ဖဲနနီၢ်ဆံးဒံးအခါ နလီၤဃံၢ် (လီၤဃံၤ) န့ၣ်နနီၣ်ဘၣ်ဒံးဧါ. ဘၣ်သ့ၣ်သ့ၣ်နစုကဘၣ်ကွး မ့တမ့ၢ် နခီၣ်လ့ၢ်ခိၣ်ကဘၣ်ထံးဒီးလီၤဘျူးဝဲလီၤ. နမိမၤမုာ်ထီၣ်က့ၤနသးဒ်လဲၣ်န့ၣ် နသ့ၣ်နီၣ်ထီၣ်ဒံးဧါ. ဘၣ်သ့ၣ်သ့ၣ် အဝဲကသ့စီကွံာ်ဝဲ နတၢ်ပူၤလီၢ် ဒီးကဘိၣ်ဘံထီၣ်ဝဲလၢ တၢ်ကံးညာ်န့ၣ်လီၤ. ဖဲန့ၣ်အခါ နကဟီၣ်ဘၣ်ဆၣ် နမိအတၢ်ကတိၤဖိလၢ အမၤမုာ်ထီၣ်နသးဒီး အတၢ်ဖိးဟုနၤလၢ တၢ်သးကညီၤအပူၤအံၤ မၤကိညၢ်ထီၣ်ဝဲ နတၢ်ပူၤလီၢ်လၢအဆါန့ၣ်လီၤ. ဒီးနကတူၢ်ဘၣ်လၢ ပှၤလၢအကမၤမုာ်ထီၣ်က့ၤနသးန့ၣ် တအိၣ်ယံၤဒီးနၤဘၣ်.

ဘၣ်ဆၣ် တုၤမ့ၢ်ပဒိၣ်ထီၣ်ဒီး ပတၢ်အိၣ်မူတဒ်သိးလၢညါလၢၤဘၣ်. တၢ်ကီတၢ်ခဲတဖၣ် အါထီၣ်ဝဲအဃိ ပသးကမုာ်ထီၣ်က့ၤအဂီၢ် တညီလၢၤဘၣ်. မိၢ်အတၢ်ဖိးဟု ဒီးတၢ်ကံးညာ်လၢ အဘိၣ်ဘံတၢ်န့ၣ် မၤလီၤမၢ်ကွံာ်ဝဲ ပတၢ်ကီတၢ်ခဲတဖၣ် တသ့လၢၤဘၣ်. ဆိကမိၣ်ကွၢ် တၢ်အဒိတနီၤတက့ၢ်.

• ခီဖျိနတၢ်မၤ တအိၣ်လၢၤဘၣ်အဃိ နသူၣ်ကိၢ်သးဂီၤတၢ် အိၣ်ဝဲတဘျီဘျီဧါ. ကၠူလယၢၤ စံးဝဲလၢ ဖဲပှၤထုးထီၣ်အီၤလၢတၢ်မၤအခါ ဖုးဘၣ်အသး ဒီးသူၣ်အုးသးအုးဒိၣ်မးလီၤ. အဝဲသးကိၢ်ဝဲလၢ ‘ယကဘၣ်လုၢ်အီၣ်လုၢ်အီ ယဟံၣ်ဖိဃီဖိဒ်လဲၣ်. ယဂုာ်ကျဲးစၢး မၤတၢ်ဆူၣ်ဆူၣ်လၢ ခီပနံာ်အံၤအဂီၢ် တဘျုးနံၣ်ညါ, ဘၣ်မနုၤအဃိ အခဲအံၤအဝဲသ့ၣ် တပာ်လုၢ်ပာ်ပှ့ၤယၤလၢၤဘၣ်လဲၣ်.’

