“ပာ်ဆူၣ်နသး ဒီးတံးတဟီၣ်တက့ၢ်. ဒီးမၤတၢ်တက့ၢ်”
“ပာ်ဆူၣ်နသးဒီးတံးတဟီၣ်တက့ၢ်. ဒီးမၤတၢ်တက့ၢ်. ပျံၤတၢ်တဂ့ၤ. ဘၣ်ယိၣ်တၢ်တဂ့ၤ. အဂ့ၢ်ဒ်အံၤ, ကစၢ်ယွၤ . . . ကအိၣ်ဒီးနၤလီၤ.” —၁ ကွဲးနီၣ်တၢ် ၂၈:၂၀.
၁, ၂. (က) စီၤၡလိၤမိၤ ဒိးန့ၢ်ဘၣ်မူဒါလၢ အရ့ဒိၣ်မနုၤလဲၣ်. (ခ) ဘၣ်မနုၤအဃိ စီၤဒၤဝံးအသးကိၢ်တၢ်လၢ အဖိခွါစီၤၡလိၤမိၤအဂီၢ်လဲၣ်.
စီၤၡလိၤမိၤ ဒိးန့ၢ်ဘၣ်ဝဲ မူဒါလၢ အရ့ဒိၣ်တခါလီၤ. ယဟိဝၤယွၤဃုထၢထီၣ်အီၤလၢ ကသူၣ်ထီၣ်ဘှီထီၣ် တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ. ဒီးမ့ၢ်ဝဲတၢ်သူၣ်ထီၣ်ဘှီထီၣ်လၢ အရ့ဒိၣ်ကတၢၢ်တခါလီၤ. တၢ်လုၢ်ဟံၣ်အံၤ ကဘၣ်အိၣ်ဒီး “အလၤအကပီၤအဒိၣ်အထီ” လီၤ. တကးဒံးဘၣ်တၢ်သူၣ်ထီၣ်အံၤကကဲထီၣ်ဝဲ “ကစၢ်ယွၤအဟံၣ်” န့ၣ်လီၤ.—၁ ကွဲးနီၣ်တၢ် ၂၂:၁, ၅, ၉-၁၁.
၂ စီၤဒၤဝံးနာ်ဝဲ လၢယွၤကမၤစၢၤ အဖိခွါစီၤၡလိၤမိၤလီၤ. ဘၣ်ဆၣ် စီၤၡလိၤမိၤန့ၣ် “အသးစၢ်ဒံး, ဒီးအတၢ်လဲၤခီဖျိစှၤဒံး” လီၤ. မ့ၢ်အဝဲကအိၣ်ဒီး တၢ်သူၣ်ဒူသးဒူလၢ ကတူၢ်လိာ်မူဒါအံၤအဂီၢ်ဧါ. မ့ၢ်လၢအသးစၢ် ဒီးအတၢ်လဲၤခီဖျိစှၤဝဲအဃိ မ့ၢ်အဝဲသူၣ်ထီၣ်ယွၤအတၢ်လုၢ်ဟံၣ် ဘၣ်ကန့ၢ်ဧါ. ဒ်သိးအတၢ်မၤ ကကဲထီၣ်လိၣ်ထီၣ်အဂီၢ် စီၤၡလိၤမိၤ လိၣ်ဘၣ်တၢ်သူၣ်ဒူသးဒူ ဒီးကဘၣ်မၤတၢ်လီၤ.
၃. စီၤၡလိၤမိၤ မၤလိန့ၢ်ဘၣ်ဝဲ တၢ်သူၣ်ဒူသးဒူလၢ အပၢ်အအိၣ်လၢ ကျဲဒ်လဲၣ်.
၃ ဘၣ်ဃးဒီး တၢ်သူၣ်ဒူသးဒူန့ၣ် စီၤၡလိၤမိၤ ကဒိးန့ၢ်ဘၣ်တၢ်မၤလိလၢ အပၢ်စီၤဒၤဝံးအအိၣ်အါမးလီၤ. ဖဲစီၤဒၤဝံးအသးစၢ်ဒံးအခါ အဝဲမၤသံဝဲ ဆၣ်ဖိကီၢ်ဖိလၢ အဒူအကိၤလၢ ကဟဲအီၣ်အပၢ်အသိဖိန့ၣ်လီၤ. (၁ ၡမူၤအ့လး ၁၇:၃၄, ၃၅) ဒီးအဝဲပာ်ဖျါထီၣ် တၢ်သူၣ်ဒူသးဒူ ဖဲအဝဲလဲၤဒုးဝဲသုးခိၣ်လၢ အလီၤပျံၤလီၤဖုး စီၤကၤလယးန့ၣ်လီၤ. ဒီးမ့ၢ်လၢ ကစၢ်ယွၤအတၢ်မၤစၢၤအဃိ အဝဲမၤနၢၤဝဲ စီၤကၤလယးလၢ လၢၢ်ဖိတဖျၢၣ်န့ၣ်လီၤ.—၁ ၡမူၤအ့လး ၁၇:၄၅, ၄၉, ၅၀.
၄. ဘၣ်မနုၤအဃိ စီၤၡလိၤမိၤ လိၣ်ဘၣ်ဝဲ တၢ်သူၣ်ဒူသးဒူလဲၣ်.
၄ လၢတၢ်န့ၣ်အဃိ စီၤဒၤဝံး မ့ၢ်ပှၤအဂ့ၤကတၢၢ်တဂၤလၢ ကဟ့ၣ်ဂံၢ်ဟ့ၣ်ဘါ စီၤၡလိၤမိၤလၢ ကအိၣ်ဒီးတၢ်သူၣ်ဒူသးဒူ ဒီးကသူၣ်ထီၣ်ဘှီထီၣ် တၢ်လုၢ်ဟံၣ်န့ၣ်လီၤ. (ဖး ၁ ကွဲးနီၣ်တၢ် ၂၈:၂၀ တက့ၢ်.) စီၤၡလိၤမိၤ မ့ၢ်တအိၣ်ဒီး တၢ်သူၣ်ဒူသးဒူန့ၣ် အဝဲကပျံၤတၢ် ဒီးတအဲၣ်ဒိးသူၣ်ထီၣ်ဘှီထီၣ်တၢ်လၢၤဘၣ်. အဝဲမ့ၢ်မၤဝဲ ဒ်န့ၣ်န့ၣ် ကနးဒိၣ်န့ၢ်ဒံး အဝဲမၤဝဲဘၣ်ဆၣ် တကဲထီၣ်ဘၣ်န့ၣ်လီၤ.
