မုၢ်မဆါတနံၤအံၤ ပှၤပာ်ဖျါထီၣ် တၢ်အဲၣ် ဒီးတၢ်ပာ်ကဲန့ၣ် စှၤလီၤမၣ်စှၤလီၤဝဲ. အဒိ ပှၤဆူးပှၤဆါတဖၣ် ကိးဃါကသံၣ်သရၣ်, ပှၤလဲၤအီၣ်တၢ်လၢ စဲၢ်တဖၣ် တပာ်ကဲဝဲ ပှၤမၤတၢ်ဖိတဖၣ်ဘၣ်, ပှၤဒိးကဘီယူၤတဖၣ် မၤကီမၤခဲဝဲ ပှၤမၤတၢ်ဖိလၢ ကဘီယူၤ, ဖိသၣ်တဖၣ် တပာ်ကဲ သရၣ်သရၣ်မုၣ်လၢၤဘၣ် ဒီးမၤပျံၤမၤဖုး ဒီးထီဒါဝဲ သရၣ်သရၣ်မုၣ်တဖၣ်. ဒီးပှၤမၤထံဂ့ၢ်ကီၢ်ဂ့ၢ်တနီၤန့ၣ် အအိၣ်ဒီး တၢ်သကဲာ်ပဝးလၢ အတဂ့ၤဘၣ်တဖၣ် ဒီးတနီၤန့ၣ် မၤအိၣ်မဲာ်.

 လံာ်စီဆှံ ပာ်ဖျါထီၣ်ဝဲ တၢ်ဟံးစုနဲၣ်ကျဲလၢ ပကအိၣ်ဒီး တၢ်ပာ်ကဲ ဒီးရ့ဒီးပှၤဂၤ ဂ့ၤဂ့ၤကသ့အဂီၢ်. တကးဒံးဘၣ် အဒုးသ့ၣ်ညါပှၤလၢ လၢပစိၤခဲအံၤန့ၣ် ဘၣ်မနုၤအဃိ တၢ်သကဲာ်ပဝးလၢ အဂ့ၤလီၤစှၤဝဲလဲၣ်.

 လၢဟီၣ်ခိၣ်ဒီဘ့ၣ် လၢတၢ်လီၢ်ဝးဝးန့ၣ် ပထံၣ်ဘၣ်လၢ တၢ်သကဲာ်ပဝးလၢအဂ့ၤ စှၤလီၤမၣ်စှၤလီၤဝဲ.

•   တၢ်မၤနီၣ် လီၢ်ခံကတၢၢ်တခါ ပာ်ဖျါထီၣ်ဝဲလၢ ပှၤအမဲရကၤဖိတဖၣ် ထံၣ်ဝဲလၢ ပှၤလၢအအိၣ်လၢ အမဲရကၤ အပူၤတဖၣ်န့ၣ် အတပာ်လုၢ်ပာ်ပှ့ၤဝဲ တၢ်သကဲာ်ပဝးလၢအဂ့ၤ လၢၤဘၣ်. ဒီးခဲအံၤန့ၣ် အနးဒိၣ်န့ၢ်ဒံး လၢအပူၤကွံာ် ၂၂ နံၣ်အတီၢ်ပူၤဒံး.

•   လၢထံကီၢ် ၂၈ ဘ့ၣ်န့ၣ် ပှၤမၤတၢ်သံကွၢ်စံးဆၢဒီး ပှၤအဂၤ ၃၂,၀၀၀. ဒီးပှၤလၢအဝဲသ့ၣ်အကျါ ၆၅ မျးကယၤန့ၣ် တဲဝဲလၢ လၢပစိၤခဲအံၤ ပှၤလၢအပာ်ဖျါထီၣ် တၢ်ပာ်ကဲ ဒီးရ့ဒီးပှၤဂၤဂ့ၤဂ့ၤန့ၣ် စှၤလီၤမၣ်စှၤလီၤဝဲ.

 ဘၣ်ဃးဒီး တၢ်ပာ်သူၣ်ပာ်သး ဒီးတၢ်သကဲာ်ပဝးလၢ နထံၣ်ဘၣ်အီၤလၢ မုၢ်မဆါတနံၤအံၤန့ၣ် လံာ်စီဆှံ တဲဆိပာ်စၢၤဝဲဝံၤလံ.

