“ဒီးကွၢ်ကွၢ်, လီၢ်ပစိာ်အိၣ်ပာ်လီၤအသးလၢမူခိၣ်, ဒီးပှၤတဂၤဆ့ၣ်နီၤလၢ အဖီခိၣ်လီၤ. ဒီးပှၤလၢအဆ့ၣ်နီၤလၢ အဖီခိၣ်န့ၣ်, ဖျါဝဲလီၤဂာ်လၢတၢ်မျၢ်နကၤသွဲး ဒီးတၢ်မျၢ်ဆီသွံၣ်အသိး, ဒီးတၢၢ်ကွဲၤအိၣ်ဝးတရံးလီၢ်ပစိာ်န့ၣ်, ဖျါဝဲလီၤဂာ်လၢတၢ်မျၢ်ဟ့မၠးလီၤ.”—လီၣ်ဖျါ ၄:၂, ၃. 

“ဒ်တၢၢ်ကွဲၤလၢ တၢ်အၢၣ်လိၤလၢ တၢ်ဟဲစူၤအမုၢ်တနံၤအသိး တၢ်ကပြုၢ်ကပြီၤဝးတရံးဝဲ မၤသးဒ်န့ၣ်သိးလီၤ. အဝဲန့ၣ်မ့ၢ်ယွၤအလၤကပီၤ အက့ၢ်အဂီၤလီၤ. ဒီးတုၤယထံၣ်ဘၣ်ဒီး ယလီၤဃံၤအီထီလာ်, ဒီးယနၢ်ဟူပှၤလၢ အကတိၤတၢ်တဂၤအကလုၢ်လီၤ.”—ယဃ့းစက့လး ၁:၂၇, ၂၈.

တၢ်မၢဖိယိၤဟၣ် ဒီးဝံယဃ့းစက့လး အတၢ်ထံၣ်လၢညါခီန့ၣ် ပာ်ဖျါထီၣ်ဝဲလၢ ကစၢ်ယဟိဝၤယွၤ မ့ၢ်ယွၤလၢအဒိၣ်ကတၢၢ်, ထီကတၢၢ် ဒီးအိၣ်ဝဲဒီး တၢ်မျၢ်ပလဲ လၢၢ်အကလုာ်ကလုာ် ဒီးတၢၢ်ကွဲၤ ဒီးအလီၢ်ပစိာ်လၢ လီၤကဟုကညီၢ်ဒိၣ်မးလီၤ. တၢ်ဂ့ၢ်တဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ အိၣ်အလီၢ်န့ၣ် ကဟုကညီၢ် ဒီးဃံလၤဝဲ ဒီးပှဲၤဝဲဒီးတၢ်မုာ်တၢ်ခုၣ်လီၤ.

တၢ်ထံၣ်လၢညါခီအံၤ လီၤပလိာ်လိာ်အသးဒီး ပှၤကွဲးထါစံးထီၣ်ပတြၢၤ အတၢ်ကွဲးလၢအမ့ၢ်– “အဂ့ၢ်ဒ်အံၤ, ယွၤမ့ၢ်တၢ်အဒိၣ်, ဒီးတၢ်စံးထီၣ်ပတြၢၤ အလီၢ်ဖးဒိၣ်လီၤ. အဝဲဒၣ်မ့ၢ် တၢ်ပျံၤအလီၢ်ဒိၣ်န့ၢ် ကစၢ်ခဲလၢာ်တက့ၢ်လီၤ. အဂ့ၢ်ဒ်အံၤ ကယဲၢ်ပှၤအကလုာ်တဖၣ် အကစၢ်ခဲလၢာ် မ့ၢ်တၢ်ကလီကလီလီၤ. မ့မ့ၢ် ယွၤတ့လီၤမူခိၣ်လီၤ. တၢ်လၤကပီၤဒီး တၢ်ကဟုကညီၢ် အိၣ်ဝဲလၢ အမဲာ်ညါ ဒီးတၢ်အစိအကမီၤဒီး တၢ်အဃံအလၤ အိၣ်ဝဲလၢအလီၢ်စီဆှံအပူၤလီၤ.”—စံးထီၣ်ပတြၢၤ ၉၆:၄-၆.

