တၢ်ကတိၤ “နကကဟုကယာ်အဝဲသ့ၣ်” လၢပဖးဘၣ်ဖဲ စံးထီၣ်ပတြၢၤ ၁၂:၇ န့ၣ် အဲၣ်ဒိးတဲ ဘၣ်ဃးဒီး “ပှၤဘၣ်နးဘၣ်ဖှီၣ်တဖၣ်” ဖဲအဆၢဖိ ၅ ဧါ မ့တမ့ၢ် အဲၣ်ဒိးတဲ ဘၣ်ဃးဒီး “ယဟိဝၤယွၤ အတၢ်ကတိၤတဖၣ်” ဖဲအဆၢဖိ ၆ ဧါ.

တၢ်ဂ့ၢ်အလီၢ်ခံမဲာ်ညါ ပာ်ဖျါထီၣ်ဝဲလၢ လံာ်စီဆှံတဆၢအံၤ အဲၣ်ဒိးတဲဝဲ ဘၣ်ဃးဒီး ပှၤဘၣ်နးဘၣ်ဖှီၣ်တဖၣ်.

စံးထီၣ်ပတြၢၤ ၁၂:၁-၄ ပာ်ဖျါထီၣ်ဝဲ “လၢပှၤဟီၣ်ခိၣ်ဖိအကျါန့ၣ် ပှၤလၢအသးတီ လီၤမၢ်ကွံာ်လၢာ်လံ.” ဒီး စံးထီၣ်ပတြၢၤ ၁၂:၅-၇ ပာ်ဖျါထီၣ်ဝဲဒ်အံၤ.

အဆၢဖိ ၅ တဲဘၣ်ဃးဒီး တၢ်လၢယဟိဝၤယွၤ ကမၤန့ၢ်လၢ “ပှၤဘၣ်နးဘၣ်ဖှီၣ်တဖၣ်” အဂီၢ်. ဖဲန့ၣ် ပထံၣ်ဘၣ်လၢ ယဟိဝၤယွၤ ကမၤပူၤဖျဲးအဝဲသ့ၣ်.

အဆၢဖိ ၆ တဲဝဲလၢ “ယဟိဝၤယွၤ အတၢ်ကတိၤတဖၣ်န့ၣ် စီဆှံဝဲ” ဒီး ‘လီၤဂာ်ဒ် စ့ညၣ်လၢ ပှၤပှံၢ်စီအီၤ.’ ပဝဲခရံာ်ဖိ အမ့ၢ်အတီတဖၣ်န့ၣ် ပထံၣ် ကစၢ်ယွၤ အကလုၢ်ကထါဒ်န့ၣ်.—စံး ၁၈:၃၀; ၁၁၉:၁၄၀.

လၢခံတဆၢဖဲ စံးထီၣ်ပတြၢၤ ၁၂:၇ န့ၣ် တဲဝဲလၢ “အိ ယဟိဝၤယွၤဧၢ, နကကဟုကယာ်အဝဲသ့ၣ် ဒီးနကဒီသဒၢအဝဲသ့ၣ် တဂၤစုာ်စုာ် လၢပှၤတစိၤအံၤအစုပူၤ အစိၤစိၤအဃၣ်ဃၣ်လီၤ.” အဃိ တၢ်ကတိၤ “အဝဲသ့ၣ်” န့ၣ် အဲၣ်ဒိးတဲ ဘၣ်ဃးဒီး မနုၤလဲၣ်.

ပဖးဘၣ် အဆၢဖိ ၆ ဘၣ်ဃးဒီး “ယဟိဝၤယွၤ အတၢ်ကတိၤတဖၣ်” ဝံၤအလီၢ်ခံ အဆၢဖိ ၇ ဟဲပိာ်ထီၣ်အခံ အဃိ တၢ်ကတိၤ “အဝဲသ့ၣ်” န့ၣ် ပှၤတနီၤ ဆိကမိၣ်ဝဲလၢ အကဲ ကစၢ်ယွၤ အတၢ်ကတိၤတဖၣ်. ဒီးပမ့ၢ်ဘၣ်ကွၢ် လံာ်စီဆှံန့ၣ် ပှၤထီဒါတၢ်တဖၣ် ဂုာ်ကျဲးစၢး မၤဟးဂီၤဝဲအါမး သနာ်က့ ပထံၣ်ဘၣ်လၢ ယဟိဝၤယွၤ ဒီသဒၢဝဲဂ့ၤဂ့ၤ.—ၡါ ၄၀:၈; ၁ ပ့း ၁:၂၅.

ဘၣ်ဆၣ် အဆၢဖိ ၅ န့ၣ် အဲၣ်ဒိးတဲစ့ၢ်ကီးဝဲ ဘၣ်ဃးဒီး ယဟိဝၤယွၤ ဒီသဒၢ ပှၤဘၣ်နးဘၣ်ဖှီၣ်တဖၣ်. လၢညါန့ၣ် ယဟိဝၤယွၤ မၤစၢၤ ဒီးမၤပူၤဖျဲး “ပှၤဘၣ်နးဘၣ်ဖှီၣ်တဖၣ်” ဒီးပှၤလၢအဘၣ် “တၢ်ဆီၣ်တံၢ်မၤနၢၤအီၤ” ဒီးခါဆူညါစ့ၢ်ကီး အကဆဲးမၤစၢၤ အဝဲသ့ၣ်ဒံး.—ဘး ၃၆:၁၅; စံး ၆:၄; ၃၁:၁, ၂; ၅၄:၇; ၁၄၅:၂၀.

