လံာ်စီဆှံတဘ့ၣ်လၢ တၢ်ကွဲးကျိာ်ထံက့ၤအီၤ ဒ်စိၤခဲအံၤ အတၢ်ကတိၤအသိး
တၢ်ထုးထီၣ်ရၤလီၤ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မးသဲ—လီၣ်ဖျါ
ပှၤကူၣ်ဘၣ်ကူၣ်သ့ ဘၣ်ဃးဒီးလံာ်စီဆှံတဂၤ အဲလဲ ဒူၣ်သံၤ ကွဲးဖျါထီၣ်လၢ လံာ်တဘ့ၣ် လၢအမ့ၢ် Bible Translations and How to Choose Between Them အပူၤဒ်အံၤလီၤ. “နမ့ၢ်နာ်လၢ လံာ်စီဆှံမ့ၢ်ဝဲ ကစၢ်ယွၤအကလုၢ်ကထါလၢ ပှၤခဲလၢာ်အဂီၢ်န့ၣ် အခီပညီမ့ၢ်ဝဲ ကစၢ်ယွၤ ဆဲးကျိးလိာ်သးဒီးပှၤလီၤ. . . . ဒီးဒ်သိးနတၢ်ဘူၣ်တၢ်ဘါ ကကဲဘျုးလၢ နတၢ်အိၣ်မူ ကိးသနၢၣ်ဒဲးအဂီၢ်န့ၣ် တၢ်ကတိၤလၢ [လံာ်စီဆှံ] အပူၤ ကဘၣ်မ့ၢ် တၢ်ကတိၤလၢ ပှၤတဲအီၤလၢ မုၢ်ဆ့ၣ်မုၢ်ဂီၤလီၤ.”
ပှၤလၢအအဲၣ် ကစၢ်ယွၤအကလုၢ်ကထါန့ၣ် တူၢ်လိာ်ဝဲ တၢ်ကတိၤတထံၣ်အံၤလၢ အသးဒီဖျၢၣ်ညါလီၤ. အဝဲသ့ၣ်နာ်ဝဲလၢ “တၢ်ကွဲးအသးခဲလၢာ်န့ၣ် ဘၣ်တၢ်ကွဲးအီၤ ခီဖျိလၢ ကစၢ်ယွၤအသးစီဆှံ အတၢ်ဟံးစုနဲၣ်ကျဲဒီး ကဲဘျုးလၢ တၢ်သိၣ်လိနဲၣ်လိတၢ်အဂီၢ်, လၢတၢ်သိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ် ဒီးလၢသိၣ်က့ၤသီက့ၤတၢ်လၢ တၢ်တီတၢ်လိၤအပူၤအဂီၢ်” လီၤ. (၂ တံၤမသ့း ၃:၁၆) လံာ်စီဆှံန့ၣ် တမ့ၢ်လံာ်လၢပျၢၤ ယိယိဖိတဘ့ၣ်ဘၣ်. ဒ်လံာ်စီဆှံတဲဝဲအသိးန့ၣ် ယွၤအကလုၢ်ကထါ “မူဝဲ ဒီးအိၣ်ဒီး အစိအကမီၤ” လၢကမၤစၢၤပှၤလၢ ပကလဲၤခီဖျိ တၢ်ကီတၢ်ခဲတဖၣ်လၢ ပတၢ်အိၣ်မူအပူၤလီၤ. (ဧ့ၤဘြံၤ ၄:၁၂) ဒ်သိးပှၤဖးလံာ်ဖိ ကနၢ်ပၢၢ် လံာ်စီဆှံ ဒီးအိၣ်မူပိာ်ထွဲဝဲ ကန့ၢ်အဂီၢ် တၢ်ကတိၤလၢ လံာ်စီဆှံအပူၤ ကဘၣ်မ့ၢ် တၢ်ကတိၤလၢ ပှၤတဲအီၤလၢ မုၢ်ဆ့ၣ်မုၢ်ဂီၤလီၤ. တၢ်ကတိၤလၢ လံာ်စီဆှံအပူၤ မ့ၢ်အိၣ်ဒ်န့ၣ်န့ၣ် ပှၤမုၢ်ဆ့ၣ်မုၢ်ဂီၤဖိ ဖးဒီးနၢ်ပၢၢ်ဝဲကသ့လီၤ.
