ပှၤလၢအဘူးဒီးနၤတဂၤဂၤ ကသူၣ်အုးသးအုး ခီဖျိလၢပှၤလၢအအဲၣ်ဘၣ်ဝဲတဂၤသံအဃိန့ၣ်လီၤ. ဖဲန့ၣ်အဆၢကတီၢ် မ့ၢ်နတူၢ်ဘၣ်လၢ နမၤစၢၤအီၤတသ့နီတမံၤဘၣ်န့ၣ်ဧါ. တဘျီတခီၣ် ပကဘၣ်တဲဒ်လဲၣ်, ပကဘၣ်မၤဒ်လဲၣ် ပတသ့ၣ်ညါဘၣ်အဃိ ပတမၤတၢ်နီတမံၤဘၣ် ဒီးပတတဲတၢ်နီတမံၤလၢၤဘၣ်. ဘၣ်ဆၣ် ကျဲလၢပမၤစၢၤအဝဲသ့ၣ်သ့န့ၣ် အိၣ်ဝဲလီၤ.

ဒ်သိးနကမၤစၢၤအဝဲသ့ၣ်အဂီၢ် နလဲၤဟးဆူအအိၣ်ဒီး တဲဘၣ်အီၤတၢ်ကတိၤယိယိဖိ ဒ်သိးဒီး “တဘၣ်သးဆံးတဂ့ၤ” သ့ဝဲလီၤ. ပှၤတနီၤနီၤန့ၣ် မၤမုာ်ထီၣ်က့ၤ ပှၤလၢအသူၣ်အုးသးအုးတဖၣ်အသး ခီဖျိဖိးဟုအဝဲသ့ၣ် မ့တမ့ၢ် ဖီၣ်ဝဲပှၤစု ကဖီလီဖိန့ၣ်လီၤ. ပှၤလၢအသူၣ်အုးသးအုးတဂၤ မ့ၢ်အဲၣ်ဒိးတဲတၢ်န့ၣ် ဒိကနၣ်န့ၢ်အီၤလၢ တၢ်သူၣ်အိၣ်သးအိၣ်အပူၤတက့ၢ်. တကးဒံးဘၣ် ကျဲအဂၤတဖၣ်လၢ နမၤစၢၤသ့န့ၣ် အိၣ်ဝဲလီၤ. အဒိ အဝဲသ့ၣ် မ့ၢ်ဘၣ်အသးန့ၣ် အဟံၣ်တၢ်မၤလၢ မၤဝဲတချုးဘၣ်တဖၣ်န့ၣ် နမၤစၢၤအီၤသ့န့ၣ်လီၤ. နဖီအီၣ်ဖီအီတၢ်လၢအဝဲသ့ၣ်အဂီၢ်, ကွၢ်စၢၤအဖိ, မ့တမ့ၢ် တၢ်ကလဲၤအသးလၢ အဂ့ၢ်အဝီအဂီၢ် နရဲၣ်ကျဲၤစၢၤန့ၢ်တၢ်လၢ အဝဲသ့ၣ်အဂီၢ်သ့လီၤ. တၢ်မၤလၢပမၤန့ၢ်အီၤတဖၣ်န့ၣ် အဘျုးအိၣ်ဒိၣ်န့ၢ်ဒံး ပတၢ်ကတိၤလီၤ.

ဒ်တၢ်ဆၢကတီၢ်လဲၤပူၤကွံာ်ဝဲအသိး နတဲသကိး ပှၤလၢအသံတ့ၢ်တဂၤအဂ့ၢ် ဒီးအဟံၣ်ဖိဃီဖိသ့ဝဲလီၤ. နတဲသကိး ဘၣ်ဃးဒီး ပှၤလၢအသံတ့ၢ်တဂၤအံၤ အတၢ်ဂ့ၤတၢ်ဝါ ဒီးအတၢ်လဲၤခီဖျိလၢ အလီၤသူၣ်ခုသးခုတဖၣ်အဂ့ၢ်သ့န့ၣ်လီၤ. တၢ်ကတိၤဒ်အံၤတဖၣ် ကမၤသးဖှံထီၣ်ဝဲ ပှၤလၢအသူၣ်အုးသးအုးတဖၣ်န့ၣ်လီၤ. အဒိ ဖဲၤ (မ်) လၢအဝၤသံတ့ၢ်ဝဲ အပူၤကွံာ်ဃုနံၣ်န့ၣ် စံးဝဲလၢ– “တဘျီတခီၣ် ဖဲယနၢ်ဟူဘၣ် တၢ်အဂ့ၤလၢယဝၤမၤတ့ၢ်လၢ ယတသ့ၣ်ညါဘၣ်တဖၣ်အခါ ယသးခုဒိၣ်မးလီၤ.”