ဒ်သိးပကအိၣ်ဒီး တၢ်သးဒူဒီး ပမၤတၢ်မၤလၢ ယဟိဝၤယွၤမၢ ပမၤအီၤတဖၣ် ကန့ၢ်အဂီၢ် ပလိၣ်ဘၣ်ယဟိဝၤယွၤအတၢ်မၤစၢၤလီၤ
၅. ဘၣ်မနုၤအဃိ ပလိၣ်ဘၣ်တၢ်သူၣ်ဒူသးဒူလဲၣ်.
၅ ဒ်သိးပမၤတၢ်မၤလၢ ယဟိဝၤယွၤမၢပမၤအီၤတဖၣ် ကန့ၢ်အဂီၢ် ပလိၣ်ဘၣ်ယဟိဝၤယွၤအတၢ်မၤစၢၤဒီး တၢ်သူၣ်ဒူသးဒူဒ်စီၤၡလိၤမိၤအသိးလီၤ. ခဲအံၤပကမၤလိသကိး ယွၤအခ့အပှၤလၢညါလၢ အအိၣ်ဒီးတၢ်သးဒူ တနီၤအဒိအတဲာ်လီၤ. ဝံၤဒီးပကဆိကမိၣ်ထံ ဘၣ်ဃးပဝဲစ့ၢ်ကီး ပပာ်ဖျါထီၣ် တၢ်သူၣ်ဒူသးဒူဒီး မၤဝံၤပမူဒါကသ့ဒ်လဲၣ်န့ၣ်လီၤ.
တၢ်အဒိလၢဘၣ်ဃး ဒီးတၢ်သူၣ်ဒူသးဒူ
၆. စီၤယိၤသးအတၢ်သူၣ်ဒူသးဒူန့ၣ် ထုးန့ၢ်နသးဒ်လဲၣ်.
၆ ဖဲစီၤပိၤတံၤဖၢ်အမါ လ့ပစီစီၤယိၤသးလၢ ကမံဃုာ်ဒီးအီၤအခါ စီၤယိၤသးပာ်ဖျါထီၣ် တၢ်သူၣ်ဒူသးဒူလီၤ. အဝဲသ့ၣ်ညါဝဲလၢ မ့ၢ်ဂ့ၢ်လိာ်ကွံာ်ဝဲ စီၤပိၤတံၤဖၢ်အမါန့ၣ် တၢ်ဘၣ်ယိၣ်အိၣ်ဝဲလၢ အသးသမူအဂီၢ်သ့ဝဲလီၤ. ဘၣ်ဆၣ် အဝဲတဟ့ၣ်ၡူဝဲဘၣ်, လၢတၢ်န့ၣ်အလီၢ် အဝဲပာ်ဖျါထီၣ် တၢ်သူၣ်ဒူသးဒူ ဒီးဂ့ၢ်လိာ်ကွံာ်ဝဲ တဘျီဃီလီၤ.—၁ မိၤၡ့ ၃၉:၁၀, ၁၂.
၇. နီၢ်ရၤဃး ပာ်ဖျါထီၣ်တၢ်သူၣ်ဒူသးဒူဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၇ နီၢ်ရၤဃး မ့ၢ်စ့ၢ်ကီး ပှၤလၢအိၣ်ဒီးတၢ်သူၣ်ဒူသးဒူတဂၤလီၤ. ဖဲပှၤအံၣ်စရ့လးဖိ အပှၤကွၢ်ဟုၣ်တၢ် ဟဲကွၢ်ဟုၣ်ဝဲ ဝ့ၢ်ယရံၤဃိအခါ အဝဲမ့ၢ်ပျံၤတၢ်ဒီး မ့ၢ်တအဲၣ်ဒိးမၤစၢၤအဝဲသ့ၣ်ဘၣ်န့ၣ် မၤဝဲသ့လီၤ. ဘၣ်ဆၣ် မ့ၢ်လၢအဝဲနာ်ယဟိဝၤယွၤအဃိ လၢတၢ်သူၣ်ဒူသးဒူအပူၤ အဝဲပာ်ခူသူၣ် ဝဲပိာ်ခွါခံဂၤအံၤဒီး မၤစၢၤဝဲဒ်သိး အဝဲသ့ၣ်ကဃ့ၢ်ပူၤဖျဲးအသးအဂီၢ်လီၤ. (ယိၤၡူ ၂:၄, ၅, ၉, ၁၂-၁၆) နီၢ်ရၤဃး နာ်ဝဲလၢ ယဟိၤဝၤယွၤ မ့ၢ်ယွၤလၢအအမ့ၢ်အတီ ဒီးနာ်စ့ၢ်ကီးဝဲလၢ ယဟိဝၤယွၤကဟ့ၣ်လီၤ ထံကီၢ်အံၤလၢ ပှၤအံၣ်စရ့လးဖိ အစုပူၤလီၤ. အဝဲတပျဲဝဲလၢ တၢ်ပျံၤပှၤဂၤ ဒီးတၢ်ပျံၤယရံၤဃိအစီၤပၤ ဒီးအပှၤတဖၣ် ကမၤလီၤစှၤ အတၢ်သူၣ်ဒူသးဒူဘၣ်. မ့ၢ်လၢအဝဲအိၣ်ဒီး တၢ်သူၣ်ဒူသးဒူအဃိ အနီၢ်ကစၢ်ဒီး အဟံၣ်ဖိဃီဖိပူၤဖျဲးဝဲလီၤ.—ယိၤၡူ ၆:၂၂, ၂၃.
၈. ယ့ၣ်ၡူးအတၢ်သူၣ်ဒူသးဒူန့ၣ် ကဲဘျုးလၢအတၢ်မၢဖိတဖၣ်အဂီၢ်ဒ်လဲၣ်.
၈ ယ့ၣ်ၡူးအတၢ်မၢဖိတဖၣ်စ့ၢ်ကီး အိၣ်ဒီးတၢ်သူၣ်ဒူသးဒူလီၤ. မ့ၢ်လၢအဝဲသ့ၣ်ထံၣ်ဘၣ်ဝဲ ယ့ၣ်ၡူးအတၢ်သူၣ်ဒူသးဒူအဃိ မၤစၢၤအဝဲသ့ၣ်ဒ်သိး ကအိၣ်ဒီးတၢ်သူၣ်ဒူသးဒူအဂီၢ်လီၤ. (မးသဲ ၈:၂၈-၃၂; ယိၤဟၣ် ၂:၁၃-၁၇; ၁၈:၃-၅) ပှၤစးဒူၤကဲဖိတဖၣ် ဂုာ်ကျဲးစၢး မၤပတုာ်အဝဲသ့ၣ် ဒ်သိးအသုတသိၣ်လိ ယ့ၣ်ၡူးအဂ့ၢ်တဂ့ၤသနာ်က့ တၢ်မၢဖိတဖၣ်တအိၣ်ပတုာ်ဝဲဘၣ်.—မၤတၢ် ၅:၁၇, ၁၈, ၂၇-၂၉.
