နကအိၣ်ဘၣ်လၢ ဟီၣ်ခိၣ်သီအပူၤအဂီၢ် နကဘၣ်မၤ မနုၤလဲၣ်

အိးထီၣ်

လၢတၢ်ဂ့ၢ်လၢ အပူၤကွံာ်တခါအပူၤန့ၣ် ပသ့ၣ်ညါဘၣ်လၢ တယံာ်လၢၤဘၣ်န့ၣ် ကစၢ်ယွၤ ကမၤကတၢၢ်ကွံာ် ပှၤဟီၣ်ခိၣ်ဖိ အတၢ်ကရၢကရိ လၢအအၢအသီအံၤ ဒီးကမၤလီၤမၢ်ကွံာ် ဟီၣ်ခိၣ်အတၢ်ကီတၢ်ခဲ ခဲလၢာ်. ပနာ်သ့သပှၢ်တၢၢ်လၢ ကစၢ်ယွၤ ကမၤဝဲဒ်န့ၣ်. ဘၣ်မနုၤအဃိ ပနာ်သ့သပှၢ်တၢၢ်လဲၣ်. ခီဖျိလၢ ကစၢ်ယွၤအကလုၢ်ကထါ လံာ်စီဆှံ အၢၣ်လီၤပာ်စၢၤဝဲလၢ–

“ဟီၣ်ခိၣ်အံၤ . . . ကလီၤမၢ်ကွံာ်ဝဲလီၤ.”—၁ ယိၤဟၣ် ၂:၁၇.

ပနာ်သ့သပှၢ်တၢၢ်လၢ ပှၤလၢအကပူၤဖျဲးန့ၣ် ကအိၣ်ဝဲ မ့ၢ်လၢ လံာ်စီဆှံမၢကၢာ်တဆၢန့ၣ် အၢၣ်လီၤစ့ၢ်ကီးဝဲလၢ–

“ပှၤလၢအမၤတၢ်ဘၣ် ကစၢ်ယွၤအသးန့ၣ် ကအိၣ်ဝဲ လီၤထူလီၤယိာ်လီၤ.”

အဃိ ပမ့ၢ်အဲၣ်ဒိးပူၤဖျဲးန့ၣ် ပကဘၣ်မၤ ကစၢ်ယွၤ အတၢ်ဘၣ်သး. ဘၣ်ဆၣ် ဒ်သိး ပကသ့ၣ်ညါ ကစၢ်ယွၤအတၢ်ဘၣ်သးအဂီၢ် ပကဘၣ်ဃုသ့ၣ်ညါဆိ ကစၢ်ယွၤအဂ့ၢ်.

ဒ်သိး ပကပူၤဖျဲးလၢ တၢ်အကတၢၢ်အဂီၢ် ပကဘၣ် “သ့ၣ်ညါထီၣ်” ကစၢ်ယွၤ

ယ့ၣ်ၡူး တဲဝဲလၢ “ဒ်သိးကန့ၢ်ဘၣ် တၢ်မူအထူအယိာ်အဂီၢ် အဝဲသ့ၣ် ကဘၣ်သ့ၣ်ညါထီၣ်နၤ လၢအမ့ၢ် ကစၢ်ယွၤ အမ့ၢ်အတီထဲ တဂၤဧိၤ” လီၤ. (ယိၤဟၣ် ၁၇:၃) ဖဲတၢ်အကတၢၢ် ဘၣ်အခါ ဒ်သိးပကပူၤဖျဲး ဒီးအိၣ်မူဘၣ် လီၤထူလီၤယိာ်အဂီၢ် ပကဘၣ် ‘သ့ၣ်ညါထီၣ်’ ကစၢ်ယွၤ. ဘၣ်ဆၣ် တၢ်သ့ၣ်ညါထီၣ် ကစၢ်ယွၤန့ၣ် တမ့ၢ်ထဲလၢ ပနာ်အီၤ ဒီးသ့ၣ်ညါအဂ့ၢ် ထဲတစဲးဖိဘၣ်. ပကဘၣ်ကဲထီၣ် ကစၢ်ယွၤ အသကိး. ဒီးပမ့ၢ်အဲၣ်ဒိးလၢ ပတၢ်ရ့လိာ်သးဒီး ပသကိး ကဂၢၢ်ကျၢၤန့ၣ် ပကဘၣ်ရ့လိာ်သးဒီးအီၤလီၤ. တၢ်ရ့လိာ်သးဒီး ကစၢ်ယွၤန့ၣ် ပကဘၣ်မၤအီၤ ဒ်န့ၣ်စ့ၢ်ကီး. ပကဃုသ့ၣ်ညါသကိး တၢ်မ့ၢ်တၢ်တီ အရ့ဒိၣ်တနီၤလၢ ကမၤစၢၤပှၤ ဒ်သိး ပကစးထီၣ်ရ့လိာ်သးဒီး ကစၢ်ယွၤ ဒီးပၢၤဃာ် ပတၢ်ရ့လိာ်သးဒီးအီၤ.