အဃိ တၢ်ကတိၤ “အဝဲသ့ၣ်” ဖဲအဆၢဖိ ၇ န့ၣ် အဲၣ်ဒိးတဲ ဘၣ်ဃးဒီး မနုၤလဲၣ်.

ပမ့ၢ်ဖးကွၢ် တၢ်ဂ့ၢ်တၢ်ကျိၤလၢ စံးထီၣ်ပတြၢၤ အဆၢဒိၣ်တဆၢအံၤန့ၣ် ပသ့ၣ်ညါဘၣ်လၢ တၢ်ကတိၤ “အဝဲသ့ၣ်” န့ၣ် တဲဘၣ်ဃးဒီး ပှၤဘၣ်နးဘၣ်ဖှီၣ်တဖၣ်.

စံးထီၣ်ပတြၢၤ ၁၂:၁ တဲဘၣ်ဃးဒီး ကစၢ်ယွၤအခ့အပှၤ လၢအမ့ၢ် “ပှၤလၢအသးတီ” ဒီးအဝဲသ့ၣ်န့ၣ် ပှၤလံၣ်န့ၢ်လီန့ၢ်အီၤ. ဒီးလၢခံန့ၣ် တဲဝဲဘၣ်ဃးဒီး ယဟိဝၤယွၤ ကမၤဝဲ ပှၤလံၣ်အီၣ်လီအီၣ်တၢ် ဒ်လဲၣ်အဂ့ၢ်. ယဟိဝၤယွၤန့ၣ် အတၢ်ကတိၤ စီဆှံဝဲအဃိ စံးထီၣ်ပတြၢၤ အဆၢဒိၣ်တဆၢအံၤ မၤစၢၤပှၤဒ်သိး ပကနာ်လၢ ယဟိဝၤယွၤ ကမၤစၢၤ အခ့အပှၤနီၢ်ကီၢ်.

အဃိ အဆၢဖိ ၇ တဲဝဲလၢ ယဟိဝၤယွၤ ကကဟုကယာ် ဒီးဒီသဒၢ “အဝဲသ့ၣ်” န့ၣ် အဲၣ်ဒိးတဲ ဘၣ်ဃးဒီး ပှၤလၢအဘၣ်နးဘၣ်ဖှီၣ် ခီဖျိလၢ ပှၤအၢပှၤသီတဖၣ်အဃိ.

တၢ်ကတိၤ “အဝဲသ့ၣ်” လၢအဆၢဖိ တဆၢအံၤန့ၣ် ပှၤကွဲးကူန့ၢ်အီၤလၢ လံာ်စီဆှံ လၢဧ့ၤဘြံၤကျိာ်တကတြူၢ် လၢပှၤနာ်န့ၢ်ဝဲသ့. ဒီးဖဲပှၤကွဲးကျိာ်ထံက့ၤ လံာ်စီဆှံ လၢဧ့ၤဘြံၤကျိာ်တကတြူၢ်လၢ ကြံးကျိာ်အခါ ပှၤကွဲးစ့ၢ်ကီးဝဲ တၢ်ကတိၤ “ပှၤ” ခံဘျီ. အဃိ ဖျါလၢ တၢ်ကတိၤတဖျၢၣ်န့ၣ် အဲၣ်ဒိးတဲဝဲ ဘၣ်ဃးဒီး ပှၤဘၣ်နးဘၣ်ဖှီၣ်တဖၣ် ဒီးပှၤလၢ အဘၣ်တၢ်ဆီၣ်တံၢ်မၤနၢၤအီၤတဖၣ်. ဒီးအဆၢဖိ ၇ တဲစ့ၢ်ကီးလၢ ပှၤလၢအသးတီ “တဂၤစုာ်စုာ်” န့ၣ် ကစၢ်ယွၤ ကဒီသဒၢ အဝဲသ့ၣ်လၢ “ပှၤတစိၤအံၤ” လၢအမ့ၢ် ပှၤအၢပှၤသီလၢ အဟးမၤဖဲအသး အစုပူၤ. (စံး ၁၂:၇, ၈) တကးဒံးဘၣ် ပမ့ၢ်ကွၢ် လံာ်စီဆှံ လၢဧ့ၤဘြံၤကျိာ်တကတြူၢ်လၢ အရၣ်မ့းအကျိာ်န့ၣ် အဆၢဖိ ၇ အခီၣ်ထံးတကူာ် တဲဝဲလၢ “အိ ကစၢ်ယွၤဧၢ, နကဒီသဒၢ ပှၤတီပှၤလိၤ, နကဒီသဒၢ အဝဲသ့ၣ်လၢ ပှၤအၢပှၤသီတစိၤအံၤအစုပူၤ လီၤထူလီၤယိာ်.” ပထံၣ်ဘၣ်လၢ တၢ်အုၣ်သးတခါအံၤ ပာ်ဖျါထီၣ်ဝဲလၢ စံးထီၣ်ပတြၢၤ ၁၂:၇ န့ၣ် တအဲၣ်ဒိးတဲ ဘၣ်ဃးဒီး ကစၢ်ယွၤ အတၢ်ကတိၤတဖၣ်ဘၣ်.

အဃိ လံာ်စီဆှံတဆၢအံၤ ကဲထီၣ်တၢ်မုၢ်လၢ်လၢ “ပှၤလၢအသးတီ” အဂီၢ်. အဝဲသ့ၣ် နာ်ဝဲသ့ သပှၢ်တၢၢ်လၢ ကစၢ်ယွၤ ကမၤစၢၤအဝဲသ့ၣ်.