၉. ဒ်သိး ၂ တံၤမသ့း ၁:၇ ပာ်ဖျါထီၣ်ဝဲအသိး တၢ်သူၣ်ဒူသးဒူန့ၣ် ဟဲဖဲလဲၣ်.
၉ စီၤယိၤသး, နီၢ်ရၤဃး, ယ့ၣ်ၡူး ဒီးတၢ်မၢဖိတဖၣ်န့ၣ် အဝဲသ့ၣ်ပာ်လီၤအသးလၢ ကမၤတၢ်လၢအဘၣ်လီၤ. အဝဲသ့ၣ်အိၣ်ဒီးတၢ်သူၣ်ဒူသးဒူန့ၣ် တမ့ၢ်လၢအနာ်န့ၢ်လီၤအသးအဃိဘၣ်. မ့ၢ်လၢအဝဲသ့ၣ် သန့ၤအသးလၢ ယဟိဝၤယွၤအဃိလီၤ. ပဝဲသ့ၣ်တဖၣ်စ့ၢ်ကီး ပမ့ၢ်လိၣ်ဘၣ် တၢ်သူၣ်ဒူသးဒူန့ၣ် ပကဘၣ်သန့ၤပသးလၢ ယဟိဝၤယွၤလီၤ. ပတဘၣ်သန့ၤပသးလၢ ပနီၢ်ကစၢ်အဂံၢ်အဘါဘၣ်. (ဖး ၂ တံၤမသ့း ၁:၇ တက့ၢ်.) ခဲအံၤပကတဲသကိး ဘၣ်ဃးဒီး ပလိၣ်ဘၣ်တၢ်သူၣ်ဒူသးဒူလၢ ပဟံၣ်ပူၤဃီပူၤ ဒီးတၢ်အိၣ်ဖှိၣ်အပူၤန့ၣ်လီၤ.
တၢ်အိၣ်သးဖဲ ပလိၣ်ဘၣ်တၢ်သူၣ်ဒူသးဒူ
၁၀. ဘၣ်မနုၤအဃိ ခရံာ်ဖိသးစၢ်တဖၣ် ကဘၣ်အိၣ်ဒီးတၢ်သူၣ်ဒူသးဒူလဲၣ်.
၁၀ ဒ်သိးခရံာ်ဖိသးစၢ်သ့ၣ်တဖၣ် ကမၤယဟိဝၤယွၤ အတၢ်မၤအဂီၢ်လိၣ်ဘၣ်ဝဲ တၢ်သူၣ်ဒူသးဒူလၢကျဲအါဘိလီၤ. စီၤၡလိၤမိၤန့ၣ် ပာ်ဖျါထီၣ် တၢ်သူၣ်ဒူသးဒူ ခီဖျိဆၢတဲာ်ဝဲလၢ ကသူၣ်ထီၣ်တၢ်လုၢ်ဟံၣ်တုၤအဝံၤတစုလီၤ. သးစၢ်သ့ၣ်တဖၣ် ဟံးန့ၢ်တၢ်မၤလိလၢ စီၤၡလိၤမိၤအအိၣ်သ့ဝဲလီၤ. မိၢ်ပၢ်သ့ၣ်တဖၣ်န့ၣ် ကဘၣ်ဟံးစုနဲၣ်ကျဲဝဲ ပှၤသးစၢ်သ့ၣ်တဖၣ် သနာ်က့ သးစၢ်တဖၣ်န့ၣ် ကဘၣ်မၤတၢ်ဆၢတဲာ် အရ့ဒိၣ်လၢအနီၢ်ကစၢ်ဒၣ်ဝဲလီၤ. (ကတိၤဒိ ၂၇:၁၁) လၢတၢ်န့ၣ်အဃိ အဝဲသ့ၣ်လိၣ်ဘၣ် တၢ်သူၣ်ဒူသးဒူ ဖဲကမၤတၢ်ဆၢတဲာ်လၢအဘၣ်ဃး ဒီးတၢ်ဃုထၢ တံၤသကိးလၢအဂ့ၤ, တၢ်ဂီၤမူ, တၢ်သးဝံၣ်, ကအိၣ်ဒီးတၢ်သကဲာ်ပဝးလၢအဂ့ၤ ဒီးကဒိးဘျၢထံအခါဖဲလဲၣ်န့ၣ်လီၤ. အဝဲသ့ၣ်လိၣ်ဘၣ် တၢ်သူၣ်ဒူသးဒူ မ့ၢ်လၢအဝဲသ့ၣ်ထီဒါဝဲ မုၣ်ကီၤလံၢ်အဃိလီၤ.
၁၁, ၁၂. (က) စီၤမိၤၡ့ပာ်ဖျါထီၣ် တၢ်သူၣ်ဒူသးဒူဒ်လဲၣ်. (ခ) သးစၢ်သ့ၣ်တဖၣ်ကွၢ်လိမၤဒိး စီၤမိၤၡ့ကသ့ဒ်လဲၣ်.