တၢ်မ့ၢ်တၢ်တီတဖၣ်လၢ ပမၤလိဘၣ်လၢ လံာ်စီဆှံ အပူၤ

ပသ့ၣ်ညါဘၣ်လၢ ကစၢ်ယွၤအဲၣ်ဒိးလၢ ပကအိၣ်မူလၢ ဟီၣ်ခိၣ်ပၤရဒံစူးအပူၤ

ကစၢ်ယွၤတ့လီၤ ပှၤကညီအဆိကတၢၢ်ခံဂၤ လၢအမ့ၢ် စီၤအၤဒၣ် ဒီးနီၢ်အံၣ်အု ဒီးဒုးအိၣ်အဝဲသ့ၣ်လၢ တၢ်လီၢ်လၢအဃံလၤတတီၤ လၢအမ့ၢ် ဧ့ၤဒ့ၣ်တၤသၣ်လီၢ် အပူၤလီၤ. စီၤအၤဒၣ် ဒီးနီၢ်အံၣ်အုန့ၣ် မ့ၢ်ဝဲပှၤလၢပှၤပှဲၤ ဒီးဒ်သိး အဝဲသ့ၣ် ကအိၣ်မူဘၣ် မုာ်မုာ်ခုၣ်ခုၣ် ပှဲၤဒီးတၢ်သူၣ်ဖှံသးညီအဂီၢ် ကစၢ်ယွၤ ဟ့ၣ်အဝဲသ့ၣ် တၢ်လၢအဝဲသ့ၣ်လိၣ်ဘၣ်ဝဲ ခဲလၢာ်. တကးဒံးဘၣ် အဝဲသ့ၣ် မ့ၢ်ကဲ ကစၢ်ယွၤ အသကိးထီဘိန့ၣ် အဝဲသ့ၣ် တသံဘၣ်ဘၣ် ဒီးကအိၣ်မူဘၣ် လီၤထူလီၤယိာ်. ဘၣ်ဆၣ် တၢ်မၤလိာ် ယိယိဖိတခါလၢ ကစၢ်ယွၤ ဟ့ၣ်လီၤအဝဲသ့ၣ်န့ၣ် အဝဲသ့ၣ် ဆၢတဲာ်လီၤအသးလၢ တဒိကနၣ်ဝဲဘၣ်.

ပသ့ၣ်ညါဘၣ်လၢ ဘၣ်မနုၤအဃိ ပထံၣ်ဘၣ် တၢ်နးတၢ်ဖှီၣ်လဲၣ်

ပှၤကညီအဆိကတၢၢ်တဂၤ လၢအမ့ၢ် စီၤအၤဒၣ်န့ၣ် ခီဖျိလၢ အတဒိကနၣ် ကစၢ်ယွၤ အကလုၢ်ဘၣ်အဃိ အဝဲဒီး ပှၤဟီၣ်ခိၣ်ဖိခဲလၢာ် တဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်ဘၣ်. လံာ်စီဆှံ တဲဖျါထီၣ်ဝဲလၢ “တၢ်ဒဲးဘး ဟဲနုာ်လီၤလၢ ဟီၣ်ခိၣ် ခီဖျိပိာ်ခွါတဂၤ ဒီးတၢ်သံန့ၣ် ဟဲအိၣ်ထီၣ်ခီဖျိလၢ တၢ်ဒဲးဘးအဃိလီၤ. လၢတၢ်န့ၣ်အဃိ တၢ်သံရၤလီၤအသးလၢ ပှၤဟီၣ်ခိၣ်ဖိ ခဲလၢာ်အအိၣ်” လီၤ. (ရိမ့ၤ ၅:၁၂) ဒ်ပှၤတဂၤ ဒိးန့ၢ်ဘၣ် တၢ်ဆူးတၢ်ဆါလၢ အဟဲလီၤစၢၤလၢ အမိအပါအအိၣ်အသိး စီၤအၤဒၣ် အဖိအလံၤခဲလၢာ် ဒိးန့ၢ်ဘၣ် တၢ်ဒဲးဘးလၢ အဟဲလီၤစၢၤလၢ အအိၣ်. ဒီးခီဖျိလၢ တၢ်ဒဲးဘးအဃိ ပသးပှၢ်ထီၣ်ဒီး ပဘၣ်သံ.