ပှၤဃုသ့ၣ်ညါတၢ်တဖၣ် ပာ်ဖျါထီၣ်ဝဲလၢ အါဒၣ်တက့ၢ်န့ၣ် ပှၤလၢအသူၣ်အုးသးအုးတဖၣ် ဒိးန့ၢ်ဘၣ်တၢ်မၤစၢၤအါမးဖဲ ပှၤသံဝံၤတယံာ်ဒံးဘၣ်အခါ ဘၣ်ဆၣ် ခီဖျိလၢပှၤတၢ်မၤအိၣ်အါအဃိ ယံာ်ထီၣ်ယံာ်ထီၣ် ဒီးပှၤသးပ့ၤနီၣ်ကွံာ်အဝဲသ့ၣ်န့ၣ်လီၤ. လၢတၢ်န့ၣ်အဃိ အနံၣ်မ့ၢ်ယံာ်ထဲလဲၣ် သနာ်က့ ဟံးန့ၢ်တၢ်ဆၢကတီၢ်လၢ နကဆဲးကျိးဒီးအဝဲသ့ၣ်တက့ၢ်. * ပှၤသူၣ်အုးသးအုးအါဂၤ စံးဘျုးစံးဖှိၣ်ဝဲ ပှၤလၢအဆဲးကျိးဒီးအီၤတဖၣ် မ့ၢ်လၢအဝဲသ့ၣ် အတၢ်သူၣ်အုးသးအုး ကိညၢ်ထီၣ်က့ၤဝဲအဃိန့ၣ်လီၤ.

ဆိကမိၣ်ကွၢ် ခါအိၣ်ရံၣ် အတၢ်လဲၤခီဖျိတက့ၢ်. မ့ၢ်လၢအမိၢ်သံဝံၤ အလီၢ်ခံ ယံာ်ဝဲ ၁၅ လါန့ၣ်အနီသံကဒီးအဃိ အဝဲသူၣ်အုးသးအုးဒိၣ်မးန့ၣ်လီၤ. အဝဲဒိးန့ၢ်ဘၣ် တၢ်မၤစၢၤလၢ အတံၤသကိးတဖၣ်အအိၣ်န့ၣ်လီၤ. အသကိးအကျါတဂၤလၢ အမံၤမ့ၢ် ရံၤစူၢ်ကိၣ်န့ၣ် အညါပှၢ်န့ၢ်အီၤအါနံၣ် ဘၣ်ဆၣ် အတၢ်မၤစၢၤအီၤအါကတၢၢ်လီၤ. ခါအိၣ်ရံၣ် စံးဝဲလၢ “ယမ့ၢ်တဲတီတီန့ၣ် ယသးတမုာ်ဒိၣ်ဒိၣ်ဘၣ်. ယတအဲၣ်ဒိးလၢ ပှၤကဟဲနုာ်လီၤဆူ ယမိၢ်အလီၢ်နီတဂၤဘၣ်. ယဆိကမိၣ် ပှၤကဂ့ၤဒ် ယမိၢ် တအိၣ်နီတဂၤဘၣ်.” ဘၣ်ဆၣ် ရံၤစူၢ်ကိၣ် အတၢ်ပာ်သူၣ်ပာ်သး ဂ့ၤဝဲလၢယဖီခိၣ်အဃိ ယရ့အီၤဘူးဘူးတံၢ်တံၢ်လီၤ. ကိးနွံဒဲး ပလဲၤစံၣ်တဲၤတဲလီၤတၢ် ဒီးပလဲၤထီၣ် တၢ်အိၣ်ဖှိၣ်ရိဖှိၣ် ဒ်သိးသိးလီၤ. အဝဲကွဲယၤ ဒ်သိးယကလဲၤအီထံချီဒီးအီၤ, ဟဲစိာ်န့ၢ်ယၤ တၢ်အီၣ်တၢ်အီ ဒီးကွဲးန့ၢ်ယၤလံာ်ပရၢအါမးလီၤ. ရံၤစူၢ်ကိၣ် အတၢ်ပာ်သူၣ်ပာ်သး ဂ့ၤလၢယဖီခိၣ်အဃိ ကဲထီၣ်တၢ်မၤစၢၤလၢ ယဂီၢ်ဒိၣ်မးလီၤ.”

ခါအိၣ်ရံၣ် အမိၢ်သံအိၣ်ဝဲ ၁၂ နံၣ်လံ ဒီးခဲအံၤအဝဲဒီးအဝၤ မ့ၢ်ပှၤစံၣ်တဲၤတဲလီၤတၢ်ဖိလၢ ဆၢကတီၢ်လၢပှဲၤန့ၣ်လီၤ. ခါအိၣ်ရံၣ်စံးဝဲလၢ “ရံၤစူၢ်ကိၣ် ပာ်ဖျါထီၣ်အတၢ်အဲၣ် ဒီးအတၢ်သူၣ်ကိၢ်သးဂီၢ်လၢ ယဖီခိၣ်ဒံးလီၤ. ဖဲယက့ၤဟးဆူယဟံၣ်အခါ ယလဲၤဟးအိၣ်သကိးအီၤထီဘိ ဒီးယရ့ဒီးအီၤမုာ်ဒိၣ်မးလီၤ.”