၁၁ သးစၢ်တဖၣ် ကဘၣ်ပာ်လီၤအဖီတၢၣ်ဒ်လဲၣ်န့ၣ် မ့ၢ်တၢ်ဆၢတဲာ်အရ့ဒိၣ်တခါလၢ အဝဲသ့ၣ်အဂီၢ်လီၤ. လၢထံကီၢ်တနီၤန့ၣ် သးစၢ်တဖၣ်ဘၣ်တၢ်ဆီၣ်သနံးအီၤလၢ ကဃုတၢ်ကူၣ်ဘၣ်ကူၣ်သ့လၢ အပတီၢ်ထီဒီး ကဃုတၢ်မၤလၢ ကန့ၢ်စ့အါအါအဂီၢ်လီၤ. ဒီးလၢထံကီၢ်တနီၤနီၤန့ၣ် မ့ၢ်လၢ မုၢ်ကျိၤဝဲၤကွာ် (စံပွါယ့) တဘၣ်လီၢ်ဘၣ်စးဘၣ်အဃိ သးစၢ်အါဂၤတူၢ်ဘၣ်ဝဲလၢ အဝဲသ့ၣ်ကဘၣ်မၤစၢၤအဟံၣ်ဖိဃီဖိန့ၣ် မ့ၢ်တၢ်လၢအရ့ဒိၣ်လီၤ. နမ့ၢ်ကွၢ်ဆၢၣ်မဲာ်ဘၣ် တၢ်အိၣ်သးဒ်အံၤန့ၣ် သ့ၣ်နီၣ်ထီၣ် စီၤမိၤၡ့အဒိအတဲာ်တက့ၢ်. စီၤမိၤၡ့န့ၣ် စီၤပၤဖၤရိၤအဖိမုၣ် ကွၢ်လုၢ်ဖိအီၤအဃိ အဝဲမ့ၢ်ပာ်လီၤဖီတၢၣ်လၢ ကကဲပှၤထူးပှၤတီၤ မ့တမ့ၢ် ပှၤလၢမံၤဟူသၣ်ဖျါန့ၣ် မၤဝဲသ့လီၤ. ဆိကမိၣ်ကွၢ် စီၤပၤဖၤရိၤ အဟံၣ်ဖိဃီဖိ, ပှၤလၢသိၣ်လိအီၤတဖၣ် ဒီးပှၤလၢအဟ့ၣ်ကူၣ်တၢ်တဖၣ် ကဆီၣ်သနံးအီၤထဲလဲၣ်န့ၣ်တက့ၢ်. ဘၣ်ဆၣ် စီၤမိၤၡ့န့ၣ် အိၣ်ဒီးတၢ်သူၣ်ဒူသးဒူဒီး ဃုထၢဝဲလၢကအိၣ်လၢယဟိဝၤယွၤ အပှၤဂီၢ်မုၢ်အအိၣ်တကပၤလီၤ. အဝဲပာ်တ့ၢ်ကွံာ် ကီၢ်အဲၤကူပတူး ဒီးအတၢ်ထူးတၢ်တီၤတဖၣ်ဝံၤအလီၢ်ခံ အဝဲပာ်ဂံၢ်ပာ်ဘါ ယဟိဝၤယွၤ လၢာ်လၢာ်ဆ့ဆ့လီၤ. (ဧ့ၤဘြံၤ ၁၁:၂၄-၂၆) ဒီးမ့ၢ်လၢ အဝဲမၤဝဲဒ်န့ၣ်အဃိ ယဟိဝၤယွၤဆိၣ်ဂ့ၤအီၤ ဒီးခါဆူညါစ့ၢ်ကီး ကဆိၣ်ဂ့ၤအီၤအါန့ၢ်အလီၢ်လီၤ.
၁၂ ပှၤသးစၢ်သ့ၣ်တဖၣ် မ့ၢ်ပာ်လီၤဖီတၢၣ်လၢ ကမၤယဟိဝၤယွၤအတၢ်မၤ ဒီးပာ်ဆိယွၤအဘီအမုၢ်လၢ နီၣ်ဂံၢ်တၢန့ၣ် ယဟိဝၤယွၤ ကဆိၣ်ဂ့ၤအီၤလီၤ. တကးဒံးဘၣ် ယဟိဝၤယွၤ ကမၤစၢၤစ့ၢ်ကီး အဟံၣ်ဖိဃီဖိတဖၣ် အတၢ်လိၣ်ဘၣ်န့ၣ်လီၤ. လၢတၢ်မၢဖိအစိၤန့ၣ် သးစၢ်တံၤမသ့း ပာ်ဝဲကစၢ်ယွၤအတၢ်မၤလၢ နီၣ်ဂံၢ်တၢဒီး နၤစ့ၢ်ကီးနမၤဒ်န့ၣ်သ့ဝဲလီၤ. * (ကွၢ်တၢ်ဂ့ၢ်အဘျဲၣ်တက့ၢ်.)—ဖး ဖံလံးပံၤ ၂:၁၉-၂၂ တက့ၢ်.
မ့ၢ်နပာ်လီၤနသး ဂၢၢ်ဂၢၢ်ကျၢၤကျၢၤလၢ နကအိၣ်ဒီးတၢ်သူၣ်ဒူသးဒူ လၢနတၢ်အိၣ်မူကိးသနၢၣ်ဒဲးအပူၤန့ၣ်ဧါ (ကွၢ်လံာ်အဆၢ ၁၃-၁၇)
၁၃. ဒ်သိးဒီပုၢ်ဝဲၢ်မုၣ်သးစၢ်တဂၤအံၤ ကတုၤလၢအဖီတၢၣ်အဂီၢ် တၢ်သူၣ်ဒူသးဒူမၤစၢၤအီၤဒ်လဲၣ်.
၁၃ ဒီပုၢ်ဝဲၢ်မုၣ်လၢအအိၣ်လၢ အဲၤလၢၤဘဲမၤ, အမဲရကၣ် တဂၤဒ်သိး ကပာ်လီၤဖီတၢၣ်လၢ ကမၤကစၢ်ယွၤအတၢ်မၤအဂီၢ် အဝဲလိၣ်ဘၣ်ဝဲ တၢ်သူၣ်ဒူသးဒူလီၤ. အဝဲတဲဝဲ– “ဖဲယဒိၣ်ထီၣ်သီအခါ ယမ့ၢ်ပှၤလၢအမဲာ်ဆှးသ့. ယကလဲၤဒိတကျိာ် ပှၤဂၤအပဲတြီန့ၣ်တဲတဂ့ၤ ယတဲတၢ်ဒီးပှၤဂၤလၢ တၢ်အိၣ်ဖှိၣ်အပူၤမးတဘူၣ်ဘၣ်.” ဘၣ်ဆၣ် မ့ၢ်လၢအမိၢ်အပၢ် ဒီးဒီပုၢ်ဝဲၢ်လၢ တၢ်အိၣ်ဖှိၣ်ပူၤတဖၣ် မၤစၢၤအီၤအဃိ ဒီပုၢ်ဝဲၢ်မုၣ်သးစၢ်တဂၤအံၤ မၤလၢပှဲၤဝဲအဖီတၢၣ်လၢ ကကဲထီၣ်ပှၤလဲၤလၢညါလီၤ. ဒီးအဝဲတဲဝဲလၢ– “ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ဟ့ၣ်သဆၣ်ထီၣ်ပှၤလၢ ကပာ်လီၤဖီတၢၣ်လၢပကဃု တၢ်ကူၣ်ဘၣ်ကူၣ်သ့, တၢ်မံၤဟူသၣ်ဖျါ, ကျိၣ်စ့ဒီး တၢ်ထူးတၢ်တီၤအါအါဂီၢ်ဂီၢ်လီၤ.” ဘၣ်ဆၣ် ဒီပုၢ်ဝဲၢ်မုၣ်အံၤ သ့ၣ်ညါဝဲလၢပှၤအါတက့ၢ်န့ၣ် မၤလၢပှဲၤဝဲအဖီတၢၣ်တဖၣ်အံၤ တန့ၢ်ဘၣ်အမဲာ်ညါ အဝဲသ့ၣ်ထံၣ်ဘၣ်တၢ်သူၣ်ကိၢ်သးဂီၤဒီး တၢ်သူၣ်အုးသးအုးလီၤ. ဒီးအဝဲတဲကဒီးဝဲလၢ– “တၢ်မၤယဟိဝၤယွၤအတၢ်မၤန့ၣ် ဟ့ၣ်ယၤတၢ်သူၣ်မံသးမုာ် ဒီးယတူၢ်ဘၣ်လၢ ယမၤတၢ်ကဲထီၣ်လိၣ်ထီၣ်လီၤ.”