ဒ်သိး ကမၤစၢၤပှၤအဂီၢ် ကစၢ်ယွၤ မၤန့ၢ်ပှၤ မနုၤလဲၣ်

လံာ်စီဆှံ တဲဝဲလၢ “ကစၢ်ယွၤအဲၣ် ပှၤဟီၣ်ခိၣ်ဖိ တုၤဒၣ်လဲာ် အဟ့ၣ်လီၤကွံာ်ဝဲ အဖိခွါနီၢ်နီၢ် ထဲတဂၤဧိၤ ဒ်သိး ပှၤကိးဂၤဒဲးလၢ အစူၢ်က့ၤနာ်က့ၤအီၤန့ၣ် အသုတတုၤလၢ တၢ်ဟးဂီၤတဂ့ၤ ဒီးကန့ၢ်ဘၣ် တၢ်မူအထူအယိာ် အဂီၢ်လီၤ.” (ယိၤဟၣ် ၃:၁၆) ကစၢ်ယွၤဆှၢလီၤ ယ့ၣ်ၡူးလၢဟီၣ်ခိၣ် ဒ်သိး အကဟ့ၣ်လီၤ အသးသမူလၢပဂီၢ်လီၤ. ဘၣ်ဃးဒီး တၢ်မၤလၢအပှဲၤဒီး တၢ်အဲၣ်တၢ်ကွံတခါအံၤ အဂ့ၢ်န့ၣ် အ့ဒံယါပိာ်ခွါသးပှၢ် လၢအသးအိၣ် ၈၆ နံၣ်တဂၤ လၢအမံၤမ့ၢ်ဝဲ ဖြါဘၢၤခၤန့ၣ်တဲဝဲလၢ “တၢ်မၤလၢအပှဲၤဒီး တၢ်အဲၣ်တၢ်ကွံတခါအံၤန့ၣ် ပာ်ဖျါထီၣ်ဝဲ ယဟိဝၤယွၤ a အတၢ်အဲၣ် အဒိၣ်အယိာ်လၢ ယဖီခိၣ်. ကစၢ်ယွၤ အတၢ်အဲၣ်အံၤ ဟ့ၣ်ယၤတၢ်မုၢ်လၢ်လၢ ယကအိၣ်မူဘၣ် လီၤထူလီၤယိာ်.”

ခီဖျိလၢ တၢ်လၢကစၢ်ယွၤ မၤန့ၢ်ဝဲလၢပဂီၢ်အဃိ ပပာ်ဖျါထီၣ် တၢ်စံးဘျုးစံးဖှိၣ်က့ၤအီၤ ကသ့ဒ်လဲၣ်

ခီဖျိလၢ ကစၢ်ယွၤ မၤန့ၢ်တၢ်လၢပဂီၢ်အဃိ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကပာ်ဖျါထီၣ် ပတၢ်စံးဘျုးစံးဖှိၣ်က့ၤအီၤ. ပပာ်ဖျါထီၣ် သ့ခီဖျိပ “ဆဲးမၤထွဲ အတၢ်မၤလိာ်တဖၣ်” လီၤ. (၁ ယိၤဟၣ် ၂:၃) ဒ်သိး ပတၢ်အိၣ်မူ ကပှဲၤဒီး တၢ်သးခုလၢ ခဲအံၤအဂီၢ် ပကဘၣ်မၤဒ်လဲၣ်န့ၣ် လၢတၢ်အဲၣ်တၢ်ကွံအပူၤ ယဟိဝၤယွၤ ပာ်ဖျါထီၣ်န့ၢ်ပှၤ. (ယၡါယၤ ၄၈:၁၇, ၁၈) ကစၢ်ယွၤ တအဲၣ်ဒိးလၢ ပကဘၣ်နးဘၣ်ဖှီၣ်ဘၣ်. တကးဒံးဘၣ် ကစၢ်ယွၤ အၢၣ်လီၤပှၤလၢ ပမ့ၢ်အိၣ်မူမၤထွဲ အတၢ်ဟံးစုနဲၣ်ကျဲန့ၣ် ပတၢ်အိၣ်မူ ကပှဲၤဒီး တၢ်သူၣ်ခုသးခု လၢခဲအံၤ ဒီးလၢခါဆူညါန့ၣ် ပကအိၣ်ဒီး တၢ်ခွဲးတၢ်ယာ်လၢ ပကအိၣ်မူဘၣ် လီၤထူလီၤယိာ်.

ဖးလံာ်စီဆှံကိးနံၤဒဲး

ဒ်သိးနကပူၤဖျဲးလၢ တၢ်အကတၢၢ်အဂီၢ် နကဘၣ် ဃ့ထုကဖၣ်လၢ ကစၢ်ယွၤအအိၣ် ဒီးမၤအတၢ်ဘၣ်သး

ဒ်သိးပကမူအဂီၢ် ပအီၣ်တၢ်ကိးနံၤဒဲးလီၤ. ဘၣ်ဆၣ် ယ့ၣ်ၡူးတဲဝဲလၢ “ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. မ့မ့ၢ်မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ အထးခိၣ်န့ၣ်လီၤ.”—မးသဲ ၄:၄.

မုၢ်မဆါတနံၤအံၤ ပထံၣ်ဘၣ် ကစၢ်ယွၤအတၢ်ကတိၤလၢ လံာ်စီဆှံအပူၤလီၤ. နမ့ၢ်မၤလိလံာ်စီဆှံန့ၣ် နကသ့ၣ်ညါဘၣ် တၢ်မ့ၢ်တၢ်တီအရ့ဒိၣ်လၢ အဘၣ်ဃးဒီး တၢ်လၢကစၢ်ယွၤ မၤတ့ၢ်ဝဲလၢ အပူၤကွံာ်, တၢ်လၢအမၤဝဲခဲအံၤ ဒီးတၢ်လၢအကမၤဝဲလၢ ခါဆူညါအဂ့ၢ်.

ဒ်သိးနကဒိးန့ၢ်ဘၣ် တၢ်မၤစၢၤအဂီၢ် ဃ့ထုကဖၣ်လၢ ကစၢ်ယွၤအအိၣ်

နအဲၣ်ဒိးဒိကနၣ် ကစၢ်ယွၤအကလုၢ်ဘၣ်ဆၣ် နကပတုာ်မၤတၢ်လၢ ကစၢ်ယွၤထံၣ်ဝဲလၢ အကမၣ်အဂီၢ် မ့ၢ်ကီလၢနဂီၢ်န့ၣ် နကဘၣ်မၤဒ်လဲၣ်. နကဘၣ် သ့ၣ်ညါ ကစၢ်ယွၤအဂ့ၢ် ဂ့ၤဂ့ၤလီၤ. နမ့ၢ်သ့ၣ်ညါ ကစၢ်ယွၤအဂ့ၢ် ဂ့ၤဂ့ၤန့ၣ် ကကဲထီၣ် တၢ်မၤစၢၤလၢနဂီၢ်.

ဆိကမိၣ်ကွၢ် မိာ်မုၣ်လၢအမံၤမ့ၢ် စၤခူရၤ တဂၤအံၤ အဂ့ၢ်တက့ၢ်. အဝဲမ့ၢ်ပှၤလၢ အဟးမၤကမၣ်မုၣ်ကမၣ်ခွါလီၤ. ဘၣ်ဆၣ် ဖဲအဝဲစးထီၣ် မၤလိလံာ်စီဆှံအခါ အမၤလိဘၣ်ဝဲ ကစၢ်ယွၤ အတၢ်မၤလိာ်လၢ ကဘၣ် “ဟးဆှဲး တၢ်မၤကမၣ်မုၣ်ကမၣ်ခွါ” လီၤ. (၁ ကရံၣ်သူး ၆:၁၈) စၤခူရၤ ဃ့ထုကဖၣ် ဒီးဃ့တၢ်မၤစၢၤလၢ ကစၢ်ယွၤ အအိၣ်အဃိ အဝဲပတုာ်ဝဲ အလုၢ်လၢ်လၢ အတဂ့ၤဘၣ်အံၤန့ၢ်ဝဲ. ဘၣ်ဆၣ် အဝဲဘၣ်ဒုးဆၢက့ၤဝဲ တၢ်လ့ပစီတဖၣ်ဒံး. စၤခူရၤ တဲဝဲလၢ “ယတၢ်ဆိကမိၣ်လၢ အတဂ့ၤဘၣ် မ့ၢ်ဟဲအိၣ်ထီၣ်န့ၣ် ယသ့ၣ်ညါလၢ ယမၤနၢၤအီၤလၢ ယနီၢ်ကစၢ်တန့ၢ်ဘၣ်အဃိ ယဃ့ထုကဖၣ်လၢ ယဟိဝၤယွၤအအိၣ် ဒီးတဲတၢ်ဒီးအီၤပျီပျီလီၤ. တၢ်ထုကဖၣ် မၤစၢၤယၤလၢ ယကဘူးဒိၣ်ထီၣ်ဒီး ယဟိဝၤယွၤ.” ဒ်စၤခူရၤအသိး ပှၤလၢအကကွဲၢ်တဖၣ် သ့ၣ်ညါထီၣ် ကစၢ်ယွၤလီၤ. ဒ်သိး ပှၤသ့ၣ်တဖၣ်အံၤ ကဆီတလဲ အတၢ်အိၣ်မူ ဒီးအိၣ်မူကျဲလၢ အဘၣ်ကစၢ်ယွၤအသးအဂီၢ် ကစၢ်ယွၤ ဟ့ၣ်အဝဲသ့ၣ် တၢ်ဂံၢ်တၢ်ဘါလၢ အဝဲသ့ၣ်လိၣ်ဘၣ်ဝဲ.—ဖံလံးပံၤ ၄:၁၃.

နသ့ၣ်ညါ ကစၢ်ယွၤအဂ့ၢ်မ့ၢ်အါထီၣ်န့ၣ် ‘ကစၢ်ယွၤ ကသ့ၣ်ညါထီၣ်နၤ’ ဒီးပာ်နၤဒ်သိးဒီး အသကိးလၢ အလုၢ်ဒိၣ်ပှ့ၤဒိၣ်တဂၤလီၤ. (ကလၤတံ ၄:၉; စံးထီၣ်ပတြၢၤ ၂၅:၁၄) နမ့ၢ်သ့ၣ်ညါ ကစၢ်ယွၤအဂ့ၢ် ဂ့ၤဂ့ၤမး နကပူၤဖျဲးဘၣ် ဒီးနကအိၣ်မူဘၣ်လၢ ဟီၣ်ခိၣ်သီအပူၤ. ဘၣ်ဆၣ် ဟီၣ်ခိၣ်သီန့ၣ် ကအိၣ်ဒ်လဲၣ်. တၢ်ဂ့ၢ်လၢခံတခါ ကပာ်ဖျါထီၣ်ဝဲ.

a လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ အမံၤမ့ၢ် ယဟိဝၤ.

တၢ်ဂ့ၤအဂၤလၢ နကဘၣ်သး

တၢးထီခိးတၢ်

ပှၤအါဂၤကပူၤဖျဲးဝဲ ဖဲတၢ်အကတၢၢ်ဟဲဝဲအခါ နပူၤဖျဲးသ့စ့ၢ်ကီးလီၤ

နပူၤဖျဲးကသ့ဒ်လဲၣ်. နကပာ်ဖှိၣ်တၢ်အီၣ်တၢ်အီ တၢ်ထူးတၢ်တီၤ လၢနကပူၤဖျဲးလၢ တၢ်အကတၢၢ်အဂီၢ်ဧါ.

တၢးထီခိးတၢ်