အဃိ ပှၤလၢအအဲၣ် ယွၤအကလုၢ်ကထါန့ၣ် ကသးခုဝဲလၢ ပထုးထီၣ်ရၤလီၤ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မးသဲ—လီၣ်ဖျါ လၢကညီစှီၤကျိာ်လီၤ. ယဟိဝၤပှၤအုၣ်အသးတဖၣ် ဘိးဘၣ်သ့ၣ်ညါဝဲလၢ အဝဲသ့ၣ်ထုးထီၣ်ဝဲ တၢ်ကွဲးကျိာ်ထံလံာ်စီဆှံတဘ့ၣ်အံၤ ဖဲလါယူၤလံ ၅, ၂၀၂၀ န့ၣ်လီၤ. ပှၤကွဲးကျိာ်ထံ လံာ်စီဆှံတဘ့ၣ်အံၤ ဘၣ်လီၤတံၢ်လီၤဆဲး ဒီးဒ်သိးပှၤကနၢ်ပၢၢ်ဘၣ်အီၤညီအဂီၢ်လီၤ. အဃိ ခဲအံၤ ပှၤကနၢ်ပၢၢ်ဘၣ် ကစၢ်ယွၤအကလုၢ်ကထါလၢ ကညီစှီၤကျိာ် ဒိၣ်န့ၢ်ဒံးလၢညါလီၤ. ဘၣ်ဆၣ် နကဆိကမိၣ်ဘၣ်လၢ မ့ၢ်မတၤသ့ၣ်တဖၣ် ကွဲးကျိာ်ထံ လံာ်စီဆှံတဘ့ၣ်အံၤလဲၣ်.
ပှၤကွဲးကျိာ်ထံတၢ်တဖၣ်လၢ အမၤလၤကပီၤ ကစၢ်ယွၤ
ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မးသဲ—လီၣ်ဖျါ န့ၣ်ပှၤထုးထီၣ်အီၤလၢ ကညီစှီၤကျိာ် သီသီဒံးလီၤ. ဘၣ်ဆၣ် တၢ်ကွဲးကျိာ်ထံလံာ်စီဆှံတဘ့ၣ်အံၤ အိၣ်ပာ်စၢၤလၢ ကျိာ်အဂၤ စးထီၣ်ဖဲ ၁၉၅၀ နံၣ်န့ၣ်လီၤ. ဖဲန့ၣ်အဆၢကတီၢ် တၢးထီခိးတၢ် လံာ်စီဆှံဒီးလံာ်ဖိတၢ်ကရၢကရိ ထုးထီၣ်ရၤလီၤ လံာ်စီဆှံတဘ့ၣ်အံၤ လၢကီၤလၤဝါကျိာ်လီၤ. တၢ်ကရၢကရိအံၤ မ့ၢ်ဝဲ ဟီၣ်ခိၣ်ဒီဘ့ၣ် လံာ်စီဆှံတၢ်ကရၢကရိ (Bible Society) လၢအထုးထီၣ်ရၤလီၤဝဲ လံာ်စီဆှံန့ၣ် အိၣ်ဝဲအနံၣ် ဖးယံာ်လံလီၤ. တၢးထီခိးတၢ် လါစဲးပတ့ဘၢၣ် ၁၅, ၁၉၅၀ တဲဝဲလၢ “ပှၤလၢ အပၣ်ဃုာ်လၢ တၢ်ကွဲးကျိာ်ထံ ကမံးတံာ်န့ၣ် တအဲၣ်ဒိးလၢ ပှၤကသ့ၣ်ညါ အဝဲသ့ၣ်အမံၤဘၣ်. ဖဲအဝဲသ့ၣ် အိၣ်မူဒံးအဆၢကတီၢ်မ့ၢ်ဂ့ၤ ဖဲအဝဲသ့ၣ်သံဝံၤအလီၢ်ခံမ့ၢ်ဂ့ၤ အဝဲသ့ၣ် တအဲၣ်ဒိးလၢ ပှၤကကွဲးဖျါထီၣ်အဝဲသ့ၣ်အမံၤဘၣ်. အဝဲသ့ၣ်ကွဲးကျိာ်ထံလံာ်စီဆှံ အတၢ်တိာ်ပာ်န့ၣ် မ့ၢ်ဝဲဒ်သိး ပှၤကမၤလၤကပီၤ ယွၤလၢအမ့ၢ်အတီတဂၤအမံၤအဂီၢ်လီၤ.”