၁၄. ခရံာ်ဖိမိၢ်ပၢ်တဖၣ် လိၣ်ဘၣ်တၢ်သူၣ်ဒူသးဒူအခါဖဲလဲၣ်.
၁၄ ခရံာ်ဖိမိၢ်ပၢ်တဖၣ် လိၣ်ဘၣ်ဝဲတၢ်သူၣ်ဒူသးဒူစ့ၢ်ကီးလီၤ. အဒိ, ဘၣ်သ့ၣ်သ့ၣ် နတၢ်မၤခိၣ်ကမၢနၤတလီၢ်လီၢ် ဒ်သိးနကမၤအါထီၣ်တၢ်မၤ ဖဲမုၢ်နံၤလၢနကဘၣ်မၤ ဟံၣ်ဖိဃီဖိတၢ်မၤလိလံာ်စီဆှံ, လဲၤစံၣ်တဲၤတဲလီၤတၢ် မ့တမ့ၢ် ဘၣ်ထီၣ်တၢ်အိၣ်ဖှိၣ်အနံၤန့ၣ်လီၤ. ဖဲန့ၣ်အခါ နကတဲဘၣ်နတၢ်မၤခိၣ်လၢ နတမၤဘၣ် ဒီးနကပာ်ဖျါထီၣ် ဒိဂ့ၤတဲာ်ဘၣ်လၢ နဖိတဖၣ်အဂီၢ် နကလိၣ်ဘၣ် တၢ်သူၣ်ဒူသးဒူလီၤ. လၢတၢ်အိၣ်ဖှိၣ်အပူၤ မိၢ်ပၢ်တနီၤနီၤန့ၣ် ကပျဲဝဲလၢအဖိသ့ၣ်တဖၣ် ကမၤတၢ်လၢ နတအဲၣ်ဒိးလၢ နဖိတဖၣ်ကမၤဝဲဘၣ်. မိၢ်ပၢ်တဖၣ် မ့ၢ်သံကွၢ်နၤလၢ ဘၣ်မနုၤအဃိ နတပျဲလၢ နဖိကမၤဒ်အံၤလဲၣ်. ဖဲန့ၣ်အခါ ဒ်သိးနတဲနၢ်ပၢၢ်အဝဲသ့ၣ်လၢ တၢ်ယူးယီၣ်ပာ်ကဲပူၤကသ့အဂီၢ် မ့ၢ်နအိၣ်ဒီးတၢ်သူၣ်ဒူသးဒူဧါ.
၁၅. စံးထီၣ်ပတြၢၤ ၃၇:၂၅ ဒီး ဧ့ၤဘြံၤ ၁၃:၅ န့ၣ်မၤစၢၤမိၢ်ပၢ်တဖၣ်ဒ်လဲၣ်.
၁၅ ပဖိတဖၣ် ကပာ်လီၤဖီတၢၣ်လၢ ကမၤယွၤအတၢ်မၤ ဒီးကတုၤလၢအဖီတၢၣ်အဂီၢ် မိၢ်ပၢ်တဖၣ် လိၣ်ဘၣ်ဝဲတၢ်သူၣ်ဒူသးဒူ ဒ်သိးကမၤစၢၤအဝဲသ့ၣ်အဂီၢ်လီၤ. အဒိ, မိၢ်ပၢ်တနီၤန့ၣ် တဆီၣ်ထွဲအဖိတဖၣ်လၢ ကမၤပှၤလဲၤလၢညါ, လဲၤမၤစၢၤတၢ်လၢတၢ်လီၢ်လၢအလိၣ်ဘၣ် ပှၤစံၣ်တဲၤတဲလီၤတၢ်ဖိ, မၤတၢ်မၤလၢဘ့ၤသ့လး မ့တမ့ၢ် လဲၤမၤစၢၤတၢ်လၢ တၢ်သူၣ်ထီၣ်ဘှီထီၣ် ဘီမုၢ်ဘျီၣ်ဒိၣ် ဒီးကဝီၤတၢ်အိၣ်ဖှိၣ်အလီၢ် မ့ၢ်လၢ အဝဲသ့ၣ်ဘၣ်ယိၣ်ဝဲလၢ အသးမ့ၢ်ပှၢ်ထီၣ်န့ၣ် ပှၤကကွၢ်ထွဲအီၤတအိၣ်ဘၣ်အဃိလီၤ. ဘၣ်ဆၣ် မိၢ်ပၢ်လၢ အိၣ်ဒီးတၢ်ကူၣ်သ့န့ၣ် အဝဲသ့ၣ်အိၣ်ဒီးတၢ်သူၣ်ဒူသးဒူ ဒီးနာ်ဝဲလၢ ယဟိဝၤယွၤကတီဒီး အတၢ်အၢၣ်လီၤန့ၣ်လီၤ. (ဖး စံးထီၣ်ပတြၢၤ ၃၇:၂၅; ဧ့ၤဘြံၤ ၁၃:၅ တက့ၢ်.) မိၢ်ပၢ်မ့ၢ် အိၣ်ဒီးတၢ်သူၣ်ဒူသးဒူ ဒီးသန့ၤအသးလၢ ယဟိဝၤယွၤန့ၣ် ကကဲထီၣ်တၢ်မၤစၢၤလၢအဖိသ့ၣ်တဖၣ် ကမၤဝဲဒ်န့ၣ်အသိးစ့ၢ်ကီးလီၤ.—၁ ၡမူၤအ့လး ၁:၂၇, ၂၈; ၂ တံၤမသ့း ၃:၁၄, ၁၅.
