔn ɔndastand fɔ se: Na Jizɔs na di ɔkɔ, ɛn di vajin dɛn na di anɔyntɛd dɛn we de fala Krays. (Lyuk 5:​34, 35; Sɛkɛn Lɛta Fɔ Kɔrint 11:2) Di Parebul gɛt fɔ du wit di las dez, wit di tin dɛn we gɛt fɔ apin di tɛm we da big trɔbul gɛt fɔ kam. We Jizɔs bin de tɔk bɔt di vajin dɛn we nɔ gɛt sɛns, i nɔ bin de tray fɔ tɔk se sɔm pan di anɔyntɛd dɛn nɔ go fetful ɛn i go nid fɔ chenj dɛn. Bifo dat, i bin jɔs de wɔn dɛn. Jɔs lɛk aw fayv vajin dɛn bin gɛt sɛns ɛn fayv nɔ bin gɛt sɛns, ɔl di anɔyntɛd dɛn fɔ disayd fɔ dɛnsɛf if dɛn go fetful ɔ dɛn nɔ go fetful.

We dɛn advays wi se wi nɔ fɔ rid tumɔs bɔt di stori, dat min se wi nɔ fɔ tray fɔ no ɔl tin bɔt wetin i gɛt fɔ du wit wi. Wi fɔ jɔs tray fɔ lan di lɛsin dɛn frɔm di parebul dɛn. Ilɛksɛf wi na anɔyntɛd ɔ “ɔda ship,” wi ɔl gɛt di wok fɔ kɔntinyu fɔ “waydawek.” (Jɔn 10:16; Mak 13:37; Matyu 5:16) Nɔbɔdi nɔ go fetful fɔ wi. Wi ɔl fɔ pik “layf” bay we wi kɔntinyu fɔ mek wi padi biznɛs tayt wit Gɔd ɛn fɔ kɔntinyu fɔ prich.​—Ditarɔnɔmi 30:19.

“Di Parebul bɔt di Talɛnt.”

Antoni Mɔris wan pan di Gɔvnin Bɔdi mɛmba dɛn na in gi di nɛks tɔk. I bin ɛp wi fɔ ɔndastand di we aw dɛn dɔn dɔn ɛksplen di parebul bɔt di talɛnt. (Matyu 25:14-​30) Wi dɔn ɔndastand naw se di masta na di parebul (Jizɔs) go blɛs in slev dɛn (di anɔyntɛd dɛn we de na di wɔl) tumara bambay we i go kam fɔ gi dɛn layf fɔ go na ɛvin. We i bin de tɔk bɔt wetin go apin to di “bad ɛn les” slev, Jizɔs nɔ bin de tɔk bɔt di bɔku bɔku anɔyntɛd dɛn we nɔ go fetful. Bifo dat, i bin de wɔn dɛn se dɛn nid fɔ fetful ɛn nɔ fala di bad slev.

Wetin wi kin lan frɔm dis parebul? Di masta na di parebul bin gi sɔntin we gɛt valyu to in slev dɛn. Semweso, Jizɔs bin gi in disaypul dɛn sɔntin we gɛt valyu dat na di wok fɔ prich ɛn mek pipul dɛn bi in disaypul. I want mek wi ɔl tek pat pan di prichin wok, ɛn i lɛf to di tin dɛn we de apin to wi. Brɔda Mɔris bin tɛl tɛnki to di wan dɛn we bin atɛnd fɔ we dɛn de prich wit zil.

“Udat Go Atak Gɔd in Pipul Dɛn?”

Dat na bin fayn tim fɔ di las tɔk ɛn na Jɛfri Jaksin we na Gɔvin Bɔdi mɛmba na in bin gi dis tɔk. Brɔda Jaksin bin tɔk bɔt di atak we Gɔg we de na Megɔg go gɛt fɔ atak Gɔd in pipul dɛn.​—Izikɛl 38:14-​23.

Trade, wi bin ɔndastand Gɔg fɔ bi Setan afta dɛn dɔn trowe am frɔm ɛvin. Brɔda Jaksin bin tɔk bɔt difrɛn impɔtant kwɛstyɔn dɛn we dɛn kin aks. Fɔ ɛgzampul, Jiova bin tɔk se we dɛn go win Gɔg i go gi Gɔg as it to dɛn “difrɛn kayn bɔd dɛn we de it bif ɛn to dɛn wayl bist dɛn.” (Izikɛl 39:4) Jiova bin dɔn tɔk se dɛn go bɛr “Gɔg ɛn ɔl in bɔku bɔku krawd dɛn.” (Izikɛl 39:11) Bɔt aw i pɔsibul fɔ mek dɛn kayn tin dɛn ya apin to pɔsin we na spirit? Dɛn go trowe Setan na di ol we nɔ gɛt bɔtɔm. (Rɛvɛleshɔn 20:​1, 2) Afta di 1,000 ia, dɛn go fri Setan frɔm di ol we nɔ gɛt bɔtɔm ɛn i “go go mek ɔl dɛn neshɔn ɔlɔbɔt na wɔl, ful . . . Gɔg ɛn Magɔg.” (Rɛvɛleshɔn 20:​7, 8) I sho klia wan se Setan nɔ go ful Gɔg if na in sɛf sɛf na Gɔg.

Brɔda Jaksin ɛksplen se di Gɔg we de na Megɔg we Izikɛl bin dɔn tɔk bɔt nɔto Setan bɔt na di difrɛn difrɛn neshɔn dɛn we go gɛda ɛn tɔn pan Gɔd in pipul dɛn tumara bambay. So sɔntɛm, di atak we Gɔg go atak go tan lɛk di atak we “di kiŋ na nɔt” atak ɛn di atak we “di wan we de rul na wɔl” go atak.​—Daniɛl 11:40, 44, 45; Rɛvɛleshɔn 17:12-14; 19:19.

Udat na di “kiŋ na nɔt” we dɛn tɔk bɔt? Wi gɛt fɔ wet ɛn si. Ilɛk wetin apin, wi fet go strɔng mɔ we wi si aw wi de kɔntinyu fɔ ɔndastand mɔ bɔt dis. Wi nɔ de fred di atak we dɛn gɛt fɔ atak Gɔd in pipul dɛn bikɔs wi no se we Gɔg we de na Megɔg go atak, dɛn go win am ɛn kil am kpatakpata ɛn Gɔd in pipul dɛn go de sote go. *

Fɔ dɔn di program.

Brɔda Sandasin anawns se dɛn dɔn mek wan smɔl sayz New World Translation Baybul. Dɔn dɛn de mek odio rɛkɔdin fɔ di Baybul we go gɛt difrɛn vɔys dɛn fɔ di difrɛn Baybul karakta dɛn. Dɛn go put dɛn smɔl smɔl na jw.org ɛn dɛn bigin wit Matyu.

Brɔda Sandasin anawns bak di iatɛks fɔ 2015 we kɔmɔt na Sam 106:1 (NW) we se: “Tɛl Jiova tɛnki, bikɔs i gud.” I ɛnkɔrej ɔlman fɔ fɛn rizin fɔ tɛl tɛnki ɛnide.

Di las siŋ fɔ di mitin na di nɔmba tri pan wi nyu siŋ dɛn, we gɛt di taytul “Jehovah Is Your Name.” Ɔl di sɛvin mɛmba dɛn na di Gɔvnin Bɔdi bin jɔyn di wan dɛn we siŋ na stej ɛn ɔl di wan dɛn we atɛnd di program fɔ siŋ dis fayn fayn siŋ​—dis sho se di program bin rili fayn!