•   “လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်တၢၢ်န့ၣ် ကဘၣ်ဝဲလီၤ. ပှၤဟီၣ်ခိၣ်ဖိ ကအဲၣ်လီၤထဲ အနီၢ်ကစၢ်အသး, ကအဲၣ်ကျိၣ်အဲၣ်စ့, ကပတြၢၤလီၤအသး, ကပာ်ထီၣ်ထီအသး, ကကတိၤထီဒါ ကစၢ်ယွၤဒီးပှၤဂၤ, တဒိကနၣ်အမိၢ်အပၢ် အကလုၢ်ဘၣ်, တသ့ၣ်ညါ စံးဘျုးစံးဖှိၣ်တၢ်ဘၣ် . . . တအဲၣ်ပှၤဂၤဘၣ် . . . ကမ့ၢ်ပှၤလၢ အမၤဆူၣ်မၤစိးတၢ်.”—၂ တံၤမသ့း ၃:၁-၃.

 ဒ်သိး နကသ့ၣ်ညါအါထီၣ် ဘၣ်ဃးဒီး ဝံအတၢ်စံးပာ်အံၤ ဟဲလၢထီၣ်ပှဲၤထီၣ် ဒ်လဲၣ်အဂီၢ် ဖးကွၢ်တၢ်ဂ့ၢ်လၢ အမ့ၢ် “ပစိၤခဲအံၤ ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ဒီးအတၢ်မၤ ကအိၣ်ဒ်လဲၣ်န့ၣ် လံာ်စီဆှံ တဲဆိပာ်စၢၤဝဲဧါ.”

 ဟီၣ်ခိၣ်ချၢအံၤ ပှၤပာ်ဖျါထီၣ် တၢ်ပာ်ကဲ ဒီးရ့လိာ်သးဂ့ၤဂ့ၤန့ၣ် တအိၣ်အါအါလၢၤဘၣ်. သနာ်က့ ပှၤလၢအကကွဲၢ်တဖၣ်န့ၣ် ထံၣ်န့ၢ်ဝဲ လံာ်စီဆှံ အတၢ်ဟံးစုနဲၣ်ကျဲလၢ ကမၤစၢၤအဝဲသ့ၣ် ဒ်သိး ကအိၣ်ဒီးတၢ်ပာ်ကဲ ဒီးရ့ဒီးပှၤဂၤဂ့ၤဂ့ၤအဂီၢ်. တၢ်ဟံးစုနဲၣ်ကျဲတဖၣ်အံၤ “ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ပှၤသန့ၤသးလၢ [အီၤ] သ့လီၤထူလီၤယိာ်လီၤ.” (စံးထီၣ်ပတြၢၤ ၁၁၁:၈) ပကတဲသကိး တၢ်အဒိတနီၤ-

•   လံာ်စီဆှံတဲဝဲလၢ “ကယဲၢ်တၢ်လၢ သုအဲၣ်ဒိးလၢ ပှၤဂၤကမၤသုန့ၣ် မၤအဝဲသ့ၣ်ဒ်န့ၣ် စ့ၢ်ကီးတက့ၢ်.”—မးသဲ ၇:၁၂.

   အခီပညီ– ပကြၢးရ့ဒီးပှၤဂၤလၢ တၢ်အဲၣ် ဒီးတၢ်ပာ်ကဲအပူၤ ဒ်ပအဲၣ်ဒိးလၢ ပှၤဂၤရ့ပှၤအသိး.

•   လံာ်စီဆှံတဲဝဲလၢ “ပာ်တ့ၢ်ကွံာ် တၢ်လံၣ်တၢ်လီဒီး . . . တဲလိာ်သုသး တဂၤဒီးတဂၤလၢ တၢ်မ့ၢ်တၢ်တီ.”—အ့းဖ့းစူး ၄:၂၅.

   အခီပညီ– ပကဘၣ်တဲတၢ် ဒီးမၤတၢ်တီတီလိၤလိၤ.

 နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ်အံၤန့ၣ် ဖးကွၢ်–

•   တၢးထီခိးတၢ် လၢအခိၣ်တီမ့ၢ်ဝဲ “တၢ်အဘၣ် ဒီးတၢ်အကမၣ်—တၢ်ဟံးစုနဲၣ်ကျဲလၢ နနာ်န့ၢ်အီၤသ့.”

•   ဒီးတၢ်ဂ့ၢ်လၢ အခိၣ်တီမ့ၢ်ဝဲ “ဘၣ်ဃးဒီးတၢ်ဝံသးစူၤန့ၣ် လံာ်စီဆှံတဲဝဲဒ်လဲၣ်.”