မ့မ့ၢ် ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ဒီတဘ့ၣ်န့ၣ် ပှၤထုးထီၣ်ရၤလီၤအီၤ စးထီၣ်ဖဲ ၁၉၆၁ နံၣ်န့ၣ်လီၤ. ဒီးတုၤဆၢကတီၢ်ခဲအံၤန့ၣ် ပှၤတပာ်ဖျါထီၣ် ပှၤကွဲးကျိာ်ထံတၢ်တဖၣ် အမံၤဘၣ်. ဘၣ်ဆၣ် ပနာ်သ့သပှၢ်တၢၢ်လၢ အဝဲသ့ၣ်မ့ၢ်ပှၤလၢ အအဲၣ်ထူအဲၣ်ယွၤဒီး ပှၤလၢအသးတီဒီးယွၤလီၤ. ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ လၢပှၤထုးထီၣ်ရၤလီၤအီၤဖဲ ၂၀၁၃ နံၣ် အတၢ်ကတိၤအိးထီၣ်န့ၣ် တဲဝဲလၢ “ဖဲပကွၢ်ကဒါက့ၤ တၢ်ကွဲးကျိာ်ထံ လံာ်စီဆှံတဘ့ၣ်အံၤ ဒ်သိးပကမၤဂ့ၤထီၣ်က့ၤအီၤအဂီၢ်အခါ ပပာ်ဖျါထီၣ်လၢ ပပာ်ကဲလံာ်စီဆှံ အတၢ်ကွဲးအသး ဒ်အမ့ၢ်တၢ်လၢ အရ့ဒိၣ်ဒိၣ်မးအသိးလီၤ. ပတူၢ်ဘၣ်လၢ ပအိၣ်ဒီးမူဒါဖးဒိၣ်လၢ ပကဘၣ်ပာ်ဖျါထီၣ် လံာ်စီဆှံအတၢ်ကွဲးအသး လီၤတံၢ်လီၤဆဲးလီၤ. . . . ပတၢ်တိာ်ပာ် မ့ၢ်ဝဲလၢ ပကပာ်ဖျါထီၣ် ယွၤအကလုၢ်ကထါ တီတီလိၤလိၤ ဒ်တၢ်ကွဲးအသး အခီၣ်ထံးအိၣ်ဝဲအသိးလီၤ. တကးဒံးဘၣ် လံာ်စီဆှံတဘ့ၣ်အံၤ ပအဲၣ်ဒိးလၢ ပှၤဖးဒီးနၢ်ပၢၢ်ဘၣ်အီၤ ညီဝဲလီၤ.”
ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ဒီတဘ့ၣ်မ့ၢ်ဂ့ၤ, အကတြူၢ်တနီၤမ့ၢ်ဂ့ၤ ခဲအံၤ ပဒိးန့ၢ်ဘၣ်အီၤလၢကျိာ် ၁၈၇ ကျိာ်သ့လံ ဒီးဘၣ်တၢ်ထုးထီၣ်ရၤလီၤအီၤအါန့ၢ် အဘ့ၣ် ၂၄၀ ကကွဲၢ်လီၤ. ဒီးပှၤဖးလံာ်ဖိတဖၣ် တူၢ်ဘၣ်ဝဲလၢ လံာ်စီဆှံတဘ့ၣ်အံၤ ကဲဘျုးလၢ အဝဲသ့ၣ်အဂီၢ်ဒ်လဲၣ်.
တၢ်ကွဲးကျိာ်ထံ လံာ်စီဆှံလၢ အပာ်စီဆှံ ကစၢ်ယွၤအမံၤ
ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ ကဃ့ဘါထုကဖၣ်ဒ်အံၤ “အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံအီၤတက့ၢ်.” (မးသဲ ၆:၉) လံာ်စီဆှံပာ်ဖျါထီၣ်ဝဲ ကစၢ်ယွၤအမံၤ ယဟိဝၤန့ၣ် အိၣ်ဝဲအဘျီ ၇,၀၀၀ ဃၣ်ဃၣ်လီၤ. (၂ မိၤၡ့ ၃:၁၅; စံးထီၣ်ပတြၢၤ ၈၃:၁၈) ဖဲယ့ၣ်ၡူးအတၢ်မၢဖိတဖၣ် သံဝံၤအလီၢ်ခံန့ၣ် ပှၤယူဒၤဖိအတၢ်ထံၣ်လၢအကမၣ်တခါ ဟဲနုာ်လီၤလၢ ခရံာ်ဖိတၢ်အိၣ်ဖှိၣ်အပူၤလီၤ. တၢ်ထံၣ်လၢအကမၣ်တခါအံၤ မ့ၢ်ဝဲဒၣ်လၢ ပှၤတဘၣ်သူကစၢ်ယွၤအမံၤဘၣ်. (မၤတၢ် ၂၀:၂၉, ၃၀; ၁ တံၤမသ့း ၄:၁) အဃိ ဖဲန့ၣ်အခါ ပှၤလၢအကွဲးကူက့ၤ လံာ်စီဆှံအကတြူၢ်တဖၣ်လၢ ကြံးကျိာ်န့ၣ် ထၢနုာ်က့ၤဝဲ “ယွၤ” ဒီး “ကစၢ်” လၢကစၢ်ယွၤအမံၤ ယဟိဝၤ အလီၢ်န့ၣ်လီၤ.
ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ကဲထီၣ်တၢ်မၤစၢၤလၢ ပှၤအကကွဲၢ်တဖၣ် ကဖးလံာ်စီဆှံ ဒီးထံၣ်ကစၢ်ယွၤအမံၤလၢ အဝဲသ့ၣ်အနီၢ်ကစၢ်အကျိာ်လီၤ.
ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ကမံးတံာ် ထၢနုာ်ကဒါက့ၤ ယဟိဝၤယွၤအမံၤလၢ လံာ်စီဆှံ လၢကြံးကျိာ်တကတြူၢ် အပူၤလီၤ. * အဃိ ကစၢ်ယွၤအမံၤ အိၣ်ဝဲ ၂၃၇ ဘျီလီၤ. ပထၢနုာ်ကစၢ်ယွၤအမံၤဒ်အံၤန့ၣ် တမ့ၢ်လၢ ပထၢနုာ်နါစိၤအီၤဘၣ်. ပထၢနုာ်အီၤ ခီဖျိလၢ တၢ်အုၣ်အသးလၢ ပှၤဃုသ့ၣ်ညါပာ်စၢၤအီၤ လီၤတံၢ်လီၤဆဲး အိၣ်ဝဲအဃိလီၤ. အဒိ တၢ်ကတိၤတဖၣ်လၢ ယၡါယၤ ၆၁:၁ အပူၤန့ၣ် ဘၣ်တၢ်ကွဲးကဒါက့ၤအီၤလၢ လူၤကၣ် ၄:၁၈ အပူၤလီၤ. ဒီးလၢတၢ်ကွဲးအသးအခီၣ်ထံးလၢ ဧ့ၤဘြံၤကျိာ်အပူၤ ပှၤထံၣ်ဘၣ်ဖဲ ယၡါယၤ ၆၁:၁ န့ၣ် ကစၢ်ယွၤအမံၤ ယဟိဝၤ အိၣ်ဝဲလီၤ. အဃိ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ န့ၣ်ကွဲးကျိာ်ထံက့ၤ လူၤကၣ် ၄:၁၈ ဒ်အံၤ, “ယဟိဝၤယွၤအသးစီဆှံ အိၣ်လၢယလိၤ ခီဖျိလၢ အဝဲဒိးဖှူယၤဒ်သိး ယကစံၣ်တဲၤတဲလီၤ တၢ်သးခုကစီၣ်လၢ ပှၤဖှီၣ်ဖိယာ်ဖိ အအိၣ်လီၤ.”