၁၆. မိၢ်ပၢ်တနီၤန့ၣ် ဒ်သိးအဖိတဖၣ် ကပာ်လီၤဖီတၢၣ်လၢ ကမၤကစၢ်ယွၤအတၢ်မၤအဂီၢ် အဝဲသ့ၣ်မၤစၢၤဝဲဒ်လဲၣ်. ဒီးအဝဲသ့ၣ် မၤဝဲဒ်န့ၣ်အဃိ ကဲဘျုးလၢအဖိတဖၣ်အဂီၢ်ဒ်လဲၣ်.
၁၆ ပှၤနီၢ်ဒီမါဝၤခံဂၤ လၢအအိၣ်လၢကီၢ်အမဲရကၤန့ၣ် မၤစၢၤဝဲအဖိတဖၣ် ဒ်သိးကပာ်ဒိၣ် ယဟိဝၤယွၤ အတၢ်မၤလၢ အဝဲသ့ၣ်အတၢ်အိၣ်မူပူၤန့ၣ်လီၤ. အဝၤန့ၣ်တဲဝဲလၢ– “တချုးလၢ ပဖိသ့ၣ်တဖၣ် ဟးဒီးတဲတၢ်သ့ဒံးဘၣ်အခါဒၣ်လဲာ် ပတဲဘၣ်အဝဲသ့ၣ်ဘၣ်ဃး တၢ်မၤပှၤလဲၤလၢညါအတၢ်မၤဒီး တၢ်မၤတၢ်အိၣ်ဖှိၣ်တၢ်ဖံးတၢ်မၤန့ၣ် မ့ၢ်တၢ်လၢအမုာ်ဒိၣ်မးလီၤ. ဒီးခဲအံၤ အဝဲသ့ၣ်အိၣ်ဒီး ဖီတၢၣ်လၢ ကမၤပှၤလဲၤလၢညါလီၤ.” အဝဲတဲကဒီးဝဲလၢ မ့ၢ်လၢအဖိသ့ၣ်တဖၣ် ပာ်လီၤဖီတၢၣ်ဒီး မၤလၢပှဲၤထီၣ်အဖီတၢၣ်တဖၣ်အံၤအဃိ ကဲထီၣ်တၢ်မၤစၢၤလၢ အဝဲသ့ၣ်ကတြီဆၢဝဲမုၣ်ကီၤလံၢ် အတၢ်လ့ပစီတဖၣ် ဒီးပာ်ဒိၣ်ဝဲ ယဟိဝၤယွၤ အတၢ်မၤန့ၣ်လီၤ. ဒီပုၢ်ဝဲၢ်လၢ အဖိအိၣ်ခံဂၤန့ၣ် တဲဝဲလၢ– “မိၢ်ပၢ်အါတက့ၢ်န့ၣ် ထဲးဂံၢ်ထဲးဘါ ဒီးမၤစၢၤဝဲ အဖိသ့ၣ်တဖၣ် ဒ်သိးကတုၤလၢအဖီတၢၣ် လၢတၢ်လိာ်ကွဲ, တၢ်သူၣ်ဖှံသးညီ ဒီးတၢ်ကူၣ်ဘၣ်ကူၣ်သ့ တကပၤန့ၣ်လီၤ. ဘၣ်ဆၣ် မိၢ်ပၢ်တဖၣ် မ့ၢ်မၤစၢၤအဖိတဖၣ်လၢ ကပာ်လီၤဖီတၢၣ် ဒ်သိးကမၤစၢၤအဝဲသ့ၣ်လၢ အတၢ်ရ့လိာ်သးဒီးယဟိဝၤယွၤ ကဂ့ၤထီၣ်အဂီၢ်န့ၣ် မ့ၢ်တၢ်လၢအဂ့ၤကတၢၢ်လီၤ. ဖဲပထံၣ်ဘၣ်လၢ ပမၤစၢၤပဖိသ့ၣ်တဖၣ် ဒ်သိးကတုၤလၢအဖီတၢၣ်အဂီၢ်န့ၣ် ပသးခုဒိၣ်မးလီၤ.” မိၢ်ပၢ်တဖၣ် မ့ၢ်မၤစၢၤအဖိတဖၣ်လၢ ကပာ်လီၤဖီတၢၣ် လၢကမၤယွၤအတၢ်မၤ ဒီးမၤလၢပှဲၤအဖီတၢၣ်အဂီၢ်န့ၣ် မ့ၢ်တၢ်လၢအဘၣ် ကစၢ်ယွၤအသးလီၤ.
အိၣ်ဒီးတၢ်သးဒူလၢ တၢ်အိၣ်ဖှိၣ်အပူၤ
၁၇. လၢတၢ်အိၣ်ဖှိၣ်အပူၤန့ၣ် ပလိၣ်ဘၣ် တၢ်သူၣ်ဒူသးဒူဒ်လဲၣ် ဟ့ၣ်တၢ်အဒိတက့ၢ်.
၁၇ လၢတၢ်အိၣ်ဖှိၣ်ပူၤန့ၣ် ပလိၣ်ဘၣ် တၢ်သူၣ်ဒူသးဒူစ့ၢ်ကီးလီၤ. အဒိ, တၢ်အိၣ်ဖှိၣ်သးပှၢ်တဖၣ် ကလိၣ်ဘၣ်တၢ်သးဒူဖဲ ကဘၣ်သိၣ်က့ၤသီက့ၤ ဒီပုၢ်ဝဲၢ်တဂၤလၢ အမၤတၢ်ကမၣ်ဖးဒိၣ် မ့တမ့ၢ် ဖဲအလဲၤမၤစၢၤဝဲ ဒီပုၢ်ဝဲၢ်လၢအဘၣ်ထီၣ် တၢ်ဆါဟံၣ် ဒီးကဘၣ်မၤတၢ်ဆၢတဲာ်လၢ အရ့ဒိၣ်အခါန့ၣ်လီၤ. ဒီးတၢ်အိၣ်ဖှိၣ်သးပှၢ်တနီၤနီၤ ဘၣ်လဲၤအိၣ်သကိးဝဲ ပှၤဃိာ်ဖိလၢ အအဲၣ်ဒိးမၤလိလံာ်စီဆှံ မ့တမ့ၢ် ဘၣ်လဲၤမၤဝဲတၢ်အိၣ်ဖှိၣ်ရိဖှိၣ်ဖဲန့ၣ်လီၤ. ဒီပုၢ်ဝဲၢ်မုၣ်လၢ အအိၣ်သဘျ့တဖၣ်စ့ၢ်ကီး အိၣ်ဒီးတၢ်ခွဲးတၢ်ယာ်လၢ ကပာ်ဖျါထီၣ် တၢ်သူၣ်ဒူသးဒူ ဒီးကမၤယဟိဝၤယွၤအတၢ်မၤန့ၣ်လီၤ. အဝဲသ့ၣ်မၤဝဲ ပှၤလဲၤလၢညါ, လဲၤသုးလီၢ်သုးကျဲလၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ, လီၢ်ကဝီၤ တၢ်သူၣ်ထီၣ်ဘှီထီၣ်ဝဲၤကျိၤ (Local Design/Construction program) ဒီးတီၣ်ထီၣ်လံာ်လၢ ကထီၣ်ပှၤစိာ်ဘီမုၢ် တၢ်သးခုကစီၣ်ဖိအကၠိအဂီၢ်လီၤ. ဒီးအဂၤတနီၤန့ၣ် ဘၣ်တၢ်ကွဲမုာ်အဝဲသ့ၣ်လၢ ကလဲၤထီၣ် ကံးလဧးကၠိန့ၣ်လီၤ.
၁၈. ဒီပုၢ်ဝဲၢ်မုၣ်သးပှၢ်တဖၣ် ပာ်ဖျါထီၣ် တၢ်သူၣ်ဒူသးဒူ ကသ့ဒ်လဲၣ်.
၁၈ ပအဲၣ်ပဒီပုၢ်ဝဲၢ်မုၣ်လၢ အသးပှၢ်တဖၣ်ဒိၣ်မး ဒီးအဝဲသ့ၣ်အိၣ်လၢ ပတၢ်အိၣ်ဖှိၣ်အပူၤအဃိ ပသးခုဒိၣ်မးလီၤ. အဝဲသ့ၣ်တနီၤနီၤန့ၣ် မၤယွၤအတၢ်မၤတန့ၢ်ဒ်သိး လၢညါလၢၤဘၣ်. ဘၣ်ဆၣ် အဝဲသ့ၣ်ပာ်ဖျါထီၣ်တၢ်သူၣ်ဒူသးဒူ ဒီးဆဲးမၤဒံးကစၢ်ယွၤအတၢ်မၤလီၤ. (ဖး တံတူး ၂:၃-၅ တက့ၢ်.) အဒိ, တၢ်အိၣ်ဖှိၣ်သးပှၢ် မ့ၢ်မၢဒီပုၢ်ဝဲၢ်မုၣ်သးပှၢ်တဂၤ လၢကတဲဘၣ် ဒီပုၢ်ဝဲၢ်မုၣ်သးစၢ်တဂၤ လၢကဘၣ်ကူတၢ်သိးတၢ်ဘံၣ်ဘံၣ်ဘၢဘၢ ဒီးသညူးသပှၢ်န့ၣ် အဝဲကလိၣ်ဘၣ် တၢ်သူၣ်ဒူသးဒူစ့ၢ်ကီးလီၤ. တမ့ၢ်လၢဒီပုၢ်ဝဲၢ်မုၣ်သးပှၢ်အံၤ ကအ့န့ ဒီပုၢ်ဝဲၢ်မုၣ်သးစၢ်အံၤဘၣ် လၢတၢ်န့ၣ်အလီၢ် အဝဲကပာ်ဖျါထီၣ် တၢ်အဲၣ်တၢ်ကွံ ဒီးကတဲနၢ်ပၢၢ်ဝဲလၢ အဝဲတၢ်ကူတၢ်သိးန့ၣ် ကဲဘျုး မ့တမ့ၢ် မၤဘၣ်ဒိပှၤဂၤသ့ဒ်လဲၣ်န့ၣ်လီၤ. (၁ တံၤမသ့း ၂:၉, ၁၀) ဒီပုၢ်ဝဲၢ်မုၣ်သးပှၢ်တဖၣ် မ့ၢ်ပာ်ဖျါထီၣ် တၢ်အဲၣ်တၢ်ကွံလၢကျဲဒ်အံၤန့ၣ် ကဲထီၣ်တၢ်ဂံၢ်တၢ်ဘါလၢ တၢ်အိၣ်ဖှိၣ်အဂီၢ်သ့ဝဲလီၤ.
၁၉. (က) ဒီပုၢ်ဝဲၢ်ခွါလၢ အဒိးဘျၢထံဝံၤတဂၤ အိၣ်ဒီးတၢ်သူၣ်ဒူသးဒူကသ့ဒ်လဲၣ်. (ခ) ဒ်သိးဒီပုၢ်ဝဲၢ်ခွါတဖၣ် ကအိၣ်ဒီးတၢ်သူၣ်ဒူသးဒူအဂီၢ် ဖံလံးပံၤ ၂:၁၃ ဒီး ၄:၁၃ မၤစၢၤအဝဲသ့ၣ် ကသ့ဒ်လဲၣ်.
၁၉ ဒီပုၢ်ဝဲၢ်ခွါတဂၤလၢ အဒိးဘျၢထံဝံန့ၣ် အဝဲလိၣ်ဘၣ် တၢ်သူၣ်ဒူသးဒူ ဒီးကဘၣ်မၤတၢ်လီၤ. ဖဲအဝဲသ့ၣ် အသးအိၣ်မၤတၢ်ဒ် တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်တဖၣ်အခါ ကဲဘျုးလၢတၢ်အိၣ်ဖှိၣ်အဂီၢ်ဒိၣ်မးလီၤ. (၁ တံၤမသ့း ၃:၁) ဘၣ်ဆၣ် ပှၤတနီၤနီၤ လိၣ်ဘၣ်တၢ်သူၣ်ဒူသးဒူ ဒ်သိးကမၤဝဲဒ်န့ၣ်အဂီၢ်လီၤ. ဘၣ်သ့ၣ်သ့ၣ် လၢအပူၤကွံာ်န့ၣ် ဒီပုၢ်ဝဲၢ်ခွါတဂၤ ကမၤဘၣ်တၢ်ကမၣ်အဃိ ခဲအံၤကတူၢ်ဘၣ်ဝဲလၢ အဝဲတကြၢးဒီး တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်အတၢ်မၤဘၣ်. ဒီးတနီၤနီၤန့ၣ် ကတူၢ်ဘၣ်ဝဲလၢ အဝဲသ့ၣ်အတၢ်သ့တၢ်ဘၣ် တအိၣ်ဘၣ်န့ၣ်လီၤ. နမ့ၢ်တူၢ်ဘၣ်ဒ်န့ၣ်န့ၣ် ယဟိဝၤယွၤ ဟ့ၣ်နၤတၢ်သူၣ်ဒူသးဒူလၢ နလိၣ်ဘၣ်တဖၣ်သ့ဝဲလီၤ. (ဖး ဖံလံးပံၤ ၂:၁၃; ၄:၁၃ တက့ၢ်.) သ့ၣ်နီၣ်ထီၣ် စီၤမိၤၡ့အတၢ်လဲၤခီဖျိတက့ၢ်. အဝဲစ့ၢ်ကီး တူၢ်ဘၣ်ဝဲလၢတအိၣ်ဒီးတၢ်သ့တၢ်ဘၣ်လၢ ကမၤတၢ်လၢ ယဟိဝၤယွၤမၢအီၤန့ၣ်ဘၣ်. (၂ မိၤၡ့ ၃:၁၁) ဘၣ်ဆၣ် ယဟိဝၤယွၤမၤစၢၤအီၤ ဒ်သိးကအိၣ်ဒီးတၢ်သူၣ်ဒူသးဒူ ဒီးကမၤလၢပှဲၤအမူဒါအဂီၢ်လီၤ. ဒ်သိးဒီပုၢ်ဝဲၢ်လၢအဒိးဘျၢထံဝံၤတဂၤ ကအိၣ်ဒီးတၢ်သူၣ်ဒူသးဒူအဂီၢ် အဝဲကဘၣ်မၤဝဲတၢ်မနုၤလဲၣ်. အဝဲကဘၣ် ဃ့ဘါထုကဖၣ်လၢ ယဟိဝၤယွၤအအိၣ် ဒီးဖးလံာ်စီဆှံကိးနံၤဒဲးလီၤ. တကးဒံးဘၣ် အဝဲဆိကမိၣ်ထံဝဲ ပှၤလၢလံာ်စီဆှံ ပာ်ဖျါထီၣ်ဝဲလၢအအိၣ်ဒီး တၢ်သူၣ်ဒူသးဒူတဖၣ် အဂ့ၢ်သ့ဝဲလီၤ. ဒီးလၢတၢ်ဆီၣ်လီၤသးအပူၤ အဝဲဃ့ဝဲတၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ်အအိၣ် ဒ်သိးကသိၣ်လိအီၤဒီး ကမၤစၢၤ တၢ်အိၣ်ဖှိၣ်အတၢ်ဖံးတၢ်မၤ တမံၤဂ့ၤတမံၤဂ့ၤလၢ အမၤဝဲသ့န့ၣ်လီၤ. ပဟ့ၣ်ဂံၢ်ဟ့ၣ်ဘါကဒီး သုဝဲဒီပုၢ်ဝဲၢ်လၢအဒိးဘျၢထံဝံၤတဖၣ် လၢသုကအိၣ်ဒီးတၢ်သူၣ်ဒူသးဒူ ဒီးဂုာ်ကျဲးစၢးမၤတၢ်ဆူၣ်ဆူၣ်လၢ တၢ်အိၣ်ဖှိၣ်အဂီၢ်န့ၣ်လီၤ.
“ကစၢ်ယွၤ . . . ကအိၣ်ဒီးနၤ”
၂၀, ၂၁. (က) စီၤဒၤဝံး အၢၣ်လီၤစီၤၡလိၤမိၤဒ်လဲၣ်. (ခ) ပနာ်န့ၢ်သ့တၢ်မနုၤလဲၣ်.
၂၀ စီၤဒၤဝံးဒုးသ့ၣ်နီၣ်ထီၣ် စီၤပၤၡလိၤမိၤလၢ ယဟိဝၤယွၤကအိၣ်ဒီးအီၤတုၤလၢ အဝဲသူၣ်ထီၣ်တၢ်လုၢ်ဟံၣ်ဝံၤတစုလီၤ. (၁ ကွဲးနီၣ်တၢ် ၂၈:၂၀) စီၤၡလိၤမိၤ ကဆိကမိၣ်ထံဝဲ အပၢ်အတၢ်ကတိၤလီၤ. စီၤၡလိၤမိၤအသးစၢ် ဒီးအတၢ်လဲၤခီဖျိစှၤ သနာ်က့အဂုာ်ကျဲးစၢးမၤလၢပှဲၤအမူဒါလီၤ. အဝဲပာ်ဖျါထီၣ် အတၢ်သူၣ်ဒူသးဒူ ဒီးလၢယဟိဝၤယွၤအတၢ်မၤစၢၤအဃိ အဝဲသူၣ်ထီၣ်တၢ်လုၢ်ဟံၣ်လၢ အလီၤဘီလီၤမုၢ်အံၤဝံၤဝဲဖဲ ၇ နံၣ်တခီ အတီၢ်ပူၤန့ၣ်လီၤ.
၂၁ ဒ်ယဟိဝၤယွၤ မၤစၢၤစီၤၡလိၤမိၤအသိး အဝဲကမၤစၢၤစ့ၢ်ကီးပှၤ ဒ်သိးပကအိၣ်ဒီး တၢ်သူၣ်ဒူသးဒူ ဒီးမၤဝံၤပမူဒါလၢ ပဟံၣ်ဖိဃိဖိ ဒီးတၢ်အိၣ်ဖှိၣ်အပူၤအဂီၢ်လီၤ. (ယၡါယၤ ၄၁:၁၀, ၁၃) ပမ့ၢ်မၤယဟိဝၤယွၤအတၢ်မၤလၢ တၢ်သူၣ်ဒူသးဒူအပူၤန့ၣ် ပနာ်သ့သပှၢ်ကတၢၢ်လၢ အဝဲကဆိၣ်ဂ့ၤပှၤ ခဲအံၤဒီးခါဆူညါစ့ၢ်ကီးလီၤ. လၢတၢ်န့ၣ်အဃိ “ပာ်ဆူၣ်နသး ဒီးတံးတဟီၣ်တက့ၢ်. ဒီးမၤတၢ်တက့ၢ်.”
^ လံာ်အဆၢ. 12 ဒ်သိးနကပာ်လီၤဖီတၢၣ်လၢ ကမၤယွၤအတၢ်မၤအဂီၢ် နဃုထံၣ်န့ၢ်တၢ်ဟ့ၣ်ကူၣ်လၢအမ့ၢ် “Use Spiritual Goals to Glorify Your Creator” လၢ Watchtower of July 15, 2004 အပူၤသ့ဝဲလီၤ.
