လံာ်စီဆှံ အတၢ်ကတိၤ
ပျၢ်ကွံာ်တၢ်ကမၣ်လၢ ပှၤမၤတ့ၢ်အီၤလၢညါ
ပတၢ်ကမၣ်န့ၣ် ကစၢ်ယွၤပျၢ်ကွံာ်ဝဲသ့ ခီဖျိထဲလၢ ယ့ၣ်ၡူးအသွံၣ်လၢ အပှ့ၤက့ၤပှၤအဃိ. (အ့း ၁:၇) ဘၣ်ဆၣ် လံာ်စီဆှံ တဲဝဲလၢ “ကစၢ်ယွၤ မၤဝဲဒ်န့ၣ်အဃိ အဝဲပာ်ဖျါထီၣ်လၢ အမၤတၢ် တီတီလိၤလိၤ လၢညါခါ ဖဲအဝဲ ဝံသးစူၤတၢ် ဒီးပျၢ်ကွံာ်တၢ်ကမၣ်လၢ ပှၤမၤတ့ၢ်အီၤလၢညါတဖၣ် အခါ” လၢအအဲၣ်ဒိးတဲဝဲ တချုးဖဲ ယ့ၣ်ၡူး ဟ့ၣ်လုၢ်ထီၣ်သး ဒ်တၢ်ပှ့ၤက့ၤအသိး ဒံးဘၣ်အခါ. (ရိ ၃:၂၅) ယဟိဝၤယွၤ ပျၢ်ကွံာ်တၢ်ကမၣ် တချုးဖဲ ယ့ၣ်ၡူး ဟ့ၣ်လုၢ်ထီၣ်သးဒံးဘၣ် ဒီးတကတီၢ်ဃီန့ၣ် အမၤတၢ် တီတီလိၤလိၤဒ်လဲၣ်.
ယဟိဝၤယွၤ အၢၣ်လီၤလၢ အကဒုးအိၣ်ထီၣ် “ပိာ်မုၣ်အချံအသၣ်” လၢအကမၤပူၤဖျဲး ပှၤလၢအနာ်န့ၢ်အီၤ ဒီးအတၢ်အၢၣ်လီၤ. ဒီးဖဲယဟိဝၤယွၤ မၤတၢ်အၢၣ်လီၤ အဝဲန့ၣ်အခါ လီၤဂာ်ဒ်သိးဒီး အဟ့ၣ်တၢ်အပှ့ၤလၢ တၢ်ပှ့ၤက့ၤအဂီၢ်လံ. (၁ မိၤ ၃:၁၅; ၂၂:၁၈) ယဟိဝၤယွၤ နာ်ဝဲသပှၢ်တၢၢ်လၢ တၢ်ဆၢကတီၢ်လၢ အပာ်ပနီၣ်ဝဲ မ့ၢ်တုၤဃီၤန့ၣ် အဖိခွါသးဘိ ကသးအိၣ် ဟ့ၣ်လီၤသး ဒ်တၢ်ပှ့ၤက့ၤအသိးနီၢ်ကီၢ်. (ကလၤ ၄:၄; ဧ့ၤ ၁၀:၇-၁၀) ဒီးဖဲယ့ၣ်ၡူး အိၣ်လၢဟီၣ်ခိၣ်ချၢအခါ အတဟ့ၣ်လုၢ်ထီၣ်သး ဒ်တၢ်ပှ့ၤက့ၤအသိးဒံးဘၣ် သနာ်က့ ယဟိဝၤယွၤဟ့ၣ်အီၤ တၢ်စိတၢ်ကမီၤလၢ အကပျၢ်ကွံာ် ပှၤတၢ်ဒဲးဘး. ယ့ၣ်ၡူး သ့ၣ်ညါဝဲလၢ အတၢ်ဟ့ၣ်လုၢ်ထီၣ်သးန့ၣ် ကကဲဘျုးလၢ ပှၤလၢအစူၢ်က့ၤနာ်က့ၤအီၤ အဂီၢ်အဃိ ယ့ၣ်ၡူး ပျၢ်ကွံာ်အဝဲသ့ၣ် အတၢ်ဒဲးဘးသ့.—မး ၉:၂-၆.