ခီဖျိလၢ ပှၤကွဲးကျိာ်ထံ လံာ်စီဆှံအဆၢတဖၣ်ဒ်အံၤအဃိ ကဲထီၣ်တၢ်မၤစၢၤ ဒ်သိးပှၤဖးလံာ်ဖိတဖၣ် ကသ့ၣ်ညါနီၤဖးဝဲလၢ ယဟိဝၤယွၤဒီး အဖိခွါနီၢ်နီၢ် ထဲတဂၤဧိၤလၢ အမ့ၢ်ယ့ၣ်ၡူးခရံာ်န့ၣ် လီၤဆီလိာ်အသးဒ်လဲၣ်န့ၣ်လီၤ. အဒိ ပှၤအါဂၤ ကွဲးကျိာ်ထံ မးသဲ ၂၂:၄၄ လၢ “ယွၤစံးဘၣ်ယကစၢ်” လီၤ. (မ့ၤစံၣ်လံာ်စီဆှံ) ဘၣ်ဆၣ် မတဂၤတဲတၢ်ဒီး မတဂၤလဲၣ်န့ၣ် ပှၤတသ့ၣ်ညါ လီၤတံၢ်လီၤဆဲးဘၣ်. နီၢ်ကီၢ်န့ၣ် လံာ်စီဆှံတဆၢအံၤ အတၢ်ကတိၤတဖၣ်န့ၣ် အိၣ်ပာ်စၢၤလၢ စံးထီၣ်ပတြၢၤ ၁၁၀:၁ အပူၤလီၤ. ဒီးလၢတၢ်ကွဲးအသးအခီၣ်ထံးလၢ ဧ့ၤဘြံၤကျိာ်အပူၤန့ၣ်အိၣ်ဝဲဒီး ကစၢ်ယွၤအမံၤ ဖဲန့ၣ်လီၤ. အဃိ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ကွဲးကျိာ်ထံက့ၤဝဲ မးသဲ ၂၂:၄၄ လၢ “ယဟိဝၤယွၤ တဲဘၣ်ယကစၢ်.” အဃိ ဖဲအံၤပထံၣ်လၢ ယဟိဝၤယွၤ ဒီးအဖိခွါန့ၣ် လီၤဆီလိာ်အသးလီၤ. (မၢ်ကူး ၁၃:၃၂; ယိၤဟၣ် ၈:၁၇, ၁၈; ၁၄:၂၈) ဒီးဒ်သိးပကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပကဘၣ်သ့ၣ်ညါနၢ်ပၢၢ်လၢ အဝဲသ့ၣ်လီၤဆီလိာ်အသး ဒ်လဲၣ်ဒ်လဲၣ်န့ၣ်လီၤ. မၤတၢ် ၂:၂၁ တဲဝဲလၢ “ပှၤလၢအကိးထီၣ် ယဟိဝၤယွၤအမံၤ ကိးဂၤဒဲးန့ၣ် ကတုၤလၢ တၢ်အုၣ်က့ၤခီၣ်က့ၤလီၤ.”
တၢ်ကွဲးကျိာ်ထံလၢ အဘၣ်လီၤတံၢ်လီၤဆဲး ဒီးပှၤနၢ်ပၢၢ်ဘၣ်အီၤညီ
လံာ်စီဆှံတၢ်ကွဲးအသးအခီၣ်ထံးလၢ ကြံးကျိာ်န့ၣ် ဒ်သိးပကွဲးကျိာ်ထံက့ၤအီၤလၢ တၢ်ကတိၤလၢ အလူၤစိၤခဲအံၤလၢ ပှၤနၢ်ပၢၢ်ဘၣ်အီၤညီ ဒီးတကတီၢ်ဃီန့ၣ် အခီပညီ ကဘၣ်ဝဲလီၤတံၢ်လီၤဆဲး အဂီၢ်န့ၣ် ပဘၣ်ပလီၢ်ပသး သပှၢ်ကတၢၢ်လီၤ. အဒိ ဝီၢ်တဖၣ် (verbs) လၢကြံးကျိာ်န့ၣ် ပာ်ဖျါထီၣ်ဝဲလၢ တၢ်လၢအကဲထီၣ်အသးန့ၣ် မ့ၢ်တၢ်ကဲထီၣ်အသးထဲတစိၢ်ဖိ မ့တမ့ၢ် တၢ်ကဲထီၣ်အသးဝံၤလံ မ့တမ့ၢ် တၢ်လၢအဘၣ် ဆဲးလဲၤအသးထီဘိလီၤ. ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ ပာ်ဖျါထီၣ်ဝဲ ဝီၢ်တဖၣ် (verbs) အခီပညီ ဘၣ်ဝဲလီၤတံၢ်လီၤဆဲးလီၤ. ပကကွၢ်သကိး တၢ်အဒိတခါ ဘၣ်ဃးဒီး ယ့ၣ်ၡူးအတၢ်ကတိၤဖဲ ယိၤဟၣ် ၁၅:၈ န့ၣ်လီၤ. ဖဲန့ၣ်န့ၣ် ကြံးအဝီၢ် (verb) လၢအခီပညီမ့ၢ်ဝဲ ‘သၣ်ထီၣ်’ န့ၣ် အဲၣ်ဒိးတဲဝဲတၢ်တခါလၢ ပှၤကဘၣ်ဆဲးမၤအီၤထီဘိလီၤ. အဃိ ပှၤကွဲးကျိာ်ထံ လံာ်စီဆှံတဆၢအံၤလၢ “သုမ့ၢ်ပာ်ဖျါထီၣ်လၢ သုမ့ၢ် ယပျဲၢ်ယဘီၣ်တဖၣ် ဒီးဆဲးသၣ်ထီၣ် တၤသၣ်အါမးန့ၣ် ယပၢ်ကဘၣ် တၢ်မၤလၤကပီၤအီၤလီၤ.” အဃိ ယ့ၣ်ၡူးအတၢ်ကတိၤ အခီပညီ ဖျါဒိၣ်ထီၣ်တစဲးလီၤ. ဒ်န့ၣ်အသိး ပှၤကွဲးကျိာ်ထံက့ၤ မးသဲ ၇:၇ လၢ “ဆဲးဃ့တၢ်တက့ၢ် ဒီးတၢ်ကဟ့ၣ်လီၤသုလီၤ. ဆဲးဃုတၢ်တက့ၢ် ဒီးသုကထံၣ်န့ၢ်တၢ်လီၤ. ဆဲးဒိတကျိာ်တၢ်တက့ၢ် ဒီးတၢ်ကအိးထီၣ်န့ၢ်သုလီၤ.”—ရိမ့ၤ ၁:၃၂; ၆:၂; ကလၤတံ ၅:၁၅.
ပှၤဒိးန့ၢ်ဘၣ် ကစၢ်ယွၤအကလုၢ်ကထါလၢ ဟီၣ်ခိၣ်ဒီဘ့ၣ်
ပထုးထီၣ်ရၤလီၤ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မးသဲ—လီၣ်ဖျါ လၢကညီစှီၤကျိာ်လံ. ဘၣ်ဆၣ် တၢ်ကွဲးကျိာ်ထံအတၢ်မၤ တကတၢၢ်ဒံးဘၣ်. လၢခါဆူညါန့ၣ် ပတိာ်ပာ်လၢ ပကကွဲးကျိာ်ထံလံာ်စီဆှံ ဒီတဘ့ၣ်လီၤ. တၢ်ကွဲးကျိာ်ထံ လံာ်စီဆှံလၢ ပှၤဖးလံာ်ဖိ ကဒိးန့ၢ်ဘၣ်အီၤ လၢကညီစှီၤကျိာ်န့ၣ် မ့ၢ်ပနာ်သ့လၢ အခီပညီ ကဘၣ်လီၤတံၢ်လီၤဆဲး ဒီးပှၤကနၢ်ပၢၢ်ဘၣ်အီၤညီ ဒ်လံာ်စီဆှံလၢ ကီၤလၤဝါကျိာ်အသိး သ့ဧါ.
သ့ဝဲသပှၢ်တၢၢ်လီၤ. ပနာ်ဒ်န့ၣ် သ့သပှၢ်တၢၢ်ခီဖျိလၢ ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်န့ၣ် ကွၢ်ထွဲဝဲ တၢ်ကွဲးကျိထံ လံာ်စီဆှံတၢ်မၤအံၤ ဂ့ၤဂ့ၤလီၤ. လၢတၢ်ကူၣ်သ့အပူၤ ပှၤဆၢတဲာ်ဝဲလၢ ပှၤကကွဲးကျိာ်ထံလံာ်စီဆှံ ဒ်ပှၤတကရူၢ်အသိးလီၤ. (ကတိၤဒိ ၁၁:၁၄) အဃိ ပှၤကွဲးကျိာ်ထံတၢ်အကရူၢ်တဖၣ်အိၣ်ဝဲလၢ ဟီၣ်ခိၣ်ဒီတဘ့ၣ်လီၤ. ဒီးပှၤဒုးအိၣ်ထီၣ် တၢ်ကွဲးကျိာ်ထံဝဲၤကျိၤ Translation Services လၢယဟိဝၤပှၤအုၣ်အသး အဝဲၤလီၢ်ခိၣ်သ့ၣ် ဒ်သိးကမၤစၢၤဝဲ ပှၤကွဲးကျိာ်ထံတၢ် အကရူၢ်တဖၣ်, ကစံးဆၢ ပှၤကွဲးကျိာ်ထံတၢ် အတၢ်သံကွၢ်တဖၣ် ဒီးကမၤစၢၤဝဲ ဒ်သိး ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ လၢကျိာ်အကလုာ်ကလုာ် ကလီၤပလိာ်လိာ်သးအဂီၢ်လီၤ. တကးဒံးဘၣ် ခီၣ်ဖၠူထၢၣ်အတၢ်ရဲၣ်တၢ်ကျဲၤ လၢအမ့ၢ် Watchtower Translation System မၤစၢၤဝဲ ပှၤလၢအကွဲးကျိာ်ထံလံာ်စီဆှံ စ့ၢ်ကီးလီၤ. အဒိ ခီၣ်ဖၠူထၢၣ် အတၢ်ရဲၣ်တၢ်ကျဲၤတခါအံၤ ပာ်ဖျါထီၣ်ဝဲ ဧ့ၤဘြံၤ ဒီးကြံးအတၢ်ကတိၤ တဖျၢၣ်စုာ်စုာ်န့ၣ် ဘၣ်တၢ်ကွဲးကျိာ်ထံက့ၤအီၤလၢ ကီၤလၤဝါကျိာ်ဒ်လဲၣ်န့ၣ်လီၤ. အဃိ တၢ်ရဲၣ်တၢ်ကျဲၤတခါအံၤ ကဲထီၣ်တၢ်မၤစၢၤလၢ ပှၤကွဲးကျိာ်ထံတၢ်တဖၣ် ကဃုထၢဝဲတၢ်ကတိၤလၢ အဘၣ်ကတၢၢ်လၢ အနီၢ်ကစၢ်အကျိာ်အဂီၢ်လီၤ. ဒ်လဲၣ်ဂ့ၤ ဒ်လဲၣ်ဂ့ၤ ပှၤလၢအကွဲးကျိာ်ထံတၢ်တဖၣ် ကဘၣ် ဂုာ်ကျဲးစၢးစ့ၢ်ကီးလီၤ. သနာ်က့ ခီၣ်ဖၠူထၢၣ် အတၢ်ရဲၣ်တၢ်ကျဲၤ မၤညီထီၣ် ပှၤလၢအကွဲးကျိာ်ထံတၢ်တဖၣ် အတၢ်မၤဒ်သိး ဟီၣ်ခိၣ်သီတၢ်ကွဲးကျိာ်ထံ လံာ်စီဆှံလၢ ကျိာ်အကလုာ်ကလုာ် အခီပညီကဘၣ်ဝဲ လီၤတံၢ်လီၤဆဲး ဒီးပှၤနၢ်ပၢၢ်ဘၣ်အီၤကညီ ဒ်လံာ်စီဆှံလၢ ကီၤလၤဝါကျိာ်အသိးလီၤ.
ပဟ့ၣ်ဂံၢ်ဟ့ၣ်ဘါနၤလၢ နကဖးကွၢ် ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မးသဲ—လီၣ်ဖျါ န့ၣ်လီၤ. နဖးအီၤလၢ အ့ထၢၣ်နဲး (online) အဖီခိၣ်, JW Library app အပူၤ မ့တမ့ၢ် နဟံးန့ၢ်အီၤလၢ ယဟိဝၤပှၤအုၣ်အသးတဖၣ် အတၢ်အိၣ်ဖှိၣ်အလီၢ်သ့ဝဲလီၤ. နကထံၣ်ဘၣ်လၢ လံာ်မဲာ်ဖျၢၣ်တဖၣ်လၢ လံာ်စီဆှံတဘ့ၣ်အံၤအပူၤ ဖျါၡဲၡဲလီၤ. ဒီးလၢလံာ်စီဆှံ တကတြူၢ်ဘၣ်တကတြူၢ် အခီၣ်ထံးန့ၣ် နကထံၣ်ဘၣ် တၢ်ဂ့ၢ်မိၢ်ပှၢ်တဖၣ် လၢအမ့ၢ် တၢ်ကွဲးဖုၣ်လီၤက့ၤ တၢ်ဂ့ၢ်တၢ်ကျိၤလၢ လံာ်စီဆှံတကတြူၢ်စုာ်စုာ်အပူၤ ဒီးအကမၤစၢၤနၤ ဒ်သိးနဃုလံာ်စီဆှံအဆၢ ကဘၣ်ချ့ချ့အဂီၢ်လီၤ. တကးဒံးဘၣ် လၢလံာ်စီဆှံအလီၢ်ခံန့ၣ် နကထံၣ်ဘၣ် တၢ်ဂ့ၢ်အဂၤတဖၣ်လၢ အလီၤထုးန့ၢ်သူၣ်ထုးန့ၢ်သး ဒိၣ်မးလီၤ. ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် နနာ်သ့လၢ လံာ်စီဆှံလၢ နဖးအီၤတဘ့ၣ်အံၤန့ၣ် ပာ်ဖျါထီၣ်ဝဲကစၢ်ယွၤ အကလုၢ်ကထါ ဘၣ်ဝဲလီၤတံၢ်လီၤဆဲးလၢ တၢ်ကတိၤလၢ ပှၤတဲအီၤလၢ မုၢ်ဆ့ၣ်မုၢ်ဂီၤလီၤ.