ဖိၣ်လံၤ မ့ၢ်စ့ၢ်ကီးပှၤတဂၤလၢ အဒိးန့ၢ်ဘၣ်တၢ်အဘျုး ခီဖျိလၢတၢ်ဆီၣ်ထွဲမၤစၢၤအဃိန့ၣ်လီၤ. အဝဲမ့ၢ် ယဟိဝၤပှၤအုၣ်အသးတဂၤ ဒီးအိၣ်လၢ စဲဖရဲးလီၤ. ဖိၣ်လံၤအဝၤ စိစိၣ်စ်န့ၣ် မ့ၢ်ပှၤလၢအသးဂ့ၤတဂၤလီၤ. အဝဲမ့ၢ်တၢ်အိၣ်ဖှိၣ်သးပှၢ် လၢအဒိဂ့ၤတဲာ်ဘၣ် ဒီးအါတက့ၢ် ကွဲမုာ်ဝဲမုၣ်ကမဲ ဒီးဖိၣ်ဃဲလၢအဟံၣ် ဒ်သိးကဟဲအီၣ်သကိးတၢ်ဒီး ရ့ဒီးအီၤအဂီၢ်န့ၣ်လီၤ. (ယၤကိာ် ၁:၂၇) လီၤသးအုးဒိၣ်မးလၢ ဖဲစိစိၣ်စ် အသးအိၣ် ၅၃ နံၣ်အခါန့ၣ် ဘၣ်သံလၢခိၣ်နူာ်ခဲစၢၣ်တၢ်ဆါအဃိန့ၣ်လီၤ. ဖိၣ်လံၤစံးဝဲ– “ယဝၤလၢယအိၣ်ဘၣ်တ့ၢ်ဒီးအီၤ ၃၃ နံၣ်တဂၤ ယဘၣ်ပျဲလီၤမၢ်ကွံာ်အီၤလၢ တၢ်သံအပူၤန့ၣ်လီၤ.”

ပှၤခူၣ်လီၤ ဖိၣ်လံၤအဝၤဝံၤအလီၢ်ခံ အဝဲဒီးအဖိသဒါ ဒဲနယၢၣ် လၢအသးအိၣ် ၁၅ နံၣ်တဂၤန့ၣ် လဲၤသုးအသးဆူ ကီၢ်ခဲနဒၣ်လီၤ. အဝဲသ့ၣ်လဲၤတုၤဖဲန့ၣ်ဒီး ရ့လိာ်ဘၣ်အသးဒီး ယဟိဝၤပှၤအုၣ်အသး အတၢ်အိၣ်ဖှိၣ်န့ၣ်လီၤ. ဖိၣ်လံၤစံးဝဲလၢ– “ယတံၤသကိးလၢ တၢ်အိၣ်ဖှိၣ်အသီအံၤအပူၤန့ၣ် တသ့ၣ်ညါယတၢ်အိၣ်သး ဒီးယတၢ်ကီတၢ်ခဲ လၢညါတဖၣ်ဘၣ်. ဘၣ်ဆၣ် အဝဲသ့ၣ်ဟဲဟးဆူပအိၣ်, မၤမုာ်ပသးလၢ အတၢ်ကတိၤတဖၣ် ဒီးမၤစၢၤပှၤလၢ ပတၢ်လိၣ်ဘၣ်တဖၣ်န့ၣ်လီၤ. လီၤဆီဒၣ်တၢ် ဖဲတၢ်ဆၢကတီၢ်လၢ ယဖိခွါလိၣ်ဘၣ်အပၢ် အတၢ်အဲၣ်တၢ်ကဟုကယာ်အခါ အဝဲသ့ၣ်အတၢ်မၤစၢၤအံၤ ကဲဘျုးဒိၣ်မးလီၤ. တကးဒံးဘၣ် ပှၤလၢအတီခိၣ်ရိၣ်မဲလၢ တၢ်အိၣ်ဖှိၣ်ပူၤတဖၣ် ပာ်ဖျါထီၣ်အတၢ်အဲၣ်လၢ ယဖိခွါအဖီခိၣ် န့ၣ်လီၤ. လီၤဆီဒၣ်တၢ်ဖဲ အဝဲသ့ၣ်ဟးလိာ်ကွဲ ဒီးလိာ်ကွဲဖျၢၣ်ထူအခါ ကိးဃုာ်ဝဲယဖိခွါန့ၣ်လီၤ.” အခဲအံၤ ဒီပုၢ်ဝဲၢ်မုၣ်ဖိၣ်လံၤ ဒီးအဖိခွါခံဂၤလၢာ် အိၣ်ဒီးတၢ်သူၣ်ခုသးခုလီၤ.

ဒ်သိးပကမၤစၢၤ ပှၤလၢအသူၣ်အုးသးအုးတဖၣ်အဂီၢ် ကျဲအိၣ်ဝဲအါမံၤလီၤ. တကးဒံးဘၣ် လံာ်စီဆှံစ့ၢ်ကီး မၤမုာ်ထီၣ်က့ၤပသး ခီဖျိလၢအပာ်ဖျါထီၣ်ဝဲ တၢ်မုၢ်လၢ်လၢ ပကထံၣ်လိာ်ဘၣ်က့ၤပသးဒီး ပှၤလၢအသံတ့ၢ်တဖၣ်အဃိလီၤ.