ယဟိဝၤယွၤ မ့ၢ်ယွၤလၢအဒိၣ်ကတၢၢ်သနာ်က့ အဝဲကွဲမုာ်ပဝဲဒၣ်သ့ၣ်တဖၣ် ဒ်သိးပကသုးဘူးပသး ဆူအအိၣ်ခီဖျိ တၢ်ထုကဖၣ် ဒီးတကးဒံးဘၣ် အၢၣ်လီၤပှၤလၢ ကဒိကနၣ် ပတၢ်ထုကဖၣ်လီၤ. (စံးထီၣ်ပတြၢၤ ၆၅:၂) ကစၢ်ယွၤအဲၣ်ပှၤဒီး သးအိၣ်ပှၤဒိၣ်မးအဃိ တၢ်မၢဖိယိၤဟၣ် ကွဲးဖျါထီၣ်ဝဲလၢ– “ယွၤမ့ၢ်တၢ်အဲၣ်တၢ်ကွံန့ၣ်လီၤ.”—၁ ယိၤဟၣ် ၄:၈.

“မ့မ့ၢ်အဝဲဒၣ် [စီၤစတ့းဖၣ်] န့ၣ်လၢထီၣ်ပှဲၤထီၣ်ဒီးသးစီဆှံ, ဒီးကွၢ်ထံတၢ်ဆူမူခိၣ်, ဒီးထံၣ်ဘၣ်ယွၤအလၤကပီၤ, ဒီးယ့ၣ်ၡူးအိၣ်ဆၢထၢၣ်လၢယွၤအစုထွဲလီၤ. ဒီးစံးဝဲဒၣ်, ကွၢ်ကွၢ်, ယထံၣ်မူခိၣ်အိးထီၣ်အသး, ဒီးပှၤကညီအဖိခွါန့ၣ် အိၣ်ဆၢထၢၣ်လၢယွၤအစုထွဲလီၤ.”—မၤတၢ် ၇:၅၅, ၅၆.

ယူဒၤတၢ်ဘူၣ်တၢ်ဘါ ခိၣ်နၢ်တဖၣ် မၤသံကစၢ်ခရံာ် တချုးလၢ စီၤစတ့းဖၣ် ဒိးန့ၢ်ဘၣ်တၢ်ထံၣ်လၢညါခီဒံးဘၣ်န့ၣ်လီၤ. စီၤစတ့းဖၣ် အတၢ်ထံၣ်လၢညါခီအံၤအပူၤန့ၣ် ထံၣ်ဘၣ်ဝဲလၢ ယ့ၣ်ၡူး ဂဲၤဆၢထၢၣ်သမူထီၣ်က့ၤလၢမူခိၣ်ဒီး ဒိးန့ၢ်ဘၣ်တၢ်လၤကပီၤလီၤ. ဘၣ်ဃးဒီး တၢ်ဂ့ၢ်အံၤန့ၣ် တၢ်မၢဖိပီလူးကွဲးဝဲလၢ– “[ယဟိဝၤယွၤ] ဒုးဂဲၤဆၢထၢၣ်အီၤ [ခရံာ်] လၢတၢ်သံအပူၤ, ဒီးပာ်အီၤလၢအစုထွဲ လၢမူခိၣ်အလီၢ်တဖၣ်, လၢတၢ်အခိၣ်ဒီးတၢ်အဒိၣ်အထီ, ဒီးတၢ်ကဲကစၢ်, ဒီးကယဲၢ်တၢ်အမံၤလၢ တၢ်ကိးဝဲထဲအအံၤတဃၣ်ဧိၤ တမ့ၢ်ဘၣ်, မ့ၢ်ခဲကိာ်တဃၣ်စ့ၢ်ကီး, အဖီခိၣ်,” လီၤ.—အ့းဖ့းစူး ၁:၂၀, ၂၁.

ယ့ၣ်ၡူး အလီၢ်အလၤထီသနာ်က့ လံာ်စီဆှံပာ်ဖျါဝဲလၢ ဒ်ယဟိဝၤယွၤအသိး ယ့ၣ်ၡူးသူၣ်အိၣ်သးအိၣ်ဝဲ ပှၤဟီၣ်ခိၣ်ဖိတဖၣ်လီၤ. ဖဲယ့ၣ်ၡူး စံၣ်တဲၤတဲလီၤတၢ်လၢ ဟီၣ်ခိၣ်ချၢအခါ အဝဲ မၤဘျါက့ၤ ပှၤဘၣ်ဆူးဘၣ်ဆါ, ပှၤဆိးက့မံနီၤ ဒီးမၤမူထီၣ်က့ၤပှၤသံတဖၣ်န့ၣ်လီၤ. ခီဖျိလၢအဝဲ အတၢ်ဟ့ၣ်လုၢ်ထီၣ်အသးအဃိ ပာ်ဖျါထီၣ်ဝဲ အတၢ်အဲၣ် ကစၢ်ယွၤဒီး ပှၤဟီၣ်ခိၣ်ဖိတဖၣ်န့ၣ်လီၤ. (အ့းဖ့းစူး ၂:၄, ၅) ယ့ၣ်ၡူးဆၢထၢၣ်လၢ ယွၤအစုထွဲတခီ ဒီးတယံာ်လၢၤဘၣ် ကသူဝဲအတၢ်စိတၢ်ကမီၤဒီး ကဒုးအိၣ်ထီၣ် တၢ်ဆိၣ်ဂ့ၤ အါအါဂီၢ်ဂီၢ်လၢ ဟီၣ်ခိၣ်ဒီဘ့ၣ်လၢ ပှၤဟီၣ်ခိၣ်ဖိလၢ အဒိကနၣ်တၢ်တဖၣ်အဂီၢ်လီၤ.

“ယ [ဝံဒၤနံးယ့လး] ကွၢ်ဒံးတၢ် တုၤတၢ်ပာ်လီၤ လီၢ်ပစိာ်တဖၣ် ဒီးတၢ်အိၣ် အကစၢၤကစၢၤ လၢပျၢၤလံၤလံၤတဂၤ [ယဟိဝၤယွၤ] န့ၣ်ဆ့ၣ်နီၤဝဲ, . . . ပှၤတကထိ အဘျီတကထိ မၤအတၢ်, ပှၤတကလး အဘျီတကလး ဆၢထၢၣ်လၢအမဲာ်ညါလီၤ.”—ဒၤနံးယ့လး ၇:၉, ၁၀.

ဖဲအံၤန့ၣ် အဝဲတထံၣ်ဝဲထဲ မူခိၣ်ကလူးတဂၤဘၣ် ထံၣ်ဝဲမူခိၣ်ကလူးဒီဒူၣ်လီၤ. တၢ်ထံၣ်လၢညါခီအံၤ ကလီၤသူၣ်ပိၢ်သးဝးထဲလဲၣ်န့ၣ် ထံၣ်တမှံကွၢ်တက့ၢ်. မူခိၣ်ကလူးသ့ၣ်တဖၣ်အံၤ မ့ၢ်ပှၤနီၢ်သးဖိတဖၣ်လၢ ပှဲၤဝဲဒီးတၢ်ကဟုကညီၢ်, အိၣ်ဒီးတၢ်ကူၣ်သ့ကူၣ်ဘၣ် ဒီးအစိအကမီၤန့ၣ်လီၤ. အဝဲသ့ၣ်တနီၤ ဒိးန့ၢ်ဘၣ်အလီၢ်အလၤ ဒ်အမ့ၢ် စ့ရၤဖးဒီးခ့ရူာ်န့ၣ်လီၤ. လၢလံာ်စီဆှံပူၤန့ၣ် မူခိၣ်ကလူး ဘၣ်တၢ်ယၢၤထီၣ်အီၤ အဘျီ ၂၅၀ ဘျဲၣ်န့ၣ်လီၤ.

မူခိၣ်ကလူးတဖၣ်အံၤ လၢညါတကဲပှၤဟီၣ်ခိၣ်ဖိ လၢအအိၣ်မူပာ်စၢၤလၢဟီၣ်ခိၣ်ချၢဘၣ်. တချုးလၢ ကစၢ်ယွၤတ့လီၤ ပှၤဟီၣ်ခိၣ်ဖိဒံးဘၣ်န့ၣ် ကစၢ်ယွၤတ့လီၤ မူခိၣ်ကလူးဖးယံာ်လံ. ဖဲကစၢ်ယွၤတ့လီၤ ဟီၣ်ခိၣ်အခါ မူခိၣ်ကလူးသ့ၣ်တဖၣ် ကိးသတြီထီၣ် လၢတၢ်သူၣ်ဖှံသးညီအပူၤလီၤ.—ယိၤဘး ၃၈:၄-၇.

ကျဲတဘိလၢ မူခိၣ်ကလူးလၢအသးတီတဖၣ် မၤယွၤအတၢ်မၤန့ၣ် မ့ၢ်ဝဲတၢ်မၤအရ့ဒိၣ်ကတၢၢ်တခါလၢအမ့ၢ် တၢ်စံၣ်တဲၤတဲလီၤ ယွၤအဘီအမုၢ်အဂ့ၢ်လၢ ဟီၣ်ခိၣ်ချၢန့ၣ်လီၤ. (မးသဲ ၂၄:၁၄) အဝဲသ့ၣ်အတၢ်မၤန့ၣ် ဘၣ်တၢ်ပာ်ဖျါထီၣ်အီၤလၢ တၢ်မၢဖိယိၤဟၣ် အတၢ်ထံၣ်လၢညါခီအပူၤ ဒ်အံၤ– “ဒီးယထံၣ်ကလူးအဂၤတဂၤ, ယူၤလၢတၢ်ဖးဖီအိၣ်ဒီး တၢ်သးခုအကစီၣ်အထူအယိာ်ဒ်သိး အကစံၣ်တဲၤတဲလီၤလၢ ပှၤအိၣ်လၢဟီၣ်ခိၣ်ချၢ, ဒီးကယဲၢ်ပှၤကလုာ်, ဒီးပှၤအဒူၣ်, ဒီးပှၤကတိၤတၢ်အကျိာ်, ဒီးပှၤဂီၢ်မုၢ်ခဲလၢာ်” လီၤ. (လီၣ်ဖျါ ၁၄:၆) မုၢ်မဆါတနံၤညါအံၤ မူခိၣ်ကလူးသ့ၣ်တဖၣ် တဟဲတဲတၢ်ဒီးပှၤ ဒ်လၢညါအသိးလၢၤဘၣ် သနာ်က့ အဝဲသ့ၣ်တဖၣ်န့ၣ် ဟံးစုနဲၣ်ကျဲဝဲ တၢ်စံၣ်တဲၤတဲလီၤ အတၢ်မၤဒ်သိး ပှၤလၢသူၣ်အိၣ်သးအိၣ် တၢ်သးခုကစီၣ်တဖၣ် ကနၢ်ဟူဘၣ်ဝဲအဂီၢ်လီၤ.

“ဒီးတၢ်ဒုးတၢ်ယၤ အိၣ်ထီၣ်လၢမူခိၣ်လီၤ. မံၤက့လး [ယ့ၣ်ၡူးခရံာ်] ဒီးအကလူးတဖၣ်ဒုးတၢ်ဒီးပယိၤ, ဒီးပယိၤဒီးအကလူး သ့ၣ်တဖၣ်န့ၣ်ဒုးတၢ်, ဒီးတမၤနၢၤဘၣ်တၢ်ဘၣ်, ဒီးအဝဲသ့ၣ် အလီၢ်တအိၣ်လၢၤဘၣ် လၢမူခိၣ်ဘၣ်. ဒီးပယိၤဖးဒိၣ်, ဂုၢ်လၢအအိၣ်လၢသီတဘိ, ကိးဝဲအမံၤလၢမုၣ်ကီၤလံၢ်, ဒီးစၤတၣ်လၢအလီန့ၢ် ပှၤဟီၣ်ခိၣ်ဖိခဲလၢာ်, ဘၣ်တၢ်တ့ၢ်လီၤအီၤဆူ ဟီၣ်ခိၣ်ချၢ, ဒီးအကလူးတဖၣ် ဘၣ်တၢ်ဟီထီၣ်ကွံာ်ဒီးအီၤလီၤ.”—လီၣ်ဖျါ ၁၂:၇-၉.

လၢညါန့ၣ် မူခိၣ်တအိၣ်ဒီး တၢ်မုာ်တၢ်ခုၣ်ဘၣ်. စးထီၣ်လၢကစၢ်ယွၤ တ့လီၤ ပှၤကညီဝံၤအလီၢ်ခံန့ၣ် မူခိၣ်ကလူးတဂၤအဲၣ်ဒိးလၢ ပှၤကဘူၣ်ထီၣ်ဘါထီၣ်အီၤအဃိ အဝဲကဲထီၣ်ဝဲစၤတၣ် လၢအခီပညီမ့ၢ်ဝဲ “ပှၤလၢအထီဒါတၢ်” တဂၤလီၤ. လၢခံန့ၣ် မူခိၣ်ကလူးတနီၤ ပိာ်မုၣ်ကီၤလံၢ်အခံဒီး ထီဒါကစၢ်ယွၤလီၤ. ဒီးအဝဲသ့ၣ်တဖၣ်န့ၣ် ဘၣ်တၢ်သ့ၣ်ညါအီၤလၢ အမ့ၢ်တၢ်ဝံတၢ်နါလီၤ. အဝဲသ့ၣ်တဖၣ် အၢသီဒိၣ်မးဒီး ထီဒါယဟိဝၤယွၤဒီး ကွဲန့ၢ်လွဲန့ၢ် ပှၤဟီၣ်ခိၣ်ဖိ အါအါဂီၢ်ဂီၢ် ဒ်သိးကထီဒါဝဲ ကစၢ်အတၢ်ဟံးစုနဲၣ်ကျဲလၢ အပှဲၤဒီးတၢ်အဲၣ်တၢ်ကွံန့ၣ်လီၤ.

မုၣ်ကီၤလံၢ် ဒီးတၢ်ဝံတၢ်နါသ့ၣ်တဖၣ်အံၤ အတၢ်သူၣ်ကညီၤသးကညီၤ တအိၣ်နီတစဲးဘၣ်. အဝဲသ့ၣ် မ့ၢ်ဝဲပှၤဟီၣ်ခိၣ်ဖိ အဒုၣ်အဒါ ဒီးအဝဲသ့ၣ်ဒုးအိၣ်ထီၣ် တၢ်နးတၢ်ဖှီၣ်အါအါဂီၢ်ဂီၢ်လၢ ဟီၣ်ခိၣ်ချၢန့ၣ်လီၤ. အဒိ မုၣ်ကီၤလံၢ် မၤသံဝဲဒၣ် စီၤယိၤဘး အဆၣ်ဖိကီၢ်ဖိ ဒီးအကုၢ်အပှၤတဖၣ်လီၤ. လၢခံမၤသံဝဲ စီၤယိၤဘးအဖိအဂၤတဆံ ခီဖျိအဒုးဟဲ “ကလံၤမုၢ်” ဒီးဟံၣ်လီၤပှီၢ်ဝဲအဃိန့ၣ်လီၤ. တကးဒံးဘၣ် မုၣ်ကီၤလံၢ် “တီၢ်စီၤယိၤဘး လၢတၢ်ဝ့အၢလၢ အခီၣ်ညါသးပၢၢ်လၢအခိၣ်” လီၤ.—ယိၤဘး ၁:၇-၁၉; ၂:၇.

ဖဲမုၣ်ကီၤလံၢ် ဘၣ်တၢ်တ့ၢ်လီၤအီၤလၢ ဟီၣ်ခိၣ်ချၢအခါန့ၣ် သ့ၣ်ညါလီၤအသးလၢ “အဆၢအကတီၢ်အိၣ်ထဲတစိၢ်ဖိ” လီၤ. တယံာ်လၢၤဘၣ်န့ၣ် မုၣ်ကီၤလံၢ် ကဘၣ်တၢ်မၤဟးဂီၤကွံာ်အီၤန့ၣ်လီၤ. (လီၣ်ဖျါ ၁၂:၁၂) လၢတၢ်န့ၣ်အဃိ မုၣ်ကီၤလံၢ်အံၤ အကျဲကတၢၢ်လံ ဒီးတၢ်အံၤမ့ၢ်ဝဲ တၢ်သးခုကစီၣ်နီၢ်နီၢ်လီၤ.

“န [ယ့ၣ်ၡူး] ဒိးသံနသး, ဒီးနပှ့ၤက့ၤပှၤလၢနသွံၣ်, လၢယွၤအဂီၢ်လၢ ကယဲၢ်ပှၤအဒူၣ်, ဒီးပှၤကတိၤတၢ်အကျိာ် အကလုာ်ကလုာ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤအကလုာ်တဖၣ်အကျါလီၤ. ဒီးနပာ်အီၤလၢဘီမုၢ်, ဒီးပှၤလုၢ်တၢ်အဒိၣ်လၢယွၤအမဲာ်ညါ, ဒီးအဝဲသ့ၣ် ကပၢတၢ်လၢဟီၣ်ခိၣ်ချၢလီၤ.”—လီၣ်ဖျါ ၅:၉, ၁၀.

ဒ်ယ့ၣ်ၡူး ဂဲၤဆၢထၢၣ်သမူထီၣ်က့ၤ ဒီးက့ၤထီၣ်ဘၣ်ဆူမူခိၣ်အသိး ပှၤတနီၤနီၤန့ၣ် ကလဲၤထီၣ်ဘၣ်ဝဲလၢ မူခိၣ်စ့ၢ်ကီးလီၤ. ယ့ၣ်ၡူး စံးဘၣ်အတၢ်မၢဖိသ့ၣ်တဖၣ်လၢ– “ယလဲၤ ကတဲာ်ကတီၤသုလီၢ်တပူၤလီၤ. ဒီးယမ့ၢ်လဲၤကတဲာ်ကတီၤသုလီၢ်တပူၤဒီး, ယကဟဲက့ၤကဒီးဆူသုအိၣ်လီၤ. ဒီးယကဟံးက့ၤသုဆူယကစၢ်ဒၣ်ယဲ အအိၣ်ဒ်သိးဖဲ ယအိၣ်အလီၢ်န့ၣ်, သုကအိၣ်စ့ၢ်ကီးလီၤ.”—ယိၤဟၣ် ၁၄:၂, ၃.

ပှၤလၢအလဲၤထီၣ်ဆူမူခိၣ်တဖၣ်န့ၣ် ကဘၣ်မၤတၢ်အိၣ်ဝဲလီၤ. လၢမူခိၣ်ဘီမုၢ်န့ၣ် အဝဲသ့ၣ်ကမၤသကိးတၢ်ဒီးယ့ၣ်ၡူး ဒ်ပဒိၣ်တဖုအသိး ဒီးကပၢဝဲဟီၣ်ခိၣ် ဒီးဆိၣ်ဂ့ၤပှၤဟီၣ်ခိၣ်ဖိတဖၣ်န့ၣ်လီၤ. အဃိ ယ့ၣ်ၡူး မၢအပျဲၢ်အဘီၣ်သ့ၣ်တဖၣ် ဃ့ဘါထုကဖၣ်တၢ်ဒ်အံၤ– “အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်.” —မးသဲ ၆:၉, ၁၀.

“ဒီးယ [တၢ်မၢဖိယိၤဟၣ်] နၢ်ဟူတၢ်ကလုၢ်သီၣ်ဖးဒိၣ် လၢမူခိၣ်စံးဝဲဒၣ်, ကွၢ်ကွၢ်, ယွၤအဒဲအိၣ်ဒီးပှၤကညီ, . . . ဒီးယွၤကထွါကွံာ် အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢ အခီၣ်ထံးတဖၣ်ပူၤကွံာ်လံ.”—လီၤဖျါ ၂၁:၃, ၄. 

တၢ်ထံၣ်လၢညါခီအံၤ ပာ်ဖျါထီၣ်ဝဲလၢ ယ့ၣ်ၡူးဒီးပှၤလၢ အဂဲၤဆၢထၢၣ်သမူထီၣ်က့ၤ ဆူမူခိၣ်တဖၣ်န့ၣ် ကပၢတၢ်လၢ ယွၤအဘီအမုၢ်အပူၤ ဒီးကမၤဟးဂီၤကွံာ် မုၣ်ကီၤလံၢ် အတၢ်ပၢတၢ်ပြး တကးဒံးဘၣ် ကဒုးကဲထီၣ် ဟီၣ်ခိၣ်ဒီဘ့ၣ်လၢ ပၤရဒံစူးန့ၣ်လီၤ. ဖဲန့ၣ်အခါ တၢ်နးတၢ်ဖှီၣ် ဒီးတၢ်သူၣ်အုးသးအုး တအိၣ်လၢၤဘၣ်. ဒီးတၢ်သံဒၣ်လဲာ် တအိၣ်လၢၤဘၣ်.

ပှၤသံလၢ အကကွဲၢ်လၢအကထိသ့ၣ်တဖၣ် ကဂဲၤဆၢထၢၣ်သမူထီၣ်က့ၤဝဲဖဲလဲၣ်. အဝဲသ့ၣ်တဖၣ်န့ၣ် ကဂဲၤဆၢထၢၣ်သမူထီၣ်က့ၤဝဲလၢ ဟီၣ်ခိၣ်ပၤရဒံးစူးအပူၤ ဒီးကအိၣ်မူ လီၤထူလီၤယိာ်န့ၣ်လီၤ.—လူၤကၣ် ၂၃:၄၃.