တၢ်မနုၤပၣ်ဃုာ်လၢ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ အပူၤလဲၣ်
တၢ်ဂ့ၢ်မိၢ်ပှၢ်တဖၣ်– နကထံၣ်ဘၣ်အီၤလၢ လံာ်စီဆှံ တကတြူၢ်ဘၣ်တကတြူၢ် အခီၣ်ထံး ဒီးအကမၤစၢၤနၤ ဒ်သိးနဃုလံာ်စီဆှံအဆၢ ကဘၣ်ချ့ချ့အဂီၢ်
တၢ်ကွဲးကျိာ်ထံလၢ အဘၣ်လီၤတံၢ်လီၤဆဲး– ဖဲပှၤကွဲးကျိာ်ထံ လံာ်စီဆှံလၢ ကြံးကျိာ်ဆူ ကီၤလၤဝါကျိာ် ဝံၤဒီးဆူကညီစှီၤကျိာ်အခါန့ၣ် အဝဲသ့ၣ်ဘၣ်ပလီၢ်အသးဒိၣ်မး ဒ်သိးကကွဲးဖျါထီၣ် တၢ်ဂ့ၢ်တီတီလိၤလိၤ ဒီးဒ်သိးအခီပညီကဘၣ်ဝဲ လီၤတံၢ်လီၤဆဲးအဂီၢ်လီၤ.
လံာ်မဲာ်ဖျၢၣ်တဖၣ်လၢ အဖျါၡဲၡဲ- လံာ်မဲာ်ဖျၢၣ်တဖၣ် ဖျါဝဲၡဲၡဲအဃိ ဖးဘၣ်အီၤမုာ်ဝဲလီၤ.
လံာ်စီဆှံအဆၢဖိတဖၣ် ဘၣ်တၢ်ပာ်ဖှိၣ်အီၤ တကရူၢ်ဘၣ်တကရူၢ်– မ့ၢ်ဝဲဒ်သိး ပှၤဖးလံာ်ဖိ ကနၢ်ပၢၢ်ထီၣ် ပှၤလၢအကွဲးလံာ်စီဆှံတဂၤ အတၢ်တိာ်ပာ် ဒီးအတၢ်ဆိကမိၣ်အဂီၢ်လီၤ.
တၢ်ဂ့ၢ်အဘျဲၣ်တဖၣ်– ပာ်ဖျါထီၣ်ဝဲ တၢ်ကတိၤတနီၤ အခီပညီလိၤလိၤဒ်လဲၣ်, ပှၤကွဲးကျိာ်ထံအီၤလၢ ကျဲအဂၤသ့ဒ်လဲၣ် ဒီးတၢ်ဂ့ၢ်အဂၤလၢ အကဲဘျုးလၢပဂီၢ်လီၤ.
တၢ်ရဲၣ်လီၤ လံာ်စီဆှံအတၢ်ကတိၤတဖၣ်- ပာ်ဖျါထီၣ်ဝဲ တၢ်ကတိၤတနီၤ အိၣ်ဝဲလၢ လံာ်စီဆှံအဆၢဖဲလဲၣ်န့ၣ်လီၤ.
လံာ်စီဆှံ အတၢ်ကတိၤတဖၣ် အခီပညီ- ပာ်ဖျါထီၣ်ဝဲ တၢ်ကတိၤတဖၣ်လၢ အအိၣ်ဝဲလၢလံာ်စီဆှံအပူၤ အခီပညီလီၤ.
^ ဘၣ်တၢ်ကိးစ့ၢ်ကီးအီၤလၢ လံာ်စီဆှံအသီ တကတြူၢ်လီၤ.