• ဘၣ်သ့ၣ်သ့ၣ် နကဘၣ်အိၣ်သယုၢ် မ့ၢ်လၢနလီၤဖးဒီး နသးသမူတံၤသကိးအဃိန့ၣ်လီၤ. ရခွဲ(လ်) စံးဝဲလၢ “ဖဲပူၤကွံာ်တနံၣ်ဒီးလွံၢ်လါန့ၣ်, ယဝၤပာ်တ့ၢ်ကွံာ်ယၤ သတူၢ်ကလာ်အခါ ယသးအုးဒိၣ်မးလီၤ. ယတူၢ်ဘၣ်လၢ ယသးသ့ၣ်ဖးကွံာ်ဝဲန့ၣ်လီၤ. တၢ်သူၣ်အုးသးအုးအံၤ မၤဘၣ်ဒိယနီၢ်ခိ, ယသး ဒီးယဘၣ်ယိၣ်ဘၣ်ဘှီတၢ်လီၤ.”

• ဘၣ်သ့ၣ်သ့ၣ် နကတူၢ်ဘၣ် တၢ်ဆူးတၢ်ဆါဖးဒိၣ်တမံၤလၢ ဖျါလၢအဘျါတသ့လၢၤဘၣ်န့ၣ်လီၤ. ကမ့ၢ်တၢ်ဆၢကတီၢ်လၢ နတူၢ်ဘၣ်ဒ်စီၤယိၤဘးလၢ အကအုကစွါလၢ– “ယသးဘၣ်အၢယသးသမူ, ယမူလီၤထူလီၤယိာ်န့ၣ် ယသးတအိၣ်ဘၣ်.” (ယိၤဘး ၇:၁၆) ဘၣ်သ့ၣ်သ့ၣ် နကတူၢ်ဘၣ်ဒ်သိး ဖုလူဝံး(စ်) လၢအသးအိၣ် ၈၀ တဂၤအံၤလီၤ. အဝဲတဲဝဲလၢ “တဘျီတခီၣ် ယတူၢ်ဘၣ်လၢ ယအိၣ်ခိးဒၣ်တၢ်သံအခိၣ်လီၤ.”

• ဘၣ်သ့ၣ်သ့ၣ် ဖဲပှၤလၢနအဲၣ်ဘၣ်အီၤတဂၤ သံသဒၣ်နၤအခါ နဆၢဒိးန့ၢ်ဘၣ် တၢ်မၤမုာ်ထီၣ်က့ၤနသးလီၤ.ရီဘၢၤ စံးဝဲလၢ– “ဖဲယနၢ်ဟူဘၣ်လၢ ကဘီယူၤလီၤတဲာ်ဒီး ယဖိခွါသံဃုာ်ဝဲအခါ ယတနာ်နီတစဲးဘၣ်. ယတၢ်သးအုးအံၤလီၤဂာ်ဒ် တၢ်သးအုးလၢ လံာ်စီဆှံထိၣ်သတြီၤဝဲဒီး နးတဘ့ၣ်လၢ အဆဲးဖျိယသးန့ၣ်လီၤ.”—လူၤကၣ် ၂:၃၅.

ရီဘၢၤ, ဖုလူဝံး(စ်), ရခွဲ(လ်) ဒီးကၠူလယၢၤသ့ၣ်တဖၣ်န့ၣ် ဖဲတၢ်အိၣ်အသးကီခဲ နးနးကလဲာ်အခါဒၣ်လဲာ် အဝဲသ့ၣ် ဃုထံၣ်န့ၢ်ဝဲ တၢ်မၤမုာ်ထီၣ်က့ၤအသးန့ၣ်လီၤ. အဝဲသ့ၣ် ဒိးန့ၢ်ဘၣ်ဝဲ တၢ်မၤမုာ်ထီၣ်က့ၤလၢ သ့တၢ်လၢာ်ကစၢ်ယွၤအအိၣ်လီၤ. ကစၢ်ယွၤ မၤမုာ်ထီၣ်က့ၤအဝဲသ့ၣ်ဒ်လဲၣ်. မ့ၢ်ကစၢ်ယွၤ ကကတဲာ်ကတီၤဝဲ တၢ်မၤမုာ်ထီၣ်က့ၤလၢ နလိၣ်ဘၣ်အီၤန့ၣ